大清亡國關慈禧蛋牛治 2

【常公子歷史頻道347回：替大軍閥平反系列之 五四運動（二）】

⛎美國國會山莊衝突事件，支持特朗普嘅群眾沖入搗亂，畫面似曾相識，有人將今次事件同前年7月1號香港示威者衝入立法會比較，我唔想評論，反正成件事要睇你企喺邊個立場去睇，總之到最後勝利者掌握話語權同裁判權，失敗一方要承受戰敗嘅責任。我只係想表達一點，就係類似嘅情況睇嚟會不斷出現，無論係任何國家，民粹主義會不斷昇溫，人民對政權嘅不滿只會與日俱增，而任何政權所採用嘅應付手段亦都會一樣，亦只會加大力度鎮壓，或者擴大監控嘅範圍同力度，企圖防範於未然。

♉脈絡亦都係一字咁淺，大家千祈唔好將事實複雜化，民眾對統治階層不滿，並非任何意識形態使然，原因祇有一個字，就係「窮」，當環球經濟環境變差，而上層建築統治階層未能有效分配資源惠及民眾，或者要民眾承受印銀紙所帶嚟嘅惡性通脹，民怨就會累積，累積到一定程度就會用唔同嘅形式爆發。積極嘅爆發可能用暴力示威衝擊政權，消極嘅爆發可能係不合作不信任政權，後者嘅破壞力比前者更甚，而且無跡可尋，口裡不一，離心離德先至恐師，1991年蘇聯大國無聲瓦解就係最佳例子。

♐我再講多次，我個人認為香港過去發生嘅亂局其實係經濟問題，純粹同錢有關，香港嘅經濟發展到21世紀初期已經行到樽頸，舊嗰套唔得，新嗰套做唔起，靠食地產金融老本渡日，向上流動機會大減，但物價就狂昇，我仲記得，當年有人歡呼樓價卒之去到20000蚊一尺，好似打破世界紀錄咁，仲有人唱會爆上30000！其實就點著條火藥引，食盡之前經濟起飛紅利嘅、上晒岸嘅人有物業資揸手，資產價格狂升當然開心，但係普羅大眾年青人就要承受貴租高通脹，連基本人權生活空間都被嚴重剝削，唔嬲有鬼。

♐咁樣……點解樓價會去到二萬蚊、三萬蚊一尺呢？有人鍾意炒樓？No。土地供應不足？你唔係信丫嘛傻仔。原因只係得一個，就係全世界所有國家都係用印銀紙維持經濟發展，銀紙變成通脹，變成泡沫，最後只會反映在實際生活上，變成災難。咁唔印銀紙解決問題仲有乜嘢方法解決問題呢？Sorry，我唔撚識，如果我識我發咗，唔駛喺度寫近代史，我會去加勒比海同細曬太陽。

♑【常威近代史】第六部《最九衰的大軍閥時代Round 1》電子書上架（條download link在下面），請大家課金支持我一直走落去，直至劉少奇骨灰到達北京王光美手上…

✅https://youtu.be/hvbvRHrHnsg

【常威近代史】（四百八十四回）
奪權遊戲開始

當1927年3月26號天下第一軍事強人蔣Sir未君臨上海之前，仲有一件大事件發生，就係中共組織上海工人發動第三次起義奪權，事後睇翻，當時嘅中共當然已經完全唔信任蔣Sir，至於中共知唔知道上海富商早已經聯絡蔣Sir，傾好曬北伐大軍如何和平接收上海？我相信以中共嘅列寧式高度嚴密情報組織機關，亦一定會知道。況且早前蔣Sir解除蘇聯特別顧問鮑羅廷職務，亦都間接（直接）話比第三國際同中共知，我蔣Sir好快會抽你共產黨塊板，因為我已經成功過河了（北伐戰爭大獲全勝，平定中原），哈哈！

3月21號，中共組織上海工人發動第三次武裝起義，消滅咗守軍，取得上海市政權，當時蔣Sir己經從根據地江西南昌出發，所謂先下手為強，後下手遭殃，早買早享受，遲買平兩嚿。到底係盟軍抑或係紅軍首先攻入柏林？分別其實好大。

1926年10月同1927年2月，上海工人組織為咗配合北伐戰爭，響中共上海區委同國民黨上海組織嘅策動下，先後舉行咗兩次武裝起義，之前已經提過，兩次都係柴娃娃失敗收場。1927年2月23號，中共中央同中央上海區委召開聯席會議，決定「擴大武裝組織，預備暴動」，你可能會問，咁究竟係「起義」？定係「暴動」呢？純粹名相問題，成功嘅咪叫起義囉，失敗嘅就叫暴動，侵粉攻入國會山莊奪權，2019年夏天發生喺香港嘅事，你可以叫暴動，同樣亦都可以叫起義。參與暴動嘅人我哋叫暴徒，至於參與起義嘅人我哋叫義士，兩者可以有分別，亦可以無分別。

為咗上海市第三次工人武裝起義，中共加強組織力，成立咗由陳獨秀、周恩來、羅亦農、趙世炎等八人組成、由陳獨秀負責總指揮嘅特別委員會，作為起義嘅最高指揮機關；並且成立咗以周恩來為首嘅特別軍委，負責軍事情報行動；顧順章（1904-1934）等人負責組織個3000多人嘅工人糾察隊，進行軍事及政治訓練，一於同你玩鋪大嘅！

3月20號，北伐軍白崇禧部隊進佔上海附近嘅龍華，駐守上海嘅軍閥畢庶澄（1894-1927）部隊同警察部隊，嚇到鼻哥窿都冇肉，陷入混亂狀態（應該有唔少人已經鳥獸散），中共認為起義時機已經成熟，21號，中共特委決定舉行同盟總罷工同第三次武裝起義，中午12點，上海市總工會發佈總罷工令。三小時後，全上海市80萬工人罷工，真係一呼百應，亦都睇到中共嘅強大組織力（蔣Sir都驚），我諗你試吓今日響全世界是旦一個城市號召80萬工人罷工，冇一星期都冇可能（今日有Facebook，instegram同whatsapp啊）。總罷工隨即變成武裝起義，工人糾察隊帶領罷工工人猛烈進攻各個兵營、政府機關同埋警察局，喺某啲地方戰況異常激烈，經過差唔多20多小時嘅戰鬥，22號下午6點，工人成功佔領上海，殲滅軍閥部隊3000幾人，警察部隊2000幾人，檢獲槍枝3000餘枝，由傷亡人數可以睇到，戰鬥真係異常激烈，放血量同之前兩次起義根本完全冇得比。

軍閥畢庶澄逃入租界避難，第三次武裝起義成功，同日上海臨時市民代表會議召開，選舉產生咗「上海特別市臨時政府」，臨時政府委員共有19人，其中9人為中共黨員，於是身在龍華嘅白崇禧部隊兵不血刃，直出直入進駐上海。24號，上海總工會下逹復工令，80萬上海工人停止罷工，回歸工作崗位，市面回復平靜。

依一次武裝起義，亦都係中共成立以來，最成功嘅一次軍事行動，我們偉大的總理周恩來喺當中擔任重要角色，亦都由嗰日開始，中共嘅命運亦同周恩來嘅命運連成一線。

中共行到呢一步，可以講到達革命高潮，1927年3月26號，蔣Sir到達上海，佢立刻得到虞洽卿（1867-1945）、江蘇人銀行家、金城銀行創辦人吳蘊齋等上海大資本家嘅巨大金錢資助，其實叫「資助」係錯嘅，兵臨城下，你唔主動俾就會直接打劫你，聰明嘅人都會選擇前者，起碼仲有一線生機。

上海工人佔領上海後，北伐軍亦進駐上海，因為時局不穩，上海一衆資本家亦非常頭痕，上海商界為「對外應時勢之需要，對內謀自身之保障」，商人當然最識得明哲保身，早響22號，由上海縣商會、闡北商會、銀行公會等19個商業團體發起，正式成立「上海商業聯合會」，推舉虞洽卿、王一亭（1867-1938）、吳蘊齋三人任主席。

上海商業聯合會成立後，一致通過給予蔣Sir大力支持，蔣Sir初到上海，虞洽卿已經同部份資本家向蔣Sir傳達「一致擁戴」嘅意愿，真係識時務者為俊傑啊！蔣Sir清黨之前，即係「四一二事變」前，上海商會聯合會已經兩次墊出600萬元比蔣Sir做軍費，有錢使得鬼推磨，真金白銀邊個唔鍾意？之後發生嘅「四一二事變」後，上海商業聯合會更發表「擁蔣清黨電」，吹捧蔣Sir清除共產黨係「掃除毒氛，鋤暴安良」，完全擁護蔣介石血腥清黨路線，並表示「願為後盾」，永遠支持蔣先生，之後再發生「寧漢對立」中，上海銀行工會更加停止同武漢嘅金融往來，堅定不移支持蔣介石政權。

三月仲未過去，「四一二事變」要四月先講。

#常威💀 #大軍閥平反系列 #大軍閥 #民國歷史

究竟係咩令到班工人願意武裝對抗正規武裝部隊

共產主義

【常威近代史】（四百八十五回）
蔣Sir血腥清黨前夕

今年係2021年，亦係中國共產黨建黨100週年紀念，過去百年嘅中國近代史，基本主軸就係國民黨同共產黨之間嘅嚴酷鬥爭，其實兩個政黨都係革命政黨，當中嘅分別係左右路線嘅問題，即係「資本主義」同「共產主義」之爭，由「聯俄容共」「第一次國共合作」開始，兩個政黨就如如來佛祖手心嘅兩條燈芯，即係紫霞仙子同清霞，永遠糾纏在一起，永遠沒法分得開（直到今時今日），我逼不得已要咁樣去形容——由一開始係最好嘅合作夥伴，到頭來成為咗彼此最大嘅敵人，何心呢？

一切嘅恩恩怨怨，在於一場發生喺1927年4月嘅「血腥清黨」事件，係有人過橋抽板後，更加反轉豬肚就係屎，用極度野蠻血腥手段清洗異己（自己友），結果兩個政黨結下一生一世無法化解嘅血海深仇，最後必須以鮮血來清洗，中間死咗幾多無辜嘅人，連累咗幾多天下蒼生，實在無法估算，如果我哋要為呢段血仇找出一個元兇（問責人），或所謂始作俑者，咁樣無論任何方法去迴避或修飾，答案始終都係佢：蔣Sir。（冇第二個）

好多時候，血仇一經結下，就好難能夠輕易化解，口講容易，生命生死從來都係最重要，叫人去死睇人去死咒人去死當然easy，但自己要死就一定say no冇人肯滯，因為死咗就一了百了，任何代價都無法彌補（保險亦唔係賠畀死者），血仇越大，恩怨亦越大；我常公子個人感覺，世間上唯一可以超越金錢利益嘅就係人命，人命關天，係真嘅。

上集講到，中共所組織嘅上海工人第三次武裝起義成功奪權，控制上海，白崇禧部隊冷手執個熱煎堆，行入上海，蔣sir則以君臨天下之勢乘軍艦到來，本來完美嘅童話故事到此結束，國共大家之後和睦相處天下太平，共同對付中央同東北張作霖同日本仔咪幾好，好可惜，件事並唔係咁發生。

3月24號，當上海工人武裝革命成功後，西方列強亦都有所動作，英國美國兩國軍艦忽然砲擊南京下關地區，炸死39人，炸傷百人以上，中國人命唔值錢，死幾多都祇不過一個數字。

今年1月，國民政府成收回漢口、九江租界之後，北伐軍勢如破竹，乘勝逼近東亞大錢罌上海及六朝金粉之都南京，西方列強為保護其在華嘅殖民地利益，紛紛調遣軍艦同軍隊嚟到中國，到3月中，集結喺上海附近嘅各國軍艦多達60幾艘。3月24號，北伐軍第二軍同第六軍攻入南京，直魯聯軍戰敗，解散嘅士兵同埋地踎流氓牛鬼蛇神乘機趁火打劫，而且攻入外國領事館搶掠造成外國人命傷亡，外國人嘅命就係命鳥，如是英、美等國藉口橋民同埋領使遭「暴民侵害」，下令停在長江下關嘅一首英艦同兩艘美艦炮轟南京。

25號，英國、美國總領使向武漢國民政府抗議。31號，國民政府發表宣言，指出趁火打劫嘅係敵人潰兵，並抗議英美兩國炮轟南京造成平民傷亡。但係英國同美國仍然以保護僑民為藉口，繼續向上海增兵，去到5月，各國在華嘅士兵人數達到30000人，佢哋一邊食花生，一邊等待權力鬥爭最後勝利者出現，總之你唔好燒到我嗰瓣（租界殖民地）或損害我利益就OK。（你有你死，我有我喺屋企）

3月31號，一代風雲人物康有為（1858-1927）逝世，之前我有唔少篇幅講康師傅依個人，無論評價係點，點都係一個勁抽人物。佢以「經營天下為志」，一心一意搞政治，早年（佢話）協助光緒皇帝搞維新變法，係改革派嘅先鋒，最新潮嘅人物，年青人偶像，但係踏入20世紀，佢選擇咗「尊君保皇、立憲救國」嘅保守路線，一下子由改革派變成保守派，就連佢嘅弟子梁啟超都同佢割蓆，1917年仲參加張勛嘅復辟行動作反，想做大清復國宰相（首相），張勳復辟失敗之後，非常好彩地又冇被追究，因為有水，從此定居上海，瀟瀟灑灑出入租界，仲四圍走，漫遊各地，終於佢1927年響青島病逝，六十有九，當時嚟講算係長命，可能要同曡水有關。

仲有一個人要講講，1927年3月，中國著名教育家陶行知（1891-1946）同東南大學教授趙登愚等創立咗「曉莊師範學校」，陶行知任師範校長，佢以「教學做合一」為校例，帶領師生自建茅草校舍，將大禮堂定名為「犁宮」，將圖書館定名為「書呆子莫來館」，而且首校歌叫《自主歌》，歌詞內容係咁嘅：

「滴自己的汗，吃自己的飯，自己做事，自己幹，靠人，靠天，靠祖上，不算是好漢。」

「曉莊師範學校」教學嘅理念係「做就有農夫身手，科學頭腦，改造社會精神的教師」，大力推行實驗主義教育，個輪廓睇上去都非常左派非常馬克思，所以到咗現在，南京仲有紀念館紀念依間「曉莊師範學校」架。

1927年3月仲有一件小事補充吓，中國第一座私營廣播電臺由上海新新公司開辦，依件係中國廣播業嘅里程碑，新新公司係上海三大百貨公司之一（其他兩間係先施同永安），電臺主要播放商情（即係財經）、新聞同國樂，電臺嘅出現係為咗配合推銷礦石收音機。

踏入血腥嘅4月前夕，中國同日本嘅長途電話通訊服務亦都開始，北京、天津、奉天、大連等城市都可以同日本通話。

下一次，血腥清黨。

#常威💀 #大軍閥平反系列 #大軍閥 #民國歷史

【常公子歷史頻道348回：替大軍閥平反系列之 五四運動（三）】

⛎美國國會山莊衝突事件，造成四條人命死亡，昨日報導，其中一個當Trump嘅支持者牛角人亦在家中自殺，死因成疑，同時，Trump亦成為史上第一位2度遭到彈劾嘅美國總統，剛剛知道，聯邦眾議院以232票對197票通過彈劾案，其中有10位共和黨議員倒戈，當中包括前副總統切尼（布殊時代隻手遮天，被譽為美國史上權力最大嘅副總統）之女、共和黨眾院第3號人物Liz Cheney。

♐由於參議院唔會響1月20日拜登就任新總統前審理此案，意味Trump唔會被逼得提前下台，可以完成餘下幾日任期，但通過彈劾後，佢亦走得難睇，而且有可能失去御任後擔任公職嘅權利同福利，同唔可以響2024年再次角逐總統。亦好有理由相信，卸任後嘅Donald Trump入獄機會極高，畢竟在任時太高調，亦太多官司纏身，而且係眾矢之的，好難全身而退，安享晚年。不過我個人嘅睇法係，Donald Trump始終唔係普通人，難道會企響處任你砌嗎？加上有大把錢，我亦唔否定佢會以另一個角色同身份，繼續佢御任後嘅權力遊戲，美國政治喺未來四年，一定會因為依個政治狂人而更加精彩，大家可以學習更多政治生態。

♈在政治權力鬥爭中失敗，就要面對失敗承受嘅後果，Donald Trump現在正是承受後果嘅時間。同做人同做生意一樣，你落錯注，賭錯馬，就要承擔損失，姑勿論你進行政治行動嘅動機有幾咁高尚同幾咁美好（而且所謂「高尚」同「美好」係因人而異，亦因政治立場而異），目前香港正發生嘅反對派大清洗行動，亦都係一場政治鬥爭之後必然會發生嘅事情，勝利者大規模清算失敗者，要將反對力量連根拔起，甚至一個都唔留低，你可以話手段好很辣；但係如果勝利者同失敗者嘅角色互相調換，相信可能會更狠辣更血腥。

♈中美關係會因民主黨拜登上臺而改善嗎？好多人都持樂觀嘅態度，我對此有所保留，畢竟事情牽涉到世界霸主角色嘅輪換，歷史上每一次霸權輪換難免血流成河生靈塗炭，當然要補充1991年蘇聯大國可以無聲解體，前車可鑒亦可以唔駛流太多血，歷史吊詭嘅地方在於無跡可尋，往往出乎人之意料以外，況且，一直踢逆境波嘅中國突然領先一球，亦未知能否適應踢順境波嘅環境，一日未吹雞完場，仍然有變數。

♑【常威近代史】第六部《最九衰的大軍閥時代Round 1》電子書上架（條download link在下面），請大家課金支持我一直走落去，直至劉少奇骨灰到達北京王光美手上…

✅https://youtu.be/27JszGmk8OQ

4月12號，蔣Sir國民黨右派對共產黨嘅清黨血腥大屠殺正式發生，史稱「四一二政變」！

早響4月5號，蔣Sir已經將孫傳芳舊部周鳳歧（1879-1938）嘅26軍秘密調入上海做嘢，11號，蔣Sir發出「已克復各省一致實行清黨」指令，要收到嘅人就會收到，要收唔到嘅人就收唔到。

12號淩晨，上海青幫分子向上海各公會機構發動襲擊，真刀真槍，見人就斬，見人就殺，隨後白崇禧指揮嘅26軍士兵，以調解「工人內訌」為名，收繳工人糾察隊武器，打死打傷工人300多人！同日上海各處，黑白攜手，向共產黨人作出恐怖殺戮，街頭即時槍決，拉去後巷行刑，不停發生，喪盡天良，不可原諒！

兩陣打仗，殺人無可厚非，但係殺自己友殺同路人就係絕對唔可以原諒，當然蔣Sir血腥清黨有佢嘅理由、有佢自己一套合理且心安理得嘅官方解釋，亦唔係單單係意識形態嘅問題，左右對立？容不下共產主義？藉口嚟啫，問心嗰句，點解要過橋抽板？點解要返轉豬肚？無非都係因為一個錢字加多個權字，四一二事件，國民黨同共產黨之間種下不可化解嘅血海深仇，之後會不斷燃燒落去，燒到去21世紀仍然灰燼仍在，蔣Sir你是錯了！而且錯得再無可再錯！

4月13號，上海20萬工人罷工請願示威，反對血腥清黨，百多人遭26軍士兵當場槍殺，邊個夠膽出嚟抗議就殺邊個！14號，26軍士兵繼續捕殺共產黨員，唔係拘捕唔係拉，亦唔需要法庭審訊同坐監，衹要你係共產黨，即刻就槍斃你！如果你睇到呢度，仲覺得蔣Sir清黨完全冇問題，對唔住，我並唔需要一個這樣的讀者，我禮貌地請你離開。軍人同黑社會流氓地踎連成一線，查封上海特別市臨時政府、市黨部、市學聯等進步團體，3日之內，上海300多人被殺，當中包括中共江浙區委領導人趙世炎、汪壽華等，大人物周恩來僥倖逃出生天，否則亦難逃一劫。

4月15號，南天王李濟深（1885-1959）喺廣州實行蔣Sir下達嘅「清黨」殺令，黃埔軍校之內，200多名共產黨員被捕，整個廣州一共有2000多人落網，200幾個人被即時處死，當中包括唔少中共嘅核心黨員，包括劉爾崧、李啟漢、蕭楚女、鄧培、熊雄、熊銳、畢磊等人。

蔣Sir對共產黨人嘅殺戮，血流成流，天理不容，下次繼續。

#常威💀 #大軍閥平反系列 #大軍閥 #民國歷史

✅本土唯一香港土話近代史文本

❤【常威近代史】第一部《大清亡國關慈禧蛋牛治》，全面開放，免費下載， #freedownload！

Free下載連結🔽

https://play.google.com/store/books/details?id=C3hjDwAAQBAJ

【常公子歷史頻道349回：替大軍閥平反系列之 杜威訪華 】

⛎今集敘述美國實用主義大師杜威，胡適博士論文指導老師訪問中國引發嘅風潮，杜威喺中國逗留咗好長時間，到處講學，將講求效益嘅實用主義哲學灌輸比中國人，影響其實好大，中華文化源遠流長，曾幾何時係世界上最先進嘅文明典範，但係去到19世紀，就一落千丈，變成劣等文明，第三世界，真係情何以堪。

♉當然當時嘅人並唔瞭解政治同經濟嘅關係，只係眼白白睇見相鄰小國日本嘅巨大崛起，只係睇到他人全盤西化所帶嚟嘅高速繁榮，而且人哋更無需要廢除皇帝（天皇）呢個最高存在supreme being，點解版圖細中國咁多嘅日本可以做到？而中國人口多日本咁多反而唔可以做到？當時嘅人當然明白版圖太大、人口過多先係最大問題。佢哋只係覺得本來完美無瑕嘅中國文化缺少咗一樣重要元素，或者一種哲學去令民族偉大復興？

♉首先，所缺少嘅元素一定要嚟自西方，因為當時就算係嚟自西方嘅一碌狗屎都係香嘅好食嘅；而另一方面，呢種元素一定要同傳統嘅中國儒家哲學截然不同，完全唔可以有關係。結果因為胡適嘅關係實用主義先拔頭籌，不過到頭來真正取代儒家哲學嘅，係馬克思主義。其實我個人覺得，1918年五四運動之後，就進入咗「中國人全盤接受馬克思主義」嘅過程，到咗1949年，前前後後經過30年時間，終於建立新中國，一個完全放棄3000年儒家哲學嘅新中國。

♑【常威近代史】第六部《最九衰的大軍閥時代Round 1》電子書上架（條download link在下面），請大家課金支持我一直走落去，直至劉少奇骨灰到達北京王光美手上…

✅https://youtu.be/TRb7N6EmE04

【常威近代史】（四百八十七回）
打開血腥焚國之路

有句說話叫「黨內無派、稀奇古怪」，毛主席放我哋，根據唯物辯証法，矛盾永遠存在於世界上，衹要超過兩個人喺埋一齊，就會有矛盾出現（夫妻關係就一清二楚），就會有左右之分，香港叫黃藍問題，任何人對事物嘅看法都有唔同嘅意見（有人覺得屎係臭，亦有人覺得屎係香），如果人又能夠自由表達意見的活，咁矛盾就一定會出現。矛盾出之後，理應可以透過對話協商彼此妥協或彼此諒解來解決問題（大愛訣），又可以利用暴力令對方臣服，即係打你一身，要你聽話，如果你繼續曳曳，又再打多你一鑊，打到你貼貼服服為止，都係常用嘅手法，相信近年香港人最明白。

但打還打，打唔代表要殺，暴力有等級之分，打係要你產生恐懼，跟住收嗲，但係殺戮，就係肉體消滅，唔係收聲係滅聲，採用殺戮嚟消除矛盾，老實講係最後手段，係最大嘅暴力，當然仲有更高一級嘅手段就係連坐誅九族，明成祖朱棣誅方孝儒十族，將方先生朋友及有關連嘅人殺晒，屬於歷史上罕見事例。（當然仲有更高級，就係種族滅絕、掟原子彈或核平你）

蔣Sir清黨，唔聲唔聲一開始就用最極端手段殺戮共產黨人，老實講係於理不合（個人感覺叫天理不容），傾都唔傾、拉都唔拉、審都唔審，就殺你老母一個措手不及，當街打靶。（後來越戰，有人當街將北越共産份子打靶，張相登出嚟，就引發美國國內大型反戰熱潮）當然蔣Sir自己覺得咁樣做有其確切必要性，因為革命合作夥伴共産黨來勢洶洶，不斷喺國民黨內製造分化滲透，亦遲早一定用暴力手法奪權（奪蔣Sir嘅大權），因此要防範於未然，殺光殺淨共產黨就最乾手淨腳。

蔣Sir原本係孫文「聯俄容共」政策嘅絕對支持者（其實孫文做乜蔣Sir都係 Absolutely fully support），早響1920年，蔣Sir就勸過孫文放棄歐美自由民主議會制度嘅追求，追隨蘇俄，佢話過「以蘇俄自強自立為師法」。1923年，蔣Sir甚至以孫逸仙博士代表團團長嘅身份率團前赴莫斯科考察，並且在莫斯科講過「中國國民黨」同「蘇共布爾雜什維克」係「姊妹黨」，大家拍住上，一齊搞世界革命解放全世界無產階級。蔣Sir傾慕共產主義嘅熱情，亦都感染喺佢個仔蔣經國（1910-1988）身上，1925年革命青年蔣經國就前赴莫斯科中山大學深造托派共產主義，仲改埋個俄國名「尼古拉·維拉迪米洛維奇·伊利扎洛夫」（Николай Владимирович Елизаров），後來娶埋個俄國老婆。

1927年「四一二事件」發生後，身在莫斯科嘅蔣經國亦都同老豆割蓆，透過通訊社發表聲明，內容係咁：

「蔣介石的背叛並不令人感到意外，當他滔滔不絕地談論革命時，他已逐漸開始背叛革命，希望與張作霖和孫傳芳妥協。蔣介石的革命生涯已經結束。作為一個革命分子，他已經死了。他已成為反革命分子，是中國工人大眾的敵人。蔣介石曾是我過去的父親和革命的朋友。他已走到反革命陣營。現在他是我的敵人。——蔣經國，1927年」

當然「尼古拉維拉迪米洛維奇伊利扎洛夫」要響莫斯科保命亦一定要咁做，不過我個人相信尼古拉當時同老豆割蓆係出自真心。

蔣Sir對共產黨嘅猜疑，引發點喺「中山艦事件」（其實中山艦事件有一半亦都係蔣Sir自編自導自演），蔣Sir認為係共產黨想奪權在先，情況係叫有理說不清，加上孫文仙遊已久，蔣Sir亦無後顧之憂，衹要除去眼前兩座大山（一座叫共產黨，另一座叫汪精衛），天下就係我嘅，清楚？明白？透澈？1927年2月下旬，蔣Sir早有清黨嘅決心，佢曾經講過：「我是革命的，倘使有人要妨礙我的革命，反對我的革命，那我就要革他的命！」

You must understand that「革命」係有「你的革命」和「我的革命」之分，你倘若唔認同「我的革命」，你就是「反革命」，邏輯亦都係咁簡單，正如700萬人如果有200萬人支持你，就即係表示有500萬人支持我（結論：我多過你），數學有陣時可以好簡單，唔需要太複雜，反正聽得明嘅人會聽得明；聽唔明嘅人，就算比幾詳盡嘅資料去證實事實，佢都係聽唔明。況且，「革命」本身亦唔係一種「客觀事實」，而係一種「主觀立場」。

去返清黨現場，南天王李濟深配合蔣Sir行動，響革命基地廣州捕殺共產黨同時，蔣Sir亦響南京召集胡漢民（聽話復出）、吳稚暉、李石曾、張靜江等國民黨執監委舉行特別會議，否認武漢國民黨中央黨部同國民政府，並決定響南京成立中央黨部同國民政府，唔單止清黨，仲要另立中央奪權。4月18號，南京國民政府舉行就職典禮，新政府成立後，加緊對武漢國民政府嘅顛覆分裂活動。

攤牌了！4月17號，武漢國民黨中央宣佈蔣介石叛逆革命（反革命），開除佢嘅黨籍，免去一切職務。4月22號，39名武漢國民黨中央執監委員、候補委員、國民政府委員、軍事委員會委員聯名通電聲討蔣介石，南京政府同武漢政府開始對峙，史稱「寧漢分裂」。

幾個月前，仲係萬眾一心搞北伐，打倒一衆萬惡大軍閥，幾個月後，革命尚未成功，同志們就已經籠裡雞作反，鬥過你死我活。唔知道孫文在天有靈，睇見佢一心建立嘅國民黨互相血腥撕殺，會有乜嘢感覺呢？

#常威💀 #大軍閥平反系列 #大軍閥 #民國歷史

✅本土唯一香港土話近代史文本

❤【常威近代史】第一部《大清亡國關慈禧蛋牛治》，全面開放，免費下載， #freedownload！

Free下載連結🔽

https://play.google.com/store/books/details?id=C3hjDwAAQBAJ

【常威近代史】（四百八十八回）
李大釗之死

世界上，債有好多種，最普通係錢債，有借有還世界艱難，易借易還容易量化，大不了淋紅油收數，始終有條數計，彼此有得傾；第二種叫人情債，感情嘅事好難量化，斬不斷理還亂，做人處世最好少欠人情債，因為好難還得清；第三種叫血債，講緊人命關天，血海深仇一經種落，一世都冇辦法化解，甚至可以牽連三世之遙。

1927年蔣Sir突然血腥清黨，對中國共產黨所欠下的，明顯是「血債」，血債必須血償，之後國共打生打死，死咗幾多千幾人？甚至恩怨延綿到今時今日海峽兩岸。問心嗰句，2019年香港發生嘅大亂，亦係同國民黨與共產黨嘅恩怨有關（起碼有30%～40%），而恩怨嘅源頭係喺一百年前1927年4月12號開始。有人話中國人小L氣，其實又係真，不過你睇吓啱啱美國發生民衆衝入國會山莊暴動事件，仲有人揸住枝「南方旗」你就明白，有啲恩怨，真係可以延續100年以上；仲有基督教同伊斯蘭教，天主教同基督教……甚至係千年仇怨，所以並唔係中國人特別小L氣，係人類human-being都好小L氣。

4月19號，清黨大屠殺仍處於高峰期，南京政府同武漢政府分裂成兩個國民黨中央，武漢國民革命軍喺武昌舉行第二次北伐誓師大會，預備出兵討伐河南奉軍。4月18號武漢國民政府舉行國共兩黨聯席會議，決定繼續北伐，打破被包圍封鎖嘅局面，然後先討伐南京蔣sir！

第二次北伐，原本計畫分兩部份，首先佔領河南，與東進嘅馮玉祥國民軍喺鄭州、開封會師，然後兩軍攻向北京。武漢政府決定以唐生智（1889-1970）部隊同張發圭（1896-1980）部隊為北伐主力，由唐生智任總指揮。4月底，各參戰部隊集中豫南駐馬店地區。5月13號北伐軍總指揮下令進攻，東路以張發圭領導嘅第4軍、第11軍、獨立第10師及暫編第3軍喺京漢鐵路以東地區作戰，佔領開封。西路以靳雲鄂嘅河南保衛軍各部北上。中路以第36軍、30軍沿京漢路向北推進，部隊所到之處，橫掃千軍，用咗短短一個月時間，響6月1號喺鄭州開封同馮玉祥國民軍會師。

4月27號，喺蔣介石反面之後，中共響武漢召開第五次全國代表大會，出席者有陳獨秀、蔡和森、瞿秋白、張國燾、毛澤東等82人，共產國際代表羅易（Narendra Nath Bhattacharya，印度革命家，1887-1954）、維金斯基（1893-1953）、鮑羅廷（1884-1951），國民黨方面有譚延闓、孫科、徐謙列席。

【常公子歷史頻道350回：替大軍閥平反系列之 青樓救國團 】

⛎美國總統權力順利交接，並無一如陰謀論者或「川粉」所料，特朗普會在最後關頭發動軍事政變奪權，引發美國分裂陷入內戰情況，當然特朗普仍然唔承認選舉結果，訴訟不休，佢一枝公飛走佛羅里達唔X出席交接儀式，但拜登成為新一任美國總統，已經是鐵一般事實，係無法改寫結果，就職典禮亦響個個人戴口罩及嚴謹社交距離情況下順利完成，一切和諧得就如Lady Gaga領唱美國國歌或年青詩人Amanda Gorman朗讀"The Hill We Climb"一樣地對未來充滿希望和期盼，相當符合大美國精神。

♑美國主宰世界，嚴格嚟講，亦唔係1945年二次世界大戰結束之後發生嘅事，早響第一次世界大戰結束，大英帝國霸權沒落，跟住就係美國嘅世界，如果咁樣計算，美國已經主宰整個地球接近100年，過去一個世紀，亦係人類經濟科技發展嘅黃金時代，世界出現翻天覆地嘅變化，美國作為地球圓心或發展火車頭嘅角色，其實相當重要，不過天下似乎冇不散之筵席，踏入21世紀，經歷2008年金融海嘯之後，美國霸權的確出現咗由高峰向下嘅跡象，而且繼蘇聯之後，美國終於面對更強大嘅競爭對手，就係高速崛起緊、更難以捉摸嘅社會主義中國。

♏事實上冇人能夠預料美國將會如何發展？畢竟美國底氣異常強橫，除咗軍事實力，仲有美元金融霸權，就算真係要動搖其霸主地位——除非有核子戰爭發生——否則二、三十年時間唔會少。仲有意識形態，到咗今時今日，美國嗰套（表面上）對資本主義民主自由議會制度嘅政治信仰，依然冇其他嘢可以替代，社會主義雖然強勁復辟，但仍係八二距離，呢個黃金比例要轉移，二、三十年時間唔會少，仲要假設對手響途中唔出錯先有可能發生。因此，未來二三十年嘅發展將會係非常重要。

♐拜登上臺，首先再印銀紙19000億美元救國，如無意外，區區碎紙只係夠美國人駛多半年，下半年亦都一定要印，加埋前兩次印銀紙救國，世界經濟將會（己經）大水浸，金融泡沫肯定繼續再漲大多一Round，面對疫情持續，全世界所有國家除咗印銀紙救命之外，亦冇其他有效方法續命。疫苗有冇效用？變成救世主能否及時出現的關鍵？不過提提大家，歷史告訴我們，最大嘅災禍往往並唔係發生喺谷底時間，而係發生喺谷底反彈之後。美國30年代華爾街爆煲引發嘅世界經濟大蕭條，終於響十幾年後先演變成第二次世界大戰將災難以實體形式展現人前。

♑【常威近代史】第六部《最九衰的大軍閥時代Round 1》電子書上架（條download link在下面），請大家課金支持我一直走落去，直至劉少奇骨灰到達北京王光美手上…

✅https://youtu.be/-QsYAB5H7Vo

【常威近代史】（四百八十九回）
歷史分水嶺

我以中國哲古華拉李大釗之死作為歷史分水嶺有其特別意義，因為李大釗可以話係早期中共嘅代表人物同奠基者，佢嘅死亦意味住早期中共嘅路線同性格（人有人性，黨亦有其黨格）要開始逆轉，從此以後，中共轉變成另一個形態嘅政黨，由追求意識形態同夢想變成掙扎求存，就算係毛澤東本尊，亦由揸筆桿子變成揸槍桿子，你要一個揸筆嘅文人搦起槍進行殺戮，改變何其巨大？

如果你認為中共係邪惡政權，我可以講畀你知，由一開始並唔係咁，祇不過現實實在太嚴酷，對手國民黨蔣介石實在太兇殘太血腥，於是中共迫不得已改變其個性及形態，目的都係為咗繼續生存落去。亦好多時候，為咗改變仇敵，首先就要改變自己，人生亦復如是。「點解唔怕契弟？因爲我最契弟！」潘志文講嘅。用咁嘅方法解釋人性嘅墮落，有時候幾心安理得架。

四一二清黨事件，殺共產黨（同路人），殘酷不仁兼天理不容，因為蔣Sir係因不同「政見」殺人，開咗一個極壞嘅先例，滿清帝國嘅事唔好比較，畢竟係遠古封建時代，1911辛亥革命後，一眾北洋軍閥亦都有因政見不合而殺人，但唔少仍然有法可依，有其基本規律遵守（起碼大部份經過法庭審訊），但蔣Sir清黨，則大規模屠殺手無寸鐵嘅平民，其中有工人、學生、同無辜百姓，無法無天，到達血腥致極，從此以後，破壞一切遊戲規則（徹底破壞法統），黨國合一，隻手遮天，響中國近代史上，蔣Sir絕對係原創者，其他後繼之人（包括毛澤東），只係Copycat。

後來蔣Sir去到臺灣，亦有一場「二二八大屠殺」殺臺灣原居民，寧可殺錯三千人，不可放過一人，依個係蔣Sir一直相當遵守嘅做人原則。

中原大戰之後，蔣Sir佔領南京同上海兩大中心城市，得到東南富庶之地同上海浙江大資本家全力support，於是蔣Sir就有咗清黨嘅本錢（同你蘇俄切斷我仲有水，仲唔收金盧布改收美元，仲正丫），當然血腥清黨並非蔣Sir一人意志可以主宰話事，國民黨元老張靜江、蔡元培、吳稚暉等人以中央監察委員會嘅名義亦支持清黨，而手握兵權嘅何應欽（1890-1987）、顧祝同（1893-1987）、李宗仁、白崇禧等將領亦都全力表示支持。正如四十幾年後發生嘅文化大革命，亦唔係毛澤東一個人嘅意志可以主宰（起碼仲有林彪同四人幫），歷史本來就係群體嘅故事，成日用「代言人」個體單獨理解歷史進程，往往得唔到真象。

你又可以問，作為蔣Sir手下，唔支持老細清黨得唔得呢？（咁仲唔係一人意志所主宰咩？）事實上又未必，北伐期間，其實好多人同蔣Sir嘅關係只係合作夥伴，好似桂系軍閥李宗仁同白崇禧，你話佢哋係蔣Sir條靚，佢哋自己死都唔會認。而且北伐期間，好多場重要嘅戰爭亦唔係由蔣Sir嫡系部隊（黨軍）打贏，例如攻剋武漢三鎮嘅係親汪精衛嘅張發奎部隊，蔣Sir自己亦偏偏敗績最多，包括攻取南昌城時損兵折將，lastly平定江西亦係靠桂系李宗仁同白崇禧部隊，更加唔好提光復上海係共產黨發動工人革命，蔣Sir自己都承認自北伐以來，「沒有打過一次勝仗」，不過點都好，鬼叫你係牽頭人，勝利榮光最後盡歸蔣Sir一人，北伐勝利亦讓sir成為國民黨同南京政府嘅最高領袖。

當然不得不提，蔣Sir成為最高領袖亦同錢與黑社會有關，虞洽卿等江浙財閥資本家支持嘅人係蔣介石，並非李宗仁。另外能夠有效控制當時全亞洲最富裕嘅金融城市上海，亦不能排除係蔣Sir同青幫杜月笙黃金榮有千絲萬縷嘅關係先可以成事（負責清黨揸刀嘅，亦係青幫），其實早響十幾年前，蔣Sir就喺上海浦大（玩股票），亦千萬唔好忘記，蔣Sir除咗係承繼孫文嘅衣缽，仲係陳其美（1878-1916）嘅頭馬。

1927年5月1號，清黨繼續響各省市發生。武漢北伐軍同馮玉祥國民軍部隊喺鄭州開封會師之前，馮玉祥喺西安就任國民革命軍第二集團軍總司令；6月3號，國民政府管轄下的各省，勒令停用北京政府所屬中央銀行嘅鈔票，改朝換代，自然要開始印自己嘅銀紙（否則改朝換代嚟做乜呢？），其實每一次貨幣更替，都係政權向平民百姓打劫嘅方法，同1942年日本皇軍佔領香港用軍票兌換港幣一樣，不過我相信當時嘅中國人已經非常醒目，冇乜人會用政權發行嘅銀紙，都係揸住貴金屬銀元金條同西班牙大洋穩陣啲，條數太大就兌換美金或日元，口裡雖然支持革命，但內心總是明白的。

6月5號，南京國民黨中央常務委員及各部長召開聯席會議，通過清黨原則六條，正式將清理共產黨人寫入法律條文，清黨係依法做事，不過殺人喺立法之前，就叫冇法統無法無天，大家無異議掛？同日，劉湘（1880-1938）奉蔣Sir命令出兵武漢，任命楊森（1884-1977）為前敵總指揮，是日楊森通電擁蔣反共。之前武漢政府話要討伐蔣sir叛逆，蔣Sir就先下手為強先討伐你，就睇吓邊個先係唯一中央？

6月6號，南京總司令部命令南京各書局出版嘅書籍需呈送檢查，否則不準發行，睇到未？笑面虎孫傳芳離開了，蔣Sir來了，國民革命成功了，btw，極權同時降臨了，阿門。

#常威💀 #蔣介石平反系列 #黃金十年 #民國歷史

【常公子歷史頻道351回：替大軍閥平反系列之 問題 VS 主義 】

⛎2021年開始咗半個月，全人類仍然被新型冠狀病毒所困擾，事情繼續惡化，病毒變種，傳播力增加，歐美等先進國家似乎無計可施，逼不得已實施封城宵禁強制等手段，全力遏病毒高速傳播，但到目前為止，成效非常有限。美國拜登上臺，亦不得不面對惡劣現實，扭轉前任總統特朗普的半佛系防疫策略，要求全民戴口罩，大規模接種疫苗、封城封區鎖國，毫無疑問，上述措施將會進一步重創經濟物流，2019年已經將全球經濟重創，大部份國家得返半條人命，再搞多年嘅話，情況會係不敢想像。

♐至於作為救世主角色嘅各種疫苗，亦都不斷傳出壞消息，唔少國家接種咗疫苗人士再感染病毒，原因不明，但事實證明，同一般人之前想像嘅新冠疫苗作用，效果係差天共地。亦帶出一個事實，就算接種疫苗後，防疫措施亦不能夠鬆懈半分，即係話疫苗冇辦法高速帶領世人重歸正常生活狀態，或者要等一段時間（一年半載）先有顯著成效，呢個係非常惡劣嘅消息，2021年冇可能大規模復甦，要睇2022了。

♏如果上次嘅描述係正確嘅話，今年將會非常難捱，作為一個普通人，唯有積穀防饑、未雨綢繆，頂得幾耐得幾耐，要有強烈心理準備，要同新型冠狀病毒打持久戰，大家鬥長命。回顧當年2003年沙士，全世界祇有少數幾個地方爆發，包括香港，沙士響香港高速肆虐，殺死300幾人（反觀新冠病毒到目前為止只有168人死亡），當期時的確係風聲鶴唳，但係幾個月過去，病毒突然消失，市民好快回到正常生活中，除咗經濟狀態以外，去到2004年頭，一切好似從來沒有發生。

♉但今次明顯唔同，病毒威力不及沙士，但生存、變種、傳播力量之巨大，甚至超越1918年西班牙流感，嚟到現在，任何人都無法否認，新冠病毒將會係人類歷史上面對最大嘅一場瘟疫，總體破壞力超過十四世紀黑死病肆虐歐洲情況，嚟緊嘅日子，大家需要長時間面對狂風暴雨，心理狀態要好好調節，儘量做一啲令自己開心嘅事，hea就hea吧，謹記無需要太多，反正強求亦唔會有更多。


♑【常威近代史】第六部《最九衰的大軍閥時代Round 1》電子書上架（條download link在下面），請大家課金支持我一直走落去，直至劉少奇骨灰到達北京王光美手上…

✅https://youtu.be/P76QnyAh9QM

【常威近代史】（四百九十回）
412之後，就要選擇站邊條隊

人類嘅歷史充滿黑暗，其主要嘅原因係好人雖然一世平安，但永遠無辦法取得勝利。勝利者通常係最殘忍最無情最殺人不眨眼嗰個，你稍為有少少慈悲之心，只可以領導嵩山少林寺，政治唔適合你，古今皆然。因此好人當權嘅機率實在太低，壞人當權，自然充滿黑暗，相信亦都好容易理解。

就用蔣Sir同孫傳芳去比較，外號笑面虎嘅孫傳芳其實頗為善良，甚至話佢係一個好人亦屬不足為過（當然要睇吓同邊個比），吳佩孚亦都係，如果有一個「好人指數」，佢兩位大軍閥應該係蔣Sir之上；又如果有一個「殺人指數」，蔣Sir亦當然遠遠拋離佢兩位大軍閥。不過好人完全冇用，祇有勝利者先可以掌握最後話語權，佢話你係「反革命」就係「反革命」，佢話你係「匪」你就係「匪」，佢話你係「偽」你就係「偽」，佢話你係「暴徒」你就係「暴徒」，總之乜都佢講曬，鬼叫你打輸咩？

廣東話有句俗語叫「先撩者賤，打死無怨」，冇實力唔好學人打交，打輸咗亦千萬不要哀求敵人仁慈大方處理自己。如無意外，Donald Trump絕對唔會同Joe Biden和解，坐監就坐監，輸人唔可以輸陣。當然唔開打又點知可唔可以符碌奪權呢？又啱。世事往往兩難。

去返1927年5月，5月9號，有一艘由香港開出去江門叫「兩廣」輪船，途中與「滿西」號小輪相撞沉沒，當場浸死121人，同日國民黨中央政治會議決議將上海「模範」、「游民」兩工廠，改設為國立勞動大學（仍存在一浸侵左味）。

5月12號，蔣Sir麾下桂系大將李宗仁響湖口同另一駐紮南昌嘅國民黨軍頭朱培德（1888-1937）會面，決定要求寧漢雙方暫停分裂，分途北伐，先對付張作霖奉軍及直系殘餘勢力。

5月13號，朱培德響同李宗仁見面後嘅第二日，唐生智轄下第14師師長夏斗寅（1885-1951）發出反共通電，指出工農運動令「商嘆於市、農怨於野」，指責中共「藉口總理（孫文）容共，而喧賓奪，主暴君政治擾亂我兩湖」。並乘武漢國民軍主力北伐之機，率領叛軍直逼武昌，搵個籍口作反姐。5月18號，中共決定由廣東惠陽客家人軍神葉挺（1896-1946）率領其部隊及中央軍事政治學校武力迎擊夏斗寅部隊，並且同時發動民衆，合力打敗夏斗寅，保住咗武漢政權。

5月17號，南京國民黨中央清黨委員會正式成立，在其控制各省內進一步加強清黨活動。5月20號，武漢國民黨中央發出「糾正農運」嘅訓令，由此亦可睇得出，由國民黨左派控制嘅武漢政府，亦有人對中共發動農民運動感覺不滿（以農村包圍城市），好快會發生嘅汪精衛「分黨」事件，亦由此埋下伏線。真正體現唯物辯証法所言：大矛盾內有小矛盾，小矛盾內有更小嘅矛盾。

5月21號，國民革命軍第35分第33團團長許克祥（1889-1964）喺湖南省省會長沙發動反共事變，因該日電報代號為「馬」，故史稱「馬日事變」。當晚九點半，許克祥受35軍軍長何鍵（1887-1956）密令，召集所屬各營營長及參謀人員緊急集會，晚上12點，指揮全團1000多人分別搗毀同埋封閉咗湖南省總工會、省農民協會、國民黨省黨部、黨校、農講所、解除咗工人糾察隊同農民自衛隊嘅武裝，同時釋放咗在押嘅土豪劣紳。

22號上午，許克祥封閉共產黨喺長沙嘅所有機關一共70多處，共產黨人及親共嘅群眾被屠殺者達百幾人，被捕者3000幾人，許克祥喺長沙一連屠殺咗七、八days，真係血腥清黨，被害者接近六七百人……慘劇發生之後，武漢國民政府派出譚平山、陳公博等五人前赴查辦，但唔係話你想查就查？邊個嚟邊個死呀！

於是武漢國民政府將個波交返畀總指揮唐生智全權辦理，而佛系唐生智可能禮佛禮得多，本性慈悲，僅僅記下屬許克祥一次「大過」就算九數（被殺嗰幾百人真係冤枉……），同時要求黨部及民眾團體立刻停止活動......

5月24號，軍頭夏斗寅、許克祥相繼叛亂，武漢國民黨中央發佈咗一系列遏制工農運動嘅訓令，國共合作已經到達徹底破裂邊緣，中共中央召開政治局會議商討對策。首先由陳獨秀提出中共退出國民黨，但鮑羅延以莫斯科第三國際不容許為理由，否定咗陳獨秀嘅意見；蔡和森同李立三提出以「暴動對暴動」，亦遭否決。鮑羅廷認為同國民黨左派仍有偈傾，一切都係由於工農運動太過火（太左），必須向國民黨讓步，繼續合作。另一印度人羅易則主張共產黨應該動員廣大嘅國民黨員推翻國民黨中央。依一次緊急會議，由兩位外國人鮑羅廷同羅易滔滔不絕地演說，蔡和森提出批評，瞿秋白從中調和，但直至會議結束，仍未找出對策……

中共中央未有對策，亂事接二連三，5月27號，曾經同李宗仁見面嘅朱培德下令查封共產黨人主辦嘅南昌《三民日報》，兩日後，又以江西政局不穩為由，將第三軍全體政治工作人員142人「禮送出境」，依批人當然係共產黨人。6月4號，又以農民運動過火為理由，將共產黨負責人同國民黨左派劉一鋒、李松風、方志敏、王枕心等22人「禮送出境」。

事實上由4月開始，中共控制咗國民黨江西省黨部，朱培德出任江西省主席、412政變發生後，朱培德反共傾向迅速加劇。412之前，大概國民黨內有好多中間派溫和派，仲想左右逢源，邊個都唔得罪，但412之後，就要選擇站邊條隊勒，反共定容共？揀錯咗分分鐘會冇咗條命喎……

#常威💀 #蔣介石平反系列 #黃金十年 #民國歷史

✅本土唯一香港土話近代史文本

❤【常威近代史】第一部《大清亡國關慈禧蛋牛治》，全面開放，免費下載， #freedownload！

Free下載連結🔽

https://play.google.com/store/books/details?id=C3hjDwAAQBAJ

【常威近代史】（四百九十一回）
王國維自沉頤和園昆明湖

出嚟處世，邊個唔想左右逢源？食盡兩家茶禮？做事圓滑，任何人都唔得罪，於是個個有job就揾自己，順利苟全性命於亂世，不求聞達於諸侯，中環古惑仔做人原則。但係當局面逼不得已進入戰爭狀態，敵我雙方生死相搏，用血酬取代財酬交易權力，就唔可以畀你做騎場派兩邊擺，你必須要選擇一條隊站，唔係朋友就係敵人，溫和派中間排調停排冇存在嘅空間，鬼叫你開始要打仗咩？

當時放喺一衆軍頭面前嘅就係「容共」抑或「反共」？或者未必牽涉意識形態，而係「擁蔣」或「反蔣」；情況一如今屆嘅美國總統大選，選民並唔係選擇「Donald Trump」或「Joe Biden」，而係選擇「有Trump」抑或「冇Trump」，年老呆慢且一直行來始終唔得嘅拜登只係一個配角角色。

蔣Sir成功佔領亞洲第一金融城市上海，而且得到江浙資本家及地下勢力全力支持，真正財雄勢大，黑白打通，雖然壞事做盡，但有水有環境，錢財身內物呀，「擁蔣」指數急昇，反觀如果支持中共，分分鐘到最後共埋你產，渣都冇得剩。當時有兵在手嘅軍頭個個識計數，未來景愿固然美好，但解決當下士兵出糧問題先係最重要，冇得食死撚咗亦冇辦法過渡去未來烏托邦，於是紛紛表態，全力反共（即擁蔣），就連國民黨內全力堅持「總理路線」嘅武漢政府左派，都立刻同中共劃清界綫，「容」你可以，拾卜你打仗say no，一時間，中共面對非常惡劣衆叛親離局面，領導層束手無策，支持共產主義信念嘅青年，響每個蔣Sir控制嘅城市內被血腥屠宰及關押。

1927年5月23號，天象亦有啟示，甘肅蘭州古浪、武威、華亭、永昌、民勤、張掖等20多個懸市發生強烈地震，震央中心響古浪懸，估計係黎克特制8級以上大地震，民眾當然死傷慘重，根據官方數字，單單喺威武懸就死咗25000多人，牲口死22萬，40萬間房屋倒塌，其實所有數字根本無法估算，總之大地震過後滿目瘡痍，千里難見人烟。天災人禍夾擊之下，中華民國國運已經岌岌可危。

事實上用正確嘅概念嚟講，提倡民主共和制嘅中華民國自1911年辛亥革命後建立，行到去1927年係正式滅國，前後國祚16載，雖然之後蔣Sir仍然沿用中華民國名號，但蔣Sir嘅中華民國同原本嘅中華民國，本質上已經完全改變，起碼「共和」兩個字如八萬五一樣不再存在，蔣Sir亦怕大家亂有混淆，所以改埋支國旗仔，等大家清清楚楚新國家係由我建國，16年命嗰個中華民國用嘅係「五色旗」，而蔣Sir嘅中華民國用嘅係「青天白日旗」，大家要好清楚好sure。