大清亡國關慈禧蛋牛治 2

當時嘅輿論就咁樣講：「吳氏今日正有絕好機會，掃除國中離攜分子，統一全國，建樹莫大之功勛，苟能利用此機會，回不難流芳百世，當為國人所崇拜！」

吳佩孚如日方中，點解最後會失敗收場？其中一個致命傷已經響1924年發生中，就係俾媒體炒作到飛天嘅「曹錕賄選」事件，曹餛喺北京驅逐大好人黎元洪，當上大總統，但社會輿論卻認為佢名不正言不順，賄選行為破壞法統。身為直系曹錕partner嘅吳佩孚，聲名亦一落千丈，之前亦都提過，吳佩孚用暴力鎮壓過工人運動，同左派唔啱，而當時左派最強武器，就係社會輿論。

吳佩孚成日強調自己只係個一介武夫軍人，不問政治。但老實講，20世紀嘅中國，又邊有同政治無關嘅軍事呢？呢個比喻，同響立法會內只談民生不談政治之説法有得揮。

另外再補充，吳佩孚係一個民族主義者同傳統嘅人，係大清遺老一員，但係意識形態層面上，佢就只係停留響「民族主義」四個字。人哋玩「共產主義」、「馬克思主義」，意識形態內容深過你，操作高過你，相對對軍人同民眾嘅操控同鼓動亦都強過你，鍾意撚首詩寫吓大字、以中過「秀才」自居嘅吳佩孚，畢竟都係上一個時代嘅人，中國喺五四運動之後，已經進入咗一個全新嘅時代，大家係需要新嘅嘢並唔係舊嘅嘢，長江後浪推前浪，固步自封？死得。

新時代出現，戰爭亦都演化中，1924年五十大壽嘅吳佩孚大概亦唔知道托洛斯基領導嘅紅軍係點樣打敗白軍贏得內戰？不過吳佩孚好快就會知道，共產主義並唔係同你講玩。

1924年5月1號，又到五一勞動節，係共產主義國家最重要一個日子，老細擺大壽，做細嘅一定要全力拾卜，孫文主政嘅廣州亦舉行咗國際勞動節紀念大會，孫文發表演講，會後17萬工人群眾舉行遊行慶祝，聲勢浩大（老細我做到嘢呀）。

5月3號，孫又委任許崇智為粵軍總司令，蔣介石為陸軍軍官學校校長兼粵軍參謀長，廖仲愷為黃埔軍校黨代表。

5月5號，黃埔軍校第一期學生入學，一個新時代正式誕生！真正八方風雨會廣州！

#常威💀 #大軍閥平反系列  #大軍閥 #民國歷史

【常公子歷史頻道309回：替大軍閥平反系列之 #蔡元培】

♉蔡元培，近代史上一個壞偉人，因為係佢一手將中國依個民族，由野蠻狀態帶向現代化，由佢一手打造嘅北大模型，更加成為中國近代史嘅文化基地同良心往處，亦主宰著整個近代史背後嘅癹展脈絡。

♐借住今日嘅篇幅，我想講蔡元培嘅長女蔡威廉，1904年6月3日，蔡元培同佢第二個夫人黃仲玉響上海生下長女，取名蔡威廉，名字源於德語「Wilhelm」，依個德國男孩式嘅名字，寄託着蔡元培赴德國求學、教育救國的嚮往。1913年隨父母前赴法國，入當地教會學校讀書。1916年回國入北京孔德學校，1923年又隨父母到比利時，入布魯塞爾美術學院學習繪畫；後到法國里昂美術專科學校，專習油畫。1928年回國，成為國立杭州藝專西畫系教授。

♐當代油畫巨匠吳冠中（1919-2010），蔡威廉就係佢嘅啓蒙老師，1928年，林風眠任國立藝術院院長，聘請畢業於巴黎大學嘅林文錚（1903-1990）為教務長，蔡威廉當時24歲，任教於國立杭州藝專西畫教授。二人相戀，才華出眾嘅林文錚深得蔡元培賞識，暗中為女兒同林文錚撮合。1928年結婚，隨後一直任教於杭州國立藝專。1938年中日戰爭爆發，蔡威廉隨丈夫到達昆明，撫養五個兒女。1939年5月在昆明家中產下一女後，因產褥熱而身亡，享年34歲。

♈再講講蔡威廉丈夫林文錚，蔡威廉死後，林文錚一直從事藝術教育工作，終於捱過無盡黑暗，看見新中國誕生，有人提議過佢去臺灣，但佢選擇留低，建設祖國。建國初期，林文錚係一位學貫中西、博學多才知名學者，論著頻頻在報刊、雜誌發表，文學作品亦受讀者歡迎，舒情散文同詩歌文采極佳，1954年春，林文錚續絃，與南京大學出版科校對員連棣貞結婚，當時林文諍已經50歲。

🔯1957年春天，百花齊放運動（引蛇出洞）。林文錚批評政府，換來一頂右派帽子，1957年11月，判刑二十年，直至1975年四人幫倒臺後先釋放離開監獄。1980年林文錚被當選為杭州市政協委員。他曾經對朋友講過：『遺憾的是坐牢浪費了我人生精力最旺盛的年華，而今想為社會出力報效時已是心有餘力不足。』，1989年，林文錚教授因患貧血症在杭州病逝，享年87歲。

♏蔡威廉、林文錚嘅故事，只係芸芸眾生嘅其中兩個。

♑【常威近代史】第五部《霹靂大忠臣對決無敵大買辦》電子書上架（條download link在下面），請大家課金支持我一直走落去，直至劉少奇骨灰到達北京王光美手上…

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上4000訂戶！

✅https://youtu.be/6g-o-w0QCOM

【常威近代史】（四百三十三回）
孫文與陳炯明的恩恩怨怨

講到1924年孫文聯俄容共政策進入實踐性階段，訓練軍官嘅黃埔軍校學生入學，歷史進入全新里程碑。喺呢度想補遺小小問題，令大家更清楚孫文當年嘅所作所為。

時光倒流，我哋先返翻去幾年前，由20年代初開始，聯省自治思潮同運動不斷蔓延全國，冇謂去避，就係搞獨立運動，當時嘅中華民國其實處於大分裂狀態，軍閥割據山頭行自治，不過大部份軍閥都話自己係中華民國一員（不過唔會將收到嘅稅款上繳中央啫），講就「一國」，做就「兩制」，你Ok我就Ok，好似閰錫山嗰類軍閥，四圍都係。

真正想模仿美國聯邦制，搞憲政自治（或獨立）嘅省份，當時中國有三個，分別係湖南、廣東同浙江。湖南係中國民主自由同自治運動嘅先驅者發祥地，所以先能夠孕育出曾國藩、譚嗣同、唐才常、毛澤東同劉少奇等偉大歷史人物。首先要搞「聯省自治」——美國聯邦制概念，即每一個省為一自治國家，財政立法司法獨立自治，由一個中央聯邦政府統轄國防同外交——係湖南省，主要推手趙恒惕（1880-1971），我哋今日並唔係想講湖南省，所以輕輕帶過，破壞湖南省自治嘅人，係國民黨唐生智（1889-1970），湖南省自治運動期間，年輕嘅共產主義信徒毛澤東都係百分百嘅支持者。

浙江省嘅自治運動亦響20年代初同時發生，高潮喺後來孫傳芳（1885-1935）執政年代，亦唔係今日嘅主題，我哋今日嘅主題係廣東，廣東自治最主要推手係阿烟哥，一個真正嘅、一生不羈放縱愛（民主）自由嘅陳炯明（1878-1933）。

（＊以下講陳炯明歷史，我好似講過，如有重覆，敬請原諒）

陳炯明係清朝嘅秀才，讀書人，廣州法政學堂首屆畢業生，1909年中國第一次選舉中當選為廣東諮議局議員，辛亥革命後一度擔任廣東代理都督，有人話佢係無政府主義者，但係我認為佢係美國聯邦制嘅支持者，佢認為中國太大，高度中央集權根本唔適合，應該實行聯省自治，搞美國聯邦制個套，作為第一步，陳炯明嘅目標係將廣東建設為學校、住房、公路、康樂同其他公共設施齊備嘅模範省，中間經歷過唔少波折，有一段時間陳炯明甚至失勢，帶兵進入福建深山韜光養晦咗幾年，之後反攻廣東重新執政。

陳炯明嘅關係同孫文若即若離，與其話佢係孫文嘅支持者，不如講佢想利用孫文革命第一號KOL嘅名氣，實踐佢心目中廣東省自治嘅夢想。孫文二十年代初期能夠回歸廣東主政，主要係陳炯明「粵軍」軍事力量所促成，當然冇孫文KOL支旗仔號召群眾，陳炯明亦冇可能成功反攻廣東，打走仆街龍濟光（1868-1925）。

但當時孫文所想，並非只係想搞廣東省獨立自治，而係想利用廣東作為據點，展開北伐，統一（征服）全國。兩個人嘅出發點根本唔同，所以產生衝突亦都係無可避免。

早期，陳炯明係廣東省自治嘅主要操盤手，1921年初，廣東省省議會選出省憲起草委員會起草省憲，同年12月，正式通過《廣東省憲法草案》，之後頒佈「暫行縣自治條例」、「暫行縣長選舉條例」同「暫行縣議會議員選舉條例」，令省內地方政府有部分事務的決策權，同時陳炯明亦支持司法獨立，喺佢主政廣州期間，廣州建立起立法、行政、司法、財政、審計等機構，廣東自治蒸蒸日上，陳炯明認為「中國地方自治為達到共和唯一之路」、「中國聯治可謂世界自治國之模範」。

1921年4月7號，孫文宣佈「被」選為「中華民國大總統」，其實呢個係中國共和以來，第一次出現同中央政府對立嘅政權，任何其他省份都冇咁樣做過，亦冇想咁樣去做。另建中央，相信亦唔係當時孫文嘅拍檔陳炯明嘅心意，「另建中央」同「聯省自治」畢竟係兩個唔同嘅政治體制，當然具體執行上，大致上相同。

二人決裂，由一件事觸發，1922年5月，其實內心深處好鍾意打仗嘅孫文宣佈（講）起兵北伐，要打去北京推翻當時嘅大總統徐世昌，所持嘅理由係，徐世昌係「非法總統」，因為總統大選時，22個省中有5個省冇參加，當然包括廣東省在內，徐世昌反應係，佢宣佈願意辭職，並要求「第二個總統」孫文一齊辭職，以便實行新嘅全國大選，孫文當時答應咗，「與非法總統同時下野」。

1922年6月，徐世昌係一項重大嘅外交談判成功之後，守諾言遞信請辭大總統職務。

依場外交談判關係到山東半島，山東本為德國租借地（殖民地），響第一次世界大戰結束後，1919年嘅巴黎梵爾賽和會中，山東並冇交還俾中國，反而畀咗協約國嘅另一個成員日本帝國，相信大家都好清楚，呢件事惹起全國人民公憤，引爆咗「五四運動」，亦係中國「百年恥辱」嘅象徵性事件。不過冇人留意嘅係，其實梵爾賽會議嘅不公平裁決，只係維持咗短短三年。響1922年徐世昌總統任內，中華民國通過談判，響《華盛頓會議》上迫使日本交還山東，但依件外交大勝利比後來歷史書刻意隱瞞，大家應該知道點解？

當然日本交還山東，同中國亦無直接關係，只係英美兩國家抑壓日本喺中國嘅擴張。

1922年6月2號，當徐世昌簽署收回山東嘅條約後，佢做嘅第一件事就係提交辭呈，履行佢同孫文嘅承諾。

咁你估孫文點反應呢？當然，作為一個政治家，唔守諾言就一定架啦，但係孫文之後做嘅，就畀咗陳炯明一個藉口入佢囉。

下次繼續……

#常威💀 #大軍閥平反系列  #大軍閥 #民國歷史

【常公子歷史頻道310回：替大軍閥平反系列之 #蘇維埃】

♉列寧和托洛斯基布爾什維克建立世界上第一個共產主義政權，俄國蘇維埃Soviet，即後來嘅蘇聯，無可否認，係20世紀頭號一等一大事，唯一可與之相比較，個人認為，就係美國喺1945年向日本投下兩枚原子彈，兩件歷史事件都震撼整個世界，列寧建立嘅共產主義政權，何嘗唔係向世界投下一個震憾核彈呢？

♊在列寧之前，世界上祇有資本主義帝國主義，簡略去講，祇有一種生產關係同一種經濟模式，或再簡單去講，就係「剝削」，不論共產主義是好是壞，共產主義出現後，人類始終有多一個選擇，之後半個世紀，全球有三分一人口活於共產主義國家中，我哋而家生存當中嘅世界同格局，亦係由此為基礎而建立起嚟，一切嘅恩怨、一切嘅鬥爭，全部源於「共產主義」與「資本主義」兩種唔同嘅意識形態磨擦鬥爭而遺留下來，而且尚未完結……

♐有一個盲點，經常有人講——其實資本主義係完勝共產主義，衹要睇吓近代世界兩者之間嘅距離，或活響共產主義國家同資本主義國家民眾間嘅生活水平比較，就會一清二楚。但我想話畀大家知，我哋今日所接觸嘅資本主義，同19世紀所行的資本主義，其實係兩回事，近代嘅資本主義係改良版2.0式3.0...，內裡有工人權利、大衆福利及平均財富等等概念存在，而19世紀嘅資本主義，係統統都冇，咦？而點解會有資本主義改良版2.0？全因為世界上出現咗共產主義，資本主義需要與它抗衡同鬥爭，先有自我完善同改良嘅必要，依一點大家要清清楚楚。

⛎今集youtube，亦有一個非常重要嘅中國歷史人物登場，佢係毛澤東，字潤之。「澤」同「潤」都有用水灌土地溉嘅意思，當時毛澤東所面對嘅中國，係一片貧困乾枯嘅絕望土地，佢必須要用有嘅養分嘅水源滋潤枯土，使之回復生機，重新出發。而當時少年毛澤東相信令中國重生之水，就係馬克思主義，就是共產主義，對此，毛澤東終其一生、堅信不疑。

♑【常威近代史】第五部《霹靂大忠臣對決無敵大買辦》電子書上架（條download link在下面），請大家課金支持我一直走落去，直至劉少奇骨灰到達北京王光美手上…

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上4000訂戶！

✅https://youtu.be/sL_9yV9W0aM

【常威近代史】（四百三十四回）
權力門爭中唔係朋友就係敵人

1922年中，亮風高節嘅徐世昌（1855-1939）宣佈下野，希望孫文同佢一齊辭職，締造一個南北統一嘅環境，用選舉方法產生新一任中華民國大總統。當時徐世昌已經67歲，係人瑞級，好話唔好聽，介乎退休年紀，拉埋啱啱夠五十零歲嘅孫文落水，其實係除笨有精，以退為進，鬼叫你孫文應承過我？

外號「水晶狐狸」嘅徐世昌，自然八面玲瓏，壇數絕對係孫文之上。你有張良計，孫文亦有過牆梯，完全當「一齊下野」單嘢冇件事，社會輿論呼籲孫文履行諾言，佢就有你冇你，繼續堅持「北伐」，由此可見，國父真係幾鍾意打仗，不過唔怪得佢，「黷武主義」係當時嘅大潮流，除非你唔將孫文當成係軍閥嘅其中一個，但無論如何，佢都係「軍閥時代」中嘅其中一個大軍閥。

北京方面，由上屆大總統黎元洪暫時履行大總統職權，以待下一次大選，當然黎元洪面臨直系曹錕嘅巨大政治壓力，大家都知道，之後嘅總統選舉由曹錕勝出，亦叫做「曹錕賄選」事件，曹錕遺臭萬年。

但依件事——孫文唔肯遵守諾言下野——就成為咗佢同陳炯明嘅決裂導火線，孫文一直希望自己友蔣介石取代陳炯明，統領廣東嘅軍力，陳炯明亦心知肚明，多次排斥蔣介石插入軍隊奪權，所以孫文一早已經唔妥佢！加埋徐世昌下野後，孫父命令陳炯明嘅「粵軍」幫佢北伐，陳炯明嘅軍官拒絕服從，並且喺廣州市張貼告示：

「國會恢復，護法告終；粵軍將士，一致贊同；請孫下野，表示大公。」

講得清清楚楚，要你孫文下野，亦即係作反！1922年6月12號，孫文喺廣州召開記者招待會，會上佢有以下一番言論：

「若不服從命令，我不能以武力壓服人，人說我孫中山車大炮，但這回大砲更是厲害，不是用實心彈，及用開花彈，或用八吋口徑的大炮毒氣彈，不難於三小時內把他六十餘營陳家軍變成泥粉……」

擺到明要同你陳炯明攤牌！道理亦都好簡單，八個字：「順我者昌，逆我者亡」。

陳炯明忍無可忍，終於響6月16號發動兵變，決定攻入廣州孫文屋企（總統府），但孫文事先收到風，淩晨一點帶同機密文件，包括同蘇俄代表密談嘅密件，由幾名護衛護送下秘密離開，前赴碼頭，登上永豐艦脫險，史稱「孫中山蒙難」事件。（第二次鳥，第一次響1896年倫敦，Kidnapped in London）

值得一提嘅係，孫文當時並無帶走老婆宋慶齡（1893-1981），當時宋慶齡仲懷有孫文骨肉，孫文漏夜著草，宋氏完全唔知情，等到黎明時份，陳炯明軍隊進攻總統府，發動武裝兵變，槍林彈雨交火中，宋慶齡先知道老公原來已經自己走咗上永豐艦。

宋慶齡喺衛兵保護下離開總統府，九死一生先去到廣州街頭，但旋即聽見炮聲隆隆，原來佢老公已經喺永豐號上下令炮轟廣州，大家都知道，孫大炮依一次真係孫大炮，炮炮打向廣州市區，傷及無辜市民。當時數十名中外記者上艦訪問佢，希望佢首先停止炮打廣州，但係孫文話係陳炯明首先出手，佢對此相當不滿，因此為咗維持正義，命令海軍向廣州城開炮。（心態上可能係我得唔到嘅嘢，你都唔可以掛得到？）

孫文亦好似唔記得咗佢老婆響邊樹？一邊向廣州開炮，一面談笑風生，似乎毫不在乎宋慶齡生死。宋慶齡死裡逃生，但孫文冇理佢，之後佢自己打電話畀嶺南大學校長鍾榮光求援，鍾先生派出大學電船嚟接佢，先將孫夫人送上永豐號，冚家團圓。

之後宋慶齡返回上海家中，途中小產，而且今後再不能懷孕。

更有一個講法，話孫文著草離開嘅時候，冇帶埋老婆，係想留低妻子分散陳炯明嘅注意力，等自己可以儘快登艦，對於呢種講法，我完全唔相信，以國父孫文嘅人格，佢點會咁樣做？

孫文炮打廣州，並唔能夠挽回佢被陳炯明驅逐出廣州嘅敗局，8月，返到上海，孫文同宋慶齡會面。即由嗰個時候開始，宋慶齡以「孫夫人」嘅名義開始活躍於公眾眼前，佢由孫文嘅老婆，變成咗一個國際知名嘅政治人物，亦開創咗中國領導人妻子踏足政治嘅先河，大概當時佢知道已經唔能夠生育，亦冇辦法再做一個傳統嘅「賢妻良母」，於是乎搖身一變，轉換自己嘅身份同角色，對孫文嚟講，係利多於弊。

當1923年1月，支持孫文嘅滇桂聯軍將陳炯明逐出廣州城，孫文回歸再度執政之時，又係另一個（聯俄容共）世界。亦有傳聞話孫文係用錢收賣滇桂部隊幫佢奪回廣州？至於孫文嘅錢邊度嚟？大家自己可以推理吓。

陳炯明被逐出廣州後，繼續帶領殘部響惠州一帶同孫文糾纏，直至1925年，孫文派出蔣介石率黃埔軍校學生軍兩次東征，先徹底打垮陳炯明。尤其是第二次東征，蘇聯派將官直接指揮部隊行動，陳炯明被迫解散軍隊，退居香港。再提一次，當1933年陳炯明病逝，佢係一窮二白，呢位仁兄其實非同小可，可惜歷史並冇俾佢太大嘅發揮機會。

連續用兩集舊事重提，補漏孫文同陳炯明嘅恩恩怨怨，無非都係想大家對孫文加深了解，孫文重奪廣州，採用聯俄容共政策，建立黃埔軍校，之後承繼人蔣介石北伐成功，實際上係中國近代史一個重要嘅分水嶺……

大江東去，浪淘盡多少風雲人物？一個全新嘅時代即將誕生，下次再由1924年6月黃埔軍校舉行開學典禮重新開始……

#常威💀 #大軍閥平反系列  #大軍閥 #民國歷史

常公子歷史頻道311回：替大軍閥平反系列之 #少年毛澤東】

♉世情的確係變化萬千，冇人能夠預料得到，一兩個月前我仲認為中美必定唔會發生熱戰，因為打仗對大家都冇好處，現代戰爭成本太高，發動戰爭之前要好好計數，否則會得不償失，天下萬物皆由金錢出發，條數計唔掂，冇人會喐手。我上述嘅講法，基於人類係一種理性嘅動物作出發點，但「人類係一種理性嘅動物」呢個命題，有好多時候並非一定準確。

♊美國要阻止中國崛起，以維持世界美圓金融霸權，到今時今日，已經係百分百嘅明確事實——否則「美國以印銀紙發債維持霸主地位」依個二次世界大戰以後建立起來的世界遊戲規則難以維持。呢一條係美國嘅底線，衹要整個世界嘅金融體系仍然以美金作主要結算貨幣，一切皆無問題。唔越過條底線，萬事有得傾，觸碰到底線，就係生同死嘅問題，而生死問題只可以用打仗解決。

♍中美之間，中國完全處於被動位置，目前採用嘅戰略係兵來將擋水來土掩，俗語「頂住先」，好似以前咁成為美國附庸國，靠美國年年泵水發展向上，亦冇乜可能，一來美國唔想，二來亦都唔夠錢。大家唔好懷緬過去，過去咗就過去咗，冇人能夠返轉頭。比較好笑嘅係，最近我仲認識好多人，不斷強調自己響上一個世紀點威點巴閉？各位大佬，今年係2020年了，仲去講廿幾三十年前的美好風光，係咪真係過分咗啲呢？中美關係亦如是，冇可能返翻去二十世紀以前如膠似漆嘅年代，目前大家正摸索一條新嘅路徑相處落去，終點或最後嘅結果冇人知道，實用主義者鄧小平講過，「摸著石頭過河」，大概係目前最佳嘅表述方式。

♎中美平起平坐？互相合作？亦都冇咁嘅可能。一個字頭唔能夠有兩個大佬，兩個大佬輪流坐館純屬幻想。否則任達華就唔需要喺石梨貝水塘殺死梁家輝。我哋當然「渴望」和平協商可以解決問題，但係我哋係唔應該「寄望」和平協商可以解決問題（否則世界上冇需要有軍火商），「一山不能藏二虎」的確係真理，最後衹能夠分出邊隻老虎比較好打。

♌無論如何，最後希望世界和平🙏🙏🙏

♑【常威近代史】第五部《霹靂大忠臣對決無敵大買辦》電子書上架（條download link在下面），請大家課金支持我一直走落去，直至劉少奇骨灰到達北京王光美手上…

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上4000訂戶！

✅https://youtu.be/5Y-zn22lXI4

【常威近代史】（四百三十五回）
黃埔軍校，開學！

1924年6月16號，設於廣州黃埔嘅國民黨陸軍軍官學校舉行開幕典禮，宣佈正式成立。呢一個係一個重要嘅日子，因為由黃埔軍校訓練出嚟嘅軍官，之後將會橫掃整個中國近代史！

成立黃埔軍校嘅概念，源於1921年12月，孫文同共產國際代表馬林會面嘅時候，由馬林提出創立軍校訓練革命軍人為組織所用，1923年8月孫文派出蔣介石、張太雷等組成「孫逸仙博士代表團」，前赴莫斯科取經，考察蘇聯黨務同埋軍事組織，於是就照板煮碗，將托洛斯基訓練「紅軍」一套方法移植返中國，建立黃埔軍校。

如果你要我講黃埔軍校同其他軍校最大唔同嘅地方喺邊樹？我會答你黃埔軍校係全力建立一支「意識形態軍隊」，並非單純訓練「職業軍人」，響軍事學上，喺嚮前行咗一大步。打仗除咗打人打軍備打錢打補給之外，最重要係打「意識形態」，用俗語講，即「意志」，或「戰意」，當上下一心，人人為咗一個「信念」而戰，所有嘅軍官都係「turn believers」，咁就可以打高幾班，就算武器唔夠人勁、錢唔夠人多、甚至冇糧出冇得食，憑著戰意同士氣，或者根本唔卵怕死，都可以彌補差距。

當然意識形態化軍隊亦唔係乜嘢新鮮事物，縱橫亞洲嘅日本帝國，就係一支意識形態軍隊，佢哋願意為天皇而戰死，你可以話佢哋係蠢到加零一，但係的確係勁。古代歐陸，用宗教發動戰爭，多不勝數，其實又係打緊意識形態，為天皇為耶穌為穆罕默德為和平為公義為民主為理念為資本主義為共產主義……用嚟掩蓋戰爭背後嘅真正目的，亦係常用手法。重提一次，後來蔣介石北伐成功，亦表明佢贏嘅係贏在軍隊有一個「-ism」響背後支持，贏在信念夠硬淨，至於信念係乜嘢來？點先出現？就係意識形態問題。

至於何謂「turn believer」？就真係人間世大道理喇，任何人都可以係一個「believer」，口講要相信一件事一個人有幾難呀？口講相信，但內心可以唔Q相信；或者我相信你，又並非因為真正相信你喎，而係因為其他理由而口講相信你，或者相信你，會帶嚟某啲著數，昇職加薪揾多啲，又或者可以保障自身安全，又或者大石砸死蟹，我都唔敢講唔相信你……情況有好多種，總之就唔係真心愛你，understand？

咁點先算真心愛你？點先將個「true」字加響前面？true love同true believer一樣，要pure要true，就要一心一意，全無異心，願意為愛情而死，願意為理念而上戰場，不計較任何代價，先夠pure先夠true。我哋由細到大，亦接受一套教育，要pure要true先係美德，「識時務者為俊傑」、「成為一隻變色龍」從來都係壞事、從來都係不道德。呢個概念，應用係日常倫理其實係百分百正確，但推到去政治層次，就未必一定啱囉。

為愛情而殉道，羅密歐與茱麗葉流芳百世；但係理念而戰上戰場掘地雷被炸死，又有邊個記得你呢？

孫文帶同夫人宋慶齡參加黃埔軍校開學典禮，孫民發表演說，稱創建軍校，係一個「獨一無二的希望，就是創造革命軍，來挽救中國的危亡」。胡漢文代表孫文致訓詞：

「三民主義，吾黨所宗，以建民國，以進大同， 咨爾多士，為民前鋒，夙夜匪懈，主義是從，矢勤矢勇，必信必忠，一心一德，貫徹始終。」

上述一段說話，就係黃埔軍校校訓，亦係後來中華民國國歌歌詞。

蔣介石爲黃埔軍校校長，廖仲愷為國民黨黨代表，黃埔軍校最高領導機構為校本部，由孫文、蔣介石、廖仲愷三人組成。下設政治、教授、訓練、管理、軍需、醫學六個部門，政治部主任為戴季陶（1891-1949），教授部主任為王柏齡（1889-1942），清一色國民黨黨員。建校之初，中共代表未見任何影響力，重申一次，孫文「聯俄容共」，「聯俄」在前「容共」在後，正如「一國」在前「兩制」在後，係有先後次序、主次之分。

黃埔軍校招收一期學員350人，編為三隊，再收備取生120人編為第四隊，學生總人數為470人。

其實當時嘅中華民國，最財雄勢大嘅人係奉天大軍閥張作霖，1924年6月15號，張作霖召開東三省金融會議，決定合併東三省官銀號為「東三省銀行」，即設立「中央銀行」制度，並且統一發行鈔票！其實「奉票」係1905年張作霖起朵嘅時候已經開始存在，係東北一帶流通嘅鈔票，不過多年來欠缺統一管理，今日張作霖獨霸東北，自然亦要統一鈔票發行制度。

張作霖設立中央銀行，統一發行鈔票，無非都係利用政治夾實你班有錢佬同資本家，另一方面牽制日本人，最重要嘅目的係籌募軍費，預備反攻中原，打第二次「直奉戰爭」，不過喺張作霖治理下嘅東北，奉票曾經成為全中國一種最有信用嘅貨幣，貨幣信用要同政權穩定直接掛鉤。

亦曾經有傳聞，為咗打擊張作霖奉票嘅信用，直系曹錕甚至印製咗一批假奉票流入東北，玩金融戰爭。當時嘅中華民國，市面上流通嘅貨幣五花八門，加上有啲鈔票製造手工異常粗糙（手寫都得），模仿非常容易，我諗呢個亦係當時中華民國經濟一路低沉嘅理由之一，可能唔係之一，係最重要嘅理由。

結語係：中國統一貨幣制度出現，時間係1949。

#常威💀 #大軍閥平反系列  #大軍閥 #民國歷史

【常公子歷史頻道312回：替大軍閥平反系列之 #西原借款】

♉金錢嘅流動，係社會運行嘅血液，人民嘅焦慮，對社會嘅不滿，甚至產生嘅社會動盪，絕大部分同金錢有關。而金錢嘅問題，就係分配不平均嘅問題，「不患貧而患不均」係絕對正確嘅定律，就算一個社會如何富裕，如果財富只集中在小部分權貴手上，始終會出現問題，問題係結構性嘅，無法可以解決。

♉社會主義嘅出現，就係為咗解決上述問題，社會主義者希望一個社會能夠按人民需要而分配財富，從而令到有需要嘅人得到協助同基本溫飽，社會主義事實上並唔渴望財富能夠完全均分，畢竟每個人嘅能力同埋付出都有所相異，有能力嘅人可以獲得較多嘅財富和利益，係合理嘅。更何況，絕對平均分配根本係一種幻想，冇可能實現。過往幾場「共產公社式平均主義」實驗話比我哋知，冇可能work，甚至會帶來嚴重嘅反效果。

♈理所當然的，平均主義有可能實現，就關乎資源有多寡，同人民數目有多少問題，100萬由五個人分，每人得到20萬，當然冇問題；但如果100萬有100萬人分，每人最後分得一蚊，就係大問題。所以好多調查都講畀我哋知，世界上人民生活得最幸福嘅國家，排名頭幾位通常係芬蘭、荷蘭、瑞典、挪威等北歐國家，原因並非佢哋嘅政治體制或社會制度有幾好，只因爲地廣人稀，粥多僧少，自然萬事好商量。

🔯所以，如果希望整個地球嘅人類可以活得更幸福，大前提係減少人類數量，純粹係分配嘅問題，地球目前人口大概76億，三四十年後會去到100億到達高峰，之後先會響高峰滑落（呢個係最樂觀估算），所以在我有生之年，睇嚟情況只會越嚟越嚴重，將有限嘅資源或財富作更有效或更平均嘅調配，亦係唯一嘅出路，否則就祇有大規模的殺戮同戰爭將會降臨世界。

♍有人話，40歲後仍然係左膠，智力一定有問題，我唔否認我嘅智力有問題，畢竟世界唔能夠平均或達到平衡，就係因為人類智力有高有低嘅問題，我的確屬於「低」一面嘅範疇，亦係無法否定嘅事實。

♑【常威近代史】第五部《霹靂大忠臣對決無敵大買辦》電子書上架（條download link在下面），請大家課金支持我一直走落去，直至劉少奇骨灰到達北京王光美手上…

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上4000訂戶！

✅https://youtu.be/VHRteQ8YLSk

【常公子歷史頻道313回：替大軍閥平反系列之 #美日兩隻塘邊鶴】

♏個人認為20世紀有三件事最為重要，第一是1914年爆發嘅第一次世界大戰，第一次世界大戰出現，原因錯綜複雜，但歸結起來，其實係「仇恨」兩個字，而且交戰雙方陣型對對方的仇恨，係被唔同理由放大咗100倍，之後睇返，第一次世界大戰完全可以避免，當然當時嘅人對所謂現代戰爭仍未能夠完全瞭解，亦嚴重忽略現代戰爭嘅殺傷力同破壞力，歐洲人對發生響1905年嘅第零次世界大戰——日俄戰爭——視而不理，亦冇汲取任何教訓，結果隨便開動碎肉機嘅開關掣，最後將自己同時搞成肉醬。

♐第二件最重要嘅事，喺美國向日本長崎同廣島投下兩枚原子彈，原子彈嘅巨大殺傷力不但結束咗第二次世界大戰，而且為人類帶來接近半個世紀嘅和平黃金年代，從原子彈爆發嗰一刻開始，人類先開始唔敢隨便發動大型戰爭，否則玉石俱焚。而兩枚原子彈，亦都奠定咗美國世界霸主嘅地位，由美國作為意識形態核心所開展出來嘅20世紀下半葉，就係我哋身處過活嘅時代，直至今日。但必須明白，路總會有盡頭，下一段路喺邊度？暫時未能搵到。

⛎20世紀，亦係一個「共產主義」同「資本主義」兩種唔同意識形態鬥爭嘅大世紀，天下二分，冷戰五十年，某程度上，第二次世界大戰亦係呢場意識形態鬥爭嘅序幕。終於到咗1991年，大國蘇聯響戈爾巴喬夫領導下，無聲和平解體，其消滅崩潰速度之快同過程之平靜無聞，縱觀整個人類5000年歷史上，無出其右。但蘇聯解體，並非意味住兩種意識形態嘅鬥爭結束，蘇聯留低嘅一切，由中國完全承繼，直至21世紀，開啟另一個冷戰時代，正正就係我哋今日所處嘅世界格局。

♎歷史係一面鏡，能夠比我哋清楚瞭解過去，同時展望未來，至於能否從歷史汲取當中教訓，則冇可能寄予厚望，人類畢竟係一種善忘嘅動物，只擁有金魚記憶。

♑【常威近代史】第五部《霹靂大忠臣對決無敵大買辦》電子書上架（條download link在下面），請大家課金支持我一直走落去，直至劉少奇骨灰到達北京王光美手上…

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上4000訂戶！

✅https://youtu.be/EcDV7vpYKmw

Michael Jackson變白係因為佢患咗一種叫白癜風嘅皮膚病，呢隻病會令到病人冇辦法產生黑色素，驗屍報告已經證實咗

完全唔關漂白事

【常威近代史】（四百三十六回）
究竟係質重要？抑或係量重要？

1924年7月1日，内蒙古改名為「蒙古人民共和國」，響蘇聯背後支配下成為一個獨立國家，行共產主義制度，正式脫離中華民國，成為蘇聯同中國之間嘅緩衝帶。外蒙古一大片土地，原本係清帝國留下俾中華民國嘅國土遺產，不過中華民國成立之後，政治局面立立亂，根本對邊陲之外蒙古鞭長莫及，冇辦法作有效管治，人哋要獨立，你亦吹佢唔漲掹佢唔長，況且從來外蒙古不嬲都係自成一派，有自己嘅文化、宗教同語言。

成日有人講，外蒙古獨立係中華民國嘅巨大失誤，甚至有人話關孫文蔣介石事，其實關佢哋忍事？大家亦唔好講乜嘢「自古以來」乜乜乜物物物，藉口啫，呢個世界永遠冇話邊個屬於邊個，一切純屬權力同政治，你有Power就係正確，亦係政治正確。Power就係錢就係軍事力量，並唔係道德光環同仁義道德，後者屬於錦上添花嘅美麗糖衣，國家有錢有Power，自然可以揾文棍砌得好靚好正，歸根究底，亦都係國家有冇錢嘅問題。

當時中華民國中央政府窮到底褲穿窿，春袋都跌咗出嚟外露抖涼，只係甩咗半個蒙古其實相當好彩，如果英國人狠心啲，西藏已經一早可以獨立，西藏獨立，新疆亦隨時不保，咁個中國（傳統意義下嘅中國）就會冇咗50％……

隨著孫文「聯俄容共」政策推行，國民黨同中共亦進入合作蜜月期，之前講過黃埔軍校建立之初，國民黨係排斥中共黨員加入，不過孫文既然收得蘇聯錢，點都要做得好好睇睇，中共響廣東嘅勢力，亦開始壯大起嚟。

7月3號，「廣州農民運動講習所」正式開幕，根據6月30號國民黨中央執行委員會會議決議，由國民黨中央農民部主持，共產黨直接負責，兩黨合辦「農講所」，教導廣大農民革命意識，首屆農講所主任就係海豐人、畢業於日本早稻田大學、之後建立蘇中國第一個蘇維埃嘅「農民大王」中共黨員彭湃（1896-1929），首批學員38人，其中仲有兩人係女性，多數都係參加個革命運動、有一定經驗嘅學生、農民同埋工人。

講習所以培養「堅忍卓絕之農民運動戰鬥員」為宗旨，學員要閱讀各種革命書刊、進行與國民革命為中心內容的政治教育，以提高其思想政治覺悟，目的係為咗進行武裝鬥爭以及軍事運動教育。「農講所」並唔係學術機構，而係軍事機構，除咗聽書，學員仲要接受正式軍事訓練，使到學員畢業後，能夠指導農民組織自衛軍，成為農民武裝嘅領導者。

「農講所」學員亦組織實地參觀學習，調查研究農村情況同農民問題，以增強學員從事農民運動嘅決心同埋能力，不過有一樣嘢真係要講講，「農講所」第一屆7月3號開學，8月21號就舉行畢業典禮，前後只係兩個月都唔夠，係一個不折不扣嘅軍事「速成班」，畢業典禮上，孫文到場致詞，33個畢業生中，有24個被委派為國民黨中央農民部特派員，分赴廣東各地，開展農民運動工作。去到1926年9月，「農講所」一共辦咗6期。

兩個月貨仔嘅速成班，究竟可以學到啲乜呢？睇返成個中國近代史，我哋會發現好多人話去外國留學、又去日本接受軍事訓練，又有好多學堂，又有好多速成班train人，但學習時間往往好短，好多時候幾個月貨仔就搞掂，長都係一年半載就話畢業？大佬，讀個正式degree要三四年喎。當年大清帝國嚴復（1854-1921）做過校長嘅北洋（天津）水師學堂，課堂四年制，實習三年先可以做軍官架！

由此可見，世道越來越即食，要講求效率，唔需要深入亦唔需要理論堅實，總之啱就埋嚟，最緊要有人圍爐取暖，人多好做事。係「質」同「量」嘅問題，咁究竟係「質」重要？抑或「量」重要？質與量嘅二元思辯，即係日常生活中嘅大題目，我哋嘅社會我哋嘅人生我哋嘅存在我哋嘅生活，究竟係要求質？抑或要求量？前者是個人主義，後者係集體主義，唔同嘅時代應該有唔同嘅要求，冇話一定嘅。

抛磚引玉，希望大家思考一下：質與量。

7月15號，廣州沙面英租界數千工人同埋華籍巡警舉行大罷工，抗議租界當局歧視華人。事緣上個月沙面租界當局頒佈新例，規定華人進出沙面，需持有貼有照片嘅執照，而西方人及日本人、印度人甚至越南人都唔駛？咁唔係歧視chinese又係乜呢？

玩罷工當然要專業人士領導，由中共廣東區委領導之下，沙面數千工人罷工抗議租界當局歧視汙辱中國人，華人巡捕全部罷崗，罷工得到廣州政府支持同埋全國各界聲援，英國法國當局被迫於8月17號取消禁令，工人又贏一仗。當時嘅世界，工人運動（即係半份馬克思主義）氣勢如虹，可以想像，差唔多一年後發生驚天動地嘅「省港澳大罷工」，亦已經醞釀籌備之中。

今集仲有一件小事要補充，7月14號夜晚，蘇聯紅軍將領大元帥大本營高級軍事顧問巴甫洛夫喺廣州郊外江面進行實地勘測時，因月黑風高，不慎被船纜絆倒而落水，搶救不治，以身殉職，年僅32歲。孫文深為痛惜，親自擔任其追悼會嘅主持人。

明白未？睇到未？當時南方國民黨政府有大量蘇聯紅軍將領負責訓練軍人同組織軍事力量，一支從來未喺中華民國國內出現過新式意識形態軍隊，亦響咁嘅環境下開始誕生。上一輩嘅軍事制度、上一輩嘅軍人戰鬥方式，將會全部被取替同撲滅。

#常威💀 #大軍閥平反系列  #大軍閥 #民國歷史

【常公子歷史頻道314回：替大軍閥平反系列之 #公民團事件】

♏睇返100年前，黎元洪同段祺瑞嘅「院府之爭」，其實真真正正體驗到「法統」精神存在，大家都依循體制步驟做事甚至依法進行權力鬥爭，老老實實，被稱呼為中國近代史上第一次「法統重光」，其實一啲都唔過譽。1911年辛亥革命爆發後，中華民國建立，目的係想創造一個擁有「法統精神」嘅共和國嚟取替原本滿清皇朝專制獨裁政體，乜嘢叫「法統精神」？就係大家依法做事，有規有矩，唔能夠離開制度規矩所規範嘅框架，喺框架之內，你玩乜都得。

♈所以段祺瑞要玩嘢，都要好似袁世凱咁組織一堆公民團，搵一大班流氓地踎黑社會假扮市民，製造民意，包圍國會，強迫國會內嘅議員就範，影響佢哋嘅投票意向，大家都睇到，公民團包圍議會，後來議會內嘅國會議員又包圍國務總理段祺瑞，堪稱為中華民國建國以來一幕「奇境」，老實講，段祺瑞當時有兵在手，動用軍隊包圍國會，實施軍法統治，趕走黎元洪，其實亦都有可能，但係佢冇咁做，就係佢心底裡仲有「法統精神」精神存在。

♈之後黎元洪利用公民團事件彈劾段祺瑞，逼段祺瑞辭去國務總理一職，即符合法統原則，段祺瑞辭職之後，離開北京返回天津，亦冇立刻發動兵變奪回權力，雖然之後佢透過婉轉嘅手段對付黎元洪，壞事做盡，但係基本上冇離開遊戲框架。最後誘使黎元洪引張勳入北京城玩復辟帝制，黎元洪先至一鋪清袋。段祺瑞用的是計謀，並非暴力。

♏當然段祺瑞係十惡不赦，畢竟佢都係中國近代史上一個惡名昭彰嘅大軍閥，不過細說從頭，大家亦不得不承認，就算段祺瑞係一個無惡不作嘅大軍閥，佢同樣亦都係一個擁有「法統精神」嘅大軍閥。山之後有更高嘅山，一蟹不如一蟹。

♑【常威近代史】第五部《霹靂大忠臣對決無敵大買辦》電子書上架（條download link在下面），請大家課金支持我一直走落去，直至劉少奇骨灰到達北京王光美手上…

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上4000訂戶！

✅https://youtu.be/v9TAmZrc_rY

【常威近代史】（四百三十七回）
why repeat and repeat？

孫文重新「佔領」廣州，成為國民黨北伐中原嘅起步點，但當時嘅廣州市民究竟有幾咁鍾意孫文呢？我真係唔敢講，我衹能夠講一句，大多數平民都係唔鍾意打仗嘅，只係希望安安樂樂過日子，如果1924年8月廣州有公投，我相信九成人會趕孫文走。

其實戰爭同我哋嘅距離係非常之近，大約兩年前（2018），可能大家都會覺得戰爭係遙不可及嘅事，真係發夢冇咁早，到咗今日2020年嘅夏天，如果（局部）戰爭真係突然爆發，我諗大家都唔會太驚奇吧？口臭都要講多次：如果印銀紙可以解決問題，世界上就無問題存在，印銀紙只可以解決當前嘅問題，但係會為之後帶來更大嘅問題——不過所謂更大嘅問題都只不過係打仗啫，衹要唔動用核武器嘅話，其實又唔係乜嘢大問題啫。

咁樣諗，大家會舒服啲。

1924年8月2號，廣州表面上大局已定（暗湧仍然存在），孫文正式實施全面控制，下令設立中央銀行，任命老婆宋慶齡細佬宋子文為行長（1894-1971），黃隆生（1870-1939）、林麗生為副行長。革命先驅者黃隆生本來係一個裁縫，佢係第一個製造「中山裝」嘅人，時代先鋒，風行100年。

孫文籌備建立中央銀行cap水，前後已經有一年時間，8月7號，公佈《中央銀行條例》15條，明確指出中央銀行嘅作用係「發展國內實業，調劑國內金融，補助國民經濟，促進國際貿易」，並核定中央銀行首期資本為1000萬元毫銀。所謂「毫銀」，就係指早在19世紀60年代就響廣東流通使用由英國倫敦造幣廠、香港造幣廠鑄造的一、二毫港幣，又係港貨，當時最有信用，威唔威先？廣東話「一毫」即係「一毛」，「五毫」即「五毛」，個稱呼用到今時今日。

講乜嘢發「發展國內實業，調劑國內金融，補助國民經濟，促進國際貿易」都係假，設立中央銀行嘅目的就係印銀紙，要印出有信用並且可以流通嘅獨家貨幣，既然孫文唔認同北京中華民國政府政權，佢哋發行嘅「國幣」，就即係廢紙！從今以後，廣州人就要用我孫文印嘅銀紙！就係咁簡單。

8月16號，登！登！登！廣州中央銀行舉行開幕典禮，孫文到場致訓祠，勉勵各屆「共同維持中央銀行紙幣信用，促成中央銀行發展，不致為外國銀行所操縱」。統一發行貨幣，分別為1圓、5圓、10圓及50圓4種，並且規定，所有稅項、田租及其他公款，一律使用中央銀行新貨幣，而且申明中央銀行並不作政治借款，政府借款（並非政治借款）須在六個月內歸還。政府可以向中央銀行借錢經營，概念就係印銀紙。正如美國聯邦政府一直向「美國聯邦儲備局」Federal Reserve System (Fed)（即係美國中央銀行）借錢，同一個概念。

到底乜嘢係貨幣？其實大家講個信字，衹要你信我又信，全社會及全世界都信，貝殼可以成為貨幣，人類剪出嚟嘅腳甲亦都可以成為貨幣，貨幣本身並無任何價值存在，係人類用其「信用」令貨幣成為交易媒介，所以喺印刷機出現之前，要用最冇用嘅「原材料」做貨幣，例如貝殼、銅、白銀及黃金，因為上述呢啲嘢，除咗用嚟做貨幣之外，根本冇乜其它用途。

當然貨幣亦要滿足以下三個條件，先可以成為流通貨幣：

1. 交易媒介 (Medium of Exchange)：貨幣第一個主要功能，是作為市場的交易媒介，即是用作支付，代替以物易物。

2. 記帳單位 (Unit of Account)：第二個主要功能是作為記帳單位。現今市場有眾多商品，要衡量一幅畫作的勞動價值，和建一道牆的勞動價值，兩者如何比較，就要用同一個單位來衡量，即是記帳單位。

3. 延遲支付的標準 (Standard for deferred payment)：第三個主要功能是延期支付的標準，指貨幣會受到通脹與通縮的影響。

至於能否滿足上述條件？就每隻貨幣都有唔同經歷，中國要出現真正能夠滿足上述三個條件嘅流通貨幣，要去到1949年嘅人民幣。

響孫文嘅中央銀行發行貨幣之前，8月10號，孫文第一號頭馬蔣介石喺廣州白鵝潭緝鑊商團團長陳廉伯（1884-1944）為發動兵變而偷運入廣州嘅軍火。自從孫文1923年重新佔領廣州、驅逐陳炯明之後，廣州嘅局勢仍然未平定，英籍香港人、啱啱跌破30蚊嘅0005滙豐銀行買辦，廣州商團團長陳廉伯受港英政府及陳炯明資助，組成一支4000多人嘅「商團軍」，並且召集廣州及附近縣鎮嘅商團，籌備聯防總部，企圖顛覆孫文廣州政府。本月上旬陳廉伯從香港訂購槍支9000枝，子彈300萬發，經挪威商船偷運入廣州。

孫文事先收到風，下令封存槍械子彈於黃埔軍校（自用），並且通緝陳廉伯一干人等，12號開始，陳廉伯煽動廣州商民請願及罷市，要求發還被扣軍火，8月28號，英國派出九艘軍艦駛入白鵝潭，向廣州政府發出警告，9月1號，孫文發表對外宣言，嚴重抗議英國政府干涉中國內政，但事態仍無法控制，廣州政局仍然動蕩不安，陳廉伯有英國政府撐腰，孫文蔣介石亦吹佢唔漲掹佢唔長。

歷史的確係一面鏡，所有嘅事情不斷重複再重複，100年前發生嘅事，100年後繼續發生，睇嚟1000年後都會repeat！

#常威💀 #大軍閥平反系列  #大軍閥 #民國歷史

【常威近代史】（四百三十八回）
孫文究竟諗緊乜？

「聯俄」還「聯俄」，「容共」還「容共」，「聯俄」不一定要「容共」，大家講清楚，歷史上寫「國共合作」，其實又幾時有合作過呢？1924年中，孫文嘅國民黨容許共產黨員以個人身份加入國民黨，絕對唔係俾面你中共，而係畀面中共背後嘅老細：蘇聯。

1924年8月15號，中國國民黨響廣州召開一屆二中全會，會議再一次肯定咗國共合作政策，三番四次強調大家自己人，之前唔啱嘅嘢，大家抹咗佢算。早響6月，國民黨元老張繼等提出彈劾共產黨案，當時作為共產黨總書記陳獨秀發文反駁，之後，國民黨內部嘅右派不斷評擊左派共產黨滲透，8月15號嘅會議上，張繼再提出「兩黨分立」議案，表明各有各做，與革命英雄文人瞿秋白（1899-1935）響會議上針鋒相對，最後「兩黨分立」議案俾多位國民黨要員反對，會議最終決定：

「凡屬一切真正革命分子，不論其階級屬性為何，本黨皆應集中而包括之。」，即：容住你先。

國民黨當然唔放勢孤力弱嘅中共響眼內，但老細蘇聯就係千萬得罪不得，當時孫文嘅政治顧問係鮑羅廷（1884-1951），幫孫文訓練軍人嘅係一班紅軍軍官，咁你又估吓呢班蘇聯軍官究竟係聽孫文話？抑或聽鮑羅廷話呢？相信答案唔使我多講。

鮑羅廷係一個傑出嘅組織者，資深世界革命顧問，係佢教導孫文以列寧嘅方法成就夢想，按照布爾什維克建黨嘅模式改組國民黨，令國民黨成為一個（比較）有組織有紀律嘅軍事獨裁政黨，孫文一早就知道你一句我一句係唔得，所以之前創立過一人獨攬大權嘅獨裁政黨「中華革命黨」，但係佢明顯唔識搞，直至遇上馬林、越飛同鮑羅廷等專業人士，先明白獨裁政黨究竟要點玩法。

蘇聯係將注碼押喺孫文身上，莫斯科嘅金錢、軍火同人才源源不絕送到，幫你籌建黃埔軍校。但係「第三國際」亦明白孫文並唔係一個百分百嘅共產主義者（個人認為最多70%比例），亦明白孫先生嘅為人性格，所以一早做好兩手準備，一方面大力資助國民黨東山再起，另一方面一手組織當時人數並唔多嘅中國共產黨，利用中共黨員加入國民黨，互相牽制，協助莫斯科響內部左右國民黨嘅決策。

呢段時間，有好多年輕嘅共產黨員乘勢彈起，只提兩個名夠照：一個叫毛澤東，另一個叫周恩來。

咁孫文又點諗？以孫先生嘅智慧，又點會唔知道蘇聯利用緊佢嘅KOL聲名滲透中國，要搞一場轟轟烈烈嘅無產階級大革命推翻資本階級？佢又點會唔知道蘇聯有兩手準備，扶起你國民黨同時，亦想利用國民黨壯大中共，但係我非常相信，以孫文性格，同邊個合作？什麼意識形態？或者打仗要死幾多人都無關痛癢？最重要嘅係佢要完成心中嘅夢想。

好，行文至此，咁究竟孫文想點呢？孫文嘅夢想究竟係乜？推翻滿清？驅除韃虜？建立共和？唔係全部實現咗咩？普選產生國會，選舉產生大總統，按照法統行事，北京中央政府一直都做緊，當然做出嚟好唔好睇？做出嚟你孫中山滿唔滿意又係另一回事？自從袁世凱稱帝失敗，中華民國北京政府一直冇離棄法統精神，國家雖然係窮，爭拗雖然不絕，但係某程度上亦都算百花齊放，甚至大鳴大放，一場五四運動展開中國文化新一頁，你話軍閥奪權，其實從來冇共和國誕生過，一直都係唔同軍政府掌政？睇吓你用乜角度去演繹囉？難道你孫文自己並唔係一個軍閥嗎？外國勢力干涉中國內政？引發民不聊生？咁你孫文用緊邊個錢改造國民黨同北伐呢？

當然孫文亦係絕頂聰明人，亦係馬基維利主義者候選者，佢非常明白真正嘅民主共和制度（或叫法統），應用響當時嘅中華民國，只會繼續引發內亂同大分裂，就算佢自己唔做，其他人都會做。要阻止內亂分裂發生，必須有一個強而有力嘅軍事政權統一所有分離勢力（軍政），首先實施高壓獨裁統治（訓政），大局平定之後，先可以放權行自由民主共和法統制度（憲政）。呢個亦係孫文《建國大綱》嘅基本軍政、訓政與憲政三段論，孫文其實冇錯，佢只係睇得太清楚，太明白遊戲規則。

1924年9月1號，財雄勢大嘅張作霖響奉天召開軍餉會議，定下戰費5000萬，並下令全體陸軍進行秋操演習，隨時同你直系曹錕、吳佩孚開拖，依場「事先聲明」嘅內戰，一早講咗要打，亦冇得唔打，只係差在幾時打？同點樣打？

觸發點係上海，又係0005上海，1924年9月3號，直系軍閥齊燮元（1885-1946）同皖系軍閥盧永祥（1867-1933），為了爭奪上海嘅控制權開戰，江浙戰爭爆發。

直系軍閥重要頭目齊燮元係當時江蘇督軍，控制蘇、皖、贛三省，盧永祥時任浙江軍務善後督辦，控制浙江及上海，係唯一仍有實際地盤嘅皖系軍閥，為咗抗衡直系，廣州孫文、盧永祥同張作霖早已經結成「反直同盟」，係「反直」唔係「反殖」。

上海何等重要？直系早想據而有之，為咗爭奪上海，齊燮元佈署多時，8月24日，齊燮元集結兵力，電請北京中華民國大總統曹錕下令討伐盧永祥，並於9月3日正式進攻皖系盧永祥嘅浙軍！牽一髮，動全身，和平嘅日子終於過去，戰爭再一次降臨大地！

#常威💀 #大軍閥平反系列  #大軍閥 #民國歷史

【常公子歷史頻道315回：替大軍閥平反系列之 #共產主義】

♏「共產主義」本身並不是一件壞事，它甚至乎是最好的事。你可以想像，整個世界的資源能夠作最平均的分配，個人不論高低，都有相同的對待，人類再不需要扭曲本性來勞動工作，每個人能夠盡展所長，做自己喜歡做的工作，展現出自身的真本性，用馬克思的說法，人類不再「異化」，而能夠做回自己，再沒有階級，再沒有剝削，再沒有不平等，大家一齊喜悅地活在一個烏托邦裡，無分彼此，世界大同。

♉上述所言，難道不是人類最後的夢想嗎？的而且確是，除非不是。但最大的問題係，最美好嘅景愿能否做得到呢？用什麼方法可以做得到呢？目標沒有問題，過程才是問題。馬克思同恩格斯，提倡共產主義，係希望能夠解放佢哋當時（19世紀）面對資本主義世界中嘅工人階級同無產階級，兩位死前，大概都無想像過共產主義真係可以建立一個國家，佢哋無非想將無產階級連成一線，作為一股力量抗衡資產階級嘅無窮無盡嘅剝削。

⛎馬克思同恩格斯嘅烏托邦希望，響列寧同托洛斯基手中完成，一個共產主義國家正式響1917年誕生，地球上一場共產主義實驗正式拉開序幕，之後發生咗好多事，死咗好多人（下刪十萬字），及後至1991年蘇聯響戈爾巴喬夫手中無聲解體，但共產主義實驗仍未告一段落，只係進入咗谷底，共產主義實驗仍然冇停止過。不過做嘅人唔同咗，亦響原本嘅概念同方法上作出大規模修改，用另一套方法繼續進行實驗，或者用燈貼切嘅形容詞——繼續進行同資本主義嘅嚴酷鬥爭。

♐共產主義嘅出現，全因為十九世紀資本主義嘅不妥當；同樣道理，今日中國嘅崛起，全因為西方世界嘅文明墮落，彼此相輔相乘，互為因果。

♑【常威近代史】第五部《霹靂大忠臣對決無敵大買辦》電子書上架（條download link在下面），請大家課金支持我一直走落去，直至劉少奇骨灰到達北京王光美手上…

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上4000訂戶！

✅https://youtu.be/Gzd65Gu4krw

【常威近代史】（四百三十九回）
山海關大戰

直系軍閥齊爕元討伐皖系軍閥盧永祥，戰場響滬寧鐵路沿線及江浙、浙閩、浙贛邊境擺開，盧永祥三面受敵，勢孤力弱根本撐唔住！但直系嘅真正主力部隊亦唔係齊爕元，打到咁上下，直系軍閥、人稱「心狠手辣笑面虎」孫傳芳（1885-1935）響福建傾巢而出，進佔江山，威脅命脈大城市杭州，9月17號，盧永祥徹離杭州，將司令部遷至上海龍華，孫傳芳25號佔領杭州，10月初，部隊攻陷上海外圍各縣，直抵龍華，向上海作全面包圍，10月13號，盧永祥宣佈下野，即係打輸投降，從上海出逃日本（又係日本）。

10月16號，直系軍閥孫傳芳佔領上海，收編盧永祥殘部，戰爭結束，直系大獲全勝，關於孫傳芳控制上海嘅故事，我哋之後再講。但係當1924年9月3號江浙戰爭爆發時，因為火頭點起，9月17號，直奉兩軍亦都係熱河開戰，「第二次直奉戰爭」亦宣佈爆發！

東北大軍閥，當時最財雄勢大嘅張作霖打輸「第一次直奉戰爭」之後，心有不甘，退回東北後，大力整頓軍備，一定要反攻直系控制嘅北京同中原，盟友盧永祥被直系討伐，張作霖自然有藉口即刻開打，9月4號，張作霖通電全國，響應盧永祥，並決定出兵討直援浙。9月15號，張作霖組織鎮威軍，自任大元帥，投入六個軍，戰鬥總兵力為17萬人，另有後援部隊押尾，兵分6路，直踩入關！

張作霖東北大軍壓境，盛況空前，相比起「第一次直奉戰爭」規模，今次先係玩真料，其實第一次直奉戰爭，只係直奉兩派牛刀小試，摸吓對方底牌，之後嘅日子，兩系積極備戰（你睇當時曹錕做大總統嘅北京政府咁窮你就明白），其實就係為咗打一場事先張揚嘅驚世大戰「第二次直奉戰爭」！

9月17號，中華民國北京中央政府大總統曹錕發佈討伐張作霖嘅命令，派出民國關公吳佩孚為討逆軍總司令，東三省省長王承斌（1877-1936）為副司令，王承斌係政治家吳景濂表弟，亦係漫畫《老夫子》原作者王家禧（1923-2017，即王澤）的父親。

直系投入三個軍迎戰張作霖大軍壓境，號稱總兵力達25萬，前三個軍總司令分別為彭壽莘（1872-1947）、王懷慶（1876-1953）及馮玉祥（1882-1948），戰爭首先響熱河爆發，雙方主力喺山海關、九門口戰場上正面交鋒，奉軍進軍迅速，先後攻佔朝陽、凌源、赤峰、隆化等地，王懷慶部隊潰不成軍。10月7號，張作霖下達全軍總攻擊令，10月12號，吳佩孚親臨山海關督戰，直奉兩軍喺山海關爆發大戰，雙方死傷各有萬餘人，直系不支，守唔住關口，奉軍打破缺口，先後攻佔石門寨、山海關，並於1924年10月12號進入關內，直系軍隊士氣全失，軍心大亂。吳佩孚率領殘部推至秦皇島，用軍艦運來三萬援軍，企圖力挽狂瀾。

直奉戰爭爆發，南方孫文當然冚住半邊嘴笑，9月5號，孫文發表《討伐曹吳告軍民文》，支持盟友張作霖同盧永祥，並且宣佈隨時北伐幫拖，9月18號，當「第二次直奉戰爭」正式爆發時，國民黨又發表《北伐宣言》，9月22號，孫文宣佈將「北伐軍」改名為「建國軍」，即係話畀你知，隨時預備揮軍北上建國！不過都係講吓啫，講就大聲，任何具體軍事行動並未發生。

9月21號，不過喺廣東側邊嘅另一個軍閥陸榮廷（1859-1928），就俾李宗仁（1891-1969）聯合趙恆惕（1880-1971）部隊擊敗，通電下野，另一個民國嘅重要人物李宗仁亦宣佈踏入時代舞臺。

去返第二次直奉戰爭，奉軍大獲全勝，於10月12日入關！同時10月23號，直系籠裏雞作反，馮玉祥發動北京政變，推翻曹軍政府！馮玉祥一直都係直系重要軍頭，第一次直奉戰爭之後，佢受到吳佩孚排擠，被調任徒具虛名嘅陸軍檢閱使，去咗北京搞首都治安，堂堂一個大軍閥，變咗個高級公務員？條氣點啃得落？於是乎佢一早對曹錕同吳佩孚不滿，暗中聯繫孫文派嚟嘅特使，籌備作反工作。

但好明顯，曹錕同吳佩孚並唔知道馮玉祥心有異心，否則亦唔會響「第二次直奉戰爭」中任命佢為前線第三軍總司令，你既然畀隻好牌我上，馮玉祥當然唔客氣喇，馮玉祥受命做第三軍總司令後，推薦孫岳（1878-1928）為北京警備副司令，以作內應。同時hea搞出兵，故意拖住，其實暗中已經聯繫緊張作霖同埋段祺瑞，並且達成「請孫文北上」以及「奉軍不入關」（但後來入咗）嘅兩條秘密協議，同各方面取得軍事行動默契，堪稱軍閥時代第一號二五仔！

9月尾，馮玉祥代表直系出兵之後，更加帶領部隊左兜右兜，遲遲唔肯將大軍放上山海關前線，又以籌措軍餉為藉口行吓停吓，終於拖拖拉拉，拖到山海關大戰都打卵完，10月12號奉系大軍踩入關，吳佩孚先知道領咗馮玉祥嘢。

10月19號，當奉軍入關後，二五仔馮玉祥響灤平召開軍事會議，決定連夜班師回京，發動政變！下次繼續……

【常公子歷史頻道316回：替大軍閥平反系列之 #十月革命】

♏「共產主義」同「資本主義」兩種意識形態嘅鬥爭，一直主宰住人類整個20世紀嘅歷史進程，你唔去理解共產主義，你根本冇辦法瞭解整個20世紀嘅世界格局，去到21世紀，兩種主義嘅鬥爭亦從來無停止過，祇不過係角色置換，由原本嘅「蘇聯」，變成今天嘅「中國」，中蘇爭拗變成中美爭拗，新冷戰時代代替舊冷戰時代。

♈細說從頭，其實1997年香港回歸係一次重大的歷史事件，亦係一個偉大嘅歷史實驗，由鄧小平提出「一國兩制」概念，喺一個國家之內，同時實踐共產主義（或叫社會主義）同資本主義兩種制度並行，究竟是否可行？究竟能否做得到？某程度上，亦係一種方法企圖化解共產主義同資本主義之間兩種意識形態嘅鬥爭。但事實證明，行咗25年嘅「一國兩制」，並唔能夠做到上述效果，新冷戰重臨，其實歷史兜咗個圈，返回上世紀80年代左右嘅世界二分嘅局面，原地踏步。

⛎當然有人講，目前中國亦唔係行緊共產主義，但係我好相信，喺中國嘅上層建築同統治階層中，當權者佢哋亦無放棄過社會主義嘅偉大夢想，只係修正形式同方法，會繼續堅持行落去。我諗，亦唔可以以所謂「好事」同「壞事」簡單地去描述以上情況，中國唔堅持社會主義路線就一定啱？就會國泰民安？我相信並唔係咁，如果歷史真係咁簡單，大學唔需要有「歷史系」喎。

♊人文科學的邏輯，包括歷史在內，都係各有各嘅說法，同各有各嘅演繹同表述，冇話有絕對正確或絕對嘅錯誤存在，到頭來，要睇吓你相信（或捍衛）邊種講法？或相信（或捍衛）邊種意識形態？到最後仍然係自由意志嘅選擇，當然如果有一日，你發現自己再冇能力去選擇你所相信嘅事物，咁嗰一日，我叫做「洪水滔天」。

♑【常威近代史】第五部《霹靂大忠臣對決無敵大買辦》電子書上架（條download link在下面），請大家課金支持我一直走落去，直至劉少奇骨灰到達北京王光美手上…

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上4000訂戶！

✅https://youtu.be/LKDXdiwHbDg