【我每晚都會發比呀哥追殺嘅惡夢】

「你有咩應對方法？」Vincent問Hugo。


「好簡單，就係我混入去掠奪團做臥底。」Hugo說。


「做臥底？要咁誇張咩？」Gary問。


「依加情況變到越嚟越不受控制，再咁落去只會更多人受害。」Hugo解釋：「如果要將掠奪團解體，我對佢地嚟講係新面口，混入去同你地裡應外合會更加有效。」


「唔係喎，我地班嗰個露仁夾都係掠奪團，佢實認得你。」Peter想到不可以的原因。


「呢方面我有辨法。」語未，Hugo把他那黑色粗框眼鏡脫下，用手把他那整齊的「蛋撻頭」抓亂，讓瀏海重現。


「你....你係邊個！交翻Hugo出嚟！」Gary衝過去搖他。


「我就係Hugo。」Hugo重新自我介紹：「同我平時嘅形象好唔同，所以佢唔會易認得出我。」


Peter仔細地觀察了一會，現在的Hugo確是與他平常截然不同，擺脫了庸俗的書呆子味，搖身一變成有壞壞感覺的少年。


「原來Hugo唔留蛋撻頭都幾有型架喎。」Marla都驚嘆著。


「.....」Peter聽了心裡很不是味兒,，再想想自己的外表，自卑的心又開始作祟。


「咁去掠奪團做臥底呢個重任就交畀你啦。」Vincent把手掌搭在Hugo肩膀上：「有咩事就同我地求救啦，不過我見你都係聰明人，應該可以放心。」


話音一落，Hugo便出發去找尋掠奪團的蹤影。

「原本以為終於多翻個聰明人幫手....結果佢去做臥底....」Peter失落地說。


「灰咩心呀，依加呢度仲我！」阿淵拍拍心口，自信地說。


「.....你地都好啲，我連自己有咩能力都未知....」Peter更是沮喪。


「唔好咁啦，你諗下你一直冇能力都撐到，證明你就算唔用能力都贏到其他人，唔係仲叻咩！」Marla為Peter打氣。


「......」Peter聽完後，淺淺一笑：「多謝你安慰我。」


Peter憶起一路以來發生的事，都是因為有這群同伴才順利渡過，方安心下來。


「哥，有樣嘢我醒起想問你。」但想到一半，忽地發現：「你知唔知藍火蟻呢樣嘢？」


「藍火蟻？」Vincent使用神通說明書，找尋牠的資料：「佢係夢世界其中一種生物.... 而且...具有毒素。」

「係呀，之前有人試過畀佢咬完，之後每次入夢都重覆畀佢地咬嘅畫面，走唔甩。」Peter解釋。


「........可以令人無限死亡....」Vincent想了想：「我知你想講咩，的確係一個對策，利用啲蟻唔係冇可能，但我地需要得到提煉藍火蟻毒素嘅方法。」


「提煉藍火蟻？」Peter問。


「冇錯，我睇神通說明書，應該有種能力係可以提煉佢嘅重覆死亡毒素出嚟，不過我地要搵嗰個人，仲要佢肯幫我地先得。」Vincent說。


「會唔會叫個蛋撻頭順便搵埋提煉師？」阿淵提議：「以佢智慧應該唔算太困難。」


「好，我會通知佢呢件事。」Peter回話。


「咁依加只要等待藍火蟻毒素得到手，再用嚟對付掠奪團頭目阿輝，咁呢場戰爭就可以完結。」Vincent總結。


「我地呢段時間可以做啲咩幫手？」Marla問。


「緊係四圍打擊啲掠奪團啦！」Gary興奮地說。


「呢樣都係我地可以做嘅事，仲要一齊搵提煉師。」Vincent回話。


然後，他們在這晚到不同區域解救被遭掠奪團毒手的人。

叮鈴鈴鈴—


鬧鐘響起，Peter在床上伸一伸懶腰。


「入完夢真係同冇瞓過一樣，都係咁攰。」


Peter照舊梳洗完畢便趕回學校。


一進入班房，便看見露仁夾準備出去，正好與Peter相撞。


「咪阻住哂，夢又係咁，而家又係咁。」露仁夾向Peter發出敵意。


「你講咩？唔正確嘅事緊係要阻止。」Peter反駁。


「你話唔正確？唔正確又會咁多人一齊做？會唔會係你問題呀？」露仁夾繼續挑釁。


「........」Peter一時無法回話。


「咁又未必，就算所有人就緊同一件錯事，都唔會令嗰樣嘢變成正確。」Hugo出現幫口。


「咪就係，你地最後一定會有應有嘅懲罰！」Gary也來到。


「好，你地最醒啦，唔似得Peter阿哥咁死蠢，將所有嘢傾囊相授，結果落得咁嘅下場。」露仁夾再補一句：「搞成咁真係抵死。」


Peter死盯著露仁夾，只是握緊拳頭，沒有反駁，只要露仁夾再說多一句，就會出手教訓他。


「你講乜撚嘢呀！」料不到，Gary竟然按捺不住，衝上前攻擊露仁夾。


「嘖！」但本來就有學武底子的露仁夾，躲開了Gary的拳擊。


「你夠膽就唔好避！冇膽鬼！淨係識利用個夢！」Gary想繼續攻擊，但被Peter和Hugo阻止。


「唔好衝動，你咁只會自己蝕底。」Hugo勸Gary。


「係囉，佢地聰明過你幾多，就算我喺夢到做啲咩都冇人捉我，但現實唔同，只要你郁我一條毛，我都可以置你於死地。」露仁夾恐嚇Gary。


「咩事咁嘈呀，堆哂喺門口搞咩？」陳老師剛好到達。


「冇，畀啲烏蠅嬲住啫。」話音一落，露仁夾前往洗手間。

自推

幫你推

接下來，Peter也把藍火蟻和尋找提煉師一事告訴Hugo。


「情況大致都了解，我會盡力搵佢。」Hugo點頭以示明白。


「好似成日都麻煩到你，會唔會影響你學業？」Peter對Hugo感到內疚。


「經歷咗咁多嘢，我地之間仲介意呢啲嘢咩？」Hugo反問。


「咪就係！我地之間點可以用學業嚟衡量。」Gary也參一嘴。


「.....多謝你地。」Peter安心地微笑。


「我都要諗下用咩方法去搵提煉師出嚟，今晚會有行動。」Hugo說。

入夜，Hugo在夢世界四處莽撞，希望能碰見掠奪團的人。


「又話佢地周圍恰人，行咁耐都唔見班人。」Hugo繼續找尋。


「細路，自己一個呀？」驀然背後出現一把陌生聲音。


「我....」


Hugo話未說完，那些陌生人已經開始動手。


對方人數佔優，有三人圍攻Hugo，各持武器向前衝。


Hugo也不甘示弱，把地上轉化為彈性結構，急忙躲開攻擊，同時利用靈活優勢，把三人耍得團團轉。


「喂，點解你會識想像能力！我又未見過你，你係咪跟Vincent嗰邊嘅人？」那些人疑惑，停下了攻勢。


「..........」Hugo想了數秒，然後擺出一副嫌棄表情：「Vincent？嗰條口水佬？點會呀，我依加搵緊掠奪團，想加入埋一份攞著數咋。」


「加入掠奪團？」那些人互相對視了一眼：「點解家陣先嚟話加入？」


「因為之前現實有啲事要良好嘅精神狀態去做，入翻嚟就聽到掠奪團嘅事，有著數仲唔狗衝咩？」Hugo嘻笑了一下。


「喂點呀。」

「畀唔畀佢加入好？」

「見佢能力都唔錯，應該會幫到手。」

那些人圍著屑屑私語，似乎在商量著要不要讓Hugo加入掠奪團。

「好啦，帶你翻去見下阿輝先再決定。」那些人帶著Hugo，前往某個地方。


步行了一段時間， 到了一個從未見過的新區域，這裡是黑夜之城，從遠處看去，周遭都有霓虹燈發出的燈光，有紅光、有綠光、有藍光、有紫光，把原來灰濛漆黑的城市襯托得五彩斑斕。


我們把這種景色稱之為「Cyberpunk」風格。


「呢度都幾靚。」Hugo說。


「唔好咁多廢話，行快啲去見阿輝。」那些人透露：「阿輝嘅能力係測謊機，一試就會試到你有冇講大話。」


「........」Hugo沒有回應，心想，幸好他們智商不高，隨隨便便就說出自己頭領的能力，要不然待會一口就要被識破。


「到喇，上去啦。」那些人走進了其中一棟大廈，乘搭升降機上樓。


到了目的樓層，一眼就看見那個奢華的大廳，具有氣派和高檔次的裝潢，阿輝正正坐在大廳中的沙發上。


「佢係邊個？」阿輝看著Hugo。

「佢係我地啱啱發現，識想像能力，話想加入掠奪團嘅人。」那些人說明來因。


「仲有識能力嘅人係未見過？」阿輝思疑：「你叫咩名？」


「.........」Hugo嚥下口水，心想，自己不能說慌，但說出真名肯定會招惹露仁夾懷疑。


「點？做咩唔講嘢？」阿輝追問。


「我叫雨仔。」Hugo猛然想起自己小時候因喜歡下雨天，家人給自己起的乳名。


「嗯......」阿輝仔細打量著Hugo：「咁你有咩能力？」


「自己嘅能力唔可以隨便透露，應該係呢個夢世界嘅基本知識？」Hugo反問阿輝。


「.......」阿輝沉默數秒，然後笑逐顏開：「你都幾醒，同呢度好多人都唔同。」


「唔敢當。」Hugo時刻提防測謊機能力，未知發動條件和功效，所以也不敢多話。


「歡迎你加入我地。」阿輝只是點頭以示友好。


Hugo也回敬點頭，沒有說話。

「咁你地同雨仔去講解我地團隊嘅構成啦。」阿輝指示那些帶Hugo上來的人。


「呢邊請。」那些人雖然這樣說，但從表情也看得出他們對於這決定有點不服。


然後，他們幾人乘搭升降機到下層。


「呢棟樓其實就係我地嘅據點，分咗二十層，頂樓係阿輝同露仁夾嘅房間，之後嘅九層就係先鋒部嘅房間。」那些人說明。


「先鋒部？」Hugo好奇這一詞。


「啊，唔記得講，我地掠奪團分咗兩部分，一部分係缺乏戰鬥力嘅侍候部，另一部分就係有戰鬥力嘅先鋒部。」

那些人接著說，

「侍候部負責服侍其他成員，而好處就係先鋒部會捉人翻嚟畀佢地殺，大家都互利互惠。」

「估唔到你地咁有組織同合作性....」Hugo回話。


「呢啲嘢都係靠阿輝諗出嚟，無可否認佢真係幾聰明，如果唔係都唔會認佢做頭領。」那些人說。


「阿輝.....」Hugo聽完後，雖然阿輝是敵人，但也不禁對他心生敬畏。


「睇你啱啱運用嘅能力，應該都係加入先鋒部架啦，跟我地出去捉人殺人啦。」那些人叫Hugo再次外出。


「我今晚...都係想留係到參觀多陣先！」Hugo連忙解釋：「始終第一次見到咁靚嘅區域，仲係好興奮！」


「.......嗯。」那些人便放下Hugo，徒然離開。


「呼.....」Hugo乏力地坐在上，心想，原來卧底也不好當，轉數要快不在話下，連演技都要有一定程度。


而不再跟那些人外出的原因，是Hugo知道提煉師的能力應該不足以成為先鋒部，所以索性收窄範圍，在下面九層找尋提煉師的蹤影。


「由頭搵到落去啦...」但今晚幾經波折後，所剩的時間應該也不多，要趕快行動。


就在轉角，一名用托盤提著多杯飲料的男生正匆忙地趕往升降機方向。


碰—！


二人第一次見面就相撞，飲料瀉在一地。


「死啦死啦，抽咗成晚先抽到呢幾杯嘢出嚟，今晚又冇人殺啦！」男生手忙腳亂地撿起地上的杯。


「你話....抽出嚟？係咩意思？」Hugo疑惑。


「....嗯？你係邊個，點解未見過你。」男生反問。

g持

多謝支持！

咁多位新年快樂

新年快樂

新年快樂

「我叫雨仔，係新加入掠奪團。」Hugo自我介紹。


「......」男生思疑數秒：「.....你好，我叫阿森。」


「係呢，你頭先話抽呢幾杯嘢出嚟，係咩意思？」Hugo繼續追問阿森。


「好話喇，見你係自己人就同你講。」阿森自信地說：「我嘅能力抽取液態物質，每晚我都會抽啲純果汁畀先鋒部啲人，因為好好飲，所以我次次都可以插隊殺人先。」


「同普通榨汁有咩分別....？」Hugo問。


「分別就大喇！我抽出嚟嘅汁係純好多，現實係冇可能飲到。」阿森看著地上的果汁，變得喪氣：「可惜，今晚畀唔到你試。」


「點解？再整過唔得咩？」Hugo不明其解。


「我抽液體嘅時間比較耐，而家最多抽到一杯半啦。」阿森臉色一變，笑淫淫地說：「一杯半，唔知夠唔夠換一個人呢？」


「嘩，你個樣做咩咁猥瑣。」Hugo驚訝。

「你都係男仔就唔怕同你講....」阿森靠近Hugo的耳邊說：「我會要求先鋒部捉女仔翻嚟畀我.....」


「.......！」Hugo聽到這句後，立即明白是怎一回事，可惜現時卧底身份不能出一口氣，只能咬牙切齒，握緊拳頭。


「做咩定哂格咁？聽完係咪你都想試下呢，最多讓你上先，人畀我殺喇。」阿森搭著Hugo肩膀。


「唔使客氣，我份人都係鍾意靠自己多啲。」Hugo假裝出一個友善笑容。


「咁奇怪嘅你，咁你能力係咩？」阿森再說：「不過喺得呢度，即係入唔到先鋒部啦，唔慌係咩好能力。」


「呃....係呀，渣到都唔好意思講出嚟。」Hugo接著說：「不如畀我見識下你嘅抽取能力？」


「見你咁誠懇，就畀你望下啦，跟我嚟。」說罷，阿森就帶Hugo去自己房間。


到了房間，裡面猶如一間科學實驗室，有一張長沙發和冰箱，房間中心放著一張大長方桌，上面擺滿了玻璃杯和托盤。


「雪櫃入面就係唔同水果，你睇下想飲咩水果汁。」阿森說。


「提子汁？」Hugo在冰箱拿出幾串白葡萄。

「無問題，等我一陣。」阿森把左手放在白葡萄上，右手就放上玻璃杯口。


然後，白葡萄汁液便一點一點地在阿森的右手手心流出。


「係呢，你係咪咩液體都抽到？」Hugo問。


「都唔算嘅，其他我唔知，我只係抽到啲我識嘅成份出嚟，即係你叫我抽提子嘅糖水我抽到，但你講啲化學成份我就抽唔到，因為根本就唔識。」阿森解釋。


「咁...人血呢？」


「哈，我當初發現到呢個能力就係因為抽到人血。」阿森突然變得灰心：「不過唯一缺點就係需要時間太耐，唔會吸得死人，如果唔係我就做到先鋒部啦。」


「你好似好想做先鋒部咁喎？」


「緊係啦，做到我就唔使係到等人畀女仔我，我可以出去大肆搜掠！」說到女生，阿森突然又興奮起來。


「........」Hugo雖然很不屑阿森的為人做事，但為了任務成功，只好硬著頭皮奉承他：「其實我就有個辨法，可以發揮你嘅能力，上位一定唔成問題。」


「咩辦法？」阿森停下動作，聆聽Hugo說話。

「我知道有種生物，叫做藍火蟻，佢體內有一種毒素可以人入夢無限死亡。」Hugo繼續說：「你可以抽佢嘅毒素出嚟利用，為掠奪團剷除眼中釘，到時阿輝仲唔重重有賞？」


「真係有啲咁嘅生物？！」阿森拉起Hugo：「快啲帶我去，我要攞啲毒翻嚟邀功！」


「唔好咁急，呢度過去都有少少遠，今晚已經時間無多，我約定你聽晚係呢度等，記得早啲。」Hugo說。


「好！一言為定。」阿森回話。


翌日，


Hugo如常回校，利用早上時間和Peter、Gary商量。


「我已經搵到提煉師。」Hugo說。


「咁快！只係一晚時間...」Peter、Gary都感到驚訝。


「唔好咁大聲，你知露仁夾係我地班....」Hugo說。


「係喎，佢認唔認到你？」Peter問。


「我暫時未見過露仁夾，不過我得到佢地團隊好多資料。」Hugo再把掠奪團的組織結構細說一遍，更說了阿森的可恥行徑。


「竟然有啲咁嘅事....」Gary握緊拳頭：「早知我都入掠奪團....」


「死仔！啲咁賤格嘅嘢都做得出咩？」Peter巴了Gary的頭一下。


「而且嗰個阿輝，有好棘手嘅測謊機能力，對住佢都要事事小心。」Hugo說。


「好彩係你去做卧底，如果係我地....應該已經畀人殺咗....」Peter說。


「我地各有所長啫。我已經同提煉師講好咗，今晚會同佢去抽取藍火蟻毒素。」Hugo說。


「太好，咁我地就可以好快打低掠奪團，唔好再畀佢地任意妄為。」Peter深呼吸了一下。

那夜入夢後，


Peter把Hugo的進度告知了Vincent。


「佢果然唔係得個樣，真係幾做得嘢。」Vincent讚賞Hugo。


「佢一向都係才子嚟。」Peter四處看了看：「楓呢？今晚都未見過佢。」


「佢應該去咗啲空曠區域修練想像能力。」Vincent再說：「以佢嘅能力，應該冇人可以威脅到佢。」


「佢仲要修練？仲唔夠勁咩？」Peter問。


「想像能力係有好大空間可以發揮，我發現到佢身上嘅氣係可以隨住心情而變色，每種顏色都有唔同效果。」


「痴線....邊可能仲夠佢玩....」


「冇話對付唔到嘅，如果佢真係發起癲上嚟，我地全部人去制服佢都唔係冇可能。」Vincent再說：「不過佢就好似定時炸彈咁，留喺身邊都有一定危險。」


「你喺到講咩呀，哥哥佢唔會隨便傷害人架！」在旁聽見的小秋反駁：「如果你繼續唔信任佢，佢好快會畀人唆擺走架！」


「你...用能力見到？」Vincent問。


「.......係.....我最唔想就係呢件事發生....」小秋低頭說。


怎料，這一切都被正在背後的楓聽見。


楓不敢相信自己如此祟拜的Vincent居然會這麼說，說自己是一顆危險的定時炸彈。


「唔會....佢唔係咁睇我....佢同其他人唔同架.....」楓一邊喃喃自語，一邊渡步離開。


直至走到一個從未見過的區域，楓靜靜的想著方才的事。


「做咩自己一個喺到呀？」


楓背後猛然出現一把熟悉的聲音。


回頭一看，是阿輝。

其實我唔係好明小秋嘅能力係咩
有冇巴打可以指點下