[踩去西藏]四千公里的單車流浪日記 Live

1001 回覆
361 Like 17 Dislike
2019-06-30 00:19:14
Day 18 務川

旭哥今朝好早就過咗嚟我住嘅旅館,帶我去食早餐,佢揸部電單車,我踩單車喺後面跟住。 我唔知呢個叫咩粉,但有啲似桂林米粉


除咗請我食早餐之外,旭哥仲買咗支脈動畀我係路上飲,同送我一段路先走。 雖然大家萍水相逢,但係佢就不求回報咁去招待我。由香港一路踩 到而家, 真係從未遇過好似旭哥對我咁好, 其實真係好感動

最後佢再三叮囑我要好好注意安全,同埋要食多啲嘢補充能量,有咩問題或者困難就打畀佢

如果中國多啲好似旭哥咁嘅人,相信會好美好

「不要說感謝的話,要什遇到需要幫助的人,在能力範圍內就幫助他們,但是一定要保護好自己。」


分別咗之後我就一路沿住省道踩, 路況十分之好


我經過見到有賣嘢食嘅,就諗住買定啲饅頭 做乾糧, 點知佢話冇得餅, 叫乜鬼嘢土家族醬香餅, 咁唯有試下


我在踩咗一陣,見到路上好多檔賣西瓜仔,生果 不時不食,我忍唔住買咗個嚟食, 五蚊雞


由於唔使再對住條爛路嘅心情特別舒暢, 但係 我開心得太早, 係中午嘅時候突然好肚痛, 我都唔知係啲餅嘅問題定係西瓜嘅問題, 我二話不說就掉咗食淨少少嘅餅

其實踩車真係最怕係頭暈身㷫屙嘔肚痛, 基本上我係keep住一陣陣痛, 我即刻停低佢個位坐 同埋食咗啲正露丸

大概耽誤咗個零鐘開始正常返可以踩單車



我都幾鍾意呢個品牌嘅連鎖酒店, 價錢唔算貴 但係整體質素幾好,架車又可以推上房




踩過嚟嘅時候見到附近好似都冇乜特別嘢食, 所以我都係嗌美團外賣算, 嗌咗啲飯同埋啲補給品



送到上嚟我先知道原來咁鬼大盒, 有30包獨立包裝, 每包有三塊, 我諗慳啲食應該可以食到去西藏


食完飯批咗芒果,正


難得開推車上房,咁梗係順手洗下架車, 洗完靚仔曬



今日間房包自助早餐, 聽朝早啲落去食先
2019-06-30 00:37:16
的確,我鄉下啲親戚成日話共產黨麻煩又唔好
2019-06-30 00:52:45
一口氣睇到底 好羨慕 加油!
2019-06-30 08:41:37
咁你係廣東嘅時候有冇人提啊?
利申:深圳人
2019-06-30 09:07:33
輕輕問過下我
2019-06-30 09:27:03
唉 佢地最多只可以睇住冇乜好橋
2019-06-30 09:59:18
Live咗
2019-06-30 18:31:17
好熱血 加油呀樓主
2019-06-30 22:04:23
啱啱先到酒店,今日真係筋疲力盡
2019-06-30 22:38:30
樓主加油~
2019-06-30 23:38:55
好好睇,會繼續追~支持你
2019-07-01 00:40:51
今日冇文
2019-07-01 01:16:05
Day 19 正安

路漫漫其修遠兮

踩去西藏嘅旅程雖然仲有好長嘅路,但目標好明確。反觀人生呢個旅程,我卻一直找唔到方向

呢間酒店嘅自助早餐都真係算高質, 喺大陸來講。 有中式有西式, 都幾多人食




我食完上去執埋啲嘢都有啲晏, 到出發都已經 接近11點。 今日嘅目標係沿住呢個303省道,去呢個正安縣, 但一開始我已經感覺到有啲唔好對路, 呢條省道好似有啲伏味



途中我買咗六個饅頭做乾糧, 估唔到 去靠呢六個饅頭捱足全日



仲諗住揀條省道呀冇死啦,點知我真係後悔

全條路最靚係呢一段,大約一公里長


結束咗開頭呢段小起伏嘅路,之後都循例都喺爬坡, 但爬爬下發覺點解好似有上冇落咁嘅, 如是者我諗應該爬咗30公里坡同埋小小平路,爬到我都有啲懷疑人生




正當有啲灰嘅時候,見到兩個細路拖住隻牛行過, 我見佢地幾可愛,就畀咗兩包餅同埋啲朱古力佢哋, 見到佢哋個笑容我當堂心情都好返唔少


跟住冇耐就有個大落坡,當堂為之一振。 仲遇上咗有車壞轆攔住咗喺條路中間,卡死咗後面, 而我可以褪車順利通過



冇耐就經過一個村落,喺士多買嘅時候, 老闆娘問我喺邊度踩過嚟。 佢個女聽到我喺香港踩過黎就同我影咗張合照


佢哋仲同我講話下面有一大段路整緊,應該 要啲時間通過

當開始落斜路段嘅時候,太陽亦都開始落山。
不得不提個景真係好靚, 我一邊喺盤山落車一邊睇





個天開始黑 我亦與上咗嗰段超長嘅爛路, 咩類型嘅爛路都喺曬呢段路裏面 ,唔係講笑,連續落咗十幾公里嘅爛路坡, 我已經喺屁股輕輕離開座椅咁踩, 但都到凳到好痛。 呢段路認真難忘



心裏面不斷咒罵, 終於到咗爛路嘅終點。我見到一條大直路, 黎酒店又更近一步


又係我開心得太早,雖然淨番大概十公里到,但呢段入市區嘅路,都係要爬幾公里坡, 靠住車燈同埋士力架, 我幾快筋疲力盡嘅情況下先去到酒店




本身琴晚洗得好地地嘅車,而家仲衰過尋日, 唔想頻撲唯有叫美團 ,再加多盒生過

2019-07-01 01:17:24
好眼瞓, 一邊寫一邊恰眼瞓, 瞓覺先
2019-07-01 02:03:45
當你踩到318就會有大量游客當左你係景點,瘋狂同你影相越近拉薩就會越多
2019-07-01 21:42:30
Day 20 道真

踏入呢個旅程嘅第二十日, 我呢重慶得返兩日嘅距離。 係呢一路踩過黎, 由城市踩到去村莊, 由好路踩都係爛路, 都基本上係孤身一人。 你話有冇諗過放棄, 其實呢個念頭經常會喺我踩到好辛苦嘅時候出現, 但只要諗到放棄咗就唔會再有機會來過,準備咗咁耐,經歷咁多困難,而家先話放棄,甘心咩

一人一車, 經歷過台灣環島, 再到而家嘅西藏之行, 我經歷咗幾多佢就經歷咗幾多,咁耐以嚟冇爆過呔冇出啲咩大狀況, 對得我住有餘。
既然帶得佢出嚟,我要佢風風光光咁返屋企

講返今日, 由於太攰,我瞓到好晏先起身, 所以亦唔打算踩好遠, 近近哋五十公里左右。 我都懶得落去食早餐, 叫咗個芹菜牛肉飯外賣上黎


今日呢條路真係唔錯,一直都好順, 我經過咗間包店買咗幾個饅頭做乾糧, 饅頭真係最穩陣,又飽肚



今日呢條先至叫省道, 尋日我都唔知係咪行咗條假路




如是者好路上,加不斷嘅落波, 離目的地淨番好少嘅距離,見咁順利坐低食個tea先


我驚佢一個文化園區咁嘅嘢, 好奇兜入去, 啲館全部上曬鎖,人都冇乜,唯有走





就到住嗰度,見到有檔洗車, 我都唔係好頂得緊架車咁污糟, 我想問老闆單車洗唔洗, 老闆話五蚊雞,又幾平喎,係時候幫架車沖個靚涼




洗完新嘅一樣


洗完車同老闆坐低傾左陣計, 老闆覺得我哋香港好, 好繁華,人人都都好多錢。 其實唔單只係老闆一個,我遇到好多人都有咁嘅想法, 佢哋以前都係廣東打過工十幾年, 嗰時應該都係香港繁華嘅年代

「城裏的人嚮往田野的風光, 鄉村裏的人卻嚮往鬧市的繁華」

本身就搵咗一間旅店, 但去到發覺佢個位置唔係幾好,單車唔係太方便上去, 跟住我搵緊第二間店嘅時候, 有個阿姨過嚟問我係咪搵住嘅地方, 佢話佢嗰間嘢就喺附近, 我跟手係攜程 search一下又真有, 而且又住到香港人, 所以就去咗佢嗰度




我見時間早就出咗去附近行下,睇下有冇啲咩好嘢食, 見到間漢堡包店就食咗個漢堡



由於冇乜特別嘢啱心水, 所以我都係美團外賣算數。 不得不提大陸嘅外賣實在太方便, 配送費又平, 對比喺香港嗰啲什麼熊貓袋鼠,簡直係完勝


今晚早啲休息,聽朝直接踩入去重慶嘅南川區
2019-07-01 22:39:34
辛苦啦 巴打
2019-07-02 12:32:56
想問你啲路線喺點定?地圖建議出嚟?因為見到成日都有爛路,想知喺國道定其他鄉路?我踩過台灣踩咗幾日都唔跟地圖提供嘅走啦,行晒國道算
2019-07-02 15:58:17
用一個城市做大方向,之後每日臨訓前用地圖App定另一嘅路線,路線優先次序係國>省>縣>鄉>村, 但只要條路冇封,其本上地圖都會顯示為行到, 所以我前日行省道都可以伏到仆街

爛唔爛真係睇彩數, 因為貴州好多地方都修緊路, 你嗰一兩年呢可能已經全部係好路

台灣基本上唔跟地圖都冇乜嘢, 但呢邊唔跟地圖, 好大機會喺山區度收皮
2019-07-02 15:59:33
LMLMLMLMLM
2019-07-02 16:17:35
入咗重慶南川區,呢邊曬到hihi,要喪飲水補充
2019-07-02 16:42:48
係個陰涼嘅地方唞下先,拎車尾支水一飲,熱水黎嘅

2019-07-02 21:26:25
即喺你之前遇到嘅爛路都有喺國道出現?我之後都想好似你咁踩,但我諗住大部分都走國道
2019-07-02 21:36:33
國道未遇過爛
2019-07-02 23:30:13
Day 21 南川

本來諗住早啲起身,但係都係瞓到八點半先起身, 跟住出去收番啲衫準備出發, 點知發現少咗隻手套, 搵咗好耐都搵唔到

上次踩台灣已經發生過一次類似嘅事, 估唔到會再次上演, 仲要兩次都係唔見到右手。 我本身已經帶埋上次淨返一隻嘅左手手套出嚟, 以防萬一,都係嘥氣


跟住之後出去食咗碗牛肉麵,就開始出發踩入重慶南川區


接近重慶嘅路果然非常之暢順好踩




踩咗一段距離就終於入到南川, 但亦都非常之好天,曬到一個點


入咗南川之係一段比較長嘅爬坡, 但風景亦都係非常之唔錯嘅, 但由於太曬所以每踩一段, feel到有少少想中暑嘅感覺,要停低搵個陰涼地方歇一歇腳





直到踩到去呢條隧道就正式開始落坡之旅, 基本上係一直落到去南川, 嗰種爽快嘅程度不能用文字描述


其實我都真係幾鍾意踩隧道,尤其係嗰啲冇咩燈嘅隧道,唔應解會有種自癒感


過咗隧道係一個露營區,見到啲人野餐同埋佢見到馬,呢樣我真係估唔到, 見到馬我就有啲騎馬癮起,好想策馬奔騰



一直踩到落下面就會去到呢個金佛山嘅一個山門, 我稍為search咗一下,金佛山其實冇乜太大吸引



開始見到市鎮嘅影子, 離酒店都不遠了




呢條路都幾特別,佢個方向係正正向住太陽落山 ,你一路踩會一路畀啲陽光直射, 但幾襯佢個名- 金佛大道, 一路踩就有種佛光普照嘅感覺


途中仲見到間捷安特, 諗住入去買咗手套, 但啲款真係買唔落手, 我都係直接淘寶畀我嘅成都補給專員


今日入住嘅係呢間金佛山大酒店, 接待嘅小姐姐服務態度好好




稍為整理下之後就落咗去行咗陣街, 但發現行起路上嚟胯下好痛, 應該呢幾日嘅磨擦積累而成, 行咗一陣已經痛到唔想行,想搵個位坐低, 食咗個碧咸包


跟住拿拿聲去附近嘅超市買啲補給品,就返酒店



我都係 呢排先發現原來大陸嘅好多嘢都係秤重 例如麵包,係逐斤計



聽講 衛生巾係可以減少磨擦造成嘅不適, 我就買嚟試下, 由於咁大個人都未買過衛生巾, 所以隨手揀咗盒, 或者有冇絲打可以簡介一下點樣分類或者推介


食個包梗係唔夠飽喇, 再嗌多咗個水煮牛同埋 豬潤粉


食埋呢抽飯後巨峰提子就perfect
吹水台自選台熱 門最 新手機台時事台政事台體育台娛樂台動漫台Apps台遊戲台影視台講故台健康台感情台潮流台上班台財經台房屋台飲食台旅遊台學術台校園台汽車台音樂台創意台硬件台攝影台玩具台寵物台軟件台活動台電訊台直播台站務台成人台黑 洞