Day 56 江孜第三天
食完早餐就過隔離南尼乡嘅南尼寺參觀,呢幾日都好好天,和暖嘅太陽加上柔柔嘅風,真係好寫意
一如既往,我哋係去啲唔使畀門票嘅寺廟。 南尼寺比我想像中大, 但睇嘅嘢唔算好多, 遠遠比唔上內陸啲佛教寺廟咁香火鼎盛。 少咗啲人煙嘅味道,多咗份簡樸
睇完我又圍住個佛塔將啲轉輪轉咗圈,入鄉隨俗嘛。 之後就揸返去食晏, 途中遇到啲交警嘅臨時檢查點, 咁啱嗰陣時我哋以為唔使停就諗住喺側邊過, 點知就就被交警截停咗。 佢問我哋知唔知要停車,一個戴住副超著住短袖, 一個就揸住支金箍棒係,咪以為去取西經就唔使檢查。 之後叫我哋下次唔好就放行
食完晏,我地抖咗陣就出去。我想買名信片同佢地啲藏民孭起背脊嗰款手織羊毛斜孭袋, 可惜嘅係兜咗成日都搵唔到, 後來見到一個孭住成身袋嘅藏民大叔, 佢仲唔係賣袋嘅, 我問咗問價錢佢話百五蚊, 雖然我覺得有啲鬼但個質量係好嘅, 可惜個花紋唔啱心水, 我聽日再影畀大家睇嗰啲袋係咩樣
話說阿靖今晚就會抵達拉薩, 我哋諗住後日係呢個日客則會合, 一切報團去呢個珠峰大本營, 阿曦話冇錢所以唔去。 話說報團嘅話費用都唔平,去珠峰大本營兩日一晚就成千銀。經過客運站嘅時候我問咗問去日客則嘅客車班次同埋車費, 36蚊,坐一個半鐘
另外我亦都去咗公安局問有冇得搞邊防證, 佢哋話呢度冇,最近要去日客則
我哋漫遊英雄城嘅途中突然有個不速之客, 上咗你架車,係隻拉布拉多。 大概一個街口之後佢就落咗車
只有我哋諗住返屋企嘅時候見到一對喺街度截順風車藏民父女, 佢哋孭住一式一樣嘅斜孭袋,個花紋幾靚,於是我就問佢哋喺邊度買,佢地話自家製嘅,可惜啊。 咁啱我哋有順路就兜埋佢哋, 幫人嘅感覺其實真係好開心
之後返到去食完飯,因為出面落雨, 所以就留咗喺屋企睇電視, 開咗套電影岡仁波齊黎睇,拍得好寫實,加上自己一路入藏,啲情景好有代入感。他們地嗰份對信賴既虔誠同毅力真係好值得尊敬。 每個人做事都唔需要別人嘅理解, 只要走自己認為啱嘅路就可以了
本身計劃大概15號到就會離開西藏,坐火車經青藏鐵路入西寧再轉去新疆。 但如果南北疆大環線咁玩, 時間同旅費都未必夠, 因為我預計九月中之前就會返香港。 所以可能唔入新疆,去青海玩幾日, 過甘肅去敦煌睇石窟,之後就回程
但計劃歸計劃, 我不嬲係一個唔鍾意緊跟計劃行嘅人,而且人算不如天算。 到時隨機應變啦, 能走多遠走多遠
另外有幾個friend都問,旅程上識唔識到女, 我都笑而不語。 基本上除咗慧慧, 路上都冇乜同女交流過。路上踩車嘅女本身就少,我遇到嘅後生女五隻手數得晒,合眼緣嘅湖南妹,亦輪唔到我,而且之後再冇遇到過。嗰時阿靖仲笑住話,呢種資質係重慶一街都係,重慶冇野多,係靚女多。 跟住我同阿靖講,到時如果我一直搵唔到女朋友嘅你介紹個比我