[踩去西藏]四千公里的單車流浪日記 Live

已經適應咗，今日爬第三座山高爾寺山，海拔4412，一啲事都冇

樓豬加油

Day 36 相格宗

今日要翻過第三座山， 海拔4412既高爾寺山

本身我哋都較咗6點20分嘅鬧鐘， 可惜真係太好瞓， 我哋最終八點鐘先起身。 呢邊一停電的確係好平常， 起身嘅時候都係冇電嘅


之後就拿拿聲執好啲嘢準備出發， 你老闆見到我哋準備走， 又幫我哋裝水又幫忙攞行李， 仲介紹埋附近邊度有早餐食。 真係要推介下老闆間店




開始十幾公里嘅爬升， 喺路上見到原來離拉薩仲有大概1600公里





見到呢條隧道， 我就知又翻過一座山， 高爾寺山嘅海拔畀折多山高， 但係我一啲高反都冇出現過， 我諗我已經適應咗



緊接住嘅就係有成三十幾公里嘅持續下坡， 直達雅江





入雅江食咗個晏





之後就係連續十七公里嘅爬坡， 而且好猛太陽， 我諗最少有30度。 沿途有樹蔭嘅地方基本上都見到有騎友係到休息， 仲見到個帶埋隻狗 嘅徒步者 同前人留低嘅寫咗字嘅石塊





哋踩到隻狗咁樣， 喺離目的地仲有四公里嘅一間超市買水兼抖下， 藏族老闆娘問我哋住唔住宿，。問一問價錢，發覺都幾抵，每人50蚊住宿加早晚餐， 所以就住咗落嚟



老闆娘知我哋未飲過酥油茶，就去整咗一壺畀我哋飲。 我覺得幾香幾重奶味 ，係幾特別嘅



晚餐我哋都唔想老闆娘特登煮一枱畀我哋， 所以直接同老闆娘一家一齊食， 食飯都係人多比較開心啲

樓主踩得好hea
仲要難得隊友都係

我覺得樓主岩既 出現過高反 要慢慢踩 習慣左先

hea咩

只要keep住踩，路上其本上只有我哋超過其他騎友，其本上都未比人後來居上過，究竟係我地快定佢地慢

係我哋前面嘅阿曦同旺仔，係茫康意見不合，一個想趕行程，一個想慢啲感受下，旺仔唔踩直接搭車返重慶

我個陣由瀘定踩到折多塘、折多塘再到新都橋，但我見你成日都有半日時間休息，我成日8點鐘就已經出發，時間好用好多

其實依家用左大概幾錢

加油，女呢？

大約9千到

半日就冇嘅，但食飯+小休最少2個鐘，停低食下野睇下風景，加上阿靖食完飯要抖半個鐘先踩，如果唔係會胃痛

話咁快就一個月

四人眾既阿曦自己一個踩緊？ 幾時會join埋佢一齊踩？

支出大概係點
btw日日追post已成習慣
樓主加油

一個人踩嗰時洗費大好多，往大約每日100，三餐每餐25，平時啲路上買野食野飲40到

一日三百内，有時想食好啲另計

遇到阿靖後，所有野都有多個人攤分，有時一日先用80蚊

阿曦慢踩等我哋

變左二人行

Day 37 俄拉東果

今日翻過咗第四座山- 剪子彎山

一如過往話7點半起身，但又訓到8點幾先落去食早餐


9點半先開始踩，爬返4公里上相格宗，再爬天路十八彎，當我地成功爬完嘅時候，好似冇咩感覺，唔經唔覺就踩咗上黎








再上就係過剪子彎山隧道，過完之後其本上都係海拔4000米以上漫遊，風景好靚。我地有個共識，每日冇話一定到邊到，風景靚就停低，差唔多天黑踩到邊住到邊。揾到呢種隊友真係好

我哋其本上每個觀景台都停，對住個靚景食野，絕對係享受











後來踩到呢個位食野




老闆娘話有條捷徑快好多，可以直接推過對面山上返公路，我叫阿靖揀，最終踏上咗無間道。如果徒步行，真係快好多，但加上單車係煉獄級。遠睇以為坡度低，一落到去就已中伏，45度以上，我地兩個每推一段路都要兩人推一部車，之後將佢嗰部停低，再推我嗰部，想回頭已太難。
最後用咗成2個半鐘先推山頂，完全力歇，兩條友係四千海拔推車上山，真係好嬲又好笑。當然，亦都好難忘





推車途中有藏民放牧，問我地係咪係到鍛鍊身體

之後就到頂又遇到另一個藏民，黎咗幫我地推，我順便地問可唔可以住宿，之後就去咗佢個帳篷住，食咗豐富嘅晚餐，又松茸，又牦牛，又土豆包子






由於之前出現高反，已經第三日冇沖涼，唔知自己頂到幾多日，我諗一星期係冇問題。而家應該完全適應咗，冇再出現過高反，聽日涼返個熱水涼先

一口氣追post睇到呢度，而家先知高反唔沖得涼

好羨慕你地可以自由自在做自己想做既事

入住藏民帳篷幾錢晚？

全日流咁多汗都三日無沖涼

果邊應該幾乾燥

天氣係幾涼 但始終都係會流汗

可以先嘗試沖個快既熱水涼、唔好洗頭、沖完儘快著返衫、一攝親就會病！特別是由腳板攝上去。