Day 17 德江
前進 同 連杰 好早就出咗門,返番自己讀書同埋做嘢嘅城市
由於朝早落大雨, 我都唔急住出發,所以就落咗去樓下行下順便食早餐。 我誤打誤撞入咗一個街市,都幾有特色。 同埋我發覺呢邊嘅人都 幾鍾意孭住個籃, 我喺鎮度見,到我去山裏面都會見到
又再重遇呢個十蚊自助任食, 咁當食晏晝
停雨嘅時候都差唔多十一點,咁我就返賓館執埋啲嘢, 準備出發
出發前我去咗會長嗰度同佢影咗張相留念
雖然都係爛路, 亦都會踩到燥底,但路上景都唔錯, 可以令心情舒暢返
又係呢補給時間, 終於搵到間係有賣純牛奶嘅, 喺平時山區嘅路上想搵間有牛奶嘅都真係好難, 同埋唔知點解呢呢排車呢特別想飲啲酸嘅嘢例如蘋果醋同橙汁
之後我遇上咗一段大約長5公里以上嘅怪路, 佢原本係應該喺條好嘅路,但係每隔大概200米就會爛咗, 佢爛嘅程度係單車要推車過,其中有一段係Boss級連私家車行都有啲困難
有時我真係想知究竟高德地圖係點樣定義自行車路線, 琴日定咗條掘頭路都算啦, 今日定咗條樓梯畀我, 闊度大概係0.5米, 斜係45度, 由於兜另一條路或者原路折返要好長時間, 我唯有硬著頭皮推落去
之後踩到返入市區都開始入夜,係一個幾繁榮嘅小鎮
喺就踩到去賓館之前,遇到一位揸住電單車帶著一家大細嘅旭哥同我打招呼,問我需唔需要幫手, 原來佢以前都曾經踩過單車同揸電單車去西藏幾次, 所以見到車友都特別開心
佢叫我返賓館收拾下,之後帶我出去食嘢, 佢嗌咗個牛肉飯畀我之餘,仲叫廚房炒咗一斤牛肉 畀我加餸, 話要好好補充體力先可以踩落去
後來我仲去咗佢屋企飲茶傾計。 旭哥屋企真係幾大 ,下面係佢阿哥間舖上面係住嘅地方, 仲有個私人健身室。 佢平時鍾意打獵, 可惜呢排查得嚴,下次我再黎嘅時候帶我一齊去
其實旭哥嘅經歷都幾多,佢細個去過少林寺學功夫,後來係職業泰拳手, 之後每逢比賽完就會拎獎金去唔同嘅地方體驗, 通常都係揸電單車多, 試過穿越無人區,全國都走遍
而家就選擇安穩落嚟,返番自己嘅城市過啲休閒嘅小日子, 平時偶爾遇到經過嘅車友,佢都會幫忙
我都好認同旭哥嘅講法, 趁後生就做多啲自己想做嘅嘢, 而家想做嘅嘢就而家做, 唔好話遲下先做, 唔係樣樣嘢遲下都可以做得返。 同埋遲下就會有遲下想做嘅嘢,唔好畀咁多藉口自己,諗太多就唔會做
佢話自己個心態, 係有咗家庭小朋友之後已經唔同咗喇, 雖然都係有一顆流浪嘅心, 但係多咗一份牽掛, 即使自己一個去旅行亦都唔會去太長時間。 佢叫我趁而家仲有時間, 好好去編織一份屬於自己青春嘅回憶
佢真係一個好有經歷嘅男人, 呢種男人特別型。 臨送我返旅館之前,旭哥送咗一嚿烏江石 畀我留念, 話可以補我一路平安
佢話聽朝一齊食早餐同我餞行
一個旅程上面,最令你難忘深刻嘅唔係啲風景有幾靚, 而係你喺路上遇到嘅人同事