【常威近代史】（三百三十回）
大軍閥平反系列
1919年1月，由美國、英國、法國、意大利、日本五大強國發起主持喺法國巴黎梵爾賽宮舉行嘅和平會議，中國作為協約國嘅成員國，亦都被邀請派出代表出席巴黎和會。
有需要澄清一點，其實巴黎和會開咗整接近一年，由於參加人數同埋代表太多，要處理嘅事務亦都太多，到1920年1月21號先正式結束，中間經歷咗好多事，亦都牽引到中國嘅政局發展，尤其是喺巴黎和會去到中段時候，中國就爆發咗一場轟轟烈烈嘅五四愛國運動。
喺巴黎和會響朵嘅，有中國嘅著名外交家顧維鈞（1888-1985，相當長命），佢喺會上努力捍衛中國嘅利益同民族尊嚴，贏得當時同埋後世人景仰同尊重。
響第一次世界大戰中迅速增強自身國力嘅美國，積極喺戰後確立自己取代大英帝國、步上世界主導者嘅地位，當時嘅美國28任總統威爾遜（Thomas Woodrow Wilson, 1856-1924）提出一系列戰後國際關係秩序嘅構想，即係成立「國際聯盟」，亦即係後來「聯合國」嘅框架同前身，佢希望成立一個有廣泛認同性嘅國際性組織，用嚟處理以及調解國家與國家之間嘅糾紛，從而達到和平，減少戰爭發生。無疑，美國嘅構想係一番善意，亦都非常合情合理（左膠角度），做唔做到係另一回事，凡事動機出於美好，都係值得欣賞。
用咁嘅思路，列寧同托洛斯基建立嘅共產主義政權，捍衛勞工階層同無產階級利益，都係值得欣賞，係人類文明嘅進步表象。點解成日強調「毋忘初心」？因為其實好多事情一開始都係美好同高尚嘅，只係後來變了質，共產主義係其中一樣，香港嘅逆權運動都係一樣，由和平示威變成對抗警暴，我都可以接受，但「獅鳥」卻係變質行為。毋忘初心，我哋香港人反抗嘅，係極權統治白色恐怖謊言制度，某程度上亦係政治暴力，如果用「暴力」反抗「暴力」，用「謊言」對付「謊言」，只恐怕有一日，彼此只會淪落成為同一種事物：「暴君體制」，貪求一時之快，失去道德高地同行動高尚性，或者傷害自身良知同修養，係得不償失。
大家要記住，如果我哋會贏，我哋贏係贏個人道德修養，係贏信仰和平理性普世價值，係贏對美好事物具有美感嘅欣賞能力，係贏內涵意志同價值觀。切記。
早響第一次世界大戰結束之前，美國總統威爾遜就停戰協議以及戰後和平保障問題，發表咗著名嘅《十四條宣言》，當中曾經咁樣講過：
「公開之和平條約，以公開之方法決定之，此後無論何事，不得私結國際之盟約，凡外交事項，均需開誠佈公執之，不得秘密從事。」另外亦都提及：「確定約章，組織國際聯合會，其宗旨為各國交互保障其政治自由及土地管轄權，國無大小，一律享同等之權利。」
