大清亡國關慈禧蛋牛治 2

咩公關部？

【常威近代史】（三百一十回）
大軍閥平反系列

經過一場區議會選舉泛民大勝，社會恢復平靜。由此可以發現，大份香港人所追求嘅，其實係社會內部嘅「政治改革」，並非「革命活動」，再三強調，革命係一個階級推翻另一個階級嘅暴力過程，係完全否定現行政權合法性同所有現存政治制度，大部份香港人顯然唔係咁諗，事實放喺眼前，毛主席話要「實事求是」，所以亦都係時候要搬走「革命」兩個字，議題再集中返「五大訴求」同「雙普選」之上。我一直強調，「革命」距離香港人好遠，亦係這個意思。

另一點想提出，社會動盪好難延續超過半年時間，同上一次「六七暴動」一樣，六七暴動由1967年5月頭新蒲崗膠花廠工人勞資糾紛開始，到11月尾港英政府響旺角勞工子弟學校拘捕108個師生結束。今次嘅社會動盪都係過咗半年，然後回復平靜，大部份市民對動盪不安嘅忍耐極限大約只有「半年」，呢個係人類嘅心理問題。

我記得十年前我養母突然過身，當時我情緒非常低落，成日流眼淚手震失眠，於是我去搵醫生，醫生嘅答覆係，如果我嘅不安情緒延續超過半年以上，我就需要訴諸精神科藥物平伏情緒，以上經歷，大概可以作為一種註腳。

革命KOL孫文1917年喺廣州搞嘅就係一場真正嘅革命活動，因為大前提係，孫文完全拒絕承認當時北京中華民國段祺瑞中央政府嘅合法性，決定另起爐灶，另立中央，建立「中華民國軍政府」，利用軍事手段對抗北京中央政府。

1917年9月1號，響廣州國會非常會議嘅不記名投票選舉中，孫文以84票當選為中華民國軍政府大元帥，沉寂多時嘅革命KOL，終於重拾最高話語權，再一次以革命領導者嘅身份，發動佢嘅「護法運動」「三次革命」路線。

9月8號，廣州督軍桂系陳炳焜（1868-1927）宣佈不支持廣州軍政府成立，但亦不加干涉，採取中立狀態，其實唔打，就即係加入孫民陣營囉，不過隻老鼠入咗米缸，陳炳焜亦好快冇訂企...

9月10號，廣州局勢平定，孫文發表佢嘅大元帥就職宣言，宣佈正式成立中華民國軍政府，痛斥北京政府拒絕恢復《臨時約法》同召開國會，表示要盡大元帥之職，發動戰爭勘定內亂。廣州軍政府選出唐昭儀、伍廷芳、孫洪伊（1827-1936）、張開儒（1869-1935）、程璧光、胡漢民等人擔任各部部長，呢啲人大家都熟口熟面，唔再多介紹。

而且孫文仲任命黐線佬章太炎做軍政府秘書長、李烈鈞做總參謀長、吳景濂（1873-1944）為大元帥府高級顧問、廣東王陳炯明（1878-1933）做軍政府第一軍總司令。廣州軍政府成立之後，護法運動正式開始，南北之爭又嚟一次。

而係軍政府中，亦有一個人平步青雲，權力開始逐步上昇，成為軍政府大元帥孫文身邊嘅得力助手，佢就係繼承黑社會大佬陳其美留低所有政治遺產嘅蔣介石，1917年9月20號，蔣介石就向孫文提交《對北軍作戰計劃》，似乎獨獨割據南方廣州，以長江劃界，同北京平分天下並非中華民國軍政府嘅最終政治目的，發動北伐，打返上北京，先係最後目標。孫文當時未必係咁諗，因為有好多歷史痕跡都講咗畀我知，大軍閥孫文同其他好多軍閥一樣，喺一個地方主義者，佔領廣州控制廣東，佢其實覺得OK and Fine。不過我差唔多好肯定，佢身邊嘅蔣介石並唔係咁諗，蔣介石嘅氣魄同野心，其實大過孫文好多。

之不過當時南方嘅軍事勢力，就算可以集中統一，要打贏北方嘅龐大北洋系統，其實完全冇可能。「北伐」美夢，要到好多年後、發生咗好多事之後先能夠實現，起碼要等到列寧成立世界上第一個共產主義政權先講啦。

要補充返一點，引發黎元洪段祺瑞「院府之爭」攤牌嘅「對德國宣戰問題」，廣州軍政府似乎同中央政府採取統一口徑，9月22號，廣州國會非常會議議決對德宣戰案，26號對德國同奧匈帝國宣戰。不過軍政府咁樣做都無可厚非，畢竟軍政府要生存落去，就唔可以得罪「協約國」成員，特別係日本同英國。時間亦去到1917年年尾，1918年第一次世界大戰就會結束，而德國果然係戰敗國。當時中國兩個政府都算落啱注，我亦都唔夠膽想像如果一戰嘅戰勝國係德國，中國會發生乜嘢事？讀過歷史嘅朋友都明白，去到1917年年底，其實仲冇人知道第一次世界大戰嘅勝利者屬於邊邊？所以，後來德皇威廉二世突然宣佈德國投降，德國國內嘅人民其實冇辦法相信同接受。

9月29號，北京政府下令通緝孫文，不過你有你通緝，我有我做大元帥，革命就係這個意思。政治混亂，天災亦都從未停止過，9月全中國十多個省份都有水災，災民達到430萬，不過天災人禍，已經係常態，亦係普羅市民日常生活嘅一部份，完全避無可避。

今集最後要補充1917年9月，中國出現咗一個明星，佢喺美國完成博士學位返嚟（真的，因為當時大部分人的學位都是假的），年僅26歲，聰明靚仔，又由我哋嘅共產主義之父北大文學院院長陳獨秀鼎力推薦，北大校長蔡元培破格聘用，佢叫胡適（1891-1962），當時佢喺北京大學教授外國文學、英語修辭學同中國古代哲學三科，胡適響美國嘅博士論文題目係《中國古代哲學方法之進化史》，胡適亦都係第一個利用西方哲學學理解讀中國哲學嘅人，最後得出嘅結論係「中國哲學冇撚用」，中國文化應該全盤西化，胡適嘅出現，亦成為好快會發生「五四運動」嘅新文化運動嘅主將。

#常威 #大軍閥平反系列  #大軍閥 #民國歷史

【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ

耿春瑩同華爽，叫春叫得爽

【常威近代史】（三百一十一回）

大軍閥平反系列

聰明靚仔嘅胡適，係安徽人，茶葉富商之後，1910年留學美國常春藤聯盟康乃爾大學（Cornell University）選讀農務系，1915年進入多倫比亞大學哲學系，跟隨實用主義哲學大師杜威（John Dewey , 1859-1952）寫博士論文。

所謂實用主義（Pragmatism），根據《劍橋哲學詞典》的定義，「這種哲學強調理論與實踐的關係，並把透過有方向行動的結果，而顯露出來的經驗同自然的連續性，看作反省的起點」，「因此，知識乃是被利益與價值所引導，既然客體的實在不能先於經驗而被了解，那麼，唯有將真理之宣稱視為在實驗上決定的條件之滿足，亦即視為探究之結果，才能加以證成」（註）（唔知講乜？大家千祈唔好讀哲學）。

簡單啲講，實用主義係「工具性」，佢哋只係認同後天（形而下）嘅經驗，而不認同先天（形而上）嘅存在，所有嘅「真理」同埋「價值」，只因為佢哋能夠喺某程度上令人滿意地解決「實際問題」而存在，「真理」只係喺經驗過程中被確信嘅信念，係會出錯，係可以進一步被修正同竄改（同基本法一樣）。實用主義係一種唯物主義，唔相信價值同埋真理係先天性嘅存在，同共產主義馬克思主義一樣，一切皆從現實物質條件而決定。

而我個人認為，「實用主義」比「馬克思主義」更冷酷無情，因為馬克思主義基本上係出於「人文關懷」而出現，係希望解決無產階級貧苦大眾嘅苦難而誕生，以實用主義本身則認為，如果可以解決問題，「行惡」都可以成立。其實現代世界，就係一個以「實用主義」運行嘅世界，大家為咗解決唔同嘅問題，可以唔分黑白善惡，所謂道德同人文價值，甚至可以柄埋一邊，或者只係純粹用作意識形態宣傳物同 惡行嘅掩飾品。而杜威作為美國實用主義大師，隨著美國嘅國勢喺二次世界大戰之後統治全世界，實用主義亦都響全世界橫行無忌。

於是乎，當社會出現問題或動盪，實用主義者就可以名正言順不擇手段去解決當下問題，例如鼓吹警察使用暴力，濫暴濫捕濫起訴、可稱之為「以暴止亂」，放一萬枚催淚彈，打議員打傳媒打學生打女人行緊急法蒙面法停駛地鐵……通通只不過係為咗解決問題，為咗想社會平靜落嚟，所有行惡手段，只不過係為咗達到目的而存在，於是乎，其實係冇錯嘅。又或者，用實用主義者嘅邏輯，香港人追求民主自由平等公義等概念性事物，其實都係虛無嘅，只不過係中咗美國人計，被美國人挑撥離間，最後用作於中美之間貿易談判賭枱上嘅談判籌碼。（利申：實用主義係美國人發明嘅）

由於是乎，因為印銀紙，即量化寬鬆，可以解決眼前嘅金融問題，所以銀紙可以繼續狂印。問題暫時解決咗先算，至於之後嘅大洪水，係之後世界嘅事情。再退一萬步，不斷發展工業同製造消費品，可以將資本主義經濟不斷嚮前推進，至於造成地球資源枯竭或製造出巨大嘅環保污染問題，並唔係當下要解決嘅問題，對於之後發生嘅嘢，之後再解決。「活在當下」係實用主義者堅定不移信奉嘅邏輯。

實用主義同中國嘅儒家哲學比較，更加係完全背道而馳，儒家哲學相信天道人性，認為天有其道，萬物有其位，人性本善，強調個人道德修養。放響實用主義者嘅立場，完全係Bull Shit！人為何要為善？個人道德修養可以當飯食嗎？其實係多撚餘！如果人人都係禽獸，男盜女娼，但個社會又可以不斷向前行，經濟繼續高速發展，咁人係應該成為禽獸，並冇錯，如果社會因為人民行惡而發展進化向上，咁個社會係應該唔存在任何道德價值。上述講嘅嘢可能大家覺得好荒謬，但其實過去二三十年，大家有眼見，真係如實發生緊。

美國人係實用主義擁護者，而實用主義往往到最後會成為數學算式。舉一個例，二次世界大戰，1944年太平洋戰爭結束，日本完全唔夠美國揪，戰敗投降係遲早嘅事，但係美國人計算若然要用地面戰爭佔領日本本土，可能會帶來更多美軍傷亡，以及時間會拖長。於是佢哋決定投落兩枚原子彈於長崎與廣島大量平民百姓聚居之地，利用極端威嚇手段快速結束戰爭。

另一個例子，越戰期間，美國五角大廈參謀部又有一條算式，認為只要殲滅北越軍人數目，能夠超過佢哋可以補給嘅數目，就可以打贏越戰。所以下令進行瘋狂空襲轟炸，甚至使用「橙劑」化學武器大量殲滅敵人。當然事後證明佢哋條數計錯咗，美國都係打輸咗越戰。

當今世代，其實所有人都係實用主義者嘅信徒，不單止是美國人。而1917年，正正就係胡適，將佢師傅杜威的「實用主義」哲學帶嚟中國，而且大受歡迎，中國傳統嘅儒家哲學，由於未能喺當時現實社會中發生實質作用，於是完全無還手之力。而實用主義強調嘅「唯物性」「科學性」，亦都快速取代中國人傳統堅信嘅「禮義廉恥」，「唯物主義」短時間內取代「唯心主義」，於是好快，嚟自俄國嘅「共產主義」思潮就響當時嘅中國高速傳播……

註：羅柏特．奧迪等著，【劍橋哲學詞典】，臺北，貓頭鷹出版社，2002，頁977

#常威 #大軍閥平反系列  #大軍閥 #民國歷史 

【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

【常威近代史】第二部《中國一百年前的第一次改革開放》實體購買
https://www.382now.com/product?id=151

【常威近代史】第三部《東方維多利亞女王之死》實體購買
https://www.382now.com/product?id=165

【常公子歷史頻道207回：大清亡國關 #慈禧之死 蛋牛治】

♉【大清亡國關慈禧蛋牛治】系列，到今集，隨住慈禧太后嘅死圓滿結束，前後做咗207回，以每回平均六分鐘計算，一共1300分鐘播放時間，要睇晒，要用21小時，都幾得人驚。成日講是時事，不如今日講下我對條Youtube Channel嘅展望。

♐【常公子歷史Youtube頻道】建立咗差唔多一年半時間，目前有大概2000個訂戶，你話成功當然係唔成功，但係亦唔算好失敗。因為畢竟係陀地家庭式手工業製作，工作人員祇有三位，包括我常公子，負責寫稿同錄音，我嘅拍檔阿潮同佢老婆，就負責影片製作，全部無償出發，背後冇金主亦無任何投資者，大家祇不過想做條粵語香港人話近代史channel，為我哋香港人同我哋嘅粵語廣東話留下一點歷史印記，費事成日俾人話我哋香港人冇文化冇歷史感。

♊2020年，會係充滿變數嘅一年。頻道嘅內容，我亦會想辦法加入新事物，首先有好多朋友勸我製作「國語版」，希望可以多啲臺灣朋友睇，但係我本身唔識講國語，亦暫時未搵到識國語嘅朋友配合錄音，但我總想喺2020年做咗佢，希望成事喇。

♏另外有個好朋友會喺觀塘開一個網台，我都會去幫手製作一啲歷史同其他節目，呢啲節目我都會放上去我條channel播，希望條channel多啲嘢睇。最近有唔少人對香港未來睇得好悲觀，我冇呢種感覺，反正本來無一物，我其實係屬於嗰隻冇乜嘢好輸嘅人，冇事冇樓亦冇撈，一直勤奮工作，亦唔關時勢好或者時勢差事，馬克思講過，人係勞動嘅動物，人類要從勞動中都找尋生命價值，我堅信不疑。

♈最後趁住今日呢個咁特別嘅日子，「東方維多利亞女王慈禧之死」，希望大家將我條channel介紹俾多啲朋友睇，廣傳開去，係咁多。

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上3000訂戶！

🍳https://youtu.be/wxYS6HsVE0M

【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

【常威近代史】第二部《中國一百年前的第一次改革開放》實體購買
https://www.382now.com/product?id=151

【常威近代史】第三部《東方維多利亞女王之死》實體購買
https://www.382now.com/product?id=165

【常威近代史】（三百一十二回）
大軍閥平反系列

眾所鳩知，中國人最鍾意講一套做一套。今日香港好多人表面上攞個良心出嚟做嘢，實際上揞住個良心做事；表面上完全失控，實際上係醞釀一次大洗牌同推23條；網絡上亦有不少人黃個黃飛鴻，但其實是暗共，目的都係為咗叫群衆散水返屋企瞓覺；相同道理，美國人表面上捍衛香港人民主自由，實際上將香港當成貿易戰籌碼利用……

意識形態操控有一招「多重龍門」，就係將政治問題高度複雜化，模糊焦點，令一般人無所適從。呢一招會令好多水平唔夠嘅人感覺到是非黑白難辨，到頭來乾脆乜都唔理，而退出政治討論或對政治完全失去興趣，畢竟每個統治者都知道，一個普羅大眾唔談論（或不懂談論）政治嘅城市，先至係最容易管治（香港上世紀七八十年代就係最佳例子）。當然依一招好高深，做得唔好會弄巧反拙，香港目前2019年發生嘅情況，大概如此。

你可能會問，阿常公子，咁究竟真相係乜？

我就會答你，大方向上，中央最想喺香港推行23條國家安全法立法，因為佢哋覺得只有23條立法，先可以將外國反動勢力完全清洗出香港，最直接啲講，就係合法地封咗蘋果日報依個影響力最大嘅反動傳媒機構。

咁美國呢？

我唔覺得美國想完全推翻中共統治，佢哋現在只係唔接受習近平。美國人最想嘅就係保持過往三十年嘅狀態，即係美國同中國嘅「從屬關係」，即主客分明，美國係莊，中國係閒。只要習近平下臺，換上另一個比較「冇咁有所作為」嘅領導班子，美國人絕對會接受。而且「保障香港嘅民主同人權」同「美圓作為世上唯一交易貨幣」兩者重量比較，係天淵之別。畢竟美國要繼續印銀紙發債維持其世界霸主地位，任何想挑戰佢嘅人，佢哋都會全力反撲，直至打到對手一棟都冇為止。

我成日同人講，中國要挑戰美國嘅霸權，係早咗10-20年，中國最偉大嘅結界師鄧小平響1979年講過，要真正超英趕美，係改革開放後50年至100年後嘅事，今天係過早發難，習主席無疑係心急咗一啲。

講返歷史，1917年底段祺瑞重新上臺，清除黎元洪勢力後，佢亦追究之前搞復辟嘅亂黨，口講嚴懲佢哋，通緝佢哋，但係統統通而不緝，就算係張勳本人，抑或保皇黨康有為梁啟超，全部長期逍遙法外，之後甚至仲參與返政治遊戲。事後睇返，全部嘢好似一個局，祇不過係想棟（動）黎元洪一個啫。

而所謂「向德國宣戰案」，參與第一次世界大戰，亦只不過係另一筆大借款嘅口實，段祺瑞北洋政府只係派咗幾十人去歐洲打咗個白鴿轉，就當參與咗一戰。日本人再次向段祺瑞政府借出鉅款，段祺瑞則利用借返嚟嘅錢加強自己皖系嘅軍事力量，企圖進一步鞏固權力。而日本則利用中國欠債，進一步控制中國嘅內政同經濟，對日本同段祺瑞嚟講，叫雙贏局面。

【常威近代史】（三百一十一回）

大軍閥平反系列

聰明靚仔嘅胡適，係安徽人，茶葉富商之後，1910年留學美國常春藤聯盟康乃爾大學（Cornell University）選讀農務系，1915年進入多倫比亞大學哲學系，跟隨實用主義哲學大師杜威（John Dewey , 1859-1952）寫博士論文。

所謂實用主義（Pragmatism），根據《劍橋哲學詞典》的定義，「這種哲學強調理論與實踐的關係，並把透過有方向行動的結果，而顯露出來的經驗同自然的連續性，看作反省的起點」，「因此，知識乃是被利益與價值所引導，既然客體的實在不能先於經驗而被了解，那麼，唯有將真理之宣稱視為在實驗上決定的條件之滿足，亦即視為探究之結果，才能加以證成」（註）（唔知講乜？大家千祈唔好讀哲學）。

簡單啲講，實用主義係「工具性」，佢哋只係認同後天（形而下）嘅經驗，而不認同先天（形而上）嘅存在，所有嘅「真理」同埋「價值」，只因為佢哋能夠喺某程度上令人滿意地解決「實際問題」而存在，「真理」只係喺經驗過程中被確信嘅信念，係會出錯，係可以進一步被修正同竄改（同基本法一樣）。實用主義係一種唯物主義，唔相信價值同埋真理係先天性嘅存在，同共產主義馬克思主義一樣，一切皆從現實物質條件而決定。

而我個人認為，「實用主義」比「馬克思主義」更冷酷無情，因為馬克思主義基本上係出於「人文關懷」而出現，係希望解決無產階級貧苦大眾嘅苦難而誕生，以實用主義本身則認為，如果可以解決問題，「行惡」都可以成立。其實現代世界，就係一個以「實用主義」運行嘅世界，大家為咗解決唔同嘅問題，可以唔分黑白善惡，所謂道德同人文價值，甚至可以柄埋一邊，或者只係純粹用作意識形態宣傳物同 惡行嘅掩飾品。而杜威作為美國實用主義大師，隨著美國嘅國勢喺二次世界大戰之後統治全世界，實用主義亦都響全世界橫行無忌。

於是乎，當社會出現問題或動盪，實用主義者就可以名正言順不擇手段去解決當下問題，例如鼓吹警察使用暴力，濫暴濫捕濫起訴、可稱之為「以暴止亂」，放一萬枚催淚彈，打議員打傳媒打學生打女人行緊急法蒙面法停駛地鐵……通通只不過係為咗解決問題，為咗想社會平靜落嚟，所有行惡手段，只不過係為咗達到目的而存在，於是乎，其實係冇錯嘅。又或者，用實用主義者嘅邏輯，香港人追求民主自由平等公義等概念性事物，其實都係虛無嘅，只不過係中咗美國人計，被美國人挑撥離間，最後用作於中美之間貿易談判賭枱上嘅談判籌碼。（利申：實用主義係美國人發明嘅）

由於是乎，因為印銀紙，即量化寬鬆，可以解決眼前嘅金融問題，所以銀紙可以繼續狂印。問題暫時解決咗先算，至於之後嘅大洪水，係之後世界嘅事情。再退一萬步，不斷發展工業同製造消費品，可以將資本主義經濟不斷嚮前推進，至於造成地球資源枯竭或製造出巨大嘅環保污染問題，並唔係當下要解決嘅問題，對於之後發生嘅嘢，之後再解決。「活在當下」係實用主義者堅定不移信奉嘅邏輯。

實用主義同中國嘅儒家哲學比較，更加係完全背道而馳，儒家哲學相信天道人性，認為天有其道，萬物有其位，人性本善，強調個人道德修養。放響實用主義者嘅立場，完全係Bull Shit！人為何要為善？個人道德修養可以當飯食嗎？其實係多撚餘！如果人人都係禽獸，男盜女娼，但個社會又可以不斷向前行，經濟繼續高速發展，咁人係應該成為禽獸，並冇錯，如果社會因為人民行惡而發展進化向上，咁個社會係應該唔存在任何道德價值。上述講嘅嘢可能大家覺得好荒謬，但其實過去二三十年，大家有眼見，真係如實發生緊。

美國人係實用主義擁護者，而實用主義往往到最後會成為數學算式。舉一個例，二次世界大戰，1944年太平洋戰爭結束，日本完全唔夠美國揪，戰敗投降係遲早嘅事，但係美國人計算若然要用地面戰爭佔領日本本土，可能會帶來更多美軍傷亡，以及時間會拖長。於是佢哋決定投落兩枚原子彈於長崎與廣島大量平民百姓聚居之地，利用極端威嚇手段快速結束戰爭。

另一個例子，越戰期間，美國五角大廈參謀部又有一條算式，認為只要殲滅北越軍人數目，能夠超過佢哋可以補給嘅數目，就可以打贏越戰。所以下令進行瘋狂空襲轟炸，甚至使用「橙劑」化學武器大量殲滅敵人。當然事後證明佢哋條數計錯咗，美國都係打輸咗越戰。

當今世代，其實所有人都係實用主義者嘅信徒，不單止是美國人。而1917年，正正就係胡適，將佢師傅杜威的「實用主義」哲學帶嚟中國，而且大受歡迎，中國傳統嘅儒家哲學，由於未能喺當時現實社會中發生實質作用，於是完全無還手之力。而實用主義強調嘅「唯物性」「科學性」，亦都快速取代中國人傳統堅信嘅「禮義廉恥」，「唯物主義」短時間內取代「唯心主義」，於是好快，嚟自俄國嘅「共產主義」思潮就響當時嘅中國高速傳播……

註：羅柏特．奧迪等著，【劍橋哲學詞典】，臺北，貓頭鷹出版社，2002，頁977

#常威 #大軍閥平反系列  #大軍閥 #民國歷史 

【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

【常威近代史】第二部《中國一百年前的第一次改革開放》實體購買
https://www.382now.com/product?id=151

【常威近代史】第三部《東方維多利亞女王之死》實體購買
https://www.382now.com/product?id=165

重覆貼了，sorry

【常威近代史】（三百一十三回）
大軍閥平反系列

1917年10月，中國內戰再一次爆發，依一次係孫文口中嘅「第三次革命」。幫助大家記憶，第一次革命就係「#辛亥革命」，「第二次革命」就係1913年討伐 #袁世凱 違反「#臨時約法」，而第三次，就係今次嘅「護法戰爭」，目標係北京政府嘅揸Fit人 #段祺瑞。孫文一生人好鍾意搞革命，由1895年開始搞，搞到佢死嗰日1925年仲搞緊，搞足30年，死嘅時候輓聯係「革命尚未成功，同志仍需努力」。

所謂第三次革命，即係北洋系中央政府集團對西南軍政府軍閥集團之戰，主要嘅戰場係響湖南同四川，其實又係一場 #南北之爭。不過非常有趣嘅係，由於北洋軍閥集團內部，亦分裂成為主戰嘅 #皖系軍閥（即段祺瑞）同主和嘅 #直系軍閥（即 #馮國璋）兩個陣營；而對面亦唔好得幾多，所謂護法軍內部陣營之中，不同派系響「護法」問題上嘅態度同表現亦都唔一致，甚至有人根本唔係為咗護法，只係驚唇寒齒亡又或者殃及池魚，所以被迫企埋響同一陣線開火。

#毛主席 講得無錯，大矛盾中有小矛盾，小矛盾裡面亦有更小嘅矛盾。唔同嘅政治派系因為各自嘅階級成分同埋觀點立場相異，矛盾難免會出現。因此要將個別嘅勢力統合起嚟，需要一個「#口實」或「#藉口」。當時北方段祺瑞，就用「國家統一」；而南方嘅孫文，則用「維護憲法」為口實，各自統合唔同陣型同派系，聯成一線，對付「大矛盾」中嘅共同敵人。

2019年嘅香港亦都好似，之前所謂泛民陣營，本來已經崩分離析，但特區政府好衰唔衰推「#逃犯條例」，為敵方製造咗統合力量嘅「口實」，結果所有反對派成功統合成統一戰線，共同發動逆權運動反對政府，反抗中央。而反對派響今次運動中亦都學精咗，由一開始已經強調「#不分化」、「#不割蓆」，要以大局為重，「#和勇同路」、「#各自爬山」，共同進退，打仗需要團結一致，歷史上大部分戰爭打輸嘅理由，都唔係因為唔夠打，而係因為內部出現分化。

但係唔分化，就會出現「#大臺」統合各方反對勢力。2019年發生嘅逆權運動，好多人認為係一次冇大臺、純粹由民間自發嘅反政府活動，但係大臺一定有，祇不過今次嘅大臺隱藏喺好後，今鋪背後嘅大臺係唔係「美國政府」？我實在唔知道。

去番1917年10月發生內戰，呢次嘅內戰特色係，因為大家雙方交戰嘅內部都有矛盾分化，所以並唔係一場認真嘅戰爭，成日出現忽戰忽和、和中有戰、戰中有和嘅情況。除咗少數嘅戰役，其實大部份嘅戰事都係好hea，並唔係生死相搏、玉石俱焚嗰隻。我相信段祺瑞係想堅打，但佢嘅partner暫代大總統无馮國璋，就完全不合作甚至消極抵制；而南方軍閥，基本上更加係一盤散沙，各自為政，各自為鞏固自己嘅地盤同利益打算。所以話第三次革命，其實本身係一場戲，亦都唔係錯曬。

【常威近代史】（三百一十五回）
大軍閥平反系列

段祺瑞因為主張「武力統一」政策受挫，而於1917年11月22號辭去內閣總理職位下野，返番去佢嘅根據地天津（佢就成日兩面走），大總統馮國璋以為大權在握，但段先生並非紙紮燈籠，12月頭，段祺瑞頭馬徐樹錚多番串連後，以直系曹錕同皖系張懷芝為首嘅北洋派十二省督軍，喺天津召開另一次「督軍團」會議，商討對西南停戰嘅問題。

上集已經講過，西南軍閥提出十大訴求，呢啲訴求係北方軍閥所不能接受，所以呢次督軍團會議，主戰派大佔優勢，一致要求組織另一次強大兵力，再一次進攻四川同廣東，「統一中國」。而督軍團會議主戰嘅決定，又將矛頭直指主和嘅大總統馮國璋，令佢非常狼狽，直皖兩系的矛盾日趨激化。

加上南方兩大軍閥陸榮廷同唐繼堯根本唔想繼續打，佢哋暗中接洽馮國璋，要求主和，及早結束孫文口中所謂嘅「第三次革命」南北戰爭。但係段祺瑞又想打，咁怎麼辦呢？各大軍閥各有想法，情況撲朔迷離。於是馮國璋迫於無奈，12月18號重新起用段祺瑞，任命佢擔任「參戰督軍」，全權負責有關參與第一次世界大戰嘅各項事務，馮國璋咁樣做有兩個動機：第一，將參戰嘅問題卸畀段祺瑞，咁就關人撚事；第二，藉此打破僵局，緩和直皖兩派嘅矛盾。

段祺瑞欣然接受依個任命，從表面睇，「參戰督軍」權力唔大，但係由於呢個職位不隸屬於內閣，而參戰事務涉及到政府各個部門，咁就可以令佢實際上擁有隨意向中央政府各部門下達指示權力，輕易達到左右政局嘅政治目的；其次，可以利用參戰督軍合法身份，以編練參戰軍做藉口，乘機向日本借錢、調配政府資源發展自己嫡系部隊嘅計畫。

此情此景，同今日嘅香港警察都非常相似，警察系統浚駕行政會議，超越特首，唔係一直發生緊咩？

段祺瑞得到甜頭，「武力統一」中國亦拋諸腦後，佢向馮國璋讓步。於是，12月25號聖誕節，中華民國代理大總統宣佈停戰令，「南北戰爭」暫時結束。當然南方所要求恢復舊國會，平返黎元洪等等，中央政府亦都冇理到，中央繼續主張以「臨時參議會」代替「國會」行使職權。

一場「鬧劇」，即係南北戰爭，終於喺古靈精怪局面之下宣佈結束。世局瞬息萬變，尤其是當俄國發生「十月革命」，列寧共產黨上臺執政，發生喺歐洲大陸第一次世界大戰戰局，亂過亂世佳人。皖系段祺瑞就睬你都有味，積極勾結日本人，用日本人嘅錢、用日本人嘅軍事顧問、全盤用日本嘅軍事裝備同武器，積極編練佢嘅皖系嫡系部隊，即係所謂「第一次世界大戰中國參戰軍」。

馮國璋當然唔like，佢千方百計用行政手段希望抑壓段祺瑞軍力坐大，因為佢知道，自己無論點，遲早都要同死對頭段祺瑞打一鑊甘！

亦喺依個寒冷嘅聖誕節，中國北方地區爆發大規模鼠疫，呢次爆發嘅鼠疫同1910年東三省所遭遇嘅鼠疫類型相同，均屬於肺鼠疫，患者受感染後，爆發猛烈咳嗽，好快吐血致死。呢次鼠疫響北方流行咗七個月，去到1918年夏天先至平靜落嚟，染病死者大概有17000人。

好！又要睇下我哋嘅國父孫文做緊乜鳩？之前已經講過，KOL孫文聲就夠大，以「中華民國廣州軍政府」大元帥自居，經常代表南方軍閥發表講話，但軍政府實力有限（嚴格嚟講，當時南方大軍閥係陸榮廷同唐繼堯，孫文充其量只一個小軍閥），孫文基本盤只有程璧光嘅海事戰艦部隊，陸軍部隊仍然未能成立，其時要涿鹿中原，冇陸軍係冇偈傾嘅，所以去到1918年，孫文決定大力組織陸軍，擴大自己實力。

孫大炮終於發炮！1918年1月3號夜晚，孫文下令駛至廣州大沙頭嘅「永豐」、「永翔」同「楚豫」三艦開炮，向觀音山廣東督軍處發炮50枚，廣東督軍莫榮新（1853-1930）沒有下令還擊……

第二日，孫文將屬於桂系嘅莫榮新召到大元帥府，指責佢將廣東搞到民不聊生，莫榮生恭敬認錯，並答應孫文要求，將廣東財政收入一部份畀軍政府使用，講白啲，就係勒索囉。

桂系軍人莫榮生，一直夾X住孫文，唔畀佢喺廣州坐大，佢曾經派出殺手行刺孫文，但唔成功。而孫文為擴充陸軍部隊，派員到廣東各縣市招募民兵，莫永生就通令各地將孫文嘅招兵人員以「土匪」罪名，就地槍決，歷史記載，單係增城一地，就有69個人被打靶。真係大矛盾裏邊有小矛盾，小矛盾裏面又有更小嘅矛盾。

1918年1月15號，「華法教育會」喺北京舉行會議，鼓勵有志青年留學法國，勤工儉學。留法勤工儉學潮流開始於1912年，但係只係自發性參加。到1917年，俄國十月革命成功，共產黨勢力積極參與及泵水下，留法勤工儉學工作開始步入正軌同常規化，之後嘅日子，一共有20批來自全國18省嘅學生抵達法國學習，佢哋響法國其實並唔係讀書，而係組織革命團體，學習馬克思主義，當中唔少人後來返番中國，成為中國革命嘅積極投身者，其中有周恩來同鄧小平。

同一日出版、影響當時年青人最深、陳獨秀等人主編嘅《新青年》刋物，全部改為白話文，並且使用新式標點符號。亦由嗰日開始，所謂逗號、句號、感嘆號、冒號、開引號閂引號……等標點符號，先真正響中國成為潮流。

一場開天闢地嘅新文化運動，亦正式醞釀誕生，傳統嘅儒家哲學同傳統價值觀，快將壽終正寢。取代傳統儒家嘅，除咗來自西方嘅「實用主義」、「科學主義」同「民主自由」之外，仲有「馬克思主義」同「共產主義」，舊嘅唔去，新嘅唔嚟。不過新一輪嘅文化大更替，所帶嚟嘅後果係——血肉橫飛！

而當時，當所有人要摒棄儒家思想呢塊阿婆紮腳布嘅同時，我諗大概冇人想到，足足100年後，孔子孟子會被重新擺上神枱供奉，作為挽救中國人道德價值觀大滑坡嘅唯一意識形態思想武器。

#常威 #大軍閥平反系列  #大軍閥 #民國歷史

【常公子歷史頻道210回：大清亡國關 #袁世凱練兵 蛋牛治】

♉今日內容，主要係講袁世凱並唔係一個純粹擦鞋仔，佢係有非凡嘅才華，短短幾年間，替當時一無所有嘅清帝國訓練咗一支有質素嘅西洋裝備陸軍，亦都將整個清帝國軍事文化徹底改變，至少能夠融合全世界，喺袁世凱之前，所有人閉門造車，結果清國嘅軍事力量落後於歐洲日本超過半個世紀，甲午戰爭一敗塗地，其實係清帝國滅亡嘅主因，有時脫離歷史想像，如果冇甲午一敗，中國歷史將會係另一個圖像，所以仗真係唔可以亂打。

♉踏入2020年，戰爭亦無可避免，美軍利用無人機精準擊殺戰術，炸死伊朗第二號人物，一種全新戰爭模式出現，以最小代價（無論敵我雙方）獲取最大震懾效果。本來世人對核子戰爭嘅未來世界非常悲觀，但無人機加精確制導武器畀我哋睇到了不一樣嘅可能。世事日新月異，未來世界會點樣走？仗係會點打？真係難以想像。

♑香港亦都出現變局，政府「止亂制暴」基本方針不變，警察繼續放題大濫捕，最近幾次遊行活動，都以三位數字拘捕人數做起點，眨眼間，有接近成萬人可能面對白色恐怖嘅司法檢控，係一項非常龐大嘅法律程序，未來幾年，為整個社會所帶來嘅負面效果難以想像；中聯辦換人，以駱惠寧換上王志民，一個完全冇接觸過港澳事務嘅高官接手中聯辦？唔好太多揣測，其實邊個做都一樣。

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上3000訂戶！

🍳https://youtu.be/TOTRoT2q6zY

【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

【常威近代史】第二部《中國一百年前的第一次改革開放》實體購買
https://www.382now.com/product?id=151

【常威近代史】第三部《東方維多利亞女王之死》實體購買
https://www.382now.com/product?id=165

【常威近代史】（三百一十六回）
大軍閥平反系列

1918年嘅中華民國，亂個篤屎，之前代理大總統馮國璋宣佈停戰，但係一啲效果都冇，南北雙方繼續邊談邊打，忽戰忽和，原因好簡單，因為大家分開做嘢，你有你打，我有我溝和，一邊打敵人一邊打劫勒索富商地主，亦冇話唔啱，畢竟做軍人就係要咁樣搵食。

俄國十月革命勝利後，北京政府內閣追隨協約國嘅外交策略，唔承認列寧蘇俄共產黨政權，而且下令封鎖中俄邊界，北京政府亦都醞釀乘機奪回之前沙俄響中國掠取嘅鐵路利益（可惜最後唔成功）。

1月27號，南北戰爭再爆發，南方護國軍出兵攻陷岳州，北京政府回應，下令進攻南方，大軍南下進攻湖北（鄂）湖南（湘）地區，重申一次，所謂打，其實唔係堅打，只係遠距離放吓炮，敵來我走，敵退我攻，大家非常禮讓，做場戲啫，做得唔好咪再做過囉……反正打仗只係藉口，打劫先係真實。

依種打仗模式，「打仗打劫混合體」亦係中國特有嘅軍事衝突模式，從1895年甲午戰爭開始，歷史多次講過畀我哋知，中國人打仗唔鍾意搏命，所以當時全世界，根本冇人睇得起中國嘅軍事實力，相對日本仔，更加係差天共地，日本人打仗，吓吓搵命搏，陣亡就榮光歸天皇長眠靖國神社！中國士兵上戰場，基本上係為咗自己嘅口糧同利益（或者俾人呃傻仔推上前線），背後冇意識形態理念support，生死相搏，要打戰意，中國軍隊就從來冇戰意。

依種惡劣超hea嘅情況，要去到1926年蔣介石北伐先有初步改善，抗日戰爭民族存亡之際，中國軍人先真係識嚟料，之後有共產黨馬克思主義意識形態加持嘅中國人民解放軍，先至真係堅！

南北戰事持續，1918年2月2號，廣州中華民國軍政府亦發生政變逼宮事件，之前講過軍政府大元帥孫文想擴充實力涿鹿中原，但係桂系自恃軍力強盛，想全面控制廣州軍政府，於是由元老岑春煊出面策動部分國會議員，提出改組軍政府。一場發生喺珠海嘅會議，將獨裁者孫文拉落馬，削佢去龍頭大元帥職位，改為「政務總裁」。而且所謂政務總裁並唔係只有孫文一個，護法軍各省軍派代表都係「政務總裁」，大家組成聯合會議，共同承擔軍政責任。

一句到尾，孫文又一次收皮，想做獨裁者但又一次失敗，但係革命KOL死而不僵，聲名猶在。老實講，當時支持孫文繼續存在嘅，其實係普羅民意，而並非佢自己嘅真正實力。所以玩政治，個「朵」好重要，冇「朵」冇人識你，十六座「大王」都係冇前途。

2月17號，北京馮國璋以代理大總統名義，公佈修正咗嘅《國會組織法》，根據修正法，參議院議員名額由原來的274人減為168人，其中138人由各省選出，30人由中央選出；衆議員由原來80萬人口選一名改為100萬人口選一名，由596人減為406人（有數得計，當時中國大約有四億人口）。原本參議院議員由各省議會選出，現改為由各省區地方選舉會選出。

2月22號，奉天督軍楊宇霆率軍至秦王島，將日本政府據中日軍事借款協定運畀北京政府嘅軍火截留，即打劫！除咗少數軍火放行，大部份軍火全數被打劫運往關外畀張作霖用，情況真係荒天下之大謬。據說又係蠱惑仔段祺瑞第一號頭馬徐樹增玩嘢，利用送軍火畀奉天軍閥張作霖，希望張作霖聲援皖系段祺瑞。我真係想問，軍火被打劫，日本方面又有乜嘢反應呢？可惜我冇辦法搵到資料。

1918年2月26號，仲有一件大事發生，就係香港快活谷馬場發生大火災，600幾人被燒死。當日係賽馬週年大賽日，馬場旁邊一個看臺因為觀眾擠擁忽然倒塌，棚架啱啱壓住一啲熟食檔火爐上，由於棚架係用木板同竹料扎成，所以立刻起火，火勢迅速蔓延，情況一片混亂。呢一場大火，亦都係香港1842年開埠以來一場最大嘅慘劇，死者大多數係華人。

事後，由本地慈善團體東華醫院負責脤濟工作，禮聘肇慶鼎湖山高僧響愉園建醮超渡亡魂，並與政府商議設立公墓，請求華民政務司撥出咖啡園地段，作為安葬罹難死者永遠墳場，四年後1922年8月正式動工，罹難者被悉數安葬在咖啡園墳場內，名為「戊午馬棚遇難中西士女公墓」，並建立馬棚先難友紀念碑作為紀念。

快活谷馬場嘅慘劇同殖民政府嘅善後工作，充分反映出當時香港嘅文明水平，相對於國內立立亂嘅戰亂狀態，形成鮮明對比。

同一日，2月26號，廣州軍政府海軍總長程璧光被人刺殺於廣州海珠碼頭。程璧光係廣東香山人，係孫文同鄉，生於1861年，曾任「廣甲」號管帶，參予過甲午戰爭，1895年加入興中會，係最早嘅中國革命支持者之一，1896年加入李鴻章主理清帝國海軍衙門任職，平步青雲累升至司長，40年管治海軍經驗，擁有高度國際視野，1916年由黎元洪推薦任北京政府海軍總長，其後護法運動開始，程璧光率領海軍第一艦隊追隨孫文南下廣州，建立中華民國軍政府，任護法軍政府海軍總長，佢一直支持孫文。但係後嚟，可能佢又睇穿孫文壠嘢，佢阻止過海軍聽命於孫文開炮懲罰莫榮新，又係桂系改組軍政府拉孫文下馬奪權一役，離棄孫文。

究竟邊個行刺佢？冇人知，一般屎料梗係認定桂系軍閥所為，但方丈份人不嬲好小氣，就算程璧光真係死喺佢手上，亦唔係第一個。

#常威 #大軍閥平反系列  #大軍閥 #民國歷史

【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

【常威近代史】第二部《中國一百年前的第一次改革開放》實體購買
https://www.382now.com/product?id=151

【常威近代史】第三部《東方維多利亞女王之死》實體購買
https://www.382now.com/product?id=165

♊美國向伊朗動武，可能亦都只不過係隔山打牛，最抄錄響香港01某篇文章所記嘅一首西方民謠：
「丟失一枚鐵釘，壞了一隻蹄鐵；
壞了一隻蹄鐵，折了一匹戰馬；
折了一匹戰馬，傷了一位騎士；
傷了一位騎士，輸了一場戰鬥；
輸了一場戰鬥，亡了一個帝國。」
牽一髮動全身，尋晚特朗普嘅講話仲有一句：「If you value you're own life, you will not threaten the lives of our people」，其實要世界和平，大家就要安分守己，唔好搞咁多小動作撩事鬥非。


♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上3000訂戶！

🍳https://youtu.be/ZcTQFyD-Rt0

【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

【常威近代史】第二部《中國一百年前的第一次改革開放》實體購買
https://www.382now.com/product?id=151

【常威近代史】第三部《東方維多利亞女王之死》實體購買
https://www.382now.com/product?id=165