Cax Sir趕時間,於是我地求其搵間茶餐廳入去食飯。
我地理所當然係叫快餐(頹飯),不過飲咩我就有D猶豫。
以前我去茶記係必飲凍檸啡,但如果個價錢貴得太離譜我會飲凍奶茶或者凍檸水,共通點係都係凍飲。
咁我Lee排黎M,飲凍飲我驚會發作。
咁熱飲有咩選擇呢?
熱檸系列我係完全唔得,苦茶我幾苦都可以飲到,但熱檸檬果陣澀味同埋殘留係水入面嘅果渣我完全接受唔到。
好立克同阿華田得陣甜味,好難飲。
熱奶茶咖啡我阿媽唔比我飲,話我太細個
咁我可以飲咩?
好啦,趁阿媽唔係度飲杯熱奶茶啦。
我估唔到叫杯野飲都可以諗成日。
船長叫左杯凍華田,Cax Sir要左杯凍奶茶,憑杯野飲就知道我係屬於大人嘅世界。
當然Cax Sir亦鵝左兩句,話細個唔好飲咁多奶茶,會上癮。
「點解你同Cax Sir會咁Friend?」食野果陣船長問我地。
「其實倩雯係我嘅學生。」Cax Sir親自答佢。
「係大人畫班大家都好自動波咁畫自已想畫嘅野,學習氣氛好過細路班好多。」我補充一句。
「其實無你想像中咁美好,大人畫班學唔學到野都係睇你想唔想學;
好多時D同學都係想阿Sir幫自已畫埋佢。」Cax Sir反駁我。
跟住我同Cax Sir傾左唔少有關兩種畫班嘅唔同生態,主要係細路班服侍家長,大人班要當學生係客。
當然,船長係完全插唔到嘴,佢講極都係有關自已點樣畫好D畫,點樣可以畫到我咁。
「學好Drawing,輕鬆Printing,我老師教嘅。」Cax Sir用一句話答完船長嘅問題。
「只要掌握你想畫嘅野嘅形狀同埋光影,用咩野技法表達都會畫到你想畫嘅野。」佢補充果句野嘅意思。
「有時間就練下素描啦,包括你都係。
其實船長素描分分鐘準過你。」Cax Sir指著我。
我一邊食野一邊睇電話,係FaceBook D濕尻廣告見到今日有個桌遊Group搞活動,係旺角嘅桌遊鋪有桌遊團。
桌遊一班人玩,一班人跟據同一個規則動腦筋,就算輸左都享受思考嘅過程;所以相比起Magic那種卡牌對戰遊戲,我更傾向玩桌遊。
畢竟兩個人嘅卡牌對戰遊戲只有贏家同埋輸家,比桌遊更著重勝負。
我地拿拿聲食完碟多肉少菜嘅頹飯,跟住就比錢出門口啦。
當我諗住比錢嘅時候,Cax Sir就幫我比左錢。
「今餐我請啦。」
的確,老師帶細路食野無咩理由要玩AA制,船長本身都無諗住比錢直接出左門口,所以我覺得佢係黎黐餐嘅
。
其實一餐飯我仲算比得起,畢竟今日阿媽有比一百蚊零用
。
不過如果要玩個桌遊團嘅話,其實要比八十蚊入埸費
。
當然,以一個成人黎講其實好平,但對我Lee個細路黎講其實幾有壓力。
不過我都係想去果個桌遊團去識下人,所以今日唔打Magic,去旺角玩桌遊。
點知個船長死都跟過黎。