直奉戰爭之後,張作霖退出關外,宣佈東三省自治。11月2號,北京政府外交部照會日本駐京公使,聲明奉天省擅自以路礦抵押外債,與日本簽訂嘅天圖鐵路合同,未經中央政府批準,應屬無效。張作霖梗係睬你都生臭狐?今日臺灣同美國買武器,使唔使理中華人民共和國先?各有各做,張作霖大舉外債,藉助日本人之力,大力發展經濟同軍備,好快就有「第二次直奉戰爭」。
10月18號,北京中央政府又發生大件事,真係鑊鑊新鮮鑊鑊甘,當時「好人內閣」中嘅財務總長羅文幹,因為斡旋中奧炮艦借款案中涉嫌貪污遭到拘捕。
1914年,中國曾經向奧國借款600萬英鎊訂購四艘炮艦,時隔八年,本月14號重新簽訂展期合同(延長還款期),但眾議院長吳景濂(1873-1944)等,一直唔鍾意王寵惠內閣,於是向大總統黎元洪告密,話羅文幹簽訂合同嘅時候收黑錢,指控佢貪污,黎元洪即刻指示步軍統領拘捕羅文幹,將佢送往地方檢察廳關押,另外同案拘捕多人。
羅文幹被捕後,王寵惠內閣要求黎元洪將此案交由法庭公正辦理,但吳景濂阻止黎元洪咁做,並且操縱國會通過查辦羅文幹同宣佈展期合同無效。王寵惠內閣一怒之下,內閣集體辭職,29號,汪大燮(1860-1929)組成新內閣接替,閣員中,僅有陸軍、海軍、交通三個總長為上屆留任。
一場小規模嘅政變,本來被民眾寄予厚望嘅「好人內閣」,玩唔夠兩個月就收皮,「好人」真係好大碌,就係咁解囉。權力鬥爭、黨派之爭仍然不斷發生,錢又唔夠,軍閥又割據,幾百樣嘢聚於一碌,黎元洪就算係神仙都難救,而且佢根本唔係神仙級數(真正嘅生神仙蔣介石同毛澤東仲未現世)。
民主自由議會政治,少不免會落入依種不斷爭拗再爭拗再爭拗困局,政治爭拗不斷,國家及經濟難以向前發展,呢個情況亦都係過去香港十幾年嘅情況,但凡事必須付出代價,往往自由民主議會政治嘅代價就係咁,咁又睇下你願唔願意承受?現在好多歐洲國家都非常民主自由,大麻合法化唔在講,父女都可以結婚,夠free未?但經濟一潭死水,極權國家一言堂,玩集體主義戰時狀態,動員同資源分佈當然更有效率,但所犧牲嘅就係個人嘅自由。
我常公子成日講,森羅萬象,只係兩害取其輕,凡事都係雙面刃,好事或壞事?好多時候係個人主觀感覺。而且必須要相信,經濟係同政治互相掛鉤,好難可以分開講。有自由都可以窮,冇自由亦可大富大貴,反之亦然。
不過若然要計算利害,當然要揀前者自由民主,問題係最能夠輪換,唔啱就換到啱,雖然有個可能性係——世界上並冇100%女孩存在。必須要明白,世界上永遠冇最好嘅制度,亦冇所謂最好嘅生活方式。畢竟所謂世界同人生,只係人類幻想嘅產物。
你聽得明?就會開心好多……
#常威 #大軍閥平反系列 #大軍閥 #民國歷史