[踩去西藏]四千公里的單車流浪日記 Live

阿曦可能想陪你先唔踩 btw 好好enjoy 餘下旅程

仲未分到邊個係阿曦 邊個係 阿靖

Day 53

起身就同醫生講打算出院，佢再三叮囑我唔好再踩住，唔係到時傷上加傷手尾長，雖然而家勉強行到又唔太痛，但呢幾日用拐杖磅下用會好啲

汁好哂啲野之後就落去辦埋啲出院手續同交錢， 除咗個五千蚊按金我仲要畀多千六蚊， 佢其他都唔算貴，最貴真係覺得救護車費。 喺大陸如果唔係有醫保，我諗好多人冇錢睇醫生


搞掂曬之後阿曦踩咗我架車去客運站，我就坐的士過去。 去拉薩嘅車有分大巴同埋商務，價錢分另是155跟185，由於商務有個位可以伸直隻腳， 對行動不便嘅我係user friendly嘅








經過四個半鐘嘅車程終於抵達咗拉薩。落咗車阿曦就踩我部車去布達拉宮，而我就坐三輪車， 沿途發覺拉薩同我想像中有啲唔同，嗰種人多車多，唔知點解令我有種泰國嘅感覺








三輪車唔可以直接洗到去布達拉宮前面，跛腳嘅我只有拐下拐下行過去。去到放好架車影相嘅時候就落雨，好快咁影咗幾張就走





之後亦係阿曦踩去快遞店，我坐車去，本身想寄順豐，但遠又就關門，只好搵最近嘅，揾咗百世，車連駄包連住院啲單齊寄走要三舊幾水，我真係怕百世寄失，再買多份寄失陪一皮嘅保險




估唔到今次西藏之旅踩單車嘅部分，係會咁樣結束， 亦令到咁多位期待我踩去拉薩既巴打絲打失望， 我爛尾了。 而之後我會繼續喺拉薩週邊隨心玩， 其中包括珠峰大本營，亦都會繼續出post直到旅程結束

而家最急切嘅問題係我要買個背囊，來裝我啲冇寄走嘅野，可惜冇平靚正嘅。算，呢個問題唔急，食咗野先



之後阿曦孻姑同姑丈就黎接走我地



痴咗餐羊肉晚餐

佢地話到屋企要零晨三點，要翻幾座山同經過羊湖，可惜夜晚睇唔到

無話難唔難尾嘅，你已經好勁，相信大家都唔想你格硬黎好好享受下西藏，係一個好神奇嘅地方，有時間可以去埋尼泊爾

算係唔錯
318唔推車唔坐車唔拉車唔送包完成到成程一成人都唔知有冇

3xx直寄香港？

唔係，寄去廣東比我表哥，回程返鄉下探親順利拎車

無話難唔難尾嘅，你已經好勁，相信大家都唔想你格硬黎好好享受下西藏，係一個好神奇嘅地方，有時間可以去埋尼泊爾

無帶passport

Day 54 江孜

尋晚去到阿曦孻姑屋企比預期早，點幾鐘。地方好大，仲有獨立房，休息一流


朝早起身食早飯，好多肉，佢姑丈叫我食多啲唔洗客氣，食多啲好快啲


食完睇咗陣電視，佢地班咗架電瓶車比我同阿曦出去玩




我地住呢度係江孜英雄城，齋聽個名已經覺得好有霸氣， 十足十武俠小說裏面啲門派







佢呢度有個類似小布達拉宮咁嘅寺廟， 亦都有一個比較出名嘅白居寺， 我亦都係呢度第一次係西藏見到外國人




兜兜下發現，架電瓶車冇乜電，我哋就即刻揸返去， 但係最後嘅800米就冇曬電，要推車

返到去之後我哋恰咗陣就食晏， 食完晏之後佢孻姑幫我哋班返咗架電動三輪車， 我坐副駕駛佢孻姑坐後面做導遊，展開下午嘅郊遊












差唔多時間就返去食晚飯， 今日嘅晚餐喺火鍋，係啖啖肉


食完飯我哋又出咗去遊車河， 個小布達拉宮夜晚仲會著燈， 遊完就返屋企準備瞓覺



阿曦孻姑屋企真係個休養好地方， 有豐富嘅三餐同埋良好嘅休息， 應該可以好快就康復，到時就可以行上山上面的寺廟

致樓主：

我追到Live。

睇到你撞傷膝蓋同屈伸有問題。我都試過喺越南單車炒車遇上你同樣情況。尤其是屈伸唔到，我最後返回香港醫足四星期骨科，證實係滑膜炎。我估你的情況都好大可能係滑膜炎，係膝蓋發炎積聚滑液，需要四星期先可以復元。唔似係積血呀。

如果你現在屈伸進度未理想，真心建議要停三數星期，甚至不如要長一些。

我當年炒完車，唔知釘從會安到芽莊繼續踏多五天，結果膝蓋關節屈伸唔到，回港後先知出事，要呆到兩星期先屈到小小，直到四星期後屈得返，以為好返，跟住再返越南踏埋佢，直到胡志明市，點一知無耐又屈伸唔到，返香港繼續醫，連衝擊波同打類固醇針喺膝蓋先叫做好返，但膝蓋的軟組織位開始硬化，跑都無以前咁靈活了。

樓主，自己衡量下去唔去埋佢，萬事小心。

多謝巴打，情況真係好似，我會小心。車我寄走咗，唔踩了，睇下過幾天屈嗎屈到膝，如果情況唔理想，睇黎真係要結束行程返香港

btw，你受傷嗰時，有冇小便嘅時侯膝頭會痛呢個情況

小便膝頭痛就沒有. 只是很長時間屈伸唔到、好似打肌肉硬化針咁

Day 55 江孜第二天

今朝起身食完早餐，同阿曦姑丈傾咗陣計。原來佢三十幾年前就黎呢邊打工開荒，嗰時呢邊好荒蕪，綠色嘅野都見唔咁濟，好大風沙，冬天嘅時候係零下20幾度，而家窗外既田野全部係後來開墾，山上面好多樹都係國家撥款種嘅，慢慢發展落嚟呢度先開始多咗啲人氣



之後佢孻姑带咗我哋去參與呢度一年一度嘅盛會達瑪節，簡單黎講就係一個賽馬加年華，有市集，有表演，有馬跑，真係人山人海，好熱鬧











由於行動不便，我全靠大聖爺支如意金箍棒嘅支撐下，先可以頂得住


途中我見到呢啲不明物體， 我問阿曦孻姑，佢話呢啲叫奶渣糖。 我買咗一串，食落又幾好食， 唔知係咪度度嘅味都係一樣， 奶味之中有啲黃瓜嘅香味


午餐


食完晏就去週邊遊車河，阿曦十足十個包工頭。經過左一個好大嘅太陽能發電場





遊完車河就返去，阿曦就訓晏教，我就係電視睇電影。話咁快就食晚飯，每一餐嘅標配係多肉加一支雪花純生



一邊飲純生一邊望住窗外嘅風景， 彷彿就好似以前暑假返鄉下玩一樣，好休閒好舒服。 但自從出嚟做咗嘢之後鄉下都好少返了， 真係好懷念細個嘅時候。 人就係咁奇怪，大部分時間都係喺度祈望未來同埋回憶過去， 細個嘅時候就想快啲變大個， 但大個咗就發覺原來細個嘅時候先係最開心。又有幾多人可以把握到現在

食完飯抖咗陣，佢地帶咗我哋去一家唔洗比入場費嘅寺廟-日追寺， 而我亦都為住個寺廟將啲經輪轉咗次， 希望可以轉走啲衰氣。寺廟旁邊不遠處仲有個天葬嘅地方，佢哋稱為斬人台。 我個人認為天葬呢個形式係幾好， 生於自然回歸自然







呢到就係斬人台



講起葬禮， 我希望自己將來死嘅時候係可以將自己嘅灰撒係一個呢生人去過而又最難忘嘅地方。 在生嘅時候已經困係間屋裏面，唔通死咗都要長期困起個幾尺地/龕位？ 我就寧願隨風飄揚或者回歸自然， 如果有子孫嘅，佢哋都唔使喺清明重陽咁辛苦搞場大龍鳳，又金銀衣紙又燒豬

呢度就係我尋日同大家講嘅小布達拉宮(我稱為)


夜景亦唔錯

加油 要堅持落去
路上平安

塞翁失馬
好好地咁抖番隻腳先
之後再踩過

安全無價。 最多好返晒第日踏過第二條PATH，例如越南、柬埔寨、泰國，唔怕爬坡仲可以去埋LAOS。又唔係貴，GOOGLE TRANSLATE可解決言語不通問題。

當初唔係炒車，我本來都踏埋柬埔寨、泰國同LAOS。。。

啱啊，真係安全至上，只要傷患好返，仲可以去唔同地方踩

傷筋動骨一百天，巴打多多休息，減少膝部勞損。不過我可以預見養傷嘅呢幾日，你嘅體重會好似火箭般上升

一個人出走, 其實最唔好既係中途結伴長遊 , 雖然係多左個照應. 但都失去左探索自我既時間 .

去西藏, 2個人都已經嫌太多 . 去西藏唔住青旅都係一種損失.

終於用咗兩日追完其實我自己都想去踩車 但身邊啲frd唔係唔識踩 就係真•專業車手 我自己對上次真係踩就已經係十年前無車又無體力 搞到我都唔知去邊到揾人一齊踩
加上依家又出咗國讀書 唔可以話想踩就踩 一定要等term break先可以玩 搞到我有心無力
不過點都好 巴打要take care

支持樓主繼續比我地遊記
無爛尾, 我覺得你好勁

阿曦同佢嘅親戚都好nice

住耐啲真係會火箭般上升

我都覺，白吃白住到我都有啲唔好意思

未復完之前，係阿曦孻姑屋企休養應該係我目前最好嘅選擇，正常行到之後返拉薩住青旅識下人拼下團週圍玩