大清亡國關慈禧蛋牛治 2

【常威近代史】（四百二十二回）
La casa de papel紙房子現象

中國近代史上的描述通常是，自袁世凱死後，中國進入所謂大混亂嘅「軍閥時代」，而軍閥時代就係一班仆街軍閥大混戰，結果中華大地被戰火蹂躪，民不聊生，死好多人……（下刪十萬字），但睇翻轉頭，所謂軍閥時代大混戰，撇除大部份小規模嘅地區武裝衝突外，大概是指兩場大戰役，分別係1920年的「直皖戰爭」，同1922年嘅「直奉戰爭」。

兩場戰爭，分別係直系軍閥曹錕同吳佩孚聯同奉系張作霖打倒原來皖系段祺瑞，以及之後直系將奉系張作霖勢力趕出關外，獨攬大權。其實簡單啲講，就係直系曹錕通過兩場戰爭，成為中華民國最高權力擁有者，係一次權力交替，總之曹錕個總統位並唔係買返嚟，而係明刀明槍打返嚟。曹錕賄選，只不過係最後門面功夫，只不過係想維持「法統」形式，保住個中華民國議會制度存在，其實唔算打茅波。

我成日都講，無論係曹錕、抑或段祺瑞、或者張作霖、加埋吳佩系，四條蛋散，以佢哋當時擁有嘅軍事實力，隨時建立一個軍政府取代北京中央其實有何艱難？在當時中國，個個軍閥都咁做，割地稱王。但大家可以睇到，四大軍閥蛋散，無論先後都冇咁做過，佢哋只係想喺幕後操縱一切（撈權撈水或者作為代理人為主人服務），或者投入體制正式撈返個總統做過吓癮，自己還自己，中華民國還中華民國，從來冇將中華民國同自己合而為一，「朕即國家」、「黨國合一」嗰套，四條蛋散智慧有限，真係識條鐵？

成日話鳩班軍閥係獨裁者嗜血者，其實佢哋根本唔卵係，1923年之前，獨裁者根本未出現過，嗜血者亦未被嚴酷鬥爭同仇恨製造出嚟。最好笑就係，係由真正嘅「獨裁者」將成班北洋軍閥變成「獨裁者」，目的係要為畀全國人民知道，「獨裁者」本身並唔係「獨裁者」。

呢一招幾好用，叫做惡人先告狀，先下手為強。最近有套西班牙劇大紅大紫叫「紙房子」（西班牙語：La casa de papel，英語：Money Heist），劇中一班惡賊攻入西班牙鑄幣廠印銀紙自用，佢哋有個理據，就係點解自己印銀紙就係犯法？而國家印銀紙就係合法？大家都係開機印銀紙啫？而且國家印銀紙嘅量，係佢哋嘅數以百倍千倍，咁唔係「竊鉤者誅、竊國者候」又係乜？

紙房子現象蔓延全球，其實好多人心中都明白真相係乜嘢？瘋狂開機印銀紙話挽救經濟，但印出嚟嘅銀紙，首先挽救咗一大班上層建築資本家既得利益集團，上肥下瘦之餘，再製造新一輪資產泡沫，普羅大眾所得到嘅利益少之又少，反而儲蓄同棺材本不斷貶值，得不償失。

又兜遠咗，講返1920年嘅直皖戰爭，時間由1920年7月14號打到23號，前後打左10日時間；1922年嘅直奉戰爭，由4月28號打到5月5號，只係打咗7日咁大把？唔好同所謂第一次世界大戰同第二次世界大戰比較勒，就算同1895發生響中國嘅「甲午戰爭」或1905嘅「日俄戰爭」相比，根本亦係「蚊形戰爭」。而且兩場軍閥大戰，都係以陸戰為主，交戰嘅區域亦都只係集中於華北平原一帶，我最近睇一本書，有以下嘅描述：

「軍閥之間的作戰方式也不像真正的戰爭那樣你死我活，西方觀察家發現仗打得半心半意，這樣描述道：穿灰色軍裝的士兵們走到戰場上，停下來，四下望望，然後不緊不慢地放幾槍，有時也發幾炮，但少有擊中目標的。傷亡數字遠不能跟西方戰爭比較，這可從一個細節看出：有的軍隊雇傭苦力抬著有限的棺材隨軍而行，為的是告訴士兵們，要是不幸被打死，他們的屍體會得到體面妥善的埋葬，這對中國人是至關重要的事。將士們隨身攜帶的，還有其它要緊的東西，如像個人的小茶壺以備沏茶、還有鮮豔的蠟紙雨傘。天上一開始飄雨，戰鬥就會停止，雨傘紛紛打開，戰場立刻變成五彩繽紛的蘑菇園。這樣的軍隊，卻要面對孫中山正在蘇聯人指導下組建的戰爭機器……」（註）

軍閥時代嘅戰爭形式，晒馬多於肉博，就好似香港嘅黑社會講數，一有爭拗，就大家吹雞晒馬先，好少話一開始就動刀動槍揾命搏，畢竟血酬成本實在太高，而且血酬一旦加深，就大家都冇得返轉頭。你呃我錢攞我哋盤或者溝埋我條女，條仇恨記半年都嫌多；相反如果你殺咗我老竇，咁就叫血海深仇，仇恨會記一世，甚至跨代承傳（武俠小說都有講）。

所以由一開始就唔可以輕易殺人，就唔可以隨便開槍，打到你變豬頭一件事，送你上法庭受審亦可以，但千萬唔可以「無罪推定」殺人，「血酬定律」係一條界線，彼此一旦越過咗，就會打開地獄之門，之後就會真係血流成河。

今集嘅結論係，所謂軍閥時代嘅大混亂其實並唔係太混亂，所謂傳說中連場血流成河嘅戰爭亦根本唔存在，一切皆是後人老作，一切皆是後人抹黑，要千方百計要大家認識一個虛構嘅歷史觀，要將一切最衰最邪惡最醜惡嘅事情推曬響一衆軍閥身上。從來抹黑他人，只不過要爲自己洗白——史筆在我手，權在我手，個龍門當然任我擺，你見最近歐聯歐霸巴塞隆拿輸8:2，曼城輸3:1，曼聯被反cup2:1，唔通你仲唔明白個龍門響邊？唔通你仲唔明白歐洲嘅經濟狀況真係非常惡劣？唔明我講乜？OK，無知永遠是福氣。

註：張戎著：《宋氏三姊妹和她們的丈夫》，臺北，麥田出版，2020，P116-117。

#常威💀 #大軍閥平反系列  #大軍閥 #民國歷史

【常公子歷史頻道300回：斷送共和關 軍閥時代 蛋牛治】

♉我嘅常公子近代史Youtube頻道，不經不覺連載到300回，第300回亦係一個新系列嘅開始，袁世凱已死，中華民國失去強人，亦失去棟樑，一衆大軍閥粉墨登場，「替大軍閥平反系列」正式啟動，多謝大家繼續捧場！我希望能夠做落去，能夠寫落去，直至劉少奇主席嘅骨灰送到其妻王光美手上為止，1979年……

♑同袁世凱蓋棺定論，其實佢係一個好人，如果我哋界定好人嘅定義，係佢生平做好事同做壞事嘅比例，咁袁先生係七三開，甚至八二都不足為過，後世人抹黑袁世凱同抹黑慈禧太后一樣積極，我唔知道點解？可能制度內嘅正規公務員就係箭靶，響制度旁邊企圖奪權同想推翻制度嘅人往往先至係英雄，世事就係咁樣。維持穩定嘅人，往往承受惡名，製造混亂嘅人通常聲明甚佳。

♑當然製造混亂嘅激進者，如果最後奪權成功，佢哋就會變成維持穩定嘅保守派，新一批激進者就會出現挑戰既定跌序，世事不斷在循環。情況有一個例外，除非你早死，好似孫文一樣死得合時，咁你就會永遠成為英雄。年輕人傾向夢想，年老嘅人注重現實，亦係理所當然，激進同保守兩股勢力不斷拉扯，就促成咗歷史巨輪不斷前進的偉大能量，即係人間常態。

⛎新型冠狀病毒衝擊全球，唔單止係香港，世界上好多地方都出現反政府思潮，理由各有不同，或反抗極權或因種族主義或因經濟問題，大家都走上街頭，企圖改變自身處境嘅不幸境況。可以預料，未來10-20年整個世界都會動蕩不安，激進同保守嘅勢力會響世界上唔同嘅地方發生衝突同矛盾，人類係一種被情緒主宰嘅動物，其實好容易失控，第一次世界大戰同第二次世界大戰嘅爆發就係好例子，經歷咗70年嘅和平盛世，似乎大家都已經忘記咗戰爭所能夠帶嚟嘅巨大傷害和痛苦……

♋不過重申，我永遠對人類嘅智慧抱住信心同希望，我哋同動物唔同嘅地方，除咗我哋有語言文字，仲有我哋遇到紛爭嘅時候，未必一定要用打交解決，可以使用和平協商嘅手段解決矛盾。佛家有云：『一心開二門』，凡事並唔係祇有一條出路，凡事亦唔係祇有一個方法可以解決……

♑【常威近代史】第五部《霹靂大忠臣對決無敵大買辦》Round two電子書上架（條download link在下面），請大家課金支持我一直走落去，直至劉少奇骨灰到達北京王光美手上…

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上4000訂戶！

✅https://youtu.be/jBfFshTiPDs

✅本土唯一香港土話近代史文本

❤【常威近代史】第一部《大清亡國關慈禧蛋牛治》，全面開放，免費下載， #freedownload！

Free下載連結🔽

https://play.google.com/store/books/details?id=C3hjDwAAQBAJ

【常威近代史】（四百二十三回）
大矛盾中有小矛盾 小矛盾中有更小嘅矛盾

1923年11月，曹錕雖然通過合法途徑登上中華民國大總統位置，但國內民情同輿論都唔buy佢，認為佢係建立軍政府，係軍人干政，事實上亦冇錯，11月13號，吳景濂（1873-1944），依一位曾經四度出任國會議長嘅民初政壇重量級人物，下令關衆議院大小議場，繼續向曹錕政權施壓，不過曹錕並冇拉佢坐監，唔符合「法統」原則嘅事，其實曹錕好少做。

如果曹錕真係想建立一個軍政府，玩專制獨裁，其實亦都好簡單，衹要將反對者全部拉曬去坐監就可以，何必留低佢哋同自己玩嘢？北京嘅政局，亦係呢種混亂同拉扯嘅狀態之下，繼續經營，咁，你覺得有冇前途呢？

11月15號俄共政府駐華代表加拉罕照會外交部，表示俄共願意一如美國一樣，退還所有庚子賠款，將全部撥歸中國教育經費。當其時，北京中央政府嘅財政已經陷入崩潰狀態，完全冇錢，之前講過，政府拖欠大量公務員同教育工作者嘅薪金，整個教育系統面臨崩潰危機，教育總長職位懸空未補（冇人愿意孭飛），至11月，北京八間國立大專院校經費已經積欠九個月，教職員生活陷入絕境，13號北京大學校長蔣夢麟（1886-1964）致函俄共代表加拉罕，要求俄共放棄庚子賠款，用於發展中國教育，並將一部分撥作八間大專院校嘅營運經費同成立基金。

加拉罕一口答允，但你肯比，人哋未必肯收，18號，北京政府反對依個建議，同日北京八所國立大專院校同時關閉。如果你問我，點解當時中國嘅知識份子都會左傾，愛上共產主義，從上述嘅事件應該清楚明白。

毛主席講得啱，世界上冇無緣無故嘅愛，亦冇無緣無故嘅恨。至於蔣夢麟有冇同加拉罕扯貓尾我哋唔知，不過現實嘅情況就係，大學教授知識份子繼續冇糧出，日日坐響屋企食屎，又冇工返，自然會攞起支筆寫文章，攻擊政府宣洩內心不滿，其時輿論陣地全面左傾，曹錕有責任。所以有人話，其實曹錕智慧並唔高，甚至有啲「戇直」，即係「戇鳩」，又啱。

補充一點，操縱輿論操縱媒體（報刊雜誌）玩意識形態，當時係新鮮事物，對好多人嚟講完全陌生（到今日都係），所謂民情民意，或民眾嘅意識形態（想法），對一群由大清帝國過渡到民國嘅老古董軍政人物，好多人根本毫不在乎，佢哋以為民衆有啖飽飯食或用槍指撚住佢哋個頭，就會聽教聽話或聽你老點。但時代嚮前行鳥，好多人已經識字讀書受過高等教育，餵飽佢哋已經唔能夠滿足佢哋嘅所有需求，而警告佢哋佢哋又唔撚驚，況且個大前題係，亦冇人有能力餵飽民眾囉。（都冇水…）

既然你又冇錢餵飽民眾？又唔敢亂拉人開槍亂殺人？咁就用第三種方法控制民眾，就係要控制佢哋嘅意識形態，要向民眾灌輸一套理論同講法，要民眾真心相信你，願意為你挨餓，願意無償為你上戰場掘地雷，做得到，你就天下無敵。

11月18號，陳炯明所屬嘅各路兵馬，以惠州為基地，攻佔博羅、石龍之後、猛攻孫文嘅根據地廣州.....

11月24號，中國共產黨響上海召開三屆一中全會，主要討論加入國民黨及幫助國民黨改組嘅問題。陳獨秀、李大釗、羅章龍、蔡和森等八人參加會議，毛澤東、譚平山、朱少連因事未能出席。會議上討論並通過咗《國民運動進行計畫決議案》，指出中共要努力站喺國民黨嘅中心地位，並且響國民黨內組建黨中有黨嘅「黨組織」，從而矯正國民黨嘅政治觀念，影響同支配其行動嘅方向同埋政治方針，令到日後共產黨真正成為國民革命嘅政治領導者，使國民黨成為無產階級領導下嘅統一戰線組織同夥伴。

對於中共黨員加入國民黨嘅具體方法，《國民運動進行計畫決議案》亦規定，凡有國民黨組織嘅地方，例如廣州、北京、天津、湖北、上海、四川、山東等地，中共黨團同志一併加入其中。經過今次三屆一中全會，「第一次國共合作」基本框架完成。

但係國民黨內，亦有大量右翼成員存在，11月29號國民黨右翼聯名上書孫文，反對改組國民黨，並且大力批評共產黨玩滲透（你估我唔知咩？）。但孫文咁樣回應：

「我國革命向為各國所不樂聞，故常助反對我者，以撲滅吾黨…所望為同情，衹有俄國及受屈之國家受屈之人民耳。」

一句到尾，西方一眾列強唔buy我，唔肯科水，依家就祇有俄國共產黨肯出錢出力出人支持我孫文翻盤，請大家收嗲唔該，國民黨內右翼分子受到孫文批評，暫時緩和咗積極反對改組嘅態度。當然國民黨右翼力量並無消失，暫時韜光養晦，等待日後先同共產黨死過。

毛主席講得又啱，大矛盾中有小矛盾，小矛盾中有更小嘅矛盾。凡事放任自由，就會分裂落去，大黨中有小黨，小黨中有派系，派系中有權力鬥爭……人類畢竟係自私嘅動物，只會從自己嘅利益角度出發，呢個似乎係永恆解決唔到嘅問題。

11月29號，蔣介石所率領嘅「孫逸仙博士代表團」離開莫斯科，結束咗為期三個月嘅黨、政、軍考察。蔣介石係由日本軍事系統所訓練出嚟嘅軍人（有序），現在去埋莫斯科學習紅軍打仗嘅精髓（無序），真正兼具兩家之長，打通任督二脈，繼袁世凱之後，中國另一個軍事強人醞釀橫空出世……

#常威💀 #大軍閥平反系列  #大軍閥 #民國歷史

【常威近代史】（四百二十四回）
廣州一帶我大曬我玩曬

第一次國共合作，響一個充滿矛盾嘅環境下展開，大家都知道係互相利用關係，雙方各自利用對方嘅資源完成自己嘅政治目的。國民黨孫文固然要藉助俄共嘅資金同兵力終極翻盤，否則以佢當時嘅實力，就連廣東省內「烟哥」陳炯明嘅勢力都未必打得低？而中共加入國民黨，即要利用國民黨基本盤壯大自己實力，中共於1921年先建黨，響中國嘅新興政治版圖上係後起之秀，但政治勢力同黨員人數響幾年間高速增長，亦都係要多得1923到1926年幾年之間嘅國共合作時期滋養。

馬後炮，事後睇返，其實第一次國共合作係雙贏win win局面，國民黨固然唔洗講，北伐大成功，掃蕩中原吳佩孚勢力，打到去上海，佔領呢個亞洲財金基地大錢罌，從此飛黃騰達一朝富貴，蔣介石升上神枱，翻雲覆雨中國政治五十年；但中共亦響合作中成功坐大自己，由一個小政黨變成一個黨員遍佈全國嘅巨大政黨，最重要嘅係，馬克思主義共產主義思想進一步蔓延全國，信徒激增，為日後取得最後勝利打下深厚基礎。

其實唔同政見嘅政黨互相合作，響現代民主議會政治中，亦係常見嘅事。好多時候大選勝出嘅執政黨響國會唔夠議席，就要同其他政黨組成聯合政府施政，即所謂政治分贓。第一次國共合作，就係一次成功嘅政治分贓，只不過後來有人過橋抽板，先搞到一鑊泡。

其實戰爭冇所謂邪惡之分，戰爭有結果後，自然亦有正邪之分（贏咗就正，輸咗就邪）；基於觀點與角度相異同利益，每個人都有發動戰爭嘅理由，真理只會站在自己一方，亦都唔使爭拗。反而有時候要搵出戰爭責任，就係要睇邊個首先打第一槍？國共之間延綿二十多年嘅嚴酷鬥爭出現，係由國民黨蔣介石打第一槍先，就一定。

1923年12月，中華民國喺一片混亂之間繼續嚮前行，12月2號，孫文響廣州發表演說，題目係《欲革命成功，必須人人信仰三民主義》，應該響鮑羅廷指導下，意識形態擺上第一優先，有咗信仰先去打仗零舍醒神，響當時中國係全新嘅玩法，之前嘅人當兵，通常為咗搵份工有糧出，以此為大前題，所以可以跳槽轉工，東家唔打打西家，之前「直皖戰爭」同「直奉戰爭」兩場內戰，上述情況經常發生，陣上倒戈，屬家常便飯。

但有意識形態信仰嘅士兵，真信定假信另一回事，但倒戈嘅機會率亦都較低，最重要嘅係意識形態可以當飯食，出糧少啲又得，條大數先襟計！

不過講開又講，其實好多戰爭都需要意識形態包裝，「反清復明」、「驅除韃虜」係一種意識形態，十字軍東征以上帝之名驅逐異教徒出耶路撒冷，「光復香港」難道唔係意識形態？20世紀之前，或者係實用戰爭大師拿破崙出現之前，「宗教」係一種最重要嘅戰爭意識形態包裝技術，但19世紀之後，科學文明出現，「宗教」再難以成為民眾所服用嘅唯一一種鴉片，於是毒品嘅種類不斷增多，你唔食可洛英，可以試下揩冰或大麻喎。（總有一隻呃到你心甘命抵上戰場掘地雷嘅…）

12月18號，北京眾議院會場上，又發生兩派議員全武鬥，上月7號，支持曹錕嘅「保定派議員」，以議長吳景濂任期即將屆滿為理由，掀起倒吳風潮，反曹嘅吳景濂關閉會場，停止開會。

本月1號，吳景濂召集眾議院會議，但反對派議員雇用車伕、乞丐、黑社會等1000多人組成「公民團」（其實呢一招用咗幾多次呢？）堵塞眾議院會場門口，阻止議員入內開會，拖到18號，會議先可以展開，吳景濂仍佔據議長席，反對者激烈反對，用墨盒扔到吳景濂頭部爆缸，兩派議員大打出手，上演全天候武鬥，吳景濂立即調集院警入場，毆傷反對派議員多人，並且將部分議員囚禁於密室，19號，反對派下令撤換眾議院院警，並強烈譴責吳景濂粗暴鎮壓議員，21號，吳景濂攜帶衆議院案券及賬簿潛逃天津。

真係亂過亂世佳人，玩法統，如果唔識玩，可以玩到好亂，當時嘅中華民國就係唔識玩，冇人管嘅馬騮，真係會周圍走同咬人。

12月24號，孫文以中華民國軍政府名義發表關於粵海關關餘（即係出入口關稅結餘）問題，情況係咁，廣州大元帥府同北京外交團一直就粵海關關餘嘅問題交涉，11月23號，貧窮嘅孫文為咗籌備軍費，命令大元帥府外交部照會北京外交團，要求將粵海關關餘撥還廣州政府，否則自行提取，簡單啲講，即係「搶」。

北京外交團聲言如果廣州政府強行奪取海關關餘，將會採取強硬手段對付，同時派出20艘軍艦駛入珠江，向廣州軍政府示威，大元帥府復照北京各國公使團，稱截留關餘完全係中國內政問題，不容許外國干涉，而且認為北京中央政府乃係直系曹錕所控制嘅傀儡政府，列強不應該要求將粵稅上邀中央，廣州政府享有管轄境內關稅權利。

孫文平安夜發表嘅宣言，嚴正抗議列強以武力壓制廣州政府，而且認定北京政府為非法政府，根本冇權利處理廣州境內任何事務。國父亦都講到明，廣州我大曬我玩曬，亦由嗰日開始，廣州民眾開始迎接孫文嘅獨裁統治，真係一殼眼淚，以後大把故事講。

同年12月，位於上海嘅0005滙豐銀行大樓竣工，前後用咗兩年時間，耗資1000萬餘元興建，當時被認定係從蘇彝士運河到遠東白令海峽最華貴嘅建築物，位於上海外灘12號，係外灘佔地最多、門面最寬、最為壯觀嘅地標，屹立至今。

#常威💀 #大軍閥平反系列  #大軍閥 #民國歷史

✅本土唯一香港土話近代史文本

❤【常威近代史】第一部《大清亡國關慈禧蛋牛治》，全面開放，免費下載， #freedownload！

Free下載連結🔽

https://play.google.com/store/books/details?id=C3hjDwAAQBAJ

【常公子歷史頻道301回：替大軍閥平反系列之 #黎菩薩】

♉堂堂正正開始常威近代史嘅軍閥時代系列，呢個系列會係相當漫長，估計會有100回，當中論述嘅時間，由1916年袁世凱死後，直至1923年國共第一次合作終結，內裏橫跨左大概七年時間，依七年時間相當重要，喺中國近代史嘅描述上，就係所謂軍閥時代，一群萬惡無恥嘅醜陋軍閥互相爭鬥，令神州大地民不聊生，人民活於水深火熱，但真實情況究竟又係唔係呢？等我常公子娓娓道來。

♊呢段時間中華民國嘅國旗係「五色旗」，一支被人遺忘的共和國國旗，涵蓋一個被遺忘的時代，五色旗上嘅五色，代表五族共和，亦代表咗不同嘅思潮同勢力互相競爭，共同企圖找尋出一個求同存異嘅共和政治體制，大家都知道，追求共和、追求共識、求同存異，最後係失敗收場，中國人似乎永遠冇辦法大家坐低好好傾，以協商談判嘅手段解決問題同紛爭，或達到和平。最後必須以武力解決，「槍桿子出政權」，從來沒有例外。

♐問題當然亦唔係單單發生係中國人身上，世界上大部份政治問題，其實最後都係用武力去解決，有啲係你睇得到嘅武力，有啲你根本從來睇唔到。但事物嘅本質，又可以用文宣、理論、宗教、信仰去粉飾太平，任何東西，皆可以被包裝成另一種全然不同嘅東西，只要民眾相信同buy就可以，所以到最後，千頭萬緒可能只係關公問題，做好關雲長，萬事皆可。

♐現代世界，外國人比中國人做得好嘅，就係文宣同包裝工作，結果往往，道德高地都被西方人優先佔據，中華人民共和國作為一個意識形態政權大國，其實意識形態方面做得並唔夠理想，用現代時尚講法，係「軟實力」唔夠，未來一段日子，如果中國唔好好搞好軟實力嘅問題，相信會被全世界進一步孤立，當然上述呢種咁籠統嘅講法，其實一啲意思都冇，好有可能11月美國總統大選之後，成個世界格局就會全然改寫。

⛎過去四、五年，我對歷史有另一層體會，「人嘅意志」的確係好重要，唔同人上臺，就有唔同嘅一番景象同故事，所以用人做出發點去睇歷史，其實完全冇錯。

♑【常威近代史】第五部《霹靂大忠臣對決無敵大買辦》Round two電子書上架（條download link在下面），請大家課金支持我一直走落去，直至劉少奇骨灰到達北京王光美手上…

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上4000訂戶！

✅https://youtu.be/jzXrTs7OfYo

【常威近代史】（四百二十五回）
中國國民黨第一次全國代表大會

1923年12月，由明星電影公司出品嘅故事片《孤兒救祖記》響上海公映，引起轟動，呢部默片鄭正秋編劇（唔係鄭少秋），張石川導演，係一部帶有道德教育意義的倫理巨片，由年僅20歲嘅黃漢倫出演女主角，佢成功塑做咗片中忍辱負重的中國女性形象，因此成為中國首位電影女明星。與此同時，上海的電影事業，亦開始進入黃金時代。

同一個月，徐志摩、胡適、梁實秋、聞一多等文學家響北京成立「新月社」，呢一個係一個非常重要嘅文學團體，「新月社」響文學創作上追求唯美主義同浪漫主義，追求純粹嘅藝術層次，積極創作新詩，響政治主張上，佢哋宣傳西方嘅人權自由及民主價值，反對「盲目暴力革命」，屬於右派，親美派，同當時大行其道嘅左派文學親蘇派，分庭抗儷，不單係文學上，當時整個中華民國每個生活層面，都有左右之分，邊個話意識形態唔重要？其實每個人都活於識形態之中。

到咗今時今日中美之爭，推根究底，又係「共產主義」同「資本主義」意識形態鬥爭留低落嚟嘅尾巴，當然實際上已經冇人行共產主義，其實大家都玩資本主義（不過玩嘅方法唔同），但係門派上依然係左右對立，有你冇我，中間有一段長時間無媒苟合，大家叫做渡過蜜月，快樂過開心過，但係喺埋一齊嘅時候始終冇辦法改變對方，最後要搞離婚，都冇辦法。

1923年12月，有一個叫做「中國國家主義青年團」喺巴黎成立，依一個就真係一個極右組織，佢哋嘅黨綱係宣稱國家主義、全民政治、內除國賊、外抗強權，要令到中國自由獨立為宗旨，反對共產主義，同時反對布爾什維克。

「國家主義」同「共產主義」當時互相對立，因為由列寧同托洛斯基領導嘅「第三國際」係鼓吹世界革命，「國家」係一個遲早要消滅嘅政治單位，佢哋希望解放全世界嘅無產階級，並非只係解放個別國家嘅無產階級，否則咩叫做國際主義先？夢想同氣魄好宏大，大家亦唔好以為佢哋係發夢，解放全世界無產階級？可以嗎？但身處當時，資本主義同帝國主義築構起嚟嘅原來世界秩序已經因為一戰摇摇欲墜，整個世界需要尋求一種新嘅秩序同模式去繼續經營，當時嚟講，共產主義絕對係其中一個重要選項。

不過資本主義的確底氣夠厚，布爾什維克嘅世界革命巨浪，並唔能夠一鼓作氣推翻佢哋，結果銳氣一過，唯有先求自保，到咗後來史太林上臺，先將「國家主義」同「共產主義」合二為一，再由奧地利人希特拉嘅納粹黨發揚光大。

其實響20世紀20年代嘅五色旗中華民國，人民思想絕對自由，各種思潮互相交戰並且爭奪意識形態市場，光譜從極左極右，包羅萬有，係一個真正嘅百花齊放時代，當然最後勝利者係邊個，大家都一清二楚。

時間線進入1924年，一個全新嘅開局。

1月20號中國國民黨第一次全國代表大會喺廣州召開，當其時，孫文領導嘅國民黨，已經由俄共顧問鮑羅廷指導下完成改組，你睇召開「第一次全國代表大會」個玩法你就一清二楚，仲駛問嘅？依一次全國代表大會亦係「國共合作」正式建立的標誌。

大會響廣州高等師範學校禮堂開幕，由孫文主持，他指定汪精衛（1883-1944）、胡漢文（1879-1936）、李大釗（1889-1927）、林森（1868-1943）、謝持（1876-1939）五人為大會主席團成員，出席會議代表一共165人，其中23人係中共黨員。會議通過《第一次全國代表大會宣言》，重新解釋三民主義：對外反對帝國主義、對內反對民族壓迫、主張各民族一律平等嘅「民族主義」；規定國民擁有選舉、罷免、創制、複議等「民權主義」；主張平均地權、節制資本嘅「民生主義」。

《宣言》亦確定咗「聯俄」、「容共」、「扶助農民」嘅三大政策，接受咗中共提出嘅反帝反封建主張，並且一錘定音，將中華民國嘅亂局歸咎於「各軍閥勾結帝國主義」所造成。因此打倒軍閥，即能夠打倒帝國主義，亦即能夠拯救萬民於水深火熱。

大會同時亦都通過咗《中國國民黨總章》，同意共產黨員以個人身份加入國民黨，大會選舉咗「第一屆中央執行委員會」，由胡漢民、汪精衛、張靜江等24人任委員，中執委中有李大釗、譚平山、于樹德三位中共黨員，佔中執委八份一議席，另外響17名候補中執委中，有毛澤東、張國燾、瞿秋白、沈定一、于方舟、林祖涵、韓麟符等七名中共黨員，中共黨員打後備居多。

依張「第一屆中央執行委員會」名單，真係睇到人一殼眼淚，本來大家眾志城城、團結一致，但當中唔少人之後變成敵人，不單被政治迫害而死，更有同路人反目成仇，國民黨有，共產黨亦有，有人枉死、亦有人成為漢奸遺臭萬年，相信亦有人因此變得冷酷無情，鑄造出一代魔頭，令天下血流成河，生靈塗炭。相信於1924年1月，大家坐埋一齊喺廣州開會嘅時候，冇人能夠想像得到。

中國國民黨第一次全國代表大會響1月20號召開，但1月21號，共產主義之父列寧（1870年4月22日-1924年1月21日）響莫斯科病逝，終年53歲。消息1月25號先傳到去廣州，孫文立刻通過悼念列寧同志嘅決議，決定休會三天，各機關下半旗致哀。

列寧同志死嘅時候，孫文同志大概亦唔知道癌細胞已經喺自己身上開始擴散，佢亦只有一年多嘅壽命……命運真喜愛作弄人。

下一集，講講列寧之死。

#常威💀 #大軍閥平反系列  #大軍閥 #民國歷史

成個post淨係自己推

推

連登小有高汁POST

算啦 連登仔

當年有睇開 但唔記得睇到邊到
當年睇完呢個POST之後自己搵左好多野睇
發現真係就算有冇慈禧 大清都係收皮
相反 慈禧係減慢左大清收皮既速度

唔係嘛，我雖然唔係好精，但都算幾熟清朝，條八婆有錢唔拎錢去打仗，去幫自己擺大壽，仲有逃難個陣仲要擺滿漢全席，自己個仔死都唔緊要，最緊要自己有權，咁既人都有得吹奏？同而家林鄭有咩分別，所以話女人當權冇好野

【常公子歷史頻道302回：替大軍閥平反系列之 #北洋之狗】

♉剛剛睇到新聞，美國又同中國重新開始貿易談判，之前特朗普仲不斷話要和同中國完全割蓆，原來又係出口術，目的只係要獲取更加好嘅貿易談判條件；中國方面，一直語氣強硬，表面想同你死過，其實係想快D埋台傾。今日8月24號亦都係共和黨提名特朗普作為新一輪大選總統候選人大Show嘅日子，配合好哂中美貿易談判有好消息傳出，原來又係選舉策略，齊齊谷高收視，timing啱啱好，唔好話畀我知係巧合，因爲我唔信。

♉事實上全球化分工之下，中美兩國之間根本好難完全割斷關係，響「金錢」同「市場」面前，任何意識形態同政治道德都要擺響第二位，最緊要大家有生意做，IPO有人入飛認購，彼此互惠互利，美國之前開火嘅理由，大概只係唔滿意中國開始賺得比自己多，或者中國嘅國力崛起得太快，影響到自身世界霸主嘅地位，如果你肯跪低，如果你又願意遵守原來嘅遊戲規則，分清莊閒，其實乜都有得傾。

⛎況且美國非常明白，衹要佢哋嘅金融之手能夠伸入中國金融市場，以佢哋嘅經驗同技術，必能翻雲覆雨，操控一切，或者能夠利用中國彌補返2008年金融海嘯嘅部份致命損失。中國亦都相當明白，一定要好好鞏固自己金融市場嘅萬里長城防火牆，至少喺自己羽翼豐盛之前唔可以畀你全面插隻手入嚟，以空間換取時間，一向都係遊擊戰重要戰略，貿易戰由2018年開始，拖下拖下，邊打邊傾，又換來咗差不多三年嘅時間鳥，你吹咩？明白了嗎？是戰術嘅一種。

♊當然貿易戰發生期間，香港2019年出現嘅問題係大家意料之外，情況就好似，兩家在賭枱上對賭嘅時候，枱面上無厘頭出現咗一堆來歷不明的籌碼，於是大家伸手去搶，希望增加自己嘅賭本，從而得到更高嘅勝算。不得不承認，響香港發生嘅事情，到頭來演變成中美貿易戰籌碼嘅一部份，而生活在香港嘅香港人，則到頭來演變成一個一個嘅Condoms，亦都係無法否認嘅事實。

♉有人想返翻去2019年前嘅世界？相信已經冇咁嘅可能，正如1842年，當時生活喺香港嘅製香捕漁大清國原居民，睇見高桅巨帆雄偉嘅大英帝國軍艦駛入當時仍未被賜名嘅維多利亞港一樣，唔通佢哋又有得揀？有得揀先至係老闆，而香港人從來唔係。

♑【常威近代史】第五部《霹靂大忠臣對決無敵大買辦》Round two電子書上架（條download link在下面），請大家課金支持我一直走落去，直至劉少奇骨灰到達北京王光美手上…

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上4000訂戶！

✅https://youtu.be/pRELBHtJyVw

通常係D 唔識又要扮識既人先會係咁拎呢幾單野出黎講
我唔同你講歷史事件 我地講常識
禧蛋在位咁多年 點解黎黎去去都只係得呢幾件事比人拎出黎講
唔好玩啦 ON9 面就人地比 架就自己丟架
傻仔 你唔出聲沒人會笑9你架

再者 原來我講番一二句我既見解就叫吹奏
想借問聲你其質知唔知 吹奏點解呀
都係果句啦 面就人地比 架就自己丟架

討論下姐，我都講左唔精架啦，駛唔駛起晒鋼先？唔明咪講到人地明囉，人身攻擊有咩意思呢？

咁既人都有得吹奏？同而家林鄭有咩分別，所以話女人當權冇好野

你自己講到咁就預左比人屌架啦
好啦 你咁想比我屌 我咪屌你囉 你又話我起晒鋼
真係唔知你想點 死傻閪

【常威近代史】（四百二十六回）
列寧生命的最後一年（上）

把馬克思主義告訴世人的是馬克思；而把馬克思主義變為現實的是列寧（1870-1924）。

常公子作為一個百分百嘅左膠，當去到1924年1月21日列寧辭世那一刻，應該要寫下些文字來紀念他。列寧把馬克思主義具體實踐成為政治現實，建立世界上第一個共產主義國家，其實係豐功偉績；當然如果你站在列寧的對立面上，佢係十惡不赦，係歷史上罕見同唯一嘅千古罪人。如果冇咗列寧同托洛斯基，或者佢哋當年領導嘅布爾什維克最後冇響俄國奪權成功，往後整個世界嘅部份歷史應該會全盤改寫。

列寧的重要性無可比擬，曾經有人講過，世界上最多人認識嘅歷史人物係耶穌，排第二就係列寧。（21世紀今日，排第二應該係C朗拿度）如果要寫列寧（同托洛斯基），應該要開一個「共產主義」系列，我遲啲可能真係會試吓，目前並未係時候。所以依兩篇文章，純粹抽起列寧生命中最後一年講吓，蜻蜓點水，作為紀念也好，另外抛磚引玉，列寧生命中最後一兩年所面對嘅問題，100年後，同樣係今日所有共產主義政權（或社會主義政權）面對嘅問題。原來有啲事，連100年都冇辦法改變。

1917年10月革命成功後，俄國蛻變成世界上第一個共產主義國家，列寧擔任著相當重要嘅角色，佢係人民委員會主席（政），勞動國防委員會主席（軍），亦都係中央委員會同中央政治局代表（黨）。依種「黨政軍」三位一體嘅最高領導模式，亦由列寧奠基，沿用到今時今日。

列寧上臺執政後多次被行刺，1918年8月佢喺莫斯科演講後被刺客行刺，第一發子彈射中左肩，另一發子彈射中左胸並穿過頸部，列寧身受重傷，雖然創救得返，但子彈留在體內，由嗰日開始，佢嘅健康情況就一直向下滑。

中間發生嘅事，掠過不提，總之，初生嘅共產俄國內憂外患，從來沒有間斷過，由1917年到列寧去世嘅1924年，短短六年間，列寧所面對嘅問題同處理過嘅問題，到咗今時今日根本無法想像，當中打咗一場大型殘酷內戰、出現過一次紅色恐怖、國內發生一次又一次饑荒同經濟危機、仲有黨內嘅循環不斷權力鬥爭、無數嘅生離死別、國際間嘅巨大壓力同陰謀，除咗俄國嘅問題，佢仲建立咗「第三國際」，要向整個世界輸出革命，企圖解放全世界無產階級。

中國成為咗列寧第三國際輸出革命嘅重要試點，亦係因為列寧同其他共產主義者嘅意志，改寫咗中國人往後嘅命運。

列寧嘅健康狀態由1921年下半年急速轉壞，佢經常頭痛、失眠同聽覺過敏。如果由我判症，應該係巨大嘅經神壓力所引致嚴重嘅神經衰弱，亦有人認為係留喺佢體內嘅子彈金屬氧化，影響神經系統，更有人話佢同希特拉一樣染上梅毒。不過無論點都好，列寧嘅精神狀態已經接近崩潰邊緣，佢曾經響辦公室內要求唔再響電話，要用燈號代替；亦曾經向醫生攞過山埃（氰化鉀）想自殺。1922年4月22號，佢接受外科手術移除子彈，但健康狀態毫無起色，5月，佢第一次中風。

1922年下半年開始，當時身為黨總書記嘅史太林，已經開始部署承繼列寧，有一個千古謎團，點解列寧選擇嘅繼承者，係史上最大嘅國家主義獨裁者史太林，並唔係同佢生死與共多年嘅國際主義老戰友托洛斯基？托洛斯基因為領導紅軍打內戰，長年遠離莫斯科中央固然係重要理由，而史太林長期陪伴喺列寧身邊建立親厚關係，親疏有別？我諗未必。

之後史太林變成恐怖暴君，響1922年並唔係，冇人早知，況且單輪統治手段恐怖，你以為托洛斯基又比史太林善良嗎？當然，政治水平及學養方面托洛斯基遠響史太林之上，一個響天一個響地。可以咁樣去理解，托洛斯基係同列寧平起平坐嘅革命家夢想家創業家，而史太林則係做實事嘅忠誠能幹技術官僚，世界上第一個共產主義國家大業既已創造出來，下一步就要鞏固初生共產俄國繼續生存落去，第二代人守業比較重要，而且做實事嘅人永遠比提出口號的人更現實，同樣情況，亦發生在之後共產中國毛澤東同周恩來長達四十年嘅鬥爭之上……

雖然列寧響1922年5月中風，但係佢只係休息咗個幾月，7月就回到工作崗位繼續工作，簡直係燃燒生命，佢應該直接退休，咁條命可以擺多幾年，老實講，如果俾列寧多10年20年命，整個世界之後嘅歷史應該全部唔同曬，因為列寧生命嘅最後時間，佢開始不滿史太林嘅種種表現，但係佢已經無能為力，史太林早已大權在握……

補充一點，我亦絕對唔懷疑史太林托洛斯基之間嘅分別，在於托洛斯基係猶太人，反猶主義一直喺19世紀同20世紀主導著歐洲人嘅思想，如果今日「Black live Matter」係種族歧視（Racism）問題，相比起反猶主義（Anti-Semitism），係大巫見小巫。

長期失眠、頭痛、胃痛、身體麻痹，進入1923年，佢嘅肉體已經進入奄奄一息嘅狀態，在1923年3月第三次中風後，列寧再不能講話，身體亦處於半癱瘓半植物人狀態。不過之前一年，即1922年3月至1923年3月燃燒生命期間，佢響智力方面嘅領悟力依然強勁，身體玩完，但個腦仍然運作，佢比任何時候更有力地統治著整個共產俄國，係最後迴光返照期……

#常威💀 #大軍閥平反系列  #大軍閥 #民國歷史