大清亡國關慈禧蛋牛治 2

【常公子歷史頻道361回：替大軍閥平反系列之 建黨偉業】

⛎中國共產黨響1921年成立，到今日2021年，剛剛係100週年黨慶，世界上唔係太多政黨有長達100年歷史，所以講係一個歷史性里程碑，事實上，1949年建國至今，中華人民共和國由一個差唔多講係一無所有、貧窮落後嘅第三世界國家，到今日搖身一變，成為世界兩大強權之一，足以同美國平分天下，甚至會係短時間內經濟規模超越美國，毫無疑問係一個偉大嘅歷史成就。有句說話叫做「沒有共產黨就沒有新中國」，其實如果凡事只睇結果，呢句說話絕對正確。

♉香港最近風雨飄搖，對反對勢力嘅殲滅戰繼續打到底，毫無手軟跡象，甚至有人講overkill咗，不過亦都常態，戰爭一旦開打，就必須分出勝負，既然摸通對手無料到，就要得到徹底勝利亦要取得最大嘅勝利果實，老實講係無可厚非。50年不變，到咗2047終需要變，現在祇不過將變革嘅時間提早20零年，我早講過，呢個世界嘅嘢，開天殺價落地還錢，之前講好有50年俾你玩，玩到一半左右收番，結算其實有賺了。可能呢個道理好難明白，但係畢竟係人之常情，世道往往如此。

♑正如有人叫你買一隻股票投資，講明每股可以賺100蚊，而你好相信係能夠賺到100蚊，一心諗住要賺足100蚊先走貨，咁通常就會出事，其實賺到50蚊都算唔錯，好多時候唔駛倒輸已經好好。人世間嘅事情，無論現實上或情感上，打個五折收貨其實好正常，吓吓收足，邊有咁大隻蛤乸隨街跳？反正所有事情（股票買賣）都零和遊戲，有人賺錢即係代表有人蝕錢，從前你賺盡紅利，今日俾人食返轉頭，事實上又係零和遊戲嘅一種。

♑有句說話叫生得逢時，timing好重要，timing好就能夠食盡紅利，但係世界上邊有咁多巧合呢？正如每期六合彩只會有一個或幾個人中頭獎，你有次中咗頭獎，就同人講話六合彩好易玩，easy money嚟嘅，我諗聽嗰個會覺得你痴鳩線。我想分享一個真人真事，話說我認識（如是我聞）有一個人，佢真係中咗六合彩頭獎，結果佢認為中六合彩真係好容易中，於是之後佢每次六合彩會用幾萬蚊甚至十幾萬大包圍投注，但原來命運只係容許佢中一次六合彩頭獎，短短幾年之間，佢將中六合彩頭獎嘅錢全部輸曬，最後仲要輸凸，間鋪仔冇埋，聽講仲妻離子散。

♑【常威近代史】第七部《最九衰的大軍閥時代》Round 2電子書上架（條download link在下面），請大家課金支持我一直走落去，直至劉少奇骨灰到達北京王光美手上…

✅https://youtu.be/ZJeQhsmysyE

常公子最新小說作品【Master】https://play.google.com/store/books/details?id=5FIfEAAAQBAJ

Kindle版下載連結
https://www.amazon.com/dp/B08X4DK2FP

【常威近代史】（五百零六回）
農村問題

雖然中共中央堅持城市暴動策略力求翻盤，但實際情況係，各大城市嘅工人階級武裝，已經差不多被國民黨以暴力完全瓦解，由城市轉入農村，亦係沒有選擇中嘅選擇，中共特別會議召開之時，毛澤東人在江西井岡山，帶位幾百個意志堅定嘅紅軍（同志，Comrades），正拼命為保留共產主義夢想一點血脈而奮鬥，黨中央要處罰佢路線不正確，但山高皇帝遠，當特派專員未去到江西井崗山根據地傳達中央指示之前，毛澤東仍然繼續保有政治權力。

今日嘅井岡山係革命聖地旅遊聖地，但係當日毛澤東所到嘅井崗山，絕對係與世隔絕嘅窮鄉僻壤，其貧窮程度，絕對唔係我哋可以想像得到，惡貫滿盈滿清政權雖然倒臺，辛亥革命發生，但係中華民國嘅成立以來十九幾年，並冇改變到龐大農村人口嘅生活水平，當其時農民佔國家總人口九成以上，但佢哋嘅生活水平、佢哋所享用嘅物質條件、甚至佢哋嘅生老病死，其實係冇人注意。用一個好殘忍嘅比喻，如果你屋企樓下有隻流浪（唐）狗，你日日見到佢老母走嚟走去，有一日佢死9咗，相信你亦唔會注意一眼，最多心裡只會講：「屌，條屍邊撚個執呀？」

將當時嘅農民比喻做牲畜，其實一啲唔需要覺得奇怪，正如打越戰嘅時候，美軍嚟到越南，都當越南人（尤其是北越）並唔係人類（係Chin），今日香港，亦有唔少家庭當融入家中嘅菲律賓或印尼傭工唔係人類去看侍，叫佢哋訓響厠所或34度夏天叫人訓入閉封嘅櫃裡面（得把風扇仔），咁叫Racism。

當時嘅中華民國立立亂，城市嘅問題都未好好解決，農村嘅問題根本冇人會考慮，上帝隻手好短，伸唔到咁遠。毛澤東希望發動農民成為革命主力，其實係相當高瞻遠矚，用今日嘅語言叫唔離地。但當時黨中央以文人知識份子為首，黨嘅最高負責人喺一位28歲、精通俄語嘅文學家同詩人瞿秋白，正統馬克思主義理論中，馬克思認為農民並唔係可以信任革命夥伴，因為佢哋嘅知識文化水平低，悟性唔夠，邊度可以理解得到資本主義世界嘅萬惡本質呢？馬克思並沒有錯，農民的確係唔可能理解馬克思主義嘅（哲學）內容，總之食得溫飽就可以，理鳩你乜春主義！

20世紀初期嘅中國，城市同農村係兩個平行世界，農民造反，匪盜橫行、以及其他形式嘅社會病態已經成為農業地區特有流行病，總之唔好傳染到城市就OK，你有你死，我有我留喺城市屋企。不過，去到20年代末期，由於中國現代化嘅過程越嚟越快，農民亦都正在學會同佢哋原本生活迴然不同嘅生活方式，主要係透過商業活動同埋商品流動，廣大農民終於知道咗村莊以外紙醉金迷嘅城市世界，去到30年代商業活動亦都急速擴大。

【常公子歷史頻道362回：替大軍閥平反系列之 工人運動】

⛎萬物離散，除卻科學定律之外，基本上毫無秩序可言， 人類的出現，就是利用意識運作和工匠技巧，把離散的萬物利用歸納法組織出「秩序」來，藉著建立秩序來保障自己和增強求生能力，例如用水去滅火，用蔽體抵禦風雨，利用遷徙逃避自然災禍，或藉著耕種和殺生增加糧食供應等等，所做的一切，無非都是為了求生，為了繁衍下一代，擴大族群數目。

♐建立秩序，為了方便管理，所有的管理技巧必須重秩序出發，將秩序加諸於每個個體身上，就能夠產生管理，從而建立起社會結構和制度，所做的一切，無非都是為了求生，為了繁衍下一代，擴大族群數目。而將秩序加諸於個體身上，就形成了權力。舉個例，在一個原始部落裡，部落族主認為A君耕田比狩獵優秀，當然優秀與否是部落共主的個人主觀意願，於是族主要求A君去耕田，但A君心裡不同意，他仍然喜歡打獵多於耕田，於是族主說，如果你不去耕田，就把你逐出部落自生自滅，於是A君祇有忍氣吞聲，由一個獵人變成一個農夫生存。族主所運用的東西叫權力，用權力把秩序賦予A君身上，付之實踐。

♈上述的白痴例子，可以產生兩種情況：第一，A君是心悅誠服聽從族主指示，因為他感覺族主比自己有智慧和具有更佳的判斷力，他不去違抗命令是因為他真心相信（believe in），他認為秩序本身是宗教性的、是神喻式的；第二種情況，是他不敢違抗命令完全出於恐懼，害怕被懲罰、同時害怕承擔後果，他從來沒有相信過族主，衹是相信族主手上掌握的權力能夠毀掉他一切。兩種情況的後果都是一樣，A軍放棄了自己的意願，由獵人變成了農夫。

♈情況一，需要意識形態操控，令人真心相信履行秩序，屬於優質管理範疇；或者比較簡單，只需使用暴力作為手段便成。不過世事往往被人類複雜化，有時候用最簡的方法才是最有效，你不得不承認呢個係事實，亦係真理。更何況如果將「製造恐懼」納入為意識形態操控手段之一，無可厚非之事，因為現象亦是如此。

♑【常威近代史】第七部《最九衰的大軍閥時代》Round 2電子書上架（條download link在下面），請大家課金支持我一直走落去，直至劉少奇骨灰到達北京王光美手上…

✅https://youtu.be/nC8NnjjsDUs

【常威近代史】（五百零七回）
史太林完勝托洛斯基理所當然

1927年11月，中共中央繼續依照第三國際指示，制訂城市暴動策略，一個月後，發動廣州起義徹底失敗，死傷進一步加劇。無可否認，響1927年，中共所行嘅路線係完全依從第三國際嘅指示，自主性絕對唔強。「聯俄容共」政策係三國際嘅最高指示，當時第三國際對中國革命觀點係：「由於中國的造反在性質上是資產階級的，因此中國共產黨就必須放棄它的社會主義理想而與國民黨資產階級結盟」，國共合作期間，史太林高度讚揚蔣Sir嘅貢獻，認為佢係共產主義者嘅好朋友及好戰友，不過用任何角度嚟睇，史太林絕對係大錯特錯。

當時先知托洛斯基就對中國革命唔樂觀，佢講過「中國革命的資產階級階段和社會主義階段是合二為一的，猶如它們在俄國是合二為一的那樣，工人階級自始至終都是革命的主要動力，或是革命作為一場無產階級運動而迎來無產階級專政，或是革命完全失敗。」托洛斯基認為，中共投向國民黨係一個錯誤嘅選擇。由此可見，史太林係實用主義者，而托洛斯基則係理想主義者，兩人註定水火不相容。

叉開一筆，事實上，去到1927年，響紅都莫斯科，自從列寧死後，史太林同托洛斯基嘅政治鬥爭已經進入最後階段，托洛斯基眾叛親離，響政治局最高領導人六頭馬車中，被其他同志排擠孤立，當時俄國共產黨（布爾什維克）主要六名領導人，分別為托洛斯基（1879-1940）、布哈林（1888-1938）、史太林（1878-1953）、季諾維也夫（1883-1936）、加米涅夫（1883-1936）、李可夫（1881-1938），至1927年10月，因為托洛斯基極力反對大權在握史太林嘅獨裁政策，繼續主張世界革命而被開除出黨，之後更加流亡海外。當然擁護史太林而排擠托洛斯基嘅同志們，最後亦難逃史太林30年代所發動嘅大清洗行動而不得善終，大家睇睇上述人等嘅生卒年份，就可以一清二楚。

史太林同托洛斯基出身不同，史太林係行動革命家，出生入死係等閒事，而托洛斯基係理論革命家，才華蓋世筆鋒銳利，學養方面，兩人嘅距離係以光年計算，托洛斯基同列寧一直堅持世界革命路線，佢哋要解放嘅係全世界嘅無產階級，並非俄國一國嘅無產階級，行動以意識形態為先；而史太林則係一個100%實用主義者（或者我稱呼為馬基維利主義者），為求達到目的，可以不擇手段，意識形態亦都可以隨時改變，隨時轉換立場，大家睇佢對待中國革命「聯俄容共」政策立場亦都可以一清二楚。由於兩人性格相異，因此喺赤裸裸嘅權力鬥爭中，史太林完勝托洛斯基亦係理所當然，又當然，亦同托洛斯基本身係猶太人身份有關。

後來嘅毛澤東，其實係史太林一個翻版，不過歷史話比我哋知，從來堅持己見發夢嘅人通常都係失敗者，反而作為一條變色龍，隨時隨地改變立場應對時勢，最後先可以成功（或存活）。日常生活中，面對殘酷現實，堅持己見固守立場，當然無比高尚亦非常值得尊重，但係喺實際操作上，通常唔係一個理想選擇，除非你將道德光環放響生命第一位，不過，呢個係個人選擇嘅問題，畢竟每個人對唔同事物有唔同嘅價值觀，好難一概而論。

1927年11月10號，蔣Sir自日本返回上海，隨即致電汪精衛前赴上海，商談黨務。11月13號，中共東江特委組織成立陸豐縣蘇維埃政府，11月18號海豐縣蘇維埃政府也宣佈成立，海陸豐嘅蘇維埃，中國第一個蘇維埃，主理人當然就係我鄉里彭湃（1896-1929）。同日，寧漢雙方下令停戰。

11月16號，蔣Sir響上海演講，聲稱與汪精衛、胡漢文真誠合作，修補國民黨大分裂，會後蔣介石遇刺，當然冇事。玩政治同玩黑社會一樣，尤其是玩到最高層次，其實係生死遊戲，少啲膽汁都唔可以玩，如果你怕死，亦最好唔好玩。

11月17號，張發奎（1896-1980）部第四軍軍長黃琪翔（1898-1970）、第五軍軍長李福林（大埔康樂園始創人，1872-1952）、新編第二師師長薛岳（1896-1998，認為係「抗戰中殲滅日軍最多的中國將領」，因此日軍又稱其為「薛老虎」）等以「護黨救國」為號召，響廣州發動針對李濟深（1885-1959）嘅軍事政變。

汪精衛9月下野後，10月28號抵達廣州，希望拉攏喺廣州嘅國民黨中央委員成立中央，張發奎亦因為不滿南京政府同蔣Sir，率領部隊返回廣東，宣稱「擁汪護黨」，但為咗爭奪廣東地盤，張發奎同註駐粵嘅李濟深等新桂系人物發生尖銳嘅利益衝突。本月15號，汪精衛應蔣Sir邀請，同李濟深同赴上海，參加國民黨二屆四中全會預備會，張發奎趁機發難，發動軍事政變，率兵佔領市內各個要點，仲搜查咗李濟深同黃紹竑（與李宗仁、白崇禧號稱新桂系三大巨頭，1895-1966）住宅，黃紹竑一早收到風，逃到大英帝國殖民地香港避難。

11月19號，張發奎響廣州召集軍事會議，成立臨時軍委會（即係臨時軍政府），自任代理主席，隨後派李福林、黃琪翔揮兵沿西江進至梧州，逼桂系軍隊全面退出廣東。廣州依個南方沿海第一貿易大城市，自從辛亥革命之後，究竟經歷過幾多次政權易手？我真係冇辦法數到鳥。

#常威💀 #蔣介石平反系列 #黃金十年 #民國歷史

嘩 呢個post成年冇入過嚟

【常威近代史】（五百零八回）
浚浚柒特務時代開始

1927年11月20號，中央研究院籌備會及各專門委員會喺北京成立大會，通過中央研究院組織條例，並推舉中國偉人蔡元培兼任院長。中央研究院，簡稱中研院，為中華民國學術研究最高殿堂，總統府直屬機關。其任務包括人文及科學研究，指導、聯絡及獎勵學術研究，培養高級學術研究人才，並兼有科學與人文之研究。當然中央研究院本身亦係一個官僚機構，亦有維穩作用，畢竟所謂big mouth知識份子都係麻煩友，能夠收編就最好。但喺中華民族發展學術方面，中央研究院一直擔任著重要嘅角色。

同日，南京各界婦女二千餘人舉辦聯歡大會，通過廢除一夫多妻制、擴大廢娼運動、廢除蓄婢制度，女權運動昇溫，即係當時世界的大潮流，如果你問我，共產主義到頭來有冇解放到全世界嘅無產階級？答案應該係冇，但係解放女權，就應該係有。

兩日後，11月22號，發生咗一單叫做「南京血案」，事源南京各界喺召開慶祝討伐唐生智勝利大會後舉行遊行，突然被軍警開槍掃射，令到3人死亡，75人受傷。呢單嘢相當弔詭，其實又係由下野嘅蔣Sir一手策劃，為鋪排佢重新上臺執政。11月10號蔣Sir由日本返抵上海，立刻指示遙控親信CC系陳果夫（1892-1951）把持嘅國民黨中央黨務學校喺南京製造事端，公開提出打倒特別委員會、打到西山會議派、並發動民眾遊行。今日慘案發生之前，蔣Sir一方面煽動學生遊行，一方面密令南京軍警開槍鎮壓，然後一舉嫁禍畀山西會議派。

慘案發生之後，南京市各團體組織後援會，要求政府懲辦兇手，西山會議派頓成為眾矢之的，多次發表聲明唔關自己事，但就冇濟於事。國民政府主席譚延闓亦發表聲明，指出「此事發動，由上海有人主持，實屬黨內之爭」，西山會議派遭此打擊，食正隻大死貓，大失民心，從此一蹶不振，特別委員會亦岌岌可危。

由上述一事可以睇出，蔣Sir玩政治鬥爭，屬於超級高手範疇，由佢出現之後，三番四次打擊黨內自己友，主要競爭對手汪精衛胡漢文不在話下，打完左派共產黨又要打右派山西派，理鳩你左定右，總之凡與我蔣Sir為敵或不妥我者，統統沒有好收場，對付自己人出賣朋友過橋抽板，絕對唔手軟，後嚟嘅毛澤東亦都一樣，佢哋似乎非常明白，好多嘢談判協商係冇用嘅，同你講咁多係把撚浪費時間，徹底消滅你，就一了百了，或者打到你殘，打到你臣服自己，打到你變成一條忠誠的狗，咁就perfect池。大家千祈唔好笑，從來與政治鬥爭中，你死我活係金科玉律。

由於政治鬥爭非常嚴酷，所以參與政治之前，首先要秤吓自己有咩斤兩同背景？正如送你上殺戮戰場，俾把界刀你同俾把M16步槍你係有好大分別，你家底背景有幾厚先？你老竇係邊個先？你人脈有幾闊先？問一問自己，先好去參政丫，近十幾年，香港有唔少「素人」參政，冇財富冇背景冇人脈出身低下階層公屋仔公屋妹啱啱大學畢業，單憑一腔熱血加小小學識，就被人派上前線試水溫，到頭來成為犧牲品要坐監，亦都係有跡可尋。

✅本土唯一香港土話近代史文本

❤【常威近代史】第一部《大清亡國關慈禧蛋牛治》，全面開放，免費下載， #freedownload！

Free下載連結🔽

https://play.google.com/store/books/details?id=C3hjDwAAQBAJ

【常公子歷史頻道363回：替大軍閥平反系列之 哥前哥後三分險】

⛎俗語有云哥前哥後三分險，絕對係南方廣東人嘅生存智慧，今集內容，敘述孫中山寫信畀蔣介石，求佢唔好離開粵軍，信內孫文以「兄」嚟稱呼年紀比佢細嘅想介石，可以睇對孫文對蔣介石嘅重視程度，真係慧眼識英雄，一睇就睇得出佢係「XXX」，相人用人非常重要，尤其是搞business搞政治，一個好partner可以令大家飛黃騰達，遇人不淑就分分鐘會一齊攬炒仆街。

♐我自己都有類似經歷，出嚟行走江湖揾飯食，其實好拍檔一個難求，世界上每一個人都有缺點，每一個人都有優點，包括我自己在內，作為一個完人又大撚把錢，亦無需要出嚟響濁水潭中混。做生意撈野，必須有partner part住，做人嘅嘢，其實一係佢忍你，一係就你忍佢，忍唔到就拆夥囉，道理亦都相當簡單，最好嘅情況係好嚟好去，分手之後都可以做朋友，或者將來滄海桑田再有機會，又會走返埋一齊都未定，世事往往如此，將關係（包括男女關係）一刀切，未必一定係好事。

♈蔣介石係一個心高氣傲嘅人物，佢有多方面嘅卓越才能，以當時嘅人民質素計算，佢係最頂尖嘅0.001%人才，後來佢所做嘅一切，亦都充分證明佢嘅超卓能力；佢嘅宿命對手毛澤東亦如是，這兩個偉大嘅政治家性格上一個共通點，就係喜歡豪賭。當有人話畀你聽一隻股票（一隻Coin）明日會升，大部分人嘅選擇，係會用自己資本嘅某個百分比去搏一搏，希望單車變摩托，可能10%或20%，總之唔會輕易All ln， 但係毛澤東同蔣介石，就係嗰啲吓吓All In嗰類人，最後佢贏到咁X盡，老實講，係理所當然又實至名歸。

♉強者同普通人嘅分別，其實在於怕唔怕死一環，基本上一個人如果唔怕死就係乜嘢都唔怕（因為生命最大不了嘅亦都係death姐），我見過唔少發達嘅人，好多人都非常夠膽好沙pop，佢哋噉做普通人唔敢做嘅事，結果得到普通人唔能夠得到嘅財富，其實個世界又係相當公平。我忽然想起好多年前一套戲，應該係成龍嘅「A計畫」（或者唔係），裡面有一幕戲，成龍由七、八層樓高跳落嚟，純粹自由落體冇安全帶唔用替身親自上陣，中間只用幾個簷篷卸力，最後成功著陸地面沙地上，我至今難忘，仍然瀝瀝在目。後人話成龍點都好，佢起碼做過呢個超高難度危險動作——以後嘅香港演員亦冇人敢做相同嘅動作——就係咁簡單。你又話佢食老本，但係個老本唔係講笑呢。

♑【常威近代史】第七部《最九衰的大軍閥時代》Round 2電子書上架（條download link在下面），請大家課金支持我一直走落去，直至劉少奇骨灰到達北京王光美手上…

✅https://youtu.be/dWDr42p5rMc

幫手推

【常威近代史】（五百零九回）
蔣宋聯婚 八時恭候 九時入席

1927年12月1號，中共中央決定原中央軍事委員會縮小為軍事科，隸屬中央組織局，周恩來任組織局長兼管軍事工作，當時嘅周恩來祇有29歲，往後嘅半個世紀，佢一直操縱住中共嘅命運及發展，難怪有人認為，中國共產黨嘅偉大事業，周恩來嘅重要性比毛澤東有過之而無不及，事實上呢個亦都係真相，毛澤東係意識形態嘅代表人物，而周恩來則係一直響背後做實事嘅技術官僚，周恩來嘅影響力絕對不下於毛澤東，當毛澤東響1977年死後，亦係由沿用周恩來列寧式幹部官僚路線嘅鄧小平當道接管中國政局。

而且兩人嘅歷史評價上，周恩來一直領先毛澤東，相信到咗今時今日廿一世紀，你聽過有人話毛澤東係暴君殺人王，但係從來冇聽過周恩來係，寫書醜化毛澤東嘅有1000本，但寫臭周恩來嘅就寥寥可數，個比喻就係，巴塞隆拿輸波就一定係美斯踢得唔好，難道有其他可能嗎？作為一個政治家，周恩來根本係教材式嘅典範人物，如果想玩政治，又想玩得成功，你非要深刻認識周恩來生平同行事為人不可。

12月1號，喜事臨門，仍然下野嘅平民蔣Sir同宋美齡喺上海舉行盛大結婚典禮，宋美齡下嫁蔣Sir，成為蔣Sir第三任妻子，之前已經講過，蔣Sir追求宋美齡嘅過程一啲都唔簡單，不禁令人明白一個道理：念念不忘，必有迴響。做人要有恆心，鐵柱可以磨成針。

1922年，蔣介石喺上海孫文屋企結識宋美齡，當時孫文落難被陳炯明逐出廣州，蔣Sir出手接濟，兩人成為金蘭兄弟（本來都係黃紙兄弟），做媒人串連好事當然唔少得，據蔣Sir所講，佢初見宋美齡，就已經一見傾心，之後展開咗長達五年嘅追求過程，終於響1927年5月，蔣Sir向宋美齡求婚成功，9月底，蔣Sir東渡日本，同埋宋子文前赴神戶謁見宋母倪桂珍（宋嘉澍之妻，1869-1931），正式請求宋太夫人准其與宋美齡成婚，宋母倪桂珍答應，於是蔣Sir回歸大上海，11月28號響報章上刊登結婚啟事，今日正式大鑼大鼓結婚，蔣宋兩人先響宋家舉行基督教結婚儀式，繼而在大華飯店舉行典禮，星光熠熠，冠蓋雲集，亦係一件全國性嘅盛事，當然亦係一件重要嘅政治事件。

宋美齡出身於著名嘅宋氏家族，父親宋嘉澍係上海富豪，同美國及基督教關係密切，宋氏三姊妹都響美國留學，宋美齡更加自由喺美國長大並且接受正規美式教育，二家姐宋慶齡係孫中山夫人，大家姐宋藹齡嫁咗畀銀行孔祥熙，哥哥宋子文（1894-1971）喺國民黨要員，蔣Sir同宋美齡結婚，真正打造宋家皇朝蔣天下。如果你認為呢段婚姻冇任何政治色彩，你一係低能、一係就係盲嘅。

為咗迎娶鬼妹仔宋美齡，蔣Sir要同原配夫人同妾侍離婚，一生一世奉行一夫一妻制，更加要改信基督教（好有可能要學英文），呢段婚姻，更加將蔣Sir同美國勢力拉埋一齊，從此以後成為密不可分嘅堅實同盟。

國母孫文妻子、共產主義信徒宋慶齡對蔣Sir殺人清黨極為不滿，曾經公開指責蔣Sir背叛革命，但係自己個妹同佢結埋婚，咁左計右計都係一家人，蔣Sir可以講話係成功拆彈。加上呢段政治婚姻，令到蔣Sir同國父孫中山成為「兄弟」，聲名上就秤贏你「孫文承繼人汪精衛」。

世界上，「婚姻關係」非常重要，娶個有錢老婆，嫁個有錢老公，亦係最快捷上位飛黃騰達嘅手段（沒有之一），飛上枝頭變鳳凰，亦唔係一個人嘅事可能係一個家族嘅事，呢啲事相信唔使我多講，大家有眼見。愛情本來就係一種計算，婚姻亦都係一種交易，尤其是係上層建築同貴族世界中，姻親關係甚至係最重要嘅人脈紐帶，帶動財富權力嘅結合同催化。當然就一般平民百姓而言，婚姻就係婚姻，愛情就係愛情，童話故事就係童話故事，相信你都好少聽過童話故事會講錢，但響真實嘅現實世界中，事實上無嘢比錢更重要。

現實並非童話故事，亂世更加係刀光劍影，12月8號，奉直魯豫蘇皖等13省國民黨員朱濟武等1381人，向國民黨中央委員會提出恢復黨嘅正統，要求處分屠殺平民嘅蔣介石李濟深等人，當然大家都會明白，上述1381人，之後都會冇運行。

12月10號中共喺長沙發起暴動，立刻遭到軍警血腥鎮壓，100多人被捕遇害。真正嘅大事係第二日先發生，1927年12月11號，中國共產黨響廣州領導工人、農民及士兵舉行武裝起義，佔領咗廣州城。

廣州當時已經立立亂，11月中旬，中共廣東省委根據中央指示，決定利用粵桂混亂戰時機，發動廣州起義，並且成立由中共廣東省委書記張太雷（1898-1927）為委員長嘅軍事委員會， 由葉挺（1896-1946）、葉劍英（1897-1986）擔任軍隊總指揮，起義隊伍包括國民革命軍第四軍教導團、警衛團及廣州工人赤衛隊一共6000人。

12月11日淩晨3點30分，起義部隊向廣州各要點發起猛烈進攻，經過幾個小時激戰，佔領全廣州，隨後成立工農民主政府，蘇兆征（1885-1929）擔任主席，葉挺為工農紅軍總司令，並發布宣言，提出一切政權歸蘇維埃、打倒國民黨、打倒軍閥、實行八小時工作制、一切土地收歸國有、歸農民耕種等政綱……

#常威💀 #蔣介石平反系列 #黃金十年 #民國歷史

【常公子歷史頻道364回：替大軍閥平反系列之 驅張運動】

⛎香港政制改革已成定局，中央政府將一切推倒重來，完全開倒車，回復到97年前港英時代，未來嘅議會官守議員佔大多數比例，所謂行政長官同立法會議員皆由普選產生已成泡影，已經係無可爭辯嘅事實，相信短時間內，亦沒有重大變化出現，一切依從中央劇本發展，香港會變成另一個形態，至少喺政治方面，但係政治一定會影響經濟，兩者密不可分，活響香港嘅香港人，無論自願又好，不自願又好，將要面對一個大的變局。

♑變幻總是永恆，天下無不散之筵席，好多人認為之前嘅生活好好，之後又將會慘不忍睹，但我又想問，如果之前嘅世界真係咁好？又點會令到咁多人心生不滿呢？好多人喜歡用97年做一個歷史分界線，我作為一個橫跨97嘅過來人，我可以講俾大家知，97年前嘅一切並非想像中咁美好。

♈今日年青人話無機會向上流動？難道97年前，作為一個冇人冇物冇人脈嘅年青人，又真的可以輕易向上流動嗎？對此我深感懷疑。更何況，97年前嘅一切繁華興盛（如果真的有繁華興盛過的話），都係由於內地嘅因素所使然，港商於七、八、九十年代大舉北上設廠，賺盡兩地經濟規模差異產生嘅紅利，然後用賺返嚟嘅錢炒起香港樓市同股市，將香港打造成亞洲第一號金融城市，背後嘅backup就係成個中國內地。你承認也好，不承認也好，呢個始終係事實。

♏全新一個世界，全新一個社會模態，將會好快出現，盡力適應也好，逆來順受也好，我們始終要在這裡活下去，活得好一點，就是對自己的人生有所交待了。

♑【常威近代史】第七部《最九衰的大軍閥時代》Round 2電子書上架（條download link在下面），請大家課金支持我一直走落去，直至劉少奇骨灰到達北京王光美手上…

✅https://youtu.be/NgDjjnlC_Vk

🔥【常威近代史】第七部《最九衰的大軍閥時代》Round 2電子書上架，請大家支持！
https://play.google.com/store/books/details?id=lPgaEAAAQBAJ

amazon同步上架👍
https://www.amazon.com/dp/B08WCLGP4Y

【常威近代史】第六部《最九衰的大軍閥時代》Round 1

https://play.google.com/store/books/details?id=bCMNEAAAQBAJ

冇香港主要因為大陸經濟規模同制度差異，先撈到風生水起

如果中國係一個民主開放社會，香港都冇咁易撈得起

【常威近代史】（五百一拾回）
選擇錯誤達人：汪精衛

中共中央堅持城市暴動原則，發動廣州起義，由葉挺同葉劍英指揮嘅起義軍成功佔領廣州城，成立工農民主政府，但南京國民政府隨即下令張發圭（1896-1980）會同陳銘樞（1889-1965）、黃紹竑（1895-1966）部隊回師圍剿，12月13號，張發圭、薛岳（1896-1998）、李福林（大埔康樂園始創人，1872-1952）部隊突入廣州，雙方展開激烈巷戰，見過列寧嘅革命青年張太雷（1898-1927）不幸戰死，死嘅時候未夠30歲，起義軍部隊1200餘人撤出廣州市區，一部分喺花縣改編為紅四師後，開赴廣東海陸豐支援彭湃所建立嘅海陸豐蘇維埃；另一部分沿西江剛抵達廣西左右江地區，之後參與百色起義；部分殘兵北上韶關，參加朱德（1886-1976）、陳毅（1901-1972）領導嘅南昌起義部隊。

廣州起義仍然以失敗收場，中共嘅城市革命路線遭受致命性打擊，軍隊被迫由城市轉入農村發展勢力，之後實踐遊擊戰略「以農村包圍城市」，得以苟延殘喘不特止，之後不住壯大，再奪取江山，係20年後嘅事，建設一個國家政權，絕對唔係一朝一夕嘅事。

12月14號，南京國民政府發佈對蘇聯斷絕一切外交關係，同日中共中央發出第23號通告《廣州暴動形勢下黨的任務》，要求各地中共組織立刻組織本地區暴動，以實際行動支援廣東嘅鬥爭，效果當然相當有限。12月16號，蘇聯政府回應南京國民政府斷交令，外交人民委員齊切林（1872-1936）聲明從未承認過南京國民政府，並指出仇視蘇聯政府者，必將自受其害。警告過你，你聽唔到都冇辦法。

中共發動廣州暴動，又整隻大死貓汪精衛嘆吓，12月16號，蔣Sir最大嘅政治對手大漢奸汪精衛深夜乘郵輪離開上海，遠赴法國，又唔可以話叫著草，總之叫做離開是非地先。因為上個月17號，廣州政變發生後（即張發圭兵變趕走李濟深），汪精衛成為衆矢之的，遭受到國民黨各派尤其是桂系嘅猛烈攻擊，李濟深公開發表談話，矛頭直指汪精衛及其親信發動政變，當然真相係唔係亦都冇人知道。加上本月11號，中共發動廣州起義，雖然陳公博（1892-1946）、張發圭等進行了殘酷鎮壓，但桂系李濟深、李宗仁、大右派吳稚暉等人立刻藉題發揮，向汪發起更猛烈攻擊，指出廣州起義係汪精衛同共產黨嘅「合演的雙簧」，汪精衛再三辯解無效，當然廣州起義同佢有冇關係？真相亦都冇人知道。

不過難得有機會入你，就你老母入到盡啦，南京政府下令查辦汪精衛、顧孟餘（1888-1972）、陳公博等九人。汪精衛前後受敵，無法響國內立足，汪精衛當時雖然身處上海租界，但仍然唔安全，傳聞白崇禧就諗住搵杜月笙直接沖入佢屋企綁架佢，所以為咗保命祇有漏夜出走逃亡。佢嘅政治最大對手蔣Sir就坐山觀虎鬥，食住萬里望花生，大收漁人之利。

「引刀成一快，不負少年頭」汪精衛依份人，可說係生不逢時，國民黨嘅半部黨史，去到中日戰爭結束，其實就係蔣介石同汪精衛嘅鬥爭史；正如有人話半部中共黨史，就係毛澤東同周恩來嘅鬥爭史。汪精衛嘅外表靚仔到無倫，風度翩翩，又有文采，加上亦都係孫文指定嘅承繼人，其實係當時普羅中華民國市民嘅偶像，瓣瓣秤先蔣介石，如果當時中國有場民主選舉，我好相信汪精衛嘅得票率會拋離蔣Sir30個百分點以上，不過時也命也，多情總被無情惱，汪精衛最後以漢奸身份遺臭萬年，係手段唔夠蔣Sir狠，亦都係多次政治選擇錯誤。

揀錯老公老婆可以離婚，揀錯工亦可以搵過一份，但係政治選擇錯誤，或站錯隊好多時候就一生一世，過去一兩年，香港人已經好清楚，政治並唔係玩泥沙，係生死相搏，係人生最大嘅投資同賭博，你想推翻政權嘛？政權當然唔會放過你，道理亦都相當簡單，一旦你能夠推翻政權，你亦唔會放過前朝嘅人嘛。回想汪精衛先生，如果佢一直堅持孫文「聯俄容共」嘅共產主義革命路線，堅定不移做國民黨嘅大左派，撐住武漢政權對抗南京政權，反對蔣介石清黨，堅拒寧漢合流，繼續搞分裂兩個中央，我相信佢亦唔會做到兩面唔係人；抗日期間，如果唔係諗X多咗，婦人之仁為咗減低中國人民死傷數目以投靠日本，佢亦唔會成為遺臭萬年嘅大漢奸。不過買馬嘅嘢，一係win，一係唔win，事情發生後以局外人身份評價歷史，其實相當幼稚。

12月17日，湖北省前財政廳廳長詹大悲（1888-1927），前教育廳長李漢俊（1890-1927）喺漢口日租界被衛戌司令部逮捕並且即場打靶，佢兩位都係共產主義信徒。同日上海禁止蘇聯輪船進港，正式同蘇聯割蓆，上海蘇聯領事機構亦都下旗，職員分批返回蘇聯，中（南京政府）聯斷交。

12月19號，朝鮮排華風潮平定，之前一段日子，朝鮮出現排華動亂，華僑被屠殺及重傷者多達400幾人，排華運動成日都發生，今時今日都未停過，似乎世界上除咗猶太人、吉卜賽人之外，華人都係一種唔受歡迎嘅物類。據我所知，其實好多去英美嘅華人留學生都俾人恰到上心口，不過過咗海就係神仙，冇人會話返你知嘅。

#常威💀 #蔣介石平反系列 #黃金十年 #民國歷史

【常威近代史】（五百一拾一回）
猛虎出山重掌軍權

歷史進入1928年，1927年一連串腥風血雨，打做咗一個軍政強人，之後，終於有一個人能夠有限度地掌控中國大部份區域，結束毫無秩序嘅軍閥混戰時代，開始建立所謂基本國家秩序，打造之後中國近代史上所謂「黃金十年」，佢就係我哋未來嘅主角：蔣Sir。

無論你鍾唔鍾意佢都好，佢始終創造咗一個時代，無論佢嘅手法有幾咁難睇幾咁卑劣，但佢始終擊敗咗佢嘅政治對手及敵人。過程唔重要，結果才是最重要，我諗呢個係自由世界資本主義嘅金科玉律，不擇手段男盜女娼無惡不作又如何？最後最有錢嗰個先係贏嗰個。今時今日好多人認為世上某啲奉行社會主義國家無惡不作（例如中國），其實講共產主義社會主義先至係最講道德，響資本主義社會度，所謂道德，祇不過係一張蒙眼布，蒙住你雙眼，等你睇唔撚到所有靡爛醜惡不平腐敗同剝削，然後安心地活下去，不知不覺地被上層建築keep on奴役。

1928年1月1號國民政府黨報《中央日報》喺上海創刊，同日由戴季陶（1891-1949）、陳果夫（1892-1951）、周佛海（1897-1948）等人主編嘅《新生命》月刊亦都喺上海創辦。汲取過第三國際共產主義意識形態文宣手段操作經驗，南京國民政府亦都相當明白，意識形態操控實在非常重要，「國民革命」、「三民主義」、「國父孫中山」.......等概念，亦都係呢段時間大力推出市面銷售畀普羅大衆，中國近代史基本格局——所謂正邪黑白是非等概念——亦都係依段時間逐漸成形，亦成爲咗我哋今日根深蒂固嘅某啲歷史觀。

不過當時中華民國仍然盜賊如毛，四處都係土匪，1月1日，「大刀會」就喺通化起事，1月5號佔據通化縣城，所謂大刀會，就係黑社會民間社團或者叫公民抗命，總之有人有槍有金主有個想法，就個個都可以插支旗仔成立政權，大刀會起義活動迅速擴大到臨江、桓江、輯安、柳河等縣市，不堪橫征暴斂嘅農民群眾紛紛入會，會員人數迅速增加到24000人。1月25號，奉天省長通令各縣嚴格取締大刀會，唔畀佢再蔓延，並且派出官兵進行討伐，1月28號通化大刀會被消滅，響奉軍嘅大舉鎮壓下，各縣市嘅大刀會起事亦都相繼失敗。

1月6號，響涿州被圍剿嘅北方革命軍傅作義（1895-1974，即係後來和平俾解放軍進入北京城嗰位）開城同奉軍萬福麟（1880-1951）進行和談，並且一齊去保定會晤張學良。

1月7號，宋子文（1894-1971）就任國民政府財政部部長，宋家皇朝握住個銀根了，同日宋子文宣佈國民政府財政收入每個月不足300萬，而支出即係1100萬，主張整頓江浙兩省財政，一場翻天覆地嘅金融大洗牌，亦正式展開序幕！一句到尾，之前支持蔣Sir嘅人就有運行，之前落錯注嘅人就冇運行鳥。

1月7號亦係重要嘅一日，因為當日蔣sir通電復任國民革命軍總司令，出山接管軍權，當然表面上佢係下野，其實一直將一切控制響手中，之前嘅日本之行，蔣Sir同日本軍政界要人，包括首相田中義一（1864-1929）、陸軍大臣白川義則（1868-1932）、參謀總長今井範三、黑龍會首領頭山滿（1855-1944）等人接觸，得到日本當局對佢喺政治上經濟上嘅絕對支持。蔣Sir於11月10號回國後，隨即與汪精衛一派聯手，對控制南京政府嘅桂系（李宗仁、白崇禧）施加壓力，期間馮玉祥（1882-1948）、閻錫山（1883-1960）、聯名通電請蔣Sir復職，何應欽（1890-1987）、賀耀祖（1889-1961）等高級將領，亦都通電擁護蔣Sir出山。

上月初， 蔣、汪兩排響上海召開嘅四中全會預備會議中，決定請蔣Sir出山重掌軍權，抑壓桂系勢力坐大。當然之後，汪精衛已經再中暗箭離開上海，蔣Sir成功坐收漁人之利，好快就會將軍政大權再次集中喺自己手上！

大家亦可以睇到，蔣Sir掌握大權之初，其實同日本帝國關係相當密切，但係成也日本人，敗也日本人，只係幾年之後，蔣Sir就同日本正式反枱，引發之後嘅中日大戰——世界上的確係冇無緣無故嘅愛，亦冇無緣無故嘅恨。

1月17號，國民政府改組雲南省政府，任命龍雲（1884-1962）為主席，軍閥龍雲係雲南王，雲南喺佢管轄之下亦係一個獨立王國，千里之外嘅南京國民政府又何德何能能夠控制佢呢？總之比個位你「割地稱王」，你可以繼續做你嘅諸候，表面上臣服我周天子（南京國民政府）就OK，類似嘅情況同樣發生喺山西閻錫山身上。

1月20號，國民政府頒佈《北伐全軍戰鬥序列令》，規定北伐全軍盡歸蔣Sir統轄，第二日國民政府西征軍向湘軍發動全線總攻擊，開始逐步收拾殘局。

1928年整個1月，中共亦都組織策劃咗湘南、弋橫（弋，音亦）兩次大規模暴動（起義）。本月中旬，朱德（1886-1976）同陳毅（1901-1972）率領南昌起義部隊2000餘人，由粵北轉入湖南宜章，22號攻佔宜章，朱、陳部隊改編為工農革命軍第一師，朱德任師長，陳毅任黨代表。

1月2號，中共橫峰縣委書記方志敏（1899-1935）決定發動年關起義，農曆年關前橫峰農民響領導下首先起義，之後弋陽各鄉鎮紛紛響應，加入起義活動……

#常威💀 #蔣介石平反系列 #黃金十年 #民國歷史

常公子最新小說作品【Master】https://play.google.com/store/books/details?id=5FIfEAAAQBAJ

Kindle版下載連結
https://www.amazon.com/dp/B08X4DK2FP