Broforce
前言：
橫向動作、爽快、屠殺、幽默、英雄主義、可以多人合作又有一定嘅難度，呢幾個要素除咗好適合形容越南大戰之外，同樣地都係Broforce嘅特色。
而家好多遊戲會將爽快同困難變成二元對立。即係一隻難玩嘅遊戲會要求玩家小心行事，令遊戲節奏變慢搞到玩家冇咗份快感。但玩法似經典作品嘅Broforce就不斷有大屠殺、爆炸場面去刺激玩家嘅神經，但由於每條命只能夠承受一擊，所以小小失誤會都足以致命。呢種命懸一線嘅遊戲，好適合鍾意殺戮但又想接受挑戰嘅玩家。
玩法：
遊戲玩法非常明瞭，殺。玩家可以操控唔同嘅角色，而佢哋會有各式各樣嘅技能。但都不外乎係普通攻擊、特殊攻擊同近戰攻擊。靠呢三招，再配合場入面嘅油桶、石油氣罐，玩家就可以一直殺落去。當然某啲關亦會有大佬打，俾啲唔同嘅難題玩家。
而闖關嘅途中玩家會不時見到有啲人質。呢啲人質唔係救完加吓分就算，佢哋其實係可用角色。玩家每救一位，就相當於加多條命，並會即時轉換角色。講到呢到，終於進入Brofroce嘅核心，就係「Bro」。
英雄：
呢隻遊戲嘅角色都係改編自出名嘅電影人物，例如：Rambo、007嘅James Bond、黑超特警組嘅J等等。當然遊戲有幫佢哋進行適當改造，例如個名都一定會改到包含「Bro」呢個字，但技能、造型大致都係跟返佢嘅原型。
所以，各個「Bro」嘅技能都非常獨特，就算係普通攻擊都會有完全唔同嘅模式——可以係拳打腳踼、刀、炸彈、火槍、機關槍⋯⋯不能盡錄。而特殊攻擊更加啜核，好多都係嗰隻人物嘅招牌絕技。
Broforce有個聰明嘅設計去逼使玩家嘗試每隻人物：玩家冇得自行選擇英雄，只有以下情況先會轉到角色：開始新關、救人質同死。
而呢啲轉換係完全隨機，玩家永遠唔知下隻會用咩人物，令到大家唔能夠用死某啲角色。所以每次換人係充滿期待同緊張，如果抽中自己鍾意嘅角色只能夠用技術延長佢嘅壽命。而由於角色係要透過救人質嚟獲得，所以就算玩家用得幾好，見到有監牢都係會忍唔住救人而被逼轉角色。
唔能夠隨便換人令玩家更加重視、了解每隻角色。唔怕浪費設計者嘅心思之餘，仲可以令遊戲更加耐玩。
總結：
其實Broforce喺各方面都唔係咩新鮮嘅嘢，甚至畫質都不及經典遊戲越南大戰。但佢就憑有趣嘅角色再加特別嘅揀人機制增加咗玩家收集英雄嘅欲望。
玩家不知不覺就會上癮，每次解到新嘅人物嗰種無比嘅興奮，會好想試吓隻人有幾勁、啲技能有咩特別等等。又或者簡簡單單，估吓啲角色究竟源自邊部作品都已經係一大樂趣
平台：PS4 Windows Linux macOS
圖片： google
資料：個人鳩UP
Broforce同幾個fd打好玩炸哂d路唔比人行
呢隻有興趣,可惜ps+送個陣未買機
唯有等特價睇下有冇
好保守 都冇咩太重口味嘅嘢
繼續推介eso
(唔包解謎GAME)
