【常威近代史】(二百六十一回)
袁世凱平反系列
1914年暴力主義蔓延全球,和你飛飛唔係大潮流。一戰爆發,孫文響日本成立獨裁政黨「中華革命黨」,改組重新統合國民黨,要所有人重新效忠(附從)孫先生一人,作為孫文多年戰友,同佢一齊創立同盟會嘅革命大佬黃興,Completely唔贊成孫文嘅做法,兩個人亦開始分道揚鑣,正式世紀割蓆。
孫文年長黃興八年,黃興一直以「大哥」稱呼佢,革命路途上難免有所爭執,但由始至終,黃興都係尊重孫文嘅決定,有幾次都係黃興親自讓步,消解紛爭,論勇武同能力,黃興完全係孫文之上;個人修養同革命凝聚力,黃興亦不下於國父。但孫文今次改組國民黨,要完全拋棄「法統」兩個字,搞專制獨裁,一人獨大,則係黃興所唔能夠接受。
對於以建立現代民主法統政體為宗旨、而啱啱推返一個君主專制王朝嘅革命黨人嚟講,要佢哋再重新宣誓效忠一個人,接受獨裁統治2.0,難以接受可以理解。黃興對孫中山嘅所作所為,曾經極力反對,佢覺得孫文咁樣做係違反民主革命精神。黃興講,黨員係為革命事業而奮鬥,並不是為咗一個人。另外要喺誓約上打手指模,對老黨員更加係一種侮辱。
黃興拒絕加入新黨,對黨內團結當然係嚴重打擊,為此,孫文曾經努力尋找一個妥協方案。曾經有人提議,凡係前同盟會會員,都不必再宣誓同打手指模。而中華革命黨誓詞中,「附從孫先生」應該改為「附從總理」,再唔係孫文個名。但係孫文拒絕考慮對佢原有嘅方案作咗任何更改,完全企硬唔take嘢!黃興亦都無可奈何,祇有離開革命核心。追隨黃興離開嘅,仲有好多革命元老同志,孫文要清黨,亦都實現咗佢嘅既定目標。
孫文做嘅嘢亦都唔係錯曬,國民黨真係需要改組同整頓,亦都係毋庸置疑,自從1911年武昌起義爆發後,的確係有唔少投機分子加入國民黨,想撈政治油水。如今要淘汰一啲唔能夠堅決為革命事業效力嘅黨員,亦都係合情合理。「二次革命」嘅失敗,孫文歸咎於係國民黨嘅秩序散漫同夠統一,呢個亦都係佢要組織一個有嚴格紀律嘅黨組織機嘅有力理由。同時孫文覺得,國民黨過去嘅失敗,係因為同志唔肯100%服從黨魁,意見太多,而糾正過去錯誤嘅唯一辦法,就係要所有人「附從」佢一個人嘅意志。
呢條拋棄「法統」嘅路一打開,就無法回頭。附從孫文嘅意志,後來變咗附從蔣介石嘅意志,到咗最後附從毛澤東嘅意志,到咗今時今日就要附從「黨」嘅意志……
而革命巨頭並唔係得佢一個,起碼仲有個真國父黃興同佢咁高咁大,孫文玩清黨,老實講係清除黃興,清除革命元老,一山不能藏二虎,睇過杜琪峰黑社會都知,一個字頭亦唔可以有兩個「話事」,咩叫獨裁呀?一人獨大啊!黃興嘅態度亦都同過往一樣,叫得你一聲大哥,就再次忍讓,最後嘅選擇,係為革命大局著想,急流勇退。
黃興嘅選擇,係大仁大義大勇嘅表現。佢要響日本同孫文鬥,你估佢無料咩?但係如果開波,國民黨一定出現大分裂,咁中國革命事業就會毀於一旦。而且黃興感覺是時移世易,佢同已死嘅宋教仁一樣,堅信嘅理念從未動搖,但世局變化出乎佢想像之外,行法統自由民主之路,一路行嚟的確係唔得。退一步,成就他人同伴「今天我……」,海闊天空,毫不戀棧權位,一心為大局著想,成個中國近代史,又有幾多個可以做得到?
如果中國多幾個黃興,或者更多中國人能夠去認識黃興嘅所仁義智勇,中國人點會搞到今時今日咁丫?屌……
既然唔可以再喺埋一齊,黃興就離開日本,遠赴美國「靜養」。臨走之前,黃興答應孫文,雖然佢暫時離開國民黨(或稱呼為中華革命黨),但之後絕不分化,各有各做,兄弟爬山。
臨走前佢咁講:「最後之勝利,終歸知吾黨……所抱之主義發揮而光大之,不為小暴動以求急功,不作不近情言以駭流俗,披心剖腹,……庶吾黨之信用漸次可以恢復。又宜寬宏其量,……使異黨之有愛國心者有所歸向。然後合吾黨堅毅不拔之士,學識優秀之才,歷百變而不渝者,組織幹部,計畫久遠,分道進行。」
用現代人話去講,就係要同孫文建立聯合戰線,招攬人才,為未來革命繼續努力,直至睇到中國有民主自由法統實現嘅一日!
而孫文亦答應黃興畀兩年時間佢辦事,要黃興到外地靜養兩年,如果孫文自己搞唔掂,兩年後就將國民黨領導權交返畀黃興。不過講就咁講,都係想大家有個下臺階啫。仲有一樣嘢要提,孫文答應兩年後交還權力,但兩年之後,即1916年,黃興就因為胃出血而死,死嘅時候,只有42歲……
世事何其巧合?兄弟咁樣對你,你就咁樣對兄弟……全中國人叫緊你國父呀……
下次繼續講黃興,冇辦法停筆!明日85星期一罷工,星期二見!
#常威 #斷送共和關袁世凱蛋牛治 #袁世凱 #民國歷史
【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ
【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ
【常威近代史】第一部《大清亡國關慈禧蛋牛治》實體購買
https://www.382now.com/product?id=87
【常威近代史】第二部《中國一百年前的第一次改革開放》實體購買
https://www.382now.com/product?id=151