52.
我地每個人都因為背後出現既聲音回頭。
除咗晞儀。
「你地好,我算係呢度既領袖,我叫郭江龍,俾面既可以叫我一聲龍哥。」眼前既中年男人梳咗個發哥般既油頭,著住一身整齊既西裝,乾淨到好似呢幾日完全冇遇過行屍咁。
「你地由九龍黎到呢度一定受咗好多苦,阿榮,幫佢地安排幾間房。等你地梳洗完之後,我會搵人帶你地去醫生度做檢查,冇咩事既話就可以休息一下,我地會準備好晚餐同你地洗洗塵。」郭江龍既談吐大方得體,充滿說服力,令人一不留神,就會放下戒心。
郭江龍講完就離開咗,淨低皓榮繼續向我地介紹各個區域。
不過我一句都聽唔入,因為我既思緒停留喺郭江龍頭殼上面嗰一圈既刀疤,
同埋晞儀驚恐既神色,佢雙眼既瞳孔縮到冇得再細。
家明好認真留心地聽皓榮講野,於是我就喺隊尾度捉一捉晞儀隻手,諗住安撫吓佢,點知我發現晞儀隻手竟然係咁喺度震,額上不斷標冷汗。
「冇事丫嘛?你隻手好凍。」我好細聲咁問晞儀,更用力地捉實佢隻手,俾啲溫暖佢。
晞儀搖搖頭,示意自己冇事,但係就下意識地靠近我。
我可以明確地感受到自己既心跳微微加快,或者係因為怕俾家明發現。
「因為泳池既室內空間真係非常有限,所以呢度既居民全部都係住喺泳池入面。呢邊係主池,我地喺池底度用浮板起咗好多個間隔,每個間隔入面都會有睡袋,到夜晚居民就會返入屬於佢地既間隔度休息,嗰邊既副池、訓練池同習泳池都係一樣既用途。」皓榮向我地展示〝住宿區〞。
「嘩……劏房咁款喎。」阿文唔知幾時開始又正常番。
「近排可能都要辛苦啲,等我地之後蒐集多啲物資,或者拿下其他建築物之後,生活就活好過啲,現階段可能就要委屈各位一齊共渡時艱。」皓榮有少少唔好意思咁掃一掃後尾枕。
「咁我地幾個今晚訓邊?」全程一路企喺我身邊既阿恆問。
「唔洗擔心,因為怕新居民住唔慣,所以所有第一晚入住既居民都會住喺家庭更衣室同埋救生員休息室。呢度有啲新衫,你地去更衣室度梳洗吓先啦,沖完涼返返黎呢度,會有人黎帶你地番房。歡迎加入自救小組」佢講到呢度好似已經營運咗好耐咁。
啱啱消失咗既阿虎同阿力又唔知喺邊度冒咗出黎,手上拎住幾套乾淨既衫褲。
「唔該哂。」我一手接過全部衫褲,然後分發俾每個人。
「女更衣室喺左邊,阿虎會帶兩位女仕過去。男更衣室喺右邊,阿力你帶佢地過去啦。」亦因為咁,我終於分清楚邊個係阿虎邊個係阿力。
阿文喺前面好興奮咁同家明講話覺得呢度好好,好安全,好放心。
的確,皓榮真係將呢度講到好完美。
家明既神情同我一樣嚴肅。
我諗,佢應該都同我一樣覺得有好多漏洞。
事發到而家先第四日,邊有可能咁快就咩都部署好哂?
24小時輪班守夜,資源集中劃一分配,新住戶特殊待遇,入境身體檢查,
喺而家呢個亂世之下,四日內真係可以實行到咁多政治政策?
不但搵到呢個泳池,泳池入面仲要一隻屍都冇,出面仲要起好哂巴士牆、浮板牆,
連劏房同乾淨衫都準備好哂,究竟點做到?
一係,就個郭江龍真係有難以想像既領導能力,再加上佢地一開始就有好龐大既人力。
一係,就呢個〝自救小組〞,根本唔係呢四日先開始運作。
-------------------------------
利申:冇去過沙田賽馬會游泳池,google又得一兩張相,全靠官網資料FF,如有不實,萬望見諒。
![](https://cdn.lihkg.com/assets/faces/normal/sosad.gif)