51. (完整版)
屍臭難頂,家明將自己既褲腳割下,俾自己同晞儀綁喺面上當口罩。
阿文一路好呆咁跟喺我後面,泳茹就喺身邊扶住佢,阿文既無反抗,亦無反應。
阿恆不斷喺啲行屍面前又跳舞,好扮鬼臉。
「Don哥,其實啲行屍,其實都唔係咁犀利啫。」阿恆跑返黎我身邊講。
「嗯,正正因為行屍既弱點咁多,所以我先覺得香港仲有得救。雖然人死不能復生,但係話唔定我地可以搵到,令所有香港人免疫既方法。」又怕火、又睇唔到野、日頭反應又慢、只要腦部受損就無法生存。
只要旭日長存,香港依然屬於香港人。
【沙田賽馬會游泳池】
穿過大街小巷,終於,到咗泳池門口,泳池門外停泊咗幾架巴士,每架巴士都頭貼住尾,尾貼住頭。巴士同巴士間既空隙不足以讓一個人通過。
「爬車底?」家明用氣音問我。
我地一行六個人,兩個大背囊,爬車底太麻煩,而且萬一磨一磨,身上啲屍汁甩哂就大鑊。
我行向離我地最近既巴士,叫家明同我一齊格硬拉開車門,點知我地拉極都拉唔郁。
當我地正準備放低背囊,用盡全身力氣既時候,巴士既前後門突然咻一聲同時打開。
「其實呢度有個制可以㩒。」晞儀鬆開放喺開門制上既手,悠然地從後門行上巴士。
等全部人上哂車之後,我將車門全部栓好,然後帶住全部人行向巴士最後面,打開逃生門離開。
【入口處】
成個入口都落哂閘,百頁狀既鐵閘後更黐滿浮板,形成一道浮板牆,以致成棟建築物密不透風,毫無漏洞。
「有冇人啊!」我用力地拍咗幾吓鐵閘,聽見巨響,〝巴士牆〞外既行屍即刻傳來陣陣咆哮。
見冇人應,我又拍多幾吓,如我所願,唔少行屍都俾我吸引人到成個人貼哂落啲巴士既玻璃度,好似鬼片入面啲鬼喺燒味鋪出面,係咁舐塊玻璃以為自己舐緊舊叉燒咁。
「哎呀哎呀!咪鬼拍啦!引哂啲妖物過黎啦!」鐵閘內傳來一把女聲。
「唔好意思啊!我地收到message話呢度可以收留我地。」雖然隔住道浮板牆,入面既人見唔到我地,但係我依然裝出一副蠢頓既樣子。
「你地有冇引到啲妖物過黎架!」
「冇啊冇啊,呢度得我地六個人咋,可唔可以俾我地入去啊?入面啲野好恐佈啊!」我扮到好驚咁。
「哎呀阿婆!咪叫咗你唔好周圍走囉!入去坐吓啦!」女聲突然變成男聲。
「哎唷,坐到變化石囉!」又變返女聲!
「邊個喺出面啊!係咪阿軍啊?」剛才出現既男聲向我地問話。
「唔係啊,我地係喺facebook度收到message叫我地黎呢度架,我個account係Lap man Cheung啊。」
「喔喔喔!喺九龍嗰幾個!等我一陣,我開門!」男子講完,浮板牆中下方就出現咗光線,原來鐵閘中間有道門,不過啱啱俾滿山滿谷既浮板遮住哂。
「嗨!歡迎歡迎,快啲入黎先啦。」開門既男子笑容滿面,身上著住一件Polo既短袖衫,一條卡其色既短褲,一對深啡色既Birkenstock,睇上黎非常友善。
「呼……唔該哂,唔該哂。」全部人入哂去之後,我即刻挨住道浮板牆,扮哂喘氣咁,其他人見狀,有樣學樣。
「唔洗客氣!嗨,我叫皓榮啊,今日我負責守門,去一去廁所阿婆就偷偷地走出黎。你地冇受傷丫嘛?」
「我叫阿Don,佢地係我既同事。唔好講咁多住……有…有冇水啊?」我不斷喘氣。
「有有有,入黎先入黎先講。阿虎!阿力!出黎幫手拎行李!」皓榮往裡頭大嗌,兩個年輕男子就從右側既通道突然竄出。
唔知阿虎定阿力想接過家明既背囊。
「唔洗黎,我自己拎啦。」家明輕輕推過陌生人既手。
「唔洗緊張唔洗緊張,呢度每位居民入住之前都會將行李交俾我地,我地會將所有物資劃一分放,然後再按個人需要配給俾每位居民,確保大家過住平等既生活。」皓榮雙手一攤,開始好似地產經紀介紹住宅區咁介紹起呢度既生活。
「聽落好似幾合理咁喎。」泳茹答話。
「係架,所以全部居民住咗入黎之後都冇乜邊個會離開,我地一日24個鐘都會安排人手看門口,所以非常安全。」唔知真係以為佢介紹緊某個新起既住宅區。
皓榮一邊講,一邊將我地引進內堂。
「你啱啱話會將資源按個人需要配給,咁邊個定標準?邊個負責分?」我假裝好奇邊行邊問,其實係視察緊環境。
呢個時候,身後傳黎一把充滿霸氣、低沉厚實既聲音。
「我,郭江龍。」