大清亡國關慈禧蛋牛治 2

【常威近代史】（四百一拾回）
（離題系列）美國同日本實在愛得非常轟烈

第一次世界大戰，徹底改變咗整個世界嘅政經格局，大英帝國、法國同德國，或者講所謂主宰整個十八十九世紀整個世界嘅歐洲勢力，開始沒落（自行墜毀），取而代之嘅係自由民主大國美國同新興嘅東方力量日本帝國。《梵爾賽條約》，巴黎和會上日本取得德國在華所有利益，但同時，日本亦聞到西方列強對其急速彈起嘅強烈敵意同警戒之心。

世界上一樣嘢冇辦法改變，叫皮膚嘅顏色，Micheal Jackson點解要漂成一個白人？就係為咗擺脱膚色原罪，最近「Black lives Matter」一場運動，亦要講畀大家知，所謂種族問題其實一直冇解決過。白人歧視黑人，同時亦歧視黃種人，所有有色人種皆下等，皆帶住原罪，係白人根深蒂固嘅意識形態。

儘管當時嘅日本全力「脫亞入歐」，想話比白皮膚鼻高眼深嘅西方人知道，佢哋其實同西方人一樣擁有相同嘅才華同實力，極力想融入當時嘅「西方世界殖民主義體系」，但係皮膚同身材外表始終冇辦法改變，大家表面上可以平起平坐，日本人講英文發言，你OK我OK，但我西方人做嘅嘢，你日本人做就唔得。

甲午戰爭後，日本就俾西方列強壓迫其擴張，監生嘔返到手嘅清國遼東半島一大片土地出嚟，日本人想問，你搞殖民主義就得？點解我搞殖民主義就係違反正義原則？儍的嗎？1905年日俄戰爭，日本明明實牙實齒完勝俄國，但美國人叉隻腳入嚟做和事佬，最後日本連戰爭賠償都得唔到，正正賠了夫人又折兵，呢啖氣點忍得落？當時嘅日本人，就感覺到佢哋比西方人強烈壓迫同侮辱，點解？點解？點解？

我想講一個故事，當年同喬治布殊角逐總統寶座嘅民主黨戈爾先生（1948-），後嚟成為環保大使，有一次佢出席一個世界環保會議，佢要求發展中國家印度採用成本較高嘅再生能源取代傳統嘅煤油發電，藉此減低全球環境污染。當時印度能源部長提出一個好有趣嘅問題，大致係問點解你哋啲西方先進國家用咗百幾年低成本煤油發電，搵到盆滿缽滿上晒岸，然後就要求我哋啲發展中國家用高成本發電？個道理究竟喺邊度？

呢個問題問得好好，去返歷史，美國人可以殺曬印第安人土著奪取北美洲搞殖民主義，點解日本人做又有問題？難道所謂正義，永遠係由你美國人（或西方人）決定？呢個問題延續到今時今日，你美國用暴力鎮壓群衆就係正義？我中國一顛壓就係不義就係邪惡？當然所謂「正義」（justice）其實係唔存在嘅，一向只係由最惡嗰個、或話事嗰個所決定何謂正義何謂邪惡，到今時今日嘅世界，美國仍然係話事嗰個，所以由佢決定何謂正義？亦係理所當然。

【常威近代史】（四百一拾回）
（離題系列）美國同日本實在愛得非常轟烈

第一次世界大戰，徹底改變咗整個世界嘅政經格局，大英帝國、法國同德國，或者講所謂主宰整個十八十九世紀整個世界嘅歐洲勢力，開始沒落（自行墜毀），取而代之嘅係自由民主大國美國同新興嘅東方力量日本帝國。《梵爾賽條約》，巴黎和會上日本取得德國在華所有利益，但同時，日本亦聞到西方列強對其急速彈起嘅強烈敵意同警戒之心。

世界上一樣嘢冇辦法改變，叫皮膚嘅顏色，Micheal Jackson點解要漂成一個白人？就係為咗擺脱膚色原罪，最近「Black lives Matter」一場運動，亦要講畀大家知，所謂種族問題其實一直冇解決過。白人歧視黑人，同時亦歧視黃種人，所有有色人種皆下等，皆帶住原罪，係白人根深蒂固嘅意識形態。

儘管當時嘅日本全力「脫亞入歐」，想話比白皮膚鼻高眼深嘅西方人知道，佢哋其實同西方人一樣擁有相同嘅才華同實力，極力想融入當時嘅「西方世界殖民主義體系」，但係皮膚同身材外表始終冇辦法改變，大家表面上可以平起平坐，日本人講英文發言，你OK我OK，但我西方人做嘅嘢，你日本人做就唔得。

甲午戰爭後，日本就俾西方列強壓迫其擴張，監生嘔返到手嘅清國遼東半島一大片土地出嚟，日本人想問，你搞殖民主義就得？點解我搞殖民主義就係違反正義原則？儍的嗎？1905年日俄戰爭，日本明明實牙實齒完勝俄國，但美國人叉隻腳入嚟做和事佬，最後日本連戰爭賠償都得唔到，正正賠了夫人又折兵，呢啖氣點忍得落？當時嘅日本人，就感覺到佢哋比西方人強烈壓迫同侮辱，點解？點解？點解？

我想講一個故事，當年同喬治布殊角逐總統寶座嘅民主黨戈爾先生（1948-），後嚟成為環保大使，有一次佢出席一個世界環保會議，佢要求發展中國家印度採用成本較高嘅再生能源取代傳統嘅煤油發電，藉此減低全球環境污染。當時印度能源部長提出一個好有趣嘅問題，大致係問點解你哋啲西方先進國家用咗百幾年低成本煤油發電，搵到盆滿缽滿上晒岸，然後就要求我哋啲發展中國家用高成本發電？個道理究竟喺邊度？

呢個問題問得好好，去返歷史，美國人可以殺曬印第安人土著奪取北美洲搞殖民主義，點解日本人做又有問題？難道所謂正義，永遠係由你美國人（或西方人）決定？呢個問題延續到今時今日，你美國用暴力鎮壓群衆就係正義？我中國一顛壓就係不義就係邪惡？當然所謂「正義」（justice）其實係唔存在嘅，一向只係由最惡嗰個、或話事嗰個所決定何謂正義何謂邪惡，到今時今日嘅世界，美國仍然係話事嗰個，所以由佢決定何謂正義？亦係理所當然。

但20世紀20年代，美國仍然唔係最惡話事嗰個，梵爾賽體系係第一次世界大戰結束後大國間合作體制框架，本來就毫不穩定，加上世界局勢不斷變化，1917年俄國嘅十月革命、人口大國中國展開咗民族運動（五四運動），都深深影響日本響東方嘅角色。於是1921年11月由美國吹雞召開嘅「華盛頓會議」，就想再一次穩定梵爾賽體系，華盛頓會議召開前一星期，第一次成功實現政黨組閣平民首相原敬被右翼青年中岡艮刺殺，真係大吉利是！

參加「華盛頓會議」有美國、英國、法國、中國、意大利、日本、荷蘭、葡萄牙同比利時九國，會議嘅主題係民族自決同埋海軍裁軍問題，對於限制海軍軍備問題，矛頭又係直指日本！會議上日、美、英、法之間首先締結咗「四國條約」，確認響太平洋維持現狀，並彼此尊重對方響太平洋上殖民地權利，其實老實講，主要係傾好點樣瓜分中國依塊大餅？同埋邊個有份食？用最簡單嘅方法演繹，八個字：英法退場，美日入場！

為咗抑壓海軍軍備競賽，「華盛頓會議」締結咗海軍裁軍條約，英美裁減五成，日本裁減三成，令太平洋列強海事實力維持平衡狀態。會議嘅結果，係美國、日本、英國、法國嘅勢力暫時達到平衡，緊張狀態得到部分緩解，依種東亞同太平洋地區嘅國際協調秩序被歷史上稱為「華盛頓體系」。

全新嘅華盛頓體系裡面，日本同美國之間喺中國嘅機會均等，乜卵嘢「機會」？佢哋叫發展經濟機會，其實就係侵略機會，日本乘機落實21條中某啲部份，但原本屬於德國嘅山東省權益即要交還俾中國，計埋條數，日本人又覺得華盛頓會議係屈佢哋，點解？

第一冇咗山東省，之前已經冇咗遼東半島，兩笪地方加埋嘅總土地面積可能大過半個歐洲……

第二要裁軍，雖然英美裁五成佢哋裁三成，但日本人仍然覺得係西方人要抑壓日本人嘅軍力擴張。

第三最無厘頭，明明大英帝國自行墜毀，放棄中國最大幕後玩家地位，論資排輩，跟隊應該係由日本頂上全面代替大英帝國在華利益地位，但美國無端端叉隻腳埋嚟，之前又話唔玩嘅？而家又埋嚟爭飯食？日本人係百思不得其解。

日本同美國依對膚色不同嘅隔世情人，真係剪不斷理還亂，當日係美國人嘅黑船用武力打破日本嘅對外鎖國政策，之後明治維新，日本行嘅自由民主路亦都全面模仿美國體制，第一次世界大戰，兩個國家同時因為識走位，因此做咗兩隻最成功嘅塘邊鶴，獲得最大嘅戰後紅利……不過大家都知道，美國同日本嘅戀情只係啱啱開始，世界上最轟烈嘅愛情，從來都要生生死死……

今日最後送上黃家駒歌詞作結：「可否不分膚色的界限？願這土地裡，不分你我高低。」

#常威💀 #大軍閥平反系列  #大軍閥 #民國歷史

✅本土唯一香港土話近代史文本

❤【常威近代史】第一部《大清亡國關慈禧蛋牛治》，全面開放，免費下載， #freedownload！

Free下載連結🔽

https://play.google.com/store/books/details?id=C3hjDwAAQBAJ

【常公子歷史頻道288回：斷送共和關 虎禪師楊度（下） 蛋牛治】

♉今集繼續講民國奇人楊度嘅故事。香港嘅疫情反復，再一次進入半封城狀態，六點過後，因為禁食令，市面一片蕭條，有個朋友揸的士，就會一清二楚。過去一年時間，香港嘅經濟的確受到嚴重嘅衝擊，當然太平盛世嘅時候，社會上仍然充滿怨氣，否則亦唔會有2019年中嘅亂事發生。

♐亂世局面已經形成，不單止香港，整個世界都被新型冠狀病毒殺個措手不及，香港已經係一個富裕嘅地方，仲可以幾百億幾百億掟出嚟救市，其他貧窮國家，好多已經係年年赤字，國庫空虛，我真係冇辦法想像佢哋嘅局面為何？經濟不景氣，就會引發政治動盪，政治不穩定，就會發生戰爭，呢個係千古不移嘅定律，蔓延全球嘅第二次世界大戰，就係因為一場美國三十年代經濟大蕭條所引發。

♑最近閱讀一本書，係魏斐德（Frederic Wakeman. Jr）所寫嘅《洪業》（The Great Enterprise），講嘅係17世紀清朝開國史。內裏描述，明朝覆亡，其實係同17世紀初期一場發生喺歐陸西班牙嘅金融災難有關，1620年到1660年間西班牙塞維利亞Sevilla（即係今日西甲嘅西維爾）係歐洲嘅金融中心，因為歐洲市場爆發貿易危機，以塞維利亞為中心嘅世界貿易體系遭到沉重打擊，結果導致中歐貿易中斷，引發流入中國嘅白銀數量大減，當其時明朝普遍採用白銀作交易貨幣，白銀進口減少，引發明朝末年嚴重嘅通貨膨脹，通貨膨脹令米價暴漲，為城鎮居民帶嚟前所未有嘅巨大災難，終於引發民變，張獻忠李自成就係咁樣出現……

♐政治問題永遠同經濟掛鉤，我又再重申一句，大把錢駛，就冇人有怨氣冇人想作反，目前大家面對嘅世界局面，係資本主義自由主義黃金時代留低落嚟嘅資產泡沫臨近爆破邊緣（或者響2008年已經爆咗），利用印銀紙填補黑洞，同樣只會引發惡性通貨膨脹，物價攀升，人民生活質素物質條件相對下降，生活唔好就會累積怨氣，矛頭直指向政治制度，條方程式就係咁簡單，加多隻Covid-19做催化劑，亦加速咗爆炸時間。

♉我所見嘅就係咁，希望我睇錯😔😔😔😔😔

♑【常威近代史】第五部《霹靂大忠臣對決無敵大買辦》Round two電子書上架（條download link在下面），請大家課金支持我一直走落去，直至劉少奇骨灰到達北京王光美手上……

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上4000訂戶！

✅https://youtu.be/ExeNboMng18

【常威近代史】（四百一拾一回）
（離題系列）關東大地震

大正時代係一個民主聲音高漲嘅時代，不同思潮衝擊日本人嘅固有意識形態，一般人嘅理解，日本自明治維新開始，甚至在明治維新之前幕末時代，都係一個極端聽話守秩序忠於天皇體制嘅單向度簡單民族，佢哋嘅思想非常單純，總之天皇叫你去死你就可以去死，可以楂住架三菱零式戰鬥機撞向美軍艦橋。

最近我響Netflix睇過一套美國響二次世界大戰期間拍攝嘅戰爭宣傳片，講佢哋當時嘅敵人日本人，教美軍同美國民眾認識日本人，片中描述日本民衆都係機械人，自細接受極權思想灌輸同訓練，完全冇個人意志同獨立思考可言，結果長大後變曬邪惡嘅戰爭機器，遺害全世界？

條片睇到我眼都大埋，民宣的確好重要，但真相並唔係咁，日本人邁向軍國主義，並唔係一條直路向前行，大正時代發生嘅種種，其實係轉捩點，大正時代嘅民主運動，而且確有機會將日本變成一個好美國一樣嘅民主自由國家，只不過響種種機緣巧合之下，民主自由化反而成為軍國主義者創造極權嘅新機遇，令日本走上侵略戰爭不歸之路。

相同嘅情況亦都發生係德國，一戰之後，霍亨索倫王朝崩潰，威瑪民主共和國（1918-1933）成立，德國真係行上自由民主議會康莊大道，仲要係最自由民主嗰隻添，但到頭來，可能因為太民主太free，結果威瑪共和國糾纏於政黨政治爭拗而不斷內耗，民生經濟停步不前，國勢下滑（同某啲人對香港過去嘅政治環境想法一樣），最後終於響自由民主選舉中選出希特勒納粹黨執政，自由一舖清袋。

德國人接受納粹黨，同日本人後來接受東條英機式軍國主義、意大利接受墨索里尼法西斯統治一樣，並唔係被迫，而係真正接受過民主自由嘅洗禮，覺得民主自由唔work，所以選擇用另一種方法——救國；情況同當年袁世凱洪憲稱帝一樣，民主自由體制唔係萬試萬靈嘅政治良方，美國做得咁靚仔有佢先天優勢同後天運氣使然，做美國嘅Copycat就唔係一定得！

放返響今時今日嘅世界，中國選擇行自己嘅路，抗拒美國自由民主體制所奠基嘅所謂普世價值，堅持必需符合中國國情嘅政治體制，其實又冇話錯得曬。你試吓今日中國忽然變成多黨制民主國家，我諗唯一嘅結果就係大分裂，一個大國會變成多個小國，好似1991年蘇聯解體之後所發生嘅事情，小國冇實力，又會必須成為大國嘅附庸先可以生存落去，當然單邊主義者嘅你可以認為，如果整個世界得返美國一個大國主宰，咁就天下無敵，對於呢種睇法，我冇任何意見補充，可能係都未定，畢竟未試過又點知道呢？

去返20世紀20年代嘅日本，各種思潮氾濫，就連女性主義都抬頭，一直喺男人背後寂寂無名嘅日本女性，響民智開啟下，開始思考自己響社會同政治上嘅角色同應得嘅權利同義務，性別平權進入世界大舞臺，以我個人觀點而言，依一場性別平權嘅意識形態戰爭，在往後打足100年，女性要去到21世紀方能夠某程度上高唱凱歌。今日東京知事（市長）係女性，如果你響1920年作出依個預言，啲人一定會話你痴9線；當然你響1920年美國，同人講100年後會有一個黑人奧巴馬成為美國總統，啲人一定會話你痴999999999線。

所以重申，要真正認識歷史，唔可以用現代人嘅眼光套入古人嘅眼裡睇世界，否則一定錯。

大正12年，1923年9月1號上晝11點58分，東京發生大地震，震源係相模灣，強度達到黎克特制7.9級，呢一場就係有名嘅關東大地震，東京一帶大量房屋坍塌，地震後發生嘅火災先真正攞命，全市大火一直燒到9月3號，當時東京483,000戶中，有300,000戶被全部銷毀，整個東京住宅商業區燒燬咗44%，呢個咁慘烈嘅情況係缺乏規劃，城市太密集擠迫引發，亦暴露咗大正時代嘅管理不善。東京一府六懸一共340萬多人受災，地震死亡人數約為90,000人，當中火災死者達到76,000人，有40,000人係監生燒死，事後估算，真正死亡人數可能達到140,000。

地震發生同時，由於訊息混亂，謠言滿天飛，甚至有謠言話有社會主義者同朝鮮移民乘機到處放火搶掠，結果造成有東京民眾集體屠殺朝鮮人事件。關東大地震之後更加被媒體不斷渲染，成為不僅僅係東京人嘅慘痛體驗，而發酵成為整個大和民族所有國民嘅時代意識，甚至有國粹主義者認為地震是天譴——係懲罰日本人離開天皇體制、信奉西方城市文化及個人主義嘅慘烈代價。

關東大地震後，出現咗一場帝國復興、重建東京嘅龐大計畫，一場天災，亦開始替大正時代嘅開放民主運動定調，蒼天有啟示，多元化嘅自由社會並不適合日本民眾，有心人藉著重建帝都東京，亦開始重建日本人離心離德嘅多元民主意識形態。

歷史好奇怪，天災往往配合人禍而發生，兩者嘅關係密不可分，2020年整個世界嘅二分撕裂，就係因為一場新型冠狀病毒天災而來，你話奇怪唔奇怪？人禍基本上可以預測，天災則無法預料，歷史畢竟充滿偶然性，所以老調重彈，如果你以為人類可以操縱一切，政治可以為你鋪排往後半個世紀嘅歷史步伐，你架車多數會撞山！

#常威💀 #大軍閥平反系列  #大軍閥 #民國歷史

【常威近代史】系列，網上書展，半價大平賣

請立刻登入

https://www.382now.com/product?id=245

【常公子歷史頻道289回：斷送共和關 陳獨秀 蛋牛治】

♉中美關係進一步惡化，昨日美國關閉中國駐候斯頓領事館，事情再升溫，消息一出恒生指數插500點，立竿見影。之前我都相信中美之間嘅政治摩擦，會延綿一段好長嘅時間，處於『鬥而不破』狀態，但一場新型冠狀病毒，將事情加速催化，未來會係點？相信除咗少數玄學家之外，冇人可以預測得到結果。

♐可以相信，打仗嘅機會率好低，中國固然唔想打，美國人如果冇忘記越南戰爭同伊拉克戰爭嘅教訓，應該亦會選擇輕易動武，就算小規模軍事衝突都唔會掛，但你一拳我一腳，大家為啖氣，互相反制報復、反制報復，最怕一方玩大咗，擦槍走火，冇人想打，但意外嘅嘢真係好難講，你睇吓一隻死亡率祇有5%嘅冠狀病毒，就足以令到世界大亂，你就明白，條數其實好難計，甚至冇得計。

♊大家亦千祈唔好以為個世界局勢好穩定，的而且確至二次世界大戰之後，整個世界進入咗高速發展嘅黃金時代，中間固然有好多波折重重，但亦無礙人類整體嚮前發展嘅步伐，但自從1991年蘇聯解體後，原來嘅平衡開始消失，美國一國獨大，及至21世紀中國崛起，終於衍出今時今日嘅新冷戰時代局面，一切事件固然是偶然，亦係歷史上的必然。

♑因為合久必分，久分必合，本來就係大道理，辯證法中嘅「正、反、合」三段論永遠正確，只係睇吓用乜嘢形式去發生同演釋。

♑【常威近代史】第五部《霹靂大忠臣對決無敵大買辦》Round two電子書上架（條download link在下面），請大家課金支持我一直走落去，直至劉少奇骨灰到達北京王光美手上……

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上4000訂戶！

✅https://youtu.be/Ij1pBQx3Jh4

【常威近代史】（四百一拾二回）
（離題系列）大正民主之終結

1923年一場毀滅性嘅關東大地震，震散咗東京，亦震散大正年間嘅民主自由、社會改革呼聲，關東大地震發生後三個月，1923年12月27日，當時嘅皇太子裕仁親王（1901-1989），亦即係後來嘅昭和天皇，乘車前住貴族院（即係參議院、上議院）途中，被眾議院議員難波作之進之子、社會主義者難波大助行刺，難波大助用散彈槍射擊裕仁坐架，裕仁並無受傷，是為「虎之門事件」。

刺客被逮捕，之後被判死刑，1924年11月15日行刑，警察總監被免職，就連當時嘅內閣總理大臣山本權兵衛（1852-1933）亦即刻辭職，1923年1月7日山本內閣總辭，至於刺客嘅父親眾議員難波作之進，則選擇閉門蟄居，絕食而死，日本人真係吓吓去到好盡。

當時貴為皇太子嘅裕仁（1916年11月3日被立為太子），事實上已經擔任緊日本天皇嘅職務，早響1921年，裕仁19歲嘅時候，因為大正天皇體弱多病，裕仁出任攝政，到1926年正式繼位，改年號為昭和（尚書中「百姓昭明、協和萬邦」之意），直接1989年1月去世為止，如果計埋攝政年期，裕仁足足掌權68年，成為咗史上在位時間最長嘅國家元首之一，個紀錄睇吓伊莉莎白女王二世ERll能否打破？

講開天皇，真係要叉開一筆，響行君主立憲嘅日本帝國中，究竟天皇有幾多實際權力呢？開國明君明治天皇當然唔計算在內，大正天皇係低B仔，有權都唔曉用喎，問題喺昭和天皇裕仁身上，昭和年代日本發動第二次世界大戰，戰後一句「關人隱事」，裕仁完全置身事外，作為一個行駛國家禮節嘅虛君，法律上真係冇責任個喎！究竟真相係唔係呢？亦有唔少史料證實，昭和天皇對日本嘅戰爭責任，其實不可開脫亦無法開脫，不過佢真係好好彩，真係絕對贏在起跑線同尊貴血統。

百廢待興，東京地震開始令日本人醒覺過嚟，大正時代民主自由聲音澎湃，左搞右搞，又工人運動又罷工又農民運動又女權又民主又反權威反天皇反資本主義又社會改革又共產主義又游行示威又警暴又有刺客又有人放炸彈又地震又失業又剩又剩………………（下刪十萬字），各種思潮氾濫，到頭來得到乜嘢結果呢？好似香港嘅狀況，有人話，多年來政治爭拗不斷，產生嚴重內耗，經濟同城市發展停步不前，固步自封，卒之到咗21世紀不停被鄰居超越爬頭，昔年亞洲一顆東方之珠，黯然失色，失去昔日光芒，到底係真唔係真？

活響大正時代嘅日本民眾，同樣有上述覺悟，大正時代民智開啟嘅日本民衆，開始從自己立場中出發，提出各自嘅身份認同（identity），identity依個term，除咗用嚟「大」鳩人之外，其實相當重要，今日香港民衆就係找尋緊自己嘅identity，到底自己係邊個先？自己嘅身份到底是什麼呢？因爲我哋並唔想做一隻行屍走肉見錢開眼嘅Zombie，所以必須知道自己係邊個，先能夠決定自己嘅行為——用今日新鮮滾熱辣嘅邏輯，如果你認為自己係「中國人」，咁應該愛國擁護中央；相反如果你覺得自己係英國人，又可以拿起本BNO出走。當然你亦可以選擇「唔選擇」，隨機應變，都係一種identity。

終於趁你病就攞你命，1925年2月19日，大正時代結束前夕，衆議院全體會議突然將「治安維持法案」提出議程，所謂「治安維持法案」，亦即係話以具體法律取締非法政黨活動及其他民衆社會行動，係日本嘅「國安法」，雖然民間反對聲音不斷，3月8號，法案響眾議院仍然壓倒性票數通過，贊成者246票反對18票，3月19號提交貴族院（即係參議院、上議院）通過，反對僅得1票（德川義親）。

一錘定音，除咗維持秩序嘅治安法，一個全新嘅「普選法」亦同時頒佈，自大正時代種種社會民主改革聲音所產生嘅混亂事件，終於整理落實到「選舉法」同「治安法」上。

國民原本將政黨視為「政治統治階級的一個分支，亦係腐敗同無能同義詞」，現在透過普選法，將它視為「決定國家意志的中心」——當中嘅意識形態操作手法係：一方面通過賦予民眾選舉權，令佢哋自覺係「國民」（有權話事？），從而促使佢哋喺主觀上同國家合而為一；另一方面通過治安法，排除不遵從依點嘅人同團體，減少反對聲音衝擊中央，軟硬兼施，一手妥協一手批判——藉此重新確立日本帝國大和民族嘅團結與和諧。

大功告成，簡單啲講，就係徹底打倒民主泛濫、工人運動同共產主義思潮蔓延帝國，大家唔好再曳，同心協力，乖乖哋一起進入1926年嘅戰爭大動員嘅美好昭和時代，亦即係軍國主義大時代。

昭和天皇1926年繼位前，同俄共建立外交關係，1928年，日本關東軍策劃炸死東北天王張作霖，裕仁登基只係區區六年後，1931年9月18號，就發生咗「九一八事變」，日本人稱為「滿洲事變」，日本借中國士兵炸毀奉天郊外柳條湖嘅鐵路為藉口，正式武力出兵侵華……

我對日本大正民主時代嘅論述到此為止，非常粗疏，亦都非常概括，求求其其，我只係想畀一個具體輪廓大家，日本人行上軍國主義侵略不歸路，全因為有十幾年大正自由民主時代嘅衝擊，「民主」同「極權」當然係互相對立，但好多時候亦係互為因果，歷史弔詭嘅地方，亦在於此。

下一次離開日本，繼續離題，睇吓成個世界發生乜嘢事？

#常威💀 #大軍閥平反系列  #大軍閥 #民國歷史

【常威近代史】系列，網上書展，半價大平賣

請立刻登入

https://www.382now.com/product?id=245

【常公子歷史頻道290回：斷送共和關 中華帝國 蛋牛治】

♉美國國務卿蓬佩奧發表對中共的強硬演講，將中國嘅經濟崛起，演繹成對西方自由資本主義世界嘅最大威脅，呼籲其他盟國組成聯合戰線，全力抵制中共，並且形容此爲共同的「時代任務」，the mission of our time，如果不改變中共，誘導中共改變，中共則將會改變世界。網上把蓬佩奧發演講稱之為「討共繳文」，無疑再一次為中美的爭霸局面，再下一劑重藥，令其冇辦法返轉頭。

♐蓬佩奧強調，將「中國人」同「中共」Communist China分開處理，要對付嘅中共，並非中國人；對於蓬佩奧嘅講法，我冇任何補充，反正響自由世界每個人都有發表自己意見嘅權利，把口生響你度，就講乜都得。11月在美國總統大選，目前尋求連任嘅共和黨特朗普，因為處理新型冠狀病毒手法不善，落後於對手民主黨拜登平均六、七個百份點，如果再無動作嘅話，疫情繼續嚴峻，本來萬無一失嘅連任機會一定會斷送，拜登陣型亦好聰明，以不變應萬變，反正講多錯多，總統選舉之爭，大概己經純屬天意，要睇到11月疫情數字同社會風向。

♑特朗普一向唔將病毒放響眼內，認為Covid-19係弱流感，全世界放大咗件事，任由其發酵令全球經濟停擺，特朗普無錯，錯就錯在佢太坦白太自負，不過作為地球第一強權嘅最高領導人，自負有型係好應該。我始終認為，所有發生嘅事情同講話，都係同11月總統選舉有關，要過咗11月塵埃落定，看看勝負，先可以睇得出美國對中國嘅真正態度，當然就算民主黨拜登當選，亦唔會一下子扭轉美國人「反中」或「反共」意識，本質上不變，只係程度上嘅問題。

♈目前，新冷戰形勢上係美國主攻，中國主守，到今日為止，兩者無論經濟或軍備上，實力仍有相當大距離，況且用全球化嘅角度去睇，美國必不能不復甦、不能不步入正軌，否則全球經濟一齊攬炒，任何國家難以獨善其身，真正一鑊熟！已經有人講過，美國嘅消費者係全球經濟嘅最後一根救命稻草，而響全球化分工大市場內，中國同美國亦冇辦法徹底切斷關係，否則亦會一齊攬炒一鑊熟！更加唔好講雙方會打仗，打仗就係終極攬炒真正一鑊熟咯。

🙏唔知點解，我突然有去佛堂唸經嘅衝動，希望多唸幾遍佛經，平和人間戾氣，化解爭執，希望世界和平，人人安居樂業。真心。

♑【常威近代史】第五部《霹靂大忠臣對決無敵大買辦》Round two電子書上架（條download link在下面），請大家課金支持我一直走落去，直至劉少奇骨灰到達北京王光美手上……

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上4000訂戶！

✅https://youtu.be/3FLwzGp2nsA

✅本土唯一香港土話近代史文本

❤【常威近代史】第一部《大清亡國關慈禧蛋牛治》，全面開放，免費下載， #freedownload！

Free下載連結🔽

https://play.google.com/store/books/details?id=C3hjDwAAQBAJ

但整個19世紀，從來未有一個革命政權曾經出現（形形式式巴黎公社式嘅小型政權不計算在內），但第一次世界大戰，為共產主義建立實質政權帶來契機，1917年，當一戰仍未結束時，列寧同托洛斯基嘅布爾什維克就係俄國奪權成功，建立咗世界上第一個共產主義國家，無論係邊個角度嚟睇，都係開天闢地嘅事情。

響列寧建立世上第一個共產主義政權開始，佢就非常明白，所謂革命同政權更替，並非係由民眾意志作主導（到咗今時今日，仍有大部份人相信民眾嘅意志能夠主宰一切，呢個係民主制度最大嘅破綻），一個政權嘅意識形態只需要社會上一小部分人敢於獻身同意志堅定貫徹始終執行就可以成立，於是一個高度嚴格組織化嘅政黨成為國家政權嘅必需物，而且初生嘅共產主義政權為咗生存落去，亦不得不無所不用其極活下去，並且要向整個世界輸出革命，壯大共產主義聲勢同生存空間。

共產主義強調階級性，強調「工人無祖國」，所謂國家同民族觀念，響初期嘅共產主義世界並存在，或者講並非主流思想。列寧同托洛斯基要解放嘅，並唔係單單係俄國嘅工人階級，而係整個世界受苦受難被鐵鍊緊緊綁死嘅無產階級廣大群眾。以此作為大前題，向其他地方輸出革命，視為理所當然之事。

之後，同俄國相鄰嘅中國，亦成功變成共產主義國家。去到20世紀20年代，共產主義已經高速響中國落地生根，並且好快成為咗一股重要嘅政治力量。

同時，共產主義思潮亦響歐洲繼續蔓延開去，工人運動根本從來未平息過，工人階級嘅覺醒，同時亦係廣大民眾嘅覺醒，社會主義或共產主義嘅思想四處蔓延，工人階級運動聲勢浩大，加上一戰之後，梵爾賽體系下歐洲疆界重新建立，一股一股民族大遷移嘅移民潮，亦都將一波又一波嘅外來民族帶往世界各處，自由主義、共產主義、工人運動、社會運動、移民浪潮嘅種種挑戰之下……極右派嘅反動心理因此應勢而生，左右互為因果，世界進入二元分立大時代，民眾意識形態各走極端，法西斯亦由此誕生……

上述所講20世紀20年代世界發生嘅事情，一百年後，同樣喺21世紀20年代再一次發生……奇！

#常威💀 #大軍閥平反系列  #大軍閥 #民國歷史

【常公子歷史頻道291回：斷送共和關 君臨天下 蛋牛治】

♉中國歷史上最後一個皇帝袁世凱粉墨登場，洪憲帝制上馬，個人感覺，袁世凱要成為皇帝並非為咗一己私欲，佢希望利用復興華夏儒家文化，重建上層建築及政權權威，藉此實現國家統一同妥善管理。出發點可能係一片真心，要全中國人服下一劑苦口良藥，從此歌舞昇平，回復高度統一大一統穩定和諧狀態。

♑20世紀初期，自由民主議會制度並唔係大潮流，「君主立憲」、「開明專制」先係當時大多數成功國家例子所採用嘅政治體制，最好嘅例子就係中國鄰居日本，日本可以有一個天皇存在？點解中華民族唔可以有一個皇帝高高在上。給予人民高度嘅自由，難免會演變成為暴民政治，民粹世界，呢個係當時中華民國所面對嘅實際問題。

♊夢想固然是好，自由民主世界當然okok，但夢想係一回事，現實卻是另一回事，政治係為咗解決當前問題出現，並非為咗長治久安而來。另外有一個講法，自由民主係咪一定好呢？到頭來民衆以為自己有份參與政治決策同選擇自由，但真相卻係所有事情及意識形態完全操縱在有錢人及資本家手上。

♈對於上述質疑，我並不會加以否定（因為某程度上都係真相），不過放喺枱上面的食物，選擇實在有限，你唔揀自由民主？難道要揀專制極權？你寧願你嘅命運操縱喺資本家手中？定係操縱係極權者手中呢？到頭來係「兩害取其輕」嘅問題，廣東人話齋正所渭橫又死掂又死，你想死得舒服啲？抑或想死得難睇啲呢？

♈有個小學雞嘅問題非常好，你到底鍾意食一嚿有朱古力味嘅屎？抑或食一嚿有屎味嘅朱古力呢？前者入口香甜卻是屎，後者難以入口卻是朱古力；你如何去選擇呢？呢條問題最精妙嘅地方在於，無論作出那個選擇，其實都係一個食屎狀態，分別是如何去食怎樣去食？

♑【常威近代史】第五部《霹靂大忠臣對決無敵大買辦》Round two電子書上架（條download link在下面），請大家課金支持我一直走落去，直至劉少奇骨灰到達北京王光美手上……

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上4000訂戶！

✅https://youtu.be/8bqt-ezrVCs

【常威近代史】（四百一拾四回）
（離題系列）排外排到變了法西斯

20世紀初期西方世界，「共產主義政權」出現，一個新時代開始，最起碼民衆發現除咗原有嘅資本主義社會模式之外，仲有另一種可以俾佢哋選擇，佢哋仲發現，原來卑微貧窮嘅自己——即係勞工階層同埋無產階級（或包埋農民）——並唔係永遠俾人踩住喺地上面、只能夠辛勞工作糊口嘅一群螻蟻，衹要能夠團結起嚟，一樣可以翻身，甚至可以推翻資產階級同貴族血統，當家作主，自由話事。

當時嚟講，共產主義絕對係窮人救星，亦係每個當權者嘅終極噩夢。哪裏有窮人，哪裏有被剝削的人，哪裏就有共產主義的苗頭——世界革命應該發生嘅前題——事實上哪裏沒有窮人？哪裏沒有被剝削的人？

叉開一筆，作為一個中國人，今day我想用中國儒家哲學，粗淺地講講人性問題。有個問題成日講，人性本善？抑或人性本惡？孟子用一個比喻，佢話如果你見到一個細路仔即將跌落個井，你會冒起一份惻隱朮赤之心，想衝過去救佢，或睇見都驚心動魄，總之你唔會覺得開心笑出嚟掛？由此推論，人性本善，亦由「人性本善」呢個大前提，推論出儒家哲學嘅「仁義本體論」作為一切道德基礎。

但我想問一個問題，如果見個細路仔跌落個井度嘅『你』，由出世嗰一刻開始，被囚禁喺一間房裡面，唔俾你同任何人接觸，冇人教你讀書寫字，直至你長大後放出嚟，見到一個細路仔跌落個井度，你會唔會有惻隱朮赤之心呢？抑或會笑出嚟？我唔知道。

當然以上一個咁殘忍嘅「人體實驗」冇可能發生，純粹係愛因斯坦式嘅「思想實驗」。因此話「人性本善」，本身就有商榷餘地。人性為何？既然唔可以憑空想像，唯有靠統計數據，採用歸納法得出結論。歷史講俾我哋知，人性有善亦有惡，但「人性本惡」嘅案例多不勝數，爭奪、剝削、戰爭、屠殺……比目皆是。人類只係動物嘅一種，天然嘅本性係求生，並無是非善惡黑白概念，所謂仁義道德，基本上係披上野獸身上面一塊人皮，令睇上去，人同野獸有小小分別。

子曰「食、色、性也」，人嘅本性只係求生同繁殖，同黑猩猩一樣，同魚缸裏一條魚一樣，只係採用嘅手法同形式唔同，人類為了求生，可以不擇手段，外在環境越惡劣，手段越血腥殘暴，豐衣足食，當然人人可以以禮相待講道德講理想、談更高精神層次嘅事物；但當食都冇得食，就快冚家餓死，生死存亡時候，人始終會回復野獸茹毛飲血狀態。

因此推論，因為人性其實同客觀外在環境掛鉤，「並不是意識決定存在，而是存在決定意識」。無厘頭嘅第一次世界大戰後，成個歐洲滿目瘡痍，經濟不景氣，加上梵爾賽體系嘅胡亂劃界，觸發一場巨大嘅移民浪潮，無數人為咗搵食，漂洋過海，遠去異邦。就算喺一個國家之內，人口亦都大量地由鄉間湧向城市。20世紀初期嘅移民浪潮，移民並唔係有錢人資產階級，而係窮人勞工階層。

我本來好地地搵食，結果嚟咗一大班異邦人爭飯碗？拉低工資、扯高房租、傷害文化、搞亂治安，仇外情緒因此出現。未見過？2003年後嘅香港咪一清二楚囉！仇外情緒表達於外，最普遍嘅現象就係種族主義——即係保護本地本國民族嘅純正，免於外來劣等民族嘅污染、甚至淹沒同化。

20世紀20年代嘅歐洲，每個國家內反移民運動氣氛同樣熾熱，「反猶主義」（anti-semitism）就係其中一種極端嘅表達模式，就算係世界上最自由嘅國家美國，都開始拒絕嚮往自由嘅子民進入其內爭飯碗，自己都顧唔掂，真係冇辦法施捨比你。情況就係咁，純粹人性嘅表現。

面對經濟不景水深火熱嘅生活環境，一般社會上嘅小人物有兩種反應，第一種係覺悟到自身嘅不幸來自資產階級及制度嘅剝削，因此左傾，希望大愛精神改變世界；另一種係先求自保，有你冇你，先爭取自己同自己同路人嘅利益，將外來人當成敵人加以打擊同驅逐，向右轉，轉到極右，叫「法西斯主義」（Fascism）。

「法西斯主義」有以下定義：

「一種具革命形式的極致民族主義，此民族主義決心要動員所有『健康的』社會和政治能量，以抵抗其認定造成民族衰敗的威脅，以實現國族或民族脫胎換骨的目標。該民族主義方案涉及政治文化的復興，包括支撐政治的社會及倫理文化的重生，而在某些案例，此重生包括了基於種族學說的優生學概念的復興重生。」

最先興起法西斯主義嘅係意大利墨索里尼Mussolini（1883-1945），這位歐洲法西斯主義之父，大概參考咗1917年列寧成功奪權嘅手段，知道所謂主流民意只是「流」，只要能夠動員社會上小部分有堅定信仰（成功洗腦）兼唔怕死嘅「先鋒隊」，利用無底線街頭暴力手段就可以事成，1921年墨索里尼建立「國家法西斯黨」，在一戰後政治和經濟動盪嘅義大利，具有民族主義、反共產主義和反工會特點嘅國家法西斯黨獲得了中產階級、地主及工業資本家支持。

1922年10月28日墨索里尼發動「向羅馬進軍」政變，號召30000名「黑衣軍」攻入羅馬奪權，成為一時佳話。

人性嘅另一個特點，叫連鎖反應，可以互相棒喝得到覺悟，雖然意識形態風馬牛不相及，但墨索里尼嘅奪權手段無疑係參考列寧同托洛斯基，而墨索里尼奪權成功案例，更激發咗身在慕尼黑一個無權無勢、小小工人政黨頭目嘅雄心，佢叫希特拉。

#常威💀 #大軍閥平反系列  #大軍閥 #民國歷史

✅本土唯一香港土話近代史文本

❤【常威近代史】第一部《大清亡國關慈禧蛋牛治》，全面開放，免費下載， #freedownload！

Free下載連結🔽

https://play.google.com/store/books/details?id=C3hjDwAAQBAJ

【常公子歷史頻道292回：斷送共和關 蔡鍔與小鳳仙 蛋牛治】

♉蔡鍔係劉松仁，小鳳仙係周海媚，呢個係我對蔡鍔與小鳳仙嘅印象（當然同時暴露咗我嘅年紀），但我對蔡鍔與小鳳仙嘅印象，同真正嘅蔡鍔與小鳳仙關係全無，亦係真相；另一個經典例子就係大軍閥，許冠文係鹹濕賤格低能大軍閥，結果所謂大軍閥嘅形象就被定型，反而真正嘅大軍閥，響歷史書課本上並無稱呼為大軍閥。

♐所謂歷史，其實全部都係二手史料同三手、四手史料，改寫再改寫穿鑿附會再改寫，你去睇一個歷史學家所寫嘅歷史著作，同你去睇劉松仁同周海媚嘅蔡鍔與小鳳仙愛情故事，可能全無分別；唯一嘅分別係，前者可能誤導你更多，因為你永遠唔會將後者當成真相，戲劇電影小説純屬創作，無傷大雅，就算冠以真人真事改編名目，你也會知道是假的，情況大致這樣。

♉就以雲南軍閥蔡鍔做例子，一代軍神，首先起義反對袁世凱洪憲稱帝，為保中華民國法統之路花果飄零，以寡敵眾，戰無不勝，攻無不克，係歷史上嘅大英雄大豪傑，媲美岳飛袁崇煥；但真相係，蔡鍔好有可能係日本帝國搞亂中國嘅白手套代理人，當然亦未必係，除非唔係。我哋其實冇辦法知道，現存嘅史料，亦冇足夠嘅證據證實我上述嘅講法。

♉忠奸黑白是非分明，喺世人對歷史嘅睇法。真相係所有歷史人物並非非黑即白，非黃即藍、非藍即黃。世情在不斷變化中，嚟到現代世界，基本上全世界冇一個人或政客能夠將自己講過或承諾過嘅嘢堅持到最後，或大改或微調或忘記，因應時勢而作出改變，其實亦係無可厚非之事。大部份人嘅人生基本上亦都處於一種變化不定嘅狀態中，堅持己見真係一種「美德」？唔肯去改變就係「君子」？邊個講嘅？我淨係知道，通常遇到太頑固太固執太堅持己見嘅人，通常都有神經衰弱或情緒病，至少有社交障礙，好難相處。

♉既然係咁，自己都係一個花心嘅人，點解又可以要求伴侶從一而終？變幻才是永恆，任何一個人都在變幻中不斷重新塑造自己，如果世界在變你不變，落後於時勢，通常受傷嘅會係你自己。

♑【常威近代史】第五部《霹靂大忠臣對決無敵大買辦》Round two電子書上架（條download link在下面），請大家課金支持我一直走落去，直至劉少奇骨灰到達北京王光美手上……

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上4000訂戶！

✅https://youtu.be/bXc24sCbxbk

【常威近代史】（四百一拾五回）
（離題系列）一代魔頭希特拉是如何煉成？

當法西斯之父墨索里尼帶住三萬民兵進攻羅馬奪權嘅時候，響德國啤酒之都慕尼黑，希特拉仍然只係一個小政黨嘅頭目，響當時民主自由嘅「威瑪共和國」內，好似希特拉「德國工人黨」呢一種政治小組織，成街都係，總之插支旗仔，有個朵，講嘢有人圍爐聽，有人肯捐小小錢，有笪地方落腳，就係一個小政黨。

當時希特拉，好鍾意喺慕尼黑勞工階層集中消遣嘅酒吧中演講，大家飲大兩杯，高昇論政，高談闊論，胡言亂語。你可以想像，喺呢種地方孕育出嚟嘅政黨或政見，必然係缺乏學術理論根基同視野，純粹三個字講曬：「屌政府」，好似今日香港嘅維園阿伯，純粹只係想講粗口屌政府，以宣洩自己對社會現狀嘅不滿。

如果你響1920年同希特拉講，14年後你會成為德國最高領導人同國家總理，我諗希特拉一定會覺得你係黐銀線。因為當時嘅希特拉，的確係無權無勢，甚至連金主都冇，圍喺佢身邊嘅都係社會上邊嘅失敗者，佢哋全部鬱鬱不得志，所謂納粹黨嘅原始班底，有退役軍人、有工人、有養雞嘅，亦有大學畢業生、甚至高學歷失業嘅博士生……但係佢哋響社會上搵唔到食，懷才不遇，因此滿腔怒憤，講真，如果當時搵食容易，嗰個有份工打安分守己，可以解決三餐一宿問題，真係冇人會得閒同你上街攪抗爭運動。

好可惜，真相係一戰之後，德國失去所有，金錢同領土反而係其次，最重要嘅係民族失去尊嚴，高傲優秀嘅日耳曼民族，覺得俾其他歐洲人壓迫。第一次世界大戰喺無厘頭開始，亦都係無厘頭結束，明明東西線係占緊上風嘅德國，民眾一瞓醒，第二朝就忽然投降（呢個係當時嘅真實現象），一夜之間失去所有，巴黎和會梵爾賽條約下任由英法美日四國宰割，割地賠款不特止，威廉二世下臺，換上一個雞棚式自由民主嘅「威瑪共和國」，由歐洲第一流國家，變成三線國家，情況你可以想像為「利物浦」要燉去踢英甲，真係何等屈辱？

德國民眾完全唔可以接受，勝敗乃兵家常事，打仗可以打輸，但就唔可以接受屈辱.......尤其是屈辱你嘅，係比你低等嘅民族。

用「民族主義」建立「國家」，係19世紀中葉先開始出現嘅事物，德國同意大利就係最好嘅例子，本來疆土之內有唔同成分、各自為政嘅成員，只係一個鬆散嘅「國際聯盟」，如何將所有嘢所有人團結起嚟，組成一股更大嘅政治能量，從而建設一個巨大帝國？用嘅工具就係「民族主義」。因為你有日耳曼民族血統，所以你就係德國人，邏輯非常簡單，大眾亦都容易接受。（做政治要謹記一點，千萬唔好將理論架構set得高，因為會冇人明白，社會上大部分都係蠢人，只能夠用最愚蠢同最簡單嘅口號去團結）

正如章太炎發明「中華民族」依個概念，就成功將所有人變成中國人。乜中國人本身唔係中國人咩？你可能會咁樣問。最簡單嘅例子係「五族共和」，原本滿清帝國嘅滿洲人，根本唔係中國人一部份，孫文初期搞革命嘅口號係「驅除韃虜」，要趕走佢哋返滿洲，但後來中華民國成立，一句「五族共和」，就將滿洲人變成中華民族一員，所以之後滿洲人響東北成立嘅「滿洲國」，就變咗「偽滿洲國」，中日戰爭嘅爆發，亦因為「滿洲國」嘅Identity問題，蔣介石嘅國民政府話唔可以丟失東北「偽滿洲國」，但佢幾時擁有過「偽滿洲國」嘅主權呢？一件本來唔屬於你嘅嘢，又點會產生「丟失」呢個概念呢？

去返希特拉，對自身現狀嘅不滿，除咗可以將責任推俾政府（民主政府）外，仲可以將責任推比其他人（或民族）承受，響20世紀初期一戰之後嘅破落世界，好多窮人同losers將自身嘅不幸歸咎於另一個冇國家嘅民族——正正就係猶太人身上，所謂反猶主義（Anti-semitism）出現，並唔係新鮮事物，響19世紀最後25個年頭，以仇恨猶太民族為宗旨嘅政治運動，開始係歐洲某啲國家出現，起初是仇恨猶太人嘅財富同團結，仲有佢哋堅持嘅血統隔絕主義，後嚟個陰謀論越吹越大，正如第一次世界大戰歐洲國家之間嘅仇恨一樣，經由傳媒小說戲劇不斷渲染，猶太民族成為咗一個恐怖嘅犯罪集團，以金融勢力控制同摧毁整個歐洲。

希特拉係一個百分百嘅極端反猶主義者，反猶並唔係佢原創嘅事物，佢最大嘅錯誤係將反猶運動由戲劇宗教形式，轉化成實際行動，當政之後屠殺500萬猶太人係驚世罪孽，亦係佢成為大摩頭嘅唯一理據，除咗屠殺猶太人，其實希特拉嘅所作所為並無資格稱得上為一個大魔頭，佢嘅個人品行，甚至比當時歐陸一般政客優秀。

受墨索尼里法西斯進軍羅馬、以小博大成功影響，希特拉響1923年11月9日晚上以「納粹黨」名義策劃咗一場「啤酒館政變」，得到一戰德軍名將魯登道夫（Erich Ludendorff，1865－1937）支持，企圖利用類似嘅街頭暴力行動推翻威瑪共和國，希特拉當時連墨索尼里嘅三萬人都冇，只有幾百個烏合之衆起義，當然係失敗收場，政變失敗後三天，希特勒被判叛國罪。

希特拉成為階下囚，響獄中完成咗《我的奮鬥》一書，希特拉所策動嘅政變，不但無令佢變成歷史罪人，反而令佢變成民族英雄，坐監令人生更精彩，用希特拉身上絕對正確，佢一心一意為復興日耳曼民族尊嚴同未來而坐監，令到好多德國人開始崇拜佢、追隨佢。當佢出獄嘅時候，整個德國嘅命運亦從此改寫……

歷史不斷在重複，有太多驚人相似嘅地方，如果要寫落去，常威中國近代史要變成常威近代史，一切要響1923年當下止住，下一站我哋翻返去1923嘅中華民國，繼續中國人嘅故事……

#常威💀 #大軍閥平反系列  #大軍閥 #民國歷史

⏩最新上架，請大家課金支持💪💪

❤【常威近代史】第五部《霹靂大忠臣對決無敵大買辦》Round two

https://play.google.com/store/books/details/%E5%B8%B8%E5%A8%81_%E9%9C%B9%E9%9D%82%E5%A4%A7%E5%BF%A0%E8%87%A3%E5%B0%8D%E6%B1%BA%E8%B6%85%E7%B4%9A%E5%A4%A7%E8%B2%B7%E8%BE%A6_ROUND_2?id=puXmDwAAQBAJ

【常公子歷史頻道293回：斷送共和關 護國戰爭 蛋牛治】

♉蔡鍔係第一個企出嚟反對袁世凱稱帝嘅軍閥，中華民國至1911年創立以來，內戰不斷，首先係袁世凱北洋系統同革命派嘅「第二次革命」，革命派或稱國民黨嘅反動勢力被剿平，袁世凱獨攬大權，為咗重新塑造統治威權，建立大一統，佢推出「洪憲稱帝」計畫，我再重申多一次，可能佢未必為咗自己，而係為咗往後有順利嘅管治環境。

♉當時嘅中華民國，論人口論地域的確係一個堂堂大國，但論國勢論經濟發展，只係一個三流國家，甚至可以講唔入流。如果亂局不止，繼續處於崩分離析、軍閥割據嘅狀態，唔將國家經濟同國力搞上去，放響中華民國面前唯一嘅結局，就係俾鄰國日本完全吞蝕，真實情況亦都如此，中華民國同日本嘅關係，就如美國同墨西哥。結果日本不斷千方百計侵略中國，去到1931年，終於爆發「九一八事變」，日本人稱之為「滿洲事變」。

♐袁世凱搞帝制啱定錯？一句到尾一定錯！逆線行車必定會被扣分！但放喺當時嘅歷史環境，袁世凱想利用帝制復興華夏文化儒家哲學統一試圖重建全國人嘅意識形態，其實係一個可以理解嘅選項。當年中華民國最大敵人日本帝國，同樣行緊君主立憲虛君帝制。響袁世凱同不少時人眼裡，日本人行帝制風生水起，脫亞入歐；而中華民國行民主共和體制，則政治爭拗不斷崩分離析，我通知過大家，千萬唔好用現代人嘅眼光同角度去睇古代嘅事物，如果我常公子身處1916年，我諗我可能係洪憲帝制嘅支持者之一都未定。

⛎軍神蔡鍔完全係由日本軍事教育系統一手一腳打造出來嘅日式職業軍人，到最後蔡鍔身故嘅地方都係日本本土，歷史上冇講過畀我哋知蔡鍔發動反對袁世凱稱帝嘅「護國戰爭」同日本帝國有任何關係。當初，日本同美國都係支持袁世凱稱帝，冇日本嘅口頭支持同承諾，我諗袁世凱亦唔敢將帝制上馬，結果袁世凱實行帝制，日本人就立刻反轉豬肚玩謝你。

♌睇返歷史走向，袁世凱的確好無辜。大概依一個係佢嘅命運，一生人所做嘅錯事唔多，反而好事就日日做，最後遺臭萬年，成為秦檜魏忠賢奸臣隊伍一員，其實好唔公平，幸好佢並不孤單，至少陪佢嘅，仲有慈禧太后同汪精衛。

♑【常威近代史】第五部《霹靂大忠臣對決無敵大買辦》Round two電子書上架（條download link在下面），請大家課金支持我一直走落去，直至劉少奇骨灰到達北京王光美手上…

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上4000訂戶！

✅https://youtu.be/gFTqeeB54J4