300日浪遊到南極，直到世界盡頭（IV）

睇字都覺得辛苦

巴打呢幅有冇試，應該係泥黎，據聞可以醫肚痛水土不服，d鬼仔話味道唔錯

唔會爛最多出得慢

Arequipa最後嗰餐？個湯冇記錯$90港幣，一碗夠兩個人飲有突，啲龍蝦仲勁新鮮。成餐應該兩百蚊多啲

多謝支持

辛苦嘅嘢先好玩

冇試過，完全唔知咩嚟有冇話叫咩名堂，等我Check吓

行吓停吓，最後女神都頂唔順嘔咗出嚟今舖應該真係高反GG了。導遊見到都不斷搖頭歎息，叫我哋飲多啲水，一路行一路飲會冇咁唔舒服。其實女神都有飲水，不過唔掂就係唔掂，冇人想。我見噉嘅情況，都話不如行返轉頭抖吓唔好勉強，要知道每向前行多一步，陣間就要用返相同嘅時間回程。

但女神唔甘心，嘔完就堅持上路。我哋就行得比頭先更加慢，停得更加密。如是者，一路上佢嘔咗三次，終於用比預定多咗三倍嘅時間到咗練習嘅冰川。


去到首先要着冰爪。我嘅體力當時還好，但真係唔太適應咁凍的環境，有由頭睇到尾嘅巴絲打都知我真係好怕凍（特別推介睇返行Kilimanjaro：https://lihkg.com/thread/810593/page/1 ），我凍到連啲手指都唔係好郁到，所以着得好慢，但個導遊就喺度催，仲話頭先我哋已經行得好慢，再係噉天黑都唔使返山屋，喺度一齊凍死


練咗一陣點用冰爪斜斜哋咁沿住舊冰Z字型向上行，導遊就爬咗上去整條繩，教我點扣好晒啲安全繩之後再用冰斧爬冰。悲慘嘅女神自從到咗冰川，就直接坐埋一邊休息，連冰爪都冇着到，練都練唔到，而導遊亦都冇辦法，直接放棄咗佢。一路行過嚟嘅時候，其實我覺得導遊可以再做好啲，佢好多時都係催我哋行快啲，有時甚至用鬧人嘅方式屌我哋慢同廢，但就甚少鼓勵。女神係一個受軟唔受硬嘅人，噉樣屌法只會令佢完全唔想再行，結果嚟到佢都唔會再練點用啲工具，今日嘅訓練可以話完全失敗。


唔舒服又真係好慘，我離遠望到都好無奈當時我都深知聽日後日會行唔成。就算女神今晚返去休息完冇事，佢冇練過啲冰爪聽日都唔會行到，加上之後仲要爬升多成一千米，以今日嘅狀況去判斷根本唔應該繼續，我諗我都九成九會陪佢一齊返拉巴斯。既然係咁，就當呢個旅程係一個少少嘅攀冰體驗。所以我直接當咗呢個冰川係大佬去打，好好享受每一刻。


又暈又嘔嘅女神都不忘坐埋一邊影相，辛苦啦


一路爬嘅時候我都喺度諗，真係好難，手又攰腳又震，同平時唔使用任何工具就噉行山真係差好遠。就算比我照常出發，我又係咪真係可以上得到六千幾米嘅頂峰？


落返嚟就簡單好多，只要放鬆返個人好似瞓覺咁就自然會吊返落嚟。練多一兩次之後，都好似冇想像中咁辛苦，漸漸變得可以掌握。之後收返走啲繩，拆返啲裝備，就行返轉頭了。抖咗一陣女神都冇之前咁辛苦，起碼冇再嘔，總算喺日落之前返到山屋。


個景其實真係好靚，就算同南極比都唔過份，除咗我哋三個人再冇其他生物，配合埋惡劣嘅身體狀況別有一份淒涼。返到山屋後情況並冇太大嘅好轉。今晚嘅晚餐同晏晝一樣，都係嗰啲乾爭爭嘅雞飯同蕉，我自己都只係充饑噉食，但對於嘔咗幾次嘅女神嚟講，就食都食唔落，吞咗幾啖又想嘔。呢度最難嘅唔單止係要適應高海拔，而係一旦衰咗就好難恢復得到。除咗啲嘢難食，個廁所都核突到唔係人敢品，要係負數嘅溫度半露天噉用啲又臭又冇水嘅旱廁，連痾嘔都好唔暢快，對病嘅人真係生不如死。女神冇乜點食就去咗瞓覺，但呢度連枕頭都冇，要搵啲嘢塞滿個背囊當枕頭瞓，好唔舒服。見佢典來典去，一摸額頭，熱到好似火爐噉，原來已經發埋燒去到噉嘅情況都唔使再考慮，一定係即刻落山。唔係真係死喺Huanya Potosi都唔知咩事。點知導遊就話夜晚冇計，條山路連燈都冇，一定要聽朝先有車上嚟。即然係噉都冇得爭論，冇街燈佢夠膽揸我都唔夠膽搭。

餵佢食咗粒退燒藥，我就一路陪喺女神隔離。佢斷斷續續噉瞓得好差，我就直情成晚都瞓唔到，不斷諗返自己帶佢上嚟究竟係咪做錯。一齊旅行咗咁多個月，我應該判斷到佢嘅能力，而唔係為咗自己想玩就咩都唔理先啱。如果今次出咗咩事，喺玻利維亞呢啲地方可以點算？心中甚至出現一個念頭：話唔定呢個旅程真係嚟到尾聲，真係要完了。

冰川

樓主心痛死

不過都唔駛視為可惜既～ 玻利維亞唔係可以天空之鏡

好很正

有冇奇蹟

我成晚都唔敢瞓，亦都瞓唔着，好驚半夜發生咩事自己唔知。女神一直都額頭發滾，退唔到燒，感覺徘徊喺生死邊緣。死頂到第二朝，我就再叫導遊幫手Call車返歸，點知個導遊覺得唔需要，不停強調女神唔去可以留喺山屋，佢就同我爬完山再返山屋接返佢我話導遊你唔使擔心喎，我比咗錢就唔會預有得退，係我自願退出，你錢照收仲有多一日休息。但佢好似仲係唔信，唔知係咪遇得太多西客，始終好驚我返到去會反口要回水，不斷重覆冇得退冇得退。我話我知啦，拿拿林車我哋返拉巴斯喇，陣間女神有咩事唔慌唔回水入醫院


返到城市即刻就瞓。抖咗一兩日慢慢冇乜事，應該只係高反加埋行山辛苦先唔舒服。之後喺拉巴斯都冇再參加啲高體力嘅活動，主要喺市內遊吓。因為拉巴斯市內好多唔同嘅區可以相差幾百米海拔，呢度嘅居民好常用纜車嚟喺城市間穿梭。䌫車系統就好似佢哋嘅地鐵一樣，價錢亦都好親民，坐一程只係3Pesos（港幣三個幾）。


好鐘意遊車河坐喺上面望返落嚟，睇晒成個城市啲紅色屋仔。




啲䌫車車站都好新淨，同市內殘舊嘅建築唔一樣。唔知佢哋新站展綵嗰時有冇䌫車膠衝入去唱歌呢



日頭坐完夜晚又坐。夜晚除咗有夜景睇，最正就係冇乜人排隊，可以霸晒一個車廂架䌫車低空經過一啲民居嘅時候，仲可以聽到啲後生仔喺度Busking唱Despacito。我哋就好似坐喺一個VIP觀眾席，喺個私人包廂入面聽演唱會一樣。

當時都唔知道，原來喺街頭Busking嘅權利，並唔係每個地方都有。

都冇特別可惜，都係珍貴嘅回憶

冇了

So sweet

Lm 今個禮拜一返工嗰陣發現依個po 由1追 追到今日禮拜五就黎收工終於追到

多謝支持比個心理準備你，更得好慢

喺Huayna Potosi落山之後抖咗幾日，女神一直維持住唔太好嘅狀態，每日都係出街放吓風散一陣步就返房休息。睇嘅嘢都唔多，有兩三件小事可以紀錄吓。


有好幾日都懶得出去搵嘢食，直接喺住宿入面食埋。食食吓嘅時候聽到有其他人講廣東話，一問之下竟然又係嚟自澳門嘅情侶。自從識咗Toni同Nicole之後，一直都希望可以再識到啲啱傾嘅旅人，可以比當時無業，脫離社會嘅我哋圍爐取暖。有時同香港嘅朋友傾偈，會發現佢哋對旅程嘅內容冇乜興趣，講多兩講自己都冇乜癮。畢竟人大咗，你有你嘅生活，佢有佢嘅忙碌。正如我返緊工都未必想知其他人喺玻利維亞有咩趣事

呢對情侶除咗自己兩個，仲有啲屋企人一齊嚟玩，見佢哋成家咁多人反而冇乜意慾傾太多，簡簡單單打聲招呼交換咗Facebook就走了。佢哋個旅程都係秘魯玻利維亞為主，唔算長途，都冇乜旅遊資訊可以交換，之後亦都冇再聯絡只係睇Facebook先知佢哋後來生埋仔，唯有祝佢哋亂流下平安。


喺度食到冇嘢好食，除咗中餐同壽司，開始連韓國菜都諗起。拉巴斯有間由韓國人開嘅餐廳都幾受呢頭嘅亞洲人歡迎。我哋入到去都毫無違和感，老闆直接用韓文同我哋落單。


我就當然唔識聽，this this and this噉亂嗌一通就算。老闆話除咗韓國人，都幾多呢頭返工嘅日本人會嚟幫襯。其實喺南美，有啖湯飲吓就會好開心。我平時都麻麻哋啲酸酸辣辣嘅嘢，所以對韓國菜冇乜好感，但呢刻都覺得係美食嚟


有日行吓行吓，嚟到呢座相對出名嘅San Francisco教堂博物館，比廿蚊入去已經有埋導賞。導遊妹妹一開口就同我哋講普通話，我就話香港人唔係講普通話，講返英文得喇呢座教堂第一次起好係喺十六世紀，不過後來落雪落冧咗，重建完又經過好多次嘅收復改良先變咗今日呢個樣。



帶我哋成個教堂行咗一圈，睇吓啲秘道同埋欣賞吓迴郎設計，但我最有印象都係出面個花園嘅生果任摘。


拉巴斯市內都冇咩大力推廣嘅景點，呢個教堂同埋之前提過嘅吊車同女巫市場已經係最受歡迎嗰幾個。大部份嘅遊客都會將重點放喺市外，好似有條個名好勁嘅死亡之路，好多人會跟啲團踩單車，又有人會坐車去Rurrenabaque入亞馬遜雨林。但考慮到呢幾日嘅身體狀況，都係避免啲太用體力同冇得休息嘅活動。同埋過咗呢幾日，我覺得海拔太高嘅地方唔係好適合休息，經常行一陣就覺得好攰。我決定搭車落返一個低少少嘅地方，離開呢個唔經唔覺又住咗十日嘅城市。


Nadie estudia para hacer daño （冇人讀書讀嚟係為咗害人）

推

由拉巴斯向南坐車，嚟到玻利維亞嘅真正首都蘇克雷（Sucre）。


點解話係真正嘅首都呢？首都都有分真唔真？原來根據玻利維亞嘅憲法，法定首都係蘇克雷，但隨住越嚟越多人住喺拉巴斯，政府都跟住啲人搬埋過去，所以拉巴斯變咗玻利維亞嘅行政首都，亦係最多人住嘅城市。但講到歷史悠久，都係蘇克雷威啲。


蘇克雷有個外號，叫做「擁有四個名字的城市」（La Ciu­dad de los Cua­tro Nom­bres）。最原始嘅蘇克雷叫做Chu­qui­sa­ca（丘基薩卡），今時今日呢個變咗做蘇克雷所在省嘅省名，而因為呢度嘅原住民係查卡斯人（Char­cas），呢座城市亦一度被人叫做查卡斯。到咗西班牙人嚟到之後，發現玻利維亞波托西（Potosí）一帶有好大嘅銀礦，就將呢座喺隔離嘅山谷之城命名做La Plata（西班牙文意思指白銀）。啲西班牙人將呢度挖到嘅白銀運晒去菲律賓再同當時嘅明朝中國交易香料絲綢，再運返去墨西哥賣，仲好賺過誠哥。直至呢度成為南美洲第一個爆發反西班牙帝國統治革命嘅城市之後，先至用玻利維亞獨立後第一個總統嘅名蘇克雷作為呢個首都嘅稱號。


我哋嚟到呢個當年咁勁揪嘅城市，只係為咗抖抖（又再挑戰南美壽司）。蘇克雷海拔2800米，比起拉巴斯舒服好多。一落車嗰吓已經感覺到女神面色改善咗，似乎行山導致嘅問題已經解決咗，唔怪得成日都話高反最緊要就係第一時間落山呢度嘅氣候亦都唔錯，一年四季都係十零廿度，嚟咗兩日都係藍天白雲，同拉巴斯嗰種又乾又凍差好遠。有啲唔明點解玻利維亞人揀住拉巴斯唔揀呢度


呢度都有啲市集，冇咗女巫市場嗰啲核突屍乾，但都有啲古靈精怪嘅嘢。其中有一檔有個阿姨就買咗一疊唔知係咪溪錢，之後個老闆娘撒咗啲灰落個香爐度再拎個噹噹搖呀搖，個阿姨索完啲煙就好滿足噉笑了上網查咗一輪都唔係好搵到相關嘅介紹，應該都係一啲祈福嘅儀式，我諗中間個細路大咗應該會做到出色嘅巫師。


好記得嚟到蘇克雷嗰日係17年嘅12月31日。旅程中我冇特別去計劃邊啲日子要去到邊啲地方，如果有就唔會聖誕正日走去行山仲要行到差啲冇命除夕夜嚟到呢個可能好多人都冇聽過嘅名不經傳嘅城市，一切都只係偶然。夜晚十一點幾嘅時候，我問女神，不如落街散下步，好似好過喺房戇鳩鳩？出咗門口幾步就見到遠方有人射咗幾碌煙花上天，送走舊嘅一年。

我望住呢個唔靚得嚟但又有啲驚喜嘅煙花，數一數旅程已經嚟到第245日。好慶幸自己過咗咁刺激嘅2017年，亦好相信嚟緊嘅一年一定會更精采。雖然一路上都有起起伏伏，但整體嚟講都算順利。諗起Into The Wild戲入面嗰個出走嘅主角臨尾喺筆記度寫低嘅一句：Happiness is only real when shared。感激沿途有您。

恭喜樓主搵到個肯陪你上山下海既另一半，你應該好感激沿途有佢
繼續留名支持

人生的意義

推

再留名支持