大清亡國關慈禧蛋牛治 2

【常威近代史】（三百七十七回）
大軍閥平反系列

發生響1919年嘅「五四運動」，或者我哋稱呼為新文化運動，基本上係中國第一次文化大革命，中間帶住巨大階級性。新文化推翻舊文化，傳統士大夫讀書人階層、儒家哲學傳統全盤被推翻踢入屎坑，整個過程只係用咗區區幾年時間，由此可見，當時中華民國國民對傳統文化嘅厭惡程度，實在無以復加。

傳統中國，係一個由儒家哲學三綱五常宗族倫理組成嘅道德世界，讀書人士大夫階層係另一個Level，因為讀過書（讀過吓書），就算考唔到科舉，做唔到朝廷大官，留喺條村度都可以也文也武，甚至作威作福。中國傳統民間故事，成日強姦民女嗰啲「員外」，就係嗰亭讀過吓書嘅人，佢哋識背四書五經、識寫識讀文言文，甚至會撚吓詩作吓對，吹個靚頭焗個靚撻。真係冇辦法，係一個文盲率達到99%以上嘅農業社會，所謂讀書人其實就係維持政權穩定嘅最大推手。

古代世界，有咩人有資格讀書呢？咪有錢人囉，一條窮西，老竇老母親戚鄉里朋友成條村盲字都唔識多個，想發圍？世界上冇咁多個朱元璋。去私塾讀卜卜齋要科水（或者有年輕讀者唔知咩叫卜卜齋，卜卜齋唔係扑嘢嘅地方，扑嘢地方叫雞竇，卜卜齋係喺民間俾細路仔入去讀書嘅地方，因為好多時候要背三字經或其他儒家經典，教師會扑個木魚【唔係金魚】製造節奏同學生一齊背誦，因為木魚卜卜聲，所以叫卜卜齋），請私人教師返屋企補習？更加係名門望族先做得到，可想而知，當時讀到書嘅絕大部份係有錢人，或叫資產階級，呢啲狀況到今日都冇變過，如果你有機會入三大，不妨做個考察，睇吓學生住私樓多抑或公屋多？

普及教育？乜撚嘢嚟架？有必要嘅咩？做奴隸使乜讀咁多書呀？耕田嫁嘛，有氣有力識得食飯屙屎同繁殖就夠啦，讀得書多會作反嫁！understand？大學呀普及教育呀公立學校呀由德國普魯士發明，其實只係19世紀嘅事情。社會文化水平愈高，人類嘅反抗意識就愈高，你睇吓，歐陸一有普及教育，就有馬克思主義誕生；清朝係由1902年慈禧新政開始搞普及教育，結果幾年後，就發生辛亥革命；90年代彭定康嚟香港履任港督，大量增加大學學額，要將大學教育普及化平民化，表面睇係廢除精英主義，等多啲人有機會讀大學，德政嚟個喎！實際上係擺定個計時炸彈比你中華人民共和國97後嘆，講笑啫，英國人點會咁奸呢？紳士嚟嫁屌。

1920年代，新文化運動開始深入社會上每一個角落，民眾唔再睇文言文四書五經，outdate啦！我手寫我口，要用要睇白話文，於是乎新一代白話文文學作品鋪天蓋地出現，其中小說係最重要嘅一種文學作品，但係其實睇返中國嘅章回小說，例如《紅樓夢》、《三國演義》、《水滸傳》同《西遊記》都係用白話文寫（從前一白話文當然唔同今日嘅白話文），從前嘅世界，呢亭章回小說係民間講古佬響橋底講畀啲唔識字嘅貧苦大眾聽，叫説書，通俗小說難登大雅之堂，士大夫望到要洗眼，今時今日，我哋叫「四大名著」。

白話文嘅應用係一個里程碑，因為普羅大眾終於能夠用文字將自己嘅思想表達比其他人知，以及吸收其他人思想，從前使用文言文嘅書信來往，或者只有士大夫階層或接受過教育嘅人先睇得明白，就好似我哋今日睇古文一樣，其實係一種密碼，係一種文化封閉，亦都係一種階級權力嘅掌握。

由晚清後期開始嘅政治動盪，大家亦都可以睇到文化傳播普及係重要一環。起初戊戌政變只係侷限於士大夫階層；後來辛亥革命，識字嘅人多咗，就有一般軍人同知識分子參與；之後新文化之運動洗禮，知識大爆發，去到國共內戰，就連農民都識得叫馬克思主義打倒資本主義，叫農村包圍城市，一環扣一環，讀書識字再唔係某個階級專利。今日香港，最想港獨嘅人係大學生，反而教育水平較低嘅人，大部分傾向支持政府。「革命」前生係「教育」，所以新馬克思主義者認為，「學校」本身先至係最大嘅國家機器。

政權要穩定，必先控制意識形態，控制意識形態有兩大範疇，第一係「教育」，第二係「傳媒」。而且要改變人嘅意識形態好難，因為意識形態本身就係先入為主，除非政權敢採用大規模屠殺肉體消滅作為手段，否則採取教育或潛移默化方法，時間會用上二三十年以上。

我成日講結界師鄧小平高瞻遠矚，「50年不變」，2047回歸呢個日子唔係隨口噏當秘笈，而係50年後，嗰一代接受港英殖民地教育成長嘅香港人先至會死乾死淨（ Including me）。你接受唔到？咁你根本唔明白乜嘢叫做實用主義者？唔明白乜嘢叫馬基維利主義者？

或者你根本唔認識鄧小平是誰？亦唔明白咩叫歷史。

現在發生響香港嘅，其實係一場意識形態戰爭，新生意識形態要取代原來嘅意識形態，但守護住原來意識形態果批人，偏偏又係最年輕個批人，仲要係九七後出世個批人，其實個局面相當奇怪。中共係一個意識形態政黨，中國係一個意識形態大國，玩意識形態應該玩到出神入化任佢點撚都得，但係當權者對香港局面嘅錯判，係完全不能夠接受。又或者，上一代人始終跟不上時代，互聯網正在改變一切。

互聯網本身，正是另一波文化傳播普及，而且兇猛程度，比過去嘅任何一次知識大爆發，更要恐怖百倍。

#常威 #大軍閥平反系列  #大軍閥 #民國歷史

【常威近代史】（三百七十八回）
大軍閥平反系列

之前講過，1921年11月有一個叫「太平洋會議」，響美國首都華盛頓舉行，中華民國兩個中央都有派代表參加，開會嘅國家包括美國、英國、日本、法國、意大利同中國等九個國家，不約而同，佢哋係第一次世界大戰嘅戰勝國，中國有份參加會議，真係萬幸，就咁睇，你仲以為當時嘅中國係世界強國之一添，陰9公……

事實上，會議嘅目的亦都同中國有關。第一次世界大戰結束後，英國、美國、日本、法國四大超級強權嘅實力發生咗顯著嘅變化。最簡單嘅係，真正硬砌德國嘅英國同法國損失慘重，國內壯年男人死咗一半以上（加多場1918年西班牙流感），你話得唔得人驚？英法國力下滑；反而響側邊食花生嘅美國同日本就大收漁人之利，國力上昇。但係呢四個國家喺遠東同埋太平洋地區都牽涉巨大利益，尤其是喺中國，大家點分贓先？一戰之前，大英帝國惡曬，一戰之後，日不落帝國終於日落，美日從後趕上，要同你分餅仔。

大家又唔好唔記得，美國同日本係世仇，日本嘅明治維新係因為美國黑船堅炮利打開日本鎖國嘅大門而發生，日本人視為國恥，佢哋從來唔妥美國人，依份不世仇恨，以及依份仇恨帶嚟嘅後果，到今時今日仲喺度。

大英帝國國勢沒落，要退場後，日本成為中國最大嘅既得利益者，美國人睇見你食（中國）得咁開心，亦都好想加多雙碗筷一齊開餐。「太平洋會議」就係一場重新分配各國在華利益嘅會議，既然一衆強姦犯已經列席，作為被強姦嘅主角中國，又點可以唔出席會議呢？所以中國一定要有份參加，響會上，中國政府代表施肇基提出解決中國問題嘅十項原則，要求各國「尊重中國領土之完整及政治與行政之獨立」，其他國家一定「尊重」中國，佢哋一向尊重中國，強姦你亦唔代表唔尊重你。

中國希望和平解決遠東及太平洋問題，聲明不再割讓或租借本國領土予外國，事實上太平洋會議係一個重要里程碑，中國並表示贊成美國嘅「門戶開放，機會均等」嘅主張，亦由嗰陣時開始，美國開始加大力度插入中國事務，美國嘅競爭對手係日本。會議上通過咗《中日解決山東懸案條約及附約》，即係21條嘅尾巴，仲有《九個關於中國事件應適用各原則及政策之條約》、《九國間關於中國關稅稅則之條約》，旨在保護各國在華既得利益，大家傾好佢，唔好拗數，決定強姦嘅先後次序同埋力度大細啫。

依一場太平洋會議，確保咗一戰之後西方各國喺遠東及太平洋地區嘅新秩序，最重要嘅係，美國借住門戶開放政策，打破日本同英國喺中國嘅壟斷性優勢，取得更多響太平洋地區擴張嘅機會。中國作為被強姦嘅對象，當然任人魚肉，但係太平洋會議上，以日本人嘅眼光睇，又係一衆西方列強想抑壓日本人響亞洲擴張嘅野心，我講過，打完甲午戰爭同日俄戰爭後，日本人根本覺得東三省、遼東半島係佢哋嘅，如果唔係西方列強阻頭阻勢，或者「中國已經是日本的了」。

美國想插隻手入嚟？日本人嬲硬，日本喺中國投資嘅人命係幾十萬條，美國呢？凡事唔好淨係講錢，喺政治世界有樣嘢叫「血酬」，錢債可以還，但「血酬」就冇得還，血酬就係人命，人命基本上係無價嘅；錢債可以傾還款安排，甚至破產唔使還。但血酬唔可以，正如當年六四事件鄧小平出動坦克鎮壓天安門廣場學生，佢就講，唔通我就咁將共產黨嘅政權交出來當冇件事？咁我點對得住當年為共產主義革命犧牲嘅一種烈士英靈兄弟手足呢？鄧小平所諗嘅，就係血酬，明白未？

日本付出血酬侵略中國，叫實牙實齒，其他西方列強想食花生分一杯羹，其實真正仆街嘅係佢哋。當時嘅日本人，目標亦唔係區區一個小小中國，而係想建立「大東亞共榮圈」，一統亞洲，要東風壓西風，扭轉整個世界係紅鬚綠眼鬼佬話事、或西方猶太人資本家集團壟斷嘅資本主義遊戲規則嘅局面。日本人會為咗呢個理想不斷嚮前衝！衝！衝！甚至為此建立軍國主義，寧為玉碎，不作瓦全，打到最後一兵一卒都唔會投降，幸好奧本海默及時發明咗原子彈，掟咗落廣島及長崎……

我常公子嘅歷史論述，並唔想單單講歷史，如果歷史本身唔能夠作為現代人一種借鏡或教訓，歷史基本上冇撚用。

當時新興嘅日本帝國，要挑戰整個以西方列強為首嘅資本主義世界遊戲規則，其實同今日嘅中國亦都非常相似，東風壓西風，係一場異常殘酷嘅鬥爭，當日本傾盡國力，鬥至最後一兵一卒，最後無功而還，淪為美國嘅附庸國，咁就70幾年。今日中國重蹈當年日本嘅覆轍，由於巨大嘅經濟崛起，覺悟到遊戲規則其實絕對唔公平，所以要想辦法扭轉佢，結果，亦同當年嘅日本一樣，成為西方列強圍攻嘅對象。最近一場武漢肺炎蔓延全球，演變成「百國聯軍」圍堵中國嘅局面。最後要打嘅，係要打醒你中國反撲整個遊戲規則嘅決心。

你要搞一帶一路、搞亞投行、搞人民幣貨幣結算體系，就係另起爐灶。爐頭從來祇有一個，你想搞第二個爐頭煮餸食飯，就要問過大佬，大佬當然會答應你，從來祗有獨市生意先係最賺錢。但係要打大佬，需要有足夠彈藥，亦需要有詳盡嘅戰略部署，仲要有天時地利人和。當年日本做唔到嘅事，今日嘅中國又有冇辦法做到呢？我唔知道，因為歷史往往係出人意表，絕對唔會咁輕易俾你估得到。

#常威 #大軍閥平反系列  #大軍閥 #民國歷史

✅本土唯一香港土話近代史文本

❤【常威近代史】第一部《大清亡國關慈禧蛋牛治》，全面開放，免費下載， #freedownload！

Free下載連結🔽

https://play.google.com/store/books/details?id=C3hjDwAAQBAJ

【常公子有野講001】DSE歷史科爭議

♊拍左條片講DSE爭議，純粹抽水，不喜勿插。如果大家喜歡咁樣嘅談論節目，以後會拍多啲，希望增加條channel嘅收入，生活艱難，為夢想，頂硬上。

♉最近同好朋友兼恩人周顯怕住做「阿周電視」Youtube，畀網友留言話我無恥，之前扮黃，今日變藍。首先多謝佢批評，人都要喺批評中得到進步同反醒，至於我係黃定係藍？相信應該由網友讀者觀眾去評價？我嘅立場係乜嘢？相信大家都好清楚。

⛎有時候係為咗工作嘅需要，我並唔係有錢人，只係餐飲餐食餐餐清嘅月光族，生活上嘅選擇並不多，能夠做自己喜歡做嘅事、寫自己想寫嘅嘢、能夠講自己嘅真心說話當然最好，但好多時候，我亦唔可以百分百做得到。況且我係一個將「情義」睇得好重嘅人，我認為人與人之間嘅「情義」係應該淩駕於政治立場之上；正如我唔贊成行私刑使用暴力，唔認為一個家庭裡面應該因為政治立場而鬧翻，畢竟我哋需要同其他人建立良好關係，否則「團結就是力量」從何說起？

♈孤立自己，將自己同路人嘅數目減少，對事情完全沒有好處，遺世獨立當然是浪漫情懷，但浪漫不等於成功。當然我亦會迷失，大時代面前、人類——尤其是窮人——難免會產生選擇困難症候群，我好喜歡一本書，寫嘅係第一次世界大戰前夕1913年嘅奧地利首都維也納，當時歐洲一個靡爛到了究極嘅繁華大都會，所有人沉醉於20世紀初期由人類科技文明打造嘅美好生活之中，並唔知道一年後整個歐洲大陸將會天翻地覆，所有價值、信仰以及美好善良會喺一夜之間全部被戰爭打破。當時身處維也納有近代最偉大嘅文學家卡夫卡、亦有後嚟成為納粹領袖嘅希特拉、以及蘇共暴君史太林。

✅https://youtu.be/6T5gfIzOezg

👉最新上架⏩【常威近代史】第四部《霹靂大忠臣對決無敵大買辦》Round One
https://play.google.com/store/books/details?id=Np3PDwAAQBAJ

【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

❤【常威近代史】第一部《大清亡國關慈禧蛋牛治》，全面開放，免費下載， #freedownload！
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

【常威近代史】第二部《中國一百年前的第一次改革開放》實體購買
https://www.382now.com/product?id=151

【常威近代史】第三部《東方維多利亞女王之死》實體購買
https://www.382now.com/product?id=165

魯迅係新文學運動最重要一個人物，沒有之一，唯一可以同佢相提並論嘅只有胡適，但胡適係右派，魯迅係左派，魯迅寫嘅多部中短篇小說，徹底地喚醒咗中國人的反抗意識（或赤化），文字嘅力量喺從前非常強大，其實到咗今日都未變過，只不過係轉載文字嘅媒體日新月異而已。

魯迅原名周樹人（1881-1936），浙江紹興人，出生於一個家道中落嘅中產家庭，佢有個細佬叫周作人（1885-1967），同樣係新文學運動舉足輕重嘅大人物（個人認為民俗學家周作人成就比佢大佬大得多…兩兄弟亦係共產主義信徒），魯迅於1901年礦路學校畢業，之後考取獎學金，公費到日本讀醫，佢應該冇攞到個醫學學位，當年留學日本嘅留學生搞革命，亦都係常態同潮流（正經讀書就係笨柒囉）。留學期間認識中華民族發明者章太炎，加入革命組織光復會，但係魯迅並唔係一個積極嘅革命者，鑑湖女俠秋瑾（1875-1907）就曾經喺「猛回頭」陳天華（1875-1905）嘅追悼會上痛駡魯迅膽小怕事、投降滿虜、賣友求榮。

後來魯迅返去中國，做中學教師，並冇參與過任何實質嘅革命活動（可能有，但史書上冇記載），1911年辛亥革命爆發後，偉人蔡元培出任教育總長，開始提攜光復會舊人，魯迅就喺個時候去咗北京，響蔡元培護蔭下有份政府嘅高薪厚職。中國共產主義天地雙龍之一陳獨秀創辦《新青年》，魯迅成為寫手及長期供稿人，五四運動、新文化運動嘅興起，直接將魯迅帶到人生嘅顛峰，成為新文化運動第一號旗手，亦成為最多人認識嘅中國作家、及歷史偉人。

魯迅思想左傾，信奉共產主義同馬克思主義，不過當時作為一個年青人偶像，擁有眾多fans，要走在時代尖端，一定要buy同sell馬克思主義，就算你唔信馬克思主義亦都要扮信，左傾係潮流，右傾係守舊，係中國20世紀20年代嘅社會風貌，一派左傾文人同埋文藝工作者電影工作者，亦都響當時中國最資本主義嘅自由城邦上海灘大放異彩，響紙醉金迷嘅資本主義世界擁抱共產主義馬克思主義，的確係一件非常浪漫嘅事情，魯迅只係其中一個。

成為大作家之後，魯迅不斷出版文學作品批判現實社會、批判資本主義世界，用今日嘅講法，佢「洗咗唔少年青人嘅腦」，令佢哋思想左傾。不過呢個並唔係罪行，因為大家都好樂意咁樣做，當時亦冇人知道共產主義世界真正來臨嘅時候，會係一個乜嘢嘅慘烈狀況。

有早知，就冇乞兒。世界運行其實好簡單，你只要知道聽日跑馬其中一場頭馬就乜都搞掂曬，所以作為預言家（馬評人股評人財經演員風水師算命師或政客），永遠有市場，世人永遠相信有人會「早知」，但真相其實係冇，否則世界上唔會有乞兒。

小説作為一種意識形態戰鬥兵器，響中國近代史上，中共第一號文膽陳伯達（1904-1989）未起朵之前，以魯迅用得最好，遇神殺神，遇佛殺佛，魯迅亦同孫文一樣，係國共兩黨兩邊都唔夠膽抹黑嘅歷史人物。

1000日元上嘅頭像日本文學家夏目漱石（1867-1916）影響魯迅好深，1905年夏目漱石出版最重要作品《我是貓》，大家不妨將魯迅嘅《吶喊》同《我是貓》比較吓，你就會知當時中國同日本文化嘅分野，同距離。（*此為大東亞共榮圈的註腳*）

想聽多啲常公子講時事
新聞朕播大部份時間都係大C意見

【常威近代史】（三百八十回）
大軍閥平反系列

依兩回，都有提及日本帝國嘅偉大戰略「大東亞共榮圈」，1920年代，中華民國國固然係立立亂，但當時中國嘅最大敵人日本，亦唔係想像中咁國泰民安，大正時代，要求人權法統、以及平等公義嘅訴求，同樣出現喺日本人身上。明治死後，最高威權瓦解，而繼任嘅大正天皇，毫無魅力，日本民間亦出現反抗情緒。

1918年，日本就曾經出現過一場「米騷動」，「米騷動」係繼1905年東京大騷亂之後，日本發生嘅一場最大型嘅暴動事件，事件起因，不外乎錢嘅問題（如果印銀紙可以解決問題世界上真係無問題），當時大米價格暴漲造成咗嚴重嘅經濟困難，由於當時政府法定收購價同民間自由市場價格有極大差距，日本農民對於嗰啲令大米價格失控嘅米商同埋政府官員產生了極大怨恨，第一次世界之後，米價不斷上昇，帶動通貨膨脹，連帶租金同埋各類消費品價格亦都急速上昇，人窮唔會志短，人窮就會暴動。

經濟問題由農村蔓延到城市，終於發生咗日本現代史上一次影響範圍、組織規模同埋暴力程度空前嘅大暴動。1918年7月，暴動首先係富山縣魚津市一個小漁村開始，起初當然係和平示威，但係事態好快就升級，演變成為罷工、罷市、搶劫、民眾衝擊警察局同政府機關，而且迅速蔓延，1918年9月中旬，全日本38座城市、153個鄉鎮以及177條村出現咗超過623次暴亂，參與者超過200萬人。

事後有研究指出，日本發生大型暴動亦同俄國1917年布爾什維克奪取政權有關，甚至有共產黨人透滲日本發動尋釁滋事同暴動，共産主義風潮，不但吹遍歐陸同響中華民國發芽生根，同時亦波及資本主義大國日本，牽動普羅大眾抗爭情緒。「米騷亂」一發不可收拾，日本政府採取大力鎮壓嘅處理方式，事後有超過25000人被捕，其中有8000人被唔同嘅罪名起訴，有唔少人甚至被判死刑。

情況同今日香港亦都好相似，根據資料，截止筆者執筆之時（2020年5月），香港一共有8000人因為去年至今嘅抗爭運動而被捕，如果你計返比例，同成個日本國土面積同人口比較，香港嘅情況其實都非常誇張。

不過日本同香港唔同，「米騷亂」發生後，有人要孭飛負責下臺，當時嘅首相寺內正毅同內閣於1918年9月29日集體辭職。亦因為呢件事，日本政治亦邁向另一個時代。

原敬（1856-1921）代替寺內正毅成為第19任新首相，源京係平民出生，佢做過記者、擔任國外交官，之後成為大阪每日新聞社嘅社長，佢亦係日本政黨「立憲政友會」（政友會）嘅創會會員，被日本人稱為「平民首相」，佢亦係一個天主教徒，聖名叫David。

在任期間，原敬組織咗日本第一個政黨內閣，全面實現政黨政治模式，之前嘅日本，政壇係由明治維新之前已經存在嘅各藩主大名嘅後代同勢力所控制瓜分，即所謂「薩長藩閥」政治格局，其實係政治利益分贓，20世紀初，日本民選國會產生，前前後後要經過十幾年時間，加多場大型米動亂，日本先至正式走上自由民主法統議會之路，由此可見，自由並不會輕易得來，既得利益者唔會咁容易退下來，佢哋會同平民百姓磨爛席，所以時間好重要，毅力同耐性更加重要。

大家睇返歷史，自從19世紀60年代明治維新開始，要去到60年之後，日本先至開始行到政黨政治。當然行到政黨政治，民主風氣大盛，唔代表國家一帆風順，之後，由「政友會」主宰的日本政壇，甚至步上軍國主義嘅道路，原來由貴族主宰嘅政治秩序消失，取而代之嘅係民粹同軍人當道，最後帶領日本帝國走上二次世界大戰嘅不歸路，另一個「山後有美麗風景」嘅故事......

舊1000日本紙幣上頭像嘅夏目漱石，曾經咁樣寫過：「在（明治）天皇下葬的那天，我在書房裏傾聽大炮轟鳴，對我而言，它就像為一個世紀的消逝做最後的哀悼。」

明治時代，係一個日本邁出從傳統到現代第一步嘅偉大時代，被譽為「明治的驕傲」，「明治維新」喺世界歷史上一項難得一見的政治成就同奇蹟，不過作為一個寫歷史嘅人，我並唔會誇大明治天皇嘅能力，日本嘅崛起，源於打贏1895年一場「甲午戰爭」，同之後一場「日俄戰爭」，老實講，國力係用無數人命同鮮血換取返嚟。去到1921年，日本已經係世界上最強大嘅四個國家之一（美、英、法、日），同年響華盛頓舉行嘅「太平洋會議」，日本通過廢止1902年嘅英日雙邊同盟，軍事競賽上，船艦噸位同數目限制，日本亦唔同英國傾，而同美國傾，其實當時，響德國未重新崛起之前，日本同美國，先係世界上最強大嘅兩個國家。

「平民首相」原敬於1921年11月4號，響關西出席政友會活動時，在東京站丸之內南口大堂畀一個右翼青年中岡艮一襲擊身亡，終年65歲。佢係繼伊藤博文（1841-1909）之後，第二位喺任內被刺客行刺嘅日本首相，原敬之後，仲有濱口雄幸（1870-1931）同犬養毅（1855-1932）。

今集由中國近代史變咗日本近代史，Sorry！

#常威 #大軍閥平反系列  #大軍閥 #民國歷史

✅本土唯一香港土話近代史文本

❤【常威近代史】第一部《大清亡國關慈禧蛋牛治》，全面開放，免費下載， #freedownload！

Free下載連結🔽

https://play.google.com/store/books/details?id=C3hjDwAAQBAJ

【常公子歷史頻道264回：斷送共和關 名流內閣 蛋牛治】

眨吓眼，距離六月祇有一個月時間，原來足足過咗一年，由去年2019年6月開始，香港進入一場轟轟烈烈嘅逆權運動，社會動盪，香港甚至成為國際頭條，全世界人的注意力都集中喺香港，一年過去，似乎改變嘅嘢並冇太多，中共全面打壓，擺出一副你硬我更硬嘅態度，但係毋需奇怪，中共本身就係一個好硬同唔識轉彎嘅政權，如果佢識轉彎，亦唔會有今日嘅惡劣國際形象。

本來想繼續寫政治嘅嘢，但係我發現自己最近對政治嘅睇法同思維好枯竭好冷感，有時候，甚至唔想睇新聞，因為會令自己唔開心同有小小抑鬱。我唔係厭惡政治議題，但係可能係時候放低一陣，令自己心情平復，再從頭出發，可能會有再深一層嘅體會同埋一啲新嘅見解。

同樣，如果你覺得前路難行，或者睇唔到希望。我建議你不妨將事情放低一陣，唔再去想，亦唔再去諗。即所謂「退一步；海闊天空」，暫時放低唔代表永遠放棄，我哋只係需要時間休息同回氣，作反醒深思，等待自己狀態好番，調整好精神，再重新出發上路，可能對成件事比較好一啲。有時候人嘅抑鬱，就係想得太多，所謂鑽牛角尖，並非每個人都有成為戰士嘅本質，社會上大部分係普通人，普通人需要空間同時間淡化壓力，普通人亦唔係有能力做出超越太多自己精神所不能承受嘅行為同思考，所以喺適當嘅時候停一停休息，並冇錯。

我係一個好喜歡到泳池游水嘅人，如果可以嘅話差唔多每日都游，我記得十幾年前，有一兩個月時間我完全唔想游水，見到水都驚，後來先知道，嗰個狀態叫「厭水」，原來好多「游水嘅人」都經歷過，當你長時間進行某種重複性運動嘅時候，到咗某個階段，就會出現對每日日常訓練嘅強烈厭惡感覺，某程度上係一種心理同生理調節，係進入第二階段嘅身心準備同情緒反彈，只需要慢慢等待情緒回復，你就可以進入另一個新階段。當日我嘅厭水情緒維持咗大概兩個月時間，之後重新落水，一游就係十幾年，直至最近新型冠狀病毒疫情殺到封池為止。

我剋服得了心理，卻剋服不了外在環境，我已經三個月冇游水，今日泳池重開，我選擇第一時間重新出發。

【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上3000訂戶！

https://youtu.be/8pUc-ho0Jjo

【常威近代史】（三百八十一回）

經過咗1918年結束嘅第一次世界大戰嘅慘痛教訓，全世界一眾強國似乎通定思痛，希望歷史唔會再一次重演（可惜偏偏又重演），第一次世界大戰嘅成因，響1920年代，分析家歸結為「沒有限制的近乎瘋狂的掠奪海外領地的競賽」以及「各國秘密簽訂的雙邊條約激增」，尤其是後者，秘密條約令到唔同嘅國家分成敵對嘅陣營，唔同陣營之間嘅互相競爭，令到武裝衝突幾乎不可能避免。

歷史合理性永遠由勝利者所決定，當時強大嘅德國已經被打殘，被逼行上自由民主議會之路，文人政客當道，但德國可以被改變其政體形式，卻不可能被改變其日耳曼高傲民族性、以及其足以雄霸歐洲的基礎工業科技實力（或智力），就算嚟多場二次世界大戰，去到今時今日歐盟一體化，整個歐洲能夠話事嘅人都係德國人，阿叻就係阿叻；歐陸德國人嘅卓越情況，同樣出現喺亞洲嘅大和民族日本人身上，當時嘅日本人響整個亞洲大陸中，的確係出類拔萃，由佢哋倡議大東亞共榮圈，統率全亞洲人邁步嚮前、走向繁榮安盛，實踐東風壓西風，其實邊忽有錯？

精英主義永遠有其合理性，有能力卓越嘅人統治其他能力不足嘅人，本來就係百分百合理，否則有能力不足嘅人作為統治者，所製造出來嘅災難往往會係無法想像（身為香港人一定明白），但精英主義有一個缺點，聰明嘅人同愚蠢嘅人好多時候無法溝通，彼此產生共識、同達成諒解幾乎可以講係無法進行。所以精英不得不把平民當成「賤民」及「奴隸」看待，用個狗籠韞住你、用條狗鏈綁住你、你敢咬人就殺死你，亦都係因為方便管理嘅權宜之策。

現在香港人懷念嘅港英殖民地時代，其實就係奉行精英主義嘅典範，當時嘅殖民地社會有一批上層建築統治階層，平民百姓根本睇佢哋唔到，就算睇到，都唔可以溝通到（因為同鬼佬講嘢要識英文），精英同賤民徹底分隔，因此大家冇政治爭拗，衹要上層建築能夠潔身自愛，進退有度，或者貪得嚟適可而止、又或者保密功夫做足，大家就可以和諧共處，身為賤民同奴隸嘅平民百姓，甚至會懷念精英對佢哋嘅剝削同踐踏，其實講到尾，又係文宣同關公嘅手段。剝削永遠都會發生，問題在於被剝削者是否甘心情願同是否舒服地被剝削踐踏？

遇到渣男港女被氹上床，係一種侮辱；但去到蘭桂坊食到條粗大洋腸，內心就感覺滿足同光榮，甚至永遠記得嗰一晚，佛家叫做，一心開二門。

1920年代，世界上最強嘅國家是美國，為咗增強未來嘅穩定性，美國作為調停人提出，基於上述一戰出現嘅理由，世界各國必須抑壓帝國主義嘅本能，簽訂維持各國之間利益平衡嘅多邊協議，重新建立一個新嘅世界秩序，當時嘅28任美國總統威爾遜（Thomas Woodrow Wilson，1856－1924）牽頭提出成立「國際聯盟」，亦即係聯合國嘅前身，目的就係努力唔比任何一個國家淪爲他國侵略犧牲品嘅最高仲裁機構。

1921年秋天響華盛頓召開嘅「太平洋會議」，就係由美國牽頭，希望為太平洋地區訂立新秩序。之前講過，中國南北雙方都有派代表參加，而日本嘅全權大使就係幣原喜重郎（1872-1951），幣原接受咗當時美國總統威爾遜嘅睇法，同意停止帝國主義國家之間爭奪領土嘅競賽，取消勢力範圍，將會為日本嘅經濟發展創造更有利嘅環境，會上，日本其實放棄咗「21條」所代表嘅高壓擴張主義政策，尊重「中國國家主權獨立及其領土、行政完整」，「太平洋會議」確立嘅新方針其實對日本有重大嘅好處。

就聲望而言，經過巴黎同華盛頓會議，日本再次被肯定佢作為世界上最重要強國地位之一；響商業上，日本企業響不斷成長中嘅中國市場及東南亞地區內，佔有絕對主導地位；喺政治上，日本不單保留咗現有嘅殖民地，而且取得多國對其在《馬關》和《朴茨茅夫》條約上所授權利嘅認可。此外日本亦都得到前德屬太平洋諸島嘅委任託管權，全面接收第一次世界大戰戰敗國德國喺太平洋地區上嘅所有利益，會議後，日本亦決定係中國嘅山東省撤軍。

簡單啲講，用一個大中華膠嘅想法，當時嘅日本係暫時放棄咗武裝侵略中國嘅方針，全面扭轉利用經濟手段侵略中國，佢哋想做19世紀大英帝國對清帝國所做嘅事，同出一轍。未必一定要用武力控制你，用經濟手段一樣可以操縱你。

太平洋會議，以美國為首確立咗全新嘅世界秩序，就係以「自由貿易、公平競爭以促進全世界經濟發展，以及停止帝國主義擴張，世界強國之間應該增加互相合作以維持國際局勢嘅穩定」；至於被強姦嘅中國，會議上亦都聲明必須停止進一步破壞中國嘅領土同埋主權完整。成個局面好似幾好咁，大家講出嚟嘅說話十分好聽。不過大家必須明白，殘酷嘅現實並未因為一次太平洋會議而改變，中國仍擺脱不了被強姦者嘅角色，日本亦都冇放棄過佢哋帝國主義嘅擴張模式，只不過豺狼必需要披上一塊羊皮而已。

同樣道理，作為調停者同中介人嘅美國，何嘗放棄過佢哋嘅資本主義經濟剝削制度？要玩所謂「自由貿易、公平競爭」，最大嘅得益者只會係當時資本主義發展最成熟以及工業基礎最雄厚嘅美國，結果由1920年代開始，一個巨大嘅金融泡沫就畀美國吹咗出嚟，呢個泡沫去到1930年代中葉爆破，產生咗全世界第一場經濟大蕭條，用希特拉嘅講法，資本主義世界幕後金融財閥猶太人黑手，一夜之間將德國人嘅財富完全掠奪，直接導致納粹黨取得政權，同你玩第二次世界大戰，同你老母玉石俱焚！

今集由講日本史變咗世史，Sorry！

#常威 #大軍閥平反系列  #大軍閥 #民國歷史

【常威近代史】（三百八十二回）

回頭翻返去中國近代史，1921年的確係一個轉捩點，中國共產黨成立，新文化運動波濤洶湧展開，舊嘅唔去，新嘅唔嚟。直系奉系軍閥主宰中央政府，中原地帶係民國關公吳佩孚嘅天下，孫文勢力盤踞廣東，日益坐大，大英帝國隨住禁煙令全面執行，喺中國嘅影響力江河日下，大正時代日本暫時放棄武力侵略中國方針，改爲經濟侵略，東三省一帶成為日本人天下，亦直接令奉系張作冧扶搖直上，坐大奉系野心，與此同時，共產主義思潮成為時代潮流，「第三國際」見中國奇貨可居，地緣政治關係，近水樓臺先得月，決定大規模向中國輸出革命，新一頁故事，就此展開。

喺華盛頓舉行嘅「太平洋會議」圓滿結束，西方列強對中國嘅利益分贓亦都傾好曬，日本人大獲全勝。日本亦坐定粒六，決定取代大英帝國位置，要成為中國背後嘅經濟操盤手。12月18號，中華民國大總統徐世昌允許國務總理靳雲鵬辭職，事實上靳雲鵬的內閣，傾向直系利益，張作霖同舊交通系一早想更換佢，靳雲鵬內閣倒臺後，由張作冧扶植嘅交通系首領梁士詒（1869-1933）組織新內閣上場，梁士詒成為國務總理，新內閣上臺嘅第一件事，就係宣佈撤銷對皖系軍閥政客嘅通緝令，變相增加對直系嘅壓力；第二件事，利用軍餉，即係錢，約制吳佩孚雄霸中原嘅部隊；第三件事，又係錢，同意向日本借款贖回膠濟鐵路。

咁搞法，直系當然大表不滿，直系同奉系關係進一步破裂，原本嘅盟友好快變成敵人，而解決紛爭嘅方法亦都好簡單，就係打場仗，決定邊個先係話事人？國民對於新內閣亦冇任何期望，同而家香港一樣，來來去去又係嗰班人，其實嗰個做特首咪一樣？唔想承認都要承認，換咗四件，邊件好睇過？

政治需要新面孔，因為新面孔先可以帶來新衝擊，以及為民眾帶來新希望。我講咗好多次，將來會變成好定唔好？其實冇人知。最重要嘅係你今日相信我能夠為你帶來一個更好嘅未來，氹咗你上船先，話畀你知隻船會載你到彼岸，結果在江中心，隻船入水，大家叫救命，但係已經冇辦法，因為大家已經係同一條船上，被逼攬炒。

正如當日鄧小平要收返香港，同你講「港人治港高度自治五十年不變馬照跑舞照跳」，你信佢，係因為一個希望，並唔係一個放喺你面前嘅現實。又如果你認為一個人或政治家嘅承諾，其影響力可以到達半個世紀之後，你亦未免太天真太傻。喺政治嘅世界裏面，一日都嫌太長，50年承諾，其實係天方夜譚。

我好喜歡用美國總統奧巴馬做例子，2008年金融海嘯，美國經濟仆街，奧巴馬作為第一個黑人平民總統上臺，同你講要大刀闊斧進行改革，給予美國人民一個新希望，當時信奉佢嘅人太多，但八年任期，奧巴馬能夠改變什麼呢？佢並無辦法修補到高度資本主義下金融操作嘅永恆黑洞唔在講，就算係一個惠澤美國低下階層嘅醫療保障制度（Obamacare），亦都係佢離任嘅同時，灰飛煙滅（佢喺我記憶中最大嘅政績係殺死拉登）。今日奧巴馬成為一個電視製作人，拍攝時事節目批評政府，揭發社會弊病。但係當佢擁有最高權力嘅時候佢都做唔到，更何況係現在呢？打飛機永遠都係歡樂嘅，但亦永遠冇辦法繁殖下一代。

1921年12月23日，共產國際代表馬林（Hendricus Josephus Franciscus Marie Sneevliet，1883－1942）抵達桂林，第一次同孫中山會面。6月，馬林嚟到中國，以主導人身份籌建中國共產黨，「國共合作」嘅思維，係由馬林開始，喺佢未見孫文之前，佢已經喺10月上海同國民黨元老張繼（1882-1947）見過面。

馬林喺張太雷（1898-1927）陪同下抵達桂林，佢建議孫文組織一個能聯合社會各階層、尤其是係工農群眾嘅政黨，建立革命武裝核心，創辦軍官學校，老實講，孫文之後所做嘅嘢係馬林教嘅，歷史上冇講到錢嘅問題，但係「國共合作」嘅雛形，就係由「第三國際」泵人泵水，做大你國民黨革命政權，一切都係由馬林同孫文響1912年12月見面開始。

我講過孫文係一個共產主義信徒，第三國際革命理念其實同佢一脈相承，一拍即合亦都唔需要覺得奇怪，而且上集已經講過，大正時代嘅本帝國改變對華侵略方針，一直作為日本代理人嘅孫文，亦都係時候找尋一個新老細注資革命事業，俄共喺個時候忠個頭埋嚟，叫啱曬timing。

會面之後，孫文決定派代表團前赴俄國考察，佢哋當時都傾好，北伐勝利之後就會實現國民黨同蘇俄嘅堅實聯盟，大家齊齊玩共產主義馬克思主義，拯救萬民於水深火熱，無可否認，「國共合作」係一件美好嘅事情，假如孫文冇早死，又假如代替孫文嘅蔣介石係一個馬克思主義者，中國好有可能會提早20幾年進入共產主義時代。

同年12月，仲有一件事要補充下，浙江省蕭山地區發生農民運動，領導人喺中共黨員沈玄廬（原名沈定一，1883-1928），沈玄廬發動農民對抗地主，成立村民代表大會，亦正式組建中國現代第一個農民協會，提出沒收地主土地歸農民所有，出資興辦農民子弟學校，等農民子女有書讀。依一場小型農村革命，亦係中國共產黨農民運動嘅先驅之作，蕭山地區農民運動好快畀政府派兵鎮壓落嚟，強行解散農民協會，逮捕一衆領頭人，事後亦有人死於獄中。

#常威 #大軍閥平反系列  #大軍閥 #民國歷史

✅本土唯一香港土話近代史文本

❤【常威近代史】第一部《大清亡國關慈禧蛋牛治》，全面開放，免費下載， #freedownload！

Free下載連結🔽

https://play.google.com/store/books/details?id=C3hjDwAAQBAJ

【常公子歷史頻道265回：斷送共和關 總統選舉 蛋牛治】

♉時局瞬息萬變，短短幾日，香港又起了翻天覆地的大變化。為咗平反亂局，唔畀好似去年6月嘅事再重蹈覆轍，中央政府藉兩會舉行要替香港立國家安全法，用基本法18保權限，將內容加入附件三，內地國安法直接喺香港使用，5月28號嘅人大表決應該毫無懸念，睇情況，9月立法會選舉前亦都會全面施行。

♈我成日所講嘅大洪水到，亦都真係到咗，讀歷史你會知道，中共係一個唔會讓步嘅政權，你硬佢更硬，況且今時今日亦唔係2003年，香港嘅作用，或者作為國際金融中心對中國嘅影響力，亦遠不及從前；更何況，比起你作為一個顛覆基地，同一個金融中心的地位比較；前者嘅嚴重性，遠遠超越後者。況且，香港作為中國經濟起飛火車頭嘅作用，響21世紀前已經用完，今日中國架火車已經燃料充足，快速嚮前，超英趕美。

🔯作為一個百分百嘅實用主義者，用唯物辯證法思考。香港嘅「顛覆基地」問題始終要處理，實際嘅情況係，當你有利用價值嘅時候，不妨遷就你多啲，但當你利用價值降低嘅時候，就未必要遷就你更多。成件事嘅轉捩點發生響2008年，雷曼爆煲，金融海嘯令全球經濟引擎停上運行，中國時來運到，而且能夠把握機遇，成為最快復甦嘅經濟體系，亦由嗰日開始，中國經濟規模同國力迅速飛騰，起碼拋離咗成個歐洲同日本。亦由嗰時候開始，香港作為中國金融心臟嘅地位，迅速式微，本來存在嘅互相遷就同尊重嘅情況，亦徹底改寫。

♎一國兩制，早已經名存實亡，「國安法」要到，香港亦會為23條繼續立法工作，亦有可能係開天殺價落地還錢技倆，要香港人選擇由內地立法抑或由香港自行立法？兩害選其輕下，於是爭拗已久嘅廿三條順利過關。尋日開始，好多人好驚，但係我唔明驚啲乜嘢？大家所驚嘅國安法出現後所產生嘅問題同埋現實嚴打情況，唔係喺去年至今已經全部出現曬嘅咩？行雷閃電，閃光會俾雷聲早到，因為光速快過音速，實際上洪水一早到咗，現實早已經發生齊全，現在出現嘅問題，只係文本上嘅修補工作。

♍曾俊華話齋，自保時代開始，希望在明天，變幻才是永恆，不要怕，亦冇得怕，香港人「真係乜嘢風浪未見過？」，共勉之。

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上3000訂戶！

✅https://youtu.be/lEM9B6gyN-Q

👉最新上架⏩【常威近代史】第四部《霹靂大忠臣對決無敵大買辦》Round One
https://play.google.com/store/books/details?id=Np3PDwAAQBAJ

【常威近代史】（三百八十三回）

人年紀大咗，就會囉嗦，真係冇錯！又要講多次，以為太平盛世係常態，其實錯X到仆街，混亂同紛爭先至會係常態，香港人好幸運，能夠喺歷史夾縫上坐上一條長達半個世紀嘅太平盛世號，所以以為坐喺度發達享福係正常，其實睇返歷史，香港嘅情況好少見。

1921年結束，1922年整個中國進入激烈鬥爭嘅年代，首先1月1號，就由天津一場大示威開始，五萬人上街抵制日貨遊行；1月2號，香港華商銀行響紐約開幕，成為紐約第一間華資銀行，香港人威威，成個1月都係屬於香港人。

因為1月12號，喺海員工會組織下，香港海員舉行大罷工！香港海員工會成立於1921年3月6日，會址香港德輔道中137號3樓，1月9號，海員工會向英國雇主提出三個要求，第一增加工資；第二公會有權介紹海員就業；第三工會有權派代表簽訂勞工合同；英國人當然睬你都生臭狐，於是海員工會於1月12號下晝五點舉行大罷工，所有從香港開住廣州、江門、梧州、澳門等地船隻，以及開往英國、法國、美國、日本、荷蘭海輪上嘅中國海員1500人相繼罷工，90艘輪船因此停滯喺維多利亞港。

同香港現在嘅情況都一樣，你有你罷，你有你搞，我就係唔X會同你埋檯傾，一個星期後，罷工人數由1500人增加到6500人，2月頭，參加罷工海員有二萬人，滯留喺香港嘅船隻有116艘！香港殖民地政府仍然當無件事，繼續拉人封艇，企圖用暴力手段鎮壓罷工，2月27號，即係罷工開始個半月後！工運進一步升級，海員封鎖珠江口，阻止糧食進入香港，十萬工人支持海員，響應罷工，罷工罷市，全香港生產陷入停頓，商店關門，交通斷絕，整個城市陷入癱瘓狀態！

團結就係力量！

海員工會亦同孫文息息相關，領導罷工嘅海員工會代表蘇兆徵，本身係同盟會會員，1920年底開始，孫文籌組廣東護法政府，思想全面左傾（雖然係本身根本就係左），孫文亦鼓勵早前參與或支持中華革命黨嘅香港海員加入國民黨。海員工會就喺孫文鼓舞下成立，由孫文命名「中華海員工業聯合總會」，親筆提字工會招牌。海員工會分別在廣州同香港登記註冊。會長陳炳生、副會長蔡文修等領導層全部係國民黨員。

其實場大罷工，係有廣州革命政府support，我唔知道同12月孫文喺桂林見過馬琳有冇關係？總之共產黨就係搞工運起朵，同今日共產黨抑壓工人運動完全唔同玩法。而且罷工點會玩得起？因為有糧出！當時工會向罷工海員派發每人每日4毫5仙到1元的生活費，總罷工期間，仲有唔少人離開香港返廣州串聯。

✅本土唯一香港土話近代史文本

❤【常威近代史】第一部《大清亡國關慈禧蛋牛治》，全面開放，免費下載， #freedownload！

Free下載連結🔽

https://play.google.com/store/books/details?id=C3hjDwAAQBAJ

【常威近代史】（三百八十四回）
理解一個字就足夠：「窮」

1922年1月26號，中華民國北京中央政府發行國債9600萬元，用嚟償還各項債務同利息開支，年息達到八厘。中央政府缺錢亦唔係一朝一夕嘅事，由1911年辛亥革命開始，到咗1922年，仍然係以借貸度日，而且用債冚債，正所謂債臺高築，十個煲得一個蓋，唔死有鬼。

情況同今日亦都一樣，國家冇錢怎麼辦？唯有發行國債集資找數，即係話印銀紙，又如果，#印銀紙可以解決問題咁個世界根本無問題，今日，睇見陶傑先生一篇文章講得好好，佢咁講：

「就是只一條出路：無限印鈔放水。既然出口下滑，外匯短缺，政府缺錢，只能發行無息國債，讓中央銀行來買。由央行購買政府的債務，轉印為貨幣，亦即政府的負債，變成央行負債。此亦即美國市場經濟學家佛利民之「直升機撒錢」（Helicopter Money）政策。此可導致進一步流入泡沫資產：股票、房地產、古董，持有以上資產者，下一輪會升值得眉開眼笑。」（註）

現在全世界嘅情況，同當日中華民國面對嘅困境一模一樣，如果覺得太複雜，理解一個字就足夠：「窮」。

政府每年要用巨大開資、又爭人周身街數，又冇辦法製造足夠嘅財富找數，於是祇有再借，因為你已經夠窮，信用唔好，抵押品亦唔夠，於是只可以借高息大耳窿，債冚債，數冚數，無休無止，安信兄弟同UA都撐唔到你。銀紙印得越多，就會變得越嚟越唔值錢，擁有資產嘅資本家及財閥，就會第一波直接受益於印出嘅新銀紙，製造資產泡沫，結果貧者越貧，富者越富。資源、生產工具及資本會愈嚟愈集中喺更少數人手上，造成更大嘅壟斷同不公平現象，所謂自由市場競爭機制明存實亡，一般平民向上流動機會更小，財富集中代表權力集中，極權統治出現，某程度上係政府印銀紙嘅後遺症，如果冇民主議會機制監察嘅話，後果只會更加嚴重，極權步伐只會行得更快。

歷史一早已經話咗畀我哋知，咁樣做（即印印印）嘅效果會係乜嘢？銀紙印得越多，資本同權力就會更加集中，政治就會更加封閉，極權變為常態，極權主義就會產生帝國主義（imperialism），本來個人化自由商業經濟競爭，變成政治巨大寡頭之間嘅嚴重對立同鬥爭，因為生產鏈全球化，冇人或國家主權可以自主獨立，被逼要跟隊，冇所謂中間排、冇所謂溫和派、亦冇所謂第三或第四勢力制衡其他對手，而且經濟大災難降臨，你唔係我嘅敵人就係我嘅盟友，最後衹能夠選擇你死？或我亡？戰爭就係咁樣發生。

細讀歷史，大家就會明白所謂打仗，其實並非純粹意識形態衝突嘅問題，而係經濟嘅問題。mean小小去講（非學術性表述），意識形態只係慫恿平民上戰場掘地雷嘅文宣口號，你信？就Ok。

去返20年代嘅中國，中華民國中央政府貧窮，國民更加貧窮，經濟問題變成政治問題，點解咁多人信馬克思同分離主義？窮囉！非常簡單！今日香港點解咁多人不滿政府？不滿中共？窮囉！非常簡單！香港人一向做慣大爺，坐響度收錢，要我做跟班睇你頭？而又冇啖好食，梗係唔妥喇，駛問？

Hongkonger要我講，我都唔知點講？

一邊警暴拉人，嚴刑峻法或乾脆放棄法治為求穩定社會局面，搞埋意識形態文字獄，白色恐怖全天候打壓自由。理應大部份香港人會感到非常抑壓同對前景失去信心。但係好奇怪，個股市無跌，仲撐住2萬4，第一號紅頭大股0700騰訊日日升頂住個雞天，市民唔買滙豐保值改買騰訊，食力中資股搞IPO，次次過百億入飛？十個市民五個有份。

對住部電視電話呼天嗆地，哀嘆香港就快淪陷就快仆街，但轉頭又排隊睇樓，睇下有冇平貨執或上車？結果樓市不跌反昇？究竟係一個乜嘢玩法呢？我其實唔明。（我亦不得不承認，社會上的確係有太多偽善嘅黃絲）

到底係唔係其實香港已經完全撕裂成為兩個階層？即貴族階層同平民階層？前者不受政治議題約束同影響，只玩金錢遊戲；後者表面上好似好多人好大聲，但其實響成個金錢pool裡面，手握嘅資本只係佔極少數，對經濟大局毫無影響力。

我想舉一個例子，疫情期間馬照跑，全香港投注站關閉，馬迷入唔到去買飛，投注額理應大幅下降，但係條數出嚟，投注額只係微跌5%左右？咁即係點呢？咁即係話你知平民百姓投注額只係屬於小數，係雞仔注，理論上關閉全香港投注站都仲得！人多唔代表有經濟實力，同香港目前展現出嚟嘅現象好相似。當然關閉全港投注站，又會對商鋪價格造成嚴重影響，其實唔可以咁做（一笑）。

更加奇怪嘅係，喺香港，大部分被剝削得最深嘅低下階層反而係最擁護政府；而又有響貴族階級邊緣掙扎嘅中產階級，係最多人反對政府，我只可以講一句：「大家有小小精神分裂病徵」。

玩政治玩意識形態，最高境界係玩到似有若無，我中有你，你中又有我，一方面係最好嘅朋友，另一方面係最大嘅敵人。最後嘅目的係為咗撚化嗰啲自以為有智慧嘅知識份子（好似我常公仔依亭苯七），令佢哋無所適從，變成吳啟華彈出彈入，以為自己知，其實完全無知，結果變成陰陽怪氣，唔藍又唔黃，咁就可以化解佢哋嘅文宣威力同響社會上對平民百姓嘅意識形態影響力，民間意識形態無法築構成型，反對力量就無法形成，咁就祇有follow up官方統一口徑嘅意識形態表述，明白未？

好高架，有的確係深咗小小。

註：https://www.cup.com.hk/2020/05/15/us-china-hong-kong-chess/

#常威 #大軍閥平反系列  #大軍閥 #民國歷史

😎【碌葛男人嫁得過】

https://play.google.com/store/books/details?id=e1N7DwAAQBAJ

❤download電子書，可以救地球