大清亡國關慈禧蛋牛治 2

6月4號，張作霖再印銀紙填補戰爭黑洞，奉票增發5000萬元，市價狂跌，僅值面額嘅兩成，自從奉系財神王永江（字鐵龕，1872-1927）拂袖而去，早已經睇到奉系財政瀕臨崩盤狀態，你估打仗真係唔使錢咩？本來好好地一個富裕嘅東北，就被好大喜功嘅張作霖監生玩謝。不禁又要再提多次，如果張作霖醒目少少，唔好搞咁多事繼續食花生，唔好玩涿鹿中原嗰套帝皇神話，唔去發展軍備打仗，主力發展（有石油儲存嘅）黑山白水東北經濟，同日本財團拍住上圍威喂，我非常相信，天下本來就是張學友的，中日戰爭亦唔需要打。

6月4號，中共最高領導人陳獨秀就「中山艦事件」寫咗封信俾蔣Sir，信中反駁事件係共產黨倒蔣陰謀嘅說法，回擊國民黨右派份子對共產黨嘅指責，重申共產黨喺國共合作問題上嘅原則立場同態度。陳獨秀亦指出，中共若然陰謀倒蔣，就應該被打倒；共產黨員若然陰謀倒蔣，就應該受到懲罰。

但響中共內部，對總書記陳獨秀嘅讓步同容忍態度，好多人都表示不滿，而且明眼人都睇得出，「中山艦」事件根本係蔣Sir無中生有，為打擊共產黨自編自導嘅一場大戲。陳獨秀連番失誤，態度曖昧且錯判形勢，亦為自己下臺埋下伏線。

6月5號，國民政府為進行北伐戰爭，特別任命蔣Sir為國民革命軍總司令。蔣Sir被任命為國民革命軍第一軍軍長後，力邀張靜江（1877-1950）南下協助佢發展勢力，張靜江到達廣州後，為蔣Sir周旋於國民黨內各派之間，促成蔣Sir順利出任國民革命軍總司令，按規定，海陸空軍均受總司令統轄，軍民財政各部門機關亦都受總司令指揮，權力大到無可再大，蔣Sir搖身一變，成為政治巨人。孫文死後，還未到一年零三個月，蔣Sir已經掃除一切障礙同競爭對手，順利承繼孫文嘅一切，水到渠成，真係堅抽。

6月8號，北伐軍先遣部隊葉挺獨立團攻克湖南攸縣，打響北伐戰爭第一槍……

你要打，中原各路軍閥亦都未X驚過，打仗當食生菜，6月14號，民國關公直系吳佩孚對北方國民軍下總攻擊令，6月18號，吳佩孚派出軍隊到達湖南，抵禦廣州北伐軍來襲，戰火一觸即發。

6月19號，國民黨致信中共中央，建議成立兩黨聯席會議，萬事好商量，中共派出瞿秋白、張國燾、譚平山代表談判，國民黨同共產黨兩黨決裂，其實只係時間問題，姑且拖住先。

6月22號，暫時由直系張作霖控制嘅中華民國北京政府內閣改組，海軍總長杜錫珪兼（1875-1933）代國務院總理。

#常威💀 #大軍閥平反系列 #大軍閥 #民國歷史

💙最新上線，請課金支持

【常威近代史】第六部《最九衰的大軍閥時代》Round 1

https://play.google.com/store/books/details?id=bCMNEAAAQBAJ

【常威近代史】第六部《最九衰的大軍閥時代》Round 1
amazon同步上架👍請大家大力支持💪💪💪

https://www.amazon.com/dp/B08PVMT6P5

【常公子歷史頻道338回：替大軍閥平反系列之 結束一切戰爭之戰爭】

⛎全城封閉，都冇乜嘢好做，之前嘅生活方式徹底改變，但屋租繼續要交，稅亦繼續要交，有啲嘢徹底改變咗，但有啲嘢卻永恆不變？香港唔算慘，全世界好多地方同香港都一樣，比香港更差嘅地方仲有更多，我冇辦法想像係疫情下，貧窮同發展中國家係點樣渡過？希望疫情儘快結束，否則後遺症將會好大，延綿到往後十年都未定。

♏時間多了，應該多讀一點書，但現實同夢想往往相差好遠，唔知點解最近唔係好想睇書，買返嚟同借返嚟嘅書已經堆積如山，想讀嘅書好多，但真正能夠讀上手嘅就好少，或者係心理問題？又或者有一啲不能名狀嘅事情已經響我生命中發生，我會想辦法調節，同整個社會氛圍亦都有關，我最近連有線新聞都唔想睇，有小小眼冤，又想cut咗有線佢，我知道好難，但係會努力嘗試。

♎今日寫小一點，真的沒有什麼想説，見諒。

♑【常威近代史】第六部《最九衰的大軍閥時代Round 1》電子書上架（條download link在下面），請大家課金支持我一直走落去，直至劉少奇骨灰到達北京王光美手上…

✅https://youtu.be/ECSDpKVAMGI

💙最新上線，請課金支持
【常威近代史】第六部《最九衰的大軍閥時代》Round 1
https://play.google.com/store/books/details?id=bCMNEAAAQBAJ

7月9號，蔣Sir有你冇你，就任國民革命軍總司令，並舉行北伐誓師典禮，名義上由依一日開始，蔣氏北伐戰爭正式開打！誓師典禮響廣州東較場舉行，國共兩黨黨政軍要員及各界民眾50000餘人參加大會，聲勢浩大，由國民政府代主席譚延闓（1880-1930）授印，中央黨部代表吳稚暉（1865-1953）授旗，蔣Sir宣誓就職總司令後，隨即舉行閱兵儀式。

北伐軍兵分三路，西路軍為主力，擔任正面作戰，兵力大約50000人，擁有蘇聯軍官及蘇製裝備，主力進攻兩湖，目標直指吳佩孚心臟地帶武漢；中路軍保障西路主力大軍側翼安全，負責進攻江西孫傳芳部隊；東路軍向敵兵空虛嘅浙江福建兩省進軍；留低第五軍駐守廣州根據地。

臨兵鬥者，皆陣列在前，GO！響歷史上，北伐係一場民族革命，亦都係孫文生前嘅夢想（革命尚未成功，同志仍需努力），打倒北方北洋非法中央政府，重建本源護法國民政府；當然你亦可以認為北伐戰爭，只係大軍閥蔣介石發動內戰奪權，場仗有冇合理性？要睇吓你係乜嘢政治立場？同埋觀點與角度？每個人觀看同一事物，可以產生不同意義，畢竟人類嘅想像空間無限，所謂合唔合理？亦都冇一定標準。

7月11號，第一個好消息傳來，北伐西路軍李品仙（1890-1987）部隊攻剋湖南省省會長沙市！6月底，第四、第七軍陸續到達湖南前線，與佛系唐生智（1889-1970）嘅第八軍組成西路軍，以唐生智為前敵總指揮，正面進攻兩湖戰場，7月頭，長沙戰役開打，北伐軍分左、中、右三路，對漣水、淥水敵人防線實施總進攻，7月10號，李品仙部隊進占湘潭，陳銘樞（1889-1965）部隊同張發圭（1896-1980）部隊佔領醴陵，11號，李品仙部隊攻入長沙市，敵軍葉開鑫（1885-1937）部隊逃往汨羅江北岸，北伐第一期作戰計畫，基本完成。

可能由短時間長沙失陷開始，吳佩孚先至啱啱知道，原來最大嘅敵人並唔係北方國民軍，而係南方嘅蔣Sir（同佢嘅蘇式裝備）！

7月13號，國民黨大員廖仲愷被刺案喺廣州判決，兇手梁博（涼薄）被判處死刑，close file！7月16號，吳佩孚大本營洛陽全城被大水淹沒，浸死幾千人；另外提提大家，省港澳大罷工仍然繼續發生中，左派工人運動從來未停過，成個中國真係立立亂！

今個月，為咗紀念孫文，廣東大學亦正式改名為中山大學，1924年9月，響孫文嘅指示下，廣東各高等院校合併為廣東大學，廣東大學初期設文、理、法、農、醫各科，建校初期，孫文每週都會到廣東大學演講，勉勵同學「讀書不忘革命，革命不忘讀書」，並親筆寫下「博學之、審問之、慎思之、明辯之、篤行之」之校訓。

其實讀書還讀書，革命還革命，係應該分開嘅，撈埋一齊嚟講，好容易出事……

#常威💀 #大軍閥平反系列 #大軍閥 #民國歷史

💙最新上線，請課金支持

【常威近代史】第六部《最九衰的大軍閥時代》Round 1

https://play.google.com/store/books/details?id=bCMNEAAAQBAJ

✅本土唯一香港土話近代史文本

❤【常威近代史】第一部《大清亡國關慈禧蛋牛治》，全面開放，免費下載， #freedownload！

Free下載連結🔽

https://play.google.com/store/books/details?id=C3hjDwAAQBAJ

【常公子歷史頻道339回：替大軍閥平反系列之 西班牙流感】

⛎今集會講述發生係1918年嘅全球大瘟疫，即係西班牙流感H1N1，相隔一個世紀，另一場大瘟疫Covid-19肆虐全世界，兩者唔同嘅地方係，發生喺今天嘅新型冠狀病毒，因為人類嘅醫療科技比起一個世紀之前突飛猛進，所以死亡人數比起西班牙流感少好多好多，不過兩者帶嚟嘅震盪，無疑亦都係相當巨大，簡直可以講係改變咗整個世界嘅歷史走向。

♐西班牙流感據不完全估計，全球死亡人數接近一億人，當時全世界人口大約係18-19億，即係話全球人口差唔多死咗5%，如無意外，西班牙流感疫都係人類歷史上一場殺傷力最大同死人最多嘅大瘟疫，亦都直接導致第一次世界大戰結束，改變整個歐洲秩序，但係所謂統計數字都只係集中係當時嘅先進國家，即係當時歐洲諸國，其他落後國家或發展中國家，例如當時嘅中華民國印度非洲拉丁美洲，根本亦冇正式正確嘅統計數字提供。

♉西班牙流感致命率高，係由於病發嘅時間相當快，由感染開始，可以由一夜之間變成重症，第二朝瞓醒就去見耶穌基督或佛祖，相當得人驚；而且由佢感染嘅廣泛區域估計，流感應該係經由鳥類傳播，否則冇可能跨越五大洋七大洲全球散播，當時嘅人類面對這場世紀瘟疫，亦都束手無策，當時冇全球化合作抗疫嘅基礎，亦冇所謂疫苗誕生，經過一年多嘅肆虐，不斷死人，西班牙流感始消失於無形，大概係群體免疫（herd immunity）效果。

♐相反今日困擾全球嘅新型冠狀病毒，雖然致命率低，但係經過一年時間，佢嘅傳染力反而有加強的跡象，你睇香港第四波疫情就知道，雖然冇人愿意講出口，但係明眼人都知係空氣傳播，即係帶實個口罩洗乾淨雙手都未必有用，基本上係睇你好唔好彩，有冇遇上佢。而且病毒喺度不斷變種，未來疫苗能否有效控制？或者可唔可以跟絕疫情，其實有待觀察。

♉到目前為止，全球感染人數接近7000萬，160萬人死亡（死亡率2%），過去一年，全球經濟損失估計達到94,000億美元，2020年全球經濟收縮約5.2%（應該有好大水分，我估算保20%左右），亦係二次世界大戰以來最大嘅經濟衰退，最近更加有人話，要全面回復到病毒發生之前嘅經濟狀況，最不樂觀嘅估計，可能要用上十年時間（人生真係有幾多個十年？）。不過咁長遠嘅事，無謂去推測。最大鑊嘅係，成個2021年睇，嚟仲要戴住口罩過活……

♑【常威近代史】第六部《最九衰的大軍閥時代Round 1》電子書上架（條download link在下面），請大家課金支持我一直走落去，直至劉少奇骨灰到達北京王光美手上…

✅https://youtu.be/wD_K10zNkP0

💙最新上線，請課金支持
【常威近代史】第六部《最九衰的大軍閥時代》Round 1
https://play.google.com/store/books/details?id=bCMNEAAAQBAJ

【常威近代史】（四百七十二回）
以「主義」對抗「主義」

北伐軍李品仙攻克長沙，7月30號，湖南省政府成立唐生智為主席。中華全國總工會發表《對國民政府出師宣言》，號召工人階級支持北伐大軍，形勢一片大好，終於促成1911年辛亥革命之後，南方對北方最大嘅一次軍事反撲。

我多次重申，南北問題係中國近代史嘅重要徵結，南拳北腿，唔單止係武林問題，仲係歷史問題，到今日仍然存在；中國人好奇怪嗎？其實一啲都唔奇怪，美國都有南北問題，由南北戰爭伸延到今時今日，韓國有南北問題、意大利都有南北問題、普羅大眾的確係金魚記憶動物，但係有啲嘢人類好難忘記，叫「仇恨」。每每受人恩惠會輕易忘記，但係俾人過咗棟，好多時候會記一生一世。人類有啲劣根性，好難根治。

1926年8月1號，喺日本長崎舉行咗一個叫做「亞細亞民族大會」，通過咗組織亞細亞國際聯盟方案，亦即係亞洲聯合國框架，亦即係大東亞共榮圈基建，中國代表（北方政權）響會上要求取消不平等條約，日本當然唔應承你，仲駛問？

打仗係需要錢嘅，8月2號南方國民政府為籌集北伐軍費，發行第二次有獎公債1000萬元，至於獎金獎品係乜嘢？我check唔X到。總之捐錢畀蔣Sir北伐，就有jet so！同日北京政府通電通緝鮑羅廷，罪名係呢位蘇聯「第三國際」朋友「煽惑」中國民眾造反，反對中央政府。今日嘅香港，大家對「煽惑」依兩個字應該唔陌生，社會動盪戰爭期間，就要提高民眾對政權的忠誠度，否則一失足成千古恨。有人唔明白2020年香港發生乜嘢事？冰封三尺非一日之寒，2020年要解決嘅就係2019年下半年發生嘅事，本來無一物，何處惹塵埃？係你作反在先，亦唔好怪我秋後算賬，邏輯思路就係咁樣。

8月4號，中共發佈《堅決清洗貪汙腐化分子》嘅通告，亦係中共首個反對貪汙嘅文件，文件內指出：喺革命高潮時期，投機分子、反動政客都跑到了革命的隊伍中來，造成黨員質量退化嘅情況，發生侵吞公款、化公為私等貪污行為，所以要將這些不良份子毫不容情地處理。講真，貪汙行為永遠冇辦法處理清淨，其實世界上亦都無一個冇貪汙嘅地方，你以為有只係你睇唔到，或者俾人誤導係冇，其實一直有——香港曾經勝在有ICAC，當然今日亦有。

8月6號，北京《社會日報》主筆林白水（1874-1926），以「宣傳赤化」嘅罪名比奉系軍閥、裝甲列車之父張宗昌（1881-1932）下令打靶。為咗阻止「三民主義」向北方氾濫，張宗昌提出「讀吾孔子之書，講禮義廉恥之四維主義」，以「主義」對抗「主義」，得到北洋政府嘅捧場，崇尚古風嘅林白水恥於與其為伍，孔孟比你啲軍閥講臭曬，於是發表評論，將北洋政府末屆總理潘復（1883-1936）同張宗昌嘅關係比喻成「腎囊之於睪丸」，張宗祥為此惱羞成怒，將林白水打成赤化分子，拉去打靶！林白水係當時著名嘅公共知識份子，奉系殺一個林白水，等於製造多1000個林白水。

8月19號，張作霖槍殺錢商，張作霖為擴充武力，濫發奉票，令到奉票價值大幅眨值，加上不法錢商糧商從中投機，奉票已經貶值到等於廢紙。今個月奉天省政府發出命令，警告在南滿鐵路附近做奉票投機嘅商人，但係由於該區為日本控制，班投機者睬你都生臭狐。8月19號張作霖派部下誘請錢商多人到大西城門一間酒樓赴宴，商人不防有詐，被引入陷阱、落閘放狗，當場槍決馬浚川等五個錢商。

殺人唔代表可以令奉票行情回升，之後奉天日本領便以金融混亂、日僑受害為由，向奉天當局發出警告。張作霖亂印銀紙，印到連背後金主日本帝國都表示不滿，真係大腸有屎，失敗！

今個月仲有一件大事發生，就係清末、民國名人，集文化人、政治家、實業家於一身嘅張謇（1853-1926）喺南通病逝。張謇出身農家子弟，自幼好學不倦，16歲中秀才，1894年高中狀元，授翰林院修撰，甲午戰爭後有感於中國嘅失敗，張謇棄官返鄉，創辦實業以期救國；1906年，任「預備立憲公會」副會長，成為立憲派重要領袖；1909年，任江蘇咨議局議長；1912年任南京臨時政府實業總長；1913年任熊希齡內閣工商、農林總長；1914年任農商局長；1915年因不滿袁世凱復辟，辭官返鄉，續辦實業及教育。

張謇一生致力發展實業，先後創辦紡織、鹽墾、榨油、麵粉、冶煉、輪船等10餘間公司，同時資助教育，興辦通洲師範、女子師範、南通學院、圖書館、體育場所及各項公共文化設施，貢獻良多，為一代典範人物。

八月，北伐軍亦喺湖南湖北戰場勢如破竹，直逼武昌。8月12號蔣介石喺蘇聯軍事顧問陪同下抵達長沙，兵分三路，中央軍由唐生智兼任總指揮，以武漢至武勝關為目標，左路軍以黔軍袁祖銘（1889-1927）為總指揮，進攻荊州，掩護中央軍左翼；右路軍以朱培德（1888-1937）為總指揮，監視江西，掩護中央軍右翼；8月19號，北伐軍全線總進攻，突破汨羅江防線，佔領平江城；22號第八軍攻克岳陽，第四軍突入湖北境內，至此控制湖南省全境。

下次繼續北伐——just begun！

#常威💀 #大軍閥平反系列 #大軍閥 #民國歷史

https://www.youtube.com/playlist?list=PL0RVUAILQUOvTo8JJrayjrvd_Nbjc-0Me

❤請加入常公子的近代史世界！

#ChineseHistory #HongKong #China #History

【常威近代史】（四百七十三回）
人民唔著舊鞋著新鞋

蔣介石北伐軍嘅最大敵人除咗直系吳佩孚，仲有盤踞上海一帶嘅直系笑面虎五省聯軍總司令孫傳芳，張作霖大本營係東北，我諗當時蔣介石亦冇諗過會同實力最強、兼有日本人做靠山嘅奉系張作霖正面發生軍事衝突，所謂鞭長莫及。

蔣介石嘅比伐軍隊經過蘇俄喺政治上同軍事上嘅悉心訓練，加上源源不絕先進武器嘅大量補給，實力已經大大超越咗過住其他北洋軍閥嘅武裝水平，而且心理質素亦都秤先，用蔣介石自己嘅說話講：「國民黨軍隊具備了高度的作戰能力，鋼鐵般的嚴格紀律，細緻的政治工作以及獻身於政治理想的決心。」亦即係意識形態工作做得好好，當時冇人識用「意識形態」依四個字形容情況，只知道北伐軍識得用宣傳「主義」嚟征服人心，當時嘅評論係「革命軍氣盛，得人心，尤其是青年支持」，事後孫傳芳更加直接承認五省聯軍戰敗，最大原因係「革命軍宣傳力太強」同「便衣隊防不勝防」；前者係媒體宣傳，後者就係間諜滲透，一雞兩味，問你死未？

當時亦有報紙咁樣評論：「黨軍（蔣介石北伐軍）長處在能以軍事政治並行。故師行所至，事半功倍，質言之，一舉一動，皆有政治的意味」，黨政合一，作用在此，軍人再唔係職業軍人或半職業軍人，而係同政黨嘅命運共同體。其實世上萬事萬物嘅運作規律，亦都在於點樣將唔同嘅事物連結起嚟，捆綁埋一齊。「萬有引力」本身就係時間同空間嘅第一規規律，佛家講嘅「緣」，亦有引力嘅意思，瀨尿蝦點樣同牛丸走埋一齊，並出現瀨尿牛丸，本身亦都係一個好例子，所以我話周星馳嘅電影充滿哲學意味同境界高超，就係咁解。

叉開幾百字，講吓周星馳電影嘅境界，大家仲記唔記得「喜劇之王」，老細喺夜總會要初戀，你以為好好笑？其實都不知有幾高？人生在世，營營役役，其實求乜啫？就係「初戀」兩個字。然後再推演至有錢佬嘅taste好難估計，又再將層次推高一級，初戀只係「唯心主義」，有錢就係「唯物主義」，最低限度，必須要有錢先能夠喺夜總會度搵到「初戀」，同樣道理，要完成心中嘅慾望或理想，必須有錢先得，「唯物主義」先於「唯心主義」，真真正正係「唯物辯證法」嘅終極展現，香港同香港電影，曾幾何時，其實好高，之後，好有可能係物極必反。

用意識形態控制軍隊，用政治掛帥，其實就係初戀囉。之前已經講過，蔣介石所以贏嘅係「意識形態宣傳工作」，所謂「北洋軍無主義，北伐軍有主義」，但係孫傳芳同佢嘅幕僚亦唔係垃圾，你有三民主義，笑面虎亦有「三愛主義」提倡過，所謂「三愛主義」，就係「愛國家、愛人民、愛敵人」，其主要內容係：

「一曰愛國，人民為求生存而組織國家，世界未統一以前，各國各有自立之根源，即各有自救之方策，皮之不存，毛將焉附，故不肯以己殉人，始為真愛國。」

「二曰愛眾，凡屬含生負氣之倫，皆在民胞物與之列。樂利必求其共用，政治則選賢與能，交際則講信修睦，不獨親其親，不獨子其子，老有所養，壯有所用，幼有所長，鰥孤獨廢寡疾皆有所歸。蓋國家事，非一人一黨所能為，故當泛愛合眾，以求多助，不如分黨立異，以自樹敵。」

「三曰愛敵，政黨政治，觀成於英美，流風所被，波及東亞。然政黨政治，應以國家為前提，最忌一黨之專斷，最重各黨之友愛，政黨之相對雖有政敵之稱，而彼此尊重，實有切磋之雅。中國歷來具有實力者，但知競爭實利，實無政黨可言，而樹敵者之互相砥礪，各不相容，實為擾亂之重大原因。」

文言文好難？亦可能係文言文出事囉，「三愛主義」力拚「三民主義」，但係前者簡單啲講亦都係舊世界事物，亦即係將孔孟儒家哲學重新包裝上市，由五四運動開始，打倒孔家店根本就係潮流，舊嘅唔去新嘅唔嚟，「共產主義」先係當時最前衛最時髦嘅思想同意識形態，人心厭舊，再拋出阿婆條三千年紮腳布，冇可能喺宣傳上得到任何優勢，唔通今時今日仲有人睇cctvb膠劇咩？要睇，都睇Netfllix后翼棄兵啦。

凡事凡物都係說法問題，太陽底下無新事，祇有全新嘅包裝同宣傳口號，如何將舊事物用新包裝重新推出市場，先係重中之重。

嚴重跳格，去返歷史進程，北伐軍控制湖南全境，吳佩孚湖南兵敗之後，響「鄂南門戶」汀泗橋、賀勝橋部署重兵，力守中原心臟地帶武漢三鎮。1926年8月26號，北伐軍進攻吳佩孚防線，27號淩晨，第四軍攻剋汀泗橋，攻佔咸寧；28號吳佩孚親目到賀勝橋前線督戰，30號清晨，北伐軍總動員，雙方駁火，死傷慘重，最後葉挺獨立團突入敵陣，攻佔賀勝橋，北伐大軍兵臨武昌城下。

9月6號北伐大軍攻剋漢陽，9月7號攻佔漢口。9月10號，蔣介石下令李宗仁第七軍加入作戰，進入江西，9月14號北伐軍總司令頒佈封鎖武昌。9月17號，蔣介石由湖北啟程前赴江西指揮軍事行動，委派唐生智負責湘鄂軍事工作。同日「中華全國總工會」喺漢口成立辦事處，直接指揮五省工運工作，辦事處主任為李立三，秘書長為後來嘅國家主席劉少奇。

情況發展得好快，高度嘅作戰能力，鋼鐵般嘅嚴格紀律，細緻嘅政治工作，加埋獻身於政治理想嘅決心，北伐大軍，勢如破竹，無可匹敵。

#常威💀 #大軍閥平反系列 #大軍閥 #民國歷史

💙最新上線，請課金支持

【常威近代史】第六部《最九衰的大軍閥時代》Round 1

https://play.google.com/store/books/details?id=bCMNEAAAQBAJ

最新上線，請課金支持

【常威近代史】第六部《最九衰的大軍閥時代》Round 1

https://play.google.com/store/books/details?id=bCMNEAAAQBAJ

【常威近代史】第六部《最九衰的大軍閥時代》Round 1
amazon同步上架請大家大力支持

https://www.amazon.com/dp/B08PVMT6P5

【常公子歷史頻道340回：替大軍閥平反系列之 勞工神聖】

⛎近代勞工階層嘅待遇改善，其實全因為1917年「十月革命」之後列寧建立第一個共產主義國家開始，係咪有蘇聯之前，或馬克思恩格斯未出現之前，英國工業革命之後，世界上只有一種經濟運作制度，就係資本主義，資本主義所強調嘅係資產階級向勞工階層作出剝削，社會制度同政治完全傾向資產階級，造成無產階級無盡無盡嘅苦難及社會極端化嘅不平等，因此先至出現馬克思同恩格斯所寫嘅《共產黨宣言》，以及1848年嘅全球工人階級大革命。

♈清帝國係一個農業社會，並唔存在所謂產業工人階級，所以20世紀之前，中國（或叫清帝國）對共產主義運動差不多係全盤免役，我個人亦都好相信，如果唔係俄國變成一個共產主義國家，共產主義係唔會傳入中國發展至開花結果。

♈所謂產業工人階級，要到辛亥革命之後，中華民國建立先開始喺中國出現，但就算去到20世紀30年代，中國工人階級嘅數目依然占社會人口極小部分，當時中國其實超過90%以上嘅人口都係農民，所以毛澤東將革命希望放響廣大農民之上，其實係一啲都冇錯嘅實事求是做法，而發生喺30年代，毛澤東所代表嘅「本土派」同來自莫斯科由王明所代表嘅「國際派」之間嘅路線鬥爭亦係咁樣出現，最後，毛澤東秉承嘅農民路線取得最後勝利，建立中華人民共和國，大概呢個亦係史太林唔鍾意佢嘅原因（之一），不過無論如何，政治就係要「實事求是」，唔可以談太多空想同理想。


♑【常威近代史】第六部《最九衰的大軍閥時代Round 1》電子書上架（條download link在下面），請大家課金支持我一直走落去，直至劉少奇骨灰到達北京王光美手上…

✅https://youtu.be/sn10fyQVrUk

💙最新上線，請課金支持
【常威近代史】第六部《最九衰的大軍閥時代》Round 1
https://play.google.com/store/books/details?id=bCMNEAAAQBAJ

【常威近代史】（四百七十四回）
My aim is Money Shanghai

1926年9月，北伐大軍兵臨武昌城下……

9月5號發生咗另一件事，一直以嚟，帝國主義者英國一直響長江呼風喚雨，1926年6月至8月，英國輪船喺川東長江內河先後撞沉中國漁民船四艘。8月29號，英國輪船「萬流號」又撞沉四川軍閥楊森（1884-1977）軍隊木船三艘，64人浸死。楊森扣押兩艘英國輪船「萬流號」及「萬通號」，船上人員成為人質。

9月4號，英國人調動軍艦，另外喺商船上埋伏士兵，駛向輪船「萬流號」及「萬通號」，擊斃守衛川軍，救出船上人質，同事開炮轟擊萬縣達三小時之久，炸毀房屋千餘間，軍民死傷達5000餘人，整個萬縣變成一片頹垣敗瓦。

英國人真係船堅炮利，上述事件可以講係無法無天，但係響當時嘅中華民國嚟講，根本就係常態，軍閥割據各自為政嘅情況下，係邊個有槍邊個惡，邊個多槍邊個話事，何況英國人唔只多槍，仲有軍艦。你有本事就駛隻軍艦去泰晤士河炮轟 London bridge Brother囉？所謂鞭長莫及，當年美國人都係咁樣諗，誰不知拉登仲有一招飛機撞世貿襲擊你美國本土。

鬥爭嘅方法係鑊鑊新鮮鑊鑊甘，學習歷史亦都未必一定可以預防。等鬥爭一定會發生，因為「其樂無窮」嘛。點解人類唔可以和平共處？大家安居樂業？呢個問題仲難解過「世界為什麼會存在？」，主張「性惡論」嘅荀子曾經解釋過，人嘅本性如水，有向下流動嘅傾向，未必唔啱。況且亂世就有人賺大錢，就個人階級利益嚟講，都係一種正常嘅人性表現。我諗如果你係經營口罩廠，你都唔想Covid-19會突然之間消失.......

每個人有唔同嘅利益來源，一切都係講錢，當資源分佈唔均勻，就會發生鬥爭，但係所謂資源，除咗實體嘅資源——例如土地、能源、原材料、糧食及生產工具外；仲有無形嘅資源——例如權力、意識形態、虛榮感同快樂等等。冇得食要搶糧，飽暖則思淫欲，一切物質條件得到滿足後要追求精神境界，人嘅欲望係無限，所以鬥爭永遠冇辦法停止。

9月11號，北伐軍第一第二軍聯合總進攻江西重鎮南昌城，蔣Sir親臨城下督戰，孫傳芳部下南昌城防司令岳思寅死守，北伐軍久攻不下，於14號撤圍。

9月17日，馮玉祥喺綏遠五原，舉行就職誓師典禮，正式率領部下投身國民革命，有上個月15號開始，國民軍喺南口同張作霖吳佩孚嘅聯合部隊激戰四個月後，開始全線向五原一帶撤退。今個月16號，馮玉祥秘密喺莫斯科返抵五原，當晚馮玉祥召集于右任（1879-1964）、孫岳（1878-1928）、方振武（1885-1941）、鹿鍾麟（1884-1966）等國民軍重要將領開會，共同組成國民軍聯軍，馮玉祥被推舉為總司令。17號，馮玉祥舉行就職宣誓典禮，于右任以國民黨中執委常委身份向其授旗。馮玉祥即場宣佈國民軍全體將士集體加入國民黨，並且宣誓：

「本國民軍之目的，以國民黨之主義喚起民眾，剷除賣國軍閥，打倒帝國主義，追求中國之自由獨立。」

至此，國民軍同蔣Sir北伐大軍連成一線，南北呼應。五原誓師之後，馮玉祥召集舊部，重整旗鼓，國民軍從5萬人迅速擴展至25萬人，另外頒佈命令「煙酒必戒，嫖睹必戒，除去驕情，除去奢侈，實行勤儉，為黨犧牲，國民革命，方能成功」嘅32字治軍新誡條，加強軍事政治訓練，令到軍隊規模同埋戰鬥力大增。馮玉祥去過莫斯科接受訓練返嚟，果然提昇境界。

其實，除咗馮玉祥之外，本月中共亦都派遣顧順章（1904-1934），陳賡（1903-1961）等人前赴蘇聯，接受「契卡」訓練，「契卡」即係「間諜」，即係特工特務，或者叫007，訓練項目包括偵探、審訊、暴動、劫獄、爆破、射擊、被密通訊、政治保衛等等。呢批人係1927年先後回到中國，顧順章曾經擔任中共江浙區委軍委書記，工人糾察隊總隊長，後來主管中共中央特科，亦即係最高情報特務機關。蔣Sir清黨後，顧順章1931年被捕後投降國民政府，叛變中共，供出中共大量機密。1935年，顧順章因涉及中統軍統矛盾、組建「新共產黨」觸犯蔣Sir忌諱，而被中國國民黨處死。

亦有傳聞，顧順章叛變中共後，慘遭滅門，家人親戚朋友無一倖免，鬥爭何奇嚴酷。

9月20號，吳佩孚抵達鄭州，召集軍事會議。9月23號，省港澳大罷工形勢有所緩和，國民政府政務會議決定自動取消封鎖港澳政策，兩地恢服交通物資往來。

9月25號，另一個重要人物亦都喺依個時候登場，蔣Sir任命中國現代文學家、劇作家、詩人、歷史學家、古文字學家、書法家、學者、社會活動家郭沫若（1892-1978）代理國民革命軍總政治部主任。

9月29號，國民黨中央黨部通告不承認「西山會議派」喺上海設立嘅中央黨部，兩個中央變番一個中央，國民黨左派勢力被清洗，「西山會議派」呢個罐頭即刻過期，用完即棄。

同日蔣Sir發出指令，向盤踞上海錢罌一帶嘅大軍閥——五省聯軍總司令——笑面虎孫傳芳發起總攻擊！蔣Sir北伐終點在望：Money Shanghai！ Do you understand what I want？

#常威💀 #大軍閥平反系列 #大軍閥 #民國歷史

💙最新上線，請課金支持

【常威近代史】第六部《最九衰的大軍閥時代》Round 1

https://play.google.com/store/books/details?id=bCMNEAAAQBAJ

【常公子歷史頻道341回：替大軍閥平反系列之 南北和談】

⛎2020年快將過去，真係百感交集，因為發生咗好多不幸嘅事情，庚子年真係唔可以講笑，年頭嘅時候，我已經講過庚子真係大凶年，上一次庚子中國發生史上最嚴重嘅大饑荒，再對上一次1900年唔駛講，北京淪陷，國破家亡咁滯，庚子先生，唔該你快啲走，60年後先好再返嚟。

♈冇乜嘢寫，就咁。

♑【常威近代史】第六部《最九衰的大軍閥時代Round 1》電子書上架（條download link在下面），請大家課金支持我一直走落去，直至劉少奇骨灰到達北京王光美手上…

✅https://youtu.be/-qwzQuhYC5A

💙最新上線，請課金支持

【常威近代史】第六部《最九衰的大軍閥時代》Round 1
https://play.google.com/store/books/details?id=bCMNEAAAQBAJ

北伐軍之前攻打汀泗橋同賀勝橋後，吳佩孚召集殘部死守武漢三鎮。9月3號同5號，北伐軍第四、第七軍對武昌發起進攻，皆因城防堅固未能攻克，於是改變計劃，由第八軍於6號、7號兩日相繼攻佔漢陽、漢口，同時派軍收復鄂北大片土地，16號攻克鄂豫邊境嘅武勝關，將吳佩孚部隊趕至河南信陽一帶，武昌變成一座孤城。

之後就係長期封鎖同圍城，武昌城守軍彈盡糧，軍心渙散，本月8號守軍吳俊卿（並唔係臺灣頭號通緝犯）部隊同北伐軍接洽歸降事宜。雙十節當日，北伐第四軍第八軍因有內應，一舉攻佔武昌城，殲敵萬餘人，生擒武漢防禦總司令陳嘉漠及武昌守備總司令劉玉春（1878-1932），經歷40多日嘅武漢三鎮會戰，終於結束，大軍閱吳佩孚兵敗如山倒，蔣Sir滿血。

10月15號，國民政府發表《討伐孫傳芳宣言》，同日，國民黨聯席會議通過《請汪精衛銷假案》，由蔣Sir自編自導自演嘅「中山艦事件」發生後，原來嘅坐館龍頭汪精衛被迫出走巴黎放長假。蔣Sir集黨、政、軍大權於一身，國民政府亦轉移到新右派手上，於是引起國民黨左派同埋各派軍閥嘅不滿，於是，逐發起「迎汪運動」，中共為削弱蔣Sir嘅權勢，亦都提出擁護汪精衛復職，主張汪精衛同蔣介石合作，今日嘅會議，決定請汪精衛銷假，返回中國，見機行事。

同日，吳佩孚通電駁斥駐外13國公使停戰及召開國民會議，主將表示徹底「討赤」（當咗蔣Sir係共產黨？）。

10月16號，浙江省長夏超（1881-1926）就任國民革命軍第18軍軍長一職，宣佈討伐孫傳芳。20號，孫傳芳免去夏超浙江省長職務，並派兵入浙江討伐夏超，22號，夏超兵敗潰逃，被殺。

10月22號，蔣Sir致電譚延闓、張靜江，主張國民政府及中央黨部由廣州移至武昌。10月23號，四川軍閥楊森（1884-1977）加入國民革命軍，被任命為第20軍軍長。

10月24號，上海工人為配合北伐戰爭，發動武裝起義，北伐開始之後，中共上海區委組織咗2000幾人嘅工人糾察隊，積極預備武裝起義，行動主要負責人係羅亦農（1902-1928）、趙世炎（1901-1927），總指揮為李震瀛（1900-1938）。10月23號下午起義總動員令下達，24號淩晨，起義開始，參加人數為國共方面各約200人，由於通訊落後（冇人有手提同whatsapp），起義信號唔係個個知道，大部分地區未能發動，僅南市區有20餘人襲擊派出所，起義行動好快就結束，又係行先死先，工人領袖陶靜軒（1890-1926）、奚佐堯（1898-1926）被捕遇害，成為烈士，另有十多個人被捕，起義失敗，幫唔到北伐手。

#常威💀 #大軍閥平反系列 #大軍閥 #民國歷史

💙最新上線，請課金支持

【常威近代史】第六部《最九衰的大軍閥時代》Round 1

https://play.google.com/store/books/details?id=bCMNEAAAQBAJ

【常威近代史】（四百七十六回）
金錢遊戲係唯一本質

打仗係金錢遊戲，打仗固然需要錢，打仗嘅最後目的亦都係為咗錢，大家必須理解，亦必須承認。

當然成日將錢掛響口邊的確係好嘔心好庸俗，「視錢財如糞土」「兩袖清風」邊個唔想？無視金錢榮譽，亦係中國傳統儒家哲學中君子人格嘅必須心理條件，但現實還是現實，真相係要吃得飽穿得暖先可以口口聲聲同人講「視錢財如糞土，視富貴如浮雲」。更加極端嘅例子係，唔小嘅饑荒事件都有「人相食」事件記載，滅絕人性呀……但，邊個想食人呀？因為冇得食先要食，當就快餓死時，道德其實唔存在，因為死咗就一了百了，冇人想死，逃避死亡係人性嘅第一底線，當死神敲你門口，你就乜嘢都可以做出嚟，人性係咁，冇計。

所以，食得飽穿得暖就係錢嘅問題，冇水亦冇人格，冇水亦冇資格講夢想講理念，要明白真正的「革命」（假嘅唔計）點樣發生？一定要明白上述道理。蔣Sir能夠喺國民黨政治鬥爭中脫穎而出，打敗元老級人馬汪精衛、胡漢民獨攬大權，其實亦都係佢比其他兩人更明白錢嘅重要性，要建立自己的班底，要豢養自己嘅「黨軍」，你認為冇錢可以嗎？難道你認為單靠意識形態口號就可以吹雞聚人圍爐嗎？錯鳩曬。

所謂戰爭打仗攻城掠地，統統都係金錢遊戲，統統要計數，軍隊佔領一個城市，嗰個城市嘅資源就係屬於佔領者，首先要大肆搶掠，彌補軍費開銷，城市中嘅中產階級同埋有錢人要交出「贖金」先可以保命，窮人則被拉扶進入軍隊補充人手繼續壯大實力。日本皇軍佔領香港，將港幣兌換軍票，就係一次性掠奪整個香港嘅財富，唔係邊有錢整隻大和號？邊有錢同美國打太平洋戰爭？

蔣Sir似乎比其他國民黨領導人更認識到上海喺財政上嘅重要性，知道控制上海稅款嘅收入勝過指揮許多師嘅軍隊。響1912到1922年間，浙江寧波人蔣Sir好多時候都喺上海生活，佢同嗰度金融界嘅領袖人物有密切關係，亦都同上海最大嘅地下社團秘密組織「青幫」直接掛勾，千萬不要忘記，蔣Sir係陳其美（1878-1916）頭馬，清幫陳其美喺辛亥革命之後曾經控制上海，蔣Sir祇不過係伸延大佬嘅意的重新奪回金融大本營，所以必須相信，北伐由一開始，蔣Sir已經將終點定喺上海，並唔係真係要打去北京，推翻中華民國中央政府。This is only a money war， you know?

再提一提大家，1926年嘅上海，一個聯合國式嘅自由城邦，其實係當時世界四大重要城市之一，可以同紐約、倫敦、東京相提並論（其實應該要計埋巴黎同德國巴戈利亞地區），得上海得天下，蔣Sir想法絕對正確。當然有一個好重要嘅問題，蔣Sir係用緊蘇聯嘅資金打仗北伐，理論上係需要依從金主（第三國際）意志去「赤化」上海，即共上海（資本家）的產。

但蔣Sir一早就知道唔可以咁樣做，否則上海就會步上東歐第一大城市聖彼德堡後塵，因此由北伐戰爭醞釀開始，蔣Sir高速右傾，亦係心裡一早就盤算好如何將來奪取上海後能夠控制局面，或者簡單直接少少，能夠有效控制所有財富資源。