大清亡國關慈禧蛋牛治 2

【常威近代史】（四百五十五回）
廣州國民政府成立

1925年7月1號，廣州國民政府正式成立，當然只名相問題，以孫文為牌頭嘅廣州軍政府一直存在，亦一直用唔同嘅角色經營廣州控制廣東，今日堂堂正正開靚個招牌，可能亦都係幕後人有信心，江山遲早會落入南方人手上。

陳炯明嘅粵軍殘餘勢力差不多完全掃蕩完畢，廣州嘅資本家及帝國主義者受制於左派發動嘅「省港大罷工」，自顧不瑕，工人階級萬眾一心，正正就係起朵之時。當然一切要多得孫文留低嘅「聯俄容共」政策，來自蘇聯嘅金盧布、軍事顧問同軍備軍火，一船一船運到廣州國民政府手上，有錢就乜都可以玩，多謝幕後金主布爾什維克！

6月15號，國民黨中央委員會決定改組大元帥府為國民政府，6月24號，胡漢民發佈改組國民黨政府決議案，宣佈六項改組法則，7月1號，國民政府成立，認真快手！汪精衛 （1883-1944）、胡漢民（1879-1936）、張人杰（1877-1950）、廖仲愷（1877-1925）、譚延闓（1880-1930）、許崇智（1887-1965）、于右任（1879-1964）、張繼（1882-1947）、林森（1868-1943）、徐謙（1871-1940）、戴季陶（1891-1949）、伍朝樞（1887-1934）、古應芬（1873-1931）、朱培德（1889-1937）、孫科（1891-1973）、程潛（1882-1968）十六人為政府委員，其中汪精衛、胡漢文、譚延闓、許崇智、林森五人為常務委員。後來成為大漢奸嘅汪精衛做國民政府主席，代替孫文原本位置。

國民政府下設外交部、財政部、軍部、交通部及司法部，分別由胡漢文民、廖仲愷、許崇智、孫文之子孫科、徐謙擔任部長。7月1日，各委員宣誓就職，並發表國民政府成立宣言，向全國宣佈「國民政府唯一職責，即在履行先大元帥遺囑」，正式將孫文擺上神枱，成為最高存在。所以我成日講，歷史人物一定要死得合時，好多時候機會窗口（ Opportunity Window）係由死亡嗰一刻開啟，黃家駒、梵高都係一樣。

國民政府成立，當前最重要任務係著手廢除不平等條約（即係收返啲租界同經濟利益）、以及召集國民會議（重開國會講咗好多年）。同時公佈《國民政府組織法》，呢點非常重要，《國民政府組織法》規定國民政府採用合議制，需受國民黨嘅指導及監督，掌管全國政務，亦講比大家知，所謂「國民政府」係「一黨專政」，只有國民黨一黨獨大，當然表面上唔係，但內裡係，黨國合一，亦成為之後嘅基本玩法。大家千祈唔好話係中國共產黨開啟「一黨專政」先河，首先玩「一黨專政」嘅其實係國民黨，推向再前，其實又係孫文始創。

仲有一點又非常重要，國民政府成立了，中共冇人有份進入高層，真係有份開工，冇份分享榮譽。

7月3號國民政府將廣東大學命名為「國立中山大學」，亦即係今日嘅中山大學。同日，「廣州國民政府軍事委員會」成立，汪精衛、廖仲愷、蔣介石為委員。7月8號，香港《工商日報》創刊之日，國民政府決定將「黃埔學生軍」擴大為國民革命軍第一軍，成為國民黨旗下最強嘅武裝力量，依支武裝力量嘅話事人，當然就係蔣介石。7月15號國民政府任命宋子文（1894-1971）為中央銀行行長，金權正式落入宋家之手。

一片風起雲湧之際，全國工潮繼續發生，此起彼落，7月6號，上海公共租界工部局電氣處借工人罷工為藉口，通告即日起停供各大工廠馬達電力，造成五萬工人失業，你唔鍾意開工要罷工，我就同你一齊攬炒！7月10號，日本帝國公使向段祺瑞交涉上海、漢口、九江、沙面等衝突事件嘅損失，向北京中央政府施加壓力！7月21號，段祺瑞派出特使到廣州洽談外交事宜同商量「沙面慘案」善後，南北暫時槍口一致向外，力抗如狼似虎嘅帝國主義者。

7月23號，國民黨意識形態大師的戴季陶出版《國民革命與中國國民黨》一書，國民黨右翼理論終於自成體系，上一個月，戴季陶已經發表《孫文主義之哲學基礎》一文，以孫文「三民主義」為國民政府指導思想及正統意識形態奠下基石。早響5月國民黨一屆三中全會上，戴季陶就提出所謂「純正三民主義」説法，《國民革命與中國國民黨》出版後，則進一步形成系統化嘅戴季陶主義。

戴季陶主義內容其實好簡單，就係以孫文「純正三民主義」為中心，反共反左，反對馬克思主義，反對共産主義反對階級鬥爭，要用中國傳統儒家哲學嘅仁愛道德體系，解釋孫文嘅三民主義革命思想；宣揚對立階級具有共同嘅仁愛性，宣揚階級調和，要求和諧同平穩，反對馬克思主義提出嘅階級鬥爭理論。戴季陶鼓吹國民黨嘅獨立性同排他性，反對共產黨員加入國民黨，同時反對國共合作。

戴季陶主義出現，亦為之後好快會發生嘅國共分裂埋下伏線。戴季陶同蔣介石嘅關係何等密切？根本就係生死與共嘅好兄弟，連蔣緯國（1916-1997）嘅親生父親其實係戴季陶。因此蔣介石反檯清黨，過橋抽板，其實一早已經有佈署，亦唔係突如其來，左派或共產黨睇唔到或冇防備到，被殺個措手不及，係嚴重嘅戰略失誤。

#常威💀 #大軍閥平反系列 #大軍閥 #民國歷史

✅本土唯一香港土話近代史文本

❤【常威近代史】第一部《大清亡國關慈禧蛋牛治》，全面開放，免費下載， #freedownload！

Free下載連結🔽

https://play.google.com/store/books/details?id=C3hjDwAAQBAJ

【常公子歷史頻道328回：替大軍閥平反系列之 #中國標點符號】

♏美國總統大選風起雲湧，民調領先嘅拜登由一開始開票，就落後俾特朗普，特朗普喺重要嘅摇擺州佛羅里達州、德薩斯州及喬治亞州勝出，形勢一片大好，本來連任在望，但係到咗點票後期，郵遞選票扭轉整個局面，原本以為特朗普可以順利勝出嘅威斯康辛州同密芝根州出現逆轉，民主黨拜登反領先，一來一回之下，如果照目前嘅狀況（11月5日星期四早上），拜登將會啱啱得到270張選舉人票，擊敗得到268選舉人票嘅特朗普，以兩票輕微之差，一個馬鼻勝出今次大選。

♐由於雙方嘅票數咁接近，而關鍵又響郵遞選票之上，因此共和黨特朗普一定唔會認輸，可以預計一連串嘅法律訴訟將會在之後兩個月展開，最後鹿死誰手，仍然係未知之數？不過無論如何，今次大選將會加劇美國社會嘅撕裂狀態，可以預料無論之後四年邊個執政，情況都會相當混亂同艱巨，世界整體局面，亦唔會因為一場美國總統選舉有太大轉變，畢竟冰封三尺非一日之寒，如果我哋以為換一個人，就可以完全翻盤，咁係對歷史認知嚴重不足。

♐一場新型冠狀病毒改變咗整個世界，如果冇呢場瘟疫，特朗普一定連任成功；而到咗目前為止，全人類仍處於「被動抗疫狀態」，最樂觀估計，如果疫苗生產同接種運作順利，2022年底世界將會回復正常（如果真係有所謂「正常狀態」嘅話），但整個2021年，甚至2022年，將會係非常難過嘅一兩年就一定。

♑不過就算難過，始終都要過。香港係外向型經濟體，靠全世界資金流動出入而生存揾食，其實疫情對香港先影響至深，去到現在，具體惡劣情況逐漸浮現出嚟，企業裁員會加劇，社會經濟一潭死水，最弊股市樓價並冇反映現實情況，個局再搞多一兩年，加埋一直冇辦法解決嘅政治問題，情況可以變到好壞，真係元氣大傷。不過天下無不散之筵席，盛宴杯盤狼藉過後，一定要有人收拾碗筷，靜觀其變，平常心做人。

♑【常威近代史】第五部《霹靂大忠臣對決無敵大買辦》電子書上架（條download link在下面），請大家課金支持我一直走落去，直至劉少奇骨灰到達北京王光美手上…

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上4000訂戶！

✅https://youtu.be/WHdNsdpF62c

幫你推一推

【常威近代史】（四百五十六回）
廖仲愷被刺 真凶是誰？

1925年8月11號，一間由日本人管理嘅天津紗廠，工人罷工，要求改善待遇聲援五卅運動，資方連同中國軍警，加上廠方保安當場打死6個人，打傷20個人！第二日天津其他紗廠工人前來聲援，舉行過萬人集會，直隸總督李景林覺得事態嚴重，派出1500名士兵荷槍實彈，包圍示威現場，突然槍聲響起，士兵向工人實彈開槍，當場槍殺20幾人，打傷百幾人，逮捕400人。而且李景林仲派軍隊封鎖各工會及學生會等團體，暴力鎮壓天津市示威遊行，其手段到達令人髮指地步，天津民眾處於恐怖之中。

有好多人唔明點解咁多人會加入共產黨？要推翻資本主義？但如果你活喺當時，一個血肉橫飛嘅恐怖時代，其實好多人都會。而且列寧布爾什維克革命奪權已經發生，並且成功存活，中國工人階級亦睇到未來同希望。

8月11號，北京中央政府段祺瑞委任王寵惠（1881-1958）為修定法律館總裁，負責修訂中華民國同西方列強各國嘅各項不平等條約，其實當時中國已經有不少聲音要收回「租界制度」，取消西方列強喺中國國內無法無天嘅「國中之國」，脫離國土被列強瓜分嘅悽慘境況。

8月20號上午9點，國民黨大員廖仲愷偕同夫人何香凝（1878-1972）前往參加國民黨中央執行委員會會議，響到達中央黨部門口上樓梯時，畀幾名凶徒突然開槍射擊，廖仲愷身中四槍倒地，送往醫院途中不治身亡！

事發突然，國民黨中央政治會議當日舉行臨時大會，決定由許崇智、汪精衛、蔣介石三人組成特別委員會，全權處理政治、軍事及警察事務，並且宣佈廣州全城戒嚴！25號，根據調查結果，特別委員會下令拘捕嫌疑犯胡毅生、朱卓文、林直勉三人，但胡毅生同朱卓文已經潛逃，衹能夠捉到林直勉及與此案有關嘅梅光培、魏邦平、梁將楷等人歸案。國民政府成立由李章達等七人組成嘅審判委員會、及由朱培德、周恩來組成嘅檢察委員會，對案件進行審理工作。

事後得出嘅結論係，行刺廖仲愷幕後指使係西方國家勢力同國民黨右派集團，不過依件案背景實在太複雜，內幕亦都好深，廖仲愷係國民黨嘅左派大將，堅守孫文遺志，支持「聯俄容共」、「國共合作」政策，加上本案要犯亦都逍遙法外，從來冇墮入法網！好話唔好聽，搵到嘅都祇不過係替死鬼、白手套。因此行刺廖仲愷案真相一直未能夠大白於世，直至今時今日。

廖仲愷係孫文嘅親密戰友，當時聲名極好，拍得住大漢奸汪精衛，佢嘅死引起全國人民嘅震驚同埋哀悼，廣州市十幾萬人參加吊唁同送葬，全國各地紛紛舉行追悼會，國民政府亦都命令各機關下半旗三天，所有黨員佩戴黑紗7日，以最高規格以示哀悼。附帶一提，廖仲愷有個仔叫廖承志（1908-1983），後嚟成為中共大員，響香港回歸問題上，角色舉足輕重。

【常威近代史】（四百五十七回）
莫斯科中山大學開學了

1925年9月4號，段祺瑞指令外交、交通兩總長批准「萬國郵政公約」，呢個係中國郵政史上嘅大事，中國正式同全世界全面郵政接軌；同日廣州培英中學被土匪打劫，掠去人質56名，治安有幾混亂？一睇就知；兩日後，9月6號山東黃河決堤浸死幾千人；9月7號，上海民眾舉行「辛丑條約國恥紀念大會」，會後群眾發動遊行，遊行隊伍行到英租界時，被英巡捕開槍射擊，即場被打死多人；9月7號，武漢居民因「漢口慘案」冇人解決，舉行20萬人水陸大遊行；9月14號，汪精衛繼任國民黨黨軍及黃埔軍校黨代表；9月15號，由張學良（1901-2001）指揮嘅奉軍強行解散「上海總工會」，抑壓上海工人罷工行動，並且通緝工會委員長共產黨員李立三（1899-1967）；9月19號，國民政府軍事委員會任命中共要員周恩來為蔣介石做軍長嘅第一軍政治部主任。

9月22號，江西安源路礦發生「九月慘案」。17號，安源路礦數千個工人舉行紀念罷工勝利三周年慶祝大會，當晚漢冶萍公司總經理盛思頤（盛宣懷第四個仔）宣佈解散工人俱樂部，即時開除工人1200名。20號晚，江西督辦方本仁（1880-1953）派出大批軍警包圍安源路礦俱樂部，逮捕俱樂部副主任黃靜源等70人。21號，俱樂部宣佈同盟罷工抗爭，呢個時候，正係井下工作嘅數百名礦工聽到消息後，即刻將井下嘅監工職員十幾人拘禁作為人質，9月22號軍警下井作出營救行動，即場打死工人3名，打傷數十人！行動結束後，23號，千幾個工人被開除並且押解出江西省，一個月後，黃靜源亦被當局秘密殺害，史稱「九月慘案」。

你睇，啲罷工工人有幾咁刁？手法有幾咁出位？資本家有幾咁邪惡？官商勾結有幾咁嚴重？工業行動有幾咁殘忍？其實，到底係邊個啱？邊個唔啱？其實又冇人知，任何人只會從自己嘅「階級利益」所出發，大前題係衹要對自己有利益就係正確，損害自己利益就係不正確，Right？大部分人都有上述觀點，從自己出發之前要顧及他人利益？咁其他人有冇顧及過我嘅利益呢？你唔需要回答呢個問題，因為世界上冇人能夠回答呢個問題，因此世界上永遠有「階級鬥爭」發生，如果你唔係一個左派，你可能會覺得冇，不過並唔係真係冇，祇不過係用另一種名相呈現喺你眼前。

唔明，再講多少少，「階級鬥爭」可以被演繹為一場「勞資糾紛」亦無不可；另外「低下階層爭取合理權益或生存權利」，亦都可以被視為一場「革命」。一切眾生，皆是「名相」問題，一切情感，都是「執著」問題；人點解要信佛，就係要「盪相遣執」，看透名相之分，遣除自身執著，用佛教術語，就叫做擺脱生死輪迴，信不信由你。

一條歷史頻道，冇理由變咗條宗教頻道，回歸主旨，1925年9月最重要嘅事情：就是蘇聯政府為咗配合中國革命培養革命人才，特別係軍事人才，特事特辦，響蘇俄首都莫斯科創立咗莫斯科中山大學，以國父孫中山命名，難道到了這一刻，你還以為孫文不是正宗左派嗎？

大佬特事特辦，做細嘅國民黨當然全面配合，為此成立咗由譚延闓、古應芬、汪精衛組成嘅選拔委員會，選拔中國革命青年前赴莫斯科。寫到呢度叉開一筆，其實孫文死後，承繼孫文嘅應該係汪精衛，你睇乜都關佢事喎？黨、政、軍全部擔大旗，當然大家都知道非常可惜，蔣介石之後會同佢分身家，爭做國民政府揸Fit人，從此兩個勢不兩立，搞「寧漢分裂」玩兩個中央，到咗最後，一個成為千秋萬世嘅一代偉人，另一個則成為同秦檜魏忠賢等級嘅賣國大漢奸，世事何曾玄妙？論「奸」？我同你講汪精衛要輸九條街，佢充其量只係一部單車，而佢嘅對手係一部法拉利。

莫斯科中山大學兩年制，以訓練革命幹部為己任，主要開設俄語、西方語言（即係英文）、社會發展史、中國革命運動史、俄國革命史、哲學、政治經濟學、軍事學、及列寧主義等課程。中山大學附設中國問題研究所、翻譯局同中文印刷所等機構，經費主要來源於赤色職工國際同蘇聯工會中央委員會，簡單啲講，即係「第三國際」。

兩個月後嘅11月，莫斯科中山大學喺莫斯科工會大廈舉行開幕典禮，主禮人係紅軍之父托洛斯基，首任校長係狄拉克，國共兩黨大批留學生入讀，中國共產黨人當中包括鄧小平（1904-1997）、俞秀松（1899-1938）、左權（1905-1942）、吳玉章（1878-1966）、林祖涵（即林伯渠、1886-1960）、葉劍英（1897-1986）、張聞天（1899-1976）、陳紹禹（即王明、1904-1974）、秦邦憲（即博古，1907-1976）、王稼祥（1906-1974）、楊尚昆（1907-1998）等，粒粒皆星，史稱「二十八個半布爾什維克」。而國民黨方面一個抵十個，一個蔣介石之子蔣經國（1910-1988）夠照嘞！

去到1928年，莫斯科中山大學改名為「中國勞動者共產主義大學」，1930年停辦，呢幾年間，莫斯科中山大學訓練出大批中國共產主義列寧式幹部，或者叫職業革命家、又可以叫無產階級先鋒隊，總之革命同埋政治就係佢哋嘅終身職業同埋終身使命，依群人亦係共產主義喺中國發揚光大及最後奪權建國嘅中流砥柱，所以唔好再同我講教育唔重要，教育係最重要，所謂「學校」亦係最重要嘅「國家機器」！

【常威近代史】（四百五十八回）
兇手是誰其實一啲都唔重要

莫斯科中山大學成立，「第三國際」為中國革命訓練了大批「職業革命家」，為中國無產階級大革命事業對號入座，實踐列寧主義中「無產階級先鋒隊」奪權嘅基本遊戲規則——好多人天真地相信，政權易轉需要大多數人民民意（或選票）支持，其實係錯，所謂奪權本身根本唔需要大多數人民支持，衹要有「基本盤」，有少量唔怕死意志堅定嘅「革命同志」（Revolutionary comrades），不怕犧牲投身戰鬥，就能夠扭轉整個政治局面。因為社會上大多數人其實係「中立」嘅（係廢嘅、係冇膽嘅、係見風駛艃嘅），佢哋好多時候只係口講支持，真係要動刀動槍埋身肉搏，其實大部分人會立即縮沙！投票可以，投身火海就咪搞我。

有人話5%嘅人，就可以決定其他95%人嘅命運，其實我個人覺得5%可能都係一個高估比例，你睇吓意大利墨索里尼（1883-1945）極右法西斯奪權、推倒民主政底上臺執政，最初支持墨索里尼嘅意大利人，一定冇5%。但係支持墨索里尼嘅人敢於戰鬥唔怕死喎打去羅馬博一舖，所以咪得咗囉。

政治係最大嘅投機，一個唔小心就會人頭落地，不過風險愈大，回報亦越大，你敢去做5%唔怕死嘅人，一旦奪權成功，你同你嘅後代就可以享有政治分紅；正如孫文都講得好清楚，革命時期佢將國民黨員分成幾級，由一開始未成功跟我孫文打江山出生入死，他日革命成功就係統治階層，睇定形勢先跟我孫文嘅、或者贏咗之後先加入，咁就冇權做統治階層，只係有資格響側邊食花生。唔想付出任何代價又想贏？唔要付出又想分花紅？世界上邊有咁大隻蛤乸隨街跳呀？仲想食兩家茶禮？或者唔想得罪兩邊？開邊瓣都有份贏冇份輸？有人真係會咁樣諗嗰喎，以為個世界真係咁著數？香港人就係因為呢種想法惹禍上身，到頭來兩邊都不是人……

1925年9月，隨住國民黨左派大將廖仲愷之死，國民黨內左右之爭進一步激化，傳說刺殺廖仲愷嘅幕後黑手係國民黨另一大員右派胡漢民（1879-1936），不過始終係無頭公案，無證無據。不過，中共就集中火力批駁國民黨右派理論「戴季陶主義」，批判戴季陶反對共産主義、反對階級鬥爭並汙衊共產黨寄生於國民黨嘅言論，列舉事實證明共產黨喺國民黨中國革命中嘅重要性同地位。本月，中共第一號人物陳獨秀喺雜誌發表給戴季陶嘅一封信，另一個重要人物瞿秋白（1899-1935）亦都發表《中國人民革命與戴季陶主義》一文，駁斥戴季陶喺政治上反對階級鬥爭、喺思想上宣傳唯心主義史觀、同埋喺組織上反對共產黨員加入國民黨嘅種種說法，全力向對手開火。

10月2號，胡漢民因為涉嫌行刺廖仲愷，被迫同女兒乘坐「列寧號」客輪離開廣州，前赴蘇俄考察，以避風頭。根據調查，行刺廖仲愷案，案中要犯胡毅生（1883-1957）係胡漢民嘅堂弟，另一要犯林直勉（1888-1934）係胡漢民助手，兩個人都同胡漢民有關聯，而且案發前佢哋曾經喺胡漢民屋企會，商議行動計畫。令到胡漢民非常尷尬，當然胡漢民話唔關自己事，但係咁嘅情況下，亦好難唔關你事啫，胡生？

胡漢民受到黨員同民衆廣泛嘅懷疑同譴責，喺廣州已經無法立足，而且加上國民黨內兩大巨頭汪精衛同蔣介石正進行權力鬥爭，少隻香爐少隻鬼，兩人都利用「刺廖案」驅逐胡漢民勢力，國民黨特別委員會裁定，派胡漢民以國民政府特使名義出國考察，就係逐佢出廣州。孫文死後，本來國民黨四大金剛，一個死加一個走，剩低兩個，跟住就係一山不能藏二虎嘅遊戲。

蔣介石係「刺廖案」嘅最大得益者，期間佢就任廣州衛戌司令及國民革命軍第一軍軍長，步步高昇，大大加強咗自己嘅軍事實力同埋政治地位。如果用偵探小說嘅推理手法，獲利最多者通常就係最大嫌疑犯，保險受益人通常就係兇手，不過喺歷史記述上，似乎傾向真凶係胡漢民，不過真相係每個人都冇辦法知道喇。

左右之爭，意識形態之戰，從政治蔓延到軍隊，1925年10月2號，汪精衛到黃埔軍校上任黨代表一職，同日發表演說，鼓勵黃埔軍校學生閱讀社會主義、共產主義、馬克思主義及其他共産主義刊物嘅訓令，亦都開宗明旨話畀大家知我汪兆銘係國民黨左派。

10月5號，廣州國民政府發佈報《告東征軍將士書》，正式宣佈進行第二次東征，上一個月，粵軍軍閥陳炯明召集最後力量，陸續佔領東江地區，並召集重兵於惠州，以三面夾攻之勢進攻廣州，作垂死一擊，9月28號國民政府決定再次東征，任蔣介石為東征軍總司令，汪精衛為國民黨代表，周恩來為政治部主任。

東征軍共分三路縱隊，分別由程潛（1882-1968）、何應欽（1890-1987）、李濟深（1885-1959）任隊長，總兵力達到三萬人，10月6日正式出征，10月10日逼近惠州，10月13號發動總攻，擊經過30多小時嘅激戰，終於攻剋陳炯明最後根據地惠州，跟住東征軍乘勝追擊，勢如破竹，相繼佔領海豐、陸豐、蘭塘、紫金、河源、五華、興寧、梅縣等地，11月4號攻剋汕頭，到11月底將東江地區陳炯明勢力全部肅清，徹底剷除擾亂國民政府多時嘅粵軍分離勢力，陳炯明戰敗，著草去香港，呢個酷愛自由、一生不羈放縱小軍閥嘅故事，亦告一段落。

#常威💀 #大軍閥平反系列 #大軍閥 #民國歷史

【常公子歷史頻道330回：替大軍閥平反系列之 #安福俱樂部】

♏DQ四個議員，全體泛民辭職，祇有熱血公民鄭松泰同醫學界梁沛然繼續留低，認真轟轟烈烈，今次離開嘅泛民議員，來屆立法會選舉是否可以入閘參選，都有疑問。可以講，今次係香港「議會文化」嘅一個大轉折，未來會係點？應該係中央會一直打落去，直至打到對手一棟都冇為止，完全冇停手嘅跡象，戰略上亦都冇停手嘅必要，反正大家都已經撕破臉，禮尚往來有傾有講嘅時代已經過去，平衡已經響2019年下半年大亂局中全面消失，假如當時泛民有能力叫停亂局，泛民仲有小小籌碼在手，可惜底牌被摸透，亂局出現同泛民取態亦都無關，終於連最後嘅小小利用價值都冇埋，既然冇利用價值，對統戰大局亦都冇任何幫助，因此可以全部say goodbye。

♉自97年回歸之後，所謂「議會抗爭」文化亦都到此告一段落，前後玩咗23年，四分一個世紀，都係時間換換玩法同形式。由2003年提出香港23條立法開始，足足拖咗16年，最後一次過處理清楚，國安法一立，所有嘅疑問亦被釐清，大家無需要半天吊，清清楚楚應該要做什麼，不應該不可以做什麼，亦未嘗唔係一件好事。可能有好多人好難接受今次嘅大變局，但事實擺在眼前，大家亦冇得返轉頭。過去只係一種記憶，未來先係最重要，香港人一切原有嘅生活模式都會徹底改變，大家要重新面對一個全新嘅生活政治經濟格局，去重新適應。不過香港人一直強調自己適應力甚強，任何時勢皆可絕處逢生，響新遊戲新玩法中，如果我哋呢種性格都係冇變過嘅，應該唔使怯嘅。

♑好多人認為民主自由好重要，其實響香港社會，冇嘢比生活同食飯更重要，呢度仍然係一個笑貧不笑娼嘅庸俗世界，如果你認為上述兩件事即「民主自由」同「生活食飯」係等價嘅話，咁一邊喪失咗少少，另一邊應該增加多少少，但如果兩樣嘢一齊跌落去，咁就係雙輸局面；正如防疫封城會影響經濟但可以救人命，但如果防疫封城之餘仲有大量人被感染，咁就係雙輸局面。冇人想兩頭唔到岸，得到其中一樣嘢，都係好嘅。

♑【常威近代史】第五部《霹靂大忠臣對決無敵大買辦》電子書上架（條download link在下面），請大家課金支持我一直走落去，直至劉少奇骨灰到達北京王光美手上…

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上4000訂戶！

✅https://youtu.be/RVk3YFWaqJg

【常威近代史】（四百五十九回）
笑面虎大軍閥孫傳芳

一雞死，一雞鳴，第二次直奉戰爭，民國關公吳佩孚大敗於張作霖之手，直系大敗，大總統曹錕被軟禁於北京，奉系推段祺瑞走馬上任處理中華民國北京中央政府，吳佩孚戰敗後，秦皇島上船回歸大本營洛陽城，爛船仲有三分釘，話曬都曾經「八方風雨會洛陽」，實行重整旗鼓同你再砌過。

但係直系軍閥，亦唔係單單只係得個好打得嘅關公吳佩孚，另外一個人亦迅速崛起，盤據中原江南一帶，佢就係直系笑面虎孫傳芳（1885-1935），其實孫傳芳同其他大軍閥一樣，響正史上都係一條仆街杏加橙，呢樣嘢根本唔駛講，衰就一定，你睇個朵叫「笑面虎」，本身就係貶義詞。大家都要明白，北洋軍閥之中有邊個好人呢？其實係冇，依種邏輯叫「一竹篙打一船人」。當勝利者標籤咗你係某個身份，標籤咗你係某啲組織某種勢力或某個意識形態嘅一員，無論你參與程度是深是淺（甚至係定唔係、有定冇），到最後你就係同一黨人。當歷史大清算發生時候，亦一定將你計算在內（中國人叫連坐法），連同其他垃圾一齊送入歷史堆填區。

「一竹篙打一船人」歷史思考邏輯，好多時候都好唔公平。北洋軍閥集團中都有好人能人，難道滿清當權200幾年一個好官都冇？同樣道理，今日中國難道只有貪官裸官？一樣米養百樣人，每個組織每個政權裡面都有好人亦有壞人，問題在於比例多寡？

我哋成日將「眾數」變成「單數」思考，用「一竹篙打一船人」嘅思考方法，其實只係方便自己思考，係思維上嘅慵懶表現。如果放喺實際操作，就係方便管理同埋易於辦事。既然猶太人中有大奸大惡控制全球金融嘅幕後大黑手，咁就不如簡單啲，殺曬所有猶太人就搞掂，滅你族，一天光晒，當時希特勒納粹黨就係咁諗，中國人叫「寧枉無縱」，寧願殺多，唔好殺漏。好似好殘忍咁？但其實好多時候就係咁樣發生，到咗今時今日你冇理由唔會明白。

一旦殲滅戰開打，就一定會有「寧枉無縱」情況發生。大家以禮相待有傾有講只會喺和平盛世（大家夠錢駛）發生，依種狀態叫「平衡」，「平衡」其實又係一個不穩定嘅狀態，俾風吹一吹或其中一邊郁一郁就會消失，「平衡」消失後，就出現矛盾，矛盾不斷加劇深化，之後就係埋身肉搏殲滅戰，一係唔打，是旦一方吞聲忍氣，但一開始打交就唔會以禮相待，你見過人一面打交一面say sorry say love you all未呢？冇架！戰爭一旦開打，就要打到有一邊驚為止認輸為止，有人認輸先可以再開始談判，談判協商後就締做另一個階段嘅平衡，又會回復以禮相待有傾有講嘅狀態，然後大家翹埋雙手，等待下一次平衝消失再打過——上述情況用左派語言，叫「唯物史觀」，又可以叫「矛盾論」或者「不斷革命論」，要睇吓你係原教旨派、毛派定托派？

孫傳芳早年喺北洋武備學堂畢業，以名列前茅成績獲得清廷公費留學日本士官學校深造，佢係讀足四年先畢業，同期同學有聯省自治之父趙恒惕（1880-1971）、山西王閻錫山（1883-1960）、段祺瑞手下第一猛將徐樹錚（1880-1925）等大軍閥。順帶一提，後來稱霸中原嘅蔣介石，雖然都留學過日本，但係所接受嘅只係初級軍事訓練，係小學生並唔係大學生。

1909年（宣統元年），孫傳芳接受陸軍部考試，成績優秀，加入王占元（1861-1934）所率北洋陸軍近畿第2鎮，任步兵隊第5標教官。民初時代，第2鎮改編為第2師，駐紮湖北省，孫傳芳升為旅長。1920年7月直皖戰爭中，孫傳芳隨直系王占元俘虜皖系長江上游總司令吳光新（1881-1939），孫傳芳隨後接任長江上游總司令。1921年8月，王占元在湖北省失勢。孫傳芳接任第2師師長，成為兩湖巡閱使吳佩孚部屬，正式加入直系，成為雄霸一方嘅軍閥。

1922年4月的「第一次直奉戰爭」後，孫傳芳勢力冒起，由軍閥變成大軍閥，1923年1月，孫傳芳率軍前赴福建，被任命為福建軍務督。1924年9月，「第二次直奉戰爭」前哨戰「第一次江浙戰爭」開打。孫傳芳支援直系江蘇督軍齊燮元（1885-1946），擊敗皖系的浙江督軍盧永祥（1867-1933）。此後，孫傳芳被任命為閩浙巡閱使兼浙江軍務督理。

自此，蘇浙一帶為孫傳芳、齊燮元、盧永祥三人勢力鼎立。「第二次直奉戰爭」中，直系敗北，段祺瑞上場，奉系張宗昌（1881-1932）為支援盧永祥而南下挑戰孫傳芳。孫傳芳於1925年1月同齊燮元結成同盟，組織「江浙聯軍」迎撃張宗昌，戰勝敵人。加上新上任嘅段祺瑞為籠絡孫傳芳而任命其為浙江督辦，孫傳芳先打敗盧永祥，亦順勢逼走盟友齊燮元下野，玩一人獨大，另外孫傳芳亦秘密同馮玉祥（1882-1948）領導國民軍結成同盟，盤踞中國最富裕嘅上海江蘇浙一帶。

1925年10月，孫傳芳自任浙、蘇、閩、皖、贛「五省聯軍總司令」，先發制人向奉軍發動猛烈攻擊！9月6號，張學良（1901-2001）以鎮壓工運為名，率領奉軍進駐上海，之前8月，段祺瑞已經委任奉係將領楊宇霆（1886-1929）、姜登選（1880-1925）為江蘇及安徽督辦，攤分孫傳芳勢力，奉、直二系矛盾進一步激化，於是孫傳芳聯繫馮玉祥嘅國民軍、同埋自己嘅直系部隊，組成五省聯軍，不宣而戰，打去上海，史稱「第二次浙奉戰爭」！

#常威💀 #大軍閥平反系列 #大軍閥 #民國歷史

✅本土唯一香港土話近代史文本

❤【常威近代史】第一部《大清亡國關慈禧蛋牛治》，全面開放，免費下載， #freedownload！

Free下載連結🔽

https://play.google.com/store/books/details?id=C3hjDwAAQBAJ

【常威近代史】（四百六十回）
孫傳芳獨佔上海灘

『安排他日終須仗，甘苦來時要共嘗。』

1925年10月15號，「第二次江浙戰爭」爆發，孫傳芳組成「五省聯軍」，不宣而戰，進擊響上海嘅奉軍張學良部隊，張學良中冷箭，被打個措手不及立刻撤退，10月16號，上海呢個大錢罌，當時全世界最重要嘅四個城市（倫敦紐約巴黎上海）之一，落入大軍閥孫傳芳手上，同日孫傳芳發出討奉通電，鄂、皖、贛三省響應，並請出吳佩孚同孫傳芳共主大計。

11月初，孫傳芳部隊同奉系張宗昌嘅奉魯聯軍喺徐州附近展開大戰，經過幾日交手，孫傳芳部隊佔領軍事重要戰略位置徐州，奉系勢力始終水土不服，全面退出南方，孫傳芳成功控制五省，成為當時勢力最大嘅直系軍閥。

其實今次「第二次江浙戰爭」，亦係「第二次直奉戰爭」嘅2.0，直系算係攞返個采，雖然北方畀你打到一棟都冇，但張作霖奉系勢力想染指南方，渡過長江則完全無能為力。從此以後，唔計其他獨立食花生軍閥，大北方由奉系張作霖控制，中原由直系孫傳芳（吳佩孚）打骰，廣東有蔣介石聯俄勢力急速冒起，形成三分天下之勢，當然大家都知道最後勝利者係邊個？好戲陸續有來。

孫傳芳雖然號稱「五省聯盟」揸Fit人，兵多將廣，但係佢始終係北洋後起之秀，個朵唔夠吳佩孚同曹錕響，內部形勢非常複雜，實際由佢親手控制嘅基本部隊，為數只有50,000萬人，其他將領大多數都會見風使舵，隨時反轉豬肚就係屎，所以後來蔣介石北伐軍打去上海，途中好多北洋軍人都被收買同招降，唔少降將後來仲喺蔣介石政權中撈得風生水起，例如陳調元（1886-1943）、陳儀（1883-1950）、周鳳岐（1879-1938）、賴世璜（1889-1927）、林蔚（1890-1955）、上官雲相（1895-1969）等等。

孫傳芳打退奉軍，得到上海之後，進入人生最鼎盛時期，佢並唔係一介武夫，用當事人嘅標準，孫傳芳係文武兼備嘅「儒將」，聲名比得上民國關公吳佩孚，好似都上過時代雜誌Time做封面（要fact check），當時嘅人咁樣評論佢：「孫傳芳為北洋後起軍閥之最狡詐且有機智縱橫之才者」、「佢良智過個人者也」、「深潛莫如閻（錫山），機智莫如孫（傳芳），北人之二雄也」、「孫傳芳在北方軍人中，還算是一位思想比較開明的將領，就是在行政方面，他也沒有什麼壞聲名」。

佢邀請咗辛亥革命元老章太炎（1869-1936）做政治顧問，著名科學家丁文江（1887-1936）為經濟顧問，軍事家蔣百里（1882-1938）及日本名將岡村寧次（1884-1966）任高等軍事顧問，幕僚可謂人才濟濟，就連梁啟超對孫傳芳嘅評價都唔錯，梁啟超咁樣講佢：「孫傳芳在北洋中總算比較的好，江浙地方政象亦總算比較的清明，丁在君（丁文江）、蔣百里與孫的合作並不算無理由」，中國第一代傑出地質學家丁文江亦有以下評價：「孫傳芳關心社會治安狀況和部隊紀律，抑制稅收，並公開宣稱為愛國而獻身，不失為一個『好』軍閥」，由此可見，孫傳芳在當時聲名甚好，並非一個卑鄙無恥下流賤格鹹濕討厭嘅「大軍閥」。

孫傳芳亦都宣稱自己係一個民族主義者、一個百分百嘅愛國者、儒家哲學傳統主義者，反對「國中之國」租界嘅存在，佢自己曾經講過：「每次我一到通商口岸，都深感恥辱，因為通商口岸一直提醒著我們國家主權的喪失」，而且孫傳芳亦明白，中國政府和中國民眾在管治能力方面，的確遠遠落後於西方列強，「每次從租界到華界，都會感到穿過了兩個截然不同的世界，前者是上層社會，而後者是下層社會，華界的許多東西，馬路、建築、抑或是公共衛生，都無法和租界相比，這種對比構成了我們民族最大的恥辱，這種恥辱比我們喪失的主權還要大得多。」

於是孫傳芳佔領上海之後，曾經提出一個「大上海」計劃，佢有以下嘅偉大構思：「我想在上海設一個機關，把地方行政權力集中在一起，使它有能力可以改良原有的市政，籌備未來的商埠，解決外交上的懸親，漸漸地把租界以外的上海，打造成一個模範市，然後以模範市的成績，為要求收回租界的根據，這是我平生最大的志願。」

孫傳芳希望將上海建成「真正的自治邦」。當然大家都知道，真正將「收回租界」成為事實嘅人並唔係孫傳芳，真正可以抹去「中國人恥辱」嘅人，係後來國民黨嘅蔣介石，如果認真去講，應該係1949年建立中華人民共和國嘅毛澤東同共產黨先啱。

凡事要睇你點樣去睇同define，「大上海」計劃響孫傳芳之手，的確付諸實行過，祇不過時間唔夠，1927年孫傳芳就畀蔣介石嘅北伐軍打敗。胡適喺50年代嘅回憶錄咁講過：「我們三十年後回想起來，丁在君（文江）當日擔任的建立一個統一的『大上海計劃』的工作確是一行有遠見有開創魄力的建設大事業，若沒有孫傳芳和陳陶遺（當時的江蘇省長）的完全合作，這個試驗絕沒有成功的希望。……孫傳芳想來不認識在君，居然能完全相信他，給他全權，在他八個月任內，從沒有干涉他的用人之道，這不能不算是孫傳芳的政治家風度了。」連胡適都咁講孫傳芳，你就知道孫傳芳並非一個普通嘅大軍閥，佢好有可能係一個好人。

不過好人唔代表可以得到最後勝利，歷史脈絡從來都係一個又一個「劣幣驅逐良幣」嘅遊戲，好人最大嘅用處，就係俾壞人抹黑。

#常威💀 #大軍閥平反系列 #大軍閥 #民國歷史

✅本土唯一香港土話近代史文本

❤【常威近代史】第一部《大清亡國關慈禧蛋牛治》，全面開放，免費下載， #freedownload！

Free下載連結🔽

https://play.google.com/store/books/details?id=C3hjDwAAQBAJ

【常威近代史】（四百六十一回）
你分裂，我也分裂

1925年10月，笑面虎孫傳芳擊敗奉軍控制上海，陳炯明徹底潰敗，廖仲愷被刺，胡漢民退出權力鬥爭舞臺，南方國民政府，剩低汪精衛同蔣介石兩虎相爭，國民黨內左右之爭亦趨白熱化，10月3號蔣介石再發動行動，進一步鞏固軍權，當時身兼廣州衛戌司令嘅蔣介石，下令拘捕國民黨中央執行委員、建國川軍總司令熊克武（1885-1970）、建國川軍第一軍軍長余際唐（1888-1964）等川籍將領，罪名係疏通外敵，為國民黨黨內大清洗展開序幕。

呢個世界嘅嘢、或者所謂政治其實好簡單，一係自己友，一係就係敵人，你唔係自己友，就係敵人（一部份）！當錢夠駛時太平盛世可以容納中間派溫和派騎牆派；進入戰爭期間鬥爭高潮就要敵我分明，有言道「先安內，後攘外」，必雖要喺組織之內清除異己，就算打橫嚟都冇辦法，一來為權力，二來減少組織內部自爆機率，大家要一條心，統一路線，槍口共同向外，先可以攻打敵人。

蔣介石係軍人出身，由頭到尾都係一個正統軍人；相反當時佢最大嘅政治對手汪精衛則係文人出身，「中華第一美男子」，詩詞歌賦瓣瓣掂，講外型講魅力講資歷拋離你蔣介石幾個馬位，一句「引刀成一快，不負少年頭」簡直係革命家嘅座右銘，不過文人鬥軍人，其實由一開始已經註定勝負誰屬，汪精衛一生最大鑊嘅就係成為蔣介石嘅敵人，同樣道理，蔣介石一生最幸運嘅就係有汪精衛依個詩人做敵人，後來蔣介石遇到一個同自己同級數嘅對手毛澤東（雖然都係詩人），就打唔贏嘞！汪精衛因此成為天下第一號漢奸，其實亦都係劇本一早註定。

踏入11月，鬥爭進一步尖銳化，11月21號，廣州國民政府委任周恩來為東江各屬行政專員，主政東江原本陳炯明嘅勢力範圍。

11月23號，非法嘅國民黨一屆四中全會在北京西山碧雲寺孫中山靈前召開，點解叫非法？因為喺國民黨右派私下結集舉行，未經廣州民國政府正式批准，違反政治限聚令，出席會議嘅有執行委員葉楚傖（1887-1946）、居正（1876-1951）、沈定一（1883-1928）、邵元冲（趙完鬆，1890-1936）、石瑛（1879-1943）、鄒魯（1885-1954）、林森（1868-1943）、覃振（1885-1948）、石青陽（1879-1935）、茅祖權（1883-1950）、傅汝霖（1895-1985）、張繼（1882-1947）、謝持（1876-1939），國民黨內右派大佬雲集一堂，擺明反共，亦因為呢次會議，出現咗「西山會議派」，代表國民黨內極右勢力。

但係點解無端端會去咗北京西山？原來9月時候，鄒魯、林森等人作為廣州代表團北上，響上海同國民黨右派大腦戴季陶、謝持等人商議決定響北京（作反）召開一屆四中全會，11月16號，佢哋喺西山碧雲寺預備會議，先聯名電告汪精衛，講聲主席你知：「喂，左派，我哋右派作反喇！」

西山大聚會，成班右派當然係坐埋一齊聲討中共，會議決議「對共產黨員加入本黨者，一律使其退出本黨」、「解雇蘇聯顧問鮑羅廷」、「開除汪精衛黨籍六個月及免去其中央執行委員之職」、「撤銷擔任中央執行委員及候補委員嘅共產黨員譚平山、李大釗、毛澤東、瞿秋白、張國燾等職務」，推舉林森、鄒魯等五人為常務委員，將中央執行委員會移往上海，重新推定各部部長，定於1926年3月召開國民黨二大！

咁即係點呀？咁即係作反囉，即係搞分裂主義！27號，國民黨中央執委會喺廣州發出通牒，強烈指責「西山會議派」嘅分裂活動。至於當時擁有最大軍權嘅戴季陶黃紙兄弟蔣介石有冇份參與？歷史並冇正式話畀我哋知。

你分裂，奉系都分裂，11月22號，奉軍第三軍團副軍團長郭松齡（1883-1925）不滿張作林窮兵贖武，同馮玉祥達成消除戰禍、實行民主等密約，通電與奉系決裂。郭松齡將所屬部隊改編為五個軍，易名「東北國民軍」，11月27號佔領山海關，配合馮玉祥部隊，勢如破竹，12月初攻佔錦州，13號攻佔營口，馮玉祥軍隊則進佔熱河，24日平安夜佔領天津，控制直隷全境。

張作霖遭此巨變，進退失據，形勢岌岌可危，12月21號，郭松齡前鋒部隊距離張作霖基地瀋陽僅僅60公里，好彩張作霖背後仲有大佬Superme being，邊位呀？大日本帝國啦！日軍立刻派出空軍飛機，向郭松齡陣地發動猛烈轟炸，並化裝成奉軍協同作戰，突擊郭軍後方。24號平安夜，馮玉祥部隊佔領天津之時，郭氏夫婦陣前被捕，就地槍決打靶！

11月28號，北京亦都發生咗一場「首都流產革命」，響中共北京組織嘅策動下，北京各界民眾舉行大會，要求段祺瑞政府落台，成立由國民會議組成嘅國民政府。會後，手持棍棒嘅學生敢死隊同保護隊遊行到政府總部，並且行去段祺瑞屋企探段祺瑞，軍警立刻出動，與群眾對峙數小時，同一時間，財政總長李思浩（1882-1968）、教育總長章士釗（1881-1973）住宅亦被群眾搗毀！

11月29號，北京街道上出現咗50,000名群眾，以「首都革命」旗熾行頭，舉行大規模示威遊行，不過示威遊行並無引發其他北京市民支持，冇辦法再做大，加上背後亦冇軍事力量支持，一場非常和平嘅「首都革命」亦宣佈靜靜地流產，段祺瑞冇落台，不過佢個屎窟亦坐唔到幾耐鳥。

你睇，成個中華民國每股勢力都喺度搞分裂搞鬥爭，冇人可以話事，立立亂，點解成日話要追求大一統？其實都係有道理。以當時嘅情況，政局一日未穩，一日未可以全面發展經濟，經濟一日未能夠全面發展，就永遠都係二打六，俾西方列強欺壓剝削。作為西方列強，當然希望你愈亂愈好，唔通想你統一加強大咩？成為我嘅對手，又點算呢？

阿寶話人類會不斷重複錯誤，而且不懂得響錯誤裏學習，其實係錯！人類並非想不斷重複錯誤，而係「不斷重複錯誤」本身，係人類嘅本性同歷史嘅必然。如果現在整個地球上只有一千萬人口，咁樣全地球所產生嘅物質條件就一定能夠滿足一千萬人口嘅全部物質需要，咁就唔會有任何鬥爭出現，全地球一體化嘅「地球聯邦」政治體系亦會如愿成立……

人口清洗計劃已經進行中

【常公子歷史頻道333回：替大軍閥平反系列之 雞！全部都係雞】

♏高壓嘅政治氣氛急速湧來，相信今時今日嘅香港人，再冇一個人可以話政治同自己無關，佢之前嘅世界，我哋的確係可以唔理政治，或者漠不關心，努力搵錢，搵夠就閃，移民美加，從此各不相干，安心做個美國人加拿大人，一世平安。不過好可惜，呢種日子已經過去，就算你今日順利移民到美國加拿大（英國及臺灣），你似乎都無法逃避你本身係「中國人」依個身份認同問題。

♉2020年，新型冠狀病毒殺全地球人一個措手不及，基本上無人可以倖免，世上再無樂土，之前的確冇人可以估得到掛？我好記得2019年年頭，有個朋友同我講過，佢話中美貿易戰爆發，時局衰冇可再衰，所有壞消息已經出曬，難道仲會有更壞嘅消息出籠嗎？（佢主要係針對本地股票投資市場而言），但不過，更壞嘅事情陸續有來，2019年下半年一場反修例風波，平地一聲雷，為香港帶嚟自1967年、1989年以來前所未有嘅大亂局；我亦曾經講過，亂局最多可以維持半年，半年之後，大概年尾聖誕節就會有所改善，仲記得2019年聖誕節嘅時候，有人出嚟講要挽救市道，希望聖誕節檔期同農曆新年檔期可以同香港經濟補補血……

♏仲記得庾子年年初三，打完兩日麻雀，電視新聞報導武漢有一種奇怪嘅肺炎出現並且傳播，當時的確不以為意，完全冇意識到係一個核彈從天而降……結果咁就一年，現在出街要長期戴口罩，日日都係疫情防疫抗疫疫情防疫抗疫疫情防疫抗疫，人心惶惶，整個社會籠罩住一片愁雲慘霧，加上2019年風波嘅政治後續追加，雙管齊下，徹底改變咗香港人一切生活形態……但所有事情似乎並未完結，2021年只會比2020年更差，「疫苗」嘅生產速度同埋接種速度及範圍，對世界經濟復甦非常重要，但係冇人可以估到發生乜嘢事？到咗今時今日，對未來太樂觀嘅一切推測，大部分都係錯嘅。

♐世界上最有智慧嘅人之一Bill Gate亦都預言過，如果一切順利發生，主動防疫措施有效，最起碼要去到2021年底，一切先會有轉機，呢個係最樂觀嘅推算，有乜冬瓜豆腐，衰到2022年中亦都有可能。咁即係話，起碼仲有一年加半載要捱，大家自求多福，逆境自強！

⛎我同阿潮工作勁忙，揾食艱難，忙中可能錯漏多，原來上次出漏咗331回，直接跳到332同333回，331回常威近代史星期六會補番上架！敬請原諒！

♑【常威近代史】第五部《霹靂大忠臣對決無敵大買辦》電子書上架（條download link在下面），請大家課金支持我一直走落去，直至劉少奇骨灰到達北京王光美手上…

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上4000訂戶！

✅https://youtu.be/cUGRblAtyOE

【常威近代史】（四百六十二回）
雙雄並起

大家都知道，二十世紀前半葉中國最後嘅命運是操縱響兩個人手上，一個叫蔣介石，一個叫毛澤東，佢哋兩個代表兩種唔同嘅意識形態，一個係資本主義，另一個係共產主義，兩個人之間嘅鬥爭亦都塑做咗中國近代史嘅形成，影響咗數以十億計中國人嘅命運，影響力響佢哋離世三十幾年後仲延綿到今時今日，兩個人雖然水火不容，但某程度上佢哋嘅性格都好相似，兩位都係不擇手段以求達到目的嘅「馬基維利主義者」，我好相信，如果佢哋唔係敵人嘅話，一定會成為好朋友。

佢兩位同之前嘅政客非常唔同，之前，大多數人都係為「國家主體」建立「意識形態」，即「意識形態」為「國家政權」而服務。但佢兩位明顯具有時代前瞻性，明白「意識形態」並非為「國家」（或政權）而服務，反而係由「意識形態」領導「國家」、建立「國家」，所以兩位嘅政權或所建立的國家，其實都係「意識形態國家」（或「意識形態政權」），當然佢哋嘅新思維，都係源於莫斯科聖彼德堡，源於列寧同托洛斯基。

1925年嘅12月，毛澤東同蔣介石分別做咗好多事，響歷史上嘅影響力日漸加深，而佢哋做嘅嘢，都係意識形態工作。

12月1號，當直系軍閥吳佩孚喺漢口宣佈發行軍備債券2000萬元時候，毛澤東響《革命》半月刊上發表「中國社會各階級的分析」一文，明確地指出，「地主階級」同「買辦階級」喺革命的敵人；而「中產階級」具有革命性同妥協性，響革命高潮來臨嘅時代，「中產階級」必定好快地分化，而「小資產階級」（小商戶、手工業工作者，即係自雇人士）可以參加或者附和革命，成為「無產階級」嘅可靠同盟軍；「半自耕農」同「農民」係「無產階級」最廣大同最忠實嘅支持者，而「無產階級」係近代中國最進步嘅階級，喺革命嘅領導力量。

將成個國家人民，分劃成唔同階級處理同分析，亦充分實踐咗毛澤東喺中心思想，一切歷史嘅形成，其實都係一部「階級鬥爭史」（Class struggle），佢自己就曾經講過「階級鬥爭，一抓就靈」，任何社會矛盾及衝突皆源於「階級鬥爭」，認清事物發展嘅本源，喺適當嘅地方對症下藥，自然——一抓就靈。