大清亡國關慈禧蛋牛治 2

🔥【常威近代史】第八部《最九衰的大軍閥時代》Round 3電子書上架，請大家多多支持！

https://play.google.com/store/books/details?id=fY8mEAAAQBAJ

【常公子歷史頻道371回：替大軍閥平反系列之 湖南獨立運動 】

⛎臺灣火車出軌意外，有超過50人喪生，願他們早登極樂，南無阿彌陀佛。事緣因為一架卡車停泊喺斜坡上，司機冇拉手掣，造成驚天慘劇，有時候一個些微的動作，足以帶嚟極大嘅災難，做任何事情之前，必須要謹慎同埋諗清諗楚，中國儒家哲學強調「獨慎」，就係呢個意思，做事唔可以衝動，要小心衡量風險，尤其是今時今日，有啲嘢急不在一時，退一步有時候的確係海闊天空，尤其是對於有大把時間嘅人嚟講。

♏身邊有愈來愈多朋友選擇離開香港，轉到外地發展。相信疫情結束後，會再有一輪移民潮，佢哋嘅目的地大部份都係英國。有時候亦唔關2019年事，根本有好多人一早都想移民英國加拿大，不過過去移民門檻好高，今日反而變得輕而易舉，所以就選擇離開。嚟緊幾年，香港會有一個人口大換血嘅過程，之後是福是禍？冇人能夠估計得到。希望所有離開嘅朋友，一路順風，能夠有更美好嘅人生。

♏復活節假期，疫情有回落跡象，希望一切儘快回復正常，大家能夠過返正常嘅生活。無論如何，無論發生乜嘢事情，日子總是要過。呢場疫情，將會徹底改變整個世界嘅運作規律，大概2021年下半年，疫情帶嚟嘅波幅會逐漸顯現，好多時候，一切嘅發生，都係響高潮之後先發生，未來，拭目以待，謹慎，決不可少。

✅https://youtu.be/3qvASkaYNQ8

💙最新上線，請課金支持

【常威近代史】第八部《最九衰的大軍閥時代》Round 3
https://play.google.com/store/books/details?id=fY8mEAAAQBAJ

【常威近代史】（五百一拾九回）
大軍閥張作霖之死

濟南慘案發生，中日關係空前緊張，日本大正年間，以經濟手段代替實際侵略嘅時代已經係明日黃花，雄才大略嘅昭和天皇登位，佢嘅野心有幾大？相信大家都知道，中國依個二打六國家佢係志在必得，佢要得到嘅嘢係整個亞洲，製做一個以日本帝國為中心嘅先進東方秩序，好聽啲叫「大東亞共榮圈」，正確的描述應該係「大日本東方帝國」，矛頭直指太平洋對岸嘅資本主義大佬美國。當然結果大家亦都好清楚，最後邊個贏邊個輸，勝者為王，贏嗰個成為世界（貨幣）霸主，之後就主宰整個世界（負責專利印美圓），去到二十一世紀，到今時今日，自行失控後，先真正面臨挑戰。

1928年5月9號，北伐軍第三軍團佔領石家莊，正面威脅中華民國北方政權首都北京，5月17號，日本帝國進一步向山東增兵，第三師團15000人抵達青島。5月18號，奉系大軍閥張作霖拒絕日本政府勸其撤兵出關嘅要求，張作霖同日本嘅關係緊張。

5月20號，中共湘贛邊界第一次代表大會喺寧岡茅坪召開，決定成立湘贛邊界中共特委，毛澤東擔任書記，中共「由城市進入農村」大戰略正式揭幕。5日後，1928年5月25日，中共中央發出《軍事工作大綱》，將軍隊正式定名為「紅軍」，無可否認，當時嘅「紅軍」，只係一群分散於全國各地嘅游離散卒，我諗數數埋埋都未必夠10000人，但係十幾年後，紅軍就會發展成為一支百萬雄獅，最後打敗蔣Sir奪取江山，統一中國。

世事嘅嘢真係好難講，莫欺少年窮？真係冇錯喎，不過要係亂世中講；太平盛世其實是什麼意思呢？太平盛世即係秩序穩定狀態，既得利益者繼續坐享其成，被壓在最底層嘅群眾就永無翻身之日，階級壁壘分明，正金字塔結構（上窄下闊）永恆不變，90%-95%無產者（國家）被剝削，供養5%-10%貴族階層（國家）揮霍享樂，依種狀態，我哋叫做「太平盛世」；咁嘅時代，我哋叫「黃金時代」。

其實我並非攻擊「太平盛世」，中國人講「各安其位」並唔係壞事，世界本來就沒有絕對公平存在，資源分享失衡亦都係平常事，所謂「秩序」，其實係由唔同階級經過協商或暴力威嚇而得出，大家覺得冇問題就冇問題，你OK我就OK。無知是福，其實係千古不變嘅道理，知得多，反而係壞事，讀書會讀壞腦就係咁解，知識份子一定要被打壓，亦都係咁解。

5月27號，第三集團軍佔領河北滿城，奉軍第10軍全軍覆沒，張作霖奉系軍隊兵敗如山倒，退出關外回歸東北亦都係唯一選擇。5月28號，打蛇隨棍上，國民革命軍國集團軍開始隊對奉系軍隊全線發動總攻擊。5月29號，日本海軍宣佈禁止中國南、北海軍喺青島、煙臺、龍口、大沽口、秦皇島領海各20里內交戰。

5月30號，由於形勢緊急，張作霖召集最高緊急會議，以大元帥名義下達總撤退令。叱吒風雲的張作霖，絕對諗唔到，佢嘅生命只係得返幾日……

整個5月，南京國民政府同時大規模整頓內政，月中，國民政府公佈《著作權法》及《著作權法實施細則》，保障知識產權；國民政府亦第一次提出實施「三民主義的教育」，正式將孫文嘅「三民主義」放上神檯，成為國民政府嘅官方意識形態，同月，國立中央大學正式喺南京成立。要政權長治久安，教育係最重要嘅一環，除軍隊之外，「學校」係最重要嘅「國家機器」，20世紀20年代末葉，中國人終於明白呢個大道理。

1928年6月1號，張作霖聲明撤離北京，次日發表退出北京通電，6月3號，張作霖離開北京返回奉天，至此北洋軍閥政權正式覆滅。張作霖喺戰場上節節失利，日本政府認為佢喺中原已經難有作為，其實已經多次勸佢退兵出關保持實力，但佢唔聽話，加上由於張作霖喺滿蒙同東北鐵路修築問題上，對日本採取不合作態度，令部分軍國主義分子極端不滿，認為張作霖已經唔係「滿蒙積極政策」嘅好夥伴，因此要隊冧佢！

6月初，張作霖喺日本嘅威逼下，加上張學良及楊宇霆等人苦勸，決定退兵出關。臨行前，日本駐華公使芳澤謙吉（1874-1965）仍一再相纏，要求張作霖覆行「日張密約」，6月2號，芳澤親自去中南海求見張作霖，但張作霖唔見佢，表示「我不能出賣東北，以免後代罵我張作霖是賣國賊，我什麼都不怕，我這個臭皮囊，早就不打算要了！」6月3號清晨，張作霖登上返回奉天嘅專列。

喺張作霖決定撤兵同時，關東軍高級參謀河本大作大佐（1883-1955）已經作出謀殺張作霖嘅決定，佢嘅計劃得到關東軍總司令岡村長太郎及日本參謀部嘅默許同埋支持，河本大作派人打聽張作霖臨離開北京嘅準確時間，隨即喺皇姑屯附近嘅滿鐵、京奉鐵路交叉處嘅南滿鐵路橋上安裝咗250磅嘅烈性炸藥，由奉天守備隊中隊長東宮鐵男喺距離橋上500米處觀察臺上負責引爆。

6月4號，張作霖嘅專列抵達南滿鐵路橋時被炸毀，包車只剩下車輪同埋底盤，前來迎接張作霖嘅黑龍江督軍吳俊升（1863-1928）當場斃命，張作霖被抬返去大元帥府，幾小時後死去，臨死之前，遺命將一切交托予其子張學良之手。

為免東北局勢動盪，大元帥府冇立刻公佈張作霖嘅死訊，直接本月21號，張學良返回沈陽接任奉天督辦後，張作霖嘅死訊先向全國公開。

#常威💀 #蔣介石平反系列 #黃金十年 #民國歷史

🔥【常威近代史】第八部《最九衰的大軍閥時代》Round 3電子書上架，請大家多多支持！

https://play.google.com/store/books/details?id=fY8mEAAAQBAJ

【常威近代史】（五百二十回）
北伐成功了 北洋軍閥時代正式結束

張作霖之死，代表住北洋軍閥時代正式結束，如果我哋由袁世凱天津小站練兵開始計算，所謂北洋軍閥時代足足延綿咗三十年，依班禍國殃民嘅仆街杏加橙終於全部收皮，實在可喜可賀！佢哋雖然唔係每一個都係仆街，甚至有好人能人，但係一竹篙要打一船人，集體亢奮主義時代降臨，凡事凡物統一歸納計算，總之北洋軍閥就係鹹濕仆街滿手血腥乞人僧兼衰九格，唔使再多講。每一個時代有唔同嘅讀史方法，今時今日讀史，要順應潮流大趨勢，讀應該讀嘅史，反正歷史嘅真相其實冇人知道；但如果你覺得好難接受，不如選擇唔好讀史，所謂歷史知識實際上並非生存所必需，純粹玩樂自娛。

坊間亦有講法，話殺死張作霖嘅並唔係日本仔，有可能係自己人做，亦有可能同蘇聯有關，對於類似嘅臆測，我不作回應，反正凡事都係有可能，你既然相信歷史可以任意剪輯、修改同著色，以苻合不同時代（官方）意識形態所需，你根本無需在乎邊個講法，最重要嘅係你願意接受邊個講法，你亦無需告訴別人你嘅想法，純粹玩樂自娛性質嘅嘢，自己開心滿足就可以，我哋畢竟身處一個可以同矽膠公仔結婚相處終生嘅虛擬世界中，「我」是最重要的，「其它人」可以不理。

1928年6月4日，張作霖被刺身亡（消息未公佈），其實6月3號，仲有一個大人物過身，佢就係中華民國前任大總統黎元洪先生，響天津因為腦中風，一命嗚呼，享年63歲，黎元洪自1923年卸任大總統後，不問政事，專心從商，因為有朵，亦搞得有聲有色，本年初，佢經營嘅中興煤礦被蔣Sir攤派咗100萬庫券同100萬軍餉，簡單啲就係明搶你錢，令佢嘅生意經營變成非常艱難，心中鬱結難平，今日去睇賽馬嘅時候突然昏迷，送院搶救不治。可能佢都明白蔣Sir好快會接收天津，冇眼屎乾淨盲。

黎元洪被稱為政壇不倒翁，又有泥菩薩稱號，因為一次意外，本來係軍佬嘅佢，因為武昌革命爆發，被逼從政，仲撈到做大總統，泥菩薩做事面面俱圓，好少得罪人，重申一次，佢嘅能力同佢得到嘅榮譽及財富並唔合比例，一生幾符碌吓，不過唔緊要，始終係一個好人嚟（並唔係殺人王），過到六張算長命。傳聞黎元洪生前叫啲仔女唔好玩政治，最好遠離政治，佢嘅後人大多數散居海外，並無特別記載。

6月6號，由於國民政府北伐軍迫近天津同北京，末代皇帝溥儀由日本人保護下離開天津，前赴大連（好快佢就會同日本人響東北搞壇滿州國出嚟，直接導致中日戰爭全面爆發）。同日，陳獨秀次子中共江蘇省委組織部長陳喬年（1902-1928）響上海遇害，享年26歲，一年前佢大哥陳延年（1898-1927）亦被國民政府亂刀砍殺，陳獨秀兩個仔都死得好很慘，政治真係唔係玩泥沙，亦唔係打GTA，本身係生死遊戲，玩唔起千祈唔好玩，有顧忌請速遠離。

6月8號，第三集團軍商震部隊進入北京城，並冇遭到任何反抗，北伐北伐，終於到達最後終點，由廣州打到去北京；6月10號，天津易幟，改懸青天白日滿地紅旗，6月12號，國民政府外交部分別致電各國公使，令改懸青天白日滿地紅旗。之後嘅日子，就係南京國民政府接收北京及天津兩個大城市嘅細節瑣碎事項。

6月18號，中共喺莫斯科召開第六次全國代表大會，出席嘅代表一共有84人，候補代表34人，共產國際負責人大佬布哈林（1888-1938）出席咗會議。會議上批判咗陳獨秀嘅「右傾機會主義」，同埋瞿秋白嘅「左傾盲動主義」，批右再批左，真正無分彼此。會議認為目前中共水深火熱，中心任務係，爭取群衆、儲蓄力量、建立紅軍、開展遊擊戰爭等等，重新調整戰略，保留一點星火，他日再次燎原。

蘇兆征（1885-1929）、向忠發（1879-1931）、周恩來（1898-1976）、項英（1898-1941）、瞿秋白（1899-1935）、蔡和森（1895-1931）同張國燾（1897-1979）七人組成中央政治局，由工人出身嘅向忠發當選政治局主席。

6月21號，國民黨中央政治會議決定將北京改稱北平，並將北平、天津設為特別市。根據上個月由南京國民政府頒佈嘅《特別市組織法》，特別市直轄於中央政府，其行政級別與省相若，先後設為特別市嘅仲有廣州、南京、上海、青島同漢口。國民黨同時決定改直隸省為河北省，原京兆各縣併入河北省，「直隸」呢個地緣名稱，由今日開始正式被取締。

6月23號，張學良喺瀋陽召開東三省軍民聯合會議，推舉張作相（1881-1949，張作霖結拜兄弟）為東三省保安總司令，但張作相拒絕就任；6月25號，日本領事警告張學良不得同南京政府妥協，我諗當時張學良憎到日本人仆街！

6月28號，國民黨中央決議禁止招募新兵，缺額不補，原因亦都好簡單，北伐大致完成，仗已經打卵完，大局已定，軍隊亦係時候休養生息或解散，再招募新兵？就係籠裡雞作反鳥打自己友了。當時嘅局面，南京政府（及其同盟）分為四股龐大軍事勢力，分別係蔣Sir自己嘅黨軍、李宗仁嘅新桂系、仲有二五仔馮玉祥，仲有個山西王閻錫山，遊戲暫時終結，之後，就要埋檯傾吓分贓嘅問題。

#常威💀 #蔣介石平反系列 #黃金十年 #民國歷史

【常威近代史】第八部《最九衰的大軍閥時代》Round 3
https://play.google.com/store/books/details?id=fY8mEAAAQBAJ

【常威近代史】第七部《最九衰的大軍閥時代》Round 2
https://play.google.com/store/books/details?id=lPgaEAAAQBAJ

【常威近代史】第六部《最九衰的大軍閥時代》Round 1
https://play.google.com/store/books/details?id=bCMNEAAAQBAJ

【常威近代史】第五部《霹靂大忠臣對決無敵大買辦》Round two
http://shorturl.at/dW145

【常威近代史】第四部《霹靂大忠臣對決無敵大買辦》Round One
https://play.google.com/store/books/details?id=Np3PDwAAQBA

【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

🔴【常威近代史】第一部《大清亡國關慈禧蛋牛治》免費下載
https://play.google.com/store/books/details?id=C3hjDwAAQBAJ

【常公子歷史頻道372回：替大軍閥平反系列之 勁歌金曲】

⛎最近有著名KOL賣樓移民，在網上被多方面聲討，每次睇見呢種新聞嘅時候，都係得啖笑，政治本身就係一份工作，工作需要獲得酬勞，而酬勞多寡係個人嘅議價能力問題，呢個係資本主義社會嘅基本生存原則，你話佢係老千？世界上老千多的是，而且某程度上，任何人都可以被介定成老千，半斤何時可以換八兩？換唔足就係老千囉，香港係一個金融城市、集資中心，今日係未來都會係，否則就會喪失其存在價值，如果你承認上述一番話，請你不要介意有太多老千存在。

♈何為正人君子呢？大家有冇諗過？首先正人君子唔可以有錢，因為財富系萬惡之源，應該冇錯？其次正人君子應該摣緊自己宗旨做人，從一而終，不可以左搖右擺，否則就係騎牆派；再者，正人君子應該願意為他人犧牲，唔可以純粹為自己而生存。老實講，如果上述三個定義係成立嘅話，我自己絕對唔係正人君子，亦唔想做正人君子。我想講一個歷史故事，從前有一個人叫方孝孺（1357-1402），因為佢唔肯認同明成祖朱棣嘅執政合法性，結果被朱棣「誅十族」，除咗佢嘅親戚之外，佢嘅朋友都被株連斬殺，結果方孝孺名垂千古，成為一代大儒，但似乎好少人會諗過佢嘅親戚朋友有咩感受？

♉用我自己嘅定義，所謂正人君子，就係指做人應該有其底線，唔能夠觸碰底線或超越底線，就算有人俾十億美金你，你都唔可以做超過底線嘅事情，一口拒絕，大概就係咁，當然所謂底線每個人都有所不同，基本上唔可以殺人放火姦淫擄掠偷呃拐騙，條底線set得越高，高到某個水平，就可以叫做正人君子（掛）。不過討論呢種話題，其實非常nonsense，意義亦不大。今時今日，仲係顧掂自己先啦，自己都未處理得好，又邊有能力處理他人呢？太容易拋出大愛，會好心做壞事，要記得從前有個方孝孺。

✅https://youtu.be/IK3bqDGM42c

💙最新上線，請課金支持

【常威近代史】第八部《最九衰的大軍閥時代》Round 3
https://play.google.com/store/books/details?id=fY8mEAAAQBAJ

【常威近代史】（五百二十一回）
利益分贓大會展開 有事慢慢傾

1928年7月1號，仗打完，大家開始善後工作，做過生意嘅人都明白，善後工作嘅難度比打仗高十倍，打仗時候因為生死攸關，個個都全力以赴，太平盛世之後，就要開始計算自己嘅利益，冇著數？典解要同你博命呢？你傻架？世界上有啲所謂成功人士，其實好多都有一套技能——就係無厘頭搵到傻仔同佢哋博命，啲傻仔之後又無厘頭唔計較利益喎，咁佢咪贏到盡囉。至於啲傻仔點解肯搏命？就係做大佬嘅口技問題，搭雞棚嘅能力問題，口技係天生，正如吹簫吹得老細舒服，就會有打賞。講得咁cheap，不如高檔少少，咁叫意識形態操縱藝術。

1號，國民政府審計院正式成立，開始計數喇喂，開始分水啦喂。2號，國民政府公佈《國民政府財政部善後短期公債條例》，發行公債4000萬元，籌旗先，啲公債點sell？其實亦都相當簡單，新佔領區內各大商家地主有錢佬土豪劣紳，每個人都要認購新政府嘅公債啦，你唔買都得，唔科水都可以，畢竟南京國民政府都係一個西方式民主自由嘅政府，不過我相信一定有後果，金石良言，「後果自負」。舉個實例，5號，蔣Sir以中興煤礦公司未履行報效北伐軍餉百萬元為由，下令將公司沒收充公，see？睇到未呀？「報效」呀，我派兵北伐解放你、幫助你逃出大軍閥製造嘅水深火熱世界，你當然要畀錢「報效」我呢，天經地義架，挑，你估打仗唔駛錢架？

上述嘅邏輯其實好好用，所謂亂世，其實係打劫嘅好時機，我之前都講過，所謂「義和團」概念究竟係點解？十幾萬流氓衝去北京，老實講就係為咗打劫貴族，乜撚嘢「扶清滅洋」都祇不過係打劫嘅籍口，好多時候，或者全部時候，一切問題其實都係經濟問題、都係貧富懸殊嘅問題、都係利益分贓嘅問題。所謂革命，無論表面有什麼高尚理由或理念，內裡都係為咗解決經濟問題，一切都係錢作怪，共產主義最後嘅理想係消滅貨幣，其實某程度上係正確嘅。

一啖砂糖一啖屎，5號，國民黨中常會決定停止新聞檢查，大局既定，當然可以放寬言論自由，衹要你講嘅嘢有利於蔣Sir執政，你可以充分自由地去講，可以大鳴大放，不過當時如果你又以為可以自由到宣傳共產主義，都是會被秘密警察拉去後巷打靶的。7號，國民政府外交部發表宣言，宣佈廢除一切不平等條約，重訂新約。呢一樣嘢亦都非常重要，因為「不平等條約」大部分都係關於錢同還債，例如「馬關條約」、「庾子賠款」等巨大債務，由滿清政權一直留落嚟，家陣新政權上臺，冇話唔繼續還錢，但係首先要傾傾有冇折頭先？

9號，國民政府下令通緝陸宗輿（1876-1941）、章宗祥（1879-1962），章士釗（1881-1973）、曹汝霖（1877-1966）等人，佢哋全部都係之前北京中央政府嘅要員，罪名一句到尾：「莫須有」，當然，大部份政府要員一早已經跟住張作霖著草離開北京，有人隱居租界內（你吹得我脹咩），有人流亡海外，一朝天子一朝臣，大家都是正確的，上述四位通緝犯，你睇吓，全部都好長命架。

10號，日本陸軍省將山東派遣軍第三團撤回，因為中國形勢大致敲定，日本亦無增兵嘅理由。我個人亦都非常相信，當時日本人可能已經同末代皇帝溥儀有咗默契，開始另一個新project侵略中國，個project叫做「滿州國」項目，呢個項目，亦都喺度密鑼緊鼓進行中，好快就會launch。

7月11號，蔣Sir邀請馮玉祥、閻石山、李宗仁等人喺北平湯山開會，商討軍事善後問題，四大巨頭，聚首一堂，大家傾下點分贓先。國民政府4月興師北伐後，各路大軍（四大集團兵）一齊打去北平，攻勢淩厲，勇不可擋，6月3號，笑面虎孫傳芳宣佈下野，離開遊戲，所屬部隊向國民革命軍投誠；6月4號，張作霖倉皇出關，途中遇刺身亡；6月8號，國民革命軍進佔北京，（和平解放北京民眾），7月3號，四大巨頭一齊入京，7月6號，四人響香山碧雲寺孫中山陵前，舉行北伐完成祭告典禮，國父北伐遺愿，終由四人達成。

但隨著北伐戰爭結束，四大巨頭亦因為地盤分佈不均，帶嚟新矛盾。首先蔣Sir第一集團軍佔有廣東及華東富庶之區，當然冇問題；馮玉祥第二集團軍佔有山東、河南、陝西、甘肅；閻石山第三集團軍佔有山西、河北、察哈爾、綏遠及北平、天津兩市；李宗仁第四集團軍佔有廣西、湖南、湖北及漢口市。大家look look，除咗蔣Sir同閻石山佔有理想地盤外，馮玉祥所佔據嘅大部分都係內陸貧瘠地區，生不出蛋來，而且冇出海口；而兩次北伐功勞最大嘅李宗仁新桂系，則嫌最後得到嘅地盤太細（一句都尾唔公平囉），其實四大巨頭中，冷手執個熱煎堆嘅人係閻錫山。

響四巨頭湯山會議上，蔣Sir提出要削減龐大嘅軍事開銷，應該統一編譴全國部隊，精兵簡政，並且要從第一、第二、第三、第四集團軍中抽調最精銳嘅各師歸中央直轄，吓？咁都得？就係咁都得，簡單一句，蔣Sir就係要喺戰爭結束之後，削弱其他三個集團軍嘅實力，以利自己統治，你覺得其他三個巨頭反應係點？下集我哋繼續講講。

#常威💀 #蔣介石平反系列 #黃金十年 #民國歷史

✅本土唯一香港土話近代史文本

❤【常威近代史】第一部《大清亡國關慈禧蛋牛治》，全面開放，免費下載， #freedownload！

Free下載連結🔽

https://play.google.com/store/books/details?id=C3hjDwAAQBAJ

【常公子歷史頻道373回：替大軍閥平反系列之 踩地雷】

⛎有句說話咁樣講，「資料不等於信息，信息不等於知識，知識不等於智慧」，今時今日嘅社會，更加有啟發性。今時今日打開個電話，所謂資料同信息，源源不絕海量奉上，根本連睇嘅時間都唔夠。呢個現象造成兩種後果，第一，知信息變得更廉價，google大神一出，所有事情一目了然，你識我都曉，結果，過去嘅所謂知識份子專家同權威講嘅嘢，一下子變得一文不值，或者個個自己都係專家權威；我唔敢講係好事定係壞事，好處係知識不再被某一個階層或某一堆人壟斷，壞處就係所謂知識變得愈嚟愈廉價，廉價到一個點，所有知識都係垃圾。

♊第二，信息過份氾濫化，好容易真假難辨，假嘢滿天飛，寫出嚟就係真？或配張圖就係真相？相信大家都應該瀨過嘢了？上面已經講過，資料不等於信息，資料可以係真可以係假，可以隨便老作，我舉一個例子，有人話你知今個月香港失業率係7%，另有人話你知係7.1%，兩者之間，到底邊個真邊個假？抑或兩個都係假？其實我哋無從判斷，或者所謂真實數字亦根本唔存在。一切我哋接收嘅資料，必須經過過濾同思考，再作出判斷同分析，我哋接收嘅信息，亦必須以準確為先，否則輕者冇事，重症可能會引發大災難。

♑得到正確信息只係第一步，其實大部分人，都係處於接收信息或被灌輸信息嘅狀態中，所謂「知識」係第二個層面嘅事情，知識其實並不廉價，或者亦唔應該用錢去衡量。的而且確，但如果只有知識，而並無深刻嘅反思同埋領悟，則冇辦法到達至所謂智慧，所以，佛家認爲我哋必須要「轉識成智」。

✅https://youtu.be/QRLZYJGRK5k

💙最新上線，請課金支持

【常威近代史】第八部《最九衰的大軍閥時代》Round 3
https://play.google.com/store/books/details?id=fY8mEAAAQBAJ

【常威近代史】（五百二十二回）
盜墓者羅拉

蔣Sir（妄）想杯酒釋兵，削弱其他三位盟友嘅軍事實力，真係冇乜可能。馮玉祥、閻錫山、李宗仁三人各懷心事，李宗仁同馮玉祥因為對地盤分配早有不滿，一早想趁機調整，因此喺大會上提出諸多意見同要求，相反閻錫山最後入閘，反而冷手執個熱煎堆，佔據北平同天津兩大錢罌，當然唔出聲，保持沉默靜觀其變，因此大家傾吓傾吓，食吓飯飲吓花酒，之後又冇咗件事，依一次發生喺北京湯山嘅分贓大會，其實冇最後結果。

其實閻石山、馮玉祥同李宗仁三個人都唔信任蔣Sir，點解呢？理由亦都好簡單，所謂一次不忠，百次不容，你蔣Sir點樣對自己嘅盟友，大家都一清二楚，血腥清黨，周街打靶，過橋抽板，反轉豬肚，樣樣做齊，唔計清黨，難道革命盟友陶成章（1878-1912）係邊個殺大家唔知道咩？孫文恩人廣東王陳炯明點收場呢？所以同你做partner，點可以唔小心呢？你咪當我傻先得架？雖然你係一個光明正大心無二念憂國憂民鐵漢柔情嘅光頭軍人，但係為咗自己條命仔，都係小心啲好。

之後嘅歷史，蔣Sir嘅盟友同埋親密戰友對佢都非常小心，我唔敢講呢個係唔係「國共內戰」國民黨最後失敗收場嘅主因？但係應該有關係嘅。另外國民黨內好多針，好多人為共產黨做間諜，點解呢？我相信都係有關係嘅。

1928年7月5號，河北馬蘭峪東陵發生特大盜墓案，東陵為清室嘅陵地，一共有帝陵、後妃陵14座，其中包括乾隆、慈禧嘅陵寢，民國建立，清室優惠條例講到明陵地係重要保護文物，不過兵荒馬亂，唔通有錢唔要咩？盜墓者係直魯聯軍嘅殘部孫殿英（1889-1947）部隊，孫軍閥派出工兵進行挖掘，用烈性炸藥炸開墓門，搜掠內裡價值連城嘅金銀珠寶，淘寶不特止，仲將帝后屍體弄得支離破碎，一片狼藉，正一仆街冚家鏟。新聞曝光之後，全國譁然，民眾都要求政府拉佢，但係孫殿英手上大把錢，利用送禮疏通，呢件巨案竟然不了了之。我睇到依段歷史，真係最初嚇一跳，然後就得啖笑。當時係一個乜嘢嘅世界？大家應該清楚明白。

至於孫殿英偷咗啲乜？相信亦都冇人知道？有幾多人因此發達？亦冇人知道，反正冇人會話你知。財來自有方，發達當然有方法。孫殿英溫墓不但冇被捕，而且之後一個華麗轉身，投靠國民革命軍，之前佢曾經係直系，又做過奉系，後來又投靠過日軍、汪精衛政府，二次大戰日本投降後，又歸順蔣sir，成為國民革命軍中將，何止三家姓奴？不過又唔需要奇怪，其實當時好多軍閥都係咁，雇傭兵制度啫，邊個有錢出糧咪同邊個打仗囉？揾食啫，搵食大曬架。

孫殿英最後嘅收場，就響國共戰爭中被解放軍所俘，毒癮發作而死，未能投靠共產黨之餘，亦死得好X肉酸.......

7月12號，班禪活佛入川求援，請求派兵收復失地，保護國權；7月13號，湖南省政府決議，湖南境內煙館一律封閉，秘密買煙者即時槍斃，鴉片嘅問題，其實一直未停過，地上貿易被全面禁止，地下活動依然蓬勃，畢竟毒癮好難戒，咁易戒得甩，就唔叫「毒品」叫「補品」喇，係咪先？至於中國嘅毒禍幾時先告一段落？Sorry，又係1949年天下大治之後。

7月14號，國民政府派代表劉光、張同禮抵達瀋陽，同啱啱死咗老豆嘅奉系少帥張學良商討東北易幟問題，其實當時張學良已經放咗風想投城，不過做戲做全套啫，我蔣Sir求吓你你先肯制，下臺階又矮啲啲，議價能力又高少少，你好我又好，大家happy，仗大家都唔想再打，奉系主宰嘅東北，又出現經濟大崩盤，打條毛咩？7月18號，日本駐瀋陽領事館要求張學良簽訂《新滿蒙五路決定》，張學良拒絕，兩邊夾，張學良仲邊有得揀？

7月19號，你未易我先易，奉系大將湯玉麟（1871-1949）喺熱河通電易幟，服從國民政府。7月21號，全國15個省及香港100多名代表喺上海召開《全國反日代表大會》，模仿日本建設國家嘅時代早已經一去不返，現在對岸嘅日本帝國，係中華民國嘅敵人，依一點，去到1928年濟南慘案之後，國民再無懸念。個人相信，亦係反日潮流大盛以及蔣Sir（有限度）統一中原上後，「中華民族」呢個概念，先正式落地生根，凝聚一個巨大嘅向心力。

當然中華民族依個概念，係包容埋你滿洲人在內，從前清帝國滿洲人不包容漢人，今日漢人海量汪涵受埋你玩，你應該多謝都多謝唔切，所以滿洲人要建立嘅新國家，係一個偽國家，大家必須清楚明白。唔同嘅國家對歷史有唔同嘅解讀，係日本人眼中，自從1911年清帝國崩潰之後，從來未有一個「大一統」嘅政治實體存在，南北不同政府與國民政府所宣傳嘅中華民族概念，係唔應該包括滿洲人在內，因此協助滿洲人響東北故鄉龍脈所在之地重建國家，本身係合情合理。

討論政治去到某個點，其實已經冇合情合理呢回事。你覺得合理，我覺得唔合理喎，亦都係非常正常，政治本身隸屬人民科學範疇，本身並非純科學，所以並無一定統一嘅合理性（與合法性），你信嘅就係真，你唔信嘅亦都冇辦法。響政權籠罩之下，你相信嘅話，就可以活得平安快樂；相反如果你唔信，就打到你信，恐嚇到你信為止。政治操作，本來是權力運作，而權力運作，基本上依靠暴力實踐及履行。

#常威 #蔣介石平反系列 #黃金十年 #民國歷史

【常威近代史】（五百二十三回）
誰敢橫刀立馬 唯我彭大將軍

平定中原，蔣Sir聲勢一時無兩，奉系張作霖被日本人炸死，繼任人張學良畢竟年少（卻不氣盛），東北易幟指日可待，南北勢必統一。國外當然有日本人虎視眈眈，但國內凈低落嚟嘅最大問題，就係「剿共」，雖然之前蔣Sir血腥清黨，應差唔多推冧共產黨間新建大廈，但係經過共產國際六大之後，中共調整鬥爭路線，由城市轉入農村發展武裝勢力抗蔣，一心同你打長期遊擊戰消耗戰，你打仗貴，我打仗平，其實當中分別好大，起初可能大家都唔覺眼，但歷史發展落去，中共農村戰略嘅優勢亦都會逐漸顯現，畢竟凡事都係講錢，你一個炸彈成本十萬美金，我一個炸彈成本五萬美金，當中分別好大，條死數仲未計人命消耗，人命同炸彈一樣值錢，邊個成本可以壓到最低，就一定能夠取得絕對優勢，昨日如是，今日亦如是。

美國人打越戰，就係一次慘痛教訓，戰線太長（橫跨大西洋），成本亦太高，美國軍人人命亦太值錢，反觀敵方北越，以低成本短距離同你打長期消耗戰，美國人頭幾年仲頭威頭勢，去到詹森接任總統，長期戰爭差啲拖垮國內經濟，引發巨大民怨，麥卡錫反共意志敵不過宣傳和平與（性）愛班嬉皮士柒頭同隊草，最後亦不得不向現實環境屈服，宣佈敗走西貢，打輸越南戰爭。

1928年7月22號，彭德懷（1898-1974）率領部隊喺湖南平江起義，6月，國民黨調獨立第五師到平江、瀏陽「清鄉」（即係剿共），但係該師嘅第一團團長彭德華已經秘密加入中共，彭德懷係1928年頭先正式接觸共產主義，4月秘密加入中共，成為軍隊內一條針。本月，中共派滕代遠（1904-1974）前赴湘鄂邊界策劃起義，早就同彭德懷接觸。

今日，彭、滕兩人率領第一團喺平江縣城起義，佔領城內重要據點，解除城內軍警2000多人的武裝，繳獲步槍1000餘支、子彈100萬發。同時，黃公略（1898-1931）領導第三團第三營、賀國中（1904-1929）領導隨營學校，亦分別係駐地嘉義鎮同岳陽起義，並趕至平江會合。7月24號，平江縣蘇维埃政府成立，成立紅五軍，全軍共2500餘人 。不久，起事部隊遭到湘鄂贛軍聯合進攻，撤出平江，東入江西修水、銅鼓、萬載，轉戰於湘鄂贛邊區，開闢咗湘鄂贛根據地。

當時30歲嘅彭德懷，後來成為抗日戰爭同國共戰爭中嘅名將（率領百團大戰），事實上，中共顯赫一時嘅大將，當時已經嶄露頭角，好似朱德、劉伯承、陳毅、彭德懷等，當然唔少得毛澤東、周恩來、鄧小平、張國燾，依一群40歲以下的年青人（我用今日定義）響未來，將會係最惡劣最血腥最嚴酷嘅環境中掙扎求存，鋼鐵就是這樣煉成的，養尊處優，肚滿腸肥，衹能夠削弱戰鬥意志，打仗除咗打錢，仲要打意志、體能同生存能力，窮人嘅生存意志當然比有錢人強大。你睇今日香港，新一輩全部係溫室中長大，唔好講打仗，就算基本生存能力都成問題（食魚都唔曉），鋼鐵嘅意志，要喺絕地苦難中先能夠磨練得出，似乎係千古不變。

捉人去坐監，提供惡劣嘅生存環境，反而可能會提昇對手嘅鬥爭意志，繼續用有限米養肥佢hea住佢，反而仲有效。

叉開一筆，講講彭德懷，被毛澤東稱呼係「彭大將軍」嘅悍將彭德懷，佢除咗係開國元勛十大元帥外，仲要係韓戰嘅主要領導人，打美國佬麥克阿瑟（Douglas MacArthur，1880-1964），你估講笑？傳說講，毛澤東之子毛岸英（1922-1950）死於韓戰，令毛澤東對彭德懷懷恨於心，之後毛澤東搞大躍進三面紅旗，全國發生大飢荒，彭德懷喺1959年廬山會議上，時任中共中央軍委副主席、國防部長及國務院副總理彭德懷上萬言書批評毛澤東太左，結果成為政治鬥爭犧牲品下馬，文革時期仲要被紅衛兵迫害，1974年死於結腸癌，要到80年代之後聲譽先至被平反。甚至有人講，彭德懷係響史太林死後，克魯曉夫上臺後，最有機會取代毛澤東權位嘅中共領導人，一山不能藏二虎，因此毛澤東一定要鬥垮彭德懷咁話。

對於呢個觀點，我自己並唔相信，彭德懷只係一介武夫，打仗固然係勁，但政治水平同毛澤東等中共中央領導人相差太遠，而當時嘅中國同蘇聯，都係以政治行先，（文人）黨指揮槍（軍人），係第一大原則，並非槍指揮黨，兩者有好大分別。彭德懷後來並非發動政變，反而可能真係真心膠，直接上書批評毛主席以至身敗名裂。當然真相冇人話我哋知，表面好似係咁。

1928年7月尾，中華民國嘅教育體系亦宣佈大改革，先響7月22日，南京政府大學院令各省須於1929年5月前制定推行義務教育計畫，所謂「義務教育」政策，可以講係一次喺中華民族歷史上出現，當然能否做到係另一回事，讀書喺古代係要錢嘅，所以如果你老豆耕田你唔X識字係理所當然嘅、合情合理嘅、天經地義嘅。今日香港係14年免費教育，幼稚園讀到大學，基本上可以全free，放響100年前，簡直係天方夜譚。另一個措施係，7月26號，國民政府大學院訓令提倡語體文教學，唔畀學校採用文言文教科書，100年後嘅今日，學生要讀文言文12篇章考試，歷史的確係一個偉大循環。

#常威💀 #蔣介石平反系列 #黃金十年 #民國歷史

【常公子歷史頻道374回：替大軍閥平反系列之 飯碗最重要】

⛎人生的問題，其實可以歸結為經濟的問題，以前我絕對唔會承認，但到咗某一個年紀，面對生活問題嘅種種，似乎無法避免，一切都同錢有關。雖然有錢未必可以解決所有問題，或者有錢會衍生更多問題，但大前提係，大部份問題都可以用錢解決，呢個先至係我哋無法避免嘅慘痛現實。以我自己做例子，父母年邁衰老，要入住老人院，老人院每個月嘅月費必須繳交，就係咁簡單，無論你想唔想，你都要交費，否則老竇老母瞓街。

♉生活從來都是這樣一回事，如果唔係一個有錢人，就必須每月頻撲返工揾錢，以應付生活所需，而且並唔係自己一個人嘅事，而係一個家庭嘅事。香港有人講，「搵食係大曬嘅」，其實一啲都冇錯，你覺得唔係，祇不過你有錢或有樓收租財來自有方，生活無憂米，當然唔需要搵食。所以飯碗係最重要，其實一啲都冇錯，當然唔同的階級，對上述嘅講法有唔同嘅觀點與角度，畢竟經濟學問題，都係馬克思主義內階級嘅問題。

♈要明白一個社會如何運作或社會政治規律，必須去理解「搵食係大曬嘅」依句説話，所有嘅問題，其實係社會上大部分民眾搵食嘅問題，所謂革命，都係因為太多人搵唔到食先至會發生，意識形態或理念式嘅革命，其實從來未發生過（宗教反而有），一個富裕嘅社會，並無革命嘅本錢。所以香港早前發生嘅事，其實相當奇怪。

♏「揾食」同「良知」，又係兩回事，為咗搵食放棄良知？其實應該怎樣解讀呢？冇錢交老人院費，父母要瞓街，本身又有冇良知呢？我真係唔知道，只可以答你，「揾夠食」先有資格講良知，冇錢講條毛咩？可能你覺得我好庸俗，但我天生下來就是這樣庸俗，因爲我是這個階級的，並不是那個階級的。我嘅優雅或庸俗，由我嘅財富同階級所決定，並非由我決定。係「存在決定意識」，並非「意識決定存在」。你認為你嘅意識可以決定你嘅存在，只因為你只係隨便講吓，成班人圍爐傾偈，對社會世界經濟政治文史哲通透之後，曲終人散，亦有人步行去巴士站坐巴士走，有人有架有司機嘅七人車響門口等。

✅https://youtu.be/w4LzBlwuy_0

💙最新上線，請課金支持

【常威近代史】第八部《最九衰的大軍閥時代》Round 3
https://play.google.com/store/books/details?id=fY8mEAAAQBAJ

【常威近代史】（五百二十四回）
黃金十年 正式啟動

正確嚟講，蔣Sir嘅黃金十年，應該係1928年8月起計，之前四大巨頭湯山傾掂數，雖然各有心事，但係表面上仲算河蟹融洽，張學良好快亦會易幟食神歸位，1911年辛亥革命以來，中華民國正式（有限度）南北統一，開展一個全新時代。既然你唔亂鳥，外國勢力當然唔鍾意，因為你攪大一統，就會坐大，坐大對侵略者嚟講，絕對唔係好事，最好你大分裂，分裂成好多個細嘅政權各自為政，咁就啱曬，1991年蘇聯解體，就係最好嘅例子，之後美國一國獨大，行單邊主義，直到今時今日。

8月1號，國民黨中央廣播電臺喺南京正式開始播音，去年南京國民政府成立後，即刻著手籌建中央廣播電臺，係當時嘅電臺，就係最重要嘅意識形態國家宣傳機器，之前係文字讀物，之後就係電視電影，寫出嚟就係真？講出嚟就係真？FB，IG睇到有圖有片就有真相？如果你到今時今日仲未覺悟，就真係有點那個……。

中央廣播電臺係南京政府繼中央通訊社、《中央日報》之後嘅第三個全國性中央宣傳機構，電臺發射功率為500瓦，每天下午晚上各播音一次，共計三小時。精彩節目內容有演講節目同埋新聞報導，當然所有新聞稿均由中央通訊社提供，絕對唔會好似「香港電臺」咁，插出糧比你嗰位老細。1932年四年後，中央廣播電臺從德國引進新設備進行改建，發射功率擴大為75千瓦，成為整個亞洲發射功率最強嘅廣播電臺，超越日本仔。

同日，全國民用航空會議喺南京開幕，成立《中華航空協會》，社會不斷嚮前行，進入廣播時代，中國人亦由二維空間跳入三維空間，民用航班亦好快出現。8月7號，（共濟會基地）羅馬教廷承認南京國民政府，並訓令在華教士一律服從南京依個新中央，南京呢個六朝金粉之都，再一次成為中國嘅心臟，之後會大興土木，成為一個壯麗嘅國際化大城市。

8月8號，國民黨二屆五中全會喺南京召開，決定取消中美、中日無線電合同，將並大企業招商局收歸國有，8月9號，張學良與日本特使林權助會面，忠告日本政府不要干涉中國內政。8月13號，英國記者辛博森喺北平發表談話，自稱經過勘查，確認張作霖係比日本人炸死，直至依一刻，全國人民先知道大軍閥張作霖已死，而兇手就係日本人，當然日本並唔承認。

8月16號，張學良控制嘅奉天召開金融會議，以挽救當地經濟，決議由官銀號、中國、交通三間行出資購入銀元，鑄造現洋500萬元，以維持奉票兌現，曾經係中國最有信用嘅奉票，短短十零年間已經跌到一文不值，睇到都有啲唏噓，衹能夠歎一句，張作霖及張學良父子水平有限，如果佢哋醒少少，整個天下幾時輪到你蔣介石話事呢？當然東北嘅局面，亦同日本人有千絲萬縷嘅關係，簡單啲講，奉系成也日本（大正），敗也日本（昭和）。

8月17號，國民政府決議將北京清華學校改名為清華大學，將其直屬國民政府管轄（即係收歸國有），1908年，美國退還部份庚子賠款，用於發展中國教育，派遣學生留美，大清政府為此設立留美學務處，呢個機構就成為咗清華嘅前身，1911年，留美預備學校喺北京近郊嘅清華園建成，以清華學堂命名，設立高等科同中等科（我諗程度大約等於今日嘅初中同小學），採用美國教育制度，民國成立之後，改名為清華學校，留美學務處撤銷，所有職權歸於清華學校。1921年起，學校減少招收中等科學生，1924年停招，1925年改收大學部學生，同時設立研究院，到咗1928年，正式正名為大學，到咗今日，仍然係中國兩間最高級嘅學府之一。

中共嘅金融體系，即係今個月正式開始。中共江西東固區委建立東固平民銀行，由區委書記黃啟綬任行長，向當地農民貸款，幫助農民建設經濟。中國嘅「紅色金融」，亦由此發端。東固平民銀行籌集資金3000元銀洋，發行蠟紙刻板印制嘅銅元票（即係銀紙），面額分別為銅圓10枚、20枚、50枚、100枚四種。銅元票發行量不斷擴大，支持咗當地嘅貿易發展，到咗1929年，印咗紙幣二萬元，並由油印改為木刻印刷。

8月30號，紅軍取得黃洋界大捷，保住咗井岡山嘅根據地。上個月12號，紅軍28、39團攻佔酃縣後，士兵委員會根據中共湖南省委嘅決定，進攻湘南。24號，與國民黨軍隊響郴州發生激戰，先勝後敗，剩下不足百人，8月23號，毛澤東親自率領31團前往救援，響桂東沙田同殘兵會合，決定重返井岡山。25號，28團二營營長袁崇全率6個連喺崇義叛變，團長王爾涿直往阻止被殺，紅四軍分兵冒進湘南，損失慘重。

與此同時，井岡山亦岌岌可危，湘贛敵軍探知紅軍主力南下，聯手發動反撲，攻佔井岡山北麓的永新、蓮花、寧崗三縣，由於今日調集四個團猛攻黃洋界哨口，紅31團的兩個連喺朱雲卿、何挺穎嘅指揮下，據險堅守，打退敵人多次進攻，並且用僅有嘅一門迫擊砲擊中敵軍指揮所，敵人以為紅軍主力回援，連夜逃走，井岡山先能夠轉危為安。上次已經講過，最惡劣嘅環境先能夠鍛煉鋼鐵，中共嘅掙扎同試煉，亦只係啱啱開始。

#常威💀 #蔣介石平反系列 #黃金十年 #民國歷史

本土唯一香港土話近代史文本

【常威近代史】第一部《大清亡國關慈禧蛋牛治》，全面開放，免費下載， #freedownload！

Free下載連結

https://play.google.com/store/books/details?id=C3hjDwAAQBAJ

【常公子歷史頻道375回：替大軍閥平反系列之 實踐係檢驗真理的唯一方法】

⛎實踐是檢驗真理的唯一方法，呢句說話完全冇錯，亦係唯物主義者嘅金科玉律。科學固然唔使講，人文科學亦如是，空口講白話，理論多多，唔同嘅專家社會賢達有唔同嘅意見，但真理在何方？真理祇有通過實踐先能夠驗證得出來。凡事要從實際角度出發，絕對唔可以紙上談兵。正如買馬買股票買幣，講到天下無敵都冇用，最後祇有贏錢嗰個先係正確嘅。

♉用賭馬做例子，網上有唔少人賣料，又話內幕消息又剩，到最後問題祇有一個，就係如果貼士係準，根本亦唔需要賣，自己賭就足夠，張貼事講咗出嚟事先張揚，隻馬會熱咗，派彩亦會少咗，道理亦都相當簡單。買馬如是，買股票都如是，財演唱股票，都係為咗想唱高股價，等莊家（或自己）高位出貨獲利，只要你能夠搭上順風車，唔係接最後一根火棒，就會有收穫。

♐實踐是檢驗真理的唯一方法，中國人儒家哲學一早亦都講咗，儒家哲學有一句話叫「知行合一」，要求人嘅言論同佢嘅行為需要統一，空口講白話，空口談道德，其實一啲作用都冇，反而你做嘅事，同你日常生活嘅行為先係最重要，「知」係一回事，「行」亦係一回事，真正嘅「道德生活」並唔係上堂拜佛或者返教會，係要喺日常生活中身體力行實踐道德規律。

✅https://youtu.be/6PuURWFIBcs

💙最新上線，請課金支持

【常威近代史】第八部《最九衰的大軍閥時代》Round 3
https://play.google.com/store/books/details?id=fY8mEAAAQBAJ

【常威近代史】（五百二十五回）
龜兔賽跑係真嘅

1928年嘅8月，表面上好似大局已定，實際上危機重重。蔣Sir崛起之初，日本人一度為蔣Sir感到驕傲，因為蔣Sir係接受日本嗰套嚴格嘅軍事訓練而出身嘅（初級）軍人，可能由於孫文留低歷史遺產嘅緣故，蔣Sir一直同日本關係亦非常唔錯，經常兩邊走，蔣Sir同日本政經高層亦有偈傾，但係隨住蔣Sir勢力日益坐大，日本開始將蔣Sir當成佢哋掠奪北方計畫嘅一個最重要威脅，「濟南事件」，或稱呼為「濟南慘案」，就係日本對蔣Sir發出嘅最後通牒，一係你跪低響我大日本太陽旗下，一係就反面。

蔣Sir知道自己嘅實力，日本人響目前絕對唔可以得罪，或者喺陣腳未穩之前亦都冇能力得罪。而日本人嘅侵略大藍圖，亦都響得到末代皇帝溥儀後全面啟動，佢哋未來要喺東北快速建立一個全新傀儡政權，就係「滿洲國」，現代嘅歷史學家都認為，「滿州國」問題，就係中日戰爭全面開打嘅原因。而一直靠著日本人資助而壯大嘅奉系張作霖，日本亦都響得到溥儀後被放棄（被炸死），張學良喺公佈父親死訊之前，其實已經為自己作出最佳選擇，好明顯，佢決定加入蔣Sir南京國民政府一方。

大家都瞭解，張學良嘅強項並唔係打仗，而係響上海灘飲酒跳舞同打高爾夫球炒股票，當然仲有媾女。蔣Sir向呢位玩世不恭嘅花花公子開出嘅易幟條件，就係畀佢擔任國民革命軍副總指揮，即係一人之下，萬人之上，排序第二嘅國民革命軍副總指揮，呢個係其他軍閥（李宗仁、馮玉祥、閻石山三傻）企圖得到而未能夠得到嘅榮譽。而且，蔣Sir答允張學良嘅部隊能夠繼續留喺東北，唔駛收編入蔣Sir嘅黨軍，保留其獨立性，易幟只係改名相，張學良實際權力同地位其實不變。

或者喺整個局面上，蔣Sir亦無其他辦法處理東北問題，因為佢亦都唔願意再抽出力量對付東北嘅戰役（你估打仗唔使錢），如果佢繼續向張學良奉系窮追猛打，就會中曬日本人計（日本人當然想你咁做，蔣Sir同張學良行埋，亦都係日本參謀部最唔願意見到嘅事）。而且有一點大家要非常注意，南方軍隊打去北方，其實好冇著數，同樣道理，北方軍隊南下中原，實力亦都大打折扣（張作霖嘅奉軍已經用實踐檢驗出我上述嘅真理），南北分野，一直係中國嘅最基本政治格局，直到今時今日都係，重申一句，請睇王家衛《一代宗師》。

仲有一點，蔣Sir允許張學良繼續佔據東北亦有一個更大嘅原因，就係要利用張學良牽制山西軍閥閻錫山，因為蔣Sir根本唔信閻錫山，當時閻石山卻冷手執個熱煎堆，佔據咗北平同埋天津兩個最重要嘅北方工業城市，利用張學良東北軍喺背後牽制佢，就等於要閻錫山帶個狗口罩出街，唔敢反咬主人一口。

據說，這條妙計係蔣Sir喺楊永泰（1880-1936）身上得到，楊永泰係當時蔣Sir最信任嘅智囊，即係佢嘅私人助手，亦係佢所有講稿嘅撰稿人，1936年死於共產黨人之手。

相對於北方嘅形勢，距離北京南方2000英里外嘅窮鄉僻壤井岡山所發生嘅一切，似乎已經被蔣Sir所嚴重忽略。如果當時蔣Sir能夠下令傾盡全力撲滅共產黨，相信井岡山據點絕對守唔住，不過睇牌面，蔣Sir當時冇可能想像得到，爛身爛世毛澤東同班文盲農民階磚三底牌先係佢生平霸業最大嘅威脅。凡事有早知就冇乞衣，你話蔣Sir「勦匪不力」，其實佢亦有苦衷，俾你知道聽日跑馬邊隻馬能夠跑入三甲，仲使返工咩？

評論歷史最大嘅盲點亦都喺呢度，畀你事後知道曬前因後果，或者知道曬所有歷史文獻記述，然後以全知嘅上帝角度指點江山，話邊個點樣做啱？邊個點樣做唔啱？其實全部多嚿魚，世事都係一樣，邊個唔係摸著石頭過河？見步行步呢？如果知道有今日2021年嘅結局，2019年保證冇香港人會上街抗爭。對發生咗嘅事作出事後評論，其實非常「犬儒主義」，不過人生得出一把口，就要隨便搵嘢噏吓算數，真理係認真你就輸了。

同樣道理，當時死守住井岡山嘅毛澤東，何嘗唔係如履薄冰？如果唔係彭德懷千人部隊叛變加入中共，一切已經玩X完。毛澤東喺江西苦戰期間，亦冇辦法出席1928年7月17號到9月1號喺莫斯科舉行嘅中國共產黨第六次代表大會（六大），大會決定中共嘅領導權落入李立三（1899-1967）依位曾經留學法國嘅知識份子手上，李立三亦都好快同毛澤東因為權力而鬥爭。六大上，周恩來順利被選為新嘅政治局委員，正式進入中共核心中嘅核心，但毛澤東只被選為中央委員，並冇進入政治局。而且由於當時通訊設備太差，直到1928年冬天，毛澤東先喺江西知道自己響六大中嘅政治位置。

1928年8月，蔣介石同毛澤東嘅地位同權勢，係差天共地，如果要比喻嘅話，蔣Sir當時係住喺山頂天比高，而毛澤東則係住喺上水嘅公屋，前者當時沉醉於霸業勝利嘅喜悅之中；後者則響貧窮落後的泥潭中掙扎求存。一個睇到光明遠大嘅前途，另一個則毫無前途可言，並且九死一生，當時蔣Sir啱啱滿40歲，而毛澤東35歲，一場龜兔賽跑，正式開始。

#常威💀 #蔣介石平反系列 #黃金十年 #民國歷史

【常威近代史】（五百二十六回）
胡漢民回歸想彈起 傻的嗎

國民黨與中共嘅龜兔賽跑正式開始，一開跑，蔣Sir嘅國民黨拋離中共30幾個馬位，中共仲未出閘，1928年，如果有人同你講中共可以奪取江山，建立中華人民共和國共產政權，賠率係香港隊攞世界盃咁上下，歷史就係成日出乎人意料之外。

當時喺井崗山苦戰嘅毛澤東，連政治局都冇份入，只係中央委員（核心嘅外圍）。距離1935年長征路上「遵義會議」全面獨攬中共權力，仲有7年時間，依7年裡面，毛澤東仲要經歷一次人生嘅政治低潮，差啲乜都冇曬。

講真，邊個會諗到2020年有隻covid-19肆虐世界呢？我成日有個預感，一個小行星撞埋嚟，人類就會全部Game Over，一切一縷青煙，好似恐龍咁樣，所以凡事有今生冇來世，活在當下，及時行樂，好有可能係真理，諗得太遠，顧慮得太多，其實一啲用都冇。

進入1928年9月，中日摩擦進一步加劇，經過「濟南慘案」嘅洗禮，當時全中國人都明白日本仔唔會放過中國，侵略你就梗啦，要避都無得避，鬼叫你李鴻章打輸甲午戰爭咩？9月1號，廣州「各界對日經濟絕交會」發出公告，從即日起強制執行「讎貨」登記（雦，仇也），抗拒唔登記嘅商人即刻沒收貨品，即係話日貨就係讎貨，要市民分清來源地，有效抵制日貨。亦由此可見，當時中日人民嘅感情已經全部破裂。

9月2號，全國學生總會第十屆代表大會喺南京開幕，作出敦請汪精衛回國主持大局等建議。大家睇到未？真係有民主架，真係有言論自由架，汪精衛條阻頭阻勢嘅沐契回國，蔣Sir一定唔X想喇，最好你成世流亡海外，但民間有民意，蔣Sir都冇計，唯有扮大方囉。9月3號，有外媒調查直、魯兩省四年兵匪災害結果，壯丁減少180萬人，財產損失二億元以上，牲口損失20萬元，戰禍連連，人民當然無好日子過。事實上，由1911年辛亥革命開始，去到1949年中華人民共和國建立前，中國人口維持於4億人左右（50年代毛主席就講過中國有四萬萬人），但依個人口數字，早響19世紀末期己經企定，即係話，20世紀頭半個世紀，中國人口並無顯著增長，原因一字咁淺——打仗死得人多。60年代後，國內再無大規模戰禍，人口回復正常增長速度，去到80年代，就10億了，今日是14億了，中國點解唔可以亂？數字講咗畀你知。

9月3號，國民黨元老胡漢民及孫科等回國，蔣Sir派出張群爲代表赴碼頭迎接，上個月，一直離開中國（流亡狀態）嘅胡漢民決定回國，再度與蔣Sir合作治國咁話。8月28號佢抵達香港，響香港，國民黨元老級人馬鄧澤如（1869-1934）勸佢唔好自貶身價投靠蔣Sir，並特製一個鳥籠內裝一隻黃雀相贈，寓意相當清楚，你胡漢民同蔣Sir再合作，就等於成為雀籠內嘅黃雀（任人擺佈），但胡漢文並唔係咁諗，佢早同蔣Sir達成協議，回到南京出任南京政府立法院院長。