【常威近代史】（三百五十回）
大軍閥平反系列
清楚返形勢先，20世紀初嘅中國南北戰爭一直持續，主要戰場喺湖南長江流域一帶，戰事規模時大時細，斷斷續續，和中有戰，戰中有和。我講過，基本上唔算係大規模嘅內戰，如果同之後發生嘅戰爭比較，直情係冇得比，二次世界大戰結束之後國共內戰，就係真真正正嘅大規模內戰，唔係你死就係我亡嗰隻，死成千萬人，先至係真正嘅內戰，civil war。
一直代表北京中央政府喺最前線作戰嘅軍人，代表人物係民國關公吳佩孚，隨住喺前線嘅日子越嚟越長，吳佩孚嘅實力亦都不斷坐大，槍杆子出政權，邊個有兵邊個惡係真理。
自從1918年8月，吳佩孚已經不斷發表「罷戰主和」嘅輿論，同北方段祺瑞皖系主張武力統一中國背道而馳，吳佩孚亦同佢嘅伯樂直系大佬曹錕，拉攏其他軍閥，包括奉系張作冧，組成「七省聯盟」，主張喺前線撤軍北歸，實行「清君側」行動，當然要打到嘅對象，就係段祺瑞嘅整個皖系，段祺瑞多次向吳佩孚作出警告同斥責，甚至叫佢做「秀才造反」，但革命無罪，造反有理，你中央政府做得唔好，人民就有權推翻你，屬於民主基本邏輯。
之前已經講過，為咗阻止吳佩孚大軍北還之路，段祺瑞曾經想奪取河南省嘅領導權，但捉蟲入屎忽，本來中立嘅軍閥趙倜唔想軍權被褫奪，反而轉向投靠直系，結果「七省聯盟」變成「八省聯盟」！
1920年4月，「安福系倒閣」事件失敗告終，令段祺瑞同安福俱樂部聲譽再度受創，我諗支持度跌到同今日嘅林鄭差唔多。直系大佬曹錕乘機以追悼湖南陣亡將士為名，喺保定召開八省聯盟會議。出席會議嘅人，包括直隸督軍曹錕、江蘇督軍李純、江西督軍陳光遠、湖北督軍王佔元、奉天督軍張作霖、吉林督軍鮑貴興，黑龍江督軍孫烈臣、河南督軍趙倜，同關公陸軍第三師師長吳佩孚。
八省聯盟從此結成，直系首領曹錕同吳佩孚喺會上牽頭，策劃倒段行動，各省督軍意見雖然不盡相同，但反對安福系態度一致，認為推翻安福系呢個貪汙政治聯盟，段祺瑞就會不攻自破，會議通過三項決議：
1.擁護靳雲鵬內閣，以抑壓安福系繼續坐大，暫不直接反對段祺瑞。
2.各省前線軍隊一律撤回原防地，即係按章工作，但係要保證南方軍隊不會乘機進攻。
3.宣佈安福系罪狀，致電中央政府請求解散安福俱樂部，即係所謂「清君側」行動。
八省聯盟提出嘅訴求亦都相當溫和，但係獨當一面嘅段祺瑞又點會俾你班蛋散要脅呢？你有「八省聯盟」好叻咩？段祺瑞亦同時間拉攏其他軍閥，組織咗「十一省聯盟」，多你三省，吹咩？當然所謂十一省聯盟純粹係政治花瓶，只係畀面派對，功能有限。大家壁壘分明，正如今日香港有「黃店」同「藍店」之分，到頭來睇下邊個多人幫襯，就係民意所在囉。
