是咁的，我變左做個細路女，然後嗱左個填色比賽冠軍

一般黎講
私人畫室D學生成日都會報報下唔玩
D學生流動性會好大

　　跟住上堂照返之前咁嘅死樣，繼續係班上面做即日功課。
　　坐我隔離果個岑麗雲唔知係咪受左我影響，開始上堂唔聽書係度玩手指。
　　因為佢坐我隔離，所以老師好少搞佢，廢事搞到我。
　　條友上堂唔聽書不特止，仲樣樣功課都唔識做要問我。
　　當然，老師廢還廢，但係Challenge佢地之前超碼自己要有料，係自由活動之前應該要學左Ｄ要識嘅野。
　　如果樣樣都唔識嘅話，係咪應該要聽下書？
　　當然，我可以唔理佢，繼續做自已嘅野，不過佢只會繼續煩住我。
　　「喂，唔好玩手指，Ｄ野你識曬咩？」
　　所以我決定叫佢聽書
　　「你又咪唔聽書？」
　　「咁你識唔識做功課？唔識你就同我乖乖地聽書，唔好同我玩手指。」
　　「老師講野咁悶，我都唔知佢係度講咩。」
　　「今堂大約講緊地球嘅組成，七大洲五大洋，上面有咩野國家；自已睇書同埋維基，睇唔明落堂問老師。」
　　我講左今堂，甚至係一個禮拜內嘅課程範圍。
　　雖然我無聽書，但佢地做緊咩我大約都知道；常識嘛，一個正常人應該要識嘅野。
　　佢見我做緊即堂功課自己都開始做，不過做到錯曬。
　　後黎更加想偷睇我嘅答案。
　　「唔識就睇書啦，我唔想理你啦。」
　　我差Ｄ連「柒頭」兩個字都衝口而出。
　　我索性囉第二科Ｄ功課出黎做，等佢抄唔到。
　　我一早識曬Ｄ野，小學功課對我黎講只係無意義嘅抄寫，但對Ｄ唔識嘅細路講，卻係檢驗佢地識唔識課堂知識嘅手段。
　　當然，我亦唔贊成比太多功課，因為學生都需要時間休息同消化學左嘅野。

　　所以落左堂之後，我拉左Miss埋一邊。
　　「有咩貴幹？」我都知佢唔多妥我。
　　Lee個係班主任，佢教中文兼常識，一個典型嘅教畜。
　　「將我搬去單邊位好似好Ｄ，我驚影響到琴麗雲。」
　　「你終於知道你衰啦咩？」
　　「我驚佢未學行先學走姐，然後仲要返轉頭問你一大餐姐。」
　　我同佢嘅分歧係無可能解決，不過我可以由佢嘅角度出發，說服佢幫我調位。
　　「畢竟我自已拉埋一邊自閉係對成班同學影響最細嘅，你都唔想下下都同同學解釋我嘅情況啦。」
　　「好啦好啦。」
　　跟住Miss走過去角落頭果個潘曦雯果度，叫佢同我調位，坐岑麗雲隔離。
　　佢唔單止無咩異義，仲好開心Tim。

　　搬左位之後，潘曦雯同岑麗雲兩個成日上堂傾計，跟住日日比Miss罰企。
　　最後佢地都係聽唔到書…唔係，老師由一開始就無心教好佢地。
　　畢竟一班三十個學生，老師能夠做就係用最多心力維持課堂秩序，然後用最細嘅心力教最多學生。
　　學生學唔識都係佢地懶姐，老師只要有罰過佢就可以照樣袋人工。
　　這是一個與我無關的故事，我可以咩野都唔做，享受我嘅特權。
　　而家就算校長比嘅特權未落到黎，我都可以係堂上面做功課，甚至係課堂以外嘅野，Miss都唔會夠膽嘥時間搞尻我。
　　當然，數學堂我都會比番幾分簿面梁老師，做完小學練習，執完佢Ｄ濕尻格式之後就囉本老師借比我嘅中學教科書操數。
　　以前岑麗雲係數學堂借過我本教科書黎睇，不過佢連題目都未必睇得明，因為係寫英文嘅。

　　第二日，我帶左我本畫簿，我盒Color brush，仲有我盒施德樓，仲有我其他畫具返學校。
　　無錯，今日係課外活動日，仲有我去水彩班嘅日子。
　　除左交畫比果個張主任之外（因為美術比賽係佢綜籌嘅），放學之前果堂我仲要係視覺藝術室上佢教嘅繪畫班。
　　佢叫Ｄ同學繼續畫素描，然後自已係視藝室果度改簿。
　　當然，我唔會聽佢指示；我係自已果本水彩簿下畫下草稿，準備聖誕主題。
　　雪人，雪地，聖誕樹…跟住我要係白色嘅畫紙上面畫白色…
　　其實跟住係畫班畫果售謠精都係同一樣情況，通常咁樣有幾個辦法做。
　　一，留白，加深「白色」以外嘅其他野；
　　二，留意白色物件上面嘅陰影，然後落好淺嘅灰藍色；
　　三，畫完水彩之後覆蓋廣告彩。
　　而好明顯雪地同雪人係需要厚塗——Ink係畫唔到嘅。
　　所以我直接出去廣告彩，再垃圾嘅廣告彩都有白色同灰色用到。
　　「老師，我想借廣告彩。」
　　「今堂係素描Wow，你快Ｄ返埋位畫返隻水果。」
　　「校長叫我準備聖誕繪畫。」
　　「素描係畫畫嘅基礎，總之我今堂要你練素描。
　　你唔可以因為你畫畫加小小就唔聽老師講野」
　　素描無錯係基礎，但佢擺出咁嘅老屎忽樣就令人唔啹。
　　起碼佢無囉出令人信服嘅實力。
　　「得，素描…４Ｂ筆呢？」
　　視藝室只提供２Ｂ素描筆，仲有好多支都斷芯。
　　「你地會整到成張枱都污糟，用２Ｂ就夠啦。」
　　「不如老師你示範比我睇點樣用２Ｂ畫Ｄ好深色嘅野啦。」
　　「畫大力Ｄ咪得囉。」
　　得把口嘅張主任，根本無心教畫，上佢堂完全係浪費時間。
　　不過我無帶廣告彩的確係失策，人地唔肯借都係人之常情。

　　所以，我係畫簿度揭開新一頁，用鉛筆打左個稿。
　　「你畫緊咩野啊？」隔離個同學見到我幅畫。
　　「安靜。」Miss叫佢收聲，不過我靜靜雞講比佢知個主題。
　　「張主任。」
　　我畫左個面目猙獰嘅老女人，佢前面有一堆畫但佢無理會，反而打側身係電腦枱上面改緊簿。
　　當然，個幾鐘嘅課外活動堂係無可能用木顏色或者鉛筆油曬成張畫紙；如果有碳枝玩捽色應該趕得切，不過學校應該唔會有。
　　所以我直接落水打濕張紙，用我果套Color brush整底色。
　　為左響應「素描」嘅主題，今次我淨係用黑色同埋灰色，玩單色水彩。
　　因為係玩票性質，所以我無咩認真搞，總之由個老女人畫起，然後趁乾緊嘅時候處理電腦同埋堆畫，油得幾多得幾多。
　　Miss個樣我無畫到十足十，總之我誇張左佢副眼鏡同埋幾條皺紋，將佢成個人卡通化左。
　　至於老師枱上面嘅畫，我決定破例加小小彩色，突顯老師應該要理果堆畫多於功課。
　　打左堆底色之後，我用黑色同埋灰色木顏色去做唔同深淺嘅漸變，係個半鐘之內畫得幾多得幾多。
　　幅畫唔即堂畫完就無意思，因為主要係諷刺個Miss。

　　「嘩，好靚啊，可唔可以借比我睇。」隔離位果幾個同學都想問我嗱畫。
　　「唔得，Lee本畫簿係我身家性財產，我唔可以比本畫簿其他人。」經常上次幅美人魚嘅經驗，我絕對唔會交畫比小學生。
　　就黎落堂果陣，Miss行過黎睇睇Ｄ同學畫成點。
　　「唔錯，幾似，不過你個深色可以再深小小。」
　　「你睇個蘋果嘅高光位，你好似完全畫左去第二度。」
　　係缺乏實戰嘅前題下，再啱嘅野都只係吹水。
　　跟住佢見到我幅野。
　　「喂，你畫緊咩野？」
　　「水彩素描，主題係你。」
　　成班同學聽到Lee個主題都衝出黎想睇畫。
　　「我無咁樣衰嘅Wow。」
　　佢笑左，仲笑埋右，也許我Lee個即堂發揮高質到連佢都唔敢亂搞。
　　我原本以為佢有更大反應，不過佢真係無我咁好氣。
　　「無計啦，你成堂坐埋一邊改功課，搞到我睇唔到你嘅樣。」我也順勢吐糟佢嘅不作為。
　　其實即堂畫畫諷刺Miss係好玩過畫聖誕節範例畫，不過對於其他同學黎講，其實Lee種學校課外活動班係學唔到太多野。
　　跟住佢收左我幅畫，仲有兩個畫得比較好嘅同學嘅畫，話囉黎貼堂。
　　雖然唔多啹佢，不過起碼佢唔會顛倒是非，也許佢上堂改簿亦只係無奈之舉。

有冇圖睇

推

　　三點幾放左學之後，老豆叫我六點半左右係美孚地鐵站等佢，同家姐食晚飯之後再去畫班。
　　我順便問埋佢家姐屋企地址同埋家姐電話，因為我真係唔知（或者唔記得左。）
　　咁中間果三個鐘做咩野呢？我功課做曬，書又唔洗溫，去Ｍ記淨坐又太無聊。
　　家姐同佢女朋友係荃灣返工，六點幾先返到屋企，所以上佢度玩係無可能。
　　所以我搭地鐵嘅時候早兩個站喺長沙灣站落車，行幾步路到左天悅廣埸。

　　天悅廣埸係一個好殘舊嘅商埸，但全香港玩卡嘅人都會識去嘅集中地。
　　天悅有數之不盡嘅遊戲王鋪，幾間兼賣Pokemon TCG嘅鋪，幾間做Vangrand，Battle Spirits，Wixoss等等唔同遊戲嘅卡鋪。
　　基本上你講得出嘅遊戲，天悅都會有人做，當中包括Magic。
　　當然，而家我無Deck係身，所以係天悅Lee個商埸周圍行下。
　　天悅除左卡鋪之外，仲有一堆唔知賣緊咩嘅奇怪鋪頭，亦有人租黎做寫字樓同埋補習社，甚至係神壇——因為平租。
　　無錯，因為賣卡嘅利潤其實唔多，所以通常都係開係工廠或者唐樓嘅樓上鋪；而天悅可以吸引到一堆卡鋪，其實同租金同埋殘舊配套有一定關係。
　　當然，禮拜三下晝，有唔少卡鋪都未開門，不過已經有幾班著緊中學校服嘅學生係遊戲王鋪門口睇緊Ｄ卡。
　　遊戲王鋪係天悅係最多，因為炒遊戲王卡利潤好高。
　　遊戲王本身多人玩，亦成日有班唔識同人Trade卡學生，係卡鋪買散卡食炒價；
　　另一方面Ｋ社（出遊戲王嘅公司）出卡完全無考慮新卡同舊卡嘅連系，所以會突然會彈出一Ｄ屈機Combo；令某Ｄ五蚊張嘅廢紙，突然升到百零蚊甚至幾百蚊，直至張舊卡比人禁。
　　點解我會咁清楚？因為我都有玩過遊戲王。
　　實際上遊戲王就係包剪揼遊戲，鬥快做Combo Lock死或者OTK(One turn kill)對面。
　　不過對於無玩嘅人黎講，睇人做自閉Combo，當魔術表演咁睇都係幾好玩嘅…不過唔好叫我落埸打。
　　而家遊戲王嘅規則同之前完全唔同，因為堆舊卡失左平衡，所以Ｋ社
就出左個新系統，你要用堆舊卡就一定要買新卡配合新系統先可以用得番。
　　無錯，Ｋ社一個決定就可以直接廢左你成副牌，Lee個亦係我唔想玩返遊戲王嘅另一個原因。

　　我再行經另外幾間卡鋪，有幾個細路係度玩Battle Spirits。
　　我見到Ｄ珠係Ｄ卡上面調黎調去，由於我無實際玩過所以唔知佢地做緊咩，不過都聽到佢地係度拗規則。
　　因為日系Game絕大部份都係日文卡，所以有好多空間比人「縮規」，博人地睇唔明張卡亂做效果。

　　我途徑一間貼滿Pokemon卡嘅鋪頭，LeeD卡應該都係正版嘅。
　　因為Pokemon卡香港有代理做美版，而且亦有唔少人走水貨賣日版；如果你係商埸鋪賣假卡做壞自已個名，人地下次可以搵第二個買。
　　而Ｄ小學雞囉返學校嘅假卡，通常都係喺文具鋪或者報紙鋪買返黎嘅雜牌卡，完全唔知道係邊度黎。
　　因為代理唔會比貨文具鋪，佢地亦唔會特登搵人去日本走水比佢，所以文具鋪嘅卡必定係大陸黎嘅假卡。
　　我好唔好買Ｄ正版Pokemon返學校Show比班同學睇呢？
　　太無聊啦，你話叫我返學校教人打Pokemon就話姐，齋Show卡就咪搞我。

　　行行下我覺得有Ｄ無聊，所以都係去搵間Magic鋪睇下。
　　以前我都係Lee間鋪留過唔少腳毛，雖然唔咩野大客，但都係間鋪度識過幾個卡友。
　　間Magic鋪格局同天悅卡鋪格局差都唔多，都係將Ｄ貴價散卡貼係玻璃，然後鋪入面放左一堆枱櫈比人打Deck，只不過佢地幾乎只有Magic。
　　當然，Magic人通常都係大人，所以間鋪淨係得老細係度。
　　個老細打打下機留意到我Lee個細路囡對住佢塊玻璃指指點點，即刻跑出黎叫停我。
　　「喂細路，唔好拍玻璃。」
　　Well，唔怪佢。佢可能以為我係隔離補習社跑出黎嘅細路。
　　細路最鐘意就係拍玻璃同埋搞破壞，所以老闆出黎叫停我係正常嘅。
　　「我想睇下Ｄ卡姐，唔會拍玻璃嘅。」
　　「哦，睇下好啦，唔好拍玻璃。」
　　「話說，今日有無Draft。」我順口問下，我唸就算有都係七點鐘之後嘅事。
　　「下？」老闆對Lee個問題表示愕然。
　　「今日無帶Deck出街姐。」
　　「妹妹你識玩Magic？睇唔出wow。」
　　「玩過下電腦版，屋企有副Izzet drake（伊茲龍獸）姐。」
　　聽到Izzet drake Lee個term，老闆知道我係內行人啦。
　　所以我順勢行入去間鋪度。
　　「平時去開邊度玩多？」
　　「其實好少囉副Deck出黎，不過下個禮拜應該會囉出黎。」
　　鋪頭入面有各種唔同代數嘅擴充包，亦有小小唔同遊戲嘅卡包賣。
　　同上去次果間鋪頭唔同嘅係，Lee多左D毒撚動漫卡套。

　　跟住有個廿零歲嘅𡃁仔入左黎。
　　「Hi，老細，你個囡？」
　　「無，係客姐。」
　　「你個蘿莉控。」個𡃁仔講笑咁講。
　　「今日早左收工上黎睇睇有無人姐。」
　　「你要唔要借我副Izzet drake同佢玩？」老闆係儲物櫃度囉左副Deck出黎。
　　「佢？」個𡃁仔指住我。
　　「好，有Deck打緊係好。」
　　我接住老細副Deck，坐左係後面果堆枱櫈度。
　　Lee副野係我屋企果副野嘅直接升級版本，雙色地，同埋一堆Key Card都相當齊全；而且仲多左一套鳳凰嘅系統，只要回合內用過三張法術就可以係戰鬥階段將佢由墓度拖出黎打人。
　　「識唔識用？」老細坐左係我隔離，想教我打牌。
　　「識。」
　　對面囉左一副藍黑白三色控制牌，用錢打死人。
　　佢副牌同老細副牌一樣都係雙色地齊全，仲有全個標準最貴嘅泰莉力。
　　前期佢可以用藍色嘅CounterSpell取消我嘅卡，亦可以用黑色殺怪同埋discard，中期佢可以用藍色效果抽卡，後期佢更可以出泰菲力抽更多牌幾個Turn之後開大技贏Game。
　　基本上我Ｄ龍獸唔係比佢Counter，就係比佢殺左，再唔係係出黎之前比佢掉左落街。
　　「SideBoard係邊？副野唔Side打唔過。」我問老細。
　　「係個盒度。」
　　作為藍紅卡組，我可以換入CounterSpell跟他對Count和保護已經在埸上的生物；另外因為對面沒辦法阻止鳳凰係個墳度跳出黎，所以只要保住佢唔好比人移除遊戲就可以同對面抗衡。
　　「尼米茲呢？」我係Side Board搵唔到伊茲對控制最強嘅一張卡。
　　「正Deck有一張。」
　　「太少啦，隻野一張卡就可以屈死控制。」
　　「而家Standard太多aggro(快攻)，Lee副野輸控制係正常嘅。」老闆解釋佢sideboard嘅理由…OK，副野係佢嘅。

　　換入sideboard後，對面囉左Ｄ更加針對嘅牌黎搞尻我。
　　包括係可以搶怪嘅結界，可以掃枱嘅法術等等。
　　而我亦只能睇住佢Ｄ法力黎做野，盡可能保住我Ｄ怪同埋打快小小。
　　不過真係劣勢對局，平均打三埸先贏一局，仲要係對面抽唔到Counter或者discard先贏到。
　　我諗如果我囉自已副Deck過黎打，我諗應該唔夠打。
　　「喂，人地係細路黎嫁姐，你唔好咁樣蝦人啦。」老細吐糟果個𡃁仔。
　　「其實你打得幾好嫁啦，Counter嘅時機好準，係老細比左副閪deck你姐。」
　　「喂，你唔好講粗口教壞細路。」
　　「你平時咪講得仲多。」
　　老闆同個𡃁仔互相吐糟。
　　我見時間差唔多，就起身想走啦。
　　「見你頭先輸到想喊咁，哥哥請你開一包卡啦。」
　　「嘩，少見Wow，一陣人地開到泰菲力你唔好喊。」
　　因為Magic玩家好少會咁樣比錢請人開包。
　　「人地係細路麻。」
　　「好啊，咁我就開Dominaria追泰菲力。」我囉左包Dominaria卡包，跟住個哥哥幫我比錢。
　　係，我個人就咁市儈，益我嘅就叫佢哥哥，唔益我嘅咪叫佢𡃁仔囉。

　　一開卡包，我見到兩隻黑人，一張係閃嘅。
　　「泰菲力！仲要係兩隻！」我大叫
　　「錢黎嫁，賣返出去幾舊水嫁。」老細跟住一齊叫
　　以港幣黎計，一隻泰菲力係三百幾蚊，閃嘅更加係六百幾蚊；而且賣出去絕對會有人收，因為其他更舊嘅Format都會用到Lee張卡。
　　「嘩，有無搞錯！一隻泰菲力就算啦，仲要連埋張閃嘅。」個哥哥見到我包卡即刻揼心口。
　　「Lee個真係要影相。」老細囉左張包卡去影相。
　　Lee個係絕無僅有嘅情況，同一包卡入面有Mythic同埋同一張嘅閃Mythic，同打麻將食天胡嘅機率差唔多。
　　我見到我開到咁神，都唔係幾好意思要佢幫我出錢…
　　「都係我比返錢啦，我都有Ｄ零用錢。」
　　「唔洗，我話左請你就請你。」哥哥的確係灑脫。
　　跟住老細即刻幫兩張卡入卡套，跟手比個最平嘅卡盒我入住果兩張卡驚佢整爛。
　　「話說，你係咪影落群組，不如加埋我入去。」
　　記憶中Lee間鋪有個WhatApp群組，老細果然拉左我入去。
　　望望個鐘，六點啦，我真係要行啦。
　　當然，時間再趕也要檢查下Ｄ野有無囉走。
　　「我趕時間要走啦，拜拜。」

　　我一路行，一路睇群組。
　　＂嘩，一包中兩隻泰菲力＂
　　＂勁＂
　　＂新人真係十歲蘿莉？＂
　　＂唔好理個怪叔叔，我係頭先幫你比錢嘅仲哥哥＂
　　當有個十歲細路囡係群組入面，仲講Ｄ同蘿莉有關嘅笑話我都覺得有Ｄ太過份。
　　＂多謝仲哥哥。＂我見佢幫我開到兩隻泰菲力，當然要講Ｄ好說話，畢竟果度差唔多成千蚊。
　　＂仲少就仲少啦，扮咩野哥哥＂其他人開始吐糟仲哥哥…
　　＂我玩開電腦版，最近先開始玩實卡，點知開第一包就咁好彩。
　　我打左兩行字之後上左地鐵，搭兩個站去美孚搵家姐同老豆食飯。

ms Lee陰陰濕濕咁

見到玩卡即刻飛曬佢

我無玩過隻game
但今次你寫玩game嗰部份，我大致上都跟到

即使有啲game嘅字眼，就算跳過都明到成篇文講咩
期待你下篇文

個老細唔係啊king呀嘛

咁天悅都有起碼兩間Magic鋪嘅（正如油麻地有兩間以上Magic鋪）
所以我特登唔謞鋪名，亦廢事曲線自爆／廣告

荔枝角畫室都係模糊左地址
不過實際上有心估可以估到係大約係邊幾間

仲有帶返個頭盔先
一切純粹虛構，單純作下故仔姐

"無錯，Ｋ社一個決定就可以直接廢左你成副牌，Lee個亦係我唔想玩返遊戲王嘅另一個原因。"
好認同....我玩果陣出咗超量已經開始失控, 而且好憎K社一嘢禁限哂KEY卡嘅做法

偽新手運

　　我搭地鐵到左美孚，WhatApp搵老豆同埋家姐，甚至直接開個新群組拉佢地兩個入去。
　　＂家姐老豆你地係邊？＂
　　＂啱啱收工就到美孚＂
　　＂我都返到美孚，恩恩早左收工係Pizza鋪等緊位＂

　　跟住我就入左商埸，係Pizza鋪門口見到家姐個女朋友。
　　佢係一個身形嬌少，但略有身材嘅靚女；佢染了一頭咖啡色頭髮，著左一套帶喱士花邊嘅棕綠色洋服，係「著得出街嘅」輕度蘿莉塔；佢淡淡的化妝修飾佢端正嘅五官，成個人睇起黎係靚到唔現實。
　　如果我係男人，我應該會想溝佢。
　　家姐，你果然識揀老婆。

　　同佢打左招呼之後，跟住一齊係門口等位。
　　我應該點稱呼佢呢？大嫂？定跟返家姐咁叫佢恩恩？之前叫佢「二家姐」都只係講笑，佢本人都唔係咁鐘意。
　　「話說我應該點叫你…畢竟平時比較少見你。」
　　「叫我恩恩，或恩姐姐得啦。」

　　講開又講，其實我真係無咩野有關倩雯嘅記憶。
　　因為家姐個女朋友嘅稱呼，我唸作為佢細妹係應該會知道嘅；就算佢之前轉過女朋友都應該會識叫姐姐…點解我會唔知嘅呢…
　　「話說，你同家姐一齊左幾耐？」所以我嘗試問下佢同家姐之間嘅野。
　　佢好驚訝我問Lee個問題？
　　「五年啦囉，你無理由唔知。」
　　「呃…我撞親個頭有Ｄ唔記得左。」我作個理由胡混過去。
　　恩姐姐係家姐係Cosplay Event識嘅，恩姐姐係Coser(CosPlayer)而家姐係攝(攝影師)，一直以黎Keep住有合作。
　　直至有一次恩姐姐比人炒，搵家姐訴苦（我估應該係劈酒，然後酒後亂性），跟住就撻著咗。
　　恩姐姐以前係模特兒，工作情況就無問佢；不過我估因為模特兒嘅潛規則，逼佢同老闆上床之類嘅狗血劇情先搞到佢變Les——當然也有可能係我諗太多。
　　而家姐係攝影師，平時係影樓幫人影相，間中出去幫學校拍學生照，或者幫人影婚紗相咁樣。
　　傾傾下家姐就返黎啦，佢兩手空空咁樣黎，真係睇唔出係個攝影師。

　　家姐唔係一般人想像嘅TomBoy，而係一個長頭髮嘅Sport Girl。
　　雖然佢嘅身形因為長期搬運器材而有Ｄ肌肉感，而且著住一套運動套裝，不過成個人都好有女人味。
　　所以話les一定係一個T一個P完全係錯嘅…
　　等埋老豆之後，我地就入去開餐啦。

其實同調已經失左控
大量不交流ＯＴＫ打法

天悅間神壇執咗定搬走咗了
magic重係度