【常威近代史】（三百零三回）
大軍閥平反系列
1917年5月，推翻沙皇政權後建立嘅俄國臨時政府未能解決國內經濟問題，更加唔肯離開第一次世界大戰戰場，國內民衆反抗情緒升溫，大規模示威活動發生，而且從未有停落嚟嘅跡象。上街嘅群眾、失業工人、從四方八面湧來聖彼德堡嘅貧民百姓、仲有軍人，人數不斷增加，去到1917年7月，上街抗議臨時政府人數接近50萬，加上臨時政府響7月1號對戰場前線嘅新一輪攻勢迅速潰敗，戰敗嘅消息火上加油，群眾越嚟越憤怒，到達臨界點。
社會一片混亂，左翼陣營亦產生分裂，甚至革命黨內部亦對當前局面有唔同嘅睇法，7月嘅俄國政局，遠比今日香港複雜，並非黃藍二絲二分法，大矛盾中有小矛盾，小矛盾中有更小嘅矛盾，政治徹底碎片化，非黑即白並唔存在。就算到咗今時今日，談論政治一定要有一個覺悟，就係唔可以非黑即白，正邪二分。世界上同人類嘅思維狀態本來就充滿灰色地帶，而所謂灰色地帶嘅存在，亦都係政治妥協周旋嘅空間，否則一黑一白，永遠傾唔埋欄，最後只能夠流血收場。
7月7號，臨時政府向列寧同托洛斯基等重要布爾什維克成員發出通緝令，列寧托洛斯基被迫轉入地下活動，臨時政府開始拉人封艇，大量布爾什維克黨員被捕、布爾什維克工人被裁員，聖彼德堡內嘅革命部隊被解散或者send去前線送死，同今日香港一樣，實行以硬碰硬、以暴制亂。但清洗布爾什維克並唔能夠平靜亂局，7月17號，50萬人上街和平抗議，臨時政府下令武力驅散，數百人被臨時政府軍人槍殺！而支持武裝鎮壓嘅，仲有當時左翼社會民主工黨裡面「孟什維克」，即係多數派。依次顛壓，亦令到布爾什維克同孟什維克徹底割蓆。
人類總要不停犯上重複嘅錯誤，尼古拉二世槍殺群眾失去羅曼諾夫家族300年帝國，克倫斯基嘅臨時政府亦同樣報上後塵……屠殺平民，必然要付出代價。
俄國軍隊亦進入分裂狀態，臨時政府統治危機加劇，加上7月大屠殺後，布爾什維克支持度大幅提昇。中央同各地嘅「蘇維埃」（即工人委員會）紛紛離棄孟什維克，轉入列寧同托洛斯基領導嘅布爾什維克。布爾什維克聲勢壯大，而放喺佢哋面前嘅抉擇，就係「然後點？」
然後點？而家全香港人都想問。
其中一個選項就係儘快策動全面武裝起義，向 臨時政府奪取政權，推翻資本主義，響俄國全面推行共產主義（或社會主義）統治。當時響布爾什維克領導階層，即中央委員會亦有唔同意見，其中大力主張即刻進行武裝奪權嘅就「真國父」係托洛斯基，支持佢嘅有列寧同斯大林（落注贏咗，之後就係佢哋嘅世界嘞），但係反對者好似季諾維也夫（1883-1936）同加米涅夫（1883-1936）認為革命未係時候，而且佢哋提出，就算起義，都應該由各地嘅蘇維埃發動，而唔係由布爾什維克黨自己發動。
