我青梅竹馬同咗個死MK仔一齊

Push 阿敏好卑微

以前有個故都係咁

阿敏俾返部手機我：「我幫你約咗小璇下星期六見，佢一定會出嚟。」

我望望手機，阿敏真係send咗個信息叫小璇下星期六同我出街，小璇上線中，但係無覆到。

「佢會，下星期六係25號，你哋一齊嘅日子。」

阿敏竟然記得我同小璇一齊嘅日子，佢對我嘅事真係好上心。

「阿敏，我哋⋯⋯」

阿敏又打斷我，今餐飯佢就不停咁打斷我，好唔想俾我講嘢咁。

「你去氹番佢，呢個係我嘅請求。」

「好。」

阿敏已經先斬後奏幫我搵咗小璇，又咁堅決我無辦法拒絕。

「記住，我哋嘅事收係心入面。你鐘意嘅係小璇，呢樣嘢我好肯定。問清楚你個心，你會發現你係鐘意佢。同埋你唔係鐘意我，你對我嘅只係性慾。」阿敏講。

「但係我覺得唔止性慾。」我講。

「如果你係鐘意我嘅點會依家先發現。」阿敏反問。

我語塞。

「總之你呢個感情係由性慾而生，你唔係鐘意我，只係想同我上床。呢份感情你同愛情混淆咗。」阿敏好強硬咁講。

阿敏講完就繼續食飯，然後佢就返屋企，臨走前佢仲提我洗碗。

佢再加多句：「我哋以後都會係青梅竹馬，無更多啦。」

好撚多文呀！！！！！

再阿敏視覺

-----------------------
叫樂文同小璇復合之後，我就趕返屋企。

入到門口之後，我就靠住道門坐咗係地下喊。

小璇先係俾到佢好嘅人，我做嘅嘢係啱嘅。

但係心就好痛，淚水源源不絕咁流出嚟。

樂文⋯⋯

原來傷心真係會令到個心痛。

兩門之隔嘅距離原來都可以咁遠。

我唔可以將佢留係呢個世界，佢值得更好，我唔配係佢身邊。

明明咁樣係啱嘅，但係點解我會咁痛苦？
---------------------------

今日應該爆完seed，睇下仲嘔到幾多。

好正樓主加油

係阿敏走咗之後，小璇就覆咗我話下星期六可以見面。

問題：我係咪準備好同小璇復合。

首先，我係咪已經誠心地、完全地鐘意小璇。

唔係。

我已經發現我鐘意咗阿敏，我做唔到100%去只愛小璇一個。

第二，如果我同小璇一齊返之後，我有冇信心一心一意同佢一齊？

無。

第三，我能唔能夠真係俾到小璇想要嘅愛佢？

唔知。

諗唔到。

於是我又滑下手機，睇返過去半年同小璇一齊影嘅相。

去大尾督踩單車、去唔同商場掃街、去攀石、去遊走唔同嘅山峰、去演唱會、去睇戲、去好多好多嘅地方，呢一切嘅中心都係小璇。係佢帶我出去，我先會探索呢個世界咁多嘅地方。

每一張相都係我哋獨有嘅回憶。

如果去呢啲地方嘅時候無小璇又會點？

得返我自己嘅話，呢啲回憶會變得枯燥起嚟。

小璇嘅笑容，小璇對我嘅喜愛，仲有，我對佢嘅喜愛。

睇下睇下，我開始流淚，呢一切都好開心。

到底敏姐想點，同第一篇差好遠

呢個女孩已經進入咗我嘅生活，我仲想同佢去更多嘅地方。

佢已經融入咗我嘅生活，佢帶咗我出去外面嘅世界。未來，我已經唔會滿足於呢百幾呎嘅單位，我已經俾外面嘅景色深深吸引住。而呢個外面嘅世界，小璇嘅存在係不可或缺。

但係我亦都鐘意阿敏，多情。

呢一刻，我最唔想失去嘅小璇。

混亂、卑鄙、可恥，一個人嘅心會傷害到另一個人。

最終，我諗嘅只係嗰個人對我重唔重要。

「對我」，最後都係諗自己。

陽光一直照耀我，佢亦講明會繼續係我背後，叫我返去拎返起顏色筆。

人生中段出現嘅顏色筆同由細就陪伴我嘅太陽，兩樣我都鐘意。

用簡單嘅排除法嚟思考嘅話，我應該繼續去為人生呢塊畫布上色。

陽光都講明唔會同我更接近，只會繼續在背後默默守護我。

顏色筆大概只係發脾氣，只要我認真對待佢，我哋喺未來一定可以好好走落去。

//問清楚你個心，你會發現你係鍾意佢。//

我係鐘意小璇，但我同時都鐘意阿敏。

唔會失去阿敏，咁我應該可以放心、全力將心意投放俾小璇，當係為咗自己，為咗佢，為咗補償。

追返小璇，呢個係唯一選擇。

我不停同自己講，我愛小璇。

如果佢之後想上床，我又應該點做？

我戴返起阿敏除落嚟，由小璇送俾我嘅手錶，然後繼續係床上思考。

//我哋以後都會係青梅竹馬，無更多啦。//

阿敏咁講，其實已經無希望啦。

就將所有心機都投放係小璇身上。

我要收起啱啱發現，但一直存在、對阿敏嘅呢份感情。

我將對阿敏嘅感情定義做純性慾，我唔鐘意阿敏。

我咁樣催眠自己。

唔好咁呃自己啦，唔work㗎

星期六，我約咗小璇係坑口嘅TKO gateway嘅food court食嘢。（全黃店，有時間支持下。）

「對唔住。」小璇一坐低就道歉，呢樣係我始料不及。

「我先係應該講對唔住嗰個。」我答。

係因為我嘅半吊子先令到你唔開心。

「唔係。我同朋友傾過，我唔應該咁心急。佢哋同我講，男仔係唔愛惜個女仔先會一早出手，如果男仔係真心鍾意個女仔嘅話，佢哋唔會介意等。」小璇仲係哭腔。

唔係呢個原因。

「你咁心急，係咪因為你唔太感受到我鐘意你？」我問。

我好想確定呢樣嘢嘅答案。

「係。」小璇肯定。

「對唔住。」我又道歉。

「唔緊要。由一開始一齊嘅時候我已經知道你唔係太鐘意我，係我期望係拍拖之後你可以慢慢愛上我。」

小璇開始眼濕濕。

小璇由一開始就知道，但佢都想同我一齊。

「你嘅期望已經達到。」我講。

我已經落咗決定，之後嘅都係小璇嘅決定。

「吓？」小璇驚訝咁抬頭望住我

「我係呢半年已經鐘意咗你，係想同你拍拖嘅鐘意。我想同你去更多嘅地方。」

我同時發現自己鐘意阿敏，但又怕失去小璇。

又做仆街。

「真係？」小璇向我確認。

「真。所以，你可唔可以再做我女朋友？」

我已經選擇咗小璇，呢個星期我當係催眠自己，不停同自己講我鐘意小璇。

阿敏都叫我選擇呢條路，所以我唔會回頭。

對阿敏嘅心意我要收係心中，隨時間過去，對小璇嘅愛意會蓋過對阿敏嘅愛意，我相信。

最終，呢份心意只係收埋咗，並無消失。

而一個係未來嘅引爆點會將呢返心意從谷底抽返出嚟。

小璇一邊流淚一邊拖起我隻手：「好。」

佢流完眼淚同冷靜落嚟之後就話：「我哋可以慢慢嚟，只要按照屬於我哋嘅步伐去行就可以。」

我緊握小璇隻手：「我愛你。」

拍拖半年，我第一次同小璇講愛佢。

「我都係，我愛你。」小璇從一而終。

「我知道過去半年我俾唔到你想要嘅你，但係未來嘅日子我會慢慢令你感覺到我愛你。」我期望。

我又再講我愛你，可能我已成功愛上小璇，或者只係催眠嘅效果。

無論如何，我要同小璇展示嘅係我嘅決心，當係為咗佢，為咗阿敏，同為咗我自己。

就係咁我同小璇一齊返。

無激烈嘅衝突，無惡言相向，無長篇大論，一切都好平淡、好短促。

只係幾句對話我哋就一齊返。

一直係我背後嘅太陽從呢日起就好似無咁耀眼。

出咁多文無人講！？