我明你意思,的確就單案嘅判決同埋邏輯而言,被告只係因為有合理疑點先被判無罪,所以原告告唔入都唔代表佢一定係老屈。
但我覺得你都要睇埋法官轉述兩女嘅供詞,佢哋係以背影認人,當中有幾個男仔都有相似嘅髮色同身高。簡單嚟講,佢哋係認唔到人但同時一口咬定係被告做嘅,令到成件事好兒戲,真正嘅色魔可能係另有其人,但偏偏被告就因為咁承受咗一切,再加上被告尋晚自述成件事,所以呢度大部人覺得佢係俾人屈同戥佢唔抵。
講到呢度,唔係話你邏輯有問題,而係你可以嘗試用呢個角度理解吓呢度嘅人點解覺得鄧同學俾人屈,當然唔排除呢度有黐線佬真心覺得條女係雞
利申:對個女仔存心屈鄧同學呢個講法有保留,畢竟唔清楚成件事。所以單純以一個被非禮嘅人角度去睇,個女仔可能純粹想還自己一個公道,但無奈認唔到人,得唔到公道之餘仲可能間接毀咗一個人嘅清白。至於成件事做得最錯嘅係,未定罪媒體就公開被告嘅個人資料,對鄧同學造成好大傷害。