大清亡國關慈禧蛋牛治 2

【常公子歷史頻道266回：斷送共和關 世紀大DQ 蛋牛治】

♉經歷咗2019年逆權運動，加埋2020年武漢肺炎襲地球，好多人都會有「我們已經不能回到從前正常的香港」那種慨歎，近一年，變化係巨大嘅，無可否認，「不能夠回到從前」係真嘅。但係我想講，任何時候，我哋都係「不能夠回到從前」。王家衛《一代宗師》裡講「從今後，我只有眼前路，沒有身後身。」任何人其實祇有眼前路，懷緬過去，純粹係一種虛構想像。

♑過去總係美好？真的嗎？人總愛粉飾過去，來表達對當下嘅不濟，事實上人嘅腦部記憶體有限，對於過去嘅印象，其實非常模糊，或者我哋只係懂得選擇美好嘅過去部分記下來，將唔好嘅事統統忘記，透過依種記憶過濾，「過去」永遠成為「美麗回憶」，而並非「真相」。歷史係一種研究過去嘅人文科學，我哋渴望尋找逝去事物嘅真相，藉此真確地將過去保留落嚟，或者再進一步，希望響整理過去嘅時候，能夠得出一啲結論或者軌跡，幫助我哋去面對未來嘅挑戰。我有時諗，歷史大概沒有存在嘅必要，是「無用之學」，雖然莊子《人間世》曰「人皆知有用之用，而莫知無用之用也」。

⛎再講，人類嘅生活真係有「正常」咩？所謂「正常」到底係啲乜？2019至2020年，如果你感覺不快樂、感覺很不正常，難道過去又好快樂好正常嗎？但所謂正常又究竟係甚麼一回事？貧富懸殊係正常嗎？人工20000元一個月，樓價20000元一呎，又係正常嗎？剝削是正常嗎？靜靜地被剝削也是正常嗎？如果你覺得上述我所講嘅嘢係不正常，咁反抗先係正常，混亂先至係正常。用統計學嘅方法講，如果你認為群體中大多數人表現出嚟嘅生活特徵就係正常嘅話，咁集體主義極權主義係正常嘅，強調個體嘅思想自由應該係不正常才是。

♍我得出嘅結論係，唔好懷念過去，因為凡事冇得返轉頭，有早知就冇乞兒；第二，所謂「正常」其實係不存在，世界上從沒有一種所謂人人有共識嘅「正常」生活狀態，所謂「正常」完全主觀，你覺得正常人哋覺得你不正常，而且世事瞬息萬變，變幻才是永恆，未來不可預測；因此引申出第三個結論，由於未來不能回預測，所以依從過去嘅歷史、經驗同教訓試圖去舖排未來之路，好多時候難免註定失敗收場；因此再引申出第四個結論，歷史真係冇用，純粹自娛同打發時間。

♈如果要我講歷史有乜實際作用？我反而會咁樣答你，人係一種需要娛樂嘅動物，你要想辦法娛樂自己，但娛樂需要付出代價同成本，於是需要找尋一種廉價而且有持久性嘅娛樂活動，閱讀歷史係其中一種，買書借書睇，相比起其他娛樂活動實在便宜得多，如果你係一個窮人嘅話就更加適合。懂得閱讀打發時間（不論是否讀歷史也好）其實係一種比較聰明同廉價嘅娛樂方法。上述意見並非我所原創，呢番說話係一個擁有博士學位嘅人同我講，應該夠權威性。想返轉頭，原來都係廿幾年前嘅事情，到今日我仍然牢牢記住。

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上3000訂戶！

✅https://youtu.be/1lmYXDdgcNQ

【常威近代史】（三百八十五回）

1922年1月，中華民國北京中央政府，進入直、奉兩大派系權力鬥爭，由奉系張作霖捧出嘅交通系梁士詒內系，遭受直系軍閥抵制，1月19日，江蘇、江西、湖北、山東、河南、陝西六省督軍省長聯名電請北京政府罷免梁士詒，政情立立亂，中央政府又窮又內鬥，真係有民主自由都冇叉用。

南方方面，各省大搞聯省自治，孫文軍政府（即佢口中嘅中華民國護法政府）愈做愈大，反北方聯盟勢力由廣東伸到廣西，串聯到雲南，另一面到達福建江西，亦係呢個時候，孫文發現佢最大嘅敵人未必係盤據中原嘅直系吳佩孚、或北京中央政府或奉系張作冧，反而係佢最親密嘅戰友「阿烟哥」陳炯明，坐擁粵軍軍權嘅陳炯明一日不除，孫文同蔣介石一日未能安枕，先安內、後攘外，正常。

而且我相信陳炯明擁護嘅聯省自治聯邦制，亦唔係孫文心裡面杯茶，孫文係要搞共產黨嗰套黨國合一，要以獨裁統治嘅手法進行北伐一統中國，之前講過去年12月底，孫文已經同中共眉來眼去，見過中共真正大佬馬林，亦應該達成初步合作協議。

1月24號，共產主義之父列寧響莫斯科接見瞿秋白（1899-1935）、張國燾（1897-1979）等人，探討國共合作嘅可能性，文人瞿秋白後來成為中共嘅最高領導人，今次莫斯科之旅，仲有幾十個「中國社會主義青年團」團員參加，佢哋由上海出發，搭船去海參崴，然後坐火車去莫斯科，其中有一個23歲年青人，第一次朝聖見到列寧，深受感動，響莫斯科正式加入中國共產黨，亦因為佢入黨嘅地方喺莫斯科，之後亦都留咗喺莫斯科讀勞動大學深研共產主義及接受列寧主義式幹部培訓，飲過鹹水，因此佢永遠係中共黨內嘅「國際派」，同「本土派」毛澤東永不咬弦，佢叫劉少奇（1898-1969），亦都係我常威近代史寫作結局主人翁。

所有嘅事情都有一個起點，亦有一個終點，中間所步過嘅，叫歷史。

1922年2月1號，超過3000個南洋華僑通電北京政府，承認南方政權，並且促請孫文迅速北伐，統一中國。當然叫得你北伐，就一定要捐錢籌旗，否則伐條毛麽？

2月6號，響華盛頓舉行嘅太平洋會議閉幕，會議通過有關中國嘅條約包括《中日解決山東問題懸案條約及附約》、《九國公約》、《九國間關於中國關稅稅則條約》，日本答應喺山東徹軍，山東問題暫時獲得解決，但正式廢除21條，則仍然冇結果。中國喺會議上提出嘅定期實現「關稅自主」，西方列強各國亦都拒絕承認。

關稅關乎國家存亡（所以打貿易戰咁重要），當時身為弱國嘅中國，並無制定關稅嘅自主權，會議上，被迫響英、美、法、日四國傾好嘅關稅文件上簽名。條約規定，稅率定為5%，響條約生效後三個月內召開修正稅則委員會議，會議可決定是否增加2.5%嘅附加稅，中國進口稅四年後再行修改。會議結束後，中國代表發表咗「保留恢復關稅自主問題」嘅宣言，擺明唔妥最後嘅仲裁結局。

關稅問題有幾咁重要？相信經過過去兩年大家都一清二楚，利用關稅限制外國貨嘅入口數量同成本，或調節自身出口貨嘅貿易優勢，其實係關乎一個國家政權嘅生死問題，除非你玩鎖國玩鳥籠經濟，否則全球一體化下，國家與國家之間嘅貿易運行，需要利用關稅作調節，同時作為一種侵略手段或防衛手段，否則全球經濟秩序一旦出現混亂，就會引發實體戰爭（就好似目前嘅情況），「世界貿易組織」WTO成立，就係提供一個平臺畀全世界每個成員國坐低慢慢傾關稅問題，希望透過條約、承諾及協商，令世界貿易取得平衡，避免混亂或戰爭發生。

2001年11月11日光棍節響卡塔爾首都多哈，正式簽署了中國加入世界貿易組織（WTO）嘅協議。 一個月後，中國正式成為世貿組織成員，融入了世界多邊貿易體制。當時，差不多每個人都相信，世界從此一帆風順，但係20年落嚟，用美國嘅講法，中國並無認真執行及嚴格對待佢響WTO所簽下嘅貿易協議，尤其是喺知識產權方面。20年過去，美國嘅講法係，中國仍然係不公平嘅貿易運行條件下獲取巨利成為既得利益者，國力及國家財富急速膨脹，而在貿易逆差之下，美國一直成為受害者，簡單啲講，叫送錢畀你駛養肥你對付自己。因此Donald Trump要發動新一輪貿易戰，好好懲罰中國。

因爲我唔係經濟專家，上面所講嘅嘢純屬廢話。中美之間嘅貿易問題，兩者亦各有表述。正如現實世界一個窮人發咗達，就會俾人講佢用不法手段或靠老婆或靠黐金糠彈起，當事人則會認爲我係自食其力，純粹靠奮鬥翻身。其實兩種講法都冇錯，睇吓你用乜嘢角度切入，能夠切出血，就係正確。大前提係，邊個唔想發達？要大撚把錢駛，當然要有計，所謂「財來自有方」，好過你冇得發達丫，係唔撚係咪先？

講返歷史，日本答應山東徹軍，將膠州德國舊租界交還中國，但保留日本領事館及日本團體嘅「公益財產」（即係還唔曬）；中國回收膠濟鐵路，但須畀錢贖回，成為5340萬馬克，以鐵路為抵押，分15年還清（咁其實唔係叫交還，叫買返）；中國收回青島海關、及山東礦山、鹽場、海底電線、電臺等主權，但日本商人喺海關行文時可用日文，青島海關職員亦應該聘用一部分日本人；其他商業利益，日本人亦要有份參與，或者第一優先或有特權。

山東問題真係解決咗？表面係解決咗，但內裡留咗十條尾巴，亦埋咗好多計時炸彈；正如1997年香港回歸中國，英國人撤出，表面事件好似得到圓滿解決咁，但真相係內裡留咗十條尾巴，亦埋咗好多計時炸彈，響20幾年後一次過爆發。當年嘅山東問題亦都係咁，過多十幾年，亦都一次過爆發，而且演變為全面侵華戰爭。

#常威 #大軍閥平反系列  #大軍閥 #民國歷史

【常威近代史】（三百八十六回）

大洪水到，睇嚟未必可以寫到劉少奇骨灰到達北京王光美之手，去得幾多得幾多。

1922年2月，直系、奉系關係迅速惡化，原來嘅盟友終於變成敵人，2月10號，張作霖派遣特使李夢庚為代表，去桂林見孫文，並且表示奉天省即將自治，脫離中華民國北京政府獨立，同日廣州護法政府外交部長Hongkonger伍廷芳致電北京政府，否定北京政府喺華盛頓簽訂嘅山東協定。

同月，張作霖嘅奉軍舉行野戰大演習，目的就係警告以吳佩孚為首嘅直系軍閥唔好再玩嘢，停止攻擊由奉系扶植嘅梁士詒新內閣。張作霖亦命令奉軍做好作戰準備，演習期間，張作霖召開奉軍高級將領會議，奉軍營長以上軍官亦都要列席參加，張作霖喺會議上要求各部門整備軍備，並命令進入備戰狀態。

你要打？直系曹錕同吳佩孚亦未驚過，大家都唔驚對方，唔會退縮！咁就一定會打！其實世界運行嘅規則，就係一個「驚」字。要千方百計令到敵人驚，因為人一驚，就會收皮，咁就唔使打；但如果敵人唔驚，咁即係代表你自己開始驚。「驚」係無形嘅心理反應，同現實可以毫無關係，正如你去睇恐怖片你會驚，但你明知一切都係假，山村貞子係人份嘅，但係你見佢喺電視機爬出嚟，你都會腳軟。

政治世界亦都係一樣，你要反抗，我就千方百計打到你驚，等你縮，等你唔夠膽再反抗。所以如果你係意識形態老屎忽玩家，就無論如何都唔可以驚，因為一驚就會露底，情況係：就算你好驚，你都要扮唔驚，而且你愈驚，表面就扮到愈硬淨，凡事可以倒轉嚟諗，思考方法上叫「逆思維」，隻馬操到火噴噴，晨操鬼死吸引，集有利條件於一身，臨場買到兩倍樓下，咁嘅情況，即係叫你唔好買，明白未？

魔鬼筋肉人一早教精你，打交嘅最高境界係心理戰術，點樣可以令到大師兄驚咗外賣仔？就係要佢諗多咗，就係要佢驚。聰明嘅馬基維利主義者，就最識玩呢招，因爲要令到敵人驚，可以係零成本操作，講吓吹吓就得架喇。當然如果你怕死，就唔好參予遊戲，特朗普由第一日開始就冇戴口罩，就係要話俾全世界人知，我唔驚新型冠狀病毒。

講返歷史，直奉就快打交，中央政府債臺高築，華盛頓會議閉幕之前，西方列強同日本都相信中國正處於政治崩潰邊緣，北京已經冇辦法向公務員發全薪，教師嘅薪水亦都拖欠咗幾個月，全北京停課咁滯，市場狀況急劇惡化，政府財政亦都無法修補，十個煲淨低嗰一個蓋都冇埋。

莫斯科加緊靠近中國南方政權，合作嘅可能性越來越大。列寧同托洛斯基對世情洞察好深，佢哋非常明白革命工作嘅基本原則，並唔係將所有嘢打爛曬，並唔係將所有關係切斷。1920年，列寧發表咗一篇重要嘅文章，叫《共產主義運動中的左派幼稚病》，提醒革命者，基本原則係要將敵人減到最少限度，而將同盟者同埋朋友增加到最大限度。要充分利用敵人陣營裡面嘅一切分歧同埋利益衝突，尋求與群眾聯盟嘅一切可能性，敵人內部未分化，你自己內部就分化，想贏幾難喇。

馬克思同列寧嘅最大分別，係馬克思係文人哲學家，係理論嘅奠基者，列寧托洛斯基係實行者，係要將共産主義理念變成實際政治操作，所謂「列寧主義」，其實並非意識形態，而係一種行動綱領。佢本身冇違反馬克思主義，佢只係將馬克思主義具體化實現同操作；同樣道理，因為唔同嘅時間地點同背景，實行馬克思主義亦因唔同環境而有唔同嘅行動綱領，俄共用列寧主義實踐，而嚟到中國後，就要變成「毛澤東思想」。

進入3月，之前講過大事件香港海員大罷工結束，勞方取得勝利，呢件事亦都大大鼓勵咗中國左派嘅鬥爭士氣。同月上海發生金融風暴，所謂「信交風潮」，1920年2月，中國人喺上海創辦第一家證券期貨交易所，第一水梗係賺錢，因此引發咗炒股風潮，做莊發硬，所以你做我又做，去到1922年，上海各類型嘅交易所暴增至140多間，1921年嘅夏秋之間，上海灘人人發狂炒賣期貨股票。

由於金融基建未做好就發大，終於個波好快吹大咗，引爆資產泡沫，因為投機者投機過度，借貸炒股票期貨，終於周轉不靈，行情暴跌，交收時cash又唔夠找數，做莊嘅交易所大批倒閉，去到1922年2月，140間交易所剩低12間，情況空前慘烈，有幾多人輸身家？相信無法計算。民衆睇見上海嘅情況，民眾又有多一個理由相信馬克思主義囉。

上海紙醉金迷，1922年3月底，一列運載小工嘅火車行駛到山海關，因為天氣嚴寒，列車上竟然有300人監生凍死，情況唔係叫慘劇，叫貧富懸殊；3月底，軍閥唐繼堯退入昆明，另一個南方軍閥顧品珍被行刺身亡，軍隊潰散；同時粵軍參謀長鄧鏗被刺，2月26號，孫文喺桂林召開緊急軍事會議，因為陳炯明阻撓北伐，北伐軍隊暫時返回廣東另謀出路，29號，廣東省議會反對北伐案，孫文同陳炯明之間，正式決裂！原來嘅盟友終於變成敵人！

你有你打，我有我打，1922年3月，世界相對平靜，響德國慕尼黑，一個由失業工人、失業軍人同遊民痴線佬組成的政黨「德國社會主義工人黨」，或簡稱Nazi納粹黨，開始成型，佢哋有咗佢哋嘅黨徽，一個來自中國嘅古老文字：「卍」（音萬），33歲希特拉開始成為黨嘅領導人（或稱呼為元首），當然仍是微不足道。

同時，困擾人類壽命千年嘅糖尿病，終於得到解決配方，加拿大醫學家班廷（Frederick Grant Banting 1891-1941）發明咗人造胰島素注射，1923年佢因此得到諾貝爾醫學獎，亦成為有史以來最年輕嘅得獎者，佢當年32歲，佢救咗幾多人？我諗數唔到

#常威 #大軍閥平反系列  #大軍閥 #民國歷史

✅本土唯一香港土話近代史文本

❤【常威近代史】第一部《大清亡國關慈禧蛋牛治》，全面開放，免費下載， #freedownload！

Free下載連結🔽

https://play.google.com/store/books/details?id=C3hjDwAAQBAJ

【常公子歷史頻道267回：斷送共和關 羅福星 蛋牛治】

♉中美全面開火，香港無可避免變成Condon，歷史再一次證明，無論任何時候，香港都係一個重要嘅角色，孫文推翻滿清皇朝統治嘅中國革命，由1895年嘅香港開始；大江大海1949，香港成為中國國民黨同共產黨之間嘅緩衝區；中共鎖國期間，香港成為中華人民共和國唯一嘅對外窗口同埋外貿進出嘅方便門；80年代中國開放改革，香港更加為中國Boost起第一輪經濟火車頭提供資金同技術來源；1989年六四，香港係唯一一個地方長期紀念；去到1997，香港係全世界第一個「一國兩制」嘅實驗品；2019年風起雲湧，更加唔使講……

♉有幸活於香港，成為一個香港人見證大時代，可說是終身無憾。今日中美關係，用外媒嘅形容，正處於「自由落體」階段，跌至自1989年六四後嘅新谷底，甚至比當時更甚。昨日美國國務卿蓬佩奧更加向國會陳述香港已經失去其自治地位，意味美國對香港嘅「特殊待遇」將會取消（現在未取消），而香港一直享有嘅「單獨關稅區」（Separate Customs Territory）地位亦可能唔存在。依一招，無論對中國同香港經濟嚟講，都會係嚴重衝擊，我亦唔敢想像若然成真，香港嘅社會政治同經濟結構會發生乜嘢巨大變化？

⛎名苻其實「攬炒」狀態，香港有人求仁得仁、有人焦噪不安。面對大時代，各自表述，有人會移民離開就一定，社會會出現大洗牌，有人會一鋪清袋，有人一朝富貴，階級產生變化，向上流動嘅機會就會出現，其實未必一定係壞事，我一直強調，社會嘅怨氣係來自所謂「太平盛世」，嚟自「欣欣向榮、形勢大好」時利益分配不公，嚟自階級剝削，深層次問題唔想辦法解決，問題會一直存在。你唔去解決「問題」，「問題」本身就會自發性找尋路徑解決自己（同對手）。

♎目前唔適宜對「美國對香港」問題評論太早，要睇多幾日形勢發展，畢竟「大國博弈，枱底一定有交易」，如果美國或西方世界「真係」同中國徹底割蓆，咁就意味住要打仗，打仗就乜都唔使傾，亦唔需要有枱底交易，直至場仗打完勝負已分，大家先可以再傾，但無論如何都必須傾，只係睇下點傾？同幾時傾？

♑天祐香港。🙏🙏🙏另外，【常威近代史】第五部《霹靂大忠臣對決無敵大買辦》Round two電子書上架（條download link在下面），請大家課金支持我一直走落去，直至劉少奇骨灰到達北京王光美手上……

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上3000訂戶！

✅https://youtu.be/ZBafwvCilu8

👉最新上架⏩【常威近代史】第五部《霹靂大忠臣對決無敵大買辦》Round two
http://shorturl.at/dW145

⏩最新上架，請大家課金支持💪💪

❤【常威近代史】第五部《霹靂大忠臣對決無敵大買辦》Round two

https://play.google.com/store/books/details/%E5%B8%B8%E5%A8%81_%E9%9C%B9%E9%9D%82%E5%A4%A7%E5%BF%A0%E8%87%A3%E5%B0%8D%E6%B1%BA%E8%B6%85%E7%B4%9A%E5%A4%A7%E8%B2%B7%E8%BE%A6_ROUND_2?id=puXmDwAAQBAJ

【常威近代史】（三百八十七回）

直皖戰爭時，直系同奉系係盟友關係，共同對付段祺瑞，但當段祺瑞下野倒臺後，直系同奉系產生權力鬥爭，一山不能藏二虎，終於要大打一場，距離上次直皖戰爭，只係和平咗19個月時間，難怪人民對軍閥恨之入骨；當然之後蔣介石嘅北伐，以及同毛澤東打嘅國共內戰，並唔係軍閥間之混戰，而係正義鬥爭，兩者本質上有分別（當然我常公子唔認為，咪一樣）。

直皖戰爭以後，各派軍閥勢力又經歷咗一次重新組合，佢哋之間嘅矛盾隨住皖系嘅倒臺，分開成兩大陣營，而依種派系對立，正正亦都為帝國主義勢力操縱提供咗方便，於是乎英美帝國主義支持直系；日本則扶植奉系，依賴關係亦都日漸明朗化。

之前講過華盛頓會議，正正凸顯咗美日兩大勢力開始主宰世界，喺瓜分中國利益問題上，大家都心領神會。直系軍閥較多求靠於英美勢力、而奉系投向日本，亦都係地理問題。之前日本係段祺瑞皖系嘅絕對支持者，段祺瑞玩完，改為支持張作霖，換馬啫。

直系靈魂人物吳佩系，身邊亦有英國人同美國人做顧問，所以當時吳佩孚嘅統治手腕，其實相當西化，喺國際間風評亦好，你睇吓吳佩系成為第一個中國人上時代雜誌做封面（1924）你就一清二楚，佢唔係淨係識得睇風水嘅。

事實上，當時吳佩孚（直系）形象就比張作霖（奉系）好，呢個同張作霖係馬賊保安出身有關，但另一方面，亦都係同佢哋背後嘅金主千絲萬縷；世界發展到今日，你會發現任何美國嘅代理人都係正義嘅化身、係正義嘅一方，當然偶有失手（越戰、兩伊戰爭），但無傷大雅；可能美國或美國嘅代理人真係代表世界正義都未定，但不得不承認，文宣先係最重要，意識形態操作先係最重要。

吳佩孚上時代雜誌封面，孫文都未上呀！正如黃之鋒上過，林鄭都未上呀！但問題係，點解時代雜誌咁重要？有冇人問過？because made in USA！問題正正喺呢度！明就明，唔明就唔明！

今時今日嘅香港，就正處於中美兩國之間意識形態交戰嘅橋頭堡，什麼是正義？你相信自由民主，咪叫黃絲親美派囉；相反你相信中國夢，相信偉大嘅祖國站起來，你就係藍絲親中派囉。西瓜歸大邊，再冇所謂中間派、溫和派、騎牆派、連想收兩邊茶禮嘅古惑中環金融才俊，亦要被迫歸邊？你係黃定係藍？要講清楚！情況亦越嚟越明顯，其實有冇人諗過，所謂「政治正邪二分法」，本身就係有問題。玩三國志都有三個國家你揀，點解到咗最後得返兩個？唔係黃就係藍？唔係黑就係白？你唔係我嘅朋友就係我嘅敵人？典解嘅？但大家又覺得冇問題，高階政治意識形態操作，真係充滿特定技巧。

張作霖亦當然希望日本帝國全力支持自己逐鹿中原，但日本人經過21條同第一次世界大戰之後，響中國民眾心中形象大插水，而且上次提到，日本大正年代，國內民主呼聲高昂，佢哋國策上亦都減低咗武力干涉中國嘅程度，改為全面經濟侵略，張作霖可謂生不逢時，日本資助佢嘅金額，同資助段祺瑞比較，完全冇得比。所以，對張作霖擴張，日本採取比較嚴謹嘅觀望態度。

20年代，論經濟實力，奉系地區係當時全中國（除咗自由城邦上海）最富裕嘅地方，奉系發行嘅紙幣，亦相當有信用，當然背後係因為日本人關係，張作霖全面奪取北京政權，亦唔係發夢。

仲有一點想提提大家，美國喺當時直奉矛盾中雖然偏袒直系，但唔代表佢哋冇賣軍火畀張作霖，有生意一樣照做。正如今日，美國每年都會買大量武器比臺灣、日本同南韓，一字咁淺，如果大家和睦相處，美國邊有生意做？有人話中共行唯物主義實用主義，美國何嘗唔係世界上最大嘅實用主義信徒呢？諗清楚，其實冇人唔係實用主義信徒，「口裏說不，身體卻很誠實」不但係東瀛AV傳說，而且係普遍真理，甚至係唯一真理。

由張作林扶植嘅交通系梁士詒內閣上場，企圖利用政治力量全面打壓直系，直系即刻起槓，全面反撲，要逼新內閣倒臺。經過二三月兩個月嘅醞釀，戰爭已成定局，直系奉系大批調動兵力，本月9號，奉軍以保護京城為名，改名「鎮威軍」入關，直抵塘沽、軍糧城，張作霖亦抵達前線親自指揮，大有問鼎中原之勢。19號，張作霖通電全國，宣稱要武力統一中國，投入12萬軍力直撲中原，口裏最大嘅敵人就是民國關公吳佩孚，稱呼佢做「統一之唯一障礙，必須征服之」！真係俾面！

25號，吳佩孚等直系將領聯名通電全國，力數張作霖十大罪狀，至於罪狀係乜？已經無關宏旨，後金努兒哈赤要打大明江山，都有「七大恨」做理由，今日中央要同香港立國安法，亦都係因為香港「恐怖主義」氾濫，所以為咗香港人嘅生命財產安全，不得不咁樣做，一切為咗正義而做！

4月29號，直系召集10萬兵力，迎戰張作霖大軍，直奉戰爭正式爆發，邊個贏邊個輸，下次再講。本月20號，南方護法政府孫文免去陳炯明廣東省長及粵軍總司令職務，轉任陸軍部長，廣東省長一職由Hongkonger伍廷芳代替，孫文同陳炯明之間，亦宣佈正式決裂。

本月20號，美國節育運動始創人桑格夫人（Mrs. Sanger，1879-1966）應蔡元培邀請嚟到北京大學進行演講，中國人第一次聽到節育同避孕嘅知識，但喺之後嘅漫長日子裏面，Chinese都冇注意到節育嘅重要性同威脅性，終於今日地球上有14億5000萬個中國人，比起整個北美洲加南美洲加埋歐洲仲要多人……

但係如果最後會贏，可能係贏喺人口數目上……

#常威 #大軍閥平反系列  #大軍閥 #民國歷史

✅本土唯一香港土話近代史文本

❤【常威近代史】第一部《大清亡國關慈禧蛋牛治》，全面開放，免費下載， #freedownload！

Free下載連結🔽

https://play.google.com/store/books/details?id=C3hjDwAAQBAJ

【常威近代史】（三百八十八回）

直奉戰爭，本質上亦都係一次代理人戰爭，直系背後有美英勢力，奉系當然係日本，呢場戰爭，亦都凸顯咗英美同日本兩大陣營爭奪在華利益嘅深層次矛盾。當然依一戰，兩大陣營背後玩家嘅身份比較模糊（其實日本人都幾明顯），啱啱華盛頓傾好曬，大家都唔想反面，反面就冇生意做，揾代理人打，贏咗就freedom，輸咗就condom，why so serious？

當時就有日本作家咁樣講：「我們切望張作霖以旭日東昇之勢，君臨於全中國，和其他志士一道完成南北統一的艱苦事業，將四萬萬國民引導到安如泰山。」

但係我講過日本政府嘅態度係曖昧，佢哋一方面想利用張作霖統一中國，但更好嘅選擇應該係，張作霖繼續留喺東北，全力發展經濟建設，避免捲入關內嘅衝突。

順帶一提，好多人以為日本想侵略全中國，但我認為佢哋根本唔想，佢哋只係想要東三省，頂多想要埋個遼東半島，加埋朝鮮半島臺灣澎湖已在手中，咁就形成咗一個大東亞共榮圈中心本部基本結構，消去日本作為一個島國容易四面楚歌局面。

比我係日本，我會咁諗，畢竟要建立一個幅員廣大嘅巨大帝國，其實維持成本相當高企，20世紀初大英帝國嘅隕落，大家有眼睇，更加唔好計之前蒙古帝國同羅馬帝國興亡史，日本人文化根底深厚，佢哋冇可能唔明。當然二次世界大戰企圖奪取太平洋的制海權，偷襲珍珠港係為勢所逼，鬼叫希特拉當時歐洲咁威？而且唔拉埋美國落水，比佢做隻開心塘邊鶴，戰略上亦冇可能。

奉系內楊宇霆（1885-1929）——張作霖的智囊奉系參謀長或少帥張學良（1901-2001）或者充當南征最主要嘅決定角色。奉系南征，劍指中原，其實係主攻一方，直系主守，從來打仗，攻城一方永遠係下風，皆因遠離本陣，運輸線補給線拉長，兼且水土不服，攻方要打贏守方，必須於軍力上大佔優勢方有何能，強如之後天下無敵裝甲德軍，要陷攻蘇聯基輔及史太林格勒，亦要付上高昂慘烈代價。

⏩最新上架，請大家課金支持💪💪

❤【常威近代史】第五部《霹靂大忠臣對決無敵大買辦》Round two

https://play.google.com/store/books/details/%E5%B8%B8%E5%A8%81_%E9%9C%B9%E9%9D%82%E5%A4%A7%E5%BF%A0%E8%87%A3%E5%B0%8D%E6%B1%BA%E8%B6%85%E7%B4%9A%E5%A4%A7%E8%B2%B7%E8%BE%A6_ROUND_2?id=puXmDwAAQBAJ

【常公子歷史頻道268回：斷送共和關 五毛 蛋牛治】

♉Rainy day，就像23年前一樣，香港回歸的夜晚，也是一個雨夜。剛剛美國總統Donald Trump宣佈以下措絕：

1⃣與WHO割蓆，正式取消全部撥款。
2⃣直接抽擊中國偷取科研成果和隱瞞武漢肺炎疫情害死全球無數生命。
3⃣將會禁止某些從事間諜活動的人物入境美國
4⃣將會加強監管中國金融機構
5⃣香港為民主前哨(bastion)
6⃣開始取消香港關係法，香港不會有特別待遇，重審香港獨立關稅區
7⃣將會制裁所有中國以及香港有份破壞香港自治權的官員

➡最後，Trump指出20年前，歸還香港比中國係希望可以帶領中國民主化，而唔係令到香港成為中國一部份。

♈美國向中國全面開火，香港果然成為兩陣對峙最前綫，是禍是福仍然未知，但肯定香港響之後嘅日子，會成為全球焦點。有幸活於大時代，見證歷史轉捩點，也未知是喜是憂？香港人未來要步步為營，迎接全新一頁，亦係無可逆違嘅事實。

♐其實任何變化，責任都唔喺香港人身上，香港只係一個被動角色。一切的根源嚟至2008年金融海嘯，之後全世界為修補金融黑洞，全球瘋狂印銀紙，但印銀紙唔可以解決問題，今時今日嘅困局同中美決裂，其實亦係「印」出嚟。

♍距離2047仲有27年，相信呢一刻，冇人可以預料會發生乜嘢事情，可能最後和稀泥當冇事發生過，但若然會演化成戰爭狀態，亦一啲都唔出奇，中美如果割蓆，雙方共同利益減少，鬥爭分分鐘越演越烈，冇人想向對方跪低，一山不能藏二虎下，情況未許樂觀。

♑天祐香港。🙏🙏🙏另外，【常威近代史】第五部《霹靂大忠臣對決無敵大買辦》Round two電子書上架（條download link在下面），請大家課金支持我一直走落去，直至劉少奇骨灰到達北京王光美手上……

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上3000訂戶！

✅https://youtu.be/BhDidg1eu4Y

👉最新上架⏩【常威近代史】第五部《霹靂大忠臣對決無敵大買辦》Round two
http://shorturl.at/dW145

✅本土唯一香港土話近代史文本

❤【常威近代史】第一部《大清亡國關慈禧蛋牛治》，全面開放，免費下載， #freedownload！

Free下載連結🔽

https://play.google.com/store/books/details?id=C3hjDwAAQBAJ

【常威近代史】（三百九十回）
從前有個人叫海豐農民大王

第一次直奉戰爭結束後，1922年5月4號，孫文喺廣州以陸海軍大元帥名義下令「分道出師」北伐，任命長期戰友李烈鈞為北伐軍總司令，許崇智為總指揮，陳炯明個名已經消失，但唔代表佢完全冇影響力，陳炯明一直操縱嘅「粵軍」仍然對佢忠心耿耿，5月20號，粵軍就曾經返翻廣州，要求孫父恢復陳炯明省長及粵軍總司令嘅職務，孫文冇答應到，27號佢委任陳炯明做「督辦兩廣軍務」，陳炯明拒絕上任。

明眼人都睇到，過去一段日子，孫文一步一步回收陳炯明手上嘅兵力，兩人由盟友變成敵人，係意識形態上嘅分別，孫文一心要行共產主義，陳炯明則繼續崇尚「今天我…」，講真，如果冇陳炯明，早前孫文根本唔可能回馬槍建立廣州護法政府，現在間公司成功上市，當然要洗走當年同生共死嘅合伙人，政治真係好殘忍，承受得到先好參與。

中間想插一個人落去，佢叫彭湃（1896-1929），唔識佢嘅人一定要識，因為佢同本公子、葉繼歡一樣係海豐人，橋東社彭家為海豐首屈一指嘅富豪，彭湃係海豐大地主之後，1917年前赴日本就讀於早稻田大學政治經濟科，經歷大時代，佢亦由一個「今天我…」嘅基督徒變成一個社會主義者。

叉開一筆，由於本公子才疏學淺，亂撚咁嚟，好多時候將「共產主義」同「社會主義」混為一談，其實兩者係有分別嘅，大家都係左，「社會主義」嘅左比「共產主義」嘅左輕微得多，程度同層次上都有好大距離，事實上所謂「社會主義」到今日隨街可見，利用社會制度同政策將社會上經濟資源作更有效更公平嘅分配、例如綜援、福利金、失業救濟金、社會保障制度、公共房屋制度、公共設施制度、免費醫療及免費教育，其實統統都係「社會主義」運作方式。可以講俾大家知，上邊所講嘅嘢1848年前從來冇喺世界上出現過。而共產主義基本上可以講係社會主義嘅究極化，亦即係話社會主義都唔夠公平，要再公平落去，用通俗嘅講法可以演繹為「做又36唔做又36」，當然問題重心在於36，如果「做又三萬六唔做又三萬六」，基本上係冇問題嘅，就此止住。

1921年5月，彭湃返回中國，7月喺廣州加入中國社會主義青年團，亦有講法佢已經直接加入中共，呢度要澄清一點，當時彭湃是否加入中國共產黨？個界線其實好模糊，因為當時中共正處於建立階段同資訊無今日咁發達，組織基本上未曾完全系統化，當然我亦唔排除中共黨員本「花冊」會響一小撮人手中。

當時主政廣東嘅陳炯明，任命彭湃出任海豐縣教育局局長，但1922年彭湃組織學生遊行慶祝五一勞動節，被認為係搞事份子，撤去教育局長職務，之後彭湃就響海豐開始從事農民運動，發動農民組織農民成立農會，1923年元旦，領導成立「海豐縣總農會」，會員人數達到十萬，佔全縣人口1/4，而且越玩越大，由海豐蔓延開去，彭湃有「農民大王」之稱，亦都係呢個時候開始，1923年陳炯明下令解散農會，彭湃及其骨幹成員轉入地下活動，繼續同陳炯明鬥爭，之後去到廣州投靠同陳炯明反目嘅孫文，以共產黨員身份，參加第一次國共合作。

彭湃上述嘅遭遇，正好表達孫文同陳炯明之間嘅左右意識形態分歧，彭湃後來1929年死前嘅遭遇，亦會反映出國共之間響孫文死後出現嘅左右意識形態矛盾。

左右對峙，並唔係今日嘅事，其實由1848年《共產主義宣言》出現響呢個世界開始，世界就陷入左右兩大意識形態對峙及鬥爭嘅局面，基本格局到今日都冇變過，大家仲以為中國八十年代行開放改革後，左右已經消失咗（因為大家都玩資本主義市場經濟遊戲）。

但真相並唔係咁，第一，中國放棄共產主義唔代表佢哋放棄社會主義（兩者層次上有分別）；第二，中國雖然放棄共產主義，但唔代表佢哋唔繼續用馬克思主義「唯物辯証法」思維去思考問題。一切都係「左」同「右」之分留低嘅問題，從來冇解決過。正如一個人不幸患上癌症一樣，唔可以被徹底「醫好」，衹能夠被「舒緩」症狀等佢唔復發或唔擴散一樣。

世道紛亂，1922年5月13號，胡適等16個著名知識份子就喺北京雜誌上刊登《我們的政治主張》一文，談及所謂「好人政府」，文章咁講：「國內的優秀分子，無論他們理想中的政治組織是什麼，現在都應該平心降格的公認『好政府』一個目標，作為現在改革中國政治的最低限度的要求，『好政府』應監督防止一切私營舞弊的不法官吏，為社會全體謀求充分的福利；容許個人的自由，愛護個性的發展。『好政府』有三個要求：一個憲政的政府；一個公開的政府；一個有計劃的政府。」

呢班知識份子亦認為「好政府」必須要由一「好人」嚟組織，佢哋認為當時大部分好人都自命清高，唔願意參與政治，結果好人乜都唔做，政治比壞人包攬做曬。佢哋呼籲社會上嘅好人要有奮鬥精神，要走出來積極參與政治改革！

一句到尾，當時胡適等一班知識份子睇到嘅「政府」，就係一個個以「壞人」組織成嘅「壞政府」，而「好人」究竟在何處呢？佢哋其實睇唔透，其實每一個出嚟參與政治嘅人，起初大部分都係好人，祇不過當長年累月活響政治漩渦之中，任何好人都會變成壞人，而且歷史話比我哋知，好心會做壞事。當日抱住最好景願參與政治嘅人，往往會成為日後最大嘅暴君。

如果你睇得透，「好人」係唔應該參與政治，應該去做醫生律師教師社工大學教授或傳道人比較適合，政治都係「壞人」參予比較好一啲，真係唔係講笑，真心話。

#常威 #大軍閥平反系列  #大軍閥 #民國歷史

⏩最新上架，請大家課金支持💪💪

❤【常威近代史】第五部《霹靂大忠臣對決無敵大買辦》Round two

https://play.google.com/store/books/details/%E5%B8%B8%E5%A8%81_%E9%9C%B9%E9%9D%82%E5%A4%A7%E5%BF%A0%E8%87%A3%E5%B0%8D%E6%B1%BA%E8%B6%85%E7%B4%9A%E5%A4%A7%E8%B2%B7%E8%BE%A6_ROUND_2?id=puXmDwAAQBAJ

【常公子歷史頻道269回：斷送共和關 章太炎 蛋牛治】

♉世局變化太快，火燒連環船，美國發生連串暴動，相信冇人可以預見，陰謀論基本上唔可以成立，因為好明顯係偶發事件，庚子年唔係講笑，美國嘅種族問題一直冇辦法解決，係另一個火藥庫，藥引一到，就會爆炸。巨浪滔天，一個一個冚埋香港，先有逃犯條例，再爆發連串社會運動，再嚟新型冠狀病毒，國安法立法，美國制裁香港……一浪接一浪，真係要以平常心面對，因為睇嚟，更壞嘅情況亦會再出現，而且會變本加厲。

♈但好多問題，歸根究底都係經濟問題，一個「窮」字可以解釋曬，均窮其實冇問題，但貧富懸殊就係大問題，香港年青人嘅憤怒，嚟自睇唔到未來，睇唔到向上流動機會，加上物價高企，生活苦不堪言，心理異常抑壓。同樣情況亦喺美國出現，封城三個月，大量低下階層失業，怨氣積壓，一搵到渲洩口，不滿情緒就會排山倒海爆發出嚟，呢個唔係獨獨香港嘅問題，2008年金融海嘯之後，已經係全世界嘅問題。如果印銀紙可以解決問題世界就無問題，但係印銀紙只會拖延問題，而且將問題好似雪球咁越轆越大。如果上述嘅講法係事實，未來充滿危機。

🔯香港會變成點？我真係唔知，我記得去年11月，當社會狀況稍為平息時，茶敘之間有朋友講，「我諗最差嘅時候已經過去，我睇唔到再有更差嘅情況可以出現」，我好難忘記呢句說話，因為嚟到2020年夏天，一語成韱。究竟有冇「更差嘅情況」可以出現呢？答案一清二楚放響面前。

⛎攬炒變成現實，焦土亦已開始，最後嘅結果唔會好快出現，事情可以拖十零二十年，甚至二三十年，中美之間缺乏互信，而且競爭勢頭已經誕生，好難可以返轉頭，除非其中一方願意徹底跪低，俯首稱臣，但機會好低。就算未來兩者關係有緩和跡象，深層次矛盾亦唔可以解決，新冷戰時代無可避免會再次重臨。上一次冷戰時代，亦係二十世紀東西方發展嘅黃金時代，人類嘅生活水平同科技直線上昇，經濟發展充分彌補冷戰對峙間製造嘅危機感，繁榮同恐懼互相抵消，最後由1991年蘇聯無聲解體結束冷戰時代。

♏新冷戰時代，係一個全新嘅格局，下次有機會再分析。

♑天祐香港。🙏🙏🙏另外，【常威近代史】第五部《霹靂大忠臣對決無敵大買辦》Round two電子書上架（條download link在下面），請大家課金支持我一直走落去，直至劉少奇骨灰到達北京王光美手上……

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上3000訂戶！

✅https://youtu.be/4Z05bvt99-A

👉最新上架⏩【常威近代史】第五部《霹靂大忠臣對決無敵大買辦》Round two
http://shorturl.at/dW145

【常威近代史】（三百九十一回）

直奉之戰，奉系大佬係張作霖；直系大佬系關公吳佩孚，但關公背後有劉備，劉備就係曹錕（1862-1938），一個近代史上頗受爭議嘅人物（當然亦係萬惡大軍閥之一），1922年年中，當張作霖退返去東三省重整旗鼓，兩年後再出關打過，之後時間，即1922-1924，其實係屬於曹錕嘅時代。

末講曹錕，先講講曹錕同吳佩孚嘅師徒關係，吳佩孚係曹錕一舉提跋，曹錕袁世凱時代北洋第三鎮領導人，第三鎮或稱第三師亦係北洋軍隊嘅核心精銳部隊，第三師喺「二次革命」中擔當重要鎮壓革命黨角色，響袁世凱死後嘅「護國戰爭」中，與滇軍激戰，亦係個時候，曹錕將第三師領導權交畀吳佩孚，從此以後吳佩孚就用手上精銳無倫第三師不斷擴張，稱霸中原。佢兩個嘅關係，其實好似Star Wars絕地武士師徒關係，當然曹錕係絕地大師Qui-Gon Jinn，而吳佩孚就係Obi-Wan Kenobi。

兩人嘅性格一剛一柔，或者講一陰一陽比較適合，吳佩孚叫得做民國關公，凡事梗係衝衝衝，剛強勇猛，銳不可擋，而曹錕則響背後運籌帷幄，二人互補不足。而且兩人亦都唔貪錢，亦喜愛將功勞分畀部下，又鍾意提拔新人，講真，作為一個軍閥其實冇得頂，我夠膽講一句，如果中華民國真係實現南北統一、俾曹錕同埋吳佩孚揸五色旗好好統治，好有可能成個局面唔同曬，或者整個世界已經是中國的了，歷史無如果，講如果係多嚿魚。

如果吳佩孚冇咗曹錕，用偶像劉仲敬嘅講法，直系存不存在都成問題。出嚟打過工都知，一個同事勇猛精進，晚晚做都唔肯收工，成日響老闆面前博表現，其實好撚乞人憎；所以吳佩孚亦招人妒忌，響直系軍閥將領裏面，其實完全唔受歡迎，甚至被人厭惡，好彩有曹錕出面調和化解，一剛一柔拍住上，直系先可以連下兩城，先敗皖系段祺瑞、再敗直系張作霖。

曹錕一直以一個「好人」嘅身份出現喺近代史上，佢「用人不疑、有才不貪、有功肯讓、因此頗得軍心」，事實上袁世凱嘅北洋系統中，曹錕並唔係異數，祇不過族大有乞兒，好人往往被一小撮壞人連累聲名，而且所謂「北洋系統」本身就係一個萬惡嘅黑社會，黑社會裏面邊有好人？香港警隊邊有白警？一竹篙打一船人，係我哋經常犯嘅嚴重錯誤之一，人之常態。

曹錕之後搞唔掂民國政治，亦可能係佢太好人之過，上次已經講過，政治操作應該交畀壞人處理，好人當道，往往適得其反。好人袁世凱已經係好例子，現代嘅奧巴馬亦復如是。今日美國嘅頹勢（如果唔係扮嘢係真頹嘅話），奧巴馬八年執政係關鍵之一，當然我唔排除，無論奧巴馬或特朗普都只係Obi-Wan Kenobi，背後仲有Qui-Gon Jinn。

1922年6月，直奉戰爭勝負已分，政局大洗牌時間又到，曹錕同吳佩孚以「護法」為名打贏張大帥，當然要第一時間恢復「法統」，既然之前嘅中央政府並唔係法統，咁即係唔合法，成為犧牲品嘅係水晶狐狸徐世昌，6月2號，大總統徐世昌被迫下野，而且「護法」成功鳥，直系同時呼籲南方廣州政府孫文下臺，恢復舊國會職權，推舉黎元洪為中華民國新任大總統，6月11號，黎元洪提出以廢督裁兵為復職條件之後，入北京覆任大總統之職。

南方孫文梗係睬你都生臭狐喇，你曹錕吳佩孚「護法」嗰個「法統」，同孫文軍政府所護嗰個「法統」，根本係兩個唔同嘅概念，孫文認為佢嗰個「法統」，先係真正嘅「法統」，其餘通通唔係。孫文不但冇下臺，而且對外宣佈，要求其他國家唔好承認新組成嘅北京政府黎元洪政權，中華民國唯一嘅合法政府喺廣州，喺我孫文手上，其餘都是假的，所以北伐要繼續進行，內戰要繼續打落去。

連偉人蔡元培都曾經通電勸孫文下臺，停止北伐。如果世事太紛亂，唔知道邊個啱邊個錯嘅話，咁我哋要聽聽權威人士分析，響當時，北大校長公共知識分子龍頭社會良心蔡元培應該有呢個資格。當然如果你認為一定要拆大台，所有社會賢達都祇不過係維護政權存在嘅狗，佢哋所講嘅都係鳩話廢話嘅話，咁又未必唔係真相。

不過我拋個問題俾你，如果社會上冇所謂「真理」，亦冇所謂「最後答案」存在，或者你連「道德」同「良知」都唔再相信，或者你覺得體制應該唔存在、個社會應該要用無政府主義運行，咁個世界會一直spin呀spin落去，螺旋式向下，直至所有人掉進碎肉機攪成肉醬為止！

呢個時候，已經俾孫文逼到埋牆嘅陳炯明非常不滿意，響6月17日直奉兩軍簽訂八項和約結束戰爭前夕，6月16號，陳炯明響廣州發動武裝兵變，要推翻孫文獨裁統治。陳炯明粵軍部下，首先圍攻孫文喺觀音山嘅住所粵秀樓，孫文一早收到風，及時離開，登上停泊於天字碼頭嘅「寶璧」艦上，次日轉登「永豐」號避難。

之前已經講過，陳炯明手中嘅粵軍，係孫文之前翻身嘅最大武裝力量，但1920年11月廣州護法軍政府重新建立後，孫文就同陳炯明反目，理由之前已經講過，其後直奉戰爭，陳炯明暗中聯絡吳佩孚，形成反孫聯盟，亦係要一心阻撓同破壞孫文嘅北伐大計。

陳炯明有冇錯？自己去判斷，但我好相信發動兵變嗰一刻，陳炯明係想剷除孫文勢力，實現南北統一，結束連綿不絕嘅內戰時代，當然你可以反駁話陳炯明狼子野心，只係想做另一個大軍閥，但由佢一生嘅經歷同埋行事為人嚟講，我相信佢係一個好人。

好人揸莊？含X啦！政治應該由壞人做嘅。

#常威💀 #大軍閥平反系列  #大軍閥 #民國歷史

【常公子歷史頻道270回：斷送共和關 大洋 蛋牛治】

♉新冷戰時代同舊冷戰時代嘅分別，在於20世紀二次世界大戰之後，東西兩大陣營都在戰後焦土中重建起來，人民渴望和平同生活安定，無論身處共產主義或資本主義世界，無論經濟同科技發展都欣欣向榮，結果抵銷政治爭拗同痛苦怨恨，展現出人類20世紀中葉一個「黃金時代」Gloden Era。

♉但隨著蘇聯解體，冷戰時代結束，世界響美國一國獨大之下前行三十年，為咗極限上繼續推高經濟流通，不斷印銀紙（印銀紙某程度上亦都係要找尋藉口繼續印銀紙），亦不斷消耗地球資源，為咗只係延續二十一世紀光輝燦爛嘅繁榮景象，但真相係，眼前的繁榮其實係透支咗未來嘅 Credit，無論天然資源上定金錢上，係一種冇抵押品嘅無上限借貸，政府都教過，借錢總要還。2008年嘅金融海嘯，就係大耳窿上門淋紅油收數嘅先兆。

♈上次金融海嘯，中國幸運地能夠獨善其身，雖然自己亦都印咗四萬億人仔找數，但相對美國同歐洲，已經係小數目。整個歐洲亦喺2008年後一蹶不振，歐洲央行雖然狂印銀紙亦冇辦法填補黑洞，大家有眼睇到。而美國嘅霸主角色亦都有所轉變，因爲要填氹，迫不得已要從「giver」嘅身份變成「taker」嘅身份，為求自保，右派當道，結果出現白人主義者特朗普上臺嘅現象，其實亦係無可避免。

♈中國唔係蠢人，佢一定係smell到美國有小小問題，於是乎想「彎道超車」，實踐東風壓西風之壯舉，或想改變整個世界以美國為主導、以美元為結算嘅基本遊戲規則，「亞投行」、「一帶一路」出手，挑戰美國霸權，當然我講咗好多次，係早咗20年，如果可以忍辱負重等多20年先出手，情況可能完全唔同曬。

⛎政治係一種講求時機嘅妥協藝術，同談戀愛一樣，當你60歲人先遇到最適合嘅靈魂伴侶，叫時機已過；但要喺最適合嘅時機做最適合嘅事，要在花樣年華好好談一場戀愛，就係命運同運氣問題。中華民族嘅運氣從來不佳，今次都唔例外，過早出手，觸動美國霸主神經，對方當然會坐以待斃，你要我同你分餅仔，你係痴心妄想，於是開打貿易戰，傾盡全力排山倒海反撲對手，一直放喺議程上嘅「新冷戰劇本」，亦順勢出臺，反而毫無突兀之感。

♍我個人相信，劇本已經一早寫好，只等待演員有期埋位拍攝，中國要挑戰，美國亦都擺好位同你隻抽。冷戰開始，相信雙方都有心理準備要玩半個世紀，至少玩二三十年。相同例子，其實日本帝國曾經做過，想東風壓西風嘅遊戲，一玩四十年，由20世紀初期玩到1945年，日本最後收兩個原子彈完敗收場，從此以後成為美國嘅附庸，直至今日。

🔯不過新冷戰時代一開始，就發生一場世紀瘟疫，相信冇人會有咁高手搞生化武器，純粹係天意使然，或者係整個地球上所有人共業而生的自然界反撲，冷戰雙方事前應該絕對估唔到，一場瘟疫，直接加速冷戰嘅前行速度，相信事前無人可知，歷史奧妙之處，亦在這裏。

♑天祐香港。🙏🙏🙏另外，【常威近代史】第五部《霹靂大忠臣對決無敵大買辦》Round two電子書上架（條download link在下面），請大家課金支持我一直走落去，直至劉少奇骨灰到達北京王光美手上……

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上3000訂戶！

✅https://youtu.be/gV-6k161EEQ

👉最新上架⏩【常威近代史】第五部《霹靂大忠臣對決無敵大買辦》Round two
http://shorturl.at/dW145