大清亡國關慈禧蛋牛治 2

5月28號，有一件事可以提吓，澳門葡萄牙當局委派一位土生葡國人羅保擔任鴉片專員，羅保博士（Dr. Pedro José Lobo，1892－1965），佢亦係香港行政立法兩局議員羅保（1923-2015）父親，故又稱老羅保。1927年3月，澳門當局宣佈一項法令，根據日內瓦關於管制鴉片菸會議嘅精神，將於同年7月1號終止政府過去給予私人機構鴉片進口、提煉、售賣及批發等專營權，改由鴉片專員管理，簡單啲講，就係將鴉片生意收歸國有，依一項法令，令壟斷澳門鴉片煙經銷嘅裕盛行失去咗鴉片專賣權。裕盛行老細係邊個？就係利希慎家族，鴉片生意式微後，利希慎家族先全力投身地產界。

風起雲湧嘅四、五月過去，進入1927年嘅下半年，6月1號，有武漢北伐軍同馮玉祥國民軍響開封會師，同日，南京特別市市政府成立，清黨工作仍然繼續，中共承受前所未有嘅生死存亡壓力。

6月2號，著名大學者、大清遺老王國維（1877-1927）自沉於北京頤和園昆明湖，自殺嘅時候祇有50歲，佢響遺書裡面咁樣寫：「五十之年，只欠一死，經此世變，義無再辱。」

王國維，字靜安，1877年出世，浙江海寧人，晚清秀才，曾入羅振玉（1866-1940）主辦嘅「東文學堂」治學，學習外語及理科，深受羅振玉讚賞，後來得到羅振玉資助，前赴日本留學，1906年回國，在清帝國學部任職，期間潛修中國曲詞研究，寫成《人間詞話》、《戲曲考原》、《宋元詞曲史》等偉大著作，當中一本《人間詞話》，提出文學境界之説，字字鏗鏘，擲地有聲，成為中國文學史上一本不可不讀嘅書（本公子仍放在檯頭）。

辛亥革命之後，王國維與羅振玉避居日本，以大清遺老自居，專治中國古文字學、音韵學，著有《殷人辭中所見先公先王考》、《兩周金石文韵讀》、《觀堂古金文考釋》，與羅振玉合著《流沙墜簡考釋》，為中國古文字研究奠基。1916年回到上海，負責《學術叢編》雜誌，1922年任北大研究所國學講師，1923年應遜帝溥儀之邀任南書房行走，同時亦係清華研究院教授。

王國維一生，力盡於學術，心繫於故國，將西方文化精髓同中國文化互相結合，成為東西文化溝通互動嘅重要橋樑。佢自殺嘅理由有好多講法，其中一個就係喪子之痛以及加上與羅振玉嘅情義斷絕，亦有因摯友葉德輝（1864-1927）響革命中被殺，佢本人亦恐怕革命軍入京後受辱，於是自沉於昆明湖底。

王國維係我非常喜愛嘅文學家，佢寫嘅詞，憂愁至極，動人心魄，不下於大師蘇軾、辛棄疾，甚有過之而無不及。

【常公子歷史頻道352回：替大軍閥平反系列之 國民黨成立 】

⛎踏入2021年先1個月未夠，整個世界已難以想像嘅方式繼續急劇變化中，因為一場大瘟疫，原來正常運作嘅事物要全盤改寫，如果我嘅睇法冇錯，特朗普唔能夠連任四年係當中最大嘅變數，假若冇依場瘟疫，極度唔受美國人歡迎、一路行來始終唔得嘅大愛拜登冇可能上臺。另一方面，新型冠狀病毒大大削弱咗美國原本嘅全面政經優勢，原來嘅預測，中國國起碼要到2030-2035年先能夠追上美國，但一場大瘟疫，此消彼長，將時間大幅度縮短，甚至有人預測未來5、6年，（假如一切條件不變）中國整體國力就能夠追上美國，至少平起平坐。

♐另一方面，原本已經五癆七傷嘅歐盟會進一步向下走，新型冠狀病毒加快英國脫歐進程，多個師兄走咗，成為競爭對手添，咁歐洲經濟會更加一蹶不振，對全球政治影響力亦勢必大減，當初歐洲諸國建立歐洲共同體，原本係想建立一個國際體系挑戰美國霸權，同美元平分天下。可惜歐盟行咗30年，一路行來始終唔得，唔得就係唔得，加多場大瘟疫洗禮，如果未來5-10年內，整個歐盟解體，再度崩分離析，我唔覺得係一件非常奇怪嘅事情，反而係一件合理嘅事。德國無論如何強大，亦冇可能將所有家當孭晒上身，不如獨善其身好過，更何況，史上最強政治女人默克爾退落嚟之後，究竟仲有冇第二個默克爾？都好成疑問。

♑如果上述講法成立，歐美國力勢必向下，中國咪一枝獨秀？一柱擎天？但最大嘅問題亦喺呢度，所謂棒打出頭鳥，成為衆矢之的，亦表示要面對大量敵人，疫情時候共產主義戰時體制當然節節領先，但疫情總有一日過去，之後情況又會點呢？我相信關鍵在於「內循環」能否順利成事，做人亦都一樣，凡事靠自己雙手就有充分嘅自主權，吓吓靠老豆靠外人外力又有幾巴閉呢？之前30年中國嘅經濟發展，真係由（老豆）美國嘅泵水帶動起飛，2020年之後，就要靠自己，底氣夠唔夠係箇中關鍵。正如跑馬嘅道理，如果隻馬可以贏就一定會贏，衹要減夠分、客觀條件適合就會贏，現在中國已經減夠分，客觀條件亦都想當遷就，能唔能夠贏出？就要靠自己了。

♑【常威近代史】第六部《最九衰的大軍閥時代Round 1》電子書上架（條download link在下面），請大家課金支持我一直走落去，直至劉少奇骨灰到達北京王光美手上…

✅https://youtu.be/nz6Y9Fc4Ulw

【常威近代史】（四百九十二回）
有錢使得鬼推磨

大清遺民王國維之死，亦象徵著舊世界正式終結，一個全新時代已經降臨，舊世界大概係指清帝國那種以儒家哲學為根基、以宗社倫理人輿人關係為紐帶、連結成嘅平靜農業超穩定社會結構。經過辛亥革命之後，以西方自由民主議會制度取而代之，答案係完全失敗，國家分崩離析，軍閥割據，政治同經濟面臨瓦解邊緣，16年壽命嘅「中華民國」正式宣佈結束，全新嘅時代係一個「黨國合一」嘅強人時代，既然和理非非冇得傾，就不如玩一言堂，以鐵腕獨裁手段治國，傾都唔使傾。同樣嘅情況，出現係世界每一個角落。

當時嘅日本，經過大正時代嘅自由民主洗禮，同樣遭受管治挫敗，民心叛離，1925年明治時代開始，雄才大略嘅昭和天皇亦進一步收緊政治權力，邁向軍國主義並非偶然。今時今日大紅大紫嘅《鬼滅之刃》，就係歌頌大正時代！除咗日本，當時嘅德國威瑪共和國亦都因為行民主自由議會制度而岌岌可危，全力內耗，國力大衰退，高傲嘅日爾曼民族（或巴伐利亞嘅普魯士遺民）無法忍受自高峰滑落嘅挫敗感，終於促成極端民族主義者希特拉納粹上臺，強人當道，萬人崇拜，情況同當時中國，大致上都一樣。

1927年中，希特拉因為發動啤酒館政變刑滿出獄已經幾年，正在全力將佢嘅「國家社會主義德國工人黨」（Nazi）重整旗鼓，佢喺獄中所寫嘅《我的奮鬥》（德語：Mein Kamp）風行全國，賣過千萬本，聲望不斷攀升，已經成為咗唔少德國年青人嘅偶像，隨後響1931年嘅國會大選中，得到80萬張選票，2.6%國民支持，納粹得到國會中12個議席。如果你喺1927年響慕尼黑街頭做一個街訪，問吓市民對希特拉嘅印象係點？我諗十個有七個會話佢係民族英雄同革命者，其餘二個覺得佢痴撚線搞亂個社會，仲有一個覺得佢係共產黨一定要殲滅。

1927年6月1號，中國旅行社正式喺上海成立，呢個係中國第一間旅行社，由江蘇著名銀行家、企業家陳光甫（1881-1976）創立，旅行社嘅前身係上海銀行嘅旅行部，主要為客戶代辦客運票務為主。自立門戶後改為中旅社，開始接待各國旅遊團體，並在國內組織團體旅遊，一時間跟團嘅風氣大盛，「旅遊」呢個概念，亦都進入中國人世界。

1927年6月9號，江蘇銀行業巨頭張嘉璈（1879-1989）代表中國銀行，屈服於蔣sir嘅勒索，向蔣Sir嘅革命軍墊付軍款200萬元（找數），遊戲規則就係咁，財源滾滾來都要靠有槍在手，你肯資助我就係自己人，唔肯資助我就係敵人，唔好話收陀地咁難聽，彼此係合作關係，有人搞你我替你出頭，冇人搞你你要養我，天經地義。好多現代人唔明白呢種遊戲規則，覺得喺現代法治世界中法律同制度可以全盤保障所有人權益，但真相係，上述嘅「比陀地」情況一直冇停止發生過，祇不過換咗套包裝，用另一種講法演繹，你睇佢唔到，當冇件事。

當年鄧小平搞開放改革，試點喺深圳同珠海，唔少香港大財閥就一呼百應，集體北上，出錢出力，投資基建搞實業訓練人才不遺餘力，就係要畀低陀地，建立彼此係自己人嘅合作關係，跌小小錢叫長期投資，他日有福同享，有難同當。

6月12號，60萬人喺上海舉行反對日本出兵山東大會，當其時嘅日本，已經成為蔣Sir國民政府嘅最大敵人，1927年之後嘅世界，亦大步邁向中日對峙嘅鬥爭局面，經過十年時間加深仇恨，終於響1937年爆發全面性嘅中日戰爭。

6月18號，張作霖響北京就任中華民國海陸軍大元帥，組織安國軍政府，任命潘復（1883-1936）為國務總理，我哋稱呼佢做末代總理，亦係五色旗中華民國最後一個國務總理。前一日，17號，北京高等審判廳開始對鮑羅廷夫人及三名蘇聯人進行審判，真係完全視國際法於無物。

6月21號，日本輪船「南洋丸」號經過南京下關時，不鳴汽笛高速航行，連續撞沉四艘中國船，100多名華人浸死，屌你老母，呢啲究竟係乜嘢事呢？除非係假新聞fake news，如果真係咁樣發生，中國人仇視日本人叫理所當然。

同日有大事發生，國民軍總司令馮玉祥承認南京政府，同蔣sir合作，進一步將武漢國民政府陷於孤立境地。6月10號，汪精衛率領大批武漢政府要員北上鄭州，同馮玉祥會面，馮玉祥嘅立場係同意「清黨反共」，但唔同意東征蔣sir，並且主張寧漢和解。

6月14號，馮玉祥派人前往南京，轉達想同蔣Sir會面，蔣Sir一口答應，16號，蔣Sir帶領南京政府大部份要員前往徐州同馮玉祥會談，會談中，蔣Sir要求馮玉祥立即清共，並且向武漢出兵，馮玉祥同樣答應清共，但無答應打武漢，認為寧漢應該合一、武漢黨部應該取消，所有人員應該到南京供職，蔣Sir同意佢嘅意見，重點係會談中蔣Sir答應每個月向國民軍提供250萬軍餉（果然有錢使得鬼推磨），南京方面同國民軍聯合，繼續北伐打上北京！

同日，馮玉祥致電武漢政府，指共產黨同武漢工農運動係「陽冒國民革命之名，陰佈全國恐怖之毒」，要求武漢政府立即「分共」，並自動取消兩個中央，革命二五仔馮玉祥，果然名不虛傳。

#常威💀 #蔣介石平反系列 #黃金十年 #民國歷史

【常公子歷史頻道353回：替大軍閥平反系列之 基爾特社會主義 】

⛎特朗普暫時離開政壇，中美關係有緩和跡象，不過鬥爭嘅缺口已經打開，要達到大和解幾乎已經冇可能，隨住中國嘅經濟實力愈接近美國，雙方意識形態越行越遠亦都係必然事實，有人擔心熱戰會發生，但係睇返歷史，其實所有大規模真實戰爭都要醞釀多年先會發生，中美關係交惡，大約由六年前奧巴馬啟動重返亞太大戰略開始，之後特朗普上臺做加速師，交惡速度加快，不過一場大瘟疫令拜登上臺，情況又好似鬆返啲啲，外交關係亦好似股票咁樣，不停上上落落、時高時低有波幅，不過中美之間整體嘅大趨勢係必定不斷向下，至於何時觸及戰爭嘅紅線我唔敢講，不過未來五至十年一定唔會，股市泡沫爆煲亦一定快過熱戰發生（或者更邏輯去講，泡沫終極爆破亦會直接導致熱戰發生）。

♉世事嘅嘢，門面功夫同宣傳手法其實最重要，真相往往完全唔重要，學朋友周顯話齋，要到潮退嘅時候先會發現邊個冇著泳褲。新型冠狀病毒疫苗出現，目前全世界已經有幾千萬人打咗，成效係點？冇人知道。至少有四個關於疫苗嘅問題，至今尚未有人可以解答：
第一，疫苗嘅免疫力能夠維持幾耐呢？一個月？半年？一年？三年？完全冇答案。
第二，接種疫苗之後，仲會感染新冠病毒嗎？似乎嚴格嚟講係會，亦都有個案發生咗。
第三，疫苗對新冠病毒變異毒株有效嗎？有人話有，亦有人話冇，但係睇最近英國嘅死亡數字增加嚟講，好似係冇。
第四，需要喺幾長時間裡面接種幾多劑量？又好似係莫衷一是，前後打完兩劑，絕對唔會終身免疫，咁幾耐要再打呢？打幾多呢？係咪要定期打？至今冇人有肯定答案。

♈當然疫苗有好多種，生產商亦有好多個，隻隻唔同，而研發疫苗的藥廠，亦都摸著石頭過河，一切要睇情況發展。正如去年今日，亦冇人能夠想像到病毒嘅破壞力，可以媲美第二次世界大戰，一切要睇情況點發生？大量不確定元素充斥2021年，可以開大亦可以開細，運氣其實主宰一切。不過響整個遊戲大局裏面，生產疫苗嘅藥廠一定會係大贏家，而且大贏特贏，贏到開巷。

♑【常威近代史】第六部《最九衰的大軍閥時代Round 1》電子書上架（條download link在下面），請大家課金支持我一直走落去，直至劉少奇骨灰到達北京王光美手上…

✅https://youtu.be/-6nUhxl1Dfs

【常威近代史】（四百九十三回）
武漢國民政府劃清界線

兩個衹能揀一個，馮玉祥投向南京國民政府，依附有水嘅蔣Sir，無疑令國民黨左派主宰嘅武漢政府陷入極其難堪嘅境地，中共嘅情況更壞，武漢國民政府亦都急不及待劃清界線，蔣Sir叫「清黨」，汪精衛叫「分共」，名相唔同，但做嘅嘢一樣，就係要趕絕中共。

講句公道說話，無論係南京政府抑或武漢政府，都係靠「聯俄容共」起家，中國共產黨（及其成員）響北伐戰爭之中亦立下不少汗馬功勞，過橋抽板，用完即棄其實冇撚所謂，呢個世界嘅嘢，唔係我利用你就係你利用我，但係「用完即殺」，就真係天理不容。國民黨人話「國共合作」，共產黨乘機滲透分化國民黨，原來真正目的係想奪權，所以要清黨分共，但係真相是否係咁呢？（做任何壞事都需要有一個藉口）

真相究竟係唔係有人要搞「黨國合一」「獨裁專政」，而黨只可以有一個，龍頭只可以一個人做。民主自由社會嘅跨黨派合作，喺中國並唔work，Right？可能都係，電影《黑社會》中，響石梨貝水塘梁家輝（大Dee）同任達華（樂哥）釣魚，梁家輝提議搞兩個「話事」，結果任達華即刻搦起舊石頭砸死梁家輝（仲殺埋佢老婆邵美琪），大概大家演繹嘅係同一個故事。

1927年6月25日，奉系張作霖響北京組建安國軍政府，自任陸海軍大元帥之後，非常出奇地以「中山老友」的名義通電全國，高談「中山之志」同「中山主義」，中山當然係孫中山孫文，孫文係國民黨嘅意識形態上帝，張作霖措辭咁奇特有趣，難免令人懷疑佢究竟想唔想打落去吖？

封電報裡面咁演繹：「共和肇造，治權在民。回思締造之艱，實維孫前大總統首創革命，百折不回，此克肅清帝制，還我民族自，作霖與中山為多年老友……信使往還，物質援助，彼此精神契，始終如一……北京會晤，歡洽平生，以後邦家多難，中山賫志以終，一切建設大端，皆屬後來之責，是作霖與中山一生宗旨，本屬相同……」

吓？認親認戚嘅？張作霖想點呢？打意識形態文宣？幾kick啊！不過由當時開始，大家又可以睇到，死去唔夠三年嘅孫文真真正正成為中國嘅象徵符號，他朝升格到「國父」水平，亦都指日可待。講句公道說話，世間上所有嘅神祗都係由凡人供奉出嚟，有人肯膜拜有人肯添香油，間廟就可以做大，我諗武將關雲長平生都冇諗過自己可以變成後世嘅神，佛陀釋迦牟尼都祇不過稱呼自己為一個人生導師，並非上天入地嘅神祗，同樣道理，如果冇咗希柏箂第一健筆使徒約翰同耶穌寫本《新約聖經》，耶穌都未必可以昇格成耶和華嘅獨生子（雖然大家都係姓「耶」）？So......奧姆真理教麻原彰晃（1955-2018）亦復如是吧？

6月27號，武漢國民政府決定解散工人糾察隊，並且逼令農政部長中共黨員譚平山（1886-1956）辭職，開始畫清界線了。第二日28號，武漢何鍵（1887-1956）35軍及盜墓者李品仙（1890-1987）第8軍部隊佔領工會機關，並通電要求武漢政府立刻與「共產黨分離」。6月29號，廣州實行第二次清黨行動，狩捕共產黨人，再槍殺13人。

如果要講共產黨點解咁黑人憎，大概亦都係同佢哋嘅農民政策有關，中共要鬥大地主，分田分地比貧苦大衆，咁大地主一定唔放過你架，大地主土豪劣紳一無是處，就係有錢；但係有錢就能夠使得鬼推磨，有錢就能夠收買軍人同政客，情況亦都非常簡單。

當時嘅中國，根據1927年國民黨中央農民部土地委員會嘅一份報告指出，地主富農佔所有全國農田土地嘅81%。而根據統計，全國無田無地嘅佃農、僱農、游民（即窮西）數目達到1.86億人（咁小？有水份喎，當時中國人口數目大概四億人），佔所有農民總數嘅55%，有土地嘅農民有1.5億，亦只佔農民總數嘅45%，富農、地主人數佔有地人數嘅32%，卻佔有80%以上嘅土地。

情況亦都好簡單好L合理， 有錢人佔據社會上大部分資源（包括土地及財富），同現代社會其實一撚樣。世界從來無公平呢回事，所謂意識形態ideology，就係「資本主義」要你相信「唔X公平」係合理reasonable嘅；而「共產主義」則要你相信「唔X公平」係可以改變嘅，不過要用武力。兩邊冇話邊個啱邊個錯？要睇你企喺乜嘢立場同你嘅出生背景，我常公子再重申一次，係「存在決定意識」並非「意識決定存在」——呢條真係真理喇。

如果你老竇大把水，成世衣食無憂，但你又相信共產主義（好似恩格斯咁），依種狀態我哋叫高尚同有文化；但如果你祇不過係一條窮西，成世俾人踩喺地底做泥，你仲相信資本主義合理性（冇人剝削緊你），依種狀態有一個專門學術名詞可以形容：叫「戇撚鳩」。

意識形態其實係廣義相對論嘅一種，真係要睇吓你企喺乜嘢位置上邊觀察object（現象）。

時間線進入1927年7月……局面完全白熱化，血腥清黨carry on，誓要殺到你中共雞犬不留先進入黃金時代，中共又如何絕處逢生？保留一線生機，我哋下次繼續……

#常威💀 #蔣介石平反系列 #黃金十年 #民國歷史

【常威近代史】（四百九十四回）
汪精衛分共

時間進入1927年7月，情況已經相當白熱化，蔣Sir所控制嘅南京（and上海）政府一枝獨秀，四周軍閥紛紛投誠，權力暴脹，先安內、後攘外，屠殺曾經係朋友嘅共產黨人殺個血流成河，北京中華民國中央政府暫時被奉系張作霖控制成為軍政府狀態，曾經叱吒一時嘅民國關公直系吳佩孚兵敗如山倒，黯然銷魂飯退下歷史舞臺，直系另一大將笑面虎五省聯盟總陀主孫傳芳正積極籌備，作最後一擊，進攻南京，企圖一鋪翻本。

外交方面，西方列強亦開始轉軚，由極度抗拒蔣Sir，響長江開炮打鳩佢，到開始接納佢同佢傾偈，畢竟係為勢所逼，東亞金融大錢罌上海落入蔣Sir控制範圍，其實蔣Sir已經掌握最大籌碼，大不了玉石俱焚，全部冚家鏟，大家冇生意做好唔撚好？（我癲起上嚟自己都控制唔到）如果想維持現狀，外匯出入平安，換個政權，也無不可吧？

西方列強思維從來冇考慮過中國人感受——相信讀這篇文章的閣下，亦從來沒有考慮過石梨背水塘馬騮的感受——總之要做生意要有來有往更成，點解我常公子不斷強調上海嘅重要性，甚至認為蔣Sir北伐嘅終點根本就一早設於上海，就係咁解，從上海到北京，還有漫長之路，中間冇乜油水可撈，真係打上去成本好重，冇謂搏丫。

形勢比人強自然有談判籌碼，俾人摸通你底牌，知道你冇料到，就自然打到你一棟都冇！古今皆然，如果叫口號可以改變世界，咁根本唔需要發明核子彈同無人機噢？當時，雄才大略嘅昭和天皇主理嘅大日本帝國，亦睇到五色旗中華民國岌岌可危，於是乎搵個借口增兵東三省，整個中國再掀起一股反日熱潮，由1927年倒數十年前，日本仍然係中國人嘅偶像同模仿對象，十年人事幾番新，日本已經成為中國最大嘅敵人，去到1927年，其實距離中日全面戰爭，只有十年時間。

1927年7月1號，澳門取消私人機構鴉片專營權，改為政府專員辦理，利希慎家族亦開始轉型，發展港澳地產事業。同日雲南改懸青天白日旗，擁護南京政府。南京政府亦自本日開始實行出口附加稅，調高2.5%，另一方面，南京政府封鎖長江流域，另一個中央武漢政府金融因此陷於極度困境，錢唔夠使，只可以繼續印銀紙，銀紙印得太多，貨幣就會大貶值（今時今日呢條真理亦都冇改變過，祇不過金融操作技術喺100年來有突破性嘅發展，印銀紙嘅國家可以將通脹輸出俾其他國家承受，呢個就係全球化嘅意義），武漢紙幣價格跌至六折，物價暴漲，汪精衛冇辦法再頂落去。

7月2號，廣東省開始停辦日貨，「對日經濟絕交大同盟執行委員會」（個名幾撚勁）通過《懲辦奸民條例》，禁止人民同日本人做生意搞貿易，當然亦禁止日貨進口；7月3號，福建廈門亦禁止日本貨進口，凡購買日貨者，罰戴紙帽遊行，即係文革式公開批鬥技術，大家要開始熟習鳥。

7月4號，中共江蘇省書記，陳獨秀長子陳延年（1898-1927）遇害，陳延年響上海恆豐里104號被逮捕，但拒絕招降，於7月4日被亂刀砍殺，死得好X慘。

7月7號，馮玉祥喺吳佩孚原本嘅根據地洛陽宣佈清黨，軍隊內所有政治人員一律被解職，至此馮玉祥國民軍完全同共產主義割蓆，二五仔馮玉祥彈起，全靠蘇聯第三國際資金一直資助，現在有毛有翼可以自給自足，亦無需要再隱瞞動機，革命從來只係一個控制軍隊嘅意識形態工具，喺適當嘅時候係可以被撤換，反正以當時軍人嘅文化水平，絕對冇可能明白馬克思主義具體內容，衹要你有糧出，信耶穌或信佛祖其實冇問題，呢個亦係「意識形態政權」同「政權嘅意識形態」之間嘅分野，當中非常微妙，「政權」同「意識形態」兩者次序一調轉，係完全兩碼子嘅事情，關於呢啲事，我哋以後大把機會講。

7月12號，北京高等審判廳宣佈鮑羅廷夫人案預審結束，鮑夫人及三名外交人員無罪釋放。

7月15號，形勢出現大逆轉，汪精衛喺武漢召集國民黨中央常務委員會擴大會議，正式宣佈同共產黨決裂。隨住武漢國民政府的統治危機不斷加深，尤其是馮玉祥倒向蔣介石，汪精衛東進討蔣已成泡影，於是政治上迅速右轉，加快反共步伐。早響6月，汪精衛就命令國民革命軍第四軍從北伐前線折返武漢，部署鎮壓工農運動，6月29號，響汪精衛默許下，35軍軍長何鍵發出反共訓令，響武漢開始佔領及封閉各工會及共產黨機關。

終於響15號，武漢國民政府正式宣佈「分共」，制裁共產黨人一切違反國民黨主義政策嘅言論行動，規定共產黨員不得進行有礙國民革命之活動；不得以國民黨名義從事共產黨之工作；凡在國民黨擔任職務嘅共產黨員必須聲明脫離共產黨，否則一律開除；國民黨黨員加入其他政黨，以叛黨罪處分。歷史上，叫「七一五分共」事變，至此「國共第一次合作」完全破裂，孫文如果九泉之下有知，必定痛駡承繼人汪兆銘。從此以後，汪精衛集團同南京集團實現合流，共同對付中共殘餘勢力。

7月16號，何鍵部隊佔領漢陽及漢口，問心一句，汪精衛唔及時宣佈「分共」，相信亦自身難保，人哋蔣Sir有黨軍你就冇，單靠靚仔同名氣實在冇L用，槍桿子出政權，邊有錯？7月18號，中共中央機關報《向導》週刊被迫停刊，國民黨江蘇省黨部通令將郭沫若（1892-1978）永遠開除國民黨黨籍，中共領導人、同周恩來一齊創辦過「中國少年共產黨,」嘅趙世炎（1901-1927）喺上海被殺……

#常威💀 #蔣介石平反系列 #黃金十年 #民國歷史

✅本土唯一香港土話近代史文本

❤【常威近代史】第一部《大清亡國關慈禧蛋牛治》，全面開放，免費下載， #freedownload！

Free下載連結🔽

https://play.google.com/store/books/details?id=C3hjDwAAQBAJ

【常公子歷史頻道354回：替大軍閥平反系列之 第三國際】

⛎困擾未來國際形勢最大的變局，始終都係中美關係，無論如何演繹，中國崛起嘅巨大政治能量始終都唔能夠忽視，從上一個世紀嘅「美蘇關係」，到今日「中美關係」，冷戰博弈嘅主角由蘇聯變成中國，身為中國人，應該感到自豪，東亞病夫之名，終於可以從歷史貨架上下架。

♐共產主義運動嘅興起，全因為工業革命之後資產階級對窮人嘅無情剝削，唯物主義者毛主席曾經講過，世界上冇無緣無故嘅愛，亦冇無緣無故嘅恨：一切嘅事情皆有因果。由19世紀中葉開始，馬克思共產主義思潮席捲全世界，差不多焚燒到每一個有剝削存在嘅地方，哪裏有窮人，哪裏便有同志comrades站出來革命，資本主義信徒稱呼共產主義為一種赤禍，的確係非常正確的形容詞，因為對資產階級大地主土豪劣紳黑五類來說，的確是一場大災禍。甚至去到今時今日，共產主義思想被對家抹黑嘅程度，亦都從來未減少過半分。因為唔抹黑對方，又何來顯示自身的正確無誤呢？

♑當然共產主義亦都有其錯誤嘅地方——起碼佢相信人性中存在善性（即孟子之性善論），就一定大錯特錯。人性，並無善惡之分，如果夾硬要講，個人感覺，傾向性惡多於傾向性善，正如灰色係接近黑色多過接近白色，要將自己擁有嘅嘢（私有財產）同其他人分享，其實完全冇可能，正如你到石梨貝水塘，企圖奪去那裏一隻恒河猴手中的一條香蕉，恒河猴一定會咬鳩你，天經地義嘅，因此如果你想同隻馬騮分享半條香蕉，非要用暴力或威嚇不可，極權出現大概嘅情況就係咁樣。又當然，你可以問，點解要夾硬要隻馬騮分半條香蕉俾你呢？當然如果故事發生在一個蕉林，隨地都係香蕉，世界是沒有問題的。問題就是猴子太多，香蕉數目不夠，因此祇有用強制資源平均分配手段，才可以養活所有馬騮。當然你又可以再問，其他馬騮餓X死，與我何干呢？衹要我自己和自己的家人可以活下去變可以啊。你這個問題沒有問錯，甚至問得非常好，因此你是一隻信奉資本主義並非屬共產主義嘅恒河猴。

♑【常威近代史】第六部《最九衰的大軍閥時代Round 1》電子書上架（條download link在下面），請大家課金支持我一直走落去，直至劉少奇骨灰到達北京王光美手上…

✅https://youtu.be/IxxySnmrszM

【常威近代史】（四百九十五回）
「做實事」=「有錢返」

寧漢合流，共同清黨，中共陷於絕地。回首歷史，汪精衛分共，亦都係為勢所逼，手上軍頭全部要反共投靠蔣介石，如果汪兆銘堅持己見，相信亦祇有死路一條。蔣Sir南京政府與汪精衛武漢政府最大分歧，在於南京政府控制大錢罌大上海，美圓英磅源源不絕，兼且控制長江下游，對武漢實行金融經濟封鎖，無論有多遠大嘅理想，冇錢都係冇得搞，所以教訓係，如果想搞革命，唔該首先學識籌款。

中國革命第一KOL孫文一直廣受大衆歡迎，亦係佢一直都有籌款嘅能力，乜嘢叫做「做實事」？「有錢返」就係做實事啊！空談理想同主義，滿口仁義道德同理論，但係如果你冇錢賣槍，一樣要收皮。而且大家要相當清楚，所謂革命，本身其實係一個經濟問題，係要改變固有嘅生產模式同埋資源分配方法，徹底改變階級結構，或者進行一次大洗牌，死一堆人，另一堆人翻身，最後嘅目的仍然係經濟問題，人類係一種要食飯屙屎嘅動物，買米需要錢，衣食住行都需要錢，冇錢真係冇得搞。

叫人罷工，工會要負責出糧，或至少要畀車馬費罷工工人；投身革命者，叫「職業革命家」，亦係一種專業，係需要有固定嘅月薪提供。呢個係最基本嘅道理，唔明白呢個道理空談革命，廣東話有一句好合適嘅諺語去形容：

『細路仔玩泥沙』。

7月18號，「七一五分共」宣言發表後3日，孫文遺孀宋慶齡喺《人民論壇》雜誌發表《為抗議違反孫中山的革命原則和政策的聲明》，開宗明旨，斥責汪精衛、蔣介石背叛革命。可以點名指謫兩人，而兩人又唔夠膽駁嘴呢，相信當時中國，祇有國母宋慶齡有依個壇數。

宋慶齡聲明，「對於本黨（國民黨）新政策的執行，我將不再參加。」，佢嚴厲譴責汪精衛蔣介石等人，肆意扭曲孫文嘅三民主義同三大政策，「使革命政黨喪失了革命性，變成雖然扯起革命旗幟，而實際上卻是維護舊社會制度的機關」，真係字字鏗鏘，擲地有聲，尤其是對於南京政府蔣Sir嚟講，革命本來就是為咗推倒舊社會制度同資本家操縱，到頭來蔣Sir為咗錢同自身權勢，同舊社會資本家黑社會同流合污，其實情何以堪呀？宋慶齡亦都指出：「孫中山把三民主義和三大政策交給我們……如果黨內領袖不能貫徹他的政策，他們便不再是孫中山的真實信徒，黨也不再是革命的黨，只不過是這個或那個軍閥的工具而已……變為一部機器，一種壓迫人民的工具，一條利用現在的奴隸制度以自肥的寄生蟲……」

宋慶齡完全冇講錯，對某啲人嚟講，「革命」不再是「目的」；而是一種「工具」同「手段」，正如上次講過「意識形態政權」同「政權嘅意識形態」完全唔同，就係「目的」同「手段」嘅分別，次序調轉，一字之差，差之毫釐，謬之千里。關於意識形態同國家機器使用意識形態嘅問題，再講落去可以講一萬字，就此止住。

【常威近代史】第六部《最九衰的大軍閥時代》Round 1
amazon同步上架👍請大家大力支持💪💪💪

https://www.amazon.com/dp/B08PVMT6P5

【常公子歷史頻道355回：替大軍閥平反系列之 黑色黃金】

⛎太陽底下無新事，係歷史嘅第一真理，事實上所有嘅事情都響度不斷循環，祇不過換咗舞臺、換咗人物、換咗角色。大部份歷史發生嘅軌跡都出奇地相似，我唔可以話讀歷史有用，但從中可以得到一啲對未來發展嘅線索就係真嘅。

♊未來二十年，整個世界將會進入新冷戰狀態，由兩個超級大國角力所主宰，一個係美國，另一個就係中國。二次世界大戰發生之後，世界分裂成為東西兩個巨大陣營，如果世界上冇核武足以引發玉石俱嘅後果，大規模世界大戰一早已經發生鳥。兩大東西陣營中，1991年蘇聯解體，其實係歷史上最奇怪嘅事情之一，從來冇一個咁巨型（包括地域人口武器數量）嘅國家，可以係一個咁低調嘅情況之下無聲（完全）消失（消失之後又完全冇人懷念仲奇），對手（西方世界）所付出嘅成本低到出奇（極有可能係史上最低），可能亦都係因為蘇聯無聲解體嘅故事，令到美國訂下對共產中國嘅博奕策略——終於上帝拿起了自己的石頭砸自己的腳。

♉亦都係因為蘇聯解體，令中共嘅領導階層更加明白防守政權穩定同控制意識形態嘅重要性，西方世界係蘇聯身上得到「進攻方法」，但佢哋並不為意中國亦喺蘇聯身上得到「防守策略」，此消彼長，勝負關鍵，其實某程度上出於美國人自大、目空一切嘅心理狀態，亦係一場典型嘅龜兔賽跑，你以為烏龜永遠追不上白兔，結果白兔喺中途停下來休息養尊處優，被烏龜越過了都毫不所覺，情況大致上係咁樣。

♐最後不得不提，1991年蘇聯解體，其實觸發點係1989年夏天響北京發生嘅天安門事件，冇1989年嘅事，柏林圍牆唔會倒下來，堂堂大國蘇聯亦會苟延殘存多一段頗長時間，我仲記得，1989年上半年，當時嘅蘇聯最高領導人戈爾巴喬夫訪問中國同鄧小平見面，一切仲好好哋，不過一年半載之後差不多，蘇聯這個超巨大國家就不再存在了，真係講到冇人信。十年河東，十年河西，新冷戰時代開始（或者已經開始咗20年），人類能否係上一次冷戰中得到教訓或某些預視？其實係有，最後結果或許唔能夠明確預測，但從歷史觀察中可以肯定嘅係——和解並冇可能（除非有第三者出現，但睇嚟未來半個世紀冇人有資格做第三者），兩者都唔可以以外力（或純粹外交策略戰爭手段）打爆對方，要鬥長命，係睇邊個「自爆」在先......

♑【常威近代史】第六部《最九衰的大軍閥時代Round 1》電子書上架（條download link在下面），請大家課金支持我一直走落去，直至劉少奇骨灰到達北京王光美手上…

✅https://youtu.be/ffaNhBodmCo

【常威近代史】（四百九十六回）
陳獨秀say沙唷啦啦

1927年7月，隨住汪精衛嘅武漢政府分共，全國各地繼續籠罩恐怖清共氣氛，而且全面升級，國民黨嘅反動派同埋其支持者對共產黨員及親共人士進行大屠殺，我再重申一點，係大屠殺，並非純粹迫害坐監流放，而係血腥腥嘅大屠殺。有啲地方，仲回復到原始狀態，不但將共產黨周街打靶，而且仲使用滿清十大酷刑之一——斬刑，將共產黨及親共人士人頭當街斬落嚟掛高示衆，其實係天理不容，強烈歷史開倒車。如果講返，共產黨同國民黨點解咁深仇大恨？其實一切都係有原因。

我再重申毛澤東一句說話：「世界上冇無緣無故嘅愛，亦冇無緣無故嘅恨」；前一句大家可以借鑒所有投資計劃都係要搵你笨；後一句可以借鑒，如果有一個人好X恨你，唔該你首先要檢討一下自己曾經做過啲乜嘢？

中共遭逢如此巨大災難，黨內亦都要有人負責，7月12，中共喺漢口召開臨時中央政治局會議，根據第三國際指示，立刻改組中央政治局。6月，共產國際執委會指出武漢國民政府已經變成咗「反革命力量」，指示中共「糾正機會主義錯誤，喺政治上健全黨嘅領導機構」，根據指示精，7月12號嘅會議成立咗由張國燾、周恩來、李維漢、張太雷、李立三五人組成嘅「臨時中央政治局常務委員會」，呢五個人全部都係年青人，除咗「職業革命家」外，佢哋亦無其他身份，即時停止黨總書記陳獨秀嘅領導職務，最高領導人陳獨秀承擔所有政治責任，宣告下馬落台，從此離開中共嘅領導崗位。

由1921年中共創立以來，陳獨秀一直擔任最高領導人位置直至1927年年中，陳獨秀領導下嘅中共，實踐咗第三國際與孫文「聯俄容共」嘅政策，與國民黨聯手展開北伐，最後打到去上海，蔣Sir背信棄義，反轉豬肚就係屎，出賣盟友，責任並不在陳獨秀身上，有人批評陳獨秀係機會主義者，優柔寡斷，呢一點我唔認同，用結果嚟推敲原因，其實一啲意義都冇（但人類成日咁樣做）。我只係睇到，替中國共產黨奠基嘅兩個最重要人物——陳獨秀同李大釗——一個黯然下臺，一個壯烈犧牲，雙雙退出歷史舞臺，不過無論如何，佢哋對中國共産主義發展嘅重要性，都無法被忽視。佢哋播下嘅種子，始終會開花結果。

7月13號臨時中央政治局常委會發表《對時局宣言》，指責汪精衛「已在公開地預備政變，以反對中國人民極大多數的利益及孫中山先生之根本主義與政策」，中共決定退出武漢政府，在面臨失敗嘅危急關頭，臨時中央政治局常委會制定咗武裝反抗國民黨反動派，舉行「南昌暴動」同「秋收暴動」嘅計畫，並決定立刻召開中央緊急會議，徹底糾正陳獨秀嘅右傾錯誤。

喺度講埋陳獨秀之後嘅故事，1927年離開中共核心後，1929年更因中蘇響東北開戰，對當時中共提出嘅「武裝保衛蘇聯」口號提出批判，被中共開除黨籍。之後，陳獨秀政治思想開始傾向托洛斯基主義，對史太林主義進行批判，並於1931年建立托派組織「中國共產黨左派反對派」，因此同時受到共產黨和國民黨雙重攻擊。

1932年佢被國民黨拘捕入獄，被判13年有期徒刑，囚禁於南京。期間著名物理學家愛因斯坦同著名哲學家羅素都有寫信同佢求情，真正國際人物，1937年8月23日抗日戰爭爆發後被釋放，晚年陳獨秀更脫離托派組織，但仍堅持相信托洛斯基主義（真係真金不怕洪爐火），並開始反思蘇聯極權模式嘅缺陷，進一步批判史太林。晚年佢對外界發表宣言：「我不代表任何人，我已不隸屬於任何黨派。」

陳獨秀既唔like史太林極權主義，亦唔like毛澤東嘅農民主義，周恩來曾多次托人勸說陳獨秀去革命聖地延安，均被一一拒絕。陳獨秀為此對好友說，黨內熟人都已經離去或逝去，現在佢對中共已不熟悉。此後，佢亦拒絕出任國民政府勞動部長，拒絕蔣sir出資畀佢組織「新共黨」，拒絕胡適邀請去美國，拒絕譚平山要佢出面組織第三黨嘅建議。

佢先後住響武漢、重慶。在重慶住院時，周恩來去過醫院探過佢，更資助陳獨秀100銀元醫病，都被陳獨秀拒絕，實際上當時佢僅靠微薄稿費收入支撐，最後更被趕出醫院。生命最後階段，陳獨秀長期隱居響四川江津，以教書為生，儘量保持低調。1942年5月27日21時40分響四川江津鶴山坪石牆院逝世，享年63歲，傳說死因係服用偏方治療高血壓中毒而死。

作爲中國共産主義嘅奠基人，陳獨秀一生人可算係光明磊落，坊間有大量抹黑佢嘅材料，信不信悉隨尊變，反正無人一生完美。作為一個堅實馬克思主義者，或者托派，佢不斷批判自己亦不斷批判四周事物，敢於用今日嘅我打倒昨日嘅我，真正正反合在正反合再正反合……其實係貫徹咗唯物辯證法嘅偉大原則。

1927年8月1號，中國共產黨喺南昌發動大規模嘅武裝起義，打響反對國民黨主流派嘅第一槍，揭開咗「國共內戰」嘅序幕，嚴格嚟講，依場civil war一開打，就打足22年，中間曾經停火一排，搞「第二次國共合作」聯手對付日本人侵略，直打到去1949年（嚴格定義應該係打到現在），先由蔣sir撤退去臺灣，中華人民共和國響北京成立而終結，其實係一場好漫長嘅戰爭，中間死咗幾多人？冇人敢統計過囉……

#常威💀 #蔣介石平反系列 #黃金十年 #民國歷史

✅本土唯一香港土話近代史文本

❤【常威近代史】第一部《大清亡國關慈禧蛋牛治》，全面開放，免費下載， #freedownload！

Free下載連結🔽

https://play.google.com/store/books/details?id=C3hjDwAAQBAJ

【常威近代史】（四百九十七回）
南昌暴動

國共內戰嘅序幕，由江西南昌開始，國民黨同共產黨嘅恩怨情仇，會一直延續落去打落去，今日嚟到你同我嘅身上，仍未停止，足足填滿咗一個世紀。

7月25號，中共臨時中央政治局常委會接納李立三嘅建議，通過咗南昌暴動嘅計畫，預備起義嘅部隊，賀龍（1896-1969）嘅20軍；葉挺（1896-1946）既11軍第10、第24師、第4軍第25師第73、75團；朱德（1886-1976）嘅第3軍教導團，總數約二萬餘人，7月27號，周恩來到達南昌，賀龍同葉挺嘅部隊亦都先後到達，立刻成立「前敵委員會」，周恩來為書記（亦即係最高指揮），譚平山（1886-1956）、李立三（1899-1967）、惲代英（1885-1931）、海豐農民大王彭湃（1896-1929）為委員，任命賀龍為起義軍代總指揮，葉挺為前敵總指揮，劉伯承（1892-1986）為參謀長。

8月1號淩晨兩點，暴動開始，起義軍經過四小時激戰，將南昌城內嘅國民黨守軍一萬餘人全殲，中共佔領咗南昌城，8月1號上午九點，暴動領導人同各省市及海外華僑代表40餘人召集聯席會議，推舉鄧賢達、譚平山、惲代英、周恩來、宋慶齡、葉挺等25人組成「中國國民黨革命委員會」，並且發表「中央委員宣言」，嚴厲斥責「武漢與南京所謂黨部政府，皆已成為新軍閥之工具」。事實上講得又冇錯，背叛革命嘅人始終都係蔣Sir同汪精衛，無論佢哋有乜嘢理由，的確係黃河水洗都唔清。

8月2號，武昌政府下令進攻南昌起義軍，同時南京政府亦調兵前赴南昌圍城，一個月前，仲「寧漢分裂」緊，大家要討伐對方，一個月後，因為出現共同敵人共產黨，南京政府同武漢政府雙方攜手展開共同軍事行動，呢個世界邊有永遠嘅敵人？同永遠嘅朋友？尤其是在政治面前，大家只講求實際利益，「LOVE」同「PROMISE」並唔存在，一定要明白清楚，先可以參與政治活動。當然如果你嘅身份係爛頭卒負責向前線掘地雷或坐監，你最好唔好明白所有，最好心裡祇有和平與愛。

兵臨城下，南昌「前敵委員會」知道冇得打，亦不作無謂犧牲，於是率領部隊撤離南昌城，南下廣東，響南下途中，因為孤軍作戰寡不敵眾，起義大軍宣佈瓦解，餘下嘅部隊，一支由彭湃帶領撤往海陸豐同農軍會合，因此之後成立中國第一個蘇维埃地方政權；另一支由朱德、陳毅（1901-1972）轉入湖南躲避。

大家亦都可以睇到，好多中共嘅大名已經浦頭，例如後來同毛澤東「朱毛」齊名嘅朱德、鄧小平四野最佳拍檔劉伯承、毛主席最信任嘅軍事人物陳毅等等，紅軍（解放軍）嘅骨幹人物開始出現。

8月3號，中共中央祕密發佈《湘鄂贛粵四省秋收暴動大綱》，除咗策劃南昌暴動，亦預備喺湖南、湖北、江西、廣東四省內發動農民工人起義，作垂死掙扎，「以農村包圍城市」嘅戰略概念，亦都開始喺中共黨內萌芽。

8月5號，南京政府通令取消「莫斯科中山大學」，蔣Sir正式同第三國際割蓆，劃清界綫，全程投靠歐美列強（資金），當時蔣Sir嘅大仔蔣經國（1910-1988）仲喺莫斯科學習共產主義，強人政治，認真唔係講笑。正如後來1950年韓戰發生，毛澤東嘅長子毛岸英（1922-1950）亦都死響朝鮮前線，自己親生仔條命都可以唔要，其實為咗達到政治目的，自己條命都可以唔要。玩政治，真係玩得起先好玩，亦唔係普通人可以玩。

8月6號，軍閥北伐大將張發奎（1896-1980）響九江大肆捕殺共產黨人，九江市總工會領導人等70餘人落入其手，收場可想而知。張發奎可謂一生不羈放縱愛自由，1949年打完日本仔國共內戰後居於大英帝國殖民地香港，組成反蔣反共之第三勢力，雖然冇乜作為，但都唔肯收兩家茶禮，堅持立場。1972年雙十節，能夠去臺灣同蔣經國見面，1980年死於香港跑馬地養和醫院，當時嘅人大委員長、張發奎前舊部葉劍英（1897-1986）更向其家屬發出唁電，稱「鄉情舊誼，時所縈懷」；蔣經國更發出「總統特頒褒揚令」表揚佢。兩個字：巴閉。

8月7號中共中央喺漢口再舉行緊急會議，會議由李維漢主持，中共中央委員，中央機關及湘鄂負責人瞿秋白（1899-1935）、張太雷（1898-1927）、鄧中夏（1894-1933）、任弼時（1904-1950）、蘇兆征（1885-1929）、蔡和森（1895-1931）、毛澤東（1893-1976）等22人出席，共產國際亦有派代表出席，會議通過咗《告全黨黨員書》文件，批判咗前領導人陳獨秀喺工會運動、土地革命、武裝鬥爭、國共關係等多方面執行嘅政策錯誤，肯定臨時中央政治局關於實行土地革命同武裝反抗嘅總方針，決定響湖南、湖北、江西、廣東等革命基礎較好嘅省份發動秋收起義。

時任中央委員嘅毛澤東喺會上發言，強調黨領導嘅軍事工作極端重要，批評專做民眾運動嘅人唔注重軍事嘅錯誤，指出「秋收暴動」非軍事化不可，並提議新政治局常委要更加堅強起來注意此問題，「須知政權是由槍桿子取得的」，一語定調。

#常威💀 #蔣介石平反系列 #黃金十年 #民國歷史

✅本土唯一香港土話近代史文本

❤【常威近代史】第一部《大清亡國關慈禧蛋牛治》，全面開放，免費下載， #freedownload！

Free下載連結🔽

https://play.google.com/store/books/details?id=C3hjDwAAQBAJ

【常公子歷史頻道356回：替大軍閥平反系列之 維護領土完整】

⛎今日係年三十晚，恭祝大家團團圓圓，食個團年飯，迎接申丑牛年新一年新挑戰，迎難而上，身體健康，平安快樂，平穩過渡，捱埋2021，2022勢必反彈，大家加油！

♑世局瞬息萬變，拜登亦好快同國家主席習近平通電話，中美關係會有一個全新格局，新格局會影響整個世界政經大趨勢，向好還是向壞？我諗就算當事人都唔可以預料。世界上總有一班人覺得一切都盡在背後玩家掌握中，整個世界背後有一班幕後玩家，響背後操縱所有。但係我活到這個年紀，我完全感覺唔到「有」，反而係感覺好多事情都係亂嚟亂入，大家摸著石頭過河，前面河水有幾深或有冇鱷魚根本冇人知道，真實嘅情況係，兵來將擋，水來土掩，煮到埋嚟先食，有事發生先想辦法解決，病毒出現先開始研究疫苗，日常生活如是，世界政治經濟局面亦如是。

♊香港經歷2019年到2020年一連串事件，我可以正式宣佈，舊嘅遊戲玩法已經全部過去，正如股票市場，新經濟取代舊經濟，買0005匯豐已經outdate，要保值資產，應該買比特幣唔係買實體黃金，死慳死抵，節衣縮食，儲夠首期，買樓上車，然後一開二、二開四、炒幾轉就風生水起嘅時代，其實老實講已經結束咗十幾年，但係仍有好多人盲目相信舊嘅遊戲規則仍然still working，繼續用舊思維處理自己嘅人生，盼望早日上車成為業主，然後一天光曬，當然我唔可以話錯，畢竟世界來到現在，什麼事情都可以發生，就算回尾槍一嘢亦有可能，總之一句到尾，就係無法預視未來。

♈仲記得21世紀初，全世界擁去讀電腦讀IT，結果現在周街IT狗，完全唔值租；再早一個潮流，全世界蜂湧讀工程，乜撚嘢double e，於是今日工程界人才氾濫，薪金長期停滯不前；在推上一個世代，土木工程係生金蛋嘅學科，今時今日，提都冇人敢提起鳥。我想講這些「歷史」故事，衹是想說，當你看到潮流的時候，潮流其實已經過去了；當人類以為可以好好地計畫未來，但係未來根本完全唔喺你掌握之內，現實生活如是，歷史亦如是……

♑【常威近代史】第六部《最九衰的大軍閥時代Round 1》電子書上架（條download link在下面），請大家課金支持我一直走落去，直至劉少奇骨灰到達北京王光美手上…

✅https://youtu.be/c4JITiPS164

【常公子歷史頻道357回：替大軍閥平反系列之 馮國璋歸西】

⛎大年初二，祝大家心想事成，萬事勝意！困境逆難而上，千萬唔可以灰心，輸人唔可以輸陣。

♐疫苗出現，全球感染新冠病毒人數有顯著下降嘅趨勢（姑勿論同疫苗有冇關係），相信去到2021年年中，全面復甦生機會出現，但目前為止，大家仍需要忍耐多一陣，仲有幾個月時間，靜靜雞頂埋佢，未來一定會更好。

♐我嘅近代史寫作計畫，不經不覺已經到咗民國政府嘅黃金十年，依十年可以講係中國近代史上面比較和平嘅日子，如果中日戰爭並無響1937年全面爆發，世界歷史可能因此改寫，不過中日戰爭嘅爆發並非只係中國同日本之間嘅事，當時係牽涉到整個世界，係一場世界性大戰，以納粹德、日本、意大利為核心嘅軸心國，決戰以英美為首嘅自由民主議會式資本主義體系，當然背後亦有世界「共產主義運動」作為催化劑，事實上，係三股意識形態響亂世下嘅終極撕殺，最後極右法西斯陣型敗陣，最後進入「資本主義」同「共產主義」二分世界嘅舊冷戰時代，而國際社會基本格局亦從此定調，直至今時今日，依然有效。

♊而上天一直在眷顧我，最近我去咗位於荔枝角道嘅「我的書房」，響舊書堆中尋覓不少珍貴歷史材料，協助我嘅近代史寫作計畫進程，別人棄之如敝屣嘅舊書，對我嚟講係如珠如寶。如果我要為我自己訂立今年嘅生存目標，我希望今年我會有多啲時間可以睇書，因爲生活艱難，終日要撲水維生，睇書嘅時間越嚟越少，我自己都覺得自己蠢咗同落後咗，我唔希望呢個情況繼續發生落去，大文豪蘇軾有詩《於潛僧綠筠軒 》曰：

😝寧可食無肉，不可居無竹。
😝無肉令人瘦，無竹令人俗。
😝人瘦尚可肥，士俗不可醫。
😝傍人笑此言，似高還似痴。

♉竹，即是書，人瘦尚可肥，士俗不可醫，人一俗，就無藥可救，此刻嘅我，正站在懸崖旁邊，哈哈。

♑【常威近代史】第七部《最九衰的大軍閥時代》Round 2電子書上架（條download link在下面），請大家課金支持我一直走落去，直至劉少奇骨灰到達北京王光美手上…

✅https://youtu.be/1LJ1t9SGA68

🔥【常威近代史】第七部《最九衰的大軍閥時代》Round 2電子書上架，請大家支持！
https://play.google.com/store/books/details?id=lPgaEAAAQBAJ

amazon同步上架👍
https://www.amazon.com/dp/B08WCLGP4Y

【常威近代史】（四百九十八回）
文人瞿秋白

中共生死存亡，響漢口召開緊急會議上，毛澤東初露鋒芒，提出「槍桿子出政權」大路線戰略，打響「國共內戰」序幕。其實都係為勢所逼，無論如何係蔣Sir所代表嘅國民黨右派使用極端暴力在先，對共產黨人趕盡殺絕，中共先至逼虎跳牆，以暴易暴。先撩者賤，打死無怨，大家要清清楚楚是非何在。

會議選舉產生咗新嘅臨時中央政治局，中共中央再一次喺短時間內改組，選出蘇兆征、向忠發、瞿秋白、羅亦農、李維漢、任弼時等九人為政治局委員；鄧中夏、毛澤東、周恩來、張國燾等七人為候補委員。8月9號，臨時中央政治局第一次會議選出瞿秋白、李維漢、蘇兆征為政治局常委，並確定由瞿秋白主持中共中央領導工作，取代下馬嘅陳獨秀。

瞿秋白（1899-1935）同陳獨秀一樣，係一個百分百嘅知識分子文人，出身貴族家庭，年少時候家道中落，承受一連串悲慘命運，講真，感覺唔到生命嘅悲苦，又點可能信奉馬克思主義共產主義？再講多次唔怕沉氣——係存在決定意識，並非意識決定存在，恩格斯、哲古華拉嘅例子係有嘅，但畢竟並唔係太多。瞿秋白響1919年五四運動期間喺北京讀書，一片赤誠積極參與學生運動，成為學生領袖，1920年初參加了李大釗、張崧年發起嘅馬克思主義研究會，投身共產主義運動，情況同湖南青年毛澤東非常相似，亦都同古往今來、包括今日香港所有嘅年青革命者經歷非常相似。

1920年8月，響北京讀俄語嘅瞿秋白被北京《晨報》同上海《時事新報》聘為特約通訊員，前赴莫斯村進行採訪，用瞿秋白嘅講法，係想「為大家開辟一條光明的路」，呢條路當然係嚮左轉。瞿秋白響蘇俄過咗兩年時間（stay咁耐，唔赤化就奇鳥），作了大量考察、採訪和寫作，先後撰寫咗《共產主義人間化》、《蘇維埃俄羅斯經濟問題》等數十篇通訊和《餓鄉紀程》、《赤都心史》等著作，以自己嘅親見親聞，客觀介紹俄國十月革命後蘇俄嘅真實情況。佢響莫斯科期間所寫嘅文章我未睇過，他日有機會一定要睇睇，睇下有冇水分？

瞿秋白以親歷其境嘅文字告訴中國人民，十月革命係「二十世紀歷史事業之第一步」，莫斯科已成為全世界無產階級「心海中的燈塔」，對共產主義進入中國嘅宣傳活動，瞿秋白嘅工作可謂非常重要，隨後產生咗廣泛影響。瞿秋白亦係最早向中國描繪列寧形象嘅人，亦係中國記者中唯一同列寧交談過嘅人。

1922年2月，瞿秋白響莫斯科由同鄉張太雷介紹，正式加入中國共產黨，1922年底，陳獨秀代表中共到莫斯科，瞿秋白擔任佢嘅翻譯。陳獨秀回國時，邀請瞿秋白回國工作。1923年1月，瞿秋白隨同陳獨秀回到北京，掌管中共宣傳工作，之後佢同魯迅一樣，響媒體發表海量嘅文章介紹馬克思主義同共產主義，去到1927年水深火熱期間，成為中國共產黨最高領導人。

撇除佢係共產黨員嘅身份，瞿秋白亦係五四期間一個非常重要嘅作家，文人知識份子嘅宣傳力量，唔可以同今日比較，節錄一首新詩，比大家睇吓瞿秋白嘅戰鬥力，以下一首《赤潮曲》發表於1923年6月《新青年》：