睇到好無引。成日呢啲位停
學曬中國有剪接啲衰野
不過已正皮。支持支持。加速加速
出快D啦..又要等._.
屌live咗
【番外一】
夜啲出多篇!
好文不妨再留名
『亡靈超生』
34.
兩棟疊到天花板咁高既紙皮箱不斷震動,好似有野係咁喺後面撞佢地咁。
我吞一吞口水,將啲紙皮箱逐個逐個搬落地下,箱後既動靜突然消失無蹤。
出現喺我眼前既係一度防煙門,一度個門柄俾人用地拖棍卡住咗既防煙門。
人總係犯賤,就好似夜媽媽自己一個沖涼既時候,你覺得有對眼喺個窗度望住你,就會忍唔住係咁望隻窗。
又好似半夜三更自己行番屋企,覺得後面有人跟住你,就會忍唔住望向後面。
我慢慢行近度防煙門,喺個窗位度望入去,咩都睇唔到。
我拎出電話,打開電筒,一邊照一邊望。
一隻眼珠突然出現喺我面前。
FUCK!我嚇到成個人向後彈咗吓,訓咗喺地下,電話都跌埋落地。
呢個角度,加上電話既燈光我先發現,天花板上面既大字。
『亡靈超生』
「咩事啊阿Don!」泳茹帶頭衝咗入黎廚房,阿文同阿恆亦都跟喺後面。
「原來有度防煙門,入面唔知有幾多行屍。」我拿拿聲企番起身,搵吓廚房入面仲有冇其他可以頂住度門既野。
啪!啪!碰!
撞門既聲音越黎越激烈。
「一定係我地頭先嘈得滯,搞到佢地而家咁燥底。」阿恆都幫手搵埋一份。
「劉…旺發?個名咁熟既?」阿文循住我部電話既燈望向天花板。
原來嗰幾隻大字隔離仲有幾隻細字。
「啊!我醒起啦!發叔啊!發叔啊!」阿文突然好興奮咁捉住我。
「邊個發叔啊?」
「住淘大嗰個發叔啊!佢專係做埋啲鬼神生意,周圍呃人架!!」阿文仲係好興奮。
「你咁開心,你同個發叔感情好好架?」
「唔係啊!你唔記得啦咩?雪櫃上面張memo啊!」
「memo?」
「我老母寫嗰張啊!佢話淘大危險勿近啊!佢地兩個去淘大一定係去救發叔,救完之後番屋企見我未番到就唯有走左先,於是黎到九龍灣。但係個運動場又淪陷咗,佢地就唯有匿入呢間餐廳,一定係咁啊!」阿文越講越開心。
我唯一咁肯定既係,阿文口中既發叔一定安全離開咗呢個廚房,先可以寫到天花板啲字,但係張叔張嬸喺唔喺度防煙門後面,我真係唔敢包。
「Don哥!枝地拖就斷啦!!!」阿恆好心急咁講。
廚房入面搵枝長啲既棍都冇,咁大個廚房點會得一枝地拖架!
前無去路,後有追兵,而家啲行屍咁活躍,我地喺正門出去實死無生。
我地一定要喺呢度捱過今晚!
「阿文阿恆,推跌個雪櫃頂住度門,泳茹,將個紅白藍膠袋拖出去門邊。」
我講完之後就跑番出去樓面,將啲凳上面既坐墊拆哂落黎,用軍刀將啲皮布界成一條條,再綁喺啲廚具既柄上面,然後將啲棉花塞入啲窿罅度,做咗一個sample俾泳茹睇之後,我就走番入廚房。
阿文同阿恆用個雪櫃頂住度門之後,就坐咗喺個雪櫃上面用自己推實度門。
「Don哥,我啱啱裝過,至少有二三十隻啊,如果佢地衝哂出黎……」阿恆面容痛苦地推住度門。
「Don,我怕我地頂唔住啊!」阿文亦都好用力。
「等多陣,等多陣。」我嘗試保持冷靜,將成個廚房入面最大既煲放喺地下,將見到既所有油倒哂落去。呢個時候泳茹亦都準備好哂所有廚具,我將佢地浸哂落啲油度,然後炓著個爐。
阿文繼續推實度門,阿恆負責打爆防煙門既玻璃,我就負責插死最靠近我地既行屍。爆完玻璃之後,泳茹就會沿住窗口位倒啲油落門邊既屍體上面,我就會喺爐頭度將啲廚具點火,而阿恆就負責將啲點咗火既廚具掟入去。
聽完我既計畫之後,大家都去到自己既位置,準備好。
阿恆拎起滅火筒,舉高過頭,一野敲落防煙門個窗度。
大家想我快啲埋尾定寫長啲?
大家想我快啲埋尾定寫長啲?