300日浪遊到南極，直到世界盡頭（IV）

留名
一日之內由蒙古追到 Live

D衫冇消毒有冇比人鬧？

睇到最後真係登陸南極嗰下凳你感動

老婆話腰骨差咗，可能孭得太重，皮膚差咗，因為成日暴曬，腳板底又痛咗，醫生話佢行得太多有筋膜炎。

我就覺得個人有活力咗，嗰時去完返嚟唔使練都可以去坦桑尼亞行Kilimanjaro，同埋唔使返工一年啲腰骨仲好咗，返工要長企仲辛苦飲食其實都好好多，以前返工成日得半個鐘食飯又壞胃又成日食快餐冇營養，旅行我鐘意食幾耐就食幾耐食咩就食咩。

明明已經出晒太陽

其實佢主要都係驚對鞋有泥。啲衫本身都冇要我哋消毒

多謝支持罷完工冇咗班機之後搭得返我都好感動

船上面得88人，就好似以前返中學嘅兩三班同學，加上冇得上網冇任何外間嘅娛樂，好容易就會喺度講是非。所以即使三唔識七，只要喺船上面發生咗啲咩古怪事，好容易就會傳開去變咗人人都知，例如一上船時嗰個男人唔要同人同房而發難渣，或者邊個由阿拉斯加揸車一路玩到烏斯懷亞，甚至我哋撲特價船飛走上嚟，都好容易通天。着晒婚紗影相就自然唔使講，我哋好快就成為咗船上面嘅焦點。


好多人以為我哋係咪最近結咗婚，走嚟恭喜我哋。其中有個好玩得嘅船員仲扮埋企鵝同我哋慶祝都真係幾窩心。知道船上面有人咁啱呢幾日生日，佢就會負責搬個蛋糕出嚟叫大家一齊唱返首生日歌。成程船嘅氣氛好唔好真係全靠有人去帶動


差啲起哄叫埋個船長出嚟同我哋證婚但我都係比較傳統，正式結婚都係想返香港等埋家人見證好啲如果唔係或者會更加難忘都唔定。

點都好，呢一切我已經夠我回味一生啦。



第二日嘅朝早再次成功登陸，今次嘅地方有個好靚嘅名，叫做Paradise Bay，係一個阿根廷科研人員嘅基地嚟。上面嘅藍白藍圖案就係阿根廷嘅國旗。




同時亦係Gentoo Penguin嘅基地，不過因為季節問題，登陸呢度嘅企鵝暫時得好少，同尋日比較都冇咁壯觀。



天氣都冇尋日咁好，陰陰沉沉，冇咩陽光。留咗一陣就上返艇仔，走返轉Zodiac Cruise，睇吓呢帶嘅冰川。




如果話尋日係睇吓太陽底吓嘅有生氣嘅南極，今個朝早就係欣賞南極嘅蒼涼。


未見識到玻利維亞嘅天空之鏡之前，就先睇到南極嘅可能太凍，成架艇上面都冇人出聲，船員停咗個引擎比我哋感受吓萬籟俱寂嘅南極。啲風打埋嚟嘅時候，真係有種寒意，唔係單純嘅凍，而係覺得如果永遠留喺呢度，個心就有啲寒


周圍都係浮冰。


船員撈咗啲喺南極呢種環境獨有形成嘅冰上嚟，話因為冰裏面冇空氣，特別清瑩透澈，等陣用嚟襯Whiskey就一流。

轉頭上到船唔識飲都飲返杯先

舊冰好靚好想奶啖

應該好多人係特別日子去

lm

巴打都幾好記性，過左咁耐都仲記得

真係要打遊記，唔係好快會唔記得細緻位 同個種心情

食完晏冇耐船長就開廣播，話比大家聽有虎鯨喺附近出沒。全世界即刻湧晒出去睇吓見唔見到。


哎丫又真係有喎

呢日下晝就去咗Orne Island登陸，景就都係冰天雪地架啦，天氣亦唔係特別好，噉今次有咩唔同呢？原來係佢哋。


就係樣衰衰望咗過嚟嗰隻，下巴嗰度有條線嘅，叫做chinstrap penguin，真係幾盞鬼



都唔少得之前見過嘅Gentoo Penguin。


雖然都仲係好靚，不過都算係嚟咗好幾次，難免有啲大同小異嘅感覺悶悶哋，搞啲花臣氹吓女神。


用南極嘅萬年雪堆成嘅心，代表我對你嘅愛好似啲雪一樣咁恆久


講完呢句溫度即刻由負五度跌落負五十度，此地已不宜人類久留，冇咩事我上返船先。


返到上去之後，啲自認後生少少嘅話不如坐埋一齊玩巧有Feel，而六十路嗰啲叔叔姨姨就喺後面開一枱玩後生仔傾下偈究竟玩咩咁有Feel呢？原來係摺緊啲企鵝耳環


上得嚟呢架船嗰啲後生仔，全部都係玩咗好耐嘅長途旅遊撚嚟。教我摺企鵝嘅係一個來自哥倫比亞嘅女仔，佢同佢個瑞士男友用晒身上嘅盤川就係為咗上嚟呢架船，真係好似鐵達尼號咁浪漫。佢哋就係我之前喺Santa Marta見到嘅嗰種旅行人，一邊擺檔賣手工製品賺旅費一邊去玩，好撚犀利。究竟係咪哥倫比亞嘅人天生就有流浪嘅基因呢？

整到咁上下我就冇繼續。作為睇開曹永廉同蘇永康嘅後生仔，始終覺得後面嗰枱同我年齡近啲，咁啱佢哋又對我哋今朝影婚紗相嘅事跡好有興趣，就話比我哋加入佢哋做千禧五虎，一齊開心些牙。睇完我哋啲相，婆婆都話覺得好靚。原來佢哋都知道有個咁靚嘅位，我哋就問點解佢哋唔上嚟。點知佢話我哋成班老人家喺下面望上去，就風濕發作上唔到啦，唯有留喺下面，唔敢離開艇仔太遠。有人甚至落唔到艇，兩日都冇登陸過。原來對我嚟講好矮好輕而易舉上到嘅小雪山，對佢哋嚟講係咁遙遠。望住我哋啲相，佢輕輕嘆咗一句：I wish I could come here 20 years earlier.


或者唔係你哋遲咗嚟，而係我哋好幸運可以早二十年嚟到

樓主影相有冇進步過

樓豬

頭兩日已經睇晒呢幾日會見到嘅所有企鵝品種。之後嗰兩日，船公司都盡量比啲唔同嘅體驗我哋。


第三日去到Orne Harbour登陸，呢個地方地勢比較高，可以行吓山，行到某個位就滑雪滑返落山。


但體能要求比起前兩日更加高，對後生嘅人嚟講問題唔大，但啲老人家又要留喺下面仰望而上唔到嚟了


遙望我哋架船，仍然好似第一日啱啱嚟到時咁壯觀。


喺我哋欣賞緊風和日麗嘅景色嘅同時，啲船員就係船上面炮製緊阿根廷BBQ Asado，即係啲烤肉，一返到上船就聞到好撚香了


做唔到相機食先，咬兩啖先補返影


下晝去到Foyn Harbour，今次因為地勢問題，呢個地方唔會安排登陸，只會開艇仔喺附近兜吓風。不過登陸咗咁多次，大家當然唔介意，好多人知道今次唔使行反而更加開心。


呢度叫做Foyn Harbour，係因為100年前有架叫做Svend Foyn嘅船喺度捕鯨而命名。 後來有艘捕鯨嘅船喺度出事着晒火，搞唔掂就扔咗喺度，之後就成為咗呢度嘅景點。



有時都覺得好矛盾。由城市嚟到呢啲不毛之地，就係為咗睇吓遠離人類文明嘅嘢。但嚟到之後，又用返呢啲人為嘅建設嚟做返景點。不禁令人去諗究竟旅行係為咗睇啲咩？


大自然嘅力量好巨大，連呢啲廢鐵都可以孕育出強靭嘅生物。


雖然架廢船應該帶嚟咗啲污染，但都暫時無損呢度嘅環境。


嚟到旅程嘅尾聲，大家都開始檢視呢個南極之旅。雖然呢度嘅人全部都縱橫四海去過唔少地方，但都不約而同認為呢度嘅風景係世一。大家開始將自己去過嘅地方排名，有人話嚟呢度之前冰島第一，而家變咗第二。我冇刻意比較，只想好好記住呢幾日見到嘅畫面，好怕有一日自己會忘記

好似冇

推

追咗幾年post,終於到尾升啦
今次去唔到嘅，咪下次去返囉⋯⋯
最緊要有錢同時間

好睇

嚟到最後一日登陸南極嘅日子，最後一次會喺Barrientos Island嘅沙灘登陸。南極嘅沙灘同香港見開嗰啲唔同，係黑沙嚟。黑沙，天陰，加上臨別秋波，心情都有啲沉重。


真係好陰沉。我哋喺南極呢四日，大約有一半時間係晴天，一半時間係陰天，根據船公司嘅講法算係非常好彩。我都好慶幸喺第一日趁住好天完成咗女神嘅心願，如果拖到最後一日先嚟影，可能就冇機會了。


南極嘅天氣好變幻莫測，原來就算上到船，都仲有千千萬萬個機會令你登陸唔到，充滿遺憾。諗到呢度，不禁覺得自己雖然機票被取消，行李又寄失，但總算買到優惠船飛兼遇上好天氣，超額完成呢個南極之旅真係要多謝上天錫比我嘅運氣。


最後一個喺南極嘅活動係Polar Plunge，即係跳海。其實我都唔知邊個發明咁撚戇鳩嘅活動，啲水零度架大佬


但最戇鳩係我仲走去玩其實我份人好怕凍。有睇第一個Post就知我喺俄羅斯貝加爾湖落完水之後就凍到抽筋病咗幾日今次都唔好得去邊。落咗水一兩秒已經唔係好妥，啲手手腳腳嘅遠端神經麻痺晒，痛到返上船都未痛完。有一刻以為要切腳趾截肢。返到房淋咗好耐熱水先至恢復知覺

唔知點解女神跳得好開心，可能係見到我戇晒鳩覺得好過癮


跳埋海，代表住南極之旅真正步入尾聲。喺重新駛返入德雷克海峽之前，有一個簡單而隆重嘅儀式，就係船長會派證書比每一個遊客，以茲證明大家去過南極。


逐個逐個叫名出嚟，好似讀中學派成績表，唱下歌跳下舞，又幾過癮。


就係呢張證書，承惠四萬銀

傻啦。珍貴嘅係經歷同回憶，而唔係證書呀

終於要離開呢片依然神秘嘅大陸，返去南美洲。對於船上面好食好住，我哋好似已經習慣咗，唔知適唔適應得返原本飄泊嘅生活。理論上到咗南極，呢趟旅程都可以完結，但我似乎仲有好多地方想去，未捨得完結住。就係噉，我哋食埋粒暈浪藥，喺顛簸嘅大海中展開後半段嘅旅程

未到尾聲架繼續追

有品味