[踩去西藏]四千公里的單車流浪日記 Live

終於追返晒post 巴打你嘅旅程好精彩
途中真係遇到好多意想不到嘅人同事
咁有情有義嘅中國人真係冇可能喺香港會見到
追post追得好過癮 希望巴打你隻腳快d好返

打好用Google翻譯

的確係，有情有義嘅中國人係香港好難遇到

巴打好勁，香港之光

Day 67 坐火車去成都

自然醒叫咗個美團，由於有促銷活動，牛炒牛肉飯+蒸餃+烚蛋+野飲先11蚊，叫我如何抗拒



食完早餐我出咗去前台登記拼晏就飯，同前台小姐姐傾咗陣計，佢北京人，本身讀緊研究生，但中途唔想讀，就出咗黎全國週遊，佢見我係香港人，話用繁體字好好，因為係承傳緊中國傳統文化，就呢一點我要比個讚佢

佢比我嘅感覺有啲似愛情公寓裡面嘅美嘉，但我唔係呂子喬

傾完我就返房翻訓，訓到佢叫我起身食飯。拼餐算唔錯，味道可以


之後我返房收拾行李準備出發。由於得返唔夠500人仔，呢排過深圳又查手機又盛，啲fd返去幫我過錢都有危險，所以唯有慳住洗。只好坐1蚊雞公交車去拉薩站。但平野通常冇好，等咗成個鐘先有車


上車有位我好感動，恰咗恰就到站了。落車行大概五分鐘入站，然後去咗售票口拎票。香港人最麻煩嘅就係冇得用機取要，一定要窗口人工取票 ，又要排隊等


拎完票就檢票入閘，去侯事室等上車。夠鐘入閘就好似走難咁




上到車第一時間去補票室排隊，居然係第一個。等啊等，終於開車。佢先要幫冇買飛嘅補無座，再黎就係去統計有剩嘅硬卧，但最後得5個上鋪，但我上唔到去


唯有繼續等，乘務員比咗張櫈我，等到肚餓就買咗個飯盒，又幾好食




本身打算補唔到，就好似呢個大哥咁


等到下一站，終放等到中鋪，我訓到係床嘅時候已經11點



不得不提排我後面嘅一個男仔，佢為咗比妹妹有得訓，都企住排咗好耐，補嘅床位係我隔離。而佢仲坐出面走廊守夜，真係難得

漫漫長夜啊

加油

係喎 其實最後阿靖係發生咩事 話佢突然古古怪怪嗰幾日

我之後有問過佢，佢話冇野

全身得返100人仔嘅感覺係點，我而家知了

樓主洗唔洗幫手? 我可以WeChat過人仔畀你, 你返香港Payme我就得
要就TG我pcKouji我畀WeChat ID你

利申: 深圳做野, 香港人

你加我id:lywinyip<--wechat
我可以過住啲人仔你你之後Payme我

先各謝兩位巴打咁有心，我唔好意思麻煩你地

我搵咗表姐過錢比我，唔洗訓街了

Day 68 火車上的時光

朝早自然醒，起身好舒服，求其食咗啲乾糧做早餐，諗住再訓過。但班嘩鬼係出面嘻嘻哈哈，又有個細路女係下面床喊，我只好玩手機





睇一睇微信錢包， 得返一百蚊，開始有壓力，有訓街嘅節奏。感受咗呢份壓力兩個鐘之後，我發咗個訊息，表姐就解決咗我嘅問題。我好怕差人錢，而家差落周身街數，只有返香港先還，早知就入幾皮人仔落大陸戶口

下午嘅肚餓嘅時候，我問尋日幫妹妹排臥鋪嘅男仔劉星幫我買同泡個杯面，佢二話不說就去，呢個細路我幾欣賞


我係走廊食緊杯面嘅時候，特然有個乘務員突然開始同我哋導賞，話我哋坐緊呢段全長1978公里嘅雪玉鐵路，歷時三代人先建成，到西寧前會經過一條唔可以影相嘅隧道，為咗悼念當年興建而犧牲嘅人

而且因為可可西里昨日地震完引起沙塵暴，所以影響埋呢邊，令出面灰濛濛，但之後一個神轉折，就開始賣奶片




有經過嘅世路問我係咪藏民，我話係香港人。之後就有人同粵語係隔離講，我都係，估唔到咁巧合

一傾之下，原來Michael都係踩車黎，由上海出發踩318，更巧合嘅佢住我附近，真係有緣。

係四點半嘅時候，車到西寧，我地全車要轉過對面車。由於Micheal係西寧玩，我去成都，所以就此分別，留影一張



過到對面車，由於太多人， 而車程剩低十幾個鐘，所以我冇去掛補票。去到7車77號嘅位，我見到對面坐咗個幾靚嘅女仔，好似千指大人劉泳希，係戀愛嘅感覺

我不經意咁成日望過去，就好似痴漢一樣。但無耐之後佢個位嘅主人到了，佢亦去咗第到。大家唔好問我點唔加微信溝下，冇他嘅，因為我唔識溝女，如果唔係都唔洗單身咁耐。靚仔真好，把口浪過油真好

巧合嘅野又再出現，尋日一齊排臥铺嘅嘅女仔原來坐我隔離位。一個幾靚嘅四川姑娘， 我覺得自己開始行好運了，終於有後生女坐隔離

車開之後，我哋呢個區域因為個藏族細路而變得好熱鬧



之後手機冇電，諗住去充電，點知得臥鋪車箱有插頭，而且我地過唔去。所以打算係餐卡食小小野就返去坐


食完準備返去嘅時候，我見到劉星嗰妹，佢出黎買杯面返去，我就順勢跟住佢混入臥鋪車箱充電


但充得好慢，我一邊充一邊同個係走廊食面嘅阿叔吹水，吹咗一陣我就返去

返到去就聽坐鈄對面大哥嘅分享會，聽到11點，就準備訓教，但有啲訓唔著。手機又冇電了


隔離小姐姐都訓唔著，我地就一路傾計，乜都傾一餐，傾到成5點。大家先眼訓恰到6點幾到站，落車前加咗佢微信，但我直覺我地應該唔會再有機會見面




出站後，我嘅心情彷彿同成都嘅天氣一樣，灰濛濛


失落嘅我又哼起一首歌

我遇見誰會有怎樣的對白 我等的人他在多遠的未來

坐係度訓真係種超能力嚟

成都好多靚女，巴打唔好灰心

巴打去成都酒吧一條街 大把女

陣緊約咗慧慧同另一個上次唔係成都嘅女仔fd，有兩個靚女陪食飯，心情可舒暢返

追到而家

Day 69 重返成都

落火車打咗個滴滴去酒店，去到可以提前入住，仲幫我免費升級，太好了，可以訓教了


之後當然係嗌個早餐喇， 餓住點瞓



食完早餐我就瞓，瞓到下午四點幾先起身。 沖涼梳洗下再去搵個fd小七。 而我亦順便將個頭拆咗， 喺四川啲邊唔想咁突出


小七住嘅酒店係耍都， 本身諗住同佢住同一間酒店，嘅但佢嗰間係唔接待香港人 。 所以我先搵到第二間

我過去嘅時候佢已經嗌定曬啲嘢


我哋食完嘢就係周圍住等慧慧放工， 點知為話要加班你唔到，叫我哋自己玩。 當我哋諗住去清吧飲下嘢，慧慧話推咗加班直接出嚟

跟住我哋合咗之後就去清吧， 去嘅途中慧慧畀人邀請咗去做訪問




但去到清吧好多人要等位，所以我哋決定喺附近買杯嘢飲，係周圍行下街




行行下我哋就決定去搵間火鍋店食下嘢，坐低傾下偈


小七開始講自己嘅感情經歷， 前男友點渣男法，曾幾為咗佢節衣縮食，食咗一個月杯面。 佢有一句係我特別記得， 當你好鍾意佢嘅時候，就算你明知佢呃你，都會心甘情願。亦都係自己比咗機會畀別人傷害自己。但聽佢講而家男朋友對佢好好，作為朋友就安心了

上次亦因為慧慧同個渣男男友分手自己出嚟旅遊散心， 我同小七同佢咁啱就係同一架車上，於是我哋就結伴一齊玩， 之後都keep住有聯繫

只要受過傷嘅，你之後都唔會義無反顧咁付出。 就開始變得對方走一步自己就一步，對方退一步自己退一步，只因害怕被狠狠嘅再傷害一次

係傾計嘅過程當中， 討論到點樣嘅男人係比較吸引，果然係壞男人更勝一籌。 佢屋企人曾經介紹過啲老老實實嘅男仔畀佢哋， 但佢哋都覺得嗰啲男仔感覺好悶

作為一個老老實實嘅男仔情何以堪。 曾幾何時都想試下學做一個壞男人，player， 可惜你性格係個毒撚就係一個毒撚， 只有收好人卡同做水泡，邊有咁易改變。 既然改變唔到性格，唯有好好感提升自己， 學多啲唔同嘅嘢，接觸多啲唔同嘅嘢，令自己變得更有内涵

你若盛開，清風自來

慧慧聽日要返早， 我哋見時間差唔多就叫佢早啲返去休息。 跟住我同小七食多陣，我就先送佢返酒店， 我再搭車返去

聽日我同小七可能會去動物園或者水族館求其行下hea下，之後夜晚等慧慧放工再一齊食嘢

呢種冇行程好隨心嘅生活真係好舒服， 但呢種感覺好唔真實。 當呢個旅程結束嘅時候就要回到現實世界了

四川囡囡好似唔錯

尋日我睇咗陳秋實律師嘅片，一個有知識會思考，追探知真相嘅人。佢冒住咁大風險，幾本上可以話賭上性命，去將自己係香港嘅所見到嘅放上微博。希望更多人可以更全面咁了解今次香港發生嘅事

係一個好值得respect嘅人。講真，係中國旅行咗耐，遇到過好多高質既中國人，有情有義嘅，亦有係學識淵博而且對事物有批判性思考嘅。 佢同係香港見到嘅大陸人好唔同， 當你遇到佢哋你就覺得如果中國多啲呢啲人，成個國家會唔同晒

但可惜嘅係喺中國呢個無論係資訊同言論都壓制得咁犀利嘅地方，清醒而又企出黎嘅人往往冇好下場。 所以好多人都選擇明哲保身， 只私底下厭惡政府，但永遠都唔會企出嚟

出生係呢片土地，一片擁有幾千年歷史，地大物博，風情萬種既土地，我從來冇覺得係件唔好嘅事，亦唔會否認自己係中國人，因為錯嘅唔係呢片土地，而係當權者/政府，只希望自己嘅國家可以變得更好

我唔答你

Day 70 成都第二天

朝早九點幾鐘就醒咗， 由於小七話冇咁早醒，應該大概十二點，所以我就慢慢食下早餐，洗下衫同埋，睇下電視先

今次嗌咗個都係十幾蚊嘅飯，真係覺得好鬼抵。 美團絕對係一種令懶人更懶嘅工具，幻想唔到香港有美團， 而且個普及程度好似大陸咁，會變成點



喺嗌美團嘅時候已經上咗去洗衫，食完美團就可收衫。 之後就開電視睇，咁啱江蘇衛視就播緊非誠勿擾， 呢個節目由我細個返鄉下已經播緊， 播到而家仲有得播。 不過係幾過癮嘅， 我曾幾何時都有諗過自己將來會唔會參加到


仲未收到小七信息我就繼續睇啦， 佢第二套係播呢個什麼新時代相親， 個名我都唔記得啦。睇落又幾搞笑， 因為呢個節目係阿爸阿媽都會坐埋上去幫個女做代言人， 男嘉賓最初係見唔到個女嘅樣只會見到佢哋家長， 但其咗個阿媽真係太肥，所以好想男喜賓都覺得佢個女唔靚。 但其實佢個女係幾正常，今晚我睇嗰陣佢係順利牽手



之後小七就話差唔多到，我就落樓下等佢。 只有我哋去咗呢個雙流區嘅萬達廣場食嘢





食完就去呢個浩海立方海洋世界




門票唔算貴百零蚊，如果提早一日，可以買嗰個省外旅客門票只需要80幾蚊。 裏面有啲似海洋公園嘅海洋館， 但呢度大好多同埋佢嘅物種都多過海洋公園， 亦都有好多呢個後生女過嚟參觀同埋影相











行咗幾個鐘離開時候都已經七點， 我哋就坐返車過返去等慧慧放工。 由於塞車去到嘅時候變咗佢等我哋。之後佢帶咗我哋食嗰間甜品， 轉食呢個椰子凍，味道非常唔錯



食完前菜就到主菜啦， 今晚我哋去食小龍蝦。 小龍蝦可以講係一樣係我食過返唔到轉頭嘅嘢， 而且呢邊夠地道又唔貴， 最後我哋三個人食咗七斤半小龍蝦


跟住我就算送佢哋返屋企再返酒店， 返到酒店嘅時候見到檯面放咗張卡同埋一碗冰粉， 我當堂覺得好窩心，對呢間酒店嘅印像都提升咗唔少


聽日小七就會搭飛機走， 而我另外一個係成都嘅女仔朋友亦都會隆重登場， 我都唔知點解喺成都識親嘅朋友都係女仔

明明諗住休養，但點解好似日日都係出去行街睇戲食飯

唔得，我後日要搵個中醫睇下針灸一下