首先講下開發依個遊戲嘅公司obsidian entertainment (黑曜石)， 好多員工都係由解散左嘅Black isle (黑島)過去。黑島創造左好多rpg 經典中嘅經典，例如planescape torment, Baldur's Gate, 同埋應該係最廣為人知嘅fallout series。
黑島執左之後，部份員工成立左黑曜石，繼續專注造高質rpg，例如有 fallout new vegas , southpark truth of the stick, pillar of eternity . 作為元組級嘅rpg 公司，劇情上面完全唔洗擔心，但係同時即使係2016發行嘅tyranny, 佢嘅玩法同外觀都十分老派。成隻遊戲都係用45度視覺，畫質亦都十分相當超級地普通，所以好注重畫質嘅話依隻唔太啱你。唔鐘意睇字或者英文好一般嘅都唔太啱。之前講過嘅planescape torment D人嘅評論係best game ever read, best book ever played， 理所當然地tyranny 都係好撚多字，仲要冇中文。(我玩嘅時候係拎定字典，拎定紙筆去學英文，真係學到幾多下)
如果上面果D都冇嚇怕你，你又鐘意玩rpg 嘅話，tyranny 應該唔會令你失望。故事發生嚮一個正邪之爭已經結束嘅地方，因為霸主kyros已經君臨天下,全世界就剩番一個叫the tiers 嘅地區仲未被攻陷。久久未能攻陷，霸主一怒之下叫左身為fatebinder (簡單嚟講嘅係公務員) 嘅主角頒令魔法法令，如果兩星期(？)內果兩班搞內訌嘅白痴軍隊未能攻陷其中一座主要城池嘅話，佢哋(包括自己)就會同城內D人一齊瓜老襯。 故事發展落去你可以投靠其中一邊(即係同另一邊反面)，做英雄反霸權，又或者on99見人就殺，唔同嘅路線有唔同嘅劇情，對話，同伴，甚至係場境，重玩性係極高。
依隻RPG比較特別嘅係你連故事／角色背景都可以改變。一開波你可以選擇時間線上發生嘅事情，依D事件會嚴重影響劇情發展，令重玩性同代入感更上層。
戰鬥方面冇乜特別，係法術可以自己創造同調整，依個係幾有趣。裝備，技能樹，隊伍依D應該有嘅都有。前期幾有挑戰性，但係後期都幾輕鬆。同埋閒置隊友雖然都會隨主要隊伍升級吸經，但係都會低幾級，令我唔係好想轉隊友。
對話方面，唔同角色會就你嘅所作所為，你之前所定下嘅故事／角色背景，忠誠度，恐懼度等等有所不同。亦都可能會受你同佢哋所屬陣營之間嘅關係影響。不過因為係咁，所以有時講嘢都要就住就住，廢事影響忠誠度，恐懼度或陣營關係，好Q煩。不過達到一定嘅忠誠／恐懼就可以用組合技。
總括黎講，鐘意RPG甚至係鐘意睇小說嘅話，tyranny 係一隻唔錯嘅遊戲，劇情豐富，代入感強，戰鬥比較容易上手，法術、背景故事系統特別。但係同時唔係人人都會鐘意同啱玩，遊戲時間亦都可以再長少少，支線好一般，所以建議特價到20至30美金先好買。
