賈覓
2017-08-24 22:48:32
27.
「又有野寫?」坐喺後座既泳茹伸個頭埋黎䏜我本簿。
「八妹。」我輕笑一聲,繼續埋頭喺我既思緒裡面。
喪屍,對老一輩既人而言從來都係傳說般既存在,就算喺電視、電影出現得再多次,大家都心知肚明冇可能成真,冇可能喺現實中出現,所以從來唔會有人傻到為咗呢種冇可能會出現既災難而做準備,政府唔會出抗屍指南,市民唔會無端白事走去學一身好武功應戰,因為喪屍根本唔存在。
而亦都係因為咁,而家先會屍橫片野。
人滿為患既屋邨被行屍取替,繁華喧鬧既九龍被行屍佔領,就連醫院既床位都被行屍霸佔。
究竟香港,仲有幾多地方真係屬於香港人?
「冇理由架……」泳茹又喺後座喃喃自語。
「咩冇理由?」我問完之後,泳茹就將佢部電話遞俾我睇。
電話入面顯示既喺各個國際新聞既網站,根據網站上面既新聞,世界各地每個國家各有各忙碌,各有各生活,睇黎似乎只有香港被侵佔。
但係奇就奇在,無論CNN定BBC呢幾日都冇報過任何有關香港既新聞。
香港人變哂喪屍竟然冇新聞!?
當年既邁阿密喪屍由2012報到而家都仲有人報緊,而家香港三日之內變成死城,竟然連一遍報導都冇!?
「Don,你離開香港太耐啦,話唔定今次單野,一早就俾大陸河蟹咗。」窗外落起綿綿細語,阿文將水撥打開。
「唔會掛,咁大件事,危及到全香港人既人命喎…唔會既…」泳茹雖然口裡否認,但係從佢既語氣就可以聽得出阿文講既野可能性有幾高。
「香港入面又唔係淨係得香港人,單憑中國邊有可能㩒得住,除非……」除非背後有更強大、更具國際性既組織做靠山,呢句說話我唔敢講出口,因為如果我估計既所有野都冇錯,我好有可能,就係呢件事既導火線……
休息咗冇耐既阿恆突然扎醒,一個轉身,嘔到成地都係。
「好…好臭……」阿恆一邊嘔一邊講。
我地三個掛住諗野,都冇發現周圍環境既變化。
原來唔經唔覺,我地已經駛入咗九龍灣既區域,九龍灣既狀況比我地到目前為止遇到既所有狀況都仲要差,「活著」既行屍比比皆是,行屍既數量多到好似夜晚旺角既街頭,成千上萬屍體既腐臭味不斷湧入車內。
路邊既行屍逐漸被汽車既引擎聲所吸引,無論車後定係左右兩邊,都跟滿行屍,除咗繼續前進,我地冇其他路可以行。
好快,就到咗九龍灣運場。
我完全見唔到阿文之前所形容既圍欄,只見到四面倒地既鐵網。
「走…走哂出黎……」阿文見到眼前既景象都目瞪口呆。
貨VAN既車窗貼哂反光貼紙,車外既行屍睇唔到車內既狀況,但係佢地泛紅既眼白、乾裂既嘴唇、扭曲既身軀我地就睇得一清二楚。
雖然行屍冇拍打車窗,但係就喺啲隙罅度聞完又聞。
「Don,點算啊……」泳茹不斷往車既中心退後,務求離行屍越遠越好。
我諗完又諗,似乎得一個辦法。
「阿恆,你落車。」
「吓?」泳茹、阿文、阿恆三人異口同聲表示疑惑。
於是,我重覆一次腦中唯一既答案。
阿恆,你落車。