小息果陣,果個岑麗雲拎左盒小食盒出黎比我,話想請我食野。
「好啊」我放底我抄緊嘅書,攞左一塊薯片放左入口。
廉價嘅味精令我有D口乾,即刻嗱左支水比黎飲。
對於零食,我基本上係完全唔食嘅,極其量都係去小食部買件三文治食;阿媽見我次次帶返學嘅食物盒都係原盒攞返黎,最後亦唔幫我準備啦,直接比多十蚊零用錢我洗(因為小食部一件三文治十蚊
)。
「咁你同我就係朋友啦。」
朋友…這個字已經好耐無出現係我字典入面。
自從讀完中學出黎,人同人之間距離就遠左好多;小朋友可以請粒糖就識到朋友,但大人可能要做好多野先識到人,甚至只係識到一班只係想係你身上攞著數嘅「朋友」。
所以,就算岑麗雲有幾煩膠,我都願意同佢做個朋友。
「咁,做左朋友,你就要借份工課比我抄啦。」
唉,世風日下,仲唔到細路仔都識搵人攞著數。
「你有咩唔識,我可以教你。」
「Lee題,Lee題,lee題同LEE題!」
基本上係成份功課,佢只係想搵人幫佢做份數學功課。
今日份數學功課係除數,我五分鐘就做完五題練習啦。
但佢好似一題都唔識做,算在朋友的份上盡可能幫下佢啦。
「好,第一題,三百四十五除十二;係張算草紙上面寫條直式比我睇。」
「首先唔好理個位住先,睇百位同十位,三十四除十二,可以除幾多份?比埋個餘數我。」我遮住後面個5字。
佢寫到係商數2,仲寫埋餘數係10。
「無錯,12乘2等於24,34減24係10。」
好彩佢仲識得兩位數除法,咁一切都易教好多。
「跟住,將後面果個位寫落去個餘數後面。
105除12可以除幾多份?」
佢答我唔到,因為係三個位。
「12乘9係幾多?」雖然我知道答案係8,但我特登問佢乘9係幾多。
跟住佢係算草紙上面計左條乘法,好彩無咩大問題。
「108。」
「無錯,但108大過105,所以我地搵細一個數字。
12乘8係幾多?」
跟住佢係算草紙上再寫一條直式,計到答案係96。
「咁寫個8係個2隔離,咁我地就計到個商數啦」
「好,105減96係幾多?」
「9」
「9可唔可以比12除?」
「好似…好似…唔得」
「咁9就係餘數。
345除12就係28剩9,你係練習簿上面再做一次。」
Lee D四則基本運算於於大人黎講係好容易,一瞬間就計好,不過對於細路黎講就可能要花好長時間先計好,今次起碼食左我大半個小息。
所以我教完佢之後就嗱嗱聲衝去廁所痾尿,因為頭先飲左成半支水
不過,大人就算唔識計都可以噤計數機,老師驚學生用計數機噤個答案出黎抄,所以就要大家係練習簿上面寫埋條直式比老師睇。
數學嘅基本運算,基本上就係要不斷練習同運算先會識,如果一開頭就比佢抄答案,咁佢成世人都無機會用腦計條數出黎,永遠都學唔識。