雖然幅謠精嘅框架基本上已經畫好,但有好多細緻位都加加減減,好明顯唔會係一堂之內搞得掂嘅。
我油左一塊塊唔同深淺嘅色塊,然後慢慢推埋一齊做漸變,然後用軟毛筆捽甩D筆觸。
間唔中Cax Sir都會過黎望下我,比小小意見我。
例如話光源嘅處理,邊度高光邊度陰影;仲有因為係動漫畫風,所以最後可能要補小小黑線等等。
然後唔經唔覺就落堂啦,由於油畫畫具比水彩要多好多時間去洗,所以我比老豆早小小收畫。
首先用紙市盡可能抺乾顏料,然後用洗筆水洗一次筆。
跟住囉舊番梘捽一捽支筆,洗走D洗筆水同埋筆上面淨底嘅顏料。
無錯,用洗筆水洗筆都係會淨顏料嘅,所以要用番梘再洗一次先夠。
跟住老豆就練完水彩開始洗水彩筆,佢洗完筆我都仲未洗完
「嘩,點解你要洗咁多支筆。」
「因為我真係用左十幾支筆
」
洗完筆之後,我比幅油畫老豆睇。
「粗筆上色,幼筆整鬆D色,唔同範圍要用唔同大細嘅筆,仲要預留一支淨係點洗筆水當擦膠咁用。」
「用筆數目其實同個人習慣有關,其實無咩對錯。
你個囡嘅油畫上色能力唔錯,配D色同原來張畫嘅顏色好配合,我諗佢畫多一兩堂就會畫完。」Cax Sir補充。
我影相記錄之後,就將幅油畫放係畫櫃等風乾,然後就走啦。
由於已經十點幾,地鐵已經開始有位坐,甚至有人特登讓比我地坐。
所以我同老豆就坐係櫈上面,唔經唔覺挨住佢訓著左。