【常威近代史】(二百五十九回)
袁世凱平反系列
天祐香港。
最近思緒混亂,上集應該要講上海租界問題,今日補充返,講埋租界問題,先去敘述孫文創立中華革命黨,終極翻盤。
上海當時嘅租界,主要係講公共租界,喺中國國內「國中之國」,完全自治,係一個特別行政區,畀我嘅感覺係一個百份百嘅「自由城邦」,租界之內嘅法律貿易管治等制度,完全行歐洲模式。大部份人理解,公共租界係由英國人話事,但真實情況並非完全如此,去到20世紀,當時嘅上海租界你可以理解成係一個聯合國,一個小型歐洲,唔同國家嘅人出入求財、務求發展機會同貿易機遇,萬眾一心只搞經濟不談政治,欣欣向榮,去到20世紀初期,上海租界甚至喺地球上數一數二嘅金融中心股票市場,亦係整個遠東財富嘅集中地。
滄海桑田,上海同香港都係從1842年《南京條約》簽訂嗰日開始發展,1840年嘅香港只有區區2000人口,同樣1840年嘅上海,亦只不過係長江出海口嘅一條小漁村。冇人能夠想像,經過半個世紀高速發展,上海同香港會成為遠東主要金融貿易中心。所有一切,托賴冇中國人玩,如果有中國人叉隻腳埋去搞局,應該又會玩到一pat屎,你可以話我崇洋媚外,但事實上的確如此。你叫隻馬騮去寫博士論文,佢應該都係無能為力。推根究底,係能力問題。
上海唔係好似香港一樣,從來冇割讓出去,屬於中國(清帝國或中華民國)領土,但係由1842年開始,通過各國領事頒佈一系列嘅「土地章程」手段,上海租界呢個「自由城邦」逐漸拓展成形,好多時候係先做咗改變,先至畀北京政府正式批准,而北京亦不得不作為既定事實而接受。理論上,係對中國土地主權嘅一種「軟性侵略」,呢個係不得不承認嘅事實。常用嘅手法係,逐步逐步嚟,逐小逐小咁蠶食你,起初係建造租界外嘅道路,然後係鋪設自來水管同埋電力,最後就係實施徵稅同埋行使警察嘅權力。
軟性侵略你,逐小逐小蠶食你,等你唔覺唔覺慢慢流失血液,係聰明嘅統戰做法。一次過奪去你所有,往往會引起好大嘅反作用力。用50年時間半個世紀慢慢食埋你,係正常嘅設計,係聰明人嘅選擇,但有人太心急,想嗱嗱臨吞曬,終於引爆炸彈。
當時管理租界嘅行政機搆,叫上海公共租界工部局(Shanghai Municipal Council,簡稱SMC),起初SMC祇不過係租界納稅人會議嘅執行機構,但它逐漸擴大權限,最後取得租界行政管理嘅具體權力,其中包括向租界內中外居民徵稅同埋維持治安嘅警察權力,順帶一提,工部局唔可以徵收「土地稅」同「關稅」,因為土地仍然屬於中國,依兩項稅款要由中國自己徵收番,但除此以外,SMC差唔多完全話曬事,我哋睇CCTVB民初劇,租界內嘅「巡捕房」,即差館警局,就係由SMC直接管轄(唔關中國政府事)。
20世紀初期,SMC嘅9個成員(議員),係由租界內嘅外國有錢人用選票選出,選民只係佔咗所有外國居民大概10%,華人與狗當然冇份,真真正正小圈子選舉。而且SMC透明度非常低,仲成日唔開會,基本上只係一個核心小圈子俱樂部,主要係英國人,代表租界內工商界嘅利益。而當時,公共租界嘅市政僱員絕大部分係英國人,20世紀初期僱員總人數為 1076人,其中有965人係英國人,人數並不包括巡捕房中嘅792個印度警察,事實上,當時維持租界治安嘅係英藉印度人(錫克教徒,所以包頭),冇中國人,民初劇裏面巡捕房有中國探長,純粹係我哋中國人自己打飛機嘅想像。
SMC呢個租界裡嘅最高行政機關,要到1928年,蔣介石北伐成功佔領上海之後,先有中國人可以參加成為代表。SMC嘅行政權力,亦冇你想像中咁大,SMC經常會同上海各國領事館同北京外交使團發生衝突同磨擦,當然牽涉嘅,多數係利益分佈嘅問題。
外國人係租界內嘅生活,完全歐化,佢哋日常生活嘅必需品,差唔多都係由歐洲直接入口,外國人響租界所過嘅生活,同響歐洲可以講完全冇分別,唯一嘅分別就係更正斗!同大家嘅印象非常相似,租界同租界外完全係兩個世界,租界之內是繁華先進歌舞昇平,而租界之外就係貧窮落後極權恐怖。兩者代表住貧富懸殊,階級壁壘分明。
由於租界享有領事管轄權,喺20世紀初期前後,成為咗唔少異見者同革命者嘅避難所,從梁啟超康有為、到孫文黃興,甚至後來的共產黨人,都多次利用租界逃避執政者嘅追捕通緝、或者響租界之內策動叛亂、周轉現金、買賣軍火或經由租界港口著草他鄉。
#常威 #斷送共和關袁世凱蛋牛治 #袁世凱 #民國歷史
【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ
【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ
【常威近代史】第一部《大清亡國關慈禧蛋牛治》實體購買
https://www.382now.com/product?id=87
【常威近代史】第二部《中國一百年前的第一次改革開放》實體購買
https://www.382now.com/product?id=151