Day 26 樂至
成日諗住早啲起身踩, 但次次都成九點先起身。 食完個自助早餐就拿拿聲出發, 唔想耽誤太多時間, 因為今日踩一百五十公里
出發咗冇耐就喺路上遇到重慶出發四人眾, 發現大家個目的地都係樂至, 所以就一齊踩。
佢哋四個都係十八廿二, 有兩個係高考完, 有兩個係大學生,年青真好。
我哋喺路上亦遇到徒步去西藏, 我哋搜咗佢個抖音,有三十幾萬粉絲
之後我就一直同四人眾踩, 我發現自己踩得認真咗, 可能平時自己一個推動力係爭咁啲
同佢哋四個速度上都幾夾得嚟, 我喺前面做呢個領航員,佢哋一直跟住我。 要保持一定嘅速度又唔可以呢佢哋太遠, 又可以鞭策到佢哋 。 我哋一直踩到去安岳先停低食啲嘢, 嗰時距離樂至仲有三十幾公里
我哋入到市區, 差唔多八點, 見到喺廣場度有好多好多大媽喺度一路跳一路圍住轉圈, 唔通呢種就係愛的魔力轉轉圈
由於佢哋嘅旅費有限我哋揀咗間比較平嘅賓館, 佢哋四個人開咗間雙人房, 我就自己一個開咗間單人
梳洗完之後我哋就一齊出去食燒烤, 飲下啤酒傾下偈。 不過好多時佢哋啲重慶話,我都唔係幾聽得明,要佢哋用返普通話同我講
原來佢哋組織西藏之行嘅時候, 本來係有30個人, 但最後成行嘅只有佢哋四個, 而且佢哋嘅家人都係有反對, 不過亦都冇咗佢哋嘅決心
同埋佢哋都話遇到我係一種緣份, 如果唔係我帶住佢哋,佢哋未必踩到黎樂至, 可能喺前一個市鎮就停。 其實我嘅諗法都係同佢哋一樣, 見唔到佢哋可能我都冇動力一直踩到樂至
佢哋仲介紹咗啲內地嘅文化畀我, 例如社會人, 簡單啲嚟講即mk仔/ 而家嘅殺馬特,忘了愛啲fd
仲有原來佢哋平時返學, 老師上堂嘅時候都係用重慶話, 如果老師係用川普上堂嘅話,佢哋會笑鳩個老師。 反觀香港, 連粵語教中文都不復在, 細路平時喺學校交流都用普通話, 咁樣仲點會有一個好嘅承傳
但食完其實我都有啲唔夠飽, 唯有返賓館食個杯麵
我哋聽日會繼續一齊踩去成都, 到成都就要分道揚鑣, 佢哋留一日就會繼續出發, 我就會留幾日,可能再次見佢哋嘅時候就已經係拉薩了