[踩去西藏]四千公里的單車流浪日記 Live

樓主有冇計過用左幾多錢

Day 74 成都第六日

訓到十點幾，又嗌咗個pizza，早午餐一齊食


食完飯就睇書， 其中一段係講輪迴。 我就喺度諗，如果輪迴係成立嘅，基本上呢個世界嘅靈魂數量係咪固定咗呢。咁我地平時清明重陽去拜嘅先人， 話唔定已經轉世投胎咗， 已經接收唔到我地啲香火

如果冇輪迥呢樣野，只有天堂地獄，咁係咪死咗冇咗肉身，靈魂得到釋放，先係真正開始？好似電影The Truman Show/The Thirteenth Floor咁，我地生活嘅世界係一個假像呢

夜晚我地去咗環球中心食野



聽朝坐十二點半嘅火車過廣州，坐九個鐘

應該兩萬有多

我好少會追足曬成個遊記嘅post 樓主你打嘅野真係好正 令到我都好掛住前兩年去西藏嘅日子 可能我個陣上珠峰嘅時候天氣好好 清楚睇到成個珠峰 個感覺都好震撼 原來自己離世界最高點係近左咁多 仲有珠峰嘅星空簡直係難忘！（雖然因爲高反淨係望左一秒）但真係好正
好欣賞你踩單車上去嘅毅力 讀萬卷書不如行萬里路 呢句真係要經歷過先真係知點解 希望你早日搵到一條岩自己行嘅路 加油

多謝絲打

Day 75 過廣州

今朝起身嗌咗個飯就開始梳洗同收拾行李。行裝唔多，一個迪卡儂背囊，一個羊毛斜孭袋，加個手抽同腳架。好快就汁完，等飯到

嗌咗個健康輕食飯盒，黎到一打開，心諗同原圖差咁遠嘅，好在味道唔太差，份量幾足



搞掂野退埋房就call滴滴去成都東站，車程大約二十分鐘。去到又係排隊換票，再安檢入閘，過程幾順利。大陸啲火車站真係長期都咁多人，而且大家都好鐘意埋晒係檢票口，好似先入會有金拾咁，我真係唔係好明

上到動車到坐好，準備展開9個幾鐘嘅征途。雖然係長途，但動車比普通綠皮火車舒服好多，個位闊落啲，椅背又可以挨後，同埋有插座


我隔離唔係坐囡囡，而係個三十歲到嘅男人，大家閒聊咗幾句就各自做自己野。我玩咗陣手機亦訓咗陣。有車仔推過係賣野食的，本來想買酸奶，但問咗下幾錢，12蚊，比平常價翻咗翻，咁貴，不了

我走之前亦都有同四川姑娘講咗句再見，佢回咗一句江湖有緣再見，我回咗句姑娘，後會有期。唔知會唔會再見到佢呢

六點幾有啲肚餓，我就買咗個火車便當，45蚊，紅燒牛肉。味道正常，食得飽，頂下肚。但估計夜晚都係要食宵夜

阿媽叫我返香港前剪返個短髮，但我係唔會的，留咗大約一年有多，可能真係有感情。經歷個唔長唔短嗰個最想放棄階段，加上香港嘅天氣，就知留長唔係咁易。亦因為留長咗，明白長髮易打kick，吹頭耐嘅煩惱。但而家好享受唔洗煩剪咩髮型，就咁紮起就出街嘅方便

雖然我平時好隨和，做好多野都三分鐘熱度，但有啲時候都會好倔強，認為想做嘅就唔理人點睇點講，有呢種性格究竟係好事定壞事

耳機中響起咗段熟悉嘅音樂，令我回想返好多野

這十年來做過的事
能令你無悔 驕傲嗎
那時候你所相信的事
沒有被動搖吧

對象和緣份已出現
成就也還算不賴嗎
旅途上你增添了經歷
又有讓稜角 消失嗎

軟弱嗎
你成熟了 不會失去格調吧
當初堅持還在嗎
刀鋒不會 磨鈍了吧

老練嗎
你情願變得 聰明而不衝動嗎
但變成 步步停下三思 會累嗎

現在嘅我快樂嗎？

「列車即將到達廣州南站」
列車嘅廣播將我從回憶帶回現實，係時候要下車了


坐上尾班地鐵，去我fd屋企，點知落早咗一個站。當我發現並且回頭嘅時，它早已遠去。我只好打車過去



去到嘅時候阿姨開門比我，話我fd班機delay咗，冇咁快返到。肚餓嘅我點咗份13蚊嘅外賣，唔知食完，佢又落機未


係未嘅，最終佢1點半先落機， delay咗兩個鐘。機場返呢度要成一個半鐘， 我唔等佢了

睇完你咁多日打嘅野 有啲位都發覺同你都有啲似
我覺得去旅行係一個好好嘅時刻去認識自己 但我就冇你咁有恆心日日帶遊記
你話你做野三分鍾熱度 都唔係丫 至少你堅持到踩單車踩咁遠 呢點我真係好欣賞
Btw我今日interview 都衰左 衰在自己準備唔夠 唉
都係時候去個旅行散下心
巴打加油 我諗你呢個旅行最辛苦嘅唔係係爛地單車/上斜 而係當呢個旅行就黎完 即將要回到現實世界嘅時候吧

旅行吧

都係，結束行程嘅時候會有種唔想回到現實哋失落感

樓豬之後有咩打算？

Day 76 廣州停留日

訓到11點幾，係餓醒。嗌咗份小菜，邊玩手機等食。等下等，咁耐仲未地嘅，睇下個美團，頂，騎手仲未拎到個餐。等咗成鐘有多，超晒時，真係嬲嬲地，我果斷退款。改嗌最快送到嘅漢堡炸雞薯條


又係度假般嘅生活，睇書睇戲睇手機，直到夜晚去食飯。我個fd請客，幫我慶功，其他係廣州嘅朋友都有黎。兩個幾月無食過日本野了



食完我地有人話去染髮，於是我地集體去咗salon。三個染髮，一個電，我就齋洗


搞咗幾個鐘先全部人搞掂，之後散水都11點半。為何夜深總是有啲肚餓，返到去叫咗隻乞兒雞同fd一齊食



聽日會返鄉下，睇黎隻腳嘅事都係瞞唔住了。算啦，既來知，則安之

有幾個小方向嘅，但見步行步啦，際遇嘅呢家野好難講，未來太遠了，我只想活好現在

1.去做學徒學門手藝，例如甜品/煮野食
一邊學一邊儲錢，到時就睇下有冇機會去鐘意既城市開間鋪頭仔，過啲小日子

2.做返老本行，將工作當成係時間換錢，唔講咩興趣唔興趣，有冇滿足感。平時去學多啲野增值下，得閒去下旅行彌補下。又回到原本嘅軌道

3.認命，剪返短，做個矯視，去考個消防員之類嘅紀律部隊，安安分分做人，循規蹈矩。過屋企人想我過嘅安穩生活，直到死去

4.如果街到有高人話我係有緣人，要傳我一身衣缽，我亦相當樂意。

5.無限可能

終於睇晒 返工用左成個禮拜睇
睇到中段有D懷念幾年前去過甘肅青海 不過當然係包車去
果種日日望住無邊際大地無高樓大廈既感覺真係好爽
同埋日日同團友一齊高歌 夜晚食串燒飲酒
無憂無慮既日子
唔知幾時再有機會咁樣去旅行

無憂無慮既感覺真係好正

但係香港係奢侈品

一路追Po, 發現巴打好擅長內省
只要目標明確, 耐力同認真十分驚人。
其實兜轉最難既, 唔係三分鐘熱度, 係搵一個人生方向。我都仲努力緊。

Day 77 順德

今日起身汁埋野落fd間鋪食埋個飯就準備走


本身打算坐火車，但要坐地鐵去南站，轉黎轉去，又一抽二拎，所以打車過去算。廣州過順德三十幾公里，call滴滴100蚊左右，快捷方便



大約45分鐘就到樓下


姑姐姑丈見到我，就問我隻腳做咩搞成咁。我梗係話自己係四川跌親嘅。姑丈話聽日帶我去睇骨科，好返先返香港

之後夜晚我地去咗飲茶，食得耐辣野，而家食返啲廣東野都有啲唔慣


夜晚同表姪女食宵夜

二十五歲

好運嘅，人生仲有三份二時間

如果要用一句話嚟總結呢咁多年，就係一事無成。細個嘅時候，屋企人總會對自己充滿期望，自己都有種將來一定會成功的幻想。可惜嘅係，當慢慢長大，就會發覺自己其實只係一個不折不扣的普通人，並沒咩與眾不同，而因呢份反差而來嘅失落感，並唔好受

作為一個普通人，按照香港嘅普世價值，理應安份守己，揾份穩穩定定嘅工，考埋政府工或紀律部隊就更好，到差唔多年紀就成家立業，然後每日反工放工度日等退休，平平淡淡咁過一生

畢左業嘅頭幾年，嘗試安份守己咁做一個普通打工仔，但慢慢發覺咁樣日復日做同樣嘅野好枯燥，見到新入職嘅同事就好似見到最初嘅自己，而啲班阿叔就係十幾年後嘅我，心裡面難免有絲慨嘆

身邊好多朋友同事都叫我考紀律部隊，唔好出面晒時間，亦係Instagram見到好多佢地入班出班嘅相，可惜嘅係我偏偏有顆叛逆嘅心，唔想咁快屈服

其實我好羨慕嗰啲有明確目標方向嘅人，起碼知道條路點行，而好似我咁冇目標方向嘅，就好似置身係迷霧森林，唔知幾時先搵到出口。

平凡嘅人卻擁有一夥不甘平凡嘅心，我唔知咁算唔算係可悲

平凡人卻想變得不平凡，同樓主諗法好相近

啱啱返完intern，望住d 同事做到隻狗咁，朝8晚6，雖則可以大大聲同人講我係乜師物師，但真係不甘呢一世人就咁過。我呢個年紀體能要考紀律步隊真係易過借火，但入到去真係好難走返出嚟做其他野。

所以襯而家後生，未有咁多包袱，任性嘅成本比較低時，就好快d 做自己想試嘅野。
我都係因為咁先會sem break 踩去尼泊爾。

希望尼泊爾唔係我嘅終點，而西藏亦唔係你嘅終點。

共勉之

共勉之

我覺得番工佔左一個人生命三分二時間，其實唔係一樣自己有興趣又有滿足感既行業係好可惜既。
只係隨時間人既需求會改變，每到一段時間抽空審視下係一件好事呀。
利申：試過quit u 幾年後同一科再畢業

而家左邊腳啲肌肉明顯有痿縮，啱啱係醫院做物理治療，聽日再照磁力共振