第二朝起身,我成個人好攰。
尋晚訓得唔好?唔係,我同倩雯傾計傾得幾開心。
跟住我去廁所一睇,嘩——條底褲有血
雖然我知道女人會月經,下面一個月會流一次血,但第一次見到始終有D震撼。
跟住我即刻同阿媽講,叫佢比DM巾我用
「痴線,你邊會咁快黎M。」
「係咪要整到條條底褲都係血等你慢慢洗
」
佢見到我條有血嘅底褲,跟住死死地氣咁比條M巾我。
「用住先,我今日幫你買包新嘅。」
阿媽叫我將條M巾黐喺條底褲上面,跟住條M巾就可以幫我吸收月經流出黎嘅血。
「不如你成包比我我,聽講好似要六個鐘換一次。」
「我自已都要用啊,你咁細個邊度用得咁多。」
痴線,我諗唔通阿媽以前係點湊家姐嘅。
香港人無論發生咩野事都要返工,學生嘅話就算死人冚樓都要返學;所以就算黎M都要返學。
我個肚成日都抽住抽住咁,好似餓過肌嘅胃痛感;不過就算小息食飽左,個胃漲住都係繼續有果種酸痛感。
中文Miss(暨班主任)見我成堂噤住個肚,行過黎問我發生咩野事。
「倩雯,你係咪唔舒服?」
我係張紙上面寫左個「M」字。
「你去醫療室坐下,搽下藥油,飲下和暖水。」跟住Miss叫女班長送我去醫療室。
醫療室有個扭傷腳,隻腳敷緊冰袋嘅男仔坐左係度,有個女校工睇住佢。
「係,你咩野事。」校工問我。
「老師話佢個肚唔舒服要搽油。」
「得,你地去廁所搽啦。」校工囉左支白花油出黎點左幾滴係班長隻手度。
的確,醫療室有個唔旭得嘅男仔喺度,我Lee個女仔唔多方便打開個肚搽油。
不過Lee D藥油,除左令我個肚好凍之外,完全無辦法舒緩那種經痛。
女班長扶返我去醫療室之後,就返課室上堂。
我坐係個男仔對面,跟住個校工過黎問候我。
「個肚仲痛唔痛?」
「其實係經痛。」我細細聲咁同校工講
跟住個校工整左個暖水袋比我攬住,然後沖左杯熱比叫我慢慢飲。
「你慢慢就會習慣嘅啦。
唔好食生冷野,飲多D和暖水,早D訓教休息多D,過幾日就會無事嫁啦。」
校工阿姐成幾十歲人,睇得學生多已經駕輕就熟,所以我好放心咁聽佢講。
「咩野叫經痛?」不過個男仔好死唔死聽到我講野。
「唔關你事,唔好八卦。」校工即刻鬧佢。
「總之每個女仔每個月都會有幾日唔舒服,你大個左就會知。」校工再講多句廢事佢追問落去。
比男仔知道女仔會月經,然後叫佢果幾日對女仔溫柔D有咩問題?
所以中小學對性教育其實好封閉,我唸大約小五小六先填鴨式咁樣要你背野,背完又唔知點樣同現實生活扯上關係,所以永遠都係一知半解。
也許阿媽咁大個人都唔識湊女都係咁嘅原因。