大清亡國關慈禧蛋牛治 2

✅本土唯一香港土話近代史文本

❤【常威近代史】第一部《大清亡國關慈禧蛋牛治》，全面開放，免費下載， #freedownload！

Free下載連結🔽

https://play.google.com/store/books/details?id=C3hjDwAAQBAJ

【常公子歷史頻道331回：替大軍閥平反系列之 新遊戲格局展開】

⛎出片次序出錯，331回常威近代史今日補番上架！敬請大家原諒！

♑第三波都未完，第四波疫情正式爆發，剛剛稍為恢復經濟信心嘅香港社會，又要面對另一次挑戰，情況一啲都唔樂觀，加埋高壓政治氣氛，無可否認全香港人要面對自1997年回歸以來最大嘅變局，安安樂樂嘅日子已經過去，嚟緊要努力做人，自強不息。

♈新型冠狀病毒可怕之處，在於佢一啲都唔恐怖，如果好似伊波拉病毒感，染咗就會七孔流血慘死，相信大家都會非常小心，政府畀出街都冇人會出街，但係呢隻病毒，致命率只有2%，而且集中攻擊老人家，高不成低不就，你可以好驚，又可以完全唔X驚，問題就喺呢度，全面封城停止所有經濟活動，好多人話根本冇咁嘅需要；但係乜都唔做，又會拖住成件事，直情係兩頭唔到岸。而且病毒傳染力極強，俾你唔好彩撞到帶菌者就係避無可避，亦都係依個位，病毒蔓延全世界，引發航空業大停擺，國家與國家之經濟交流活動暫停，世界上冇一處地方係安全，避無可避冇位走，先至係最大鑊。

♐真正可怕嘅敵人唔係明刀明槍嗰啲人，而係暗箭難防嘅小人，彈出彈入逐忽逐忽肉淩遲你好過一刀捅死你，滿足上述條件嘅新型冠狀病毒，無疑就係最可怕嘅敵人，病毒製造咗一場完美風暴，同時反映我出哋所謂嘅堅實社會結構係何等脆弱？根本唔需要世界大戰，亦唔需要核武，一隻致命率2%嘅小小病毒，就足以一鋪清袋。

♒原來一切希望，就在於「疫苗」身上，嗰個炒樓炒股票玩財技唔搞科技，最後又係要科技救命，邊個話科技唔重要？

♑【常威近代史】第五部《霹靂大忠臣對決無敵大買辦》電子書上架（條download link在下面），請大家課金支持我一直走落去，直至劉少奇骨灰到達北京王光美手上…

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上4000訂戶！

✅https://youtu.be/cmY3w2mq89c

✅本土唯一香港土話近代史文本

❤【常威近代史】第一部《大清亡國關慈禧蛋牛治》，全面開放，免費下載， #freedownload！

Free下載連結🔽

https://play.google.com/store/books/details?id=C3hjDwAAQBAJ

【常威近代史】（四百六十三回）
銀紙一係印出嚟 一係搶返嚟

「國民政府」一詞，首先出現於1906年同盟會本部所發佈嘅軍政府宣言，喺宣言裏面，將革命嘅性質界定為「國民革命」，有別於過去嘅所謂「英雄革命」，意思係「建立凡為國民皆平等以有參政權的國民政府」。

中華民國1911年建立，第二次革命之後，孫文一直拒絕承認北京政府係合法嘅中央政府，於是「革命無罪，造反有理」，1917年孫文喺廣州建立「廣州軍政府」，1921年改為「非常政府」，所召開嘅國會叫「非常國會」，1923年改為「海陸軍大元帥府」，孫文死前，從來都未用過「國民政府」呢個稱呼，原因要問孫文，大概孫文認為要完成武力南北統一之後，先可以採用掛？

不過1925年7月1號，當孫文過世之後，國民政府響廣州成立，同時通過《國民政府組織法》，規定國民政府受國民黨全權指導監督，掌管全國政權，黨國合一框架成型，當然國民政府成立之初，連廣東一省都未平定，更加唔使講所謂乜卵嘢全國政權，除咗蘇聯之外，當時全世界仍冇一個國家承認「國民政府」合法性。

不過合法性嘅嘢，係用純粹武力打返嚟，你有武力自然有合法性；相反如果你冇力，你就算有合法性都未能夠行使權力；真正要明白，權力並非來自法制和理念，只係來自純粹暴力，法制同理念，祇不過係掩飾「純粹暴力能夠帶來合法權力」嘅遮醜布，等大家舒服啲，做人好多時候都係咁啫，真相真係唔係咁L重要，最重要係過L到自己，自己個心舒L服就得——至於點樣令民眾嘅心舒L服？就係意識形態嘅問題，意識形態工作要有意識形態專業人士進行策劃，政治上嘅分工如此。

國民政府成立初期，政權由普遍認為係孫中山嘅承繼者大漢奸汪精衛打骰，蔣介石控制黃埔軍校，軍權在握，但廖仲愷被刺後，另一大將胡漢民暫時退出權力核心，形勢更加清楚，汪精衛承繼孫文遺志，貫徹「聯俄容共」政策，喺國民黨左派代表人物，蔣介石當然係右派，但當時1925年佢並冇展現真身，國民黨右派為咗打擊左牌同汪精衛，搞咗個「西山派會議」大龍鳳，抑壓汪先生，同中共喺國民黨內嘅高速發展，內鬥非常激烈。

上次講到，黃埔軍校之內親蔣軍人結社，蔣介石亦明白，軍權在握之後，下一步就係挑戰汪精衛嘅領導權力，蔣介石自從1924年5月3號就任黃埔軍校校長而來，成功創立咗第一支屬於國民黨嘅「黨軍」，即訓練咗自己嘅「嫡系部隊」，當然蘇俄派駐中國嘅全權代表鮑羅廷能夠忍受佢算係失策中嘅失策，不過一日未反轉豬肚，一日未知有屎就係真嘅，又唔通有人估到1925年汪精衛，後來會成為中國歷史上最大嘅漢奸咩？

叉開一筆講講日本，1925年12月15號，日本帝國加藤高明（1860-1926）內閣決定出兵滿洲。其時仍然係提倡憲政、自由民主呼聲高漲嘅「大正時代」最後階段，加藤高明內閣任命幣原喜重郎（1872-1951）為外相，以發揮所謂幣原外交，主張支持中國關稅自主，採取對英美協調，堅持對華不干涉，僅維持日本之合法利益云云。不過雖然表面咁X平等，但「維持日本之合法利益」一句可以放到好大，包括派兵到滿洲。

1925年嘅日本亦都非常大鑊，又係錢嘅問題，一戰之後，百業蕭條，全世界發生空前嘅經濟危機（同今日新型冠狀病毒情況差唔多），日本嘅軍費開支龐大，20年代初期，日本陸軍嘅常備師團總數已經擴展到21個（以一個軍團2-3萬人計算，陸軍總數去到成百萬，當時日本人口祇有6000萬），而且仲進行緊「八八艦隊」嘅海軍擴展計畫，軍費開銷已經超越咗日本呢個小國所能負擔嘅極限，簡單啲講，「八八艦隊」如果建成，單係每年嘅維持費用就係6億日元，而當時整個日本政府財政開支每年祇有15億日元。

其實你衹要睇睇條數，就會明白當時日本必須要對外進行侵略行動補倉，否則錢從何來呢？銀紙一係印出嚟，一係搶返嚟。狂印銀紙會導致貨幣貶值，除非有大批「靚」同你抵消通脹，硬食曬你印出嚟嘅銀紙（債券），美國就係玩呢個遊戲，玩到今時今日爆煲咁滯，不過要補充一點，狂開印刷機印銀紙一定要有強大嘅軍事力量喺背後support，否則印刷機邊個冇呀？20世紀初期仍然行緊金本位（去到70年代先畀美國歷史上最偉大嘅總統尼克遜全盤取消），每張銀紙背後都要有真金白銀去support，並非純粹虛無縹緲信用狀態，因此仲係搶實際啲。

20年代進入昭和時代嘅日本，經濟亦都非常大鑊，有所謂「昭和恐慌」，堂堂大日本帝國亞洲王者，響貧窮地區竟然有人餓死，赤貧者需要賣兒賣女，所以日本亦祇有踏上「裁軍」之路，1925年加藤高明內閣，陸相宇垣一成（1868-1956）進行「宇垣裁軍」政策，大量削減五分一陸軍軍力。

為咗補倉，日本一邊裁軍慳錢，一邊預備侵略滿洲（即中華民國），仲有一樣嘢想提，被裁軍嘅軍人點處理呢點安置呢？好多就去做咗教官，被派去普通嘅學校當軍訓教官，教學生強身健體同軍事知識，與此同時，不斷向中小學生傳播軍國主義，「軍國主義」點解會出現同點解會變成大潮流？情況可能就係咁。

好多時候打仗唔係問題，打仗之後如何安排退役軍人先係問題，呢個問題好多時候都解決唔到，因此亦同時引發其他大量問題，仗，真係唔可以亂打。下次繼續……

#常威💀 #大軍閥平反系列 #大軍閥 #民國歷史

【常威近代史】（四百六十四回）
蔣介石挾軍權入選中常委

1925年終結，日本政府決定出兵滿洲，引發國內一連串反日示威，奉系張作霖壓力極大，日本一直係張作霖背後最大嘅靠山同金主，今次阿爺自己出手做嘢，你即係話唔滿意你張作霖囉，一字咁淺。其實眨吓眼，自1895年甲午戰爭結束後，日本對中國嘅侵略野心已經前後伸延咗30年，一直拖拖拉拉，亦係時候大家攤牌。

12月23號，北京公使團發表「五卅慘案」司法調查報告，其結果是工部局等多名高層辭職，並支付死傷者撫恤金7.7萬元，但係12月29號，北京政府通電上海交涉，不承認五卅案司法解決，退還其撫恤金。

12月30號，段祺瑞頭馬徐樹錚（1880-1925）抵達北京，會唔段祺瑞，諗住再喺首都翻雲覆雨。1924年9月，江浙戰爭爆發，徐任皖系浙滬聯軍總司令。皖系再次失敗，佢響英租界寓所內被支持直系嘅英國人拘捕，並強迫他乘英輪去歐洲。

途經香港時，第二次直奉戰爭結束，段祺瑞被奉系推為臨時執政，徐樹錚獲得自由，被任命為「考察歐美日本各國政治專使」。遂率考察團15人，先後考察法國、英國、瑞士、義大利、德國、蘇聯、波蘭、捷克斯洛伐克、比利時、荷蘭、美國、日本等12個國家，公費旅遊。1925年12月11日，徐樹錚考察結束回到上海，段祺瑞以京津局面混亂電囑其赴京，一心雙劍合璧，12月19日徐動身赴京。於12月29日晚乘專車途經京津間廊坊車站，被馮玉祥部下張之江（1882-1966）挾走，於30日凌晨殺害，時年45歲。事後陸承武通電全國承認殺徐樹錚係為父親陸建章（1862-1918）報仇，陸建章係馮玉祥嘅伯樂，而馮玉祥夫人是當年被徐樹錚殺死陸建章妻子嘅侄女劉德貞。

所謂冤冤相報何時了？又，殺人填命，天經地義？but how to stop？

補充少少資料，今個月，中華郵政總局還清歷年海關欠款白銀184萬兩，曡水！「中華郵政」成立於1912年，作為中華民國國家郵政總局，隸屬於交通部郵政司，1914年3月，「中華郵政」申請加入萬國郵聯，並於1920年10月成為其真正成員，之後處理全國郵政事務。「中華郵政」喺全國建立咗26個由區郵件，運輸工具由馬車逐步改為汽車，從1917年起國城市郵局人員先後使用電單車送信。1915年開始，中華郵政扭轉自清末以來嘅郵政虧損，開始連年有所盈餘，當時郵局職業，更被人視作「金飯碗」，同今日香港做公務員一樣。要知道，當年做中華民國政府公務員未必有糧出架。

時間進入1926年，真真正正風起雲湧之年……

元旦日1月1號，為期20日嘅國民黨第二次全國大會喺廣州召開。首先大會指出國民黨右翼「西山會議派」純屬違法，決定開除謝持（1876-1939）、鄒魯（1885-1954）黨籍，責令蔣介石好兄弟戴季陶（1891-1949）作出反省，並書面警告林森（1868-1943）等人。大會重申反帝反封建嘅革命綱領，以及強調「聯俄」、「容共」、「扶助農民」三大政策，並且抬舉孫中山再上一格上神檯之上，強調「總理所定之（三民）主義及政綱（聯俄容共），實為今日中國之唯一出路」。

共產黨同國民黨左派喺依次大會上佔咗絕對優勢，響各省區250名代表中，共產黨人佔1/3以上，會議選出嘅60名中央執行委員，監察委員同候補執、監委中，中共黨員佔14名，其中譚平山（1886-1956）任執委會常委兼組織部部長、毛澤東任宣傳部代理部長、彭澤民（1877-1956）任海外部。當時嘅中共領導人陳獨秀（1879-1942）亦對國民黨右派作出讓步，以保持權力平衡（當然中共黨內有人覺得佢係作出太多讓步，呢個亦係佢將來失勢嘅前因），國民黨右派戴季陶、胡漢民（1879-1936）、孫科（孫文之子，1891-1973）仍被選為中執委。當中最重要嘅事，就係蔣介石首次被選為中執委常委，而12名中央監察委員中，祇有一名中共黨員。

蔣介石控制軍權，亦因為呢個理由，佢成功進入咗國民黨嘅領導核心，唔再喺中央外圍，佢名正言順成為咗中央執行委員會常務委員，亦由嗰日開始，蔣公不斷擴大自己嘅勢力，為自己他日成為萬人之上，創造咗有利條件！

北方方面，控制京津一帶嘅軍閥馮玉祥，不敵直系同奉系夾攻，1月1號宣佈下野，並打算出國考察（著草）。上個月，張作霖喺日本空軍幫手下，擊敗叛將郭松齡，死裏逃生，於是立刻派兵入關，一來狙擊郭松齡殘部，二來攻打曾經支持郭松齡作反嘅馮玉祥國民軍。1月5號，張作霖更加同直系吳佩孚和解，決定聯合出兵討伐馮玉祥。你睇吓，呢個世界點會有永遠嘅敵人呢？凡事去到太盡，不留任何餘地，並唔係聰明嘅做法。

此時，馮玉祥已經宣佈下野，但其國民革命軍仍然控制住北京，段祺瑞執政府仍然被國民軍控制。張作霖為避免被臨時執政府嘅政令約束，於是響1月11號，發表宣言，宣佈東三省同北京段祺瑞臨時執政府斷絕一切行政關係，放手打壓馮玉祥部隊。

#常威💀 #大軍閥平反系列 #大軍閥 #民國歷史

✅本土唯一香港土話近代史文本

❤【常威近代史】第一部《大清亡國關慈禧蛋牛治》，全面開放，免費下載， #freedownload！

Free下載連結🔽

https://play.google.com/store/books/details?id=C3hjDwAAQBAJ

【常公子歷史頻道334回：替大軍閥平反系列之 吳佩孚】

⛎吳佩孚有兩個，一個喺香港睇風水，另一個係民國關公大軍閥吳佩孚，後者喺中國近代史上舉足輕重，佢絕對有能力成就更偉大嘅事業，可惜時不利兮，最後淪為眾多許冠文式大軍閥嘅其中一個，其實有啲唔抵，不過命運就是如此，最出色嘅人唔能夠成就最偉大嘅功業，反而卑鄙無恥小人則可以流芳百世，上帝總是喜愛玩角色錯配遊戲，歷史上我哋經常可以睇到，實在唔需要覺得奇怪。

♐特首林鄭月娥發表2020年施政報告，當中想做好多事，希望喺政治爭拗減少嘅氣氛下真係能夠做得到，咁對大眾市民都有好處，我唔想再鬧佢，反正多我一個亦唔多，反而要提佢提出對十八歲以下年青人響舊年返修例運動中犯法者「從輕發落」，如果坦白從寬認罪有悔意，則可以唔留案底，老實講算係「德政」，真係畀個機會年青人，點都好，畀條生路行吓。

⛎毫無疑問香港政治已經進入一個全面嘅新格局，你可以話「一國兩制、港人治港、高度自治」已死，全城進入「一國一制」狀態，但畢竟由1997年起，玩到2019年，中間都有廿零年，期限五十年2047總算happy咗一半，叫除笨有精，當係賺咗鳥。活過四十，應該要明白人世間凡事凡物做到一半已經算成功，世界上冇話十全十美，亦冇100%嘅完人同完美境界，否則唔需要開印刷機印銀紙。所以唔應該憂鬱，反正自己唔開心亦冇辦法改變現實，奮勇嚮前共同面對吧！可能有生機呢？

⛎對未發生嘅事情predict得太多，其實並非一種正確嘅人生態度，現實同理想，打個五折已經叫super perfect，吓吓想點就點，自己又唔係李嘉誠個仔，邊有可能事事順心、如愿以償？可能我出身低微，係半個孤兒仔，家境清貧，所以凡事睇得好淡，有得食有得住有飽暖可盡自己責任可以讀自己喜歡嘅書，已經相當足夠，無需要太多，有時候太豐盛，反而未必係一件好事。今日嘅香港人，成日懷緬以前八、九十年代嘅風光日子，就係最佳例證。

⛎我當然明白放下身段好難，放低夢想更難，but，放低夢想遷就現實，其實可以叫「唯物辯証法」。

♑【常威近代史】第五部《霹靂大忠臣對決無敵大買辦》電子書上架（條download link在下面），請大家課金支持我一直走落去，直至劉少奇骨灰到達北京王光美手上…

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上4000訂戶！

✅https://youtu.be/Zgp9C_28YBQ

【常威近代史】（四百六十五回）
陳獨秀上海失蹤？

當張作霖宣佈同段祺瑞北京中央政府一刀兩斷後，北方局勢更加混亂。1926年1月15號，中國共產黨成立軍事委員會，即軍委會，由周恩來擔任第一任書記。同一時間，國民政府軍事委員會亦都分別委任蔣介石為中央軍事政治學校校長、汪精衛為黨代表，廣州國民政府內，右左兩派兩虎相鬥局面形成。

國民黨第二次全國代表大會結束後，發生咗一段小插曲，就係中共最高領導人陳獨秀突然喺上海失蹤，瞿秋白、彭述之、張國燾等中共高層深感不妙，認為陳獨秀已經被敵人秘密處死。

2月中共中央喺北京召開特別會議，其中最重要嘅議題就係關於陳獨秀失蹤問題。但陳獨秀並冇死，一個月後佢重新出現，原來佢話只係大病一場患咗傷寒，住咗入醫院告病假唔辦工。當然事情並不是表面這樣簡單，共產黨係一個嚴密組織，又點會比總書記失蹤呢啲咁荒唐嘅事情發生呢？況且列寧死後，蘇聯進入史太林同托洛斯基嘅權力鬥爭階段，陳獨秀過往亦都多次因路線問題頂撞中央「第三國際」，加上大量年輕幹部加入中共，改朝換代即將來臨，陳獨秀呢位中共「老托派」，亦坐唔到幾耐了。

響2月21號中共中央舉行嘅特別會議中，就係為咗解決黨內目前嘅第一政治責任問題。指1925年11月起，北京馮玉祥國民軍被直、奉兩系軍閥夾擊，大家都知道馮玉祥係蘇聯嘅好朋友，形勢錯綜複雜，加上國民黨內右派抬頭，中共中央總書記陳獨秀又同中央失去聯絡。面對困境，中共為確定黨嘅戰略任務，維持黨嘅工作正常運作，中共中央同團中央以及地方負責人，包括李大釗、張國燾、瞿秋白、陳延年、任弼時、譚平山等12人在北京召開特別會議。

依一次會議確定：「本黨現時最主要的責任，實是在各方面的預備廣州國民革命勢力的往北發展。」當中各方面預備包括，響北伐路經嘅湖南、湖北同河南等省組織農民接應力量；建立一個有力嘅軍委；喺國民黨中發展左派，打擊右派。

亦由2月頭開始，黃埔軍校左右之爭越演越烈，由中共領導嘅「青年軍人聯合會」，同國民黨右派團體「孫民主義學會」之間嘅對立日益加劇，為咗避免軍校分裂，黃埔軍校校長蔣介石召集兩派幹部舉行聯席會議，調解雙方衝突。聯席會議決定，兩會幹部可以互相加入，兩會人員喺軍校同黨軍中，必須服從校長同黨代表嘅領導；團長以上嘅高級長官，除黨代表外，不得加入兩會；兩會學員產生矛盾，應請校長同黨代表調解糾紛。

兩個月後，蔣介石再發佈校令，宣佈黃埔軍校內除國民黨特別黨部外，其餘組織一律自行取消，借力打力，進一步消解中共喺黃埔軍校嘅影響力。

1926年2月，罷工浪潮工人運動仍未停止，2月19號英國大使照會北京外交部，就指出廣州國民政府煽動香港工人罷工，如段祺瑞政府冇能力阻止，英國將以武力干預工運。

七國咁亂，民生仍然繼續，2月15號大型綜合性畫報《良友》喺上海創刊，創辦人為伍聯德（1900-1972），第一期以影星胡蝶（1908-1989）為封面，開創中國娛樂消閒雜誌先河，一出版就大受歡迎。

《良友》係月刋，以大量圖片報導國內國際新聞，內容相當豐富，「有圖有真相、齋噏冇卵用」開始進入中國人嘅世界。創刊號發行7000本，最高峰時候每月銷量達到40000本。1941年太平洋戰爭爆發，《良友》被迫停刊，1945年10月曾續出一期。《良友》一共出版172期同兩個特刊，係民國時代一本非常重要嘅坊間畫報，保留咗大量民間嘅歷史資料同線索。香港銅鑼灣香港中央圖書館資料館有得睇，大家可以去昅昅。

奉系張作霖勢力，繼郭松齡叛變事件後，再有波折，財神爺王永江（1872-1927）計窮力孤，再無力替張作霖斂財，奮然辭去奉天省長兼財政廳長職務，離開多年追隨嘅張作霖，重返金州故鄉終老。

張作霖自1917年5月起用王永江為奉天省財政廳廳長，王永江上任後，整頓捐稅，厘定稅項，喺城鎮廣設捐稅局，淘汰冗員，派得力人員加強各地捐稅，大大增加咗奉先省嘅收入，佢仲重新清丈土地，令田賦大為增加，擴大咗奉天省嘅財政來源。當然佢咁做，就一定天怒民怨，但張作霖全力支持佢，呢個世界嘅嘢，最緊要就係有錢返，冇錢就乜都係假。

有錢的確係大曬，張作霖就係因為有大撚把錢，所以成為東北一股最大嘅軍事力量，王永江就多次勸告張作霖「修文偃武」，求佢全力發展經濟唔好搞軍事擴張，但張作霖卻一直想問鼎中原，屢勸不改，兩次直奉大戰，張作霖差唔多將所有積蓄揮霍殆盡，你估打仗唔使錢咩？於是王永江心灰意冷，決定退休，黯然離去。

凡事去得太盡，就一定冇好結果，張作霖係最佳例子，本來坐擁富裕東北，兼有日本人喺背後支持，如果一心食花生發展經濟，睇住你中原南北內鬥，可以忍到最後先出手，整個天下可能就係你張作霖（或你個仔張學友，又或者係日本帝國嘅）。當然歷史無如果，張作霖如果長期隱伏東北唔逐鹿中原，可能一早已經俾日本人食咗都未定，總之，張作霖自己嘅故事亦都行到尾聲，好快佢亦要撒手塵寰，忍著淚説good bye！Boom！

#常威💀 #大軍閥平反系列 #大軍閥 #民國歷史

【常公子歷史頻道335回：替大軍閥平反系列之 湯化龍之死】

⛎湯化龍係中國第一代和你飛，政治家、法學家，佢係晚清時期立憲派，支持君主立憲步伐，提倡政治體制改革，反對暴力革命，辛亥革命發生，中華民國建立之後，佢亦屢次擔任要職，最後響加拿大被行刺而死，死嘅時候祇有43歲，非常英年早逝。

⛎和你飛湯化龍嘅死，亦標誌著中國政治紛爭進入暴力新時代，所謂談判協商根本唔能夠解決問題，權力分配亦冇可能響政治體制上達到平衡，大家要攞起真刀真槍，殺個你死我活。【一代宗師】話齋，一橫一直，最後企喺度嗰個，先能夠話事。

♋唔好太認真，時勢適合風花雪月先，凡事退一步，海闊天空。最近有返空閑時間，出嚟見吓朋友傾偈，發現經濟真係好差，窮人當然唔使講，就算中產階級有錢人，都似乎被疫情燒到上身，尋日見旺角區吉舖處處，每間吉舖代表過億錢同債，再搞多一年半載，真係會火燒連環船，如果有大型資金鏈斷裂事件，我諗會幾大件事，做好心理準備最緊要。要明白有疫苗進入主動防疫狀態，亦未必可以即刻解決所有問題，由接種疫苗嗰日開始，起碼要等半年時間先知道有冇顯著效果，目前病毒仍處於傳播高峰期，全球感染人數差唔多一定會超過一億（目前正式突破6000萬），距離收科，仲有排，完全回復正常生活狀態，最快2022中，中間只係希望唔好打仗。

⛎最近順應潮流玩國際象棋，發現真係博大精深，8X8=64格嘅天圓地方世界，每隻棋子都會被其它棋子所牽制，好多時候進退不得，lock down原地等死，格局同人生都好相似，邊有話可以隨心所欲想點就點？好多時侯，要突破困局就要犧牲同伴，或者進入死局就要主動投降。從來幸運只屬於一小撮人，只因為社會上太多人炫耀自己的幸運，冇運行嘅人亦唔會出聲自討苦吃，於是乎，大部分人都會覺得幸運係必然之事，結果就出事。

♑【常威近代史】第五部《霹靂大忠臣對決無敵大買辦》電子書上架（條download link在下面），請大家課金支持我一直走落去，直至劉少奇骨灰到達北京王光美手上…

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上4000訂戶！

✅https://youtu.be/ME8D5K2PX0o

【常威近代史】（四百六十六回）
最黑暗嘅一天

有好多嘢醞釀多時，終於要發生，不停死頂都冇辦法，要發生嘅終於會發生，今日香港人會好明白。

1926年3月18號，被譽為民國以來最黑暗嘅一日——情況係咁，3月7號，同蘇聯關係異常密切嘅馮玉祥國民軍為阻止奉軍軍艦進攻，封鎖咗重要戰略港口大沽口。3月12號，支持奉系嘅日本軍艦兩艘闖入大沽口挑釁，並向國民軍炮臺發炮，國民軍被逼反擊，將日艦驅逐出大沽口。

3月16號，日本以中國破壞《辛丑條約》為藉口，聯合英國、美國、法國、意大利、西班牙、比利時、荷蘭等西方列強公使，向北京政府提出最後通牒，要求撤除大沽口嘅封鎖，並停止檢查所有外國商船。

列強嘅橫蠻要求激起中國民眾嘅憤怒，3月18號，響國民黨北京特別市執委會、北京學生總會、北京總工會、廣州外交代表團等50多個團體組織之下，由去派人仕徐謙（1871-1940）、顧孟余（1888-1972）、李大釗、黃昌谷（曾任孫中山私人秘書，1890-1959）等人指揮下，萬幾個群眾聚集於天安門前，舉行「反對八國通牒國民大會」，會上決議：通電全國、全世界民眾反對八國通牒；督促北京政府反對通牒；宣佈不平等條約辛丑條約無效；電勉國民軍為反對帝國主義列強戰。

會後，群眾發動大規模示威遊行，遊行隊伍到達鐵獅子胡同執政府門前請愿，但響執政府門前，被衛兵開槍血腥鎮壓，衛兵用槍掃射示威群眾，頓時血流遍地，秩序大亂，血腥鎮壓造成47人當場死亡，189人受傷！魯迅形容依一日係「民國以來最黑暗嘅一日」。

3月20號，北京內閣對318慘案，聲明引咎，提出總請辭。3月23號，馮玉祥前往莫斯科。

北方政局大地震，南方同樣大地震，3月20號蔣介石一手製造「中山艦事件」，右派大佬身份現形，好多人方知道原來佢先至係右派大Boss！陳炯明被打敗，廣東統一後，蔣介石威望同權勢大增，但國民黨「二大」之後，黨內左派勢力不斷擴張，共產黨喺軍隊中亦有好大影響力，蔣介石要百分百把握軍權，奪取更大權勢，必須清除國民黨左派同中共依兩舊絆腳石，因此製造「中山艦事件」，顯示出其陰謀家嘅本色。

3月18號，黃埔軍校駐省辦事處通知海軍局，稱奉蔣校長命令，調動兵團兩艘軍艦前赴黃埔，聽候差遣，海軍局代理局長共產黨員李之龍（1897-1928）即派「中山艦」同「寶璧艦」前赴黃埔軍港。3月19號，因蘇俄代表團要參觀「中山艦」，李之龍向蔣介石請示可否調回「中山艦」，但蔣介石否認有調過「中山艦」到黃埔嘅命令，並且允許「中山艦」返回廣州。

3月20號淩晨3點，蔣介石卻借口「中山艦」「無故星火達旦」（即係點解深夜仲要開燈？係咪有人喺艦上開會想發動政變？），擺明係「擾亂政府之舉」，大家亦唔需要咁認真看待，是是旦旦搵個藉口發動政變啫，於是蔣介石下令虎門要塞司令CC系陳肇英（1888-1977）、歐陽格（佛學大師歐陽竟無之子，1895-1940）率領軍人佔領「中山艦」及海軍艦隊，即場逮捕海軍局代理局長李之龍等50餘人，又命令廣州市公安局局長吳鐵城（1888-1953）監視汪精衛，及蘇聯代表團同各共產黨機關，並扣押第二師各級共產黨代表！

郁手做嘢了！其實我諗蔣介石都忍咗好耐。

「中山艦」政變事件發生後，國民黨中央政治委員會召開特別會議，決議：繼續同蘇聯合作（唔通有錢唔要？）；汪精衛因病暫時休假，退出政壇；李之龍有嫌疑應即查辦。

情況亦都好簡單，發動政變，右派蔣介石係為咗逼走最大政敵左派汪精衛，獨攬國民黨大權，而且蘇聯還蘇聯，中共還中共，兩樣嘢嚟嘅，並唔可以賴尿牛丸撈埋一齊嚟講，蘇聯第三國際嘅錢同軍備，蔣介石繼續需要，但中共就唔該收皮，即係修改咗孫父嘅路線，「聯俄」Okay，「容共」No way！

1926年3月23號，左派大佬汪精衛離開廣州出國，李之龍雖然之後獲釋，但250名共產黨員被迫退出國民黨。大家要好好記住呢一日，國共兩黨嘅仇恨就係由「中山艦事件」開始，之後延綿至今，差唔多鬥足100年！

3月30號，國民政府公佈《兩廣合作宣言》，兩廣正式統一！

自去年7月，新崛起嘅廣西軍閥李宗仁（1891-1969）、黃紹竑（1895-1966）打敗咗舊桂系陸榮廷（1859-1928）、沈鴻英（1871-1938）等人，並阻止咗唐繼堯（1883-1927）嘅滇軍入桂，廣西政局平定，之後李宗仁同黃紹竑亦曾經調動隊幫助廣東國民政府統一廣東，廣東方面一直希望兩人能夠加入國民革命陣營，1926年1月，國民黨「二大」選舉李宗仁同黃紹竑為候補中央監委、同國民政府委員，1月26號，汪精衛前赴廣西，同二人相談共歸國民革命事宜。李宗仁同黃紹竑亦認為應該順應大勢，歸附國民政府，續派大將白崇禧（1893-1966）前赴廣州，商談統一事宜。

傾咗兩個月，3月14號國民政府公佈《實行兩黨統一之決議案》，3月30號兩廣正式統一！廣東同廣西從此同氣連枝，之後拍住上北伐！

#常威💀 #大軍閥平反系列 #大軍閥 #民國歷史

✅本土唯一香港土話近代史文本

❤【常威近代史】第一部《大清亡國關慈禧蛋牛治》，全面開放，免費下載， #freedownload！

Free下載連結🔽

https://play.google.com/store/books/details?id=C3hjDwAAQBAJ

【常公子歷史頻道336回：替大軍閥平反系列之 一路向西】

⛎今集講民國初年，成班國會議員去天津集體叫雞事件，你可以話，上述事件反映當時政治敗壞，呢個觀點並冇錯。但往往我哋將政客嘅「道德」同「能力」掛鉤，依一點就一定錯。有能力嘅人係咪一定有道德？相信兩者並無實際關係。你相信兩者有關係，祇不過係一啲「約定俗成」嘅思想習慣，如果要搵個比喻——就係你（如果你係一個普通男人）都會覺得一個美麗女人放屁嘅次數會比較少一樣，其實放屁嘅次數同一個人靚定唔靚完全冇關係，前者係腸胃問題，後者係審美問題。引申出如果靚女放個屁，你都覺得香噴噴，就係心理問題……

♉有德行嘅人未必有能力，而且往往因為心中嘅道德感呼喚，而出現「好心做壞事」情況。歷史上唔少嘅獨裁者同禍國殃民嘅人，其實好多都係道德感好強嘅人，希特拉係一個好例子，赤柬嘅波爾布特亦都係另一個例子，佢哋所犯下嘅滔天罪行，我諗無人能及，但係佢哋係唔係一個「好人」？某程度上亦都可以話係，佢哋堅持嘅「道德價值」甚至遠響一般人嘅堅持之上。能力越愈責任愈大；道德感愈大，破壞力亦都可以好大；多讀歷史，你就會明白。

♈政客需唔需要有道德？其實係一個非常之難回答嘅問題，正如「世界是否存在一樣」問題，可以話係冇答案嘅。你喜歡有就有，喜歡冇亦可以冇，反正每個人心裡面道德把量尺都有所不同，世間上嘅爭拗基本上嚟自呢度，彼此心目中嘅道德標準有所分別，造成對世界事物唔同的價值觀判斷，於是彼此產生矛盾同紛爭，永恆地爭拗不休，所以世界上需要一個神——需要一個上帝、需要一個佛祖、需要一個真主或者需要一個最高領袖、Superme being 去作為萬事萬物嘅仲裁同客觀標準。

♎政客可以冇得道德感，但係政客必須要有能力，或者要有基本嘅能力，正如一個唔識揸飛機嘅人冇可能駕駛一架飛機，否則一定會失事撞山。基本邏輯，而所謂能力，其實同道德一樣，亦都冇客觀標準；一個PHD未必可以有能力駕馭政治，因此要評論一個政客是否有能力，只可以由客觀標準——即所謂「結果」去判斷，要睇佢可以做啲乜嘢出嚟？或者將管治嘅地方搞成點？從「結果」去判斷「能力」，大概應該冇錯。


♑【常威近代史】第五部《霹靂大忠臣對決無敵大買辦》電子書上架（條download link在下面），請大家課金支持我一直走落去，直至劉少奇骨灰到達北京王光美手上…

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上4000訂戶！

✅https://youtu.be/EC7HF3QEtSk

【常威近代史】（四百六十七回）
歷史充滿相對性和吊詭性

歷史充滿相對性和吊詭性，有人問究竟有冇完美嘅中立狀態？對唔住，過咗40歲，我可以答你真係冇。敍述歷史事實必須有既定立場，完全中立狀態亦唔存在，正如上街嘅示威者可以被稱呼為暴徒，光輝歲月黑人民權領袖曼德拉成為南非總統之前，係世界上最可怕嘅恐怖分子一樣，對歷史事件、歷史人物嘅詮釋，好多時候亦隨著時代而改變，有時甚至黑白顛倒前後矛盾，亦係正常不過嘅事情。

你身處今年今日此時此地，認為正確嘅事情，可能喺5-10年後，已經變成不正確，更快可能係幾個月內嘅事，政治同經濟局面變化萬千，同時人類的意識形態同想法亦都不斷變化，你撫心自問，十年前嘅自己同今日嘅自己已經係完全兩個人，人況且如此，何況係整個社會甚至整個歷史？

所謂歷史的吊詭，就指我哋用此時此地嘅眼光去睇歷史閱讀歷史，本來就係摻雜咗此時此地嘅自己入去，歷史真相會因為你嘅插入而改變其對你展現嘅內容，假如你不去閱讀，所謂歷史對你嚟講，亦都沒有任何意義。哲學嘅「詮釋學」（Hermeneutics）就係講呢個問題，人類其實完全沒有辦法唔帶住任何立場同偏見去看待事物，若然有呢個世界存在，呢個世界應該就係馬克思口中——嗰個人人再冇異化嘅共產主義大同世界烏托邦。

至於呢個大同世界烏托邦，係永遠唔會出現，至少響由黑猩猩進化而嚟嘅智人（Homo sapiens）手上，係永遠冇辦法建立完成。

20世紀20年代嘅「國共合作」，後來嘅國民黨黨史，認為中共之加入國民黨，係以顛覆滲透為目的，不擇手段破壞分化國民黨嘅團結，利用唯物論同階級鬥爭思想曲解三民主義。上述講法有冇錯？其實係冇嘅。不過中共加入國民黨，其顛覆同埋滲透嘅目的一早已經講到明，你擋到就擋，中共藉助「第一次國共合作」坐大其根基，亦都係堅定不移嘅事實。但祇不過，由孫文生前訂立嘅「聯俄容共」路線，難道國民黨沒有得到任何好處？如果冇來自蘇聯第三國際源源不絕供應嘅金盧布同武器裝備？國民政府同蔣介石黨軍武力如何建立起來呢？收得老細錢，就要付出代價，老細要擺件黃馬褂入公司睇數，難道你有權拒絕嗎？唔出糧唔撈吖苯！

因此好多歷史故事，都係有理說不清，要睇吓你用乜嘢觀點與角度？企喺乜嘢立場同時間去睇？唔同嘅立場同唔同嘅時代，可能睇到完全唔同嘅嘢出嚟。

上次講到兩廣統一，新桂系三大風雲人物李宗仁、黃紹竑、白崇禧登上歷史大舞臺，蔣介石羽翼豐盛，借自編自導「中山艦事件」向中共出手下重藥，防止其繼續坐大滲透。踏入4月，3號，蔣介石通電反對「西山會議派」響上海召開「第二次全國代表大會」，「二大」只有一次（已經開咗），中央亦祇有一個（位於廣州），一山之二虎之一汪精衛離開廣州之後，揸Fit人亦只有蔣介石一個，ok？understand？

今年1月1號，國民軍總司令馮玉祥響直、奉兩系武力威逼之下，通電下野，早前已經前赴莫斯科見史太林。直系同奉系結成聯盟，張作霖同吳佩孚由死敵再成為盟友。

1月下旬，奉軍南攻熱河，直軍北取河南，對國民軍兩面夾擊，2月中，花生大王政壇不倒翁山西閻錫山（1883-1960）嘅晉軍亦都加入對國民軍嘅圍攻，國民軍節節後退。3月，直奉晉魯四大軍團逼近首都北京。

國民軍為擺脱困境，努力同吳佩孚修好關係，皖系領袖段祺瑞認為如果再俾直系吳佩孚得勢，對自己會非常不利，因此暗通奉系張作霖，你睇，個關係混亂到？敵人中有朋友，朋友中都有敵人，隨時可以互相出賣，立場更加可以左搖右擺，政治一天都嫌長。當時國民軍領袖馮玉祥手下五虎將之一鹿鍾麟（1884-1966）決定搶先下手，響北京發動政變，當時中華民國總理段祺瑞逃入東交民巷尋求政治庇護。

鹿鍾麟隨即釋放咗被軟禁緊嘅前大總統直系曹錕，大家仲記唔記得呢個肥佬？眨吓眼已經被軟禁咗成年，1月10號，鹿鍾麟通電表示歡迎關公吳佩孚進京，並稱國民軍「惟吳玉帥馬首是瞻」，本來如果吳佩孚率先入京，同曹錕重建直系領導，整個中國近代史可能從此改變，不過吳佩孚佢開出條件，要所有國民軍全部繳械投降，交支槍出嚟？即係交個頭出嚟，冇得傾，雙方修好無望。

3月14號，吳佩孚始終冇出賣到盟友張作霖，直系聯軍兵臨北京城下，3月15號，國民軍見冇得打，君子不立危牆之下，全部退出北京，扼守南口，3月20號，段祺瑞喺天津通電全國，決定引退。大軍閥段祺瑞嘅故事亦都告一段落，我畀八個字評語：『雖無過犯，面目可憎』。

3月22號，直奉晉魯聯軍入北京城，直奉二系共同軍管，因為唔同嘅軍隊使用唔同嘅貨幣，例如奉軍就用奉票，情況一片混亂，市場停市。同時廣州國民政府發表對外宣言，主將重新召開國民會議，解決國內分裂問題，請各國暫時不要承認立立亂嘅北京政府。

亂？未夠，其時盜賊羽毛，幾個省都有所謂「紅槍會」出現，其實乜會物會咪全都係黑社會，咪全部都係「匪」，全部都係為咗錢（為咗生存）打家劫舍，政權維特治安出動軍隊鎮壓剿匪，目的亦都係唔想啲「匪」最後成功奪權，成為政權……

#常威💀 #大軍閥平反系列 #大軍閥 #民國歷史

不過仍然係「先安內，後攘外」，5月15號國民黨響廣州召開二屆二中全會，會議通過咗由蔣介石提出嘅五個「整理黨務方案」，不外乎係進一步壓抑共產黨，決議案規定：加入國民黨嘅共產黨員，喺國民黨中央黨部、省黨部、特別市黨部中擔任執行委員嘅名額不得超過該黨部委員總數嘅三分一；其次共產黨員不得擔任國民黨中央機構嘅部長；第三，共產黨需將加入國民黨嘅共產黨員名冊，交畀國民黨中央保存；第四，共產國際對中共嘅指示，同中共對參加國民黨嘅共產黨員嘅指示，必需交由國共兩黨聯席會議討論通過；第五，國民黨員未受准許脫黨之前，不得加入任何其他黨籍。

一句到尾，一個個麥浚龍金剛圈飛落嚟，誓要箍死你共產黨，壓你響五指山下。對蔣介石嘅「文攻」，當時共產黨內陳獨秀、彭述之、張國燾等人採取妥協忍讓態度，認為呢啲係國民黨內部問題，他黨無權過問。議案通過之後，譚平山、毛澤東、林伯渠被迫辭職，組織部部長由蔣介石接替，由CC系親信陳果夫（1892-1951）代辦；代理宣傳部部長由顧孟餘（1888-1972）接替；農民部部長由甘乃光（1897-1956）接替；中央書記處書記由葉楚傖（1887-1946）接替，共產黨勢力被逐出國民黨中央。

你唔畀我喺建制內玩，我就開始同你打遊擊。二大二中全會召開之前，5月3號，廣州第六屆農民運動講習所喺廣州番禺學宮開學，毛澤東擔任所長，繼續教導農民搞革命。之前已經講過，「農講所」主要教授革命理論同革命方法，尤其是農民運動嘅理論同方法，此外亦進行軍事訓練，學員會前赴海豐跟農民大王彭湃實習，身體力行組織農民問題研究會，指導調查同探討農民運動嘅實際問題，10月5號，來自全國二十個省區327名學員畢業，佢哋返回各省領導農民運動，真正開枝散葉，遍地開花，教育最重要，所以任何學校都係最重要嘅「國家機器」。

與此同時，5月9號，廣州國民政府主席汪精衛以養病為名，秘密乘船前赴法國，「中山艦事件」發生後，左派汪兆銘一直被蔣監視打壓，隨後，國民黨中央政治委員會決定命令同「中山艦事件」有關嘅俄國軍事顧問季山嘉（尼古拉·古比雪夫，1893-1938）等離粵回國，要汪精衛以養病為名暫時休假，汪對此非常不滿，致函中央監察委員張靜江（1877-1950），表示不在負任何政治責任。

同樣，離開幾個月後重返廣州嘅胡漢文亦被蔣介石冷落，於同日與汪精衛同船離開中國，5月22號，蔣介石喺廣州教請汪精衛、胡漢文回廣東主持黨政事務，成語叫「貓哭老鼠」。

#常威💀 #大軍閥平反系列 #大軍閥 #民國歷史

【常公子歷史頻道337回：替大軍閥平反系列之 有奶便是娘】

⛎似乎由一開始，中國人就唔重視商業活動，當然係同儒家哲學有關，視富貴如浮雲，一直係儒家哲學道德文化嘅基本因素之一，君子講求德行，要忠君愛國、濟世為懷、鞠躬盡瘁、死而後已。西方人雖然亦都有「苦行僧」嘅概念，但係佢哋自「雙元革命」（即係工業革命同法國大革命）之後，亦都將「宗教生活」同「社會生活」分得好清楚。反而儒家哲學一直響中國人嘅世界唔單止被視為一種「宗教」，而係一種日常社會嘅普遍生活原則，亦都係依個原因，先產生18-19世紀中國響商業活竊方面大大於落後西方。

♏你細心觀察一下，雖然現代世界儒家哲學差不多已經被人完全遺忘，但係「鄙視商業活動」嘅基因仍然留喺我哋嘅血液裡面，我哋好容易仇富，但係我哋每個人都好想致富，兩者其實相當矛盾，「仇富」係「眼紅人哋」，係妒忌心作祟，當角色可以互調，相信亦冇人介意成為富人吧？

⛎其實從事商業活動，並冇唔妥，「君子愛財，取之有道」，賺錢賺得合情合理，冇傷天害理，請問違反做乜嘢道德律呢？要講道德，其應用層實可以好深入亦都可以好廣泛，人欲無限，道德律本身就係一種束縛同界眼人欲嘅工具，其作用係防止人欲無限氾濫引申大災難（例如戰爭），保持社會穩定和諧，畢竟每一個人都想生存係一個平穩和平嘅社會之中安居樂業。

♉所以「有奶便是娘」，其實冇話錯得曬，只要唔做傷天害理嘅事，邊個出糧俾你，你就要同佢做事服務佢，天經地義，尤其是當你相信資本主義生活原則，你係唔應該反對。至於剝削問題，係另一個層次嘅事情，留待社會主義者解決。凡事都係雙面刃，有其好處必有其壞處，有受益者亦有受害者，要每一個人成為儒家哲學中嘅謙謙君子其實冇可能，理想道德人格只係一種學習上嘅典範例子，不過，無論做乜嘢，基本嘅道德底線仍然係需要有，至於條底線set喺邊？係個人嘅修養問題，好難一概而論。

♑【常威近代史】第五部《霹靂大忠臣對決無敵大買辦》電子書上架（條download link在下面），請大家課金支持我一直走落去，直至劉少奇骨灰到達北京王光美手上…

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上4000訂戶！

✅https://youtu.be/s6ppPh5uytg

【常威近代史】（四百六十九回）
蔣Sir之初級評價 評極都未完

終於寫到北伐戰爭，呢場由國民黨蔣介石領導下，戰勝多個中原北洋軍閥嘅重要戰爭，徹底改寫中華民國嘅面貌，最低限度改變咗支國旗，由五色旗變咗青天白日旗，亦都徹底將所謂北洋軍閥年代推入墳墓，雖然北伐戰爭之後，仲有軍閥存在，但係一般人對近代史嘅理解之中，所謂許冠文式大軍閥的確隨住北伐壽終正寢。

由孫文「聯俄容共」政策東山再起開始，國民黨得到由蘇聯源源不絕而來嘅資助，除咗錢同武器，仲有大量軍事顧問同教官，更重要嘅係，國民黨體制得到根本性改革，變成一個列寧式高度組織化嘅軍事政黨，少談理論，多做實事（軍事），明白要贏，靠把口冇用，最重要係打低敵人。

打咀炮邊個唔識？你又屌我又屌，冇作用嘅，實牙實齒打番場交先係最重要，唔接觸對方身體？使用語言暴力就可以攻擊敵人，對敵人產生心理傷害，係21世紀之後嘅新時代事物。20世紀初期無心理呢個問題，祇有物理問題（肚飽肚餓）。口講無憑，打柒你最實際，靠把口，邊個唔係天下無敵？你敢明槍明刀上戰場埋牙打一舗，就知道邊個最後冇著底褲，露出個春囊揈吓揈吓？

遙想當年慈禧太后同明治天皇玩軍事競賽，大家一齊起步搞海軍，船艦都係購自歐美名牌、噸位相差無幾，未發生甲午戰爭黃海海戰之前，難道明治天皇就知道大清嘅北洋艦隊係紙紥嘅？當然唔係囉，打過就知，大清帝國亦係因為一場甲午戰爭而斷送江山，而日本帝國更加唔使講，一場甲午戰爭打到風生水起，脫亞入歐。

所以蔣介石敢完成國父孫文遺志，發動北伐戰爭，手中一定有揸拿，1926年6月5號，國民黨中央通過出師北伐案（其實北伐案通過咗好多次，不過每一次都未能成事，祇有今次係真），之前國民政府已經派葉挺（1896-1946）第四軍獨立軍團同鍾祖培（1890-1951）嘅第七軍第八旅，分別由廣東同廣西進軍湖南，援助佛系大師唐生智（1889-1970），展開轟轟烈烈嘅北伐戰爭序幕。

未講戰爭前，先talk talk蔣介石。

蔣Sir出左場都好耐，而且個個都知道蔣Sir將會係未來嘅主角，靚仔就不在話下（否則年輕貌美嘅宋美玲小姐亦唔會鍾情於佢），頭髮嘅問題無損佢嘅俊朗，但世人對蔣Sir嘅評價亦都非常兩極，有人覺得佢係十惡不赦，係歷史罪人；但係喜歡佢嘅人就會覺得佢偉大到可以超越耶穌基督，直情可以放入廟度供奉（傳說臺灣真係有？），而且喺佢漫長嘅歷史生涯之中評價變化亦好大，究竟佢係一個完美嘅民族領袖？或只係一個封建弄權嘅大軍閥？又或者係基督徒？民主自由嘅捍衛者？老式儒家殘忍極權統治嘅大獨裁者？多重身份，撲朔迷離。

但係不論敵友，你都無法否定蔣Sir嘅重要性，同埋蔣Sir的確係一個非凡人物，中國近代史上，唯一可以同佢相提並論嘅人，亦祇有毛澤東一個，鄧小平拍埋去，仲爭半個馬位。

由蔣Sir嚟承繼孫逸仙嘅衣缽，響1925年，孫文逝世時相信冇人可以預見，雖然蔣Sir係孫文嘅親密戰友，但係論資歷，國民黨嘅實際領導權似乎要留畀汪精衛、胡漢文或廖仲愷三個福祿壽之一，因為佢哋三個都比蔣Sir有豐富得多嘅革命經驗，而且表面上同孫文嘅關係亦都更加親密。但係蔣Sir對於政敵有一個絕大優勢，就係佢係一個百分百嘅軍人，喺1926年之前，甚至有人評價蔣Sir係一個唔會涉足政治嘅純粹軍人，但係去到20世紀20年代，軍隊已經成為當時最主要嘅政治工具，蔣Sir嘅起步點，係贏在起跑線。

1923年佢受孫文指派，成為黃埔軍校校長，響1924年到1926年間，就有超過5000名學生喺黃埔軍校畢業，佢哋好多後嚟都成為咗蔣Sir嘅人，而且呢啲年青軍官畢業後，好多取得黨軍嘅實際指揮權，而國民黨黨軍喺蘇聯軍事顧問嘅改良指導下，比一般軍閥部隊更加訓練有素，而且裝備更加精良。依支黨軍成為蔣Sir手中嘅有力工具，令佢喺以後嘅政治生涯中無往而不利。所謂北伐，亦唔係國民黨中央講吓就可以，冇蔣Sir say yes配合，國民黨實際上亦無力對華北進行北伐。

蔣Sir完全當權揸Fit，某程度上亦都係運氣使然，如果廖仲愷冇被行刺，牽連到疑兇胡漢民著草，蔣Sir亦冇可能將眼前阻擋佢權力嘅三座大山移開兩座，三減二得一，得返個汪精衛，之前嘅敘述大家已經睇得到蔣Sir點Checkmate汪先生！其實過程相當精彩！

有一點比較少人講，蔣Sir除咗控制軍權，另一方面佢亦都有優越嘅財政基礎，至於錢從何來？就真係好難搵到史料support，中國近代史嘅描述，好多時候將錢同經濟問題放響一邊，存而不論。其實通通錯曬，錢先係最重要，政治同經濟永遠互相掛鉤，冇錢冇可能打仗，打仗最大嘅理由通常亦係錢。好多人都認為意識形態同理念會放喺金錢同經濟問題之前？其實全部都係誤導同被催眠。

唔知大家識過有錢人未呢？我有一個好貼身嘅經驗，就係我認識嘅有錢人之中，我好少知道佢哋錢從何來？能夠賺錢嘅方法，唔通真係咁容易話你知咩？所以如果你到咗今時今日，會認為有陌生人會將賺錢嘅秘密講你知令你發達，我諗……你都幾X天真……幾X傻。

#常威💀 #大軍閥平反系列 #大軍閥 #民國歷史

✅本土唯一香港土話近代史文本

❤【常威近代史】第一部《大清亡國關慈禧蛋牛治》，全面開放，免費下載， #freedownload！

Free下載連結🔽

https://play.google.com/store/books/details?id=C3hjDwAAQBAJ

【常威近代史】（四百七十回）
強人政治登上世界舞臺

長江後浪推前浪，一代新人葬舊人。由1926年開始，整個中國近代史進入蔣Sir主宰嘅大時代。蔣Sir亦都好快成為1911年辛亥革命以來，首位影響力超越袁世凱嘅時代巨人。究竟係英雄造時勢？抑或時勢造英雄？不過有一點可以肯定，凡要成就大業者，首先要不擇手段，不可以有婦人之仁。

所謂和你飛飛文人政治，響美國未向廣島同長崎投落原子彈之前，通通純屬幻想同廢話，20世紀20年代，世界上最先進、文化水平最高嘅民族日耳曼民族就嘗試過行文人政治，所謂自由民主「威瑪共和國」，最後係失敗收場，而且更造就咗一個驚世大魔頭希特拉。1926年，三十幾歲嘅希特拉已經坐完政治監同埋寫咗自傳《我的奮鬥》，響德國社會大力宣傳緊佢嗰套極右日耳曼人大撚曬民族理論同猶太人顛覆世界陰毛論，並開始廣受歡迎，納粹黨嘅信徒不斷增加中。

所謂強人政治，亦開始響全世界廣泛誕生同被民眾廣泛認同，除咗德國納粹希特拉，蘇聯嘅史太林亦都拾級而上緊，當去除最大政敵托洛斯基之後，史太林亦會成為世界上權力最大最集中嘅獨裁者。自由民主和你飛飛，你傾我又傾，你講我又講，鳩噏當秘笈，其實永遠無辦法得出一個結論，不停拖拉爭拗，社會民生無法嚮前（你睇腥港過去十幾廿年就一目了然），咁不如大家唔X好傾，由一個人或一小撮人話曬事，講咗就算，統一意識形態咁樣大家就好辦事，一心一意嚮前衝，其實類似嘅想法就係資本主義——老細出糧畀你，唔該你準時返工做嘢唔好多嗲，公司賺錢你有花紅出，公司執笠唔該你執包袱；反而民主自由，眾多聲音同意見先係共產主義思維——成個世界其實好多事情都係回力標，難怪德國哲學家尼采話，世間萬事萬物純屬：永劫回歸。

永劫回歸？我以前真係唔知點解？現在總算有小小覺悟，得道在黃昏，天資所限。

1926年6月1號，國民黨中央常務委員會選舉蔣Sir為組織部部長，蔣Sir權力進一步集中，6月2號，佛系大師唐生智喺衡陽就任國民革命第八軍軍長，北伐前敵總指揮，北伐戰爭正式開打。

6月1號《上海時報》開始採用套色印刷，中國報界進入套色印刷先河，唔再得黑白兩種顏色，可加多2至3種色。報紙係當時最大嘅意識形態武器，得輿論者得天下，其實到今日都冇變過，祇不過今時今日嘅人並唔係睇報紙而係睇電話啫。