Day 41 芒康
尋晚訓教已經覺得肚唔太舒服,成晚都訓得唔好,朝早起身個肚脹住脹住,我食咗啲正露丸,但好似冇改善,想嘔又嘔唔出
留係到都唔係辦法,踩咗一段,頂唔緊就推,好返少少又踩, 由於尋日大雨有一段路塌方, 所以路上基本上好耐先會見到一波私家車經過
太辛苦嘅時候我就會停喺路邊抖一陣。禍不單行, 我部手機唔知點解著唔到, 心諗唔係呀嘛。 就係呢個時候有個推住車嘅龍哥經過, 佢停低問我有冇事, 佢了解咗我個情況之後佢畀咗啲峰蜜, 話試下會唔會好啲
而且最令我估唔到嘅係, 佢直接畀咗一部後備電話畀我, 話有部電話起碼有咩危險都可以聯絡到人, 到時整番好部電話再將呢部寄返畀佢。 經過上次旭哥,加上龍哥, 我對貴州人嘅好感度係非常之高, 佢哋嗰種幫人又唔求回報,真係好值得學習
至於龍哥點解會推著車呢,係因為佢爆左呔, 所以佢就停低咗喺度補呔, 而我亦都不斷嘗試緊睇下開唔開得得返部機, 因為我都唔想麻煩到佢, 搞一陣終於reboot到, 所以我要還返部電話畀佢
佢整番我部車之後就要踩走, 佢見到我又作嘔又好虛咁, 就建議我睇下接唔接到部皮卡車載落山,分別前我同佢影咗張相留念
之後我又推咗幾公里, 終於遇上好心嘅皮卡車, 當時距離芒康仲有20公里,車主係一家三口揸車去西藏
經過一番嘅顛簸, 終於嚟到, 分別前小妹妹仲同我揮手拜拜
之後我就同咗阿曦會合,佢陪我一齊去睇醫生。 醫生話我有機會係飲咗啲唔乾淨嘅水, 因為呢邊海拔高,啲水好難先煲得滾, 而且亦都唔太乾淨, 當地人飲可能冇問題,但外來人飲就好大機會水土不服, 建議我都係飲樽裝水。 之後就開咗啲藥畀我
返到賓館,食咗啲藥感覺好返啲, 之後就洗下衫同埋執下嘢
執嘢嘅時候我哋打開咗道門, 突然間有個人喺我哋門口出面停低咗, 我一望,原來龍哥。 嗰刻我覺得呢啲真係緣份, 龍哥話佢上次踩川藏線嘅時候亦都係住呢度, 啱先經過見到好熟面口就停低咗, 估唔到喺呢度都會再遇上
等龍哥梳洗後我哋就一齊出去食嘢
食完嘢之後我去咗龍嗰間房度傾下偈, 佢分享咗我以前唔踩川藏同埋青藏嘅經歷, 又介紹咗 佢哋嗰度啲酒嘅做法
當我返到房嘅時候,阿靖亦都踩到咗, 佢亦都係對條路屌曬鬼
聽日我哋三條友應該會早啲起身踩到去唔知邊度