大清亡國關慈禧蛋牛治 2

多謝

滿清亡國唔關慈禧事？不敢笱同

【💣香港關 #中英聯合聲明 腿蛋治 第十七回 #現代化之旅】

♒《香港關中英聯合腿蛋治》第17回相隔了一個禮拜先同大家見面，兄講聲對唔住。今集我會講麥理浩1979年嘅北京之旅，同鄧小平見面，依一次，亦都係中英兩國關於香港1997問題拉開嘅序幕。

♐對英國同中國嚟講，香港從來都一個辣手嘅問題，97年前，英帝國為咗點樣光采地放棄香港嘅殖民統治，費煞思量。97之後，中華人民共和國亦都因為想順暢管治香港，而費盡心神。香港理所當然地、因為歷史問題，變成咗形勢極度複雜嘅一個地區。呢個情況到今日仍然冇改變過，2019年發生的連串混亂事件，其實統統都係歷史遺留落嚟嘅問題，九七回歸22年，其實好多問題一直冇解決過，只是大家對問題本身視而不見，以為隨著時間嘅推移，問題就會自行解決。但真相話畀我哋知，呢個並唔係正確嘅認知，香港嘅問題從1997年不斷累積，由上一代人延續到新生代，終於發展到今時今日嘅混亂地步。

♈綜合各種原因，我會認為香港今日嘅問題其實冇辦法解決。其實當年雄才大略嘅鄧小平已經提出最穩妥嘅解決方法，就係十二個字：「一國兩制、港人治港、高度自治」。中華人民共和國只係處理香港嘅國防同外交，其餘一切事務交由香港人高度自治，2047年前，50年不變，有乜嘢50年後先講。對於鄧小平嘅想法，有識之士都會明白係一種卓越高見。

♉可惜鄧小平1997年前已經西遊，偉人留低嘅說話同指示，後繼嘅人似乎並無絕對遵從，由21世紀開始，中國不斷插手香港事務，所謂「港人治港、高度自治」其實並唔存在。香港今日出現亂局，其實係大家違背咗鄧小平留低嘅指示同意願。而家搞到「要放棄一整代人」？拉曬啲年青人？撫心自問，其實究竟係邊個嘅責任呢？

♋有一個問題要搞清楚，從來社會出現混亂，責任並不在於普羅市民身上，而在於統治階層。但今日香港，統治階層成日擺出一個姿態，係佢哋冇錯，凡事已經做得好好好perfect。祇不過係社會上太多「刁民」同「暴民」，身在福中不知福，刻意搗亂。言下之意即係話責任喺民眾身上，並非係統治階層嘅錯。對於依種不負責任同傲慢嘅講法，我冇嘢可以補充，我亦非常歡迎佢哋用呢種唔願意承擔錯誤嘅態度管治落去，因為炸彈一日唔拆，始終會一日再爆。

🇬🇧https://youtu.be/9o0hMdB-aTM

【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

【常威近代史】第二部《中國一百年前的第一次改革開放》實體購買
https://www.382now.com/product?id=151

【常威近代史】第三部《東方維多利亞女王之死》實體購買
https://www.382now.com/product?id=165

【196回：大清亡國關 #鄰舍 蛋牛治】

♉區議會選舉塵埃落定，泛民壓倒性大勝，短兵相接單對單，六四黃金比其實戰無不勝。我有好多朋友對今次嘅選舉勝利，帶出未來更多嘅憂慮，我冇諗咁遠，贏咗先算，反正政治只係解決當前問題，反正有班建制派大食懶食老本要落台年尾流流冇糧出，大量年青人上臺換血，參與政治，響實戰中汲取經驗，無論點睇都係件好事。

♐今次嘅勝利其實係一場慘勝，係用大量前線抗爭者嘅鮮血同埋刑責作為代價換取返嚟。截至目前為止，幾千人被拘捕，數百人以暴動罪被起訴，佢哋好多人可能會面對長達十年的監禁。食咗饅頭嘅泛民，希望佢哋得到更多嘅資源後，可以更加積極協助抗爭者，千萬唔好用完即棄。大家同路人，亦希望各位喺各自能力範圍內、能夠做更多嘅嘢去幫助佢哋。需知道「敢教日月換新天」嘅，其實行喺最前線嘅人，以我自己為例，只係坐響冷氣機下坐享其成，其實我無時無刻感到羞愧。

♉今集我為好朋友梁文道平反，諗返轉頭已經係好多年前嘅事，梁文道寫過一篇《仇人也是鄰舍》，結果引發本地文壇鋪天蓋地嘅攻擊，最後淡出香港文化圈，轉戰內地發展。諗深一層，篇文其實叫你connect警察，如果今時今日connected，我諗解放軍早已經出動，香港或者早已經變天都未定，一直強調嘅「最後防線」，就係咁解。「仇人」同「鄰舍」永遠唔會站於同一陣線上，意識形態大戰略，睇得通透嘅人又有幾多？

♌記憶回溯到更久更久嘅以前，某一個秋涼嘅夜晚，我同梁文道響吐露港單車徑，遙望住馬鞍山嘅萬家燈火。當時梁文道發夢話可唔可以搞一個教育機構，唔去教授一般嘅知識，而專教另類嘢，例如教人賭馬炒孖展炒樓、或者教人鬥蟋蟀撚雀、或教人如何成為一個成功嘅大耳窿或古惑仔……諸如此類。佢問我如果真係有一個咁嘅教育機構叫乜嘢名好？我就答佢中國共產黨最鍾意將知識份子打入牛棚接受再教育，不如就叫「牛棚書院」。

♉好多年後，我已經同梁文道冇再聯絡，某日我路經土瓜灣，睇見真係有一間「牛棚書院」成立咗，當時個感覺真係非常夢幻。

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上2000訂戶！

🍳https://youtu.be/T9gng1xXx8M

【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

【常威近代史】第二部《中國一百年前的第一次改革開放》實體購買
https://www.382now.com/product?id=151

【常威近代史】第三部《東方維多利亞女王之死》實體購買
https://www.382now.com/product?id=165

【常威近代史】（二百九十八回）
大軍閥平反系列

用少少篇幅，講一講1917年時候嘅少年毛澤東。

作為中國近代史上一個最重要嘅人物（沒有之一），或者作為世界歷史中一個傳奇人物，究竟佢嘅青年時代係點樣過嘅呢？今日講少少。

對毛澤東嘅評價一向非常兩極，有人話佢係古往今來一個最大嘅魔頭，亦有人非常推崇佢，到咗今日世界上仍有唔少「毛派」支持者，我常公子作為劉仲敬先生忠實書迷，我認同毛澤東係歷史上最偉大嘅馬基維利主義者，其實佢響唔同時代以唔同嘅身份同立場出現，能夠配合時勢為自己爭取最大嘅政治籌碼，玩手段玩意識形態，係玩到出神入化，最強項係燃化人民同政敵，燃到大家雞毛鴨血，燃到大家死無葬身之地，喺毛澤東之前，冇人可以做到，而我更相信毛澤東之後，亦都冇人可以copy佢，今日有人話想學佢，但係我想話畀嗰個人知，你十劃未有一撇。

我用編年史（Chronicle）文體寫民國史，時間線去到1917，當時毛澤東23歲，正身在湖南省立第一師範學校讀書，仍未畢業行乞出發去北京。

毛澤東1893年出生於湖南省長沙府湘潭縣韶山區，當時清末嘅湖南省，係中國一個思想最開放嘅省份，湖南省長沙市係王夫之（王船山）思想發源之地，亦係平定太平天國之亂大功臣曾國藩鄉下，南方士大夫團練武裝力量人員構成嘅主要提供地。

自19世紀60年代開始，湖南省軍事同革命人才輩出，簡直係星光熠熠耀保良，先有麥兜響噹噹戊戌六君子譚嗣同，自立軍唐才常，真國父黃興，當然最後有毛澤東同埋劉少奇，多到數都數唔曬。湖南人鄰近廣東思想開放，民風強悍，同樣受顛覆種基地香港氣氛薰陶，但廣東人鍾意走精面（eg.孫文），湖南人就有前冇後打死罷就。

毛澤東老豆叫毛貽昌，喺當地富農，曾經參加過湘軍，思想非常保，係中國傳統家長式人物，毛澤東母親叫文七妹，係一個普通農家婦女。年幼時代，毛澤東接受過幾年儒家私墊傳統教育，國學根基深厚，亦都奠定咗佢一生，始終無法擺脱中國文化嘅糾纏，佢喜愛詩詞歌賦，亦鍾意閱讀中國傳統文化歷史書籍同章回小說，佢自己就講過，一部「資治通鑒」、一本「三國演義」，貫通佢一生人所有政治鬥爭脈絡。嚴格嚟講，毛澤東係一個舊派傳統嘅中國知識份子。

1910年，辛亥革命爆發前夕，十六歲嘅毛澤東離開鄉間，進入湘鄉縣立東山小學堂讀書，接受新式教育，開始接觸新時代資訊。1911年辛亥革命爆發，毛澤東曾經參軍，成為湖南新軍一名士兵，之後退役，以全校第一名考入湖南全省公立高等中學，半年後退學。1913年前，毛澤東每日響湖南省長沙市湖南省立圖書館自修，每日不停睇書，中午食兩個米餅，晚上訓響社區中心收容所，閱讀各種西方政治同科學嘅經典著作（翻譯本），書中自有黃金屋，勤奮自學，境界不斷提昇。

閱讀，成為毛澤東一生人最大嘅嗜好之一，其實非常正面，試問一個革命青年，點可以唔讀書丫？唔讀書就冇理論根底，冇理論根底就好容易露底，一露底就冇人幫到你。打仗殺敵需要理據；理據來自理論；而理論則來自書本。依一點大家一定要清楚。

1913年春天，正當成個中華民國立立亂之際，毛澤東考入唔需要學費嘅湖南省南第四師範，1914年2月，第四師範併入湖南省立第一師範學校，毛澤東就喺第一師範學校，一讀就讀左四年，渡過咗佢19歲到23歲嘅青年黃金時代。

期間，毛澤東勤工儉學，用最低嘅生活成本，一邊讀書，一邊搞政治活動，呢幾年，佢響湖南第一師範認識咗好多人，呢啲人之後都成為中國革命嘅主要參與者，亦喺第一師範就讀期間，毛澤東開始接觸同埋閱讀馬克思主義著作，並開始成為馬列主義嘅信徒。

湖南讀書期間，毛澤東差唔多謝絕所有年青人享樂，甚至不談戀愛（可能根本冇錢，佢老豆唔科水），專心一致以知識裝備自己，一心一意希望拯救整個中華民族於水深火熱，佢嘅動機絕對高貴而純潔，同所有同時代嘅革命青年（或叫社會主義革命青年）一樣，為咗理想，為咗整個民族未來的福祉，佢哋可以唔食飯捱窮、可以拋頭顱灑熱血，從未驚過。

放響年青毛澤東眼前嘅連串中華民國政治紛爭，毛澤東認為解決之道就係當時火紅嘅「馬克思主義」。1918年6月，毛澤東響第一師範畢業，創辦《湘江評論》，開始響湖南傳播初級馬克思主義思想，同年佢更加同友人創建《新民學會》，搞社會主義讀書組。

年青人毛澤東似乎明白要再上一層樓，就要去當時中國最高嘅學府進修，於是1918年中，佢決定離開長沙，前往北京大學，睇下有乜嘢再發展，之後響北大圖書館認識中國馬克思主義元老級master李大釗，亦徹底改變毛澤東嘅一生……

毛澤東嘅青年時代就寫到呢度，將來要講毛澤東仲有無數事情要講，下集我哋會回歸段祺瑞黎元洪院府之爭，睇吓自由民主百花齊放，如何衍生更大的亂局……

自信人生兩百年，會當水擊三千里。

#常威 #大軍閥平反系列  #大軍閥 #民國歷史

【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

【常威近代史】第二部《中國一百年前的第一次改革開放》實體購買
https://www.382now.com/product?id=151

【常威近代史】第三部《東方維多利亞女王之死》實體購買
https://www.382now.com/product?id=165

【常威近代史】（二百九十九回）
大軍閥平反系列

去到1917年頭，其實影響中華民國政局最深嘅，係日本人嘅勢力。自從1895年甲午戰爭爆發後，日本帝國一直將中國視作一件到口嘅肥豬肉，對佢哋嚟講，最好嘅發展就係好似吞併韓國咁，將中國完全吞併成為大日本帝國殖民地，日本人無辦法做到，原因中國比韓國大得多，人口亦都多得多，政治形勢亦複雜得多，而且中國國內一直有其他西方列強勢力根深蒂固，打低中國其實好簡單，但係要打低其他西方列強就唔係講笑。

第一次世界大戰畀咗一個好機會日本，西方列強陷於戰火之中，尤其係大英帝國，正所謂火燒後欄、自顧不暇。日本早已經乘機威逼袁世凱簽訂21條，進一步蠶食新生嘅中華民國。

國務院總理段祺瑞，其實左睇右睇都係一個日本人，當時中國嘅軍人，每一個都同日本關係密，軍神蔡鍔已經係好例子，最後要死都係死喺日本境內。

鬼叫你窮？1917年1月20號，日本內閣顧問西原龜三（1873-1954），向中華民國議定500萬日元交通銀行借款合同，依筆借款，以隴海鐵路債券、中國政府國庫券、同中國政府欠交通銀行債權證為擔保。日本為咗實現單獨對華借款，由興業、臺灣、朝鮮三家銀行組成銀團，作為對中華民國借款主體，並派出西原龜三做銀團代表身份，前赴北京遊說，西原好快同中國交通銀行達成協議，呢次借款，史稱「西原借款」。

「西原借款」主要係段祺瑞用作維持同發展軍事實力，得到依筆錢，段祺瑞亦都同日本政府愈行愈埋，亦由此引發咗一場「院府之爭」政治角力。

當時正值歐洲大陸第一次世界大戰打到高潮，北京政府本來傾向「協約國」陣型，打算同以德國為首嘅「同盟國」陣型絕交，但國會之內明顯有唔同嘅聲音，有議員反對同德國絕交，好簡單，因為怕德國之後會打贏一戰，中國就仆街。其中積極反對中華民國加入協約國嘅人，仲有孫文，佢就曾經致電當時英國首相David Lioyd George阻止勸誘中國參戰。

但呢個世界嘅嘢冇得扮中立，尤其是喺戰爭狀態，你想做騎牆派收兩邊茶禮，個個唔得罪？你發撚緊夢頂！

日本屬於「協約國」陣營，段祺瑞收得一筆「西原借款」，自然就要追求同債權人同一步伐，向德國絕交並且宣戰。加上3月1號，一艘法國遊輪畀德國潛艇擊沉，船上500個華工葬身大海，3月4號，佢同全體內閣成員到總統府開會，徵求大總統黎元洪意見，但黎元洪表示反對，要求遵從法統原則，向德宣戰應該要由國會表決。

段祺瑞嘅反應相當大，即刻劈炮辭職國務院總理，並且離開北京前赴天津發脾四。之後要由副總統馮國璋出面調停，以大總統不得干涉對德外交為條件，3日後段祺瑞先返北京復職。

3月14號，中華民國加入協約國陣型，向德國斷交並宣戰，宣戰案得到參眾兩院通過，同時宣佈收回天津同漢口嘅德國租界，解除中國境內德軍武裝，停止繳付德國嘅賠款同埋欠債。又不過，對中國境內的德國人，中華民國北京政府冇採取進一步行動，響各地各部門服務嘅德國人一律留任，德國商人仍然可以繼續營業做生意，生活如常。

講真，姿態嚟啫，主要係同大佬日本交待。又好好彩，屎忽撞棍押注又押中喎，好快德國就會投降打輸第一次世界大戰，中華民國無厘頭變成「戰勝國」之一，巴黎「梵爾賽條約」簽訂時候，又觸發另一輪外交風波，以後再講。

「院府之爭」持續期間，我哋又睇吓國父孫文喺上海做乜嘢？3月30號，孫文嘅獨裁政黨「中華革命黨」通告全體黨員，打算恢復用返「國民黨」名號，要換牌頭，組織新一輪政治攻勢，所謂舊嘅唔去，新嘅唔嚟。孫文1914年7月創立嘅「中華革命黨」，玩咗三年，玩到partner黃興死埋，終於收皮！

事實上，孫文當時又有另一套諗法，早響1917年2月，佢就同上海幾個商界猛人，包括虞洽卿、趙士林、朱執信、洪承祁、盛丕華等人，籌組「上海交易所」。你冇聽錯，正史好少講呢單嘢，孫文唔搞革命住，反而喺紙醉金迷嘅上海想做股票大亨，並且租埋地方做辦事處，掛出「通記交易所」招牌，預備做股票大莊家。呢個組織上海交易所計劃備案，孫文上呈北京政府，北京政府亦都批准佢搞。

不過搞革命似乎比搞交易所容易得多，上海交易所嘅大計始終冇辦法實現，於是後來孫文就南下廣州，繼續佢嘅革命事業。我講咗好多次，孫文無論係任何時候或者任何地方，其實都係一個籌款大師，對籌款集資的確係有一手，其實佢玩IPO玩股票可能比玩革命更加成功……

#常威 #大軍閥平反系列  #大軍閥 #民國歷史

【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

【常威近代史】第二部《中國一百年前的第一次改革開放》實體購買
https://www.382now.com/product?id=151

【常威近代史】第三部《東方維多利亞女王之死》實體購買
https://www.382now.com/product?id=165

唔識嘢鳩噏

馬克思主義誕生喺歐洲資本主義社會，人地有資本家壓榨基層
當時中國大部分人都只係文盲農民，窮到燶，夾硬成套搬過去係咪忽略咗個背景
話明共產，成個國家窮到燶，冇產邊有得共

【💣香港關 #中英聯合聲明 腿蛋治 第十八回 #麥理浩訪京】

♒美國總統特朗普簽署《香港民主及人權法案》，香港——呢個有特別歷史背景遺留落嚟嘅城市——亦正式成為中美「新冷戰時代」嘅戰略重要位置。對於依件事，一部份市民感到興奮雀躍，認為美國將會保護香港嘅民主同埋人權；但有另一部份市民，則覺得美國嘅措舉，係會嚴重損害香港嘅經濟前景。香港社會，目前處於史無前例嘅撕裂狀態，黃藍壁壘分明，任何人都需要選擇隊伍而跟隨，想兩邊下注，力保不敗，已然成為明日黃花。

♈法律是法律，但執不執行法律又係另一回事。美國政府會否響未來動用法案制裁香港及內地嘅官員，我個人非常有保留，我認為法案成立，宣傳意義大於實質用途。好似核武，主要用作威嚇同談判籌碼，一旦啟用，就玉石俱焚。一拍三散（中、美、香港）嘅局面，應該係大家都唔想見到。最好嘅局面係，內地政府會退一步，給予香港人更大嘅自治權，不過未來一兩年，我唔覺得呢個局面會出現。可以預料，中央對香港嘅態度，會再「硬」一段時間，睇睇實際效果，先會決定下一步點樣做。

♎但有一點應該已經發生，就係目前喺香港嘅中共代理人，即所謂建制派陣營，將會進行一次大換血。特區政府一路冇將區選壓後舉行，司馬昭之心昭然若揭，既然過去20幾年，呢班人冇辦法好好處理問題——即協助中央有效地管治香港，仲將問題深化至群眾起義暴亂嘅程度，佢哋嘅工作表現上頭一定唔滿意，俾著你做老細，你都想炒X曬佢哋。借住一場區議會選舉，一班建制派嘅地區樁腳已經變成失業大軍，舊嘅唔去，新嘅唔嚟，未來又係另一番局面。

♒尋日同一班朋友茶敍，佢哋話香港近半年發生嘅事情，根本係連最好嘅編劇都寫唔出嘅劇情，事實上的確係，劇情嘅發展往往出乎人嘅想像之外，以後會點？根本冇人會知道，但我個人傾向相信，事物嘅發展總會朝住壞嘅方向走，香港會唔會係一個例外？當然如果人類可以預測得到未來，歷史亦沒有存在嘅必要。

🇬🇧https://youtu.be/I-2X5nrnV0Q

【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

【常威近代史】第二部《中國一百年前的第一次改革開放》實體購買
https://www.382now.com/product?id=151

【常威近代史】第三部《東方維多利亞女王之死》實體購買
https://www.382now.com/product?id=165

多謝提點

純粹睇完你d文，知道中國當時窮到燶
但當時d人夾硬將一套誕生喺資本主義富裕國家嘅理論帶去中國，其實係咪搞錯曬

【常威近代史】（三百回）
大軍閥平反系列


連我自己都不能相信，我嘅廣東話近代史連載去到300回，繼續努力，加油！

上次講到，國父孫文籌辦「上海交易所」，一心進軍金融界，同上海江浙一帶財閥玩埋一堆，倘若成功嘅話，或者整個中國歷史都會徹底改變，不過經濟同政治始終掛鉤，某程度上政治操作本身就係經濟手段之一。

用上述嘅講法，現在2019下半年香港發生嘅大亂局，亦都係一種經濟危機嘅生理反應。2008年美國金融海嘯，引發量化寬鬆，狂印銀紙，但作為世界霸主，狂印銀紙導致嘅高通脹及資產泡沫冇響大規模美國發生，因為美國借力打力、將通脹向全世界輸出，其中香港作為金錢自由出入外向形國際大都會，自然首當其衝。加上印銀紙嘅仲有中國四萬億嘅救市活動，雙管齊下，拉動香港資產泡沫瘋狂上昇，十年唔夠，樓價狂昇三、四倍，冇老豆層舊樓照住，就算你係專業人士醫生律師都俾唔起首期，除咗樓價仲有物價不斷狂升，唯一唔昇嘅就係人工，為咗要同資產泡沫進行對沖，通脹壓力全卸響普羅大眾身上，人工不但冇加，工時仲不斷加長（即係變相減薪），整個香港社會普羅市民生活水平逐漸下降。

除咗樓價，仲有股市，應跌唔跌，完全反映唔到社會實際嘅經濟下行情況，最近社會動盪，但係股市完全冇影響，6月時候27000，今日11月，都係27000，你話奇怪唔奇怪？呢個例子又可以反映出 ，香港嘅股票市場已經同民生經濟完全冇任何實質關係。即係下面有下面仆街，上邊有上邊繼續炒。另一個視角，係貧富懸殊問題已經去到究極。當中產階級同低下階層開始進入攬炒狀態，其實有錢佬完全唔關事喎？如果亂得滯，咪返英國加拿大避一排先囉，傻B！

加埋特區政府統治階層成班擦鞋仔，將香港嘅金融市場由「面向全世界」大力轉向，只「面向祖国」單一發展，削弱香港國際金融中心地位，任由紅色資本趕絕本地資本，用種種不合理手段進行大換血。於是上述一連串嘅不合理政經操作，埋下民怨嘅核彈，一經點火，自然一發不可收拾。其實所有事情都係咎由自取，與人無尤。

我已經講過好多次，讀歷史令我認識到兩點：『如果呢個世界一銀紙可以解決問題，咁呢個世界根本唔會有問題。』，另一點：『印銀紙可以解決當前問題，但會為之後帶來更大嘅問題。』

情況就好似20世紀初期嘅中華民國，窮到仆街係真，如果印銀紙可以解決問題，點解又要不停向列強借錢，維持國家開銷呢？去到1917年黎段政府時期，其實借得最多錢畀中國嘅，已經係日本人。當時日本已經用各種唔同嘅手法全面滲透入侵中國，就連中華民國向德國宣戰嘅外交策略，都要由日本人話事。

事實上1915年前，第一次世界大戰爆發後，日本係竭力反對中國參戰。原因係1915年前，日本喺中國嘅地位尚未完全穩固，同其他帝國主義國家之間仲處於爭奪狀態，當時執政嘅日本首相大隈重信，對華政策側重於政治侵略。但到咗1917年，新首相寺內正毅，吸取之前大隈重信過分政治侵略招致中國人民極大反感嘅教訓，轉移策略，將以前赤裸裸嘅政治掠奪，變為以經濟滲透為主嘅較隱蔽侵略方式。

1917年嘅2月，日本利用協約國方面急切希望中國參戰嘅心理，通過秘密外交，先後同英、俄、法、意四國簽訂密約，四國答應戰爭結束後支持日本，得到所有德國在華利益作為交換條件，因此日本先至允許中國對德國絕交同宣戰。

如果細心分析事件，仲有一點大家要注意。當日本唔想中國參加一戰嘅時候，其實美國係積極拉攏中國參戰。事實亦說明，美國同日本兩國都並非響歐洲大陸發生嘅第一次世界大戰嘅積極參與者，純粹塘邊鶴，想借住一次世界大戰奪取政治利益。如果到頭來中國參戰係因為美國而成事，咁難免會助長美國在華嘅影響力。於是日本人捷足先登，主導中國參戰，進一步抑壓中國向美國靠攏，以保障日本人自己響中國嘅龍頭地位。

上面所講一段歷史故事，無非想講畀大家知兩件事，第一件係，當時嘅中國其實完全冇主動嘅地位，甚至參加不參加一戰，都只不過係美國同日本兩大強國背後嘅政治鬥爭。中國係淪為政治籌碼，完全冇自主性，喺依一點上，其實非常可悲。而當時嘅中國淪入依種狀態，不外乎兩個理由，第一個理由係窮，第二個理由係冇足夠嘅軍事實力。

第二點係，要侵略另一個國家，經濟手段可能比軍事手段更來得奏效同徹底，當中國到處都係日本嘅資本、或工商業大部分都畀日本人控制，其實仲邊度能夠惡得出樣呢？而且所謂「侵略」，赤裸裸去表述，其實亦即係「搶錢」，無非都係想最後得到金錢上同經濟上嘅利益，其他嘅事物，無非都係「搶錢」嘅掩體。你能夠明白遊戲規則，思緒就唔會咁混亂。

政治同經濟，其實係同一種事物。前者係後者的手段，後者係前者嘅目的。


#常威 #大軍閥平反系列  #大軍閥 #民國歷史 


【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

【常威近代史】第二部《中國一百年前的第一次改革開放》實體購買
https://www.382now.com/product?id=151

【常威近代史】第三部《東方維多利亞女王之死》實體購買
https://www.382now.com/product?id=165

【198回：大清亡國關 #唯一敵人 蛋牛治】

♉20世紀初期，清帝國嘅唯一敵人，係日本。日本人自從打贏甲午戰爭，就千方百計想吞拼大清帝國，就算進入民國時代，日本人亦冇將吞併中國呢個企圖放棄過，直至1945年，成個遊戲先至正式結束，歷時接近半個世紀，當中帶嚟嘅災難同埋人命財富嘅損失，無法估量……

♐世界嘅局面瞬息萬變，到咗今時今日，中國嘅唯一敵人，係美國。諗返起幾年前，當奧巴馬仍然在位嘅時候，實際上冇人會諗到今日翻天覆地嘅變化。當胡錦濤同奧巴馬主政中美嘅年代，大家仲係朋友關係，偶爾有詏撬，但係萬事好商量，但習近平同特朗普上臺之後，形勢就產生180度嘅變化，下下對著幹，當中人嘅意志似乎主導著一切，依一點依乎毋庸置疑。

♈究竟當中發生乜嘢事哩？我嘅好朋友財經大師周顯先生就認為，一切都係因為2008年發生嘅一場「金融海嘯」，金融海嘯為美國帶嚟嘅財富損失其實無法計算，而美國修補嘅方法就係量化寬鬆，狂印銀紙修補洪水缺口。造成嘅後遺症係，美國必須向全世界其他國家輸出其通脹以及搜掠財富，之後日子，全世界資產泡沫氾濫，但經濟卻不斷向下行，似一點大家喺金融全開放型嘅城市香港可以充份見到，嚟到今日，全世界均陷入經濟衰退局面，只有美國嘅經濟一枝獨秀，你就可以睇到，當中政經金融操作又是何等厲害……

♐用更簡單嘅語言去講，二次世界大戰之後頹垣敗瓦嘅歐洲能夠經濟復興，因為美國肯買嘢；戰後日本躍升成為世界上第二大經濟體系，亦因為美國買嘢；就算係80年代中國嘅改革開放，經濟飛騰，背後嘅原因都係美國買嘢；更加唔好講蔣介石嘅臺灣、南韓或者香港，冇咗美國呢條終極大水喉，所有嘅經濟奇蹟根本唔會發生。但呢條大水喉（全球經濟火車頭），經過2008年一役，已經缺水。佢要由「買嘢」嘅身份，變成「賣嘢」嘅身份，由「放水」變「回壠」，一來一回、一收一放、一買一賣嘅角色轉變，就造就咗今日翻天覆地嘅世界形勢。

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上2000訂戶！

🍳https://youtu.be/t-azDfkISlM

【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

【常威近代史】第二部《中國一百年前的第一次改革開放》實體購買
https://www.382now.com/product?id=151

【常威近代史】第三部《東方維多利亞女王之死》實體購買
https://www.382now.com/product?id=165

https://petitions.whitehouse.gov/petition/hongkongers-support-congress-introduce-and-pass-be-water-act

支持美國推出be water act同將來通過佢
快d入黎簽署
表達香港人既支持和立場, 對付班賣港狗官同奶共派
呢排大家無乜聯署要簽, 比個任務大家, 就係簽左佢同發出去比人簽

【常威近代史】（三百零一回）
大軍閥平反系列

凡係政治鬥爭，必須有口實開火，「逃犯條例」其實好多人都唔知係乜嘢嚟，但係變成「送中」，就牽動好多人情緒，火隨風勢，變成政治大核彈，由打林鄭月娥變成打習近平，由打特區政府變成直接抽擊一國兩制、發炮攻擊共產黨，抑壓多時嘅仇中反共民怨一次過爆發。唔單止係咁，顛覆總基地香港更加再一次輸出革命，逆權風潮蔓延至加泰隆尼亞、智利、伊拉克，似乎香港人所受嘅生活壓力，似乎唔係例外。

政治核彈爆發就必須尋找解決方案，唔係話拉曬啲人開槍殺曬啲人就得、放棄曬一代人就得，正如經濟問題唔係印銀紙就可以解決。講開槍或放棄一代人（或直整兩代）嗰啲（西）人，智商其實好低。當然百貨應百客，統治階層亦好明白佢哋班客，有啲智商真係好低，對智商低嘅人（腦殘）就用智商低嘅說法去討好去收編，其實無可厚非，中國共產黨畢竟係意識形態大師，戰略嚟啫。21世紀，香港人逆權運動嘅興起，其實係同大學教育普及直接關係，將大學教育普及嘅係邊個？咪另一個意識形態大師當年嘅保守黨黨魁彭定康囉！

最新拆彈方法，王家衛講任何罐頭都會過期，將2047年嘅expiry date 延長續期（陳雲又中，真係堅！），以消解香港人民怨！嘩 ！有冇咁大隻蛤乸隨街跳呀！？大家唔好咁開心住，交換條件就係立23條國家安全法。呢招好毒，港人治港高度自治一國兩制跨越2047，對香港人嚟講一定係好事，中港區隔時限延長，至少層樓同地契保得住，順利過渡2047。但係立23條，亦即係斷送自由，冇蘋果日報睇，上街示威可以入你反革命判終身監禁，雙面刃，問你點揀？

其實我都唔識揀，不過我淨係知道一樣嘢。同任何人談條件，或訂立契約，首要原則就係對方信得過，如果對方根本唔守信用，發誓當食生菜，或者之前做過好多背信棄義嘅事，咁其實講乜都係冇用。你deal我就唔deal喇。

去返1917年4月，向德宣戰與否，成為黎元洪同段祺瑞「院府之爭」政治核彈。段祺瑞收得一筆日本人500萬英磅「西原借款」，自然要follow日本內閣嘅意願向德宣戰，以達成戰後日本人奪取德國一切在華利益嘅關鍵前題，但當時明眼人個個都睇得出有人收錢做嘢，加上21條作用下，反日情緒不斷升溫，國會同黎元洪自己就決定同段祺瑞打對台。段祺瑞馬不停蹄，推行宣戰政策，4月25號，召集各省督軍響北京召開軍事會議，討論參戰問題，實行以北洋軍事壓力，平復門洶湧民情。

會議之後，各省督軍響北京四出活動，積極鼓吹向德宣戰，當時嘅人叫佢哋做「督軍團」。嚟到呢度你會睇到，當時北京政府非常著重民意，我諗呢個就係所謂「法統」精神，今日中國，只有長官意志，並無普羅民意，任何議案，99%舉手通過，其實歷史係開倒車。

【199回：大清亡國關 #刺殺 蛋牛治】

♉「行刺」係20世紀初期常用嘅政治手段，當時作為政治人物，的確係九死一生，第一次世界大戰導火線，就係1914年6月28號，奧匈帝國皇儲斐迪南大公響薩拉熱窩被塞爾維亞民族主義者普林西普刺殺身亡開始，之後有2000萬人、加埋奧匈帝國同鄂圖曼帝國陪葬，可以講係歷史上最經典嘅刺殺事件。

♋慈禧太后咁X衰，一生人我諗亦試過有好多人想行刺佢，最後都唔能夠成功，我哋歷史上見到嘅，可能只係佔咗整體行刺數量嘅少數。今集youtube所講，保皇黨康有為派刺客行刺慈禧太后，我諗光緒皇帝冇可能唔知，冇光緒批准，康有為應該唔敢咁做。歷史上將光緒帝描述得太正面同太被動，但實際上佢亦都係一頭政治動物，會張牙舞爪，只不過佢嘅對手係馬基維利主義者慈禧太后。

♉史上最靚仔嘅美國總統約翰甘迺迪，死於刺客之手。佢嘅細佬羅伯特甘迺迪亦遭受同樣命運，一門雙傑皆死於冷槍之下，令人嘆惜，我個人認為並唔係偶然，真相同埋幕後黑手至今仍然係一個謎團。最後一個曾經被行刺嘅美國總統，係1981年朗奴列根，佢中槍大命不死，然之後亦再冇美國總統被行刺過，世界係文明咗？抑或係保安嚴密咗？或者兩者都有關係。

♊中國近代史上，毛澤東傳聞1970年比林彪個仔林立果策劃行刺過，佢哋打算炸毀毛澤東乘坐嘅專列火車，最後無成功到。但成件事到底係唔係真？亦都無辦法證明。我講過，正如林彪政變失敗後，逃亡乘坐飛機投奔蘇聯，最後飛機撞山爆炸，中共幾年後發表嘅新聞圖片，仲可以見到林彪一家人嘅完整燒焦屍骸？可信嗎？反正我就相信了。

♉早幾年，亦有傳聞中國國家主席習近平曾經被行刺，話佢腰部中槍，成兩個幾月冇出現喺公眾場合，言之鑿鑿。可信程度亦都相當高，不過又係無辦法被證實真偽。無論如何，活著嘅始終活著，死咗嘅你可能永遠唔會知道。就好似今日嘅香港，好多人話有好多年輕示威者被自殺被失蹤，同樣言之鑿鑿，係真定係假，至今仍然冇辦法證實。

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上2000訂戶！

🍳https://youtu.be/_q-BEW5FxL8

【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

【常威近代史】第二部《中國一百年前的第一次改革開放》實體購買
https://www.382now.com/product?id=151

【常威近代史】第三部《東方維多利亞女王之死》實體購買
https://www.382now.com/product?id=165

【常威近代史】（三百零二回）
大軍閥平反系列

「社會主義」、「共產主義」思潮響18世紀二、三十年代開始響歐洲興起。隨著工業革命及法國大革命發生（大史學家霍布斯邦口裡嘅雙元革命），整個世界出現咗翻天覆地嘅變化，依照左膠嘅說法，資本主義生產模式全面降臨地球，工業活動漸漸取替農業活動成為人類最重要嘅生產關係，城市則取代鄉村，成為人類聚居生存嘅全新單位。結果世界上出現咗所謂「工人階級」，佢哋嘅勞動力被資本家嚴重剝削，產生剩餘價值，資本家則利用剩餘價值嘅差額累積資本，平民百姓只剩下出賣自己嘅勞動力（血和汗）換取生報酬，漸漸，整個社會出現咗「資產階級」同「無產階級」嘅嚴重對立，貧富懸殊加劇，富者越富，貧者越貧。

19世紀後，人類到達咗「資本操控一切」嘅時代，資產階級不但操縱社會經濟生產活動，亦都操縱歐陸各國嘅政治操作，於是乎就產生所謂帝國主義，為咗擴大市場同埋向未開發地區掠奪工業生產原材料，歐洲各國之間明爭暗鬥不絕，呢個就係列寧口裡所講嘅「資本主義嘅最後階段就係帝國主義」。

喺呢個時候，有人開始以人本關懷前題下，嘗試解釋平民百姓嘅苦難來自於何處？終於響德國哲學家馬克思（Karl Marx，1818-1883）之手，成功統合之前嘅各種學說，創造出「馬克思主義」，並且最後得出結論，要徹底解決人世間嘅苦難源頭，必須由政治出發，無產階級要團結起來，以暴力手段推翻資本主義，解開枷鎖，建立無產階級專政制度，呢個亦係1848年馬克思同恩格斯（Friedrich Engels，1820-1895）所發表嘅《共產黨宣言》嘅中心思想所在。

1848年，工人階級挑戰政權活動，響歐洲遍地開花，但迅速畀資產階級暴力鎮壓，依一次喺社會主義或共產主義者口中，就係第一次大革命！其後響1871年，工人階級短暫佔領巴黎，成立「巴黎公社」，亦係人類歷史上第一個共產主義政權，當然只係曇花一現，最後亦係被當權者以血腥鎮壓結束。

所以響20世紀之前，世界上仍未真正正出現過一個共產主義政權，「共產主義」從來未成為過實際政治操作，一切只係流於空想同埋幻想，要知道「夢想」同「現實」永遠有一段好大嘅距離，人類總係以為山後面有一個更美麗嘅世界存在，可惜攀過大山之後，往往只係見到另一個更高嘅山。或者有一個比喻更加貼切，當人們努力逃出現有地獄嘅時候，下一步只不過係步向另一個更痛苦地獄。

當然有早知就冇乞衣，以馬克思主義而言，馬克思認為真正嘅無產階級革命應該係發生喺工業發展先進嘅國家裏面，因為只有嗰啲國家先有所謂「工人階級」存在，但係情況啱啱相反，真正第一個建立共產主義政權嘅係俄國，而俄國喺當時19世紀歐洲，其實係一個工業生產比較落後，仍然係一個以農業為主導嘅古老帝國。

沙俄王權嘅衰落，源於一場「日俄戰爭」，日俄戰爭中，俄國損失慘重，一支波羅的海艦隊被日本完全掃蕩，成為歷史上驚世大笑話。軍費開銷令國內經濟情況嚴重惡化，終於響1904年12月，二十萬人遊行到聖彼德堡東宮和平示威請愿，最後被俄國軍方以血腥鎮壓，死亡人數超過4000人，歷史上稱呼為「血腥星期日」。依一次暴力鎮壓，引起公眾極大憤怒，全國罷工示威暴動不絕，馬克思主義信徒急劇增加。

巨大壓力下，亡國之君尼古拉二世終於響1906年推行大規模政治改革，成立國家杜馬（國會）及實行多黨制，暫時抑壓俄國人民怒火。只可惜個天要你亡黨亡國，你就不得不亡。1914年爆發嘅第一次世界大戰係轉捩點，俄國以「協約國」身份加入戰團，以保護塞爾維亞為借口，於東線同德國奧匈帝國發生激戰，其實當時以俄國經濟實力，佢哋根本冇能力打第一次世界大戰，只可惜尼古拉二世嘅決定一錯再錯，太高估自己國家嘅實力。

終於響1917年2月，當尼古拉二世上咗前線督戰嘅時候，趁佢唔喺屋企，國內發生政變，「二月革命」推翻咗沙俄羅曼諾夫王朝300年的統治，「俄國臨時政府」成立，大家要清楚一件事，「二月革命」並非係列寧領導嘅布爾什維克（即共產黨）所發動，「俄國臨時政府」嘅組成成份，係由不同政治派別所協商組成，當中包括原本嘅貴族階層、資本主義政黨、社會主義政黨以及共產主義政黨，以當時擁有最強政治實力嘅亞歷山大．克倫斯基（1881-1970）為首。

「俄國臨時政府」並未能夠平定沙俄政權倒臺後，社會出現嘅經濟崩潰混亂狀態，有統計數據指出，1916年到1917年，俄國全國有50%嘅企業倒閉，失業群衆大量增加，而政治局面動盪，亦都蔓延至農村，到處發生遊行示威暴動，一發不可收拾，臨時政府財政亦面臨破產嘅威脅。最重要嘅一點，係克倫斯基並冇放棄戰爭，繼續派士兵上前線打仗，呢一點佢相當失敗。

列寧同托洛斯基所領導嘅「布爾什維克」本身其實係「俄國社會民主工黨」嘅其中一個派別，亦係當中最激進一個派別，簡單嘅區分，係「俄國社會民主工黨」要行各取所得嘅「社會主義」，而布爾什維克成員，則要行絕對平均嘅「共產主義」。響布爾什維克領導同組織下，1917年5月，聖彼德堡（當時已經改名做彼得格勒）出現十萬名工人同士兵遊行示威，佢哋叫嘅口號係「結束戰爭」，「一切權力歸蘇维埃」！

而「蘇維埃」，原本喺俄羅斯語中，解作「會議」或「代表會議」，meeting咁解。但係當時嚟講，蘇維埃就係「工人階級」「勞動階層」代表嘅代名詞，權力歸於蘇维埃，即係權力歸於工人階級，亦即係權力歸於代表工人階級嘅——共產黨！

下次繼續！

【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

【常威近代史】第二部《中國一百年前的第一次改革開放》實體購買
https://www.382now.com/product?id=151

【常威近代史】第三部《東方維多利亞女王之死》實體購買
https://www.382now.com/product?id=165

【💣香港關 #中英聯合聲明 腿蛋治 第十九回 #總結麥理浩時代】

♒今集我總結一下麥理治時代，香港第25任港督麥理浩爵士在任嘅11年間，所做嘅事情或作出嘅貢獻實在係同今日林鄭月娥一樣，四個字——「罄竹難書」，不過前者所做嘅統統都係好事，惠澤社群；而後者所做嘅全部係壞事，徹底破壞咗香港依個美好嘅地方。

♏我響Youtube中講過，其實香港呢笪地方，係由麥理浩一手打造出嚟，佢先至係香港嘅國父同埋上帝，其實冇錯，冇咗麥理浩嘅十一年，香港唔會變成今時今日咁，喺麥理浩管理香港嘅期間（1971-1982），佢嘅祖國大英帝國則江河日下，對比殖民地香港，則欣欣向榮，大家有眼睇，可能係時勢造英雄，亦可能係同個人嘅魅力同埋智慧管治能力有關。放返響今日嘅香港，最近半年，林鄭月娥同佢嘅管治班底完全露咗餡，一手一腳以弱智式嘅統治操作將香港一|步一步推入深淵，呢個唔係我個人嘅見解，係大部份人嘅民意，佢想避都無得避。好彩香港係玩聯繫匯率，同美元掛鉤，若然香港嘅貨幣係自由浮動，我諗已經跌咗5-10%。

♉可能你會為林鄭月娥辯護，話佢根本冇話事權，佢頭上面仲有中聯辦中央政府中國共產黨，佢只係一個扯線木偶，完全冇自由so that冇責任。但當年嘅麥理浩難道又係一個獨裁者嗎？佢頭上都有倫敦政府殖民地部、有英國首相有英女皇，但係佢管治香港嘅期間點解會有咁大嘅自由度呢？一言以蔽之，呢個就係民主制度同極權制度嘅分別，麥理浩係一個民主制度之下嘅殖民地港督，林鄭月娥即係一個極權制度之下嘅香港特首，兩者一比較，大家就一清二楚，唔使再多講。

♑當然麥理浩並唔係完人，佢同夏鼎基七十年代所堅持嘅高地價政策補貼社會福利開支，亦將香港變成一個樓宇炒賣嘅無間地獄，遺禍至今，完全冇得返轉頭，對於依一點，我要強烈譴責佢。2019年去到年尾，半年動盪之下，所有第四季經濟數據出現史無前例嘅向下走勢，但攬炒成功了嗎？股市仍然堅持喺二萬六七，樓價同租金只係輕微調節咗5-10%，年尾流流，亦會有好多食肆同零售做唔住，政府派糖，但政治上堅持唔肯妥協，情況踏入2020年，未許樂觀。

🇬🇧https://youtu.be/KaPM_zORbTE

【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

【常威近代史】第二部《中國一百年前的第一次改革開放》實體購買
https://www.382now.com/product?id=151

【常威近代史】第三部《東方維多利亞女王之死》實體購買
https://www.382now.com/product?id=165