大清亡國關慈禧蛋牛治 2

【常威近代史】（四百四十回）
北京政變

1924年10月19號，馮玉祥部隊漏夜班師回京，「第二次直奉戰爭」大局已定，財雄勢大嘅張作霖奉軍取得全面勝利，民國關公吳佩系被打得焦頭爛額著草逃回河南，亦從此一蹶不振。10月20號，馮玉祥嘅內應部隊率先包圍北京城，截斷鐵路同所有城外對外交通，佔領重要軍事據點。10月23號淩晨兩點，響北京城內孫岳部隊配合下，城門大開，馮玉祥率領大軍入城，一槍都未開過，迅速佔領整個北京。

件事實在太easy太smooth，馮玉祥部隊迅速佈守各個城門交通要道，包圍總統府，囚禁大總統曹錕，完全冇受到任何阻撓，一場北京政變，就係咁平靜嘅情況下順利完成，北京城市民執返身彩。而直系大佬曹錕亦宣佈收皮。

睇返轉頭，曹錕都幾On 9，馮玉祥有異心，佢似乎事先完全唔知道，仲比佢手握三份一重兵迎戰奉軍，整個北京城其實亦被馮玉祥一早控制咗，曹錕亦唔醒水好似孫文咁提早喬裝著草，大腸有屎都唔知，真失敗；終其一生，拍住件「好打得」嘅下屬吳佩孚打天下，到頭來吳佩孚仲威過佢，失敗中嘅失敗。

我最喜愛歷史學家劉仲敬評價曹錕呢個大軍閥「憨直」，好啱，其實曹錕係一個好人，甚至係咁多個當權者野心家之中最好嘅一個，歷史上留下嘅汙名「曹錕賄選」，話佢用錢收買國會議員選票做中華民國第三任大總統，我講過其實亦符合「法統精神」，佢一生人，亦未做過乜嘢大奸大惡之事，反而敬賢禮士，對下屬同身邊嘅人都好好，全無機心，如果你話曹錕有缺點，就係「肥」同「衰戇鳩」兩瓣。

講多次，如果將曹錕同之後嘅嗜血當權者比較，曹錕絕對係小兒科，尾燈都冇辦法睇見。劉仲敬講得好好，「不幸的是他（曹錕）遭到的抹黑，主要不是因為他壞，而是因為他不夠壞」，一語成籤。

On9曹錕被馮玉祥軟禁（冇被即場殺死，大家基本上以軍禮相待），馮玉祥政變成功，立刻發佈安民告示，平定北京民心。張作霖奉軍部隊一早配合馮玉祥政變，亦冇再向北京推進，避免咗一場大規模生靈塗炭，亦係好事。10月24號，馮玉祥喺北宛召開會議，正式組織國民革命軍，自任總司令，並與胡景翼、孫岳等將領聯名發出和平通電，號召全國，主張各方停火，「與民休息」（打贏鳥當然要休息噢），馮玉祥並提出革除腐敗政治，建設新政府等建國大綱，舊嘅唔去，新嘅唔嚟，直系軍閥主宰中華民國北京中央政府時代正式結束。

10月25號，馮玉祥再次召集軍政會議，正式決議宣佈推翻直系曹錕政權，並且電邀南方孫文北上共商國是，實現南北統一。馮玉祥亦知道自己並唔係做政客嘅料子，所以邀請皖系段祺瑞出山主持大局。

好人曹錕呢？佢一直被軟禁，亦有好好招呼，1926年中北京發生政變，佢被釋放，走到河南洛陽投奔吳佩孚，1927年後，寓居天津租界養老，養狗種花、腳底按摩、瞓飽再安睡、優哉遊哉，1937年盧溝橋事變，日本皇軍占領天津，企圖說服曹錕出面組織親日政府，遭到曹錕拒絕。1938年5月17日，曹錕響天津因肺炎病逝，終年七十有五，福有攸歸。

其實1924年10月10號，中華民國國慶紀念日，廣州亦發生咗一場叛變，孫文接手廣州後，聯俄容共，大搞軍事獨裁，其實好多人唔滿意佢（其實我想問，有邊個廣州市民滿意佢丫？），尤其是係商界，所以出現咗「商團軍」組織對抗孫文。

10月10號，廣州群眾集會慶祝國慶，背後有陳炯明同香港殖民地政府撐腰嘅商團軍企圖發動軍事政變，推翻孫文，史書記載，商團軍到處張貼告示「驅逐孫文」、「打到孫政府」等標語，並開槍掃射群衆，打死20多人（真係奇怪嘞？發動政變=槍殺市民，有冇人咁蠢呢？官方歷史話比我哋知，係有嘅），由於有人死，孫文決定嚴厲鎮壓叛亂，12號，胡漢民宣佈廣州戒嚴，13號，韶關警衛軍及前線北伐軍趕赴廣州支援，15號，政府軍同黃埔軍校學生軍分五路圍攻廣州商團軍據點，激戰幾小時後，商團軍繳械投降，孫文又贏一仗。

10月10號國慶日，中華民國大學者辜鴻銘（1857-1928）——時人稱之「學博中西，清末怪傑」——抵達日本東京，進行五場鼓吹「東方文化優越論」嘅演講，五場演講題目分別是「何謂文化教養」、「中國文明史的進化」、「日本的將來」、「東西文明異同論」and「關於政治和經濟的真諦」。辜鴻銘訪日期間，大力抨擊西方文化，大力主張中日文化嘅親密性同源性，並且口出狂言，解釋中日之間嘅敵視，實際上係「一對同胞兄弟正為爭奪父母嘅遺產而爭吵」，其實佢冇錯，又啱。

10月9號，近代古文學家翻譯家林紓（1852-1924）喺北京病逝，佢係福建人，光緒年間嘅舉人，曾執教於京師大學堂，佢唔識外文，但根據他人口述，自己用文言文翻譯超過170餘種歐美文學作品，係中國翻譯文學始祖人物，對當時嘅中國文學界同整個中國文化影響甚深，佢曾經傾向變法維新，1911年辛亥革命後傾向保守，反對新文化運動，成為守舊派代表人物。


#常威💀 #大軍閥平反系列 #大軍閥 #民國歷史

✅本土唯一香港土話近代史文本

❤【常威近代史】第一部《大清亡國關慈禧蛋牛治》，全面開放，免費下載， #freedownload！

Free下載連結🔽

https://play.google.com/store/books/details?id=C3hjDwAAQBAJ

【常公子歷史頻道317回：替大軍閥平反系列之 #第三國際】

♏所謂第一國際，即係「國際工人協會」（英語：International Workingmen's Association，縮寫為IWA）First International，1864年建立嘅國際工人聯合組織。馬克思是創始人之一、實際上的領袖。由於會名太長，人們取它的第一個單詞「International，國際」，後來第二國際成立後，始稱「第一國際」。

♉第二國際（英語：Second International），正式名稱是社會主義國際（Socialist International），係一個由世界各國工人政黨組成的國際聯合組織。 1889年7月14日，在巴黎召開成立大會，通過《勞工法案》及《五一節案》，決定以同盟罷工作為工人鬥爭嘅武器。

♐共產國際（俄語：Коммунистический интернационал，縮寫為Коминтерн），通稱第三國際（Третий интернационал），係一個共產黨同共產主義組織嘅國際聯合組織，1919年3月在列寧領導下成立，總部設於蘇聯莫斯科。1943年5月15日，共產國際執行委員會主席團作出《關於提議解散共產國際的決定》；並於5月25日公開宣佈《解散共產國際的決議》，聲言這是為咗適應世界反法西斯戰爭發展，便於各國共產黨獨立處理問題，相關人員和組織轉入隨即成立、由史太林所控制的蘇聯共產黨中央委員會國際部。

♈第四國際（英語：Fourth International，縮寫為FI），原名世界社會主義革命黨（World Party of Socialist Revolution），是由流亡海外的蘇聯領導人之一托洛斯基及其支持者創建嘅國際性聯合組織。該組織創建於1938年9月，與史太林所控制嘅「第三國際」相抗衡。1940年托洛茨基響墨西哥遇刺身亡後，第四國際不斷分裂，其中規模和影響最大的是1953年的分裂。但到目前為止，第四國際仍然是人數最多、規模最大嘅「托派組織」，仍然保持運作。

♑【常威近代史】第五部《霹靂大忠臣對決無敵大買辦》電子書上架（條download link在下面），請大家課金支持我一直走落去，直至劉少奇骨灰到達北京王光美手上…

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上4000訂戶！

✅https://youtu.be/pN0AXxvvI54

【常威近代史】（四百四十一回）
講講變色龍馮玉祥這個人

1924年10月馮玉祥發動北京政變，直系中華民國大總統曹錕倒臺，「第二次直奉戰爭」結束，段祺瑞被邀請重返政壇主理亂局，邀請孫文北上，共商國是。未開始敘述內容之前，頭先講講馮玉祥呢個大軍閥，等大家對整個局面有更深刻了解。

我最喜愛嘅歷史學家劉仲敬稱呼馮玉祥做「民國呂布」，呂布當然好打得，但係亦都係變色龍嘅代表，三姓家奴名垂千古，有人評價馮玉祥「唯利是圖，本無所謂信義，受了他的愚弄，此人成可畏也」，由此可見，呢條友的確背信棄義到咗恐怖程度。不過喺大混亂時代，「唯利是圖、毫無誠信」係正常表現，太平盛世先係好人當道，天下大亂唔做賊唔做壞蛋，好難生存落去，所以如果成日用太平盛世嘅眼光去睇大混亂時代人物嘅行事為人，經常會有偏差同出錯。

馮玉祥出生於1882年，父親係軍人，但係好窮兼有毒癮，七個兄弟死咗五件。1896年馮玉祥成為准軍嘅正式士兵，1902年改投袁世凱嘅「武右衛軍」，成為新軍一員，辛亥革命使其飛黃騰達，1912年馮玉祥擔任北方革命軍政府總參謀長，30歲就做大軍閥，真係要係咁嘅時代，先有咁嘅際遇，如果太平盛世，我諗馮玉祥呢種貧L，最多只會係貧中下農一員。

其實要打天下（飛黃騰達），祇有兩種方法——第一種你老竇大把剩落，你有足夠資本可以投資發圍；而第二種方法就係搵命搏，你要付出別人唔肯輕易付出代價及承受別人唔願意承擔嘅風險，從而得到別人所不能擁有嘅機會，天下間無免費午餐；當然太平盛世仲有另一種方法，就係依附於建制（即政權或政府）同埋制度而向上爬，所以寄生於建制中或由建制出糧嘅人反建制，本身就係用鋸saw鋸緊自己站立緊嘅樹枝，幾On9吓。

1915年袁世凱稱帝，馮玉祥率領部隊同蔡鍔嘅護國軍作戰，暗中同對方講和，1915年策動四川都督巡陳宦（1870-1939）獨立討袁，呂布誕生。但袁世凱並唔知道，仲封佢做三等男爵，袁世凱死後，馮玉祥順理成章成為北洋之虎段祺瑞嘅人。

1917年7月，馮玉祥響應段祺瑞號召，討伐張勳辮子兵復辟，1917年11月，段祺瑞令馮玉祥率領部隊攻打孫文、陸榮廷的護法軍，1918年2月，馮玉祥一陣間再打多五分鐘發表主和、主張恢復國會，支持護法，背叛老細段祺瑞，投靠直系曹錕，成為直系將領。

1918年3月，馮玉祥信咗耶穌基督，成為基督徒，同年6月，皖系段祺瑞頭馬徐樹錚殺死馮玉祥夫人嘅姑丈陸建章，於是乎，馮玉祥同徐樹崢有深仇大恨，1925年係馮玉祥殺死徐樹錚為伯樂陸建章報仇嘅。

1921年8月，馮玉祥為陸軍第11師師長，從屬直系，佢率領部隊進入陝西，陝西督軍道友閻相文（1875-1921）自殺後，接任督軍，組建西北軍，依個時候1922年，「第一次直奉戰爭」爆發，馮玉祥率領西北軍出潼關，擊敗奉系嘅河南督軍趙倜，之後就任河南督軍，因為妄殺降將寶德全，俾大佬吳佩孚揾到藉口撤去其河南督軍職務，貶佢去內蒙古守邊境。

不過有陣時機會，機會就係咁樣出現，飛雲！

1923年，佢開始同邊界接壤嘅蘇聯接觸，且得到第三國際大力資助，講「聯俄」，馮玉祥可能比孫文資格更老，大家要注意呢一點！馮玉祥根本係蘇聯嘅「老朋友」，蘇俄外交官越飛對佢評價好高，大使加拉罕更稱呼佢為「中國解放運動嘅柱石」！明未？

馮玉祥同蘇聯眉來眼去，曹錕可能都知道，於是又調佢返北京，任陸軍檢閱使，負責首都保安工作。堂堂一個割地稱皇嘅西北大軍閥，被燉冬菇成為北京一個高級公務員，呂布馮玉祥當然對曹錕、吳佩孚恨之入骨。

響北京期間，馮玉祥曾經接觸孫文派嚟嘅特殊孔祥熙，馮認同孫文嘅建國主張，當然件事都好simple，孫文同馮玉祥背後嘅大老闆都係列寧，其實大家同聲同氣，特別好辦事，呢個時候馮玉祥亦開始唔信耶蘇，信馬克思，傾心共產主義，仲響辦公室內高掛列寧肖像，講真一句，馮玉祥冇隱藏秘密，祇不過係曹錕同吳佩孚冇作出任何戒備之心，所以話兩位係好人，就係咁解，好人另一個意思，就係仙菩Simple同賴依芙Native。

「第二次直奉戰爭」爆發，吳佩孚任命馮玉祥為第三軍總司令，有傳說馮玉祥收咗奉系張作霖50萬銀元嘅賄賂，出賣曹錕吳佩孚，不過無論點都好，馮玉祥出賣直系就一定，有冇張作霖嘅賄賂，我諗佢都會一定做，況且歷史雖然冇講到明，但係馮玉祥好有可能亦係收到蘇聯大老闆嘅柯打做事。

論滲透工作，論意識形態工作，當時嘅蘇聯，手段遠遠響其他西方列強之上，有人唔明白呢一點，所以提出蘇俄吓吓掟好多錢做嘢，講真，論財富，蘇俄點及得上大英帝國、美國同日本呢？蘇俄除咗掟人同掟錢，仲有掟出意識形態，用錢收買你同時，同時用意識形態滲透你、改變你。如果你都係唔認同，我想你睇睇列寧同埋托洛斯基著作，佢哋嘅理論根底功夫做到十足十，亦都全部寫曬出嚟，毫不掩飾向全世界輸出革命嘅目的同行動綱領，你當佢流，其實係自己流。

相同嘅局面，響今日嘅香港同時發生，你當佢流，其實係自己揸流攤。

#常威💀 #大軍閥平反系列 #大軍閥 #民國歷史

肅靜迴避

【常公子歷史頻道318回：替大軍閥平反系列之 #官僚問題】

♏世事往往出人意表，原本以為10月有大事發生，有人吹美國會用無人機向中國南海發動戰爭，原本都覺得係天方夜譚，但係原來更驚奇嘅事情真係會發生，就係美國總統特朗普夫婦感染新型冠狀病毒，相信事前冇人能夠估計得到掛？有人話係陰謀（陽謀），但我唔信，因為距離美國總統大選只係剩返30日，如果Donald Trump真係咁樣玩，佢嘅智慧未免太高，雖然我認為佢嘅智慧已經好高。

♉不得不承認，特朗普受感染無疑替美國總統大選增添更多變數，一向信奉佛系防疫嘅佢，自己都中招，無疑當相有話題性，而且佢畢竟係一個74歲嘅老人，情況可大可小，兩星期後是否能夠完全康復投入選舉工程？亦都非常疑問。但又如果最後由民主黨拜登勝出大選，特朗普亦唔會罷休，我相信佢亦唔會咁順攤離開白宮，一定會爆發一場憲政危機同爭拗，加上美國嘅嚴峻局面，種族矛盾，經濟下滑，變數更多，我個人唔敢想像，亦無法表達樂觀情緒。

♈新冷戰格局下，中美對峙，中國以鐵腕軍管式手段控制疫情，做得非常成功，而且經濟逐步恢復，剛剛有報導，指全球20個工業局發達國家中，祇有中國回復經濟正增長，亦冇吹水，十一國慶八日長假期，六億人口流動，若然疫情未能受控，亦冇可能發生。相對於美國及全世界嘅水深火熱，中國嘅情況其實好好，但祇不過，捧打出頭鳥，中國嘅外交困局，亦會隨著經濟復原，變得更凶險。

♎世事無從預見，今日唔知聽日發生乜嘢事？新型冠狀病毒疫苗，好有可能係化解一切政經危機嘅鑰匙，中國應該好好把握呢個機會，投放更多資源加大疫苗嘅產能（日前吹風會中國表示一年可以生產六億劑），藉此契机造福全世界，幫助其他二三線國家擺脱疫情，復甦經濟，大國崛起，亦應該負上大國應有嘅責任同義務。祈求世界和平，凡事大事化小，小事化無，同時亦希望特朗普夫婦早日康復🙏

♑【常威近代史】第五部《霹靂大忠臣對決無敵大買辦》電子書上架（條download link在下面），請大家課金支持我一直走落去，直至劉少奇骨灰到達北京王光美手上…

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上4000訂戶！

✅https://youtu.be/oqaoZ4g_4tI

https://www.youtube.com/playlist?list=PL0RVUAILQUOvTo8JJrayjrvd_Nbjc-0Me

❤請加入常公子的近代史世界！

#ChineseHistory #HongKong #China #History

【常威近代史】（四百四十二回）
末代皇帝溥儀著草離開紫禁城

其實北京政變發生後，馮玉祥邀請段祺瑞再度出山，我係跳咗步，中間仲有一啲事發生，首先馮玉祥佔領北京後，11月1號就成立咗「西北銀行」，乜都係假，cap水最重要，明白呢個道理，世事會通透好多。11月2號曹錕宣佈辭職，由國務院攝行大總統職務，仍依法統做事，馮玉祥決定由黃郛（1883-1936）擔任國務院總理，組成臨時攝政內閣。

與此同時，民國關公吳佩孚已經從秦皇島退至天津，得返3000殘兵押尾，可謂陰公到震，佢由天津乘坐軍艦逃至武漢，返回根據地洛陽，「第二次直奉戰爭」宣佈全面結束，前前後後打咗唔夠個半月時間，依一場可能係軍閥時代中一場比較大型嘅內戰，死人唔算少（當然重申一次，同後來發生嘅內戰完全唔可以比較），張作霖嘅奉系大獲全勝，所贏嘅係武器精良、大撚把錢，仲有二五仔馮玉祥幫拖。直系曹錕一敗塗地，憨直老實人慘敗收場；吳佩孚雖然能夠全身而退，但係手上最精良嘅部隊已經被擊潰，從此以後亦都一蹶不振，好人全面退場。

11月4號，北京大局未定，馮玉祥就指使黃郛攝政內閣通過修正清室優待條件，當中包括永遠廢除皇帝尊號；廢帝與國民在法律上享有同等權利；每年補助清室家用費大幅削減字50萬元；清室所有人即日移出紫禁城，自由選擇居住地點；清室私產歸清室完全享有，公產則歸民國政府所有。（至於乜嘢係公產？乜嘢係私虛？當然由當權者define…）

11月5號，京師警備總司令鹿鍾麟率兵入紫禁城，向末代皇帝溥儀宣佈修正優待條件，溥儀似乎只有兩條路可以揀：一就係接受，二就係打靶。於是溥儀完全接受條件，將國璽交予國民政府，下晝三點，溥儀與一眾妻妾，同埋少數宮女太監，分乘五輛車輛，匆匆離開紫禁城，暫時移居佢老竇載澧嘅前醇親王府。

自從1911年辛亥革命之後，溥儀同清室繼續住響紫禁城，由民國政府真金白銀供養，中間又私賣吓古玩文物吐現，優哉遊哉，hea咗足足14年，今日終於要自力更生，重新開始，其實溥儀好廢，基本上冇乜自力更生能力，好彩仲有個朵「末代皇帝」響手，個牌頭足以用作建國，建立滿洲國，當然歷史正確，要稱呼為「偽滿洲國」。

馮玉祥無厘頭趕走溥儀，好多人都唔滿意，靚仔胡適係其中一個，佢致函外長王正廷，對馮玉祥武力驅逐遜帝溥儀表示反對，稱之為「欺人之弱」。

馮玉祥就有你冇你，下令組織清室善後委員會，向清室人員盤點清理公產及私產，更加宣佈，將紫禁城開放，預備成立博物館等事宜。本月16號，由北京《民國日報》報導，經過清室善後委員會盤點後，清室一共有古董、金錢、玉石、字畫等30多萬件文物，估值超過十億元。溥儀就是「萬般帶不走」，陰公，否則全部變買套現，溥儀有可能成為全中國一個最有錢嘅人，所以千祈唔好再同我講「贏在起跑線」五個字。

11月10號，孫文喺廣州公開發表《北上宣言》，表示將應邀北上同北京政府代表商討國是，謀求全國統一。我之前已經講過，馮玉祥同孫文背後嘅老細都係列寧第三國際，係自己友，萬事好商量。

孫文響《北上宣言》中，重申反對帝國主義同軍閥主義，提出廢除不平等條約和召開國民會議（國會）兩大主張（兩幅被），並且指出「國民之命運，在于國民之自決，本黨若得國民之援助，則中國之獨立自由統一諸目的，必能依於奮鬥而完全達到」。

一句到尾，國民之命運=國民黨之命運=國家的命運=孫文的命運。

11月12號，孫文同夫人宋慶齡、汪精衛等人乘坐「永豐號」軍艦前赴上海，當日廣州國界舉行盛大歡送會歡送大元帥走（可能真心……），大元帥職務暫由胡漢文代行。

不過你唔好理，革命KOL的確魅力沒法擋，10月17號孫文到達上海，受到五萬多個群眾歡迎，無論點都好，論名氣論聲譽孫文係第一，冇人敢認第二，我諗當時排第二嘅人應該係汪精衛，第三係胡適。

孫文發表《北上宣言》當日，民國關公吳佩孚亦在漢口發出「組織護憲軍政府」通電，蘇浙等10省21名代表列名，爛船仲有三分釘，直系並未輸晒，與此同時，山東亦宣佈武裝中立，好多大軍閥要睇定個形勢先落注，跟車太貼，大家都清楚風險所在。

10月19號中共中央發表第四次對時局嘅主張，立場當然企喺孫文嗰邊。10月20號，廣州黃埔軍校教導團正式成立，何應欽（1890-1987）被任命為團長，中共要員周恩來任黃埔軍校政治部主任，10月21號，孫文乘坐「上海丸號」離開上海，取道日本轉赴天津，臨去北京之前，都要返鄉下「日本」打個白鴿轉。

10月29號末代皇帝溥儀逃入北京日本領事館，尋求政治庇護。

孫文未到，北京嘅局勢依然風起雲湧，各派軍閥為爭奪北京政權展開明爭暗鬥。之前張作霖講明奉軍不入關，但佢即刻違反承諾，趁住馮玉祥倒戈造成直軍大亂之際，奉軍長驅直進，搶佔地盤，收編直系殘兵，並且用武力將直系倒戈將領王承斌逐出天津。

10月10號，張作霖、段祺瑞、馮玉祥三人喺天津會面，埋枱傾偈，13號，蘇、鄂、浙、閩等八省軍事首腦集會，一致擁段，不承認黃郛臨時攝政內閣。為調解矛盾穩定時局，馮玉祥同張作林敦請段祺瑞入京主政，10月24號，黃郛臨時攝政內閣辭職，10月25號馮玉祥亦被迫通電下野，北京政權由皖系奉系聯合掌握，當然大佬梗係奉軍張作霖！

#常威💀 #大軍閥平反系列 #大軍閥 #民國歷史

✅本土唯一香港土話近代史文本

❤【常威近代史】第一部《大清亡國關慈禧蛋牛治》，全面開放，免費下載， #freedownload！

Free下載連結🔽

https://play.google.com/store/books/details?id=C3hjDwAAQBAJ

【常公子歷史頻道319回：替大軍閥平反系列之 #張勳】

♏七十四歲嘅Donald Trump已經返返番去白宮辦公，星期六佢曾經發高燒，照新聞頻率去睇，未必係一件小事，不過有國家級料理，果然迅速康復，畢竟大選在即，距離美國總統大選投票，祇有三個星期時間。之前有人話特朗普用苦肉計，睇嚟未必，佢感染新型冠狀病毒純粹係一場意外，一個偶然，歷史果然存在無限偶然性。

♈DonaldTrump受到感染，迅速復出，對選情嚟講，絕對有利無害，74歲老人展現頑強生命力同積極性，相對77歲有神冇氣嘅sleepy Joe，搶晒分，加上一次十月頭驚奇，雙方選情咬得更緊，隻病毒可能幫助特朗普一把，當然今屆大選到咗現在，已經冇辦法預測勝負，未來三星期，預計雙方會有更多招數出籠，一定鬥過你死我活。我都係嗰句，民主黨出77歲拜登參選，未開波先讓半球，如果希拉里肯玩多屆，或者奧巴馬可以選多次，可以講差唔多贏梗。

♊整個世界已經被一場新型冠狀病毒所完全改變，就算疫苗順利出爐，亦未必能夠係短時間內將世界回復正常狀態，2020年已仆直，2021年對全世界嚟講，會係一個嚴峻考驗，谷底反彈？抑或天災後到人禍再築新底？真係nobody knows，不過人類要同呢隻古靈精怪嘅病毒共存渡過就一定，一定要由恐慌變成習慣，將不正常狀態變成正常狀態，最重要的是避免戰爭，否則Covid-19會成為引爆火藥庫嘅導火線。

♏我哋成日將視線放響中美兩國，但真相係世界上有大量貧窮落後國家面對疫情同封關，佢哋先大大鑊，香港之前用咗3000億救市，用咗四分一儲備對應第一波危機，頂得住有餘，個緊急掣仲可以撳多三次。但好多國家根本早就冇錢，3000億？30億都冇喇，我有時根本難以想像佢哋點頂落去？不過新聞冇報導，就係即係問題唔存在，叫冇眼屎乾淨盲。

♑【常威近代史】第五部《霹靂大忠臣對決無敵大買辦》電子書上架（條download link在下面），請大家課金支持我一直走落去，直至劉少奇骨灰到達北京王光美手上…

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上4000訂戶！

✅https://youtu.be/y_aejt0Hrjo

【常威近代史】（四百四十三回）
1924年最後一個月

時間嚟到1924年嘅12月，「第二次直奉戰爭」結束，世局大洗牌，東北大軍閥張作霖成為中國霸主，盟友孫文聲望亦蒸蒸日上，直系雖然慘敗，但吳佩孚仍然盤據中原，中國第一號大錢罌上海落入直系孫傳芳（1885-1935）手上，直系仍有胡叫。二五仔馮玉祥發動北京政變，為他人作嫁衣裳，最終被迫下野，心有不甘，老好人皖系段祺瑞被應邀出山，穩定北京中華民國中央政府局面，只係奉系紙版人，孫文應邀北上，共商國是，極有可能係同奉系張作霖投城，商討南北上下夾攻中原直系勢力嘅可行性。

孫文嘅國民黨採用「聯俄容共」政策兼改組後，實力漸強，但1924年嘅年尾，仍然處於韜光養晦嘅階段，仍未係發難時候，國民黨內嘅左右派之爭，亦冇辦法平息，第三國際嘅人才（軍事專家與教官）同資金國民黨唔介意收，但要同中國共產黨平起平坐，就冇得傾。

此處不留人自有留人處，中共另謀發展空間，1925年12月1號，中共黨員海豐人農民大王彭湃以國民黨中央農民部特派員身份，前往廣寧一帶，領導農民減租運動，對抗地主同土豪劣紳，彭湃開始聚人，響不久嘅將來，就係佢建立中國第一個「蘇維埃」，將共產主義響中國成為政治現實操作，貢獻可圈可點。

孫文北上途中，大力倡導召開國民會議，即重新召開國會（響孫文心中嘅合法國會），國共兩黨全力開動宣傳機器，展開宣傳及組織活動，全國掀起大規模嘅「國民會議運動」，KOL孫文的確魅力沒法擋，論實力，佢遠遠及唔上張作霖吳佩孚，甚至當時中國任何一個有實力嘅大軍閥，但論人氣，佢遠遠超過其他人，多年革命經驗嘅累積係底氣，但孫文一直好識包裝自己，佢做過幾多壞事你並唔知道，但係佢做過嘅好事就會被佢自己同身邊嘅搖旗呐喊者100倍放大，乜叫意識形態操縱？活生生例子在此。

你信嘅，就係真；你唔相信嘅，就算幾真都係假。今日嘅香港，有好多人逢中必反，亦都係意識形態嘅問題。有人問我，意識形態如何改變？我只可以答你，意識形態灌輸係一場深耕細作，係長時間工作嘅成果，要一下子改變人類嘅想法絕非易事，利用暴力壓抑，可能係短時間內改變形勢嘅唯一方法，但係好容易適得其反。

講真你唔鍾意一個人，佢做乜你都唔啱聽唔啱睇，相反如果你鍾意佢，就算佢做壞事劈腿你都覺得係情有可原。況且乜嘢係好事？乜嘢係壞事？好多時候只係個人一廂情願嘅睇法，凡做一件事同作出一個決定，必定有好壞兩方面效果。正如政府派錢都有人話唔啱，咁點先啱呢？凡人對眼前事物作出判斷，少不免加入自己嘅情感，所加入嘅部份，就係意識形態操控嘅部份。

特朗普堅持唔戴口罩，甚至自己瀨埋嘢都堅持唔戴，咁佢係啱定錯呢？支持佢嘅人覺得佢堅持己見，有承擔有氣魄，100%是正確的；反對佢嘅人，覺得佢係癲佬，搞到美國一鑊泡。就係一件咁簡單嘅事，一個美國總統戴唔戴口罩，都冇話絕對啱定錯，更何況係歷史上嘅大事件？因此所謂是非黑白對錯，根本唔存在，除卻科學之外，人文世界嘅真理並不客觀地存在於世界中，只係由他人講畀你知，而你選擇相信就叫真理。

12月14號，響應孫文號召，上海國民會議促成會成立，20號，廣州國民會議促成會亦宣佈成立，並且舉行十萬人大遊行，另外天津、杭州、武漢、長沙、太原、徐州、寧波、南京以及安徽、山東、河南等地紛紛成立國民會議促成會，國共兩黨合作下，去到1925年1月初，全國一共有50多個大中型城市成立國民會議促成會，國共合作下嘅宣傳機器威力有幾大？睇吓啦。

12月17號，北京電車公司響天安門前舉行通車儀式，講吓電車歷史，最早有電車嘅地方當然喺香港，1904年投入服務到宜家，我常公子仲成日搭，1906年天津創辦咗最早嘅有軌電車系統，1914年無軌電車傳入上海，1924年，北京電車系統全線開通。

12月23號，由胡適牽頭，《現代評論》週刊響北京出版，雜誌嘅宗旨係「精神是獨立的，不主附和；態度是研究的，不尚攻訐；言論趨種實際問題，不尚空談」，《現代評論》係中華民國重要嘅右派刊物，作者傾慕並且大力宣傳西方政治同文化，一共出版209期，去到1928年10月29日停刊。

1924年最後一日12月31日，孫文帶病由天津進入北京，受到十萬名群眾熱烈歡迎。孫文由11月13號應馮玉祥所邀，離開廣州出發，中途經過香港、上海、繞道故鄉日本，12月4號到達天津，但係佢嘅健康情況每況愈下，癌細胞已經高速擴散，我諗佢自己都心知肚明，今次北上之旅，好有可能係佢人生最後一次嘅旅程，所以孫文沿途大力宣傳革命主張，為咗依個目的，佢並冇選擇留喺天津養病，響1924年民國13年嘅最後一日，嚟到中國嘅心臟北京城，同日發表《入京宣言》：

「文此次來京，曾有宣言，非爭地位權利，乃為救國。十三年前，余負推倒滿洲政府、使國民得享自由平等之責任，惟滿清雖倒，而國民之自由平等早被其售與各國，故吾人今日仍處帝國主義各國殖民地之地位；因而吾人救國之責，尤不容緩。至於救國之道多端，當向諸君縷述，惟今以抱恙，不得不稍俟異日。」

非爭地位權利，乃為救國，可圈可點矣。

#常威💀 #大軍閥平反系列 #大軍閥 #民國歷史

✅本土唯一香港土話近代史文本

❤【常威近代史】第一部《大清亡國關慈禧蛋牛治》，全面開放，免費下載， #freedownload！

Free下載連結🔽

https://play.google.com/store/books/details?id=C3hjDwAAQBAJ

【常公子歷史頻道320回：替大軍閥平反系列之 #張勳復辟】

♏有一種說法，因為「無為而治」係一種美德，順住歷史軌跡去走，儘量不加以干預，用政治術語，係「大市場小政府」，好多人認為香港上一個世紀七、八、九十年代嘅黃金時代，就係無為而治嘅最佳助證，不過真相當然唔係咁，香港上一個世紀後半葉嘅高速發展，因為多方面因素而出現，當中中國內地因素為最重要，亦係毋庸否定嘅事實。

♐香港同中國，永遠息息相關，六七十年代嘅香港，係當時奉行鎖國政策共產中國南方嘅唯一對外貿易通道，因為角色獨特，自然豬籠入水。去到八、九十年代，中國開放改革，香港商人投資中國，亦食盡開放改革初期嘅經濟紅利，賺得盤滿缽滿；及後工業全球化，香港某程度上成為中國最重要對外金融集資窗口，（或者有人講係洗黑錢基地），不過無論如何，香港一直背靠祖國而飛黃騰達，係歷史真相。

♈我想表達嘅係，就算當年英國殖民地政府採取何種政策，不論無為也好有為也好，香港的歷史發展也許都係大同小異，因為最大主導權並不在統治者手中，而在於香港同中國嘅特殊地理同文化關聯。但當今嘅世界形勢，卻係因為兩個大國同時出現咗兩個有為嘅統治者，佢哋分別係特朗普同習近平，一個企圖將於金融海嘯後國勢日頹嘅美國重新喚起；另一個則發現歷史契機在前，希望實踐中華民族偉大復興使命感。無可否認兩人都是希望有所作為，絕對唔係得過且過，當然兩個國家兩個領導人彼此亦有互動關係，歷史發展本身亦主導住兩人嘅行為同想法。但無可否認，兩人同時出現，卻將整個世界格局徹底改變……

♉嚟緊嘅11月3號美國總統大選，相對變得無比重要，特朗普是否連任，會係未來幾年世界局勢最主要嘅變數……

♑【常威近代史】第五部《霹靂大忠臣對決無敵大買辦》電子書上架（條download link在下面），請大家課金支持我一直走落去，直至劉少奇骨灰到達北京王光美手上…

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上4000訂戶！

✅https://youtu.be/57wpiSjqhwg

【常威近代史】（四百四十四回）
孫文的承繼人

孫文帶病進入北京，為咗救國，同時亦將歷史帶入風起雲湧嘅1925年，孫文最後死於癌症，大概佢自己都估唔到列寧死後唔夠一年，就輪到自己，生死有命，完全冇得講，孫文算短命，如果佢可以活到七八十歲，我相信成個歷史嘅走向亦都會全然不同，至少中國變成行共產主義可能唔使等到1949，孫文最後嘅歲月，亦係佢嘅人生聲望最高峰嘅時期，亦係因為佢早死，所以成就咗國父一代傳奇。我幾乎可以寫包單，孫文長廿年命，就唔會成為「國父」。

凡係重要政治領袖，承繼問題必生波折，孫文的承繼者由頭到尾都係得一個，就係佢嘅多年戰友蔣介石，孫文培養蔣介石成為繼承人，亦非一朝一夕嘅事，論名氣論支持度論國民黨內嘅聲譽同地位，蔣介石不及中華第一美男子汪精衛（蔣介石輸光頭），孫文死後，蔣介石同汪精衛亦開始權力鬥爭，產生之後嘅「寧漢分裂」，甚至中日戰爭期間，各主一方；到最後蔣介石名垂千古，汪精衛淪為秦檜之後嘅最大漢奸，遺臭萬年。歸根究底，都係孫文選擇咗蔣介石做佢嘅繼承人。

當然蔣介石嘅成功，亦有一個非常重要嘅因素，就係一場政治婚姻，蔣介石嘅老婆係宋美齡（1898-2003），宋美齡係宋慶齡細妹，比二姐宋慶齡細五年，宋慶齡係孫文老婆，即國母，蔣介石同宋美齡結婚，就做就咗佢係孫文親戚，正所謂親上加親，自己人零舍不同，由有親戚關係嘅蔣介石承繼孫文嘅（全部）政治遺產，亦比較合情合理，蔣介石贏汪精衛，就係贏呢半個馬鼻。

蔣介石同宋美齡認識於1922年，初次見面就響宋慶齡屋企，當時孫中山仍然喺廣州。有傳說話蔣介石一見宋美齡，就一見傾心，不知道傾心的是美人還是美人背後嘅權勢，總之之後蔣介石就積極追求宋美齡，宋美齡同佢家姐宋慶齡一樣喺美國留學，完全係基督徒鬼妹仔，仲有博士學位，英文勒勒聲，簡直係時代女性典範。

1922年6月，孫文被陳炯明趕出廣州，炮轟廣州市民後乘坐中山艦蒙難想走去上海，走投無路之際，係蔣介石雪中送炭，加以援手。之前蔣介石已經拍過孫文響廣州搞過一排，好可惜蔣先生同孫文手下完全唔夾，當然最重要嘅理由係阿烟哥陳炯明，而且蔣介石擁有日本軍人個性，脾氣暴躁遠近皆知，發起嬲上嚟會亂咁打人，後來被人排擠，乾脆離開政治圈，去上海經營物品交易所金融生意，可惜打仗佢就叻，玩金融就真係油麻地，一直冇乜起色。

重遇孫文，真係患難見真情，從此以後孫文亦視蔣介石為最親密戰友兼繼承人（孫文應該未諗繼承問題，嗰陣佢冇諗過自己會咁早死掛），於是蔣介石追求宋美齡之事，孫文當然讚成，親上加親，對蔣介石固然有利，但孫文又何妨不想呢？但佢勸告介石千萬不可以操之過急，否則對方唔會咁容易接受，而且蔣介石當時已經有老婆有妾侍，大仔蔣經國（1910-1988）都12歲，宗教信仰嗰一欄仲要填上「佛教」，對方係鬼妹仔女博士兼基督徒，完全唔Match啊！仲有，當時蔣介石已經34歲，美齡23一枝花。

不過蔣介石真係一個唔會咁容易放棄嘅人，為咗追求宋美齡，佢首先同原配夫人妾侍解除一切婚約，而且後來1926年求婚嘅時候，仲答應蔣家結婚後會認真研讀《聖經》，學習基督教信仰。無可否認，蔣介石同宋美齡嘅婚姻係一段政治婚姻，蔣介石係利用佢同宋家嘅姻親關係，鞏固佢響國民黨內承繼孫文死後一切政治遺產嘅基石，所以蔣先生一生對老婆敬愛有加，不敢有半點逆違，蔣夫人後嚟亦權傾天下，宋家皇朝蔣天下，之後嘅精采故事有排講，今日止住先。

1925年1月11號，中國共產黨召開第四次全國代表大會，中共首次提出無產階級喺民主革命中嘅領導權同農民同盟軍嘅問題。農民呢個階層，亦第一次進入中共嘅革命大戰略中，正統馬克思主義，要解放嘅係勞工階級工人階級無產階級，老實講並包括農民階級在內，當然你可以將無產階級包含農民，理論上亦無錯。但馬克思主義嘅革命理論中，最主要動員嘅係工人階級，農民因為文化水平較低（即直接了當文盲），好難有階級覺悟性，用人話去講，就係驚農民「養唔熟」，唔夠忠心好容易作反。

但係由列寧、托洛斯基推翻俄國沙皇統治開始，農民階層似乎難以避免喺革命中發揮咗極大嘅推動力量，理論還理論，實際還實際。放響當時嘅中華民國仲實際，整個中華民國四億人，文盲農民佔咗95%以上，所以當時嘅中共，已經有人清楚明白，起動農民作為革命大戰略嘅重要性，當中嘅代表人物就係彭湃、毛澤東，毛澤東要靠農民起家打天下，亦係佢後嚟畀蘇聯所謂正統馬克思主義列寧幹部派杯葛同排斥嘅理由（之一）。

第四次全國代表大會，亦闡明中國嘅民族革命運動，必須有最革命嘅無產階級有力嘅參與，並且取得領導權才能得到最後勝利，而農民係無產階級嘅天然同盟軍，（見到未？「農民」同「無產階級」係分開嘅），必須重視依一個同盟力量。同時大會制定咗國共關係嘅新政策，基本方針係：打擊右派，爭取中派，擴大左派。

參加大會嘅其實只有20人，代表全黨994名黨員，第三國際亦有代表出席會議。大會選出陳獨秀、瞿秋白、蔡和森、張國燾、彭述之、李大釗、譚平山、項英、李維漢為中央執行委員會委員，陳獨秀繼續擔任黨總書記最高領導人。

#常威💀 #大軍閥平反系列 #大軍閥 #民國歷史

【常威近代史】（四百四十五回）
阿烟哥最後的反撲

孫文身在北京渡過最後歲月，1925年1月7號，陳炯明趁孫文北上之際，自稱「救粵軍總司令」從潮汕分三路進攻廣州，戰火一直冇停過……

孫文唔響度，軍權由蔣介石控制，當時蔣介石係黃埔軍校校長，1月6號佢宣佈實施「革命軍連坐法」，軍令如山，真係唔可以講笑，法規規定，戰爭時期不得臨陣退縮，若有觸犯則以連坐處分！班長同全班退卻，殺班長；排長同全排退卻，殺排長；如此類推，連、營、團、師、軍層層緊扣。假如軍長不退，全軍官兵盡退，以致軍長陣亡，即殺所屬師長；師長不退，而全師官兵盡退，以至師長陣亡，則殺該師長所屬的團長；如此推落去，總之有人臨陣退縮，就要有人以性命付出代價。

真正嘅戰爭就係咁樣，係你死我亡嘅血腥殲滅戰！之前北洋軍閥間嘅戰爭遊戲，其實大家都好hea，非常唔認真，好多時候都睇到，敵人未到就鳥獸散，或者開幾槍發幾炮向上頭交代就鬆人，圍威喂收哈哈哈軍費袋袋平安！或以打仗為名打劫為實，甚至乎邊邊人工高就去邊邊幫手，上述嘅事件成日都發生，所謂戰爭，基本上只係一種軍閥之間權力鬥爭嘅手段同姿態，大家曬吓馬，打兩嘢就可以埋檯傾講條件，並唔係生死相搏，你死我活嘅血腥殲滅戰形式，真正血腥戰爭，其實係由1925年開始。

除咗連坐法，黃埔軍校亦都擴大其影響力，號召更多年青軍人加入統一革命戰線。去年8月，為防備商團軍暴亂，黃埔軍校第一期學生聯絡廣州各軍校學生，組成「中國青年軍人代表會」，經黃埔軍校校長蔣介石、軍校國民黨黨代表廖仲凱特許，改組為「中國青年軍人聯合會」。

2月1號，黃埔軍校、滇軍幹部學校、粵軍講武堂、桂軍軍官學校、鐵甲車隊、海軍等單位代表2000餘人、響廣東大學舉行聯合會成立大會（是日亦都係出兵攻打陳炯明之時），該會主要負責人為蔣先雲、李之龍等，均為中共黨員，聯合會以團結軍人、擁護南方革命政府為宗旨，南方軍事勢力進一步擴大及統一。團結就係力量，勢力分散就會被敵人逐一擊破。

1月12號，上海總商會發出上海不駐兵、不設軍職及遷移兵工廠嘅倡議，以謀求地區穩定和平。去年9月，直系齊燮元（1885-1946）同皖系盧永祥（1867-1933）為咗爭地盤，喺上海同蘇州一帶激戰，直奉二次大戰後，奉軍南下，段祺瑞到北京主持大局，為發展皖系勢力，任命盧永祥為蘇皖宣撫使，奉軍張宗昌（1881-1932）部隊以護送為名，跟隨南下。直系笑面虎孫傳芳（1885-1935）為保地盤，聯合齊燮元組成江浙聯軍，預備對抗盧永祥張宗昌部隊，大戰一觸即發。

但係冇人想打爛上海，畢竟上海都係當時亞洲一個無比重要金融城市，各方租界內仲有大量西方列強外國勢力，軍閥都唔敢得罪佢哋，於是上海總商會發出嘅和平倡議，得到各方勢力包括奉系、皖系、直系軍閥嘅認同、附和與包容，上海一帶暫且保住和平局面。

1月26號，陳炯明發動最後反撲，向東莞虎門進攻，東江戰爭開始。

同日，身在北京嘅孫文入住北京協和醫院，檢查病情，1月27號，院方宣佈檢查結果，孫文患上末期肝癌，慘情。

段祺瑞入京組織臨時政府執政時，通電召開包括所有軍閥、政客、官僚及全國重要人物參加「善後會議」，企圖解決總統曹錕倒臺之後嘅善後問題。1月17號，孫文致電段祺瑞，反對由佢包辦善後會議，並且提出兩項條件：

一、善後會議應接納各人民團體代表。（亦即係對段琪瑞想搵開會嘅人選唔滿意）

二、善後會議涉及軍事財政問題，應由國民會議決定。（簡單啲講，唔可以講錢，要講錢就要召開國會先講，即係唔畀你段祺瑞同張作霖自把自為）

1月29號，段祺瑞拒絕孫文對「善後會議」所提出嘅主張，宣佈會議將於2月1號於北京召開。1月31號，孫文指示國民黨中央向全黨下達命令，所有國民黨黨員一律不能參加，孫文北上，段祺瑞無疑係捉蟲入屎忽！攞嚟賤！

1月31日，黃埔軍校校長蔣介石集合軍校學生軍及教導團官兵舉行東征誓師，預備同陳炯明大軍決一死戰！

陳炯明進攻廣州嘅軍力大概30000人，廣東革命政府任命楊希閔（1886-1967）為東征軍總司令，以楊希閔滇軍為左路，劉震寰（1890-1972）率領桂軍為中路，許崇智（1887-1965）率領粵軍、黃埔軍校學生軍同教導團（蘇聯軍官）為右路，三路大軍，討伐陳炯明最後嘅反撲。

2月1號，右路軍出師，左中路兩軍按兵不動，2月4號，右路軍喺蔣介石指揮下，先後佔領石龍、東莞、平湖同深圳，14號，攻入淡水，俘虜敵軍2000人，3月7號攻佔潮州、汕頭，殲滅陳炯明主力10000人，13號於棉湖再大破陳炯明部隊，奠定咗東征嘅勝局。成場戰爭，中路滇軍同左路桂軍根本唔使幫手。

有人話依一場東征戰爭，因為蔣介石有蘇聯嘅紅軍指揮官參與同蘇製軍備支援，所以打到陳炯明全無還手之力，相信亦係主要理由，但係黃埔軍校學生軍初試啼聲，就取得重要勝利，無疑令南方革命政府士氣大振，聯俄容共政策下，一股全新嘅巨大嘅軍事力量於第三國際全力支援下喺南方形成。

#常威💀 #大軍閥平反系列 #大軍閥 #民國歷史

【常威近代史】（四百四十六回）
一個盜賊如毛嘅世界，人人搵命搏

1925年2月，南方軍政府全面對付陳炯明最後反撲，成王敗寇，依個世界邊個打贏邊個正確，陳炯明提倡「粵人治粵」，要行民主自由共和聯邦制，而孫文領導嘅國民黨則要北伐統一全國攪大一統，相對之下，陳炯明變咗分離主義者，係「粵獨」人物，非要清除不可。當日孫文一支公回歸廣州搞革命政權，係由陳炯明手中「粵軍」軍事力量一手促成，昨日嘅朋友，變咗今日嘅敵人，政治就是這樣一回事，千萬不要覺得奇怪；正如1925年頭，國共合作仍然如膠似漆，但係好快一年半載貨仔就會血腥收場。當年拉登係美國人所扶植，最後送佢上是穆罕默德嘅亦係美國人。

政治局面充滿千變萬化，有人話一日24小時都嫌長，因此如果唔能夠承受政治嘅高速變化同冷酷無情，千祈唔好踏足政治圈子，玩政治嘅人要有「馬基維利主義者」嘅本質，要隨著時勢變化而不斷改變立場——或者至少改變表面立場——去適應時勢謀求生存空間，以求達到最終目的。

政治人物都係有膽量嘅變色龍，唔做變色龍根本做唔到政治人物，做變色龍但冇膽都係唔得，雖然係咁，作為變色龍唔代表佢哋冇宗旨冇終極夢想——一個冇夢想嘅人同一條鹹魚基本上冇分別——立場雖然不斷變化，但好多政治人物係會堅守佢哋嘅最終目的（或叫夢想），例如解放全世界，例如建設人人公平嘅共產主義社會，又例如爭取民主自由，平等公義、又例如國泰民安，豐衣足食，例如全心全意為資本家幕後金主打工服務出糧等等……

政治同做人一樣，目標同夢想可能一向貫徹始終（正如大部分人想做億萬富豪），但係手段就係千變萬化，為求達到目的可以無所不用其極，20歲可以嫁畀70歲，你就不要問性生活如何發生；總之過咗海就係神仙，英雄莫問出處，正如香港唔少富豪嘅第一桶金都係嚟自外家一樣，你笑佢哋？但好過你捱窮一世丫柒頭。柒頭，就係一種永遠只懂發夢的動物。

1925年世界，盜賊如毛，一係捱窮一世，一係搵命搏，冇份做兵，就要做匪，1925年1月19號，大名鼎鼎嘅吉林女匪「駝龍」喺長春被槍決，年僅24歲。「駝龍」原名張素貞，遼寧人，16歲被人拐入長春妓院做妓女，之後嫁畀陀地「大龍」，「大龍」被長春縣保安隊擊斃後，少女張素貞自任大當家，起朵「駝龍」，帶住200幾人喺長春一帶打家劫舍，無惡不作，而且多次擊退保安隊同警察，最後要由奉系軍閥調動部分軍隊剿匪，先可以將「駝龍」伏法。

類似嘅故事，係1925年嘅世界只係冰山一角，當時應該每日都發生，全國各地應該有幾千個「駝龍」活動中，盜賊如毛，因為社會不安，民眾活於水深火熱，太平盛世如果唔係為興趣，邊個會做賊邊個會做雞先？個個月有十萬蚊糧出，得鳩閑同你搵命搏？因此日本咁多女仔下海拍AV，我就打死都唔相信日本冇問題，最後都係一句：係存在決定意識，並非意識決定存在，所以人人應該讀馬克思。

2月1號，北京臨時紙板人段祺瑞唔理孫文嘅反對，如期召開佢嘅「善後會議」，原本會議有184人參加，但孫文號召全體國民黨員抵制該會，大枝嘢黎元洪、唐紹儀、梁啟超、岑春煊等人亦都拒絕參加，各省嘅代表亦都未到齊，結果184人得96人到會，未夠三分二不足法定人數，段祺瑞再call人，拖成兩個禮拜，去到13號先至夠人正式舉行第一次會議，會議合共召開咗22次，提出25個議案，不過因為軍閥內部勾心鬥角，西南軍閥又同奉系代表完全唔啱，嗌交多過傾計，結果個會開到4月21號，開到孫文都走埋上天國，25個議案只係通過咗3個咁大把，大腸有屎，認真失敗。

2月仲有一件大事發生，就係我哋嘅末代皇帝溥儀離開北京，前赴天津，正式投入日本人懷抱，大家應該記得，之前25仔馮玉祥將清室逐出紫禁城做流浪狗，正所謂此地不留人自有留人處，溥儀聯絡日本人，溥儀出京係由羅振玉與日本大使館暗中安排，2月23號末代皇帝溥儀響日本人嘅保護下秘密離開北京，25號抵達天津，住在張園，溥儀走咗之後，日本公使先至派人通知中國外交部。

呢單嘢又算在段祺瑞頭上，國人賴佢知而不防，難辭其咎。講真關佢鬼事咩？政府又冇好似陳同佳咁軟禁溥儀響安全屋，溥儀係自由人，有毛有翼有面又有水，朕鍾意去邊都可以？而且末代皇帝溥儀本來好好哋住喺紫禁城，過住優哉遊哉嘅生活，養狗種花打網球，佢亦冇打算過投靠日本人（返工），一切都係中華民國政府自己攞嚟。一連串連鎖反應下，因為日本手上有條廢帝在手，先開始構想建立「滿洲國」大計，亦因為一個「偽滿洲國」出現，導致中日戰爭全面發生，馮玉祥你係多嚿魚，多咗幾嚿魚呀。

正當段祺瑞在北京召開「善後會議」同時，中國國民黨同中國共產黨共同發起響北京召開「國民會議全國代表大會」，呢次大會，主要係針對段祺瑞臨時執政府召開嘅「善後會議」，你識開會，難道我不懂開會嗎？會議反對軍閥政治分贓，以促成真正「國會」產生。3月1號，會議響北京長安街北京教育會場召開，去到4月15號閉幕，一共有200人（人頭）參加，會議通過咗國際、國內、財政同憲法等問題嘅重要決議案（當然毫無法律效力），強調「廢除不平等條約」、「打倒帝國主義」、「打倒軍閥」嘅三幅被。

#常威💀 #大軍閥平反系列 #大軍閥 #民國歷史

【常公子歷史頻道322回：替大軍閥平反系列之 #海軍護法宣言】

♏一場新型冠狀病毒特襲地球，潮水退卻，邊個冇著泳褲一目了然！歐洲首當其衝，其實由21世紀開始，整個歐洲已經充滿問題，簡單啲講，就係入不敷支，歐盟嘅建立，對歐洲整體經濟發展停頓無補於事，反而為咗幫窮兄弟削弱咗強國例如德國嘅發展，英國人一向醒目，由歐盟建立嗰日開始，就唔用歐元繼續用英鎊，就係唔想補貼窮細佬，現在仲脫埋歐，西瓜靠大邊，都係同美國拍住上好啲。歐洲央行年年印銀紙（具體情況可以睇【紙房子】第二季第8集），雪球越滾越大，一場新型冠狀病毒引發嘅全球經濟大衰退，歐洲有機會爆大鑊。

♑相反形勢一片大利嘅反而係中華人民共和國，疫情一開始就用軍法管治，軟硬兼施，結果有效控制疫情，十一黃金周八日假期六億人口流動，內循環引擎開動，成績有目共睹。經濟學家估計，中國更有可能係2020年世界唯一經濟正增長嘅國家，真真正正一枝獨秀，中國人民站起來！但係棒打出頭鳥，美國加劇圍堵中國早已與箭在弦，現在加埋你係唯一一個冇失戀嘅人，咁仲得了嘅？之後一兩年，中國嘅外交形勢將會更加孤立，亦冇人可以想像有乜嘢事可以發生？畢竟眾矢之的，強敵環伺，點會係好事呢？

♉救命（人命損失其實有限，其實係救經濟）疫苗遲遲未推出，就算疫苗有效，距離有效控制疫情蔓延，睇嚟仲需要由疫苗開始普及計起一年半載時間，即係話，最快築底會響2021年年中之後，佢哋今日至少仲有八個月，整個地球有排捱。去到谷底，仲要反彈，想返番去2020年頭嘅世界情況，最樂觀估計，可能要拖拉到2022中年先有機會全面恢復；情況並唔樂觀，最可怕嘅係人窮志短，意志力薄弱就會做出錯誤決定——即係話最怕會打仗。

♈2022有排先到，但最影響世界大局變化嘅2020年美國總統大選只剩下兩個星期時間就揭盎，照目前走勢，大家五五波（邊個輸咗，官司都會有排打），拜登民調民調領先，但情況同四年前希拉里一模一樣，當時冇人估到Donald Trump可以贏，況且互聯網世界，Trump仲贏緊Biden九條街，不過話分兩頭說，局面發展到今時今日，如果最後Donald Trump輸，就係輸喺一場Covid-19手上，冇呢場特如其來嘅瘟疫，Trump係90%連任，世事何曾有絕對？我諗佢自己都估唔到，見佢咁X憎中國，真係情有可原。

♑【常威近代史】第五部《霹靂大忠臣對決無敵大買辦》電子書上架（條download link在下面），請大家課金支持我一直走落去，直至劉少奇骨灰到達北京王光美手上…

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上4000訂戶！

✅https://youtu.be/-VKjBGnuyak