賈覓
2017-08-27 23:21:00
30.
「啊!!!!!!!!」阿恆一邊怒吼一邊衝向攬住我既行屍,一刀一刀插落佢個頭度。
我摸一摸膊頭,發現雖然好痛,但係竟然冇傷口,低頭望一望倒地既屍體,原來係一個阿伯,脫落既假牙半吊喺嘴唇邊。
「仲望!?走啦!!!」阿恆一聲令下,我先回過神來。
我回頭向貨VAN死勁地衝,阿恆亦緊隨在後,車上既阿文亦都不斷射箭幫忙掩護,眼見距離貨VAN只淨低十幾步左右,本來喺我身後既阿恆竟然一個加速,一下子就超越我,瞬間跑到貨VAN前面將圍住貨VAN既行屍逐一插死。
終於跑到貨VAN前面,我用雙手一撐爬上車頭蓋,再爬上車頂,由天窗跳入車內。
阿文隨即開車,遠離不斷向我地湧近既行屍。
「你有冇事啊!我問你有冇事啊!答我啊!!」泳茹掉低手中既十字弓,激動地將我既衣領扯開,心口位置既幾粒鈕啪啪聲爆哂落地。
原來阿文一早坐番去司機位準備開車,頭先射箭既唔係佢,係泳茹。
「呼……呼……呼……」經過啱啱既喪跑,我氣都未回順,一個字都講唔到。
「點解會冇傷口架!頭先明明有隻行屍咬實你架!」泳茹既語氣又緊張又放鬆,非常矛盾,一方面因為驚我有事而激動,另一方面又因為見唔到傷口覺得奇怪。
「假…咳咳……假牙……」我訓喺後座度抖氣。
泳茹突然一拳打落我個肚度。
咳咳。
好彩今朝咩都冇落肚。
「次次都搵命博,死人架!好彩隻行屍冇牙啫,如果唔係而家追住我地架車既就係你啦!」佢講完又醒多我一拳。
「咳…咳…護士姐姐,你真溫柔…咳咳…」我摸住冇哂鈕既心口笑咗笑。
貨VAN突然停低。
「應該夠遠啦。」阿文終於出聲。
「阿恆呢?」我坐起身,望出車外尋找阿恆既蹤影。
「反正已經證實咗行屍唔會再攻擊佢,唔洗擔心。」阿文講完呢句說話,就爬咗過黎後座,眼定定咁望住我。
「…………」車內既三人突然一陣沉默。
「我知,頭先係好危險,但係唔代表我個方法係錯架嘛,如果冇落雨,佢地根本唔會發現到我,只不過係我太大意,唔記得仲落緊雨啫……」前車可鑑,趁阿文未開口鬧,我先發制人解釋咗先。
阿文突然高舉雙手,似乎係想對我揮拳,我反射性地緊閉雙眼,攬實自己。
原本預期既疼痛感竟然冇發生,取而代之既係一絲溫暖既感覺。
阿文攬咗我一吓。
「Sorry啊,我明知你一路都好努力咁諗緊辦法搞掂每一件事,我就淨係識一味喺度急、發脾氣,到啱啱隻行屍一野咬落你度,我真係成個人呆哂唔知點算,好彩泳茹即刻叫我去開天窗準備開車。連搵老豆老母,都要靠你,我真係好鬼冇用。」阿文本身眼濕濕,但係講到後面又激動到一拳打落個坐墊度。
「我冇野喎,兄弟黎架嘛,講呢啲。」我掃一掃佢背脊。
「搉、搉、搉……」突然傳來一陣敲窗聲。
車外出現既係踩住一架單車既阿恆,車籃上面係我地啱啱搵到既避彈衣同槍。
我地即刻開門放阿恆入黎。
阿恆一上車就同我high five咗吓。
「恆仔你……好犀利……」面對唔知喺邊度搵到架單車,仲兜番轉頭執番啲物資既阿恆,泳茹驚訝到唔知應該用咩字去形容。
「原來我都幾有用。」阿恆露出一個燦爛既笑容。
係我地第一次見到阿恆笑。
「係呢,我地而家應該點?」阿恆仲變得多野講咗。
「一日未搵到張叔張嬸,我地都唔會放心,我諗呢場雨應該就快落完,我地出去搵多次。等陣我地四個都將啲屍水抹上身,一齊出去搵,屍體已經全部檢查過哂,只要望吓生勾勾嗰啲係唔係就ok,唔係既就順手搞掂佢。」
「咁如果搵勻哂都冇呢?」泳茹一邊問一邊檢查阿恆既傷口。
「咁多行屍,冇可能搵得哂,但係我地天黑之前一定要搵到地方落腳,因為我發現行屍夜晚既移動速度快過日頭好多,一但被圍攻我地好難走得甩。」
「我地唔係約咗自救小組啲人咩?」阿恆提一提我。
「嗯,等陣覆佢地話聽日先過去啦,當務之急係搵番張叔張嬸。雨停之前,我地就喺啲紙上面寫啲message,等陣泳茹同阿恆負責周街貼啲紙,我同阿文就去認屍,咁就算天黑前我地搵唔到張叔張嬸,到佢地之後番番黎呢度,見到啲紙就知道我地會去沙田西貢。」
佢地聽完,就開始拎出車上既紙同筆寫低我地要去既地址。
「多謝,有你喺度,我知一定會搵得番佢地。」阿文遞咗條乾毛巾俾我,然後就同泳茹阿恆一齊寫字。
我趁佢地背向我埋頭寫字,
就一手用乾毛巾抹乾濕透既頭髮,
另一手將喺屍體身下執到既,張叔從不離身既即影即有全家福,塞入我褲袋,
確保冇任何人睇到。