大清亡國關慈禧蛋牛治 2

【常威近代史】（五百一拾二回）
蔣Sir為中國革命而奮鬥

1928年1月25號，繼蔣Sir最重要嘅政治對手汪精衛離開上海後，胡漢民（1879-1936）、孫科（1891-1973）、伍朝樞（伍廷芳之子，1887-1934）等重要國民黨元老級成員，亦離開上海（前赴歐洲考察咁話），講真，佢哋全部都係蔣Sir嘅政治對手，當其時，蔣Sir正在復出，重奪本來操縱響新桂系李宗仁、白崇禧手中嘅軍權，最後結果都係未知之數，權力鬥爭遊戲中，醒目嘅人都會睇定啲先站隊，否則站錯隊，除咗會花好多時間先到Counter外，仲可能會萬劫不復。

同日，安國軍將領係北京召開軍事會議，決定全力對付馮玉祥，呢件事亦都進一步將馮玉祥同蔣sir拉埋天窗，共抗奉系。

文化領域方面，左派第一號文膽郭沫若（1892-1978）以「麥克昂」為筆名，響《創造》月刊上發表《英雄樹》一文，首次提倡創作無產階級文學，左派力量雖然水深火熱，但係文宣工程從來冇停止過。文人枝筆，當時仲有好大影響力，當然到咗今時今日，人人都可以喺網上或社交媒體發表文字或評論嘅時代，文人已經冇任何影響力，書亦冇人買冇人睇，圖片影像快餐取代文字。當然可能係好事，冇文人能夠有效全面操縱意識形態（文人多大話就係咁解），個個人真係可以做到「獨立思考」，不過有獨立思考，唔代表有正確選擇喎，兩回事嚟嘅，否則細路哥做咩要返學先？個個自己喺屋企打機上網培養一份屬於自己嘅「獨立思考方法」咪得囉？典解要go to school比老師wash brain呢？唔明。

用官方嘅說法，香港由廿一世紀開始搞通識教育，想話訓練啲中學生有獨立思考事物嘅能力，結果就搞咗2019年件「大頭佛」出嚟，其實上述講法，可能未必係錯曬。「洗腦」、「意識形態操作」依啲嘢，好很高深嘅，亦都好很容易失控，亦唔可以亂九咁搞，還是交返畀專業人士處理吧，Right？畢竟沿用左派嘅論述，「學校」本身就係最重要嘅意識形態國家機器（沒有其他），依件機器最初又點解可以放手呢？覆水難收，又害咗一代人。

另外，顧頡剛（1893-1980）、容肇祖（1897-1994）等民俗學學者喺廣州建立中國第一個民俗學研究社團——中山大學民俗學會——創辦《民間文藝週刊》，進一步堅定所謂「中華民族」嘅內容同規範，進一步將所謂「中國人」重塑成形。去到1928年，其實距離辛亥革命只係過咗17年時間，響成個中國（如果真有一個叫「中國」存在嘅話），仲有好多人留緊辮，仲有好多婦女仲紮緊腳，仲有好多成村鄉鎮根本不知道「政權」、「政黨」、「法律」或「制度」為何物？「中華民族」如何界定亦未有統一說法，好快響東北出現嘅「滿州國」，國民應該唔認為佢哋係中華民族嘅一員掛，仲有香港呢個大英帝國殖民地？「中國人」嘅問題更延綿到今時今日喇。

1928年2月3號，國民黨二屆四中全會響南京召開，蔣Sir通過呢次會議，集黨、政、軍大權於一身，開始咗喺中國政壇上長達22年嘅獨裁統治，亦都正式跨出「黃金十年」嘅第一步。

四中全會前，「山西會議派」被鬥垮，蔣Sir最大政治對手汪精衛亦因牽涉中共發動嘅廣州事變，喺新桂系嘅猛烈攻擊下，被南京政府下令查辦，佢見勢色不對，即刻著草去了法國。南京中央特委會，亦因為失去咗西山會議派呢枝重要基柱，亦都喺1927年12月28日宣佈結束，好話唔好聽，放響蔣Sir面前嘅大山已經被除移，之後就係邁向權力巔峰嘅康莊大道。

1月4號，蔣Sir同譚延闓、陳立夫等人由上海到達南京，籌備四中全會召開，雖然吳稚暉、胡漢民、鄧澤如（1869-1934）、孫科等元老級重要人物堅決不出席（走鳩埋），但係四中全會都係召開咗，會上，蔣Sir嘅反共主張得到一致認同，通過咗《開除停職中央委員案》，正式將林祖涵（即林伯渠，1886-1960）、譚平山（1886-1956）、于樹德（1894-1982）、吳玉章（1878-1966）、鄧演達（1895-1931）、毛澤東等人開除出國民黨，並撤銷佢哋所有職務。全會改組咗國民黨中央執委、國民政府、軍事委員會；任命蔣介石為國民黨中央執委主席、中央政治會議主席、軍事委員會主席、雖然由譚延闓出任國民黨主席，但係南京國民政府黨、政、軍大權實際上已經全部落入蔣Sir手中！你都咪話唔堅？

去年蔣Sir同宋美齡結婚嗰日嘅早晨，佢發表咗一篇聲明，內容係咁寫嘅：「我們結婚後，革命工作將毋庸置疑地取得更大的進展，因為從今以後，我可以安心地承擔起革命的重任……由現在開始，我們兩人決定盡我們的全力，為中國革命而奮鬥。」

其實聲明中所謂「中國革命」究竟是什麼呢？顯然喺蔣Sir心中，所謂革命已經唔係孫文心中嘅「創立共產主義烏托邦世界」，蔣Sir嘅「革命」，應該係自己嘅「革命」，即係將所有權力集中喺自己一個人身上。去到1928年2月，無疑佢已經做到40%，另一半係由奉系控制嘅北方，「中國」嘅意義亦唔係指謂長江以南嘅中原地帶，仲有北京，仲有東北一大片豐饒之地，當然亦包括後來建立嘅「滿州國」。

#常威💀 #蔣介石平反系列 #黃金十年 #民國歷史

🔥【常威近代史】第七部《最九衰的大軍閥時代》Round 2電子書上架，請大家支持！
https://play.google.com/store/books/details?id=lPgaEAAAQBAJ

amazon同步上架👍
https://www.amazon.com/dp/B08WCLGP4Y

【常公子歷史頻道367回：替大軍閥平反系列之 直皖戰爭】

⛎今集內容講直皖戰爭爆發，正式開始咗中國近代史上軍閥時代嘅大混戰，由晚清開始主宰政局嘅北洋系統喺袁世凱死後出現大分裂，蛇無頭不行，實在係鐵證。皖系兵力同直系兵力，其實旗鼓相當，但最後段祺瑞嘅皖系一敗塗地，而且敗得相當難睇，當中嘅原因，視頻會為你一一道來。

♉蛇無頭不行，就現今世界嚟講亦都非常適合，二次世界大戰以後，世界其實係由美國主宰，加上1991年蘇聯解體之後，美國係一國獨大，無論軍事上同經濟上都係其他國家所望塵莫及，整個世界，其實係圍繞住美國而運行，但係美國嘅國力進入21世紀後，尤其是經歷2008年金融風暴後，明顯出現顯著嘅衰退，加上狂印銀紙（量化寬鬆），特朗普四年前嘅上臺已經預示咗美國正由高峰滑落，加上今次Covid-19疫情，美國受傷最深，可以肯定，未來兩、三年，都會係非常艱難嘅日子，美國艱難，整個世界亦唔會有好日子過吧？

♊中國國力迎頭趕上，亦係無法爭辯嘅事實，美國面對中國嘅嚴峻挑戰，過去幾年已經陸續出手抗衡，而且局勢升溫得好快，Covid-19疫情更加係火上加油嘅催化劑，美國下一步會有咩行動？冇人會知道，我甚至預示，為咗阻止中國繼續崛起趕過美國，美國可能會發動戰爭亦在所不惜，當然我唔希望會發生咁嘅事，如果真係爆發大戰，後果會非同小可，至少，我相信冇人可以再印印腳食花生掛？

♎一直作為中美之間重要交流橋樑（美圓結算中心）嘅香港，比世界上每一個地方更早身受中美交惡之害，由2019年開始，去到今時今日，大家相信亦深深感受到威力何在。最近有民調話有五分一香港人想移民，其實完全無作大，我身邊都唔少朋友計畫離開香港，佢哋對香港嘅悲觀情緒，可以用無以複加去形容。特區政府現在應該做嘅，就係要挽回市民對香港未來嘅信心，希望佢哋會好好考慮相關做法。

♑【常威近代史】第七部《最九衰的大軍閥時代》Round 2電子書上架（條download link在下面），請大家課金支持我一直走落去，直至劉少奇骨灰到達北京王光美手上…

✅https://youtu.be/xGircq63dPc

常公子最新小說作品【Master】https://play.google.com/store/books/details?id=5FIfEAAAQBAJ

Kindle版下載連結
https://www.amazon.com/dp/B08X4DK2FP

【常威近代史】（五百一拾三回）
17世紀氣候危機

響南京召開嘅國民黨二屆四中全會上，蔣Sir獨攬黨、政、軍大權，聲勢一時無倆，終於順利登上中原霸主之位，開展佢嘅蔣家王朝（宋家皇朝）霸業，平定南方中原地帶之後，跟住落嚟，蔣Sir雄霸天下嘅矛頭直指北方奉系。我個人非常相信，當時嘅蔣Sir並無將共產黨放入眼內，我諗佢永遠估唔到，後來搞掂佢嘅，會係一個現在帶住幾百萬両友著草入江西荒山野嶺冇人冇物嘅紅太陽毛澤東。

1927年2月5號，東三省因為奉票連跌（大眨值）發生恐慌，連警察都開始罷工。本來好有金融信用嘅張作霖東北「奉票」，只係短短幾年間，就變成廢紙一樣，由「美金」變成「津巴布韋幣」，由此可見，張作霖父子的確唔係乜嘢出色嘅政治管理人才，管理一個國家（或地域），穩定貨幣金融系統大概係最重要嘅管治手段（沒有之一），因為建立國家最重要嘅目的就係發行貨幣掠水，貨幣價值本身先係最重要嘅權力基礎同來源，我哋甚至可以咁樣講，貨幣嘅力量就等同國家嘅力量，或等同政權嘅力量，政治與經濟密不可分，唔用咁嘅思路去讀歷史，永遠讀唔通。

最近睇過一本書，話俾我知原來世界上有一場叫「17世紀氣候危機」（The general climate crisis of the seventeenth century），事源於1600年2月19日秘魯嘅Huaynaputina火山爆發，火山噴出嘅灰塵，遮蔽太陽光，1606年嘅冬天幾乎係600年來最寒冷嘅冬天，事件直接造成世界唔同區域農作物失收，秘魯、俄羅斯、日本、瑞士、瑞典各地嚴重饑荒。中國則於1627年開始受到影響，去到1644年到達頂點，非常巧合嘅係，明朝最後一個皇帝、衰撚到臨死前斬咗個女長平公主隻手等佢變成獨臂神尼、之後喺北京煤山上吊嘅亡國之君崇禎皇帝，正正就係1627年登位，1644年歸西。

1627年到1630年間，印度亦發生旱災同洪水，死百萬人，1634年起，日本亦連續出現糧食短缺，終於1637年九州爆發咗天草四郎（教名熱羅尼莫，1621-1638，16歲就die）嘅「原島之亂」，1642年江戶「寬永大饑荒」，餓死50萬人。1627年起，中國關中地區大旱，大量飢民遊竄成為土匪流寇，收編佢哋嘅人叫李自成（1606-1645）同殺人王張獻忠（1606-1647），亦即係明朝嘅掘墓人。

1641年後，大自然嘅力量將氣候危機推至高峰，徹底改寫歷史，1641年1月4號，菲律賓Mindanao火山爆發，連同1638年到1644年間，環太平洋火山帶（Ring of Fire）發生12場火山爆發，千億噸嘅硫磺灰，遮蔽整個東亞大氣層，產生極端氣候變化，由1640年到1650年之間嘅氣候危機，造成全世界三分一人口死亡。

成日掛係口邊，又話崇禎皇帝唔係一個好皇帝係昏君，又話之前有個東廠魏忠賢（1568-1627）亂國，又話唔應該殺死屌那媽頂硬上個東莞仔袁崇煥，又話只要有多幾碌紅毛大砲就可以打走滿清，吱吱咗咗乜乜物物大明就唔會亡國？其實都係廢話，政治經濟密不可分，改朝換代大亂世出現，好多時候係因為經濟出問題——其實個道理亦都係好簡單，就係有錢同冇錢嘅問題；其實人生亦都係好簡單，綜合落嚟，好有可能亦都係有錢同冇錢嘅問題。

現在中美之間嘅問題，亦都係有錢同冇錢嘅問題。中國人不吃這一套，係因為有錢了；美國要打中國，亦係因為冇錢了。

奉票大眨值，亦預視咗北方奉系嘅崩潰，張作霖之死同之後「九一八事變」、張學良易幟投向蔣Sir可能亦同此有關，蔣Sir掘起，信埋奉基督教學英文同「美元」掛鉤，翻轉頭睇，可能係當時最正確嘅選項，不過首先要付出投名狀——就係殺共產黨！

所有表面上毫無關聯嘅獨立事件，其實都係有所關係，中間有一條無形嘅線將所有嘢貫穿起嚟，呢條線就係錢作怪。所以2019年發生喺香港嘅事，亦唔可以獨立去睇，背後都係牽涉到經濟問題，就如中央定調，香港嘅深層次矛盾就係土地問題，亦係居住問題（年青人嘅怨氣在於上唔到車，冇地方仆嘢），亦即係地產霸權，所以要撥亂反正，就要由土地問題出發，就要由打壓地產霸權鬥地主出發，脈絡開始越嚟越清晰，明眼人都睇得出。

1928年2月6號，《南北郵政總局共同管理全國郵政事務條款》簽訂，南北政府共同委派一個郵政總辦，雖然南北敵對，但通訊同貿易總唔能夠中斷，大家擁有共同利益就係錢，又係錢作怪。

2月8號，前國民政府代理海軍局長，前「中山艦」艦長李之龍（1897-1928）喺廣州被當局打靶，示範完美秋後算賬，睇返歷史，「中山艦事件」中，李之龍實在相當之無辜，不過人死咗就一了百了，無謂再追究鳥，既然冇得補救，不如青煙一縷，政治嘅嘢，認真你就輸了。

2月17號，國民政府正式委任白崇禧、李宗仁等73人為軍事委員會委員，而蔣Sir則為軍事委員會主席，佢同新桂系之間嘅矛盾，暫時平息（或者叫暫時得到利益平衡）。而蔣Sir嘅下一步棋，就係要媾正同奉系「打得火熱」嘅二五仔之King馮玉祥。

#常威💀 #蔣介石平反系列 #黃金十年 #民國歷史

【常威近代史】（五百一拾四回）
結義金蘭同生共死

蔣Sir嘅個人魅力，其實係佢成功嘅主要因素，先不論個人能力如何，一個政治人物或政客，外表同個人魅力的確相當重要，以蔣Sir嘅最大政治對手汪精衛嚟講，其實講靚仔，汪精衛贏蔣Sir九條街，睇翻舊片，佢兩位嘅演說能力都係差唔多（一般般啦，可能係本公子用今日嘅角度去睇）。但平心而論，汪精衛外表實在太完美，甚至太完美過籠，傾向有小小女性化，反而蔣Sir軍人出身，sell嘅係東瀛光頭軍佬形象，留埋執鬚，比汪先生多幾分剛陽味，受師奶歡迎程度贏汪精衛，都係有理由。相反如果放響今時今日，英俊嘅汪精衛可以秤先一個馬位。

當然上述所講嘅全屬廢話，蔣Sir所以贏嘅係軍事，汪精衛由頭到尾都係一個政治人物——甚至係一個極有文學修養嘅政治家，相反蔣Sir紅褲仔揸槍出身，所謂「槍桿子出政權」，邊個有槍邊個惡係事實。蔣Sir堀起，其實係「軍」控制咗「黨」；1927年前，其實毛澤東都係一個文人式嘅政治人物，不過佢亦順應潮流開始改變，響江西由一個文人變成一個軍人，最後成為蔣Sir最大嘅命中宿敵。

蔣Sir獨立黨政軍大權後，同新桂系傾掂數，成為南京政府軍事委員會主席，對內，可謂大局已定，下一步，佢就會開始部署統一全國嘅霸業（佢口裡面所講繼續北伐），首先蔣Sir拉攏馮玉祥，2月18號，蔣Sir同馮玉祥響鄭州交換「蘭譜」，咩叫「蘭譜」？結義金蘭咁解。老土？當時係潮流。馮玉祥為兄，蔣介石為弟，結拜金蘭，蔣Sir稱：「安危共仗，甘苦共嘗，海枯石爛，生死不渝」，馮生則say：「結盟真義，是為主義，碎屍萬段，在所不計」。馮玉祥之前已經投靠蔣Sir，而家仲做埋結義兄弟，即係話畀全世界知，我加入咗蔣Sir間新公司，受佢保護，亦都會大展拳腳，共抗奉系（即係北京中華民國中央政府）。

21號，毛澤東率領工農革命軍，攻佔江西寧岡縣，是日成立寧岡縣蘇維埃政府。上述行為，蔣Sir當然冇放入眼內，我諗佢根本完全唔知，如果當時有人同佢講毛澤東可能會威脅到佢，蔣Sir一定會問佢：「毛澤東到底係邊位？」

21號，黃郛（1880-1936）就任南京國民政府外交部部長，並發表對外宣言；25號，張作霖委任羅文幹（1888-1941）為外交總長，王蔭泰（1886-1961）為司法總長。

2月28號，國民政府決定改組軍隊。首先將國民革命軍第一路軍，西北國民軍，北方國民革命軍，改編為第一、二、三集團軍。第一集團軍下轄18個軍，共29萬人，總司令由蔣Sir兼任，原第一路軍總指揮何應欽（1890-1987）調任國民革命軍總司令部參謀長。該集團軍下轄4個軍團，分別由劉峙，陳調元，賀耀祖，方振武任總指揮。

第二集團軍，下轄25個軍，共31萬人，總司令為馮玉祥，後編為六個方面軍，由孫良誠、孫連仲、韓復榘、岳維峻、劉鎮華、鹿鍾麟擔任總指揮。

第三集團軍總司令為山西王閻錫山，下轄十個軍，以商震、楊愛源、徐永昌、傅存懷、傅汝鈞、豐玉璽、張蔭梧、譚慶林、鄭澤新、李維新任軍長。

兩個月後4月8號，國民政府將桂系部隊編為第四集團軍，李宗仁任總司令，白崇禧任前敵總指揮，下轄21個軍。

情況亦都相當清晰，所謂四個集團軍，就係國民政府四股代表勢力，馮玉祥同閻錫山只係盟友，係「外掛程式」，即係服從你南京政府，扯你支旗仔，但唔代表俾你直接指揮，蔣Sir手中一支29萬人第一集團軍嘅「黨軍」，係蔣Sir逐鹿天下嘅基本盤籌碼，即係嫡系部隊，第四集團軍新桂系基本上唔聽蔣Sir枝笛，係李宗仁同白崇禧嘅嫡系部隊。

四大集團軍夾夾埋埋有成百萬人，真係唔打得都睇得，仲唔嚇到你奉系張學良腳軟？不過對於軍隊數目嘅官方數字，我一向唔信，同出嚟碌一樣，講大10倍至20倍身家係正常事，否則邊度大到你呢？有屎料披露，其實由廣州出發北伐打到上海南京嘅正規軍隊人數只係兩萬幾人（有蘇俄裝備），唔計桂系李宗仁部隊，喺短短幾個月間，蔣Sir手中有成30萬軍隊？就打死我都唔信。

不過南京政府不斷擴軍就係真相，個個走去當兵打仗？咁邊個耕田呢？邊個發展經濟呢？

蔣Sir將國民黨極速軍事化，都引起好多黨內人嘅不滿。本月，由王昆侖、鍾天心、諶小岑三人響原「孫民主義學會」北方分會基礎上形成咗一個反蔣派別，因該派別主張「再造民國」，故被稱為「國民黨再造派」。本年1月，國民黨元老胡漢民因蔣Sir袒護汪精衛派，一怒之下，不願繼續同蔣Sir合作，同孫科、伍朝樞同赴歐洲「考察政治」，缺席黨內多場重要會議。「再造派」雖然擁護蔣Sir反共清黨，但不滿其獨攬大權，於是喺上海創辦《再造月刊》，製造輿論，歡迎胡漢文捲土重來，再造民國。再造派嘅成員有180多人，大多數係北京大學、北洋大學、武漢大學同上海交通大學畢業嘅青年國民黨黨員，文人論政？威力有限囉。

2月28號，日本跑艦射擊福建平潭縣漁船及岸上民衆，數十人死亡。同日，南京政府決定委派李宗仁籌備西征大軍，繼續北伐，百萬大軍，誓要鏟平你北京奉系，一統天下！

#常威💀 #蔣介石平反系列 #黃金十年 #民國歷史

常公子最新小說作品【Master】https://play.google.com/store/books/details?id=5FIfEAAAQBAJ

Kindle版下載連結
https://www.amazon.com/dp/B08X4DK2FP

【常公子歷史頻道368回：替大軍閥平反系列之 永劫回歸】

⛎最近睇左本舊書，有幾十年歷史，大家都應該聽過，係史作檉寫嘅《三月的哲思》，現今讀嚟，已經係一本過時嘅作品，不過睇舊書，有一個作用，就係反思一下過去嘅自己究竟係邊個？其實現在嘅我，並不認識過去嘅我，過去嘅我已經不存在，唯一存在嘅就只係現在嘅我，所以好多時候，我都會不斷犯錯，重複去犯過去所犯過嘅錯誤，某程度上，可以叫永劫回歸，重複犯錯因為善忘，並非天生係慣犯，只是不懂得認真汲取過去的教訓，我如是；人類如是；歷史亦如是。

♉《三月的哲思》內裡有咁樣一句話：「整個愛的過程，衹是叫我們學習怎樣去愛，而不是在愛。」非常明顯，係一句描述愛情嘅說話。以前睇，當然覺得好Rmantic，學幾句去識女仔都唔錯，今日睇返，又有另一番體會，有時候我哋活著，除咗要愛人，要愛其他事物，例如愛你嘅家庭、愛你嘅事業、愛你嘅社會、愛你嘅國家。但問題係如何去愛呢？如果用錯方法去愛，好有可能會產生反效果，即係好心做壞事。用愛情嚟做例子，你好愛一個人，愛到苦苦癡纏，不能自拔，到最後好有可能會傷害對方，呢啲事每日喺報紙上都可以見得到；同樣要去愛一個國家，亦唔能夠用錯方法去愛，否則會危害到國家安全。所以愛嘅過程，的而確且係一個學習嘅過程，叫你學習用正確嘅態度去愛，要你學習用正確嘅方法去愛，要愛得其所，愛得有用才叫愛。

♉亦實在冇辦法，呢個世界，越嚟越講「實際利益」，所謂大數據時代，一切要從數據出發，大家都睇到，以個人化為主軸的「自由主義」（或叫「新自由主義」）已經宣佈過時，太過個人化，將個人欲望浚駕社會整體利益之上，所帶來嘅災禍逐漸顯現，所有人自由被收緊，並非什麼邪惡力量使然，祇不過是整個系統必須作出嘅內部調節，再引用《三月的哲思》裡的一段話：

♈『真正的愛，一定要在一切屬於節制、德性或超越心靈的培育中，才能獲得它的完整的發揮，否則亡也祇不過被一些人間的思慮所侵佔，那也就全無愛的本意可言了。』

♑【常威近代史】第七部《最九衰的大軍閥時代》Round 2電子書上架（條download link在下面），請大家課金支持我一直走落去，直至劉少奇骨灰到達北京王光美手上…

✅https://youtu.be/psQhRZhlyEA

https://www.youtube.com/playlist?list=PL0RVUAILQUOvTo8JJrayjrvd_Nbjc-0Me

❤請加入常公子的近代史世界！

#ChineseHistory #HongKong #China #History

【常威近代史】（五百一拾五回）
三大紀律同六項注意

時間線去到1928年，局面亦都相當清晰，馮玉祥同閻錫山加入南京國民政府陣營，北京中華民國中央政府由張作林霖奉系控制，南北壁壘分明，符合大部份人腦中嘅正邪二分法，一對一單挑之局，勝者為王，敗者為寇，非常簡單。

其時蔣Sir同日本嘅關係相當良好，當然佢本身係美國人嘅白手套，不過都係嗰句，政治世界裡面冇永遠嘅朋友，亦都冇永遠嘅敵人，今日攬頭攬頸，聽日就可以生死相搏，反目成仇過橋抽板出賣盟友，係蔣Sir做先，雖然喺蔣Sir之前，中國亦都冇咩嘢政治倫理可言，不過清共一事實在太肉X酸，開壞個頭，既然你一開拍嘅時候係一部血腥恐怖片，咁以後嘅發展都要係一部血腥恐怖片嘅情節，開個頭起個朵好重要，所以細路仔要搵師傅改個名，又啱嘅；叫咗你唔好使用暴力，又係啱嘅。

進入3月份，南京中央研究院正式設立咗理化實業研究所，1927年春天南京國民政府成立後，偉人蔡元培立刻主張設立中央研究院，從速開展科學研究，追上世界大潮流。1928年6月9號，中央研究院成立，蔡元培立刻將理化實業所嘅籌備工作放喺首要位置。理化實業研究所由丁西林（1893-1974，丁先生除咗係一個物理學家，仲擅長創作喜劇）、王俊、周仁等科學家負責，下設三個組別：物理組、化學組和同工程組，聘胡剛復、嚴濟慈、吳有訓、趙燏黃、沈慈輝、王秀等同為研究員，7月，理化實業研究所分拆為物理、化學同工程三個獨立研究所運作。

3月2號，福建廈門嘅日本警察喬裝為華人，搜捕韓籍黃埔學校學生李箕煥、李剛（唔係我老竇係李剛嗰個李剛）、李潤炳、李明齊等人，並開槍示威。第二日，廈門交涉處向日領事抗議，日領事卻稱上述等人為共產黨員，通緝在案，日方行動是係有法可依，當然係有法可依，唔通任意拘捕人咩？由於日方拒絕放人，廈門民眾團體發起抵制日貨運動，又舉行遊行示威抗議日方胡作非為，10號，日本派遣驅逐艦抵達廈門，實施武力威脅，民眾卻組織罷工，斷絕海上交通，並且焚燒一艘日本貨輪，15號，日方被迫釋放李潤炳、李明齊，但仍將李箕煥、李剛暗中解往朝鮮。

歷史亦都講咗畀我哋知，日本人對中國嘅滲透同干涉，日益嚴重，好多次事件，完全視中國嘅主權於無物（不過當時嘅中國主權未明確又係真嘅），好快1931年「918事變」就會發生，中日亦會正式攤牌，邁向全面戰爭。

3月6號，中共廣東省委常委、廣州起義時嘅工人赤衛隊總指揮周文雍（1905-1928）同佢嘅助手陳鐵軍（1904-1928），喺廣州紅花崗營場被槍斃，兩位烈士於上月2號被捕。之前喺地下活動中，周、陳假稱夫妻關係，今日臨刑之前，佢哋宣佈喺刑場上正式結為夫妻，真係有幾浪漫有幾浪漫，有幾壯烈有幾壯烈。周文雍行刑之前，響監獄牆上寫下詩句「頭可斷，肢可折，革命精神不可滅。壯士頭顱為黨落，好漢身軀為群裂。」，兩位死嘅時候，一位27歲，另一位26歲，都係大好青年。

從來參加革命嘅都係年青人，所以亦都有人講，其實每一次革命都係階級之爭世代之爭，用意識形態角度去睇，係政治理念嘅相異同鬥爭；但係如果用經濟學生物學嘅角度去睇，好多時候係一個階級對另一個階級嘅不滿，係一個世代反抗另一個世代。20世紀20年代，參加中共嘅共產黨員差唔多全部都係有知識文化水平嘅大好青年，佢哋有熱誠有理想，想用個人嘅力量改變世界、改寫世界嘅種種不公平現象，為咗實踐信念甚至付出生命亦都在所不惜，難道你可以話佢哋係錯咩？當時，拉佢哋去打靶因為佢哋係恐怖分子，但我始終覺得，佢哋係烈士。或者，所有「恐怖分子」其實都係「烈士」，包括拉登（1957-2011）在內。

你可能會問，既然話拉登都可以係烈士，咁納粹德國嘅黨徒呢？黑暴呢？講真，本公子真係唔識答， What we cannot talk about we must pass over in silence， 冇答你當係答咗你。

今個月，毛澤東率領嘅工農革命軍到達湖南省桂東縣嘅沙田村，將過去陸續提出嘅紀律同埋注意事項歸納為「三大紀律」同「六項注意」，過式向所屬部隊發佈，並要求嚴格執行。

所謂三大紀律就係「行動總指揮」、「不拿工人農民一點東西」、「打土豪要歸公」；六項注意就係「上門板」、「捆鋪草」、「說話和氣」、「買賣公平」、「借東西要還」、「損壞東西要賠」。簡單啲講，三大紀律同六大注意，就係要將「工農革命軍」同「土匪」兩個概念分開，「紅軍」並不是「匪」，兩樣嘢嚟嘅，所以政權打壓紅軍就係不符正義原則，打壓土匪就符合正義，名相上嘅分別，有時候好重要，點樣去稱呼一件事物，亦代表咗點樣去定性一件事物嘅內容。

提出「三大紀律」同「六項注意」嘅毛澤東，我哋都可以睇得出，佢開始明白使用語言文字嘅奧妙，你向一班未受過教育或文盲嘅民衆講馬克思主義列寧主義、講解階級鬥爭、資本家剝削同剩餘價值，其實佢哋點會明白呢？就算去到今時今日嘅21世紀，又有幾多個人會明白呢？所以不如將一切化成口號同簡單語言，增加其煽動性同實用性更加理想。明白呢個道理，先至去玩政治喇，笨！

#常威💀 #蔣介石平反系列 #黃金十年 #民國歷史

🔥【常威近代史】第七部《最九衰的大軍閥時代》Round 2電子書上架，請大家支持！
https://play.google.com/store/books/details?id=lPgaEAAAQBAJ

amazon同步上架👍
https://www.amazon.com/dp/B08WCLGP4Y

【常公子歷史頻道369回：替大軍閥平反系列之 臨兵鬥者 皆陣列在前】

⛎農曆新年之後，畀我嘅感覺係，整個香港好似忽然之間靜咗落嚟，經過長達一年嘅抗疫，有好多行業已經頂唔住，尤其是要做客戶生意嘅飲食零售服務業，好多老闆亦頂無可再頂，失業率上昇到7%，街上出現好多吉鋪，有報導，有銅鑼灣旺角嘅地鋪，租金大瀉五成，無論真定假都好，似乎有啲頗嚴重嘅事正喺香港慢慢發生中……

♑暫時仲未睇到係好事抑或唔係好事？過去經濟暢旺嘅年代，百物騰貴，樓價租金不斷挑戰天價，窮人固然買唔起樓，想做生意嘅人亦都租唔起鋪，創業成本太高昂，開間小小茶餐廳閒間地都要兩三球以上，產業單一化，年青人缺乏向上流動機會，累積社會怨氣至爆發點……所以有人話，香港嘅問題，歸結嘅重心，係土地問題係樓價問題係地產問題。「地產霸權」依個詞語，二十世紀之前係唔存在嘅，大概十零年前左右，「地產霸權」先進入民間嘅討論脈絡之中，開始有人討論及懷疑（醒覺）香港唔能夠再向前發展嘅理由，可能就係「地產霸權」拖住後腿（除非唔係），尤其是鄰近地區例如深圳嘅高速發展，更加凸顯咗香港依個解唔開嘅死結。

♐作為一個小市民，當然希望樓價租金下調至合理水平，我係由我嘅階級立場出發，當然如果我有幾層樓響手，我當然望佢繼續升爆，但係如果大規模嘅地產調整真係出現，所引發嘅動盪亦都可以係前所未見，2019年以及之後發生嘅事，已經係一個引子，政治同經濟密不可分，大家亦有眼睇到。香港由一開始，已經註定係一個「成也地産、敗也地產」嘅城市，如果唔玩地產唔玩金融？香港又可以玩乜呢？我諗暫時未有人諗到。

♏臨兵鬥者皆陣列在前，現在香港嘅情況亦都係一樣，感受到嘅平靜，可能係山雨欲來嘅先兆，不過作為一個無權無勢嘅小市民，其實一啲都唔需要擔心，嚴酷嘅鬥爭只係發生響上層建築統治階層，正如你冇貨響手，隻股票嘅升跌同你一啲關係都冇，你只係響一邊食花生，睇吓人仆街笑吓，當然，冇貨響手嘅花生友，發達亦都冇你份喇。

✅https://youtu.be/WKhH2og27ig

其時北洋三大系統，即吳佩孚張作霖及孫傳芳，吳佩孚及孫傳芳勢力盡除，剩低嘅張作霖奉系，已經獨力難支，實在係冇辦法再面對南京國民政府嘅軍事力量，好快，奉系嘅結局亦都會出現，北洋軍閥時代亦會正式過去，成為歷史殘渣，只供後人唾罵不休。

17號，日本內閣決定以北伐軍中斷膠濟鐵路為理由出兵青島，18號，北京國民政府外交部長王郛致電蔣Sir，要求注意膠濟線日本僑民權益，免生事端，19號，日本政府加派第六師團進兵山東，一步一步，部署加強侵略中國籌碼。20號，國民政府交通部改革郵政官制，首次聘用華人任郵政局長。

21號，中共中央政治局常委，中央組織局主任羅亦農（1902-1928）被國民黨當局殺害於上海，享年祇有26歲。如果用今日嘅角度，26歲，只不過係一個初出茅廬嘅年青人，其實當時嘅中共，亦都係一個由大部份30歲左右年青人組成嘅新興政黨（1928年，毛澤東35歳、周恩來30歲、鄧小平24歲、瞿秋白29歲、任弼時24歲、張國燾31歲、李維漢32歲，鄧中夏34歲、向忠發40歲、最老可能係朱德42歲）。有陣時我哋講，政治鬥爭本身就係階級鬥爭、世代之爭，其實並無錯，中華民族「殺子文化」一直存在，從來最難解決嘅，都係年青人問題。

長江後浪推前浪，一代新人葬舊人，世道如此，但係前浪同舊人並唔容易束手待斃，退位讓賢？從來只係被逼，老子食緊嘅紅利點解要分畀你後生仔呢？你要我提早退休咁我可以做乜哩？上一代要霸住個位食老本，下一代要趕佢落嚟取而代之，係一場永劫回歸，所以改革派始終有一日會變成保守派，新同舊之間，本身就係一個大循環，所以要保持新鮮感同活力，必須好似托洛斯基咁講「不斷革命」。呢個道理好難明白，要飛得好高，睇通曬全局，先至能夠有一個比較概括嘅了解同認知。

24號，蔣Sir命令全軍對日軍「始終忍耐，物出惡聲」，25號，日本皇軍熊本師團1600餘人抵達青島，部分日軍轉赴濟南，開始深入腹地，俗語講得無錯，「趁你病、攞你命」，4月30號，濟南日軍司令齊藤發出通告，南北兩軍任何一方進入膠濟鐵路界限以內者，一律需要解除武裝，真係大撚曬你話點就點，山東半島，亦喺咁嘅情況之下，逐步落入日軍嘅控制手中。

同日，中共中央發出接受共產國際決議案嘅通告，糾正左傾盲動主義，即係話早前通過要發動嘅一連串城市暴動（起義），宣佈正式結束，中共至此，進入最低潮時代。革命戰略重點由城市轉入農村，亦由此刻開始，中共他日東山再起，還看我們嘅偉大紅太陽。

#常威💀 #蔣介石平反系列 #黃金十年 #民國歷史

【常威近代史】（五百一拾七回）
朱毛會師井崗山

有錯就要認，打就要企定！面對蔣Sir血腥清黨，中共中央發動一連串城市暴動企圖力挽狂瀾，可惜事與願違，策略非但唔成功，而且令到好多人壯烈犧牲，唔少仲係工人運動嘅中堅份子大好青年高級知識分子，歷史的確令人熱淚盈眶，心裡抱負著共產主義建設大同世界美麗夢想嘅年青人，最後淪為政權屠刀下之犧牲品，赤子之心不但被嚴酷打壓，而且遭到滅頂之災，的而且確，情何以堪？不過一個讀歷史嘅人都會明白，呢啲事只會不停發生，之後亦都會再發生，永劫回歸，就係咁解。

他日風再起時，熱血青年變成殺人不眨眼嘅屠夫，或主動愿意成為發動自殺式炸彈襲擊嘅狂徒，亦係有因有果，因果相續，請問一句，當初是誰改變他們？再問一句，燃點火頭火燒山林之人，冇理由可以輕易逃避煽風點火嘅責任掛？

1928年4月26日，為咗更好地發展國內經濟，南京國民政府內政部通令各省民政廳提倡國貨，中國人用中國貨，亦都係理所當然。相關政策如下：一、由大學編審中小學課本，注重提倡國貨；二、由工商部速籌振興工藝計畫，並嚴禁商人以外國貨冒充國貨；三、由財政部實行保護國貨政策；四、由內政部大學院分別指示各級官員各學校選購貨品時，除中國所無者而必須用外國貨外，一律採購國貨使用；五、由各省政府及特別市政府通報民眾，一律提倡購用國貨風氣。

國民使用自己國家生產嘅貨物，係大國經濟崛起嘅必須條件，否則外匯就會大量流失，最後係數學問題，國際間嘅貿易，從來都係一場攻防戰，所有國家與國家之間發生嘅糾爭（或最後發生戰爭），最初都係貿易順差或逆差問題，進入21世紀，大家都應該一清二楚。起初係中美貿易摩擦，之後演變成政治摩擦，演變成意識形態摩擦，其實都係喺度解決緊錢嘅問題，如果印銀紙可以解決問題，世界又邊度有問題呢？不過我咁講，又可能係錯嘅，放喺人類眼前最嚴重嘅問題，其實係環境問題，係天然資源快將被耗盡嘅問題，而依啲問題，又並非印銀紙可以解決喎。

再過二三十年，如果人類再無辦法扭轉當前局面，環保問題將會全面凸顯（我比較喜歡用「爆煲」呢個term），情況可以惡劣到不能想像，或者今日嘅世界亂局，亦只不過係全球天然資源枯竭大災難前嘅前奏曲。

四月尾，仲有好多大事發生。4月28號，朱德、毛澤東喺江西寧岡縣礱市會面，然後朱、毛兩軍會師井岡山，依一個係一個中共黨史上可歌可泣嘅大日子。毛澤東率領嘅工農革命軍第一師喺三灣改編後，開赴寧岡，之後同井岡山農民武裝「井崗雙雄」袁文才（1898-1930）、王佐（1898-1930）部隊結合，喺井岡山建立革命根據地。今年初，佢哋攻佔咗茶陵、遂川縣，打退咗江西國民黨軍嘅第一次「會剿」（剿匪），終於喺井岡山站穩陣腳。

常公子最新小說作品【Master】https://play.google.com/store/books/details?id=5FIfEAAAQBAJ

Kindle版下載連結
https://www.amazon.com/dp/B08X4DK2FP

【常公子歷史頻道370回：替大軍閥平反系列之 拆大台主義者】

⛎今天是4月1號愚人節，也是張國榮的死忌，轉眼間原來他已經死了18年，18年是一個漫長歲月，嬰孩娃娃墮地，轉眼間變成一個成年人。張國榮死的時候是2003年，沙士的巨禍還沒有發生，相信會在當時的人，包括我自己在內，千想萬想，都想像不了18年後會是這樣的一個風景。

♑歲月能夠帶走所有東西，包括回憶。一個記性差的人，很容易「活在當下」；記性好的人，卻經常活在過去。但人總是矯情的動物，經常把「過去」重新塑造得比「真正的過去」美好，用作安慰自己，用作比喻今天，自傷自憐，但所做的一切，無非都只是想回到過去的歲月——那個幻想中的美麗世界。但這個美麗世界從來不存在，起碼在當時，自己從來不發現和察覺。

♈作為一個讀歷史的人，不應該矯情。但如實面對冷酷的現實，有時候不禁心寒，矯情是一種放鬆的手段，也是一種心理補償，只要不要太認真就可以。但如果凡事都可以不認真對應，那麼亦不需矯情，懂得自我放鬆的人，從來都是幸福的人。

♑花樣年華中，有這樣一段：「那些消逝了的歲月，仿佛隔著一塊積著灰塵的玻璃，看得到，找不著，他一直在懷念著過去的一切，如果他能衝破那塊積著灰塵的玻璃，他會走回早已消逝的歲月。」可是你明知回不了頭，才會說出這樣的話吧？

✅https://youtu.be/gdjtTv9zHLo

💙最新上線，請課金支持

【常威近代史】第八部《最九衰的大軍閥時代》Round 3
https://play.google.com/store/books/details?id=fY8mEAAAQBAJ

🔥【常威近代史】第八部《最九衰的大軍閥時代》Round 3電子書上架，請大家多多支持！

https://play.google.com/store/books/details?id=fY8mEAAAQBAJ

【常威近代史】（五百一拾八回）
濟南慘案

蔣Sir大權在握，繼續北伐，被打到一棟都冇嘅奉系，睇怕亦難以招架蔣Sir南京國民政府嘅強大氣勢，只不過物極必反，當南京政府銳勢正盛之時，一個更大嘅敵人開始有所動作，就係AV日本！中日之間嘅衝突同矛盾，其實打從甲午戰爭以後開始（或者由1885年兩方軍事競賽開始），亦從來未停止過，大家仲記唔記得發生係1894年嘅旅順大屠殺？血仇根本一早已經種下，再經歷30年時間醞釀，終於再次血腥爆發。

1928年5月3號，日軍無故挑起事端，響山東濟南屠殺中國軍民，人神共憤。5月1號，蔣Sir嘅第一集團軍佔領濟南，日軍亦召集齋藤旅團、第一師團主力進入濟南，兩軍處於對峙中。情況亦係相當簡單，山東半島一直係日本人覺得屬於佢哋嘅「財產」，既然你蔣Sir黨軍打走（或嚇走）中央政府軍佔領濟南，日本人亦唔駛同你客氣，反正大家都係「外來侵略者」啫？點解你蔣Sir可以立於道德高地呢？

大家千萬唔好用今日嘅「大一統中國」眼光去睇依件事，當時中國已經崩分離析咗好多年（個人覺得所謂「一個中國」嘅主權觀念早響1900年已經全面瓦解，到咗半個世紀後先再次重新建立），軍閥割據分地而治，其實各有各做，亦冇一個個別政權可以全面行駛「國家主權」依個政治概念，蔣Sir你係乜水先？又係一個軍閥啫，大卵曬咩？早響1927年4月，主張對中國實行所謂積極政策嘅田中義一（1864-1929）內閣成立，明治日本就再佈署全面侵華戰略。

兩軍對峙，好容易擦槍走火，今次果然就走火。5月3號上午，何耀祖部隊第40軍一名士兵患病，響送院途中被日軍阻撓，雙方因為言語不通發生爭執，日軍竟然開槍，當場打死士兵及役夫各一名。隨即，日軍以此為口實，沿途屠殺中國軍民，第40軍3師7團遭日軍突擊，全團1000人被繳械拘捕。

蔣Sir得到消息後，嚴命全軍停止還擊，駐響商業區嘅中國軍隊全部撤退，真係怕撚咗你，同時派出外交部長黃郛（1883-1936）到日軍司令部與第六師團司團長福田彥助交涉，請其約束部下。但係日軍完全冇理會，更將黃郛扣留18小時，逼佢承認衝突係由中國士兵挑釁而起，晚上11點，日軍不理外交慣例，衝入濟南交涉處，將戰地政務委員會外交處主任兼山東交涉員蔡公時（1881-1928）等19人捆綁毒打，蔡公時表明身份，並且抗議，日軍竟然割去佢嘅耳同鼻，挖咗佢對眼同條脷，再將其槍殺，其餘人員除兩個人逃出生天，全部被當場慘殺。蔡公時畢業於東京大學，應該識講日文，日軍暴行，根本冇藉口可以抵賴。

仲未夠啊，4號淩晨，國民政府派熊式輝（1893-1974）前往交涉，但日軍開出苛刻條件，之後，又先後派過趙世暄、「中國奧運之父」外交家王正延及崔世杰同日軍交涉，並邀請英國、美國駐濟南領事出面調停，但完全無效。4月7號，日軍司令福田向蔣Sir提出五項要求作為最後通牒，限12小時內答應，蔣Sir即擬定六條對策令熊式輝同福田交涉，亦無結果。

4月8號，日軍開始炮轟濟南市，4月9號，日本政府發表第三次出兵中國聲明，宣佈增派第三師團前赴山東支援，當地日軍並且猛攻濟南城門，同日，中共中央發出《反對日兵佔據山東告全國民眾書》，強烈譴責日軍暴行。4月11號，蔣Sir軍隊被迫勒令全部軍隊退出濟南，日軍入城後，又以種種藉口屠殺居民（即係殺人放火打劫槍掠），中國軍民死亡人數3254人，受傷1450餘人，史稱——「濟南慘案」或叫「五三慘案」。

如果你睇到依度，仲覺得當時日本人對中國人冇敵意，我諗你要去照磁力共振check吓個腦，當然你可以反駁，上述所演繹嘅歷史只係「中國版本」，日本人嘅歷史自然有自己嘅「日本版本」，而響「日本版本」中，就一定係中國軍人首先挑釁，日本軍人被迫自衛反抗殺人諸如此類etc……總之一定有一千萬個理由、千方百計掩飾其禽獸暴行。正如當年嘅「旅順大屠殺」，日本人嘅藉口就有清軍扮成平民混入民間，所以有殺錯冇放過。我成日都講，今日大家對日本人嘅印象係，日本人好有禮貌有好文化，但佢哋同德國人一樣，有一份獸性同黑暗，埋藏喺人格最深之處。

不過，尤達大師話我知任何人都有Dark Side，就睇吓有冇客觀環境因素，可以將人性黑暗面逼出嚟啫，if有人話你知，由現在開始24小時內法律不再生效，可以隨便殺人放火打劫搶掠而不需接受刑責，咁究竟會發生乜嘢事呢？我係完全唔能夠想像。

不過，濟南正在流血嘅時候，上海仍然紙醉金迷Boom吒吒，中國首部武俠電影《火燒紅蓮寺》正式公映，非常叫座，並引起公眾轟動。該片由明星電影公司根據向愷然嘅小說《江湖奇俠傳》改編拍成，由鄭正秋（1889-1935）編劇，張石川（1890-1954）導演，主要演員包括鄭小秋（1910-1989，鄭正秋之子，同鄭少秋欣宜等冇關係）、夏佩珍（1908-1975），胡蝶（1908-1989），鄭超凡、黃夢石等紅星。《火燒紅蓮寺》開創中國武俠神怪片之風，電影公司有見及此，不斷續拍，竟然之後拍咗18集，拍爛佢。

#常威💀 #蔣介石平反系列 #黃金十年 #民國歷史