【喪屍】《末日東方之珠--- 淪陷香港後花園》

賈覓

1001 回覆

222 Like 11 Dislike

第 1 頁第 2 頁第 3 頁第 4 頁第 5 頁第 6 頁第 7 頁第 8 頁第 9 頁第 10 頁第 11 頁第 12 頁第 13 頁第 14 頁第 15 頁第 16 頁第 17 頁第 18 頁第 19 頁第 20 頁第 21 頁第 22 頁第 23 頁第 24 頁第 25 頁第 26 頁第 27 頁第 28 頁第 29 頁第 30 頁第 31 頁第 32 頁第 33 頁第 34 頁第 35 頁第 36 頁第 37 頁第 38 頁第 39 頁第 40 頁第 41 頁

賈覓 2017-09-14 22:32:04

49-2.

「阿文你做咩啊！！」我一個箭步跟落去。

阿文目前既狀況完全符合武俠小說裡面成日講既殺紅了眼，佢一邊大嗌一邊係咁插啲行屍個頭，見一隻插一隻，短短十幾秒就殺咗好幾隻行屍，奈何佢實在嗌得太大聲，附近既行屍俾佢吸引哂過黎。

「上返去啦阿文！」我跑去阿文身後，幫佢處理背後既行屍。

「我要救發叔…我要救發叔…」阿文好似聽唔到我講野咁，一直喃喃自語。

「啊！！！！！！！」泳茹既尖叫聲從樓梯上傳來，原來兩隻行屍趁我唔為意走咗上去，不過家明同晞儀三兩吓手勢就搞掂咗佢地。

我望住不斷逼近既行屍同滿面鮮血既阿文，突然一陣火氣湧上心頭。

碰—

我一拳打咗落阿文塊面度。

「同我上返去！」我特意放低聲線，希望阿文感受到呢個係命令，唔係要求。

阿文望一望我，好似咩都冇發生咁，另番轉頭繼續殺屍，繼續大嗌。

我真係忍唔住。

一手捉住阿文衫領，將佢成個人轉過黎，右手揮拳打向佢既左面。

一縷血絲從佢嘴角流出。

「唔好打啊！」阿恆唔知幾時從樓梯上跑咗落黎，從後環抱住我，想阻止我繼續打阿文。

「發叔…？」阿文呆呆咁望住我。

我一用力就鬆開咗阿恆既束縛，左手揮拳打埋阿文左邊面。

「走啦文哥！！走啊！！！」阿恆用盡全身力氣攬實我成個人。

阿文突然雙手舉起把刀，望實我係咁講對唔住。

「呀！！！！！！！！！！」阿文發出絕望、嘶啞既吶喊，一刀向我個頭揮落黎。

唔通阿文……
當咗我係發叔？

「啊……」阿文接連發出低聲既哀號，掩實下體。喺佢將把刀插落我個頭之前，我已經狠狠咁踢咗〝小文〞一腳。

趁阿文唔為意，我一拳打落佢太陽穴，咁就暈咗。

「拖佢上去。」我望住眼前不斷前進既行屍，同身後既阿恆講。

行屍一隻一隻咁向我逼近，一刀一隻，我將死咗既行屍全部堆哂喺樓梯口。

「小心左邊。」晞儀把聲突然喺左耳傳來，佢唔知幾時行咗落黎，企喺我身後，背脊對背脊。

我向左邊揮刀，割下一隻矮小行屍既頭顱，晞儀向右邊舉刀，一躍插入行屍既太陽穴。

見殺得七七八八，我地就爬過樓梯口既〝屍山〞，拖住兩條行屍既屍體，行返上樓梯頂。

「晞儀，你有冇受傷啊？有冇整親啊？」一上到去，家明即刻好緊張咁拉住晞儀左check右check。

「…Don…」泳茹輕輕拉一拉我既衫袖，見我殺氣騰騰咁睥咗佢一眼，就識相地縮手。

雖然出現咗啲小插曲，但係原定既計畫照樣可以進行。

有咗之前既經驗就更加順手，我將行屍既屍體劏開，泳茹即刻行埋黎一齊將內臟攬碎，然後抹落自己個身度，晞儀同家明亦都一邊作嘔一邊將另一條屍劏開。

一路企喺則邊發呆既阿恆，突然喺背囊度拎出一枝水，望住坐喺地下不斷震既阿文。

「唔好……唔好……唔好……」阿文不斷震，不斷自言自語。

阿恆突然轉身望住我，將佢手上面一直緊緊握住既野交俾我。

「不如…餵文哥食我啲藥？」原來阿恆一路拎喺手上既係藥樽。

我拎起黎一睇，SSRIs？

「呢隻藥可以緩和壓力、鎮靜神經。」

呢隻藥，我記得……

阿恆好似察覺到我發現咗啲野。

「Don哥，我……我以前…有過抑鬱症。」

賈覓 2017-09-14 22:32:30