大清亡國關慈禧蛋牛治 2

「赤潮澎湃，曉霞飛涌，
驚醒了五千餘年的沉夢。
遠東古國，四萬萬同胞，
同聲歌頌，神聖的勞動。
猛攻，猛攻，
捶碎這帝國主義萬惡叢！
奮勇，奮勇，
解放我殖民世界之勞工！
無論黑白黃，無復奴隸種，
從今後，福音遍天下，
文明只待共產大同。
看，光華萬丈涌！」

其實那個文人不左傾？到今時今日亦都冇變過，馬克思主義係由人道主義立場出發，而文學本身，本來就係以悲天憫人為本質，如果你只愛自己，唔愛其他人同整個世界，其他人受苦你係無動於衷，咁文學並唔係你杯茶，你應該去讀哲學或者數學，最好唔好入大學。

去返1927年8月11號嘅中央政治局會議，中共亦決定成立南方局同北方局，南、北分開領導。順帶一提，瞿秋白主理下嘅中共，佢只係處理意識形態同宣傳工作為主，至於真正嘅軍事戰略領導工作，瞿秋白並唔係參與太多，同中國共產主義奠基者陳獨秀相比，作為第二任中共最高領導人嘅瞿秋白，其實只係個過渡性人物。係中共由一個「文人政權」過渡成為「軍人政權」嘅轉折式人物。

8月12號，李宗仁、白崇禧聯名通電汪精衛、譚延闓、唐生智等，倡議寧漢聯合，唔好再搞國民黨內部分裂。不過你想搞團結和諧，蔣Sir就並唔係咁諗，同日，蔣Sir以退爲進（常用人生戰術），向南京政府辭去國民革命軍總司令一職，當晚就離開南京，乘坐專列前赴上海。

8月初，汪精衛集團表示同意同南京政府合作，但對蔣Sir本人仍然堅決抱著反對態度，同時，武漢政府派出嘅唐生智東征軍已經逼近南京，並聲言要蔣介石下野，否則唔能夠謀求寧漢團結。南京政府內部，李宗仁、白崇禧順勢倒蔣，連親信何應欽（1890-1987）態度亦非常曖昧，李宗仁甚至講「不宜因個人地位而犧牲黨國大計」。加上8月初，蔣Sir親自督戰嘅徐州戰役慘敗，部隊倉皇撤回南京，蔣Sir為推卸責任，將前敵總指揮第10軍軍長王天培（1888-1927）處死，此舉更激起更多黨內人嘅不滿。

蔣Sir四面楚歌，不得不暫時宣佈下野，8月13號佢喺上海發表下野宣言，聲稱「期望寧漢合作、盡力北伐、徹底清黨，並以黨員身份繼續革命」，隨後乘船前赴寧波奉化老家，胡漢民、張靜江等重要人物，亦相繼辭職……就睇吓邊個需要邊個囉？汪兆銘……

#常威💀 #蔣介石平反系列 #黃金十年 #民國歷史

🔥【常威近代史】第七部《最九衰的大軍閥時代》Round 2電子書上架，請大家支持！
https://play.google.com/store/books/details?id=lPgaEAAAQBAJ

amazon同步上架👍
https://www.amazon.com/dp/B08WCLGP4Y

【常威近代史】（四百九十九回）
龍潭之役

蔣Sir沿用一貫人生套路，以退為進，下野隱居寧波，向汪精衛及所有想倒蔣嘅人逼倉，個世界好公平，如果冇咗你唔得，咁冇人會留你，但係如果有啲嘢淨係你先能夠做得到，咁你就非常值錢。響香港地做個打工仔，一定要好明白呢個道理，如果你嘅工作任何人都可以替代，咁你只係一粒可以隨時被替換嘅螺絲釘，螺絲釘係唔值錢嘅，亦都冇任何價值可言，處世之道，依一點非常重要。至於如何創造自己嘅價值，好多時候亦唔係能力嘅問題，而係文宣嘅問題。21世紀20年代，每個人都有渠道宣傳自己嘅價值何在，大家真係要好好利用，老友周顯成日講「識人好過識字」，大概就係呢個道理。冇人知你勁，咁就算你係點勁都係冇撚用嘅。

1927年6月27號至7月7號，東京召開咗一個叫「東方會議」嘅物體，就係成班日本仔商量點樣吞拚中國東北及滿蒙地區，製造大東亞共榮圈偉大前設國策，我曾經講過，自從1895年甲午戰爭打羊之後，日本人早就將中國東北一帶為自己嘅「資源領土」，加上滿清政府倒臺，軍閥割據，中華民國七國咁X亂，日本人放慢軍事侵略政策，改爲經濟侵略，全因為大正時代嘅民主自由風氣使然，有少少低智嘅大正天皇say goodbye，雄才大略、積極進取、野心昭然嘅昭和天皇繼承大統，亦自然加快軍事侵略吞併中國東北嘅步伐。

1927年8月5號，日本外務省政務次官、著名帝國主義者森恪（1882-1932）、日本駐華公使芳澤謙吉（1874-1965）、關東廳長官兒玉秀紅、駐奉天總領事吉田茂（1878-1967）、關東軍長官武藤信義（1868-1933），以及三井財閥嘅代表，喺旅順召開「第二次東方會議」，討論「滿蒙政策」。

會議確定對中國滿蒙地區政策嘅原則，將滿蒙同中國本土分開，對滿蒙實行門戶開放、機會均等主義，允許任何國家喺滿蒙發產業，但日本必須係其中佔有地理同埋歷史嘅優越地位。會議決定日本必須盡力維持滿蒙秩序，並不惜以武力鎮壓反抗聲音，允許日本人進入滿蒙內地雜居（殖民），並與中國人享有同等權利，徹底取締出入口增值稅，抑壓中國人排日情緒，並既定計劃開始滿蒙六大鐵路建設，會議同時暫時從山東撤兵。

日本亦都好清楚，佢哋要嘅只係東北一帶嘅滿蒙地區，亦即係甲午戰爭同日俄戰爭後，佢哋「應得」嘅「佔領區」，將中國切割一大份出嚟據為己有，依一part，就係之後嘅「滿洲國」（或稱偽滿洲國），亦係中日全面戰爭爆發嘅源頭所在。

1927年8月24號破曉時分，退守江北嘅孫傳芳精銳盡出，向南京國民政府作出最後一擊，史稱「龍潭之役」。龍潭之役係孫傳芳同北伐軍之間一場決定生死成敗嘅戰役，亦都係北伐戰爭中最激烈、最兇險嘅戰役，依一戰係孫傳芳嘅垂死一擊，有人話「東南一戰無餘敵，黨國千年從此辭」，蔣Sir亦有講「此役關係首都（南京）之安危，革命之成敗，在國民革命軍戰史上實占重要之地位」。

8月25號，笑面虎孫傳芳親自督師，以11個師5個旅嘅兵力，兵臨南京城下，以勢如破竹之勢，佔領烏龍山炮臺、青龍山、黃龍山、以及堯化門外嘅龍潭火車站，滬寜線交通被切斷，蔣Sir嫡系何應欽第一軍（黃埔軍、黨軍）首尾不能相顧，此時李宗仁嘅第7軍主力佈置喺南京西南一帶，防備武漢方面唐生智部隊來襲，南京城防守相當空虛，白崇禧見情勢危急，立刻調動衛立煌部隊展開垂死反擊。

時年43歲嘅孫傳芳心知此戰關係自己一世英名、亦係北洋系統命運嘅生死存亡之戰，於是親自坐鎮龍潭火車站附近嘅中國水泥廠前敵指揮，之後幾日，兩軍喺龍潭火車站附近展開連番激戰。勝負未分之前，南京城嘅所有國民政府機關同黨部人員，紛紛收拾行李，預備撤退，大將何應欽亦都預備將第1軍撤離南京，退守杭州，幸好得到李宗仁竭力說服何應欽堅守陣地，何應欽親自上前線指揮，先至穩定番黃埔軍嘅軍心。

8月30號，兩軍爆發大決戰，龍潭火車站周圍數十里地域炮火連天，血肉模糊，戰鬥非常慘烈。孫傳芳部隊強弩之末，彈藥糧草不繼，加上被投靠北伐軍嘅北洋政府海軍總司令楊樹莊（1882-1934）率領嘅艦隊於江上攔截炮擊，水陸兩面受敵，只好下令全軍撤出龍潭。

第二日，國民革命軍乘勝狙擊，孫傳芳部隊全線潰敗，中午，除咗孫傳芳自己同少數部隊成功化妝逃跑，大部份孫軍被俘，歷時一星期左右嘅「龍潭之戰」終結，國民革命軍大獲全勝，此役，白崇禧、李宗仁、衛立煌（1897-1960）等名將名聲鵲起，之後叱吒風雲，不在話下。

「龍潭之役」係一場大型戰爭，雙方死傷慘重，有軍事評論家咁樣評論：「龍潭之戰為國民革命中重要一頁，就軍事之劇烈言之，則以龍潭附近數十里之地，集兩方軍隊十餘萬之眾，激戰七日，死傷數萬，其在國民革命軍北伐戰爭史上之地位，蓋可與汀泗橋、武昌、南昌諸劇戰相等、或且過之。」

繼吳佩孚後，孫傳芳亦慘敗收場，剩下嘅張作霖奉軍更加無法抵擋北伐軍之強勢，大局既定，黨國天下，從此定調。不得不提，「龍潭之役」發生期間，蔣Sir下野退隱寧波-ing，如果由專打敗仗嘅蔣sir親自指揮，可能歷史將會完全改寫……

【常公子歷史頻道358回：替大軍閥平反系列之 我手寫我口】

⛎大年初七人日，人人生日，恭喜大家生日快樂，心想事成。

♉辛丑牛年到，時局欣欣向榮，香港股市升重上32個月以來嘅歷史高位，重上31000點，bitcoin更牛氣冲天一口氣衝破50000美元，全球疫情亦有明顯嘅下滑跡象，大家信心爆棚，似乎經過一年嘅努力，人類終於搵到應對病毒擴散嘅辦法及應變措施，當然中間已經付出極為慘痛嘅代價，世界經濟似乎要從谷底反彈，未必要等到2022年，照目前趨勢去睇，2021年下半年，世界好有機會回復正常狀態（除咗航空業及旅遊業外）。一向如是，春江水暖鴨先知，投資市場走勢一向早於真實世界實際情況，炒業績不如炒消息，連李嘉誠都出手投啟德地皮，就知道未來未必一如想像中悲觀。

♈講開股票，日本日經平均指數亦重上30000點，日本於上世紀90年代經濟泡沫爆破，前後經過差不多三十年，股市先重上上世紀90年代歷史高位，真係一個非常漫長嘅經濟調節週期，足足係一代人嘅光陰，日本人嘅起伏故事，啟發咗好多人對泡沫經濟嘅睇法同應變手段，現今世界經濟正處於一個史無前例嘅超巨大泡沫之中，日本嘅故事，足引以為戒。

♒金融市場指數上昇不止，原因祇有一個，就係全世界不停印銀紙，美國拜登政府新一輪會印17000億美元注入市場挽救美國經濟，但今次嘅「量化寬鬆」並唔會係最後一次，預計單係2021年就再有第二輪大型印銀紙行動，印出嚟嘅銀紙，首先會進入資本市場買貨投資保值避險，股市狂昇，bitcoin狂颷就係咁解，不單止係美國狂印，歐洲央行亦會狂印，所有無法支付開銷賬單嘅國家都係會印，亦預計到，好快就有第二個津巴布韋出現……上述故事，我叫American Horror Story，其實非常恐怖。

♑【常威近代史】第七部《最九衰的大軍閥時代》Round 2電子書上架（條download link在下面），請大家課金支持我一直走落去，直至劉少奇骨灰到達北京王光美手上…

✅https://youtu.be/D-oJWdwI-XI

【常威近代史】（五百回）
秋收暴動

不知不覺間，常威近代史寫到500回，我嘅心情同1927年嘅蔣Sir一樣，雖然形勢未係太好，但係對未來充滿希望同期盼。

1927年8月，經過一場「龍潭之役」，五省聯盟總司令笑面虎孫傳芳全面敗潰，整個南方，北洋軍閥勢力全面退場，剩低嘅反而係國民黨嘅內部鬥爭，籠裏雞作反，當然唔少得清理共產黨，寧漢分裂，汪精衛陣營同蔣介石陣營互相鬥爭，本來以左右區分，但最後兩者都容不下中共，真係有共同利益同時亦有共同矛盾。所以，以為打敗敵人就會天下大治？係錯嘅，舊矛盾消失嘅同時，新矛盾就會出現，上述所講嘅歷史趨勢，叫做「唯物辯證法」（dialectical materialism），或者叫「歷史唯物辯証法」。

剩低嘅北洋餘孽（如果真餘孽嘅話），仲有實力雄厚嘅張作霖奉系，當然冇咗吳佩孚同埋孫傳芳，單靠奉系（張學良）軍力，平定南方幾乎成為不可能任務，當然我亦唔覺得南方革命軍可以強渡黃河，劍指北方（北伐），一條黃河作為分界線區分中國為南北兩域，係歷史嘅基本格局，到今日都冇變過，唔明呢個格局存在，永遠冇可能睇得明王家衛嘅《一代宗師》。

喺南京附近龍潭大戰發生期間，咫尺之遙嘅上海依然故我，繼續跳舞Boom吒吒，8月27號第八屆遠東運動會喺上海開幕，到9月3日結束，中間龍潭之役正打個血肉橫飛，死幾萬人，屍堆荒野，慘不忍睹。遠東運動會上，中國獲得足球、排球、網球三項冠軍。單睇件事情，你就必須瞭解到當時上海呢個城市嘅獨特性同超越性，難怪奪得上海，就等於奪得天下。

8月30號龍潭之役結束前夕，日本政府發表撤軍聲明，並向北京外交部提出山東徹兵方案，不過今次撤兵，只係明治天皇同日本陸軍部嘅以退為進戰略，好戲陸續有來。

踏入9月份，9月1號，北京第一座無線廣播電臺落成，並開始播音，發射功率為20瓦，開辦有新聞、商情、音樂、戲曲、講座等節目，繼上海後，中國正式步入廣播時代，除咗有字睇，仲有聲聽，「有圖有真相」，當年並唔係潮流，總之有人講你就要信，寫出嚟嘅嘢就係真，所以千祈唔好用今日信息無比發達嘅眼界去睇過去歷史，其實任何人用現代人嘅眼光去看待歷史，通常都會產生錯誤同誤解。

正如一個故事，20世紀前嘅人棚牙根本冇可能會係白色，因為當時並未有牙膏氟化物出現，亦冇所謂牙醫去處理牙齒問題，以前嘅人應該大部分都有嚴重嘅牙齒問題，棚牙應該係全黑色嘅。仲有，日日沖涼，亦只係有咗自來水供應，同埋南方先會發生嘅事情，以前嘅人應該好少沖涼，加上無香體劑同止汗劑，所以應該好撚臭。

9月3號，清史館館長，曾任四川總督、湖廣總督、東三省總督趙爾巽（1844-1927）響北京病故，終年84歲，佢曾經負責編修《清史稿》，今日大家所睇嘅二十四史叫「正史」，由司馬遷《史記》開始，編到《明史》，但並未包括《清史》在內（所以有人叫二十四史，亦有人叫二十五史），叫《清史稿》，有個「稿」字，即未完成咁解，亦唔好問我點解？一切都係政治問題，係國民黨同共產黨嘅問題。

9月6號，孫中山遺孀宋慶齡到達莫斯科，同日南京政府軍事委員會下令北伐總攻擊令，講到明要繼續北伐，打上北京咁話，當然宣傳（籌款）口號嚟啫，真實情況並唔係咁樣，有咗大錢罌、遠東第一金融城市上海，其實相當足夠，無需要太多。

9月7號，中共喺海陸豐領導農民起義，領頭人係彭湃（1896-1929），佢將會喺海陸豐（常公子鄉下），建立中國第一個蘇維埃（共產主義社區），並且發行紙幣，實踐共產主義生活方式，當時畢業於日本早稻田大學嘅彭湃只係啱啱夠30歲。

差不多同一時間，9月9日，中國共產黨喺湘贛（湖南同江西）邊界起動農民，發動「秋收暴動」，一個月前，「南昌暴動」失敗收場，八七會議後，毛澤東以中共中央特派員身份前往長沙（即老家），18號，中共湖南省委成立前敵委員會同行動委員會，毛澤東、易禮容（1898-1997）分任書記，負責政治工作，易禮容中共早期領導人之一，字潤生，毛澤東則字潤之，中間都有個「潤」字，潤者，滋潤也，澤被也。

起義部隊被統編為工農革命軍第一軍第一師，盧德銘（1905-1927）為總指揮，余灑度（？-1934）為師長，下轄三個團共5000人。9月9號，第一團喺江西修水，第二團係安源，第三團係銅鼓起兵，不久受挫，於是毛澤東改變攻打長沙計畫，命令各團到瀏陽縣文家市集結。19號，前敵委員會決定保存實力，逃到國民黨力量薄弱嘅農村去。

9月29號，毛澤東率領部隊到達江西永新三灣村，根據去留自願原則（即係你走，你可以走，你願意留低，我亦都歡迎），將起義殘餘部隊縮編為一個團，稱作工農革命軍第一軍第一師第一團，編成兩個營、七個連、一個衛生隊共約七、八百人，即係話原本500人嘅起義兵，最後淨低800人左右，當然留得低嘅人，全部都係猛料子。

國民政府稱共產黨為「匪」，而當時嘅中國其實到處都係「土匪」，本來合作北伐嘅夥伴兄弟黨，就被降格為土匪，毛澤東領導秋收暴動期間，9月12號，後嚟嘅中共十大元帥之一賀龍（1896-1969）率領20軍攻佔上杭，閩西南大片土地為起義軍所佔領。

🔥【常威近代史】第七部《最九衰的大軍閥時代》Round 2電子書上架，請大家支持！
https://play.google.com/store/books/details?id=lPgaEAAAQBAJ

amazon同步上架👍
https://www.amazon.com/dp/B08WCLGP4Y

【常公子歷史頻道359回：替大軍閥平反系列之 厘金問題】

⛎今集內容講嘅厘金問題，亦即係收陀地嘅問題，收陀地係一個好複雜嘅問題，正如當年Micheal Bay 響香港鰂魚涌拍攝變形金剛，就有人以商戶名義向佢收陀地，理由就係拍攝變形金剛期間阻住鋪頭做生意，所以應該得到合理嘅小小賠償或茶錢，呢單嘢事後上過國際新聞，有人因此批評香港為落後地區。

♉但係宏觀去睇，收陀地又並非完全唔合理，所謂陀地，亦即係稅收（Tax），係一種對主權嘅體現，點解有人可以收陀地？就係因爲佢對某一個地方有其一定嘅主權或控制權，於是為咗維持該地嘅秩序同安寧，需要經費，而經費來源就係收陀地，亦即係政府（政權）向人民收稅嘅理由，點解每年要向人民徵稅？就係為咗維持整個政府嘅正常運行或維持軍力不被其他勢力侵略，令人民可以安心居樂業，或者令人民嘅生命同財產得到應有嘅基本保障。

♉當然政府（政權）祇有一個，一個地區如果出現兩個中央，要向同一班人雙重徵稅，則必定會發生戰爭。最簡單嘅例子，就係警方去拉晒收陀地嘅黑社會，既然市民已經俾咗稅款同差餉，即係有人保護其生命及財產，咁就無需再向其他勢力（其他自稱擁有主權嘅人）繳付額外保護費。

♉再宏觀去睇，一個國家需要「大一統」嘅理由亦在於「陀地問題」，因為主權愈分散，人民就要被更多嘅勢力徵收陀地（厘金問題），如果主權祇有一個 Supreme being，咁你只需向唯一「合法嘅」主權或政權繳稅，生命財產已經能夠充分得到保障，當然要維持主權祇有一個——依件事本身亦需要巨大成本，成本亦不侷限於金錢同物質上繳，有時候主權仲要向人民徵收精神或情緒上嘅無形稅款，最低限度要人民絕對服從，唔能夠喺思想或行動上想推翻主權、或勾結外國勢力作出對主權嘅任何實質或非實質威脅——大前提在於大一統對人民絕對有利（只收一份陀地），而分裂對人民則百利而無一害（可能要畀多份陀地）。

♑千祈唔好笑，收陀地係重大問題，同樣關稅亦都係重大問題，經濟本身就係政治，政治同經濟永遠分唔開。

♑【常威近代史】第七部《最九衰的大軍閥時代》Round 2電子書上架（條download link在下面），請大家課金支持我一直走落去，直至劉少奇骨灰到達北京王光美手上…

✅https://youtu.be/s2yx3Tzz4pQ

【常威近代史】（五百零一回）
政治鬥爭係沒完沒了

1927年9月16號，汪精衛宣佈下野，自認對共產黨防制過遲，聽候中央處分，武漢政府亦於當日停止辦公。你蔣Sir識玩下野依一招，汪精衛都學識鳥，大家都係以退為進，睇吓邊個冇咗邊個唔得囉？你估真係脫離權力核心咩？蔣Sir今次亦唔係第一次下野，之後佢仲會下野再下野，當下野食生菜，不過終其一生，始終牢牢掌握最高權力，你真係吹得佢脹咩？

9月16號，由寧（南京）、滬（上海）、漢（武漢）三方組成嘅國民黨中央特別委員會，喺南京正式成立。蔣Sir同汪精衛先後下野，掃清寧漢合作嘅最大障礙，9月5號，汪精衛從九江抵達南京，9號又前赴上海，聯絡喺上海嘅西山會議派人物（極右派），拉大家埋檯傾偈，9月11號，寧、滬、漢三方21名中央要員喺上海舉行談話會，經過劇烈爭吵，有冇開拖流血歷史冇記載，終於三方決定共同組成特別委員會，代行國民黨中央全部職權，以統一黨務，避免國民黨繼續分裂落去。

9月13號，汪精衛因不滿寧、滬、漢三方平分秋色，又受到寜、滬兩方打擊孤立，於是發脾四通電宣佈下野，顧孟餘（1888-1972）、陳公博（1892-1946）也隨其離開。結果特別委員會（西山會議派）得唔到汪精衛、蔣介石、胡漢民任何一位實力派人士支持，得個桔。

9月15號，寧、漢兩方同滬方分頭喺南京召開會議（各有各開），一致通過特別委員會嘅人選為：滬方林森（1968-1943）、鄒魯（1888-1954）；寧方李宗仁、李石曾（1881-1973）；漢方譚延闓（1880-1930）、孫科（1891-1973）等人，一共32兩友。16號，經過波折重重，中央委員會正式成立，著手改組國民政府及軍事委員會，于右任（1879-1964）、丁惟汾（1874-1954）等47人被推為國民政府委員，汪精衛、胡漢民、李烈鈞、蔡元培、譚延闓為常委，譚延闓任國民政府主席，于右任、方振武（1882-1941）等67人被推為軍事委員會委員，以白崇禧、何應欽等14人組成主席團，9月20日改組後嘅國民政府正式成立。

表面上唔同意見嘅人被拉埋一齊，寧漢分裂暫時結束，國民黨再次團給起來，但實際上，改組後嘅國民政府只係一個極端脆弱嘅政治聯盟，大家心病未除，派系鬥爭將會沒完沒了，尤其是以蔣Sir同汪精衛為首嘅兩個大派系，會一直鬥落去，直至鬥到汪精衛成為大漢奸永不超生遺臭萬年為止。

派系鬥爭，亦唔係中國人特有嘅問題，世間上萬事萬物，開始嘅時候，大家走埋一齊總係萬眾一心，團結非常，同心協力嚮前邁進，但蜜月期好快會過去，尤其是單生意做得起，利益大咗有水返，就自然出現利益分贓不勻嘅問題。人性有其弱點，每一個人都係認為自己係做最多嘢嘅付出係最多嘅，但點解你要分得多過我呢？咁除咗屌你老母臭化鴨之外又可以點呢？呢啲事情，會喺一間公司內發生，會響一隊band內發生、亦會喺一個家族內發生，會響一個政黨內發生，亦會響一個國家內發生，永遠沒完沒了，永遠唔會解決得乾淨……人生本來就係咁嘅一回事，你唔相信都冇辦法，當然你大撚把錢與世無爭不參與任何鬥爭係可以嘅，不過呢種人應該少之又少。年紀有返咁上下，出嚟碌過十零廿年，做過生意買賣嘅人，相信一定明白我講乜嘢？

9月21號，第二方面軍代總指揮黃琪翔（1898-1970）率軍進入廣州，次日發表「凱旋宣言」，擁護汪精衛，反帝國主義，反軍閥主義，反共產主義。

9月23號南京短波無線電臺落，可與廣州、洛陽、上海、廈門、菲律賓及東沙群島等地方直接通訊。同日石家莊二萬幾人舉行反毒示威活動，反對日本人喺當地販毒。

9月28號已經下野嘅蔣Sir離開上海，前赴日本。第二日，大軍閥山西王閻錫山（1883-1964）致電國民政府，誓師討奉，晉奉戰事開始。

風雨飄搖之際，中共中央亦由武漢遷往上海。七國咁亂，時間線正式踏入1927年10月……

10月4號，南京政府下令討奉，正式向張作霖宣戰，10月5號，南京政府外交部長伍朝樞（1887-1934，伍廷芳之子）照會日本公使芳澤謙吉（1874-1965），抗議日本對華滿蒙新政策。

10月6號前國民政府蘇聯軍事總顧問加倫將軍（瓦西里·康斯坦丁諾維奇·布留赫爾，1890-1938）離開上海，返回莫斯科。加倫將軍為蘇聯著名軍事將領，係蘇聯建國初期嘅五大元帥之一，曾任防禦日本侵略遠東方面軍司令。1923年被第三國際派到中國，任廣州軍政府軍事總顧問，參與黃埔軍校教學活動。因前任顧問在華溺水身亡。1924年10月開始，嘉倫將軍任廣州國民政府軍事顧問，參予東征及北伐。

蔣Sir唔鍾意蘇聯全權代表鮑羅廷，卻對加倫將軍惺惺相惜，即使後來清黨反共，蔣Sir回憶起加倫將軍，仍充滿感激之情，稱呼「加倫將軍是俄國將領中最為傑出而最合情理的一位良友」。加倫將軍回國後一年，1938年11月9日響史太林大清洗被暗中殺害，1956年先獲得克魯曉夫平反，恢復最高榮譽。

#常威💀 #蔣介石平反系列 #黃金十年 #民國歷史

就係天津《益世報》刊出一封蔣Sir寫比宋美齡情意綿綿嘅情書，於是蔣Sir同宋美齡嘅戀情曝光於世人眼前，咁Juicy嘅話題，當然第一時間風靡全國，蔣Sir係當時嘅軍政強人，宋美齡係孫文遺孀宋慶齡嘅細妹，宋家王朝蔣天下，連成一線仲得了嘅？

依一封，亦都係唯一一封被公諸於世嘅蔣Sir情書，剛剛宣佈下野嘅蔣Sir喺信裏邊咁樣寫：「如今無意政治活動，惟念生平傾慕之人，厥惟女士。」又話自己「萬念恢絕」、「所謂功業宛如夢幻」、「獨對女士才華容德，戀戀終不能忘」……相當肉麻，但並不有趣。

事實上由1922年起，本身有老婆仔女嘅蔣Sir已經被宋美齡所吸引，當然我哋並唔知道吸引蔣Sir嘅係宋美齡本人嘅美貌才德？抑或係宋美齡背後所代表嘅家族政治能量，總之蔣Sir五年來不斷追求宋美齡，而且愈嚟愈熱烈、愈嚟愈堅決，真係鐵柱可以磨成針，滴水可以穿石，好快宋美齡就變成蔣夫人，同蔣Sir一齊叱吒風雲，指點江山。

宋美齡嘅二姊宋慶齡係孫文遺孀，個地位高到超越銀河系（大姊宋靄齡老公係猛人孔祥熙，中國最富有嘅女人之一），蔣Sir背信棄義清共殺共產黨人，宋慶齡表達不滿，認為蔣Sir背棄孫文嘅革命大原則，自己仲飛到紅都莫斯科，完全水火不容兼勢不兩立，但係自己細妹成為蔣夫人，就真係剪不斷理亂，更重要嘅係，呢段（戀情）婚姻令到蔣Sir同孫文成為合法親戚，更加大大增強咗蔣Sir掌控國民政府最高權力嘅合理性（同合法性），響意識形態層面上，更加係一項有贏冇輸嘅巨大投資。

你汪精衛雖然係孫文根正苗紅嘅（合法）繼承人，但我蔣介石係孫文親戚，過終點前就係贏你老母一個鼻位；亦有可能成段蔣宋戀同汪精衛完全冇關係，可能只係我諗多咗啫。

當然大家亦咪以為宋美齡係普通人，沉魚落雁容德兼備同時亦都可以係一隻老虎，蔣夫人嘅事，大家可以喺歷史度尋找更多線索，權傾天下嘅蔣Sir大概生平有三個人唔敢得罪，第一個係孫文，第二個就係孫文老婆宋慶齡，而第三個就係自己老婆宋美齡了。

#常威💀 #蔣介石平反系列 #黃金十年 #民國歷史

常公子最新小說作品【Master】https://play.google.com/store/books/details?id=5FIfEAAAQBAJ

Kindle版下載連結
https://www.amazon.com/dp/B08X4DK2FP

🔥【常威近代史】第七部《最九衰的大軍閥時代》Round 2電子書上架，請大家支持！
https://play.google.com/store/books/details?id=lPgaEAAAQBAJ

amazon同步上架👍
https://www.amazon.com/dp/B08WCLGP4Y

【常威近代史】（五百零三回）
省籍問題籍貫問題非常重要

蔣Sir下野，遠離政治漩渦，但同宋美齡爆單驚世戀情（個人相信一定係佢背後操縱），成為中華民國人人茶餘飯後嘅八卦話題，人雖不在其位（當然係表面），但仍然影響力十足，保持曝光率，玩意識形態宣傳手段，蔣Sir係一級高手，其實每一個人都係凡人，但點解有啲人會升上神枱成為神祇（除咗關雲長）？其實好多時候都係靠文宣，文宣做得好，林過雲都可以變善長仁翁，意識形態操控依家嘢，喺20世紀20年代唔係好多人識玩，當然到咗今時今日，亦都有好多人仲未識玩。

大家有冇留意，啲明星有新聞嘅時候，多數係要開演唱會或出碟上片掠水時候，所謂醜聞所謂緋聞，好多時候都係一種宣傳手法，真正上曬岸養尊處優嘅大明星，其實好少新聞，你想見佢都見唔到啦屌！股票原理：一隻股票有人講好過冇人講，就算係衰嘢壞新聞，隻股票因為多人留意都係會有波幅嘅，有波幅嘅話，無論下炒向上炒都能夠獲利，呢個係基本遊戲規則。最大鑊嘅係，冇人識你冇人談論你，咁個IP做唔起，就永遠唔值錢。

1927年10月20號，寧漢醞釀和好後，即刻要搵隻替死鬼承擔之前打生打死嘅負任，南京國民政府正式下令討伐唐生智（1889-1970），免去其所有職務。佛系唐生智，法名法智，唐生嘅部隊一直喺武漢政權麾下一支戰鬥力最強嘅部隊，9月中，國民黨特別委員會成立，南京政權實際上係由桂系（即李宗仁白崇禧）把持，擁兵自重嘅唐生智對此心懷不滿，李宗仁白崇禧你係老幾呀？阿叔湖南人由辛亥革命打到北伐戰爭，戰績彪炳，而家俾你隻廣西生蕃踩響頭殼頂，真係屌你老母。

我要強調，省籍問題籍貫問題非常重要，省籍意識催生嘅山頭主義，響中國近代史上，有時候比意識形態更為秤先，架忌冷自己友圍威喂你估講笑，呢個世界嘅嘢從來都係親疏有別。各位亦千萬唔好認為呢啲係中國人獨有嘅問題，其實天下烏鴉一樣黑，世界上每一個地方都係一樣，相信鄉里親朋戚友自己人行先，有著數益自己人先，係人性嘅黑暗面亦都係光明面，一心開二門，有好有唔好。

於是唐生智、顧孟餘、陳公博等人，響9月21號成立武漢政治分會，公開與南京政府分庭抗儷，唐生智嘅東征軍，亦都進佔安慶、蕪湖、直逼南京。南京政府命令李宗仁、朱培德（1888-1937）等分別率軍西征討伐唐生智，並且取得北方馮玉祥同南方嘅李濟深支持，唐生智腹背受敵，加上汪精衛宣佈下野，寧漢分裂之局面改寫，引發唐生智部隊內部不穩軍心動搖，於是佢手東征軍，未同南京部隊激戰之前已經節節敗退自行瓦解。1927年11月7號，武漢門戶武穴失守，12號，唐生智通電下野，逃往日本暫避風頭，當然佢嘅故事未完結，好快佢就會投入返蔣Sir懷抱，同佢打江山，將仕任命，一個好打嘅將軍，永遠有立足之地。

10月23號，由奉系張作霖把持嘅北京中華民國中央政府大規模搜捕宣傳革命嘅學生，仲槍殺10個工人同學生；同日，去咗日本遊埠嘅蔣Sir喺東京發表《告日本國民書》呼籲中日親善友好；同日，中共中央發表《反對軍閥戰爭宣言》，號召全國民眾以革命戰爭反對一切軍閥戰爭，為建立統一的蘇維埃新中國而鬥爭，依個「新中國」，終於響宣言發表22年後1949年成立，所以凡事唔可以急，珠穆朗瑪峰並非一朝可以到達。

10月25號，南京政府頒佈中央銀行條例，既然大局既定，就要開始自已印銀紙，收割韭菜，肥水不流別人田。同日國民政府亦通令各省政府以後一律採用陽曆，農曆正式宣佈收皮。

10月27日，毛澤東率領秋收起義嘅幾百個義軍，抵達江西井岡山茨坪，開始建立井岡山革命根據地，一場可歌可泣嘅共產主義建國故事亦由此展開，今日井岡山係革命聖地，一切由此而起。

10月30號，中共向廣東省海陸豐發動第三次武裝起義，4月15號李濟深喺廣州實行清黨後，中共海陸豐地委決定成立東江特委（特別委員會），由彭湃籌備領導起義動作。5月1號，海豐、陸豐兩個縣同時爆發起義，義軍奪取咗兩縣政權，成立咗臨時人民政府，但好快失敗。9月7號，東江特委為接應南昌起義軍，再次舉行暴動，佔領海陸豐兩縣城，不久響國民黨軍攻擊下，轉入山區活動。

10月上旬，南昌起義軍其中一個部隊進入海陸豐，整編為工農革命軍第二師，本日，東江特委乘粵桂戰爭即將爆發之際，領導第三次武裝起義，再一次佔領海豐、陸豐兩縣全境。百折不撓，終於革命成功，11月13號同18號，海陸豐分別召開工農兵代表大會，成立工農民主政府，並頒佈沒收地主土地，取消苛捐雜稅，改良人民生活等施政綱領。

我常公子係海豐人，海豐對上就係潮州汕頭，潮州係廣東省一個富裕區域，兩三小時車程距離嘅汕民海陸豐，就一向窮到仆街，係窮人聚居嘅地方，可能因為人窮，所以海陸豐人特別彪悍，香港頭號通緝犯葉繼歡（1961-2017）就係海豐人。海陸豐沿海食海，水性特佳，所以海陸豐人無腥不歡，而且投奔怒海，攞住條車呔夠體力就可以直接遊嚟香港上岸，所以上世紀好多海陸豐人都係游水過嚟，公子老竇就係其中一個偷渡客。

#常威💀 #蔣介石平反系列 #黃金十年 #民國歷史

🔥【常威近代史】第七部《最九衰的大軍閥時代》Round 2電子書上架，請大家支持！
https://play.google.com/store/books/details?id=lPgaEAAAQBAJ

amazon同步上架👍
https://www.amazon.com/dp/B08WCLGP4Y

【常威近代史】（五百零四回）
誰人打開了潘朵拉盒子？

1927年10月，毛澤東領導嘅幾百個農民義軍響江西省井岡山建立根據地，雖然勢孤力弱，但總算暫時穩住陣腳，響中國近代史上呢個係重要嘅一頁。自蔣Sir大力清黨後，中共不得不進入地下活動，不斷在城市外圍嘅農村發動農民起義（或叫暴動），但並唔成功，不過由城市進入農村打遊擊戰略，亦替苟延殘喘嘅中國共產黨續命成功，一點香火不滅，他日再次燎原。

係毛主席教我哋，有燈便有人，念念不忘，必有迴響。

其實經過蔣Sir血腥清黨，中共黨員由最高峰嘅接近58000名，去到只剩下10000人左右，損失無比巨大，其時中共領導層內，一共有兩條路線，第一條係以瞿秋白、李立三為首嘅共產黨領袖，佢哋嘅選擇係繼續依靠蘇俄嘅津貼，喺城市裡面發動工人運動，可以講係完全符合馬克思主義嘅基本革命行動綱領；另一條路線，即係毛澤東嘅「農民路線」，中國嘅產業工人大多數集中喺國民黨佔據優勢地位嘅沿海城市，而且中國工業生產根本未入流，所以工人嘅數目亦都非常有限，與之相比，中國農民嘅數目何止千百萬倍？而且農民知識水平偏低，響意識形態嘅傳播或操縱上，絕對有優勢。

馬列主義教條唔能夠拯救中共命懸一線嘅處境，反而用毛澤東講法，《水滸傳》、《三國演義》章回小說中佔山為王、落草為寇先係救命靈丹，當然好快毛澤東亦要為佢嘅非正統「農民路線」付出政治代價，祇不過，凡事我哋只睇結果，結果話畀我哋知，毛澤東嘅選擇係無比正確。

當時毛澤東提出嘅策略係：戰略重心由城市轉移到農村，努力同中國數量最多嘅廣大農民建立親厚關係，藉此結盟建立一支能夠奪取同維持行政區域嘅紅軍，讓農民擁有歷史上缺乏嘅反對地主嘅集體力量，亦由此農民成為紅軍源源不斷嘅兵源同埋財源。毛澤東並冇錯，中國農民飽受地主壓迫同剝削，已經有上千年歷史，佢哋從來唔能夠反抗亦唔識反抗，因為冇人組織佢哋反抗教佢哋反抗，而中共作為組織者，利用意識形態適當地運用咗普羅農民對地主嘅千年怨氣同憤怒，終於為重新壯大起嚟找到出路。

多次講過，毛澤東深深瞭解到「槍桿子出政權」嘅重要性，佢指出「發動起義，單靠農民的力量是不行的，必須有軍事的幫助，有一兩個團的兵力，這樣起義就可起來」、「要奪取政權，就一定要有兵力 ，沒有兵力的支持就去奪取，這是自欺的話。我們黨從前的錯誤，就是忽略了軍事，現在應以百分之六十的精力注意軍事運動」。1927年前，中共領導層以文人為主導，無論係李大釗、陳獨秀、甚至當時嘅最高領導人瞿秋白，全部都係高級知識份子（大學教授），馬克思主義背誦如流。但如果讀書人單用知識玩文宣玩意識形態就可以改變世界，咁亦唔需要發明火藥同機關槍了？2014年嘅佔領中環運動亦復如是。當年毛澤東「農民路線」所扭轉嘅，除咗係中共嘅命運，仲有整個中共嘅固有生態。

簡單啲講，亦由1927年開始，中共由一個「文人政黨」變成了一個「軍人政黨」，亦由於「槍桿子出政權」咁重要，要控制軍隊，必須要牢牢掌握最高權力，於是追求（最高）權力、鞏固（最高）權力、運用（最高）權力，成為咗毛澤東往後生命嘅主軸同基礎信仰。冇咗權力，等於冇咗影響力，柄埋揸筆寫文章做鍵盤戰士想改變世界？中共有史以來最叻嗰個叫陳伯達（毛澤東文膽，1904-1989）同姚文元（四人幫文膽，1931-2005），成績有目共睹。明白槍幹子比筆桿子重要呢個道理，你亦會明白毛澤東日後點解要發動文化大革命？

咁阿常公子你咪自打嘴巴？你成日話意識形態同文宣好重要？但而家又話軍權武力先最重要？咁即係點呢？要我答你，如果用中共嘅歷史去睇，建黨初期意識形態文宣工作應該係最重要，如果有冇信仰基礎（或叫意識形態基礎）根本亦聚唔到人，但係要發大嚟搞，就要著眼軍事力量，否則冇槍冇炮響手，如何推翻現存政權或繼續生存呢？

答案應該係，一個政黨（或一股政治力量）建立初期，必需要牢牢建立及做好意識形態工作，所以文宣非常重要；到力量大致成形，就必須發展軍事力量，以彌補意識形態工作不足之處。上文已經講過，毛澤東都話要用60%嘅精力著眼軍事，只稍稍高於50%，佢從來都唔會放棄意識形態工作，因為佢本身天生下來就係個意識形態大莊家。更何況，要壯大軍事力量，兩者亦不可以明確區分，mean啲去講，要絕對控制軍隊同武裝力量，意識形態比金錢資源有效得多，畢竟玩意識形態未必需要用太多錢，依招叫除笨有精。

蔣Sir打北伐戰爭，贏咗個「主義」同「口實」，即係意識形態工作比北洋軍閥一方做得更好；國共內戰，實力稍次嘅共產黨打贏財雄勢大嘅蔣氏國民黨，就係意識形態工作比國民黨做得更好。

如果你覺得後來嘅中共演變成為一個邪惡政權，毛澤東又進化成一個大魔頭，共產黨又壞事做盡又無惡不作又依樣又嗰樣（當然我唔係咁諗），咁你要相信凡事有因有果，要怪就怪1927年有一個人突然反檯，背信棄義、血腥清黨，打開了潘朵拉盒子，嗰個人叫蔣介石。

#常威💀 #蔣介石平反系列 #黃金十年 #民國歷史

常公子最新小說作品【Master】https://play.google.com/store/books/details?id=5FIfEAAAQBAJ

Kindle版下載連結
https://www.amazon.com/dp/B08X4DK2FP

【常威近代史】（五百零五回）
平民蔣介石見日本總理內閣大臣

1927年10月，仲有幾件大事要發生，唔係政治事件而係民生事件，首先天津新萬國橋（即現今解放橋）落成。20年代期間，由於北京政局動盪不安，華北經濟重心部份轉移到天津，英國、法國租界畸形地繁榮，銀行、工廠、商店、電影院、貨倉、民房等建築物接連出現，天津嘅商業中心從舊城區逐漸向英法租界轉移。新萬國橋嘅落成解決咗因為城市發展而帶來嘅交通擁擠堵塞同橋下輪船通過嘅問題。從此以後唔少大工廠企業響市郊興建，擴大咗天津市區嘅範圍。

另外上海公共租界內亦首次通行公共汽車，亦都係中國首次有公共汽車行駛江湖，可以話係中國交通史上嘅重要里程碑。1933年六年後，香港九龍巴士公司先成立，就係今日你同我搭緊臭崩崩嘅九巴。

亦係同一個月，加拿大古人類學家步達生（Davidson Black，1884-1934）喺周口店發現咗一枚人類嘅臼齒，Davidson Black於1884年生於加拿大安大略省多倫多，1906年於多倫多大學獲得醫藥科學學士學位，1919年北京協和醫學院執教。1927年，佢響北京周口店出土嘅「北京人」取學名「Homo erectus pekinensis」。當時嘅中國人，未識呢啲嘢。

時間進入11月，蔣Sir下野媾女？你真係信？11月2號，南京國民政府外交部發表宣言，並照會各國駐華公使，重新廢除不平等條約嘅方針，新政權上臺，新政府成立，咁之前政權簽落或承認嘅「不平等條約」或者「債項」，新政權究竟駛唔駛繼續履行同埋承擔責任呢？呢個係有理都說不清嘅問題，1911年辛亥革命之後，滿清帝國所簽訂嘅不平等條約，例如馬關條約庚子賠款等等，歷屆（北洋）北京中央政府都有繼續履行（及還錢，所以政府咪咁窮囉），但政權多次易手，七國咁亂，要計真係冇得計。

順帶一提，衆多「不平等條約」中，就以割讓香港島及租借九龍及新界比大英帝國最為指標性，1949年中華人民共和國成立之後，其實中國係不承認一切帝國主義遺留下嚟嘅「不平等條約」，包括1842年南京條約及1899年北京條約，所以傾九七回歸，係俾面你伊莉莎白二世，叫做尊重「既定事實」不多生枝節，因此先有1984年《中英聯合聲明》（Sino-British Joint Declaration），《中華人民共和國政府和大不列顛及北愛爾蘭聯合王國政府關於香港問題的聯合聲明》（英語：Joint Declaration of the Government of the United Kingdom of Great Britain and Northern Ireland and the Government of the People's Republic of China on the Question of Hong Kong）。乜嘢叫聯合聲明？就即係彼此立場不同，各自表述，中國認為不平等條約不存在並且無效，而英國則認為條約存在且有效，所以各自以自己嘅立場出發描述既定事實，難聽啲講句，叫「無媒旬合」，於是引申出嚟嘅問題，嚟到今時今日仲未解決（例如BNO等）。

同日11月2號，南京國民政府亦都公佈《禁煙條例》，事實上中國人吸食鴉片嘅習慣，從來未停止過，祇不過一切轉入地下活動，變成龐大嘅地下經濟活動，食鴉片絕跡，又真係要去到1949年新中國成立先得。

11月5號，蔣Sir喺東京會晤首相田中義一（1864-1929），為反共並且建立統一政權請求日本支持，田中亦要求蔣Sir停止北伐，並且答應對國民政府提供經濟援助。依位傳説死於馬上風嘅日本首相田中義一最響朵嘅，就係一份《田中奏摺》，是指台灣人蔡智堪聲稱發現並秘密抄錄了「東方會議」紀要文件，即是田中義一向昭和天皇獻呈為數約40000字的秘密奏摺。其內容與之後日本實際實施嘅侵華方略相似度極高，以至於大戰中相當多人認為該奏摺係堅嘅。然而該奏摺在多年後，被很多包括中國、日本以及歐美的學者認為係流嘅。

蔣Sir當時已經下野，但係佢以一個中華民國平民身份，響日本可以同日本內閣總理大臣直接見面，你就知道佢仍然大權在握，完全唔可以講笑。

11月6號，山西王閻錫山無力獨自阻擋奉系嘅軍事壓迫，下令三路總撤退令，11月8號，華洋義賑會宣佈調查山東旱蝗兵災結果：災區56縣、災民達到2100萬，受災面積同受災人口均佔全省半數以上，山東省的確多災多難，山東號稱人傑地靈，係萬世師表孔子嘅故鄉，現代中國共産黨最高領導層中央委員會內，山東省籍亦係多數派。

11月9號，因為時局動盪，直隸省鈔價大眨值跌至六折，當局需要用行政措施控制匯價。

同日，中共中央臨時政治局由瞿秋白主持，喺上海召開擴大會議，會上因為南昌起義同秋收起義嘅失利，其領導者喺會議上受到黨規懲罰，毛澤東、中共湖南省委書記彭公達（1903-1928）被撤銷中央臨時政治局候補委員職務，老黨員譚平山被開除黨籍，南昌暴動前敵委員會全體成員受到警告處分。

會議同時指出中共現時嘅主要任務，係建立蘇维埃政權，「無代價地沒收一切地主的土地」、組織工農革命軍，創建根據地。會議接受咗第三國際代表「不斷革命論」嘅觀點，認為同時還應該推翻資產階級，沒收民族資產階級嘅企業，會議認為全國正處於「直接革命」嘅形勢，中共應該致力組織同埋發動城市中嘅武裝暴動。

#常威💀 #蔣介石平反系列 #黃金十年 #民國歷史